Kupituluka mu Bijila
20 “Shi ubaenda kukalwa divita na balwana nobe, ubamone tubalwe twabo ne makalo ne bibumbo bya basola bavule kupita bobe, kokebatyina mwanda Yehova Leza obe mwine wakulupwile mu ntanda ya Edipito udi nobe.+ 2 Shi kosake kwenda ku bulwi, kitobo ukafwena ne kwisamba na bantu.+ 3 Ukebanena’mba, ‘A Isalela ivwana, pano kemwenda kukalwa na balwana nenu. Kemwakazozejai mityima. Kemwakebakwatwa moyo nansha kwibatuyuka nansha kwibazakala, 4 mwanda Yehova Leza wenu wendanga nenu kukemulwila na balwana nenu ne kwimupandija.’+
5 “Bemaniji nabo bakanena bantu amba, ‘Le i ani waubakile njibo mipya ino kashitwile’yo? Nabya ajokele ku njibo yandi. Shi bitupu ubwanya kufwa ku bulwi ino muntu mukwabo ukashitula’yo. 6 Kadi i ani wadimine budimi bwa mañanza ino kaangwile bipa byabo? Nabya ajokele ku njibo yandi. Shi bitupu ubwanya kufwa ku bulwi ino muntu mukwabo ukashilula kwangula bipa byabo. 7 Kadi i ani ukwatyīle mwana-mukaji ino kamutundaile? Nabya ajokele ku njibo yandi.+ Shi bitupu ubwanya kufwa ku bulwi ino muntu mukwabo ukamutundaila.’ 8 Kadi bemaniji bakepangula bantu amba, ‘Lelo i ani udi na moyo ne wa mutyima muzoze?+ Ajokele ku njibo yandi, kutyina’mba wakatyumuna mityima ya banababo pamo bwa aye.’*+ 9 Shi bemaniji abapu kwisamba na bantu, bakatonga bakata ba bibumbo bya divita ba kutangidila bantu.
10 “Shi ubafwena ku kibundi mwanda wa kulwa nakyo, ufwaninwe ne kwikisapwila binenwa bya ndoe.+ 11 Shi kibakulondolola bya ndoe ne kukushitwila bibelo, nankyo bantu bonso badi’mo bakekala bobe ba mingilo ya kuningilwa kadi bakakwingidila.+ 12 Ino shi kibapele kulonga nobe ndoe kekīya kulwa nobe, ukekitēkela kasāla, 13 bine Yehova Leza obe ukekipāna mu kuboko kobe, kadi ufwaninwe kwipaya na kipete mwana-mulume ense udi’mo. 14 Inoko, bana-bakaji, bana, bimunanwa, ne bintu byonso bidi mu kibundi, bitūtwa byakyo byonso, ukebitūta ke byobe,+ kadi ukadya bitūtwa bya balwana nobe bikupele Yehova Leza obe.+
15 “I namino mokalongela bibundi byonso bidi kulampe bininge na kodi, bibundi ke bya ino mizopo ya kubwipi. 16 Ino mu bibundi bya bano bantu, bikupa Yehova Leza obe bu bupyani, kufwaninwepo kuleka kintu nansha kimo kifoma kikale kyūmi.+ 17 Inoko, ukebonakanya fututu, bene Hiti, ne bene Amole, ne bene Kenani, ne bene Pedizi, ne bene Hivi, ne bene Yebushi,+ monka mwakusoñaninye Yehova Leza obe; 18 kutyina’mba bakakufundija kulonga bilongwa byabo byonso bya munyanji byobalongela baleza babo, bakulengeje ujilwile Yehova Leza obe.+
19 “Shi ubatēkela kibundi kasāla mwanda wa kwikikwata kadi ubalu nakyo ke mafuku mangi, kufwaninwepo konakanya mityi yakyo na kasolwa. Ukadya’ko ino kufwaninwepo kwiitēta.+ Mwanda le ukatēkela mityi ya mu ntanda kasāla pamo bwa muntu? 20 Ubwanya konakanya enka mutyi oyukile’mba keudibwangapo. Ubwanya kwiutēta ne kūbaka nao bingidilwa bya kasāla ka kibundi kilwa nobe enka ne byokipona.