Lwimbo lwa Kukanda Nalo.
121 Natulula meso ami ku ngulu.+
I kwepi kukatamba bukwashi bwami?
2 Bukwashi bwami butambanga kudi Yehova,+
Mulongi wa diulu ne ntanda.
3 Kakalekapo nansha dimo kulu kobe kushetemuke.+
Yewa mwine ukulamine kakakunukapo nansha dimo.
4 Tala! Kakakunukapo nansha dimo nansha kulāla tulo,
Yewa mwine ulamine Isalela.+
5 Yehova ukulamine.
Yehova i mwemba+ ku kuboko kobe kwa lundyo.+
6 Dyuba kedikakusōkapo mwinya,+
Nansha kweji bufuku.+
7 Yehova ukakulama ku bibi byonso.+
Ukalama būmi bobe.+
8 Yehova ukakulama mu byonso byolonga
Tamba pano ne nyeke.