Isaya
27 Mu dyodya difuku, Yehova na kipete kyandi kyūmu, kikatampe kadi kikomo,+
Ukata mutyima kudi Leviatane,* nyoka usenena,
Kudi Leviatane, nyoka winyenga,
Kadi ukepaya kipangwa kikatampe kidi mu dijiba.
2 Mu dyodya difuku, mwimbilei* amba:
“Budimi bwa mañanza bwa vinyu itambija bifulwe!*+
Musangilanga mema kyaba kyonso.+
Mulamine bufuku ne dyuba,
Kutyina’mba muntu nansha umo wakamusanshija.+
Le i ani ukalwa nami na bimuna bya miba ne biyombo bityani mu bulwi?
Nkebityampa ne kwibyela mu mudilo abyo byonso pamo.
5 Shi bitupu, alamate ku kifuko kyami kikomejibwe.
Apwane nami;
Apwane nami.”
6 Mu mafuku āya’ko, Yakoba ukāla miji,
Isalela ukatōya maluba ne kushipuka,+
Kadi bakayuja ntanda na bipa.+
7 Le aye ufwaninwe kukupilwa bikupilwa bya yewa umukupila?
Nansha le ufwaninwe kwipaibwa pamo bwa mwatapilwe batapwe bandi?
8 Abe ukalwa nandi na lwanji luzakaja kitatyi kyokamupanga.
Ukamupepula na kupukuma kwandi kukalabale mu difuku dya kivula kya kutunduka.+
9 Mu uno muswelo kilubo kya Yakoba kikapūtwa,+
Kadi kitatyi kikatalulwa bubi bwandi, bino byo bipa byonso bikalupuka’ko:
Ukalonga mabwe onso a kisōkelo
Pamo bwa mpemba mivingakanibwe,
I kutupu bipanda bikola* nansha bisōkelo bya ensense bikashala.+
10 Mwanda kibundi kikomejibwe kikasalwa;
Madyo akavulaminibwa ne kulekibwa pamo bwa mu ntanda mutuputupu.+
Kyana kya ñombe kikadya ne kulāla’mo
Kadi kikadya misambo yandi.+
11 Kitatyi kikōma tumisambo twandi,
Bana-bakaji bakāya ne kwitutyumuna,
Kebabanza nato mudilo.
Mwanda bano bantu kebadipo na ñeni.+
O mwanda Mulongi wabo kakebafwilapo lusa,
Kadi Yewa webalongele kakebatōkelwapo mutyima.+
12 Mu dyodya difuku Yehova ukakukula bipa tamba ku milungu ya Munonga* kutūla ne ku Kinekaneka* kya Edipito,+ kadi mukakongakanibwa umo umo, banwe bantu ba Isalela.+ 13 Mu dyodya difuku kukelwa+ lusengo lukatampe, kadi boba boneka mu ntanda ya Ashidia+ ne boba bapalakene mu ntanda ya Edipito+ bakāya ne kwivukwila kudi Yehova mu lūlu lujila mu Yelusalema.+