Bilongwa bya Mafuku wa Bubidi
23 Mu mwaka wa busamba-bubidi, Yehoyada walonga bintu na bukankamane, weivwanika* na bakata ba tutwa,+ ko kunena’mba Azadia mwanā Yelohama, ne Ishemele mwanā Yehohanana, ne Azadia mwanā Obeda, ne Maaseya mwanā Adaya, ne Edishafata mwanā Zikidi. 2 Penepo baenda mu Yuda monso, babunga bene Levi+ ba mu bibundi byonso bya Yuda ne mitwe ya bisaka bya bashandya bene Isalela. Abo pa kwiya ku Yelusalema, 3 kipwilo kyonso kyasamba kipwano+ na mulopwe mu njibo ya Leza wa bine, kupwa webanena’mba:
“Talai! Mwanā mulopwe usa kubikala, monka mwalaile’kyo Yehova pa bana ba Davida.+ 4 Mufwaninwe kulonga namino: Mukabanya babitobo ne bene Levi bakengila+ mu dya Sabato mu bisumpi bisatu. Kisumpi kimo kikalama pa kibelo;+ 5 kikwabo kikekala ku njibo* ya mulopwe,+ ne kikwabo nakyo kikekala pa Kibelo kya Kyalwilo, kadi bantu bonso bakekala mu bipango bya njibo ya Yehova.+ 6 Kemwakalekai muntu nansha umo atwele mu njibo ya Yehova, poso’nka babitobo ne bene Levi bengilanga’mo.+ Abo babwanya kutwela mwanda i kisumpi kijila, kadi bantu bonso bakalama bibasoñenye Yehova. 7 Bene Levi bafwaninwe kujokoloka mulopwe mitamba yonso, muntu ne muntu na byabulwi byandi mu kuboko. Yewa ense utwela mu njibo ukepaibwa. Ikalai na mulopwe konso kwaenda.”*
8 Bene Levi ne Yuda ense balonga enka mwebasoñaninye kitobo Yehoyada. Penepo mukata ne mukata wasela bantu bandi badi bengila mu dya Sabato, pamo ne boba kebadipo bengila mu dya Sabato,+ mwanda kitobo Yehoyada katalwilepo bibumbo+ pa mingilo yabyo. 9 Kupwa kitobo Yehoyada wapa bakata ba tutwa+ mikobe ne mangabo matyematye* ne mangabo majokoloke byadi bya Mulopwe Davida,+ byadi mu njibo ya Leza wa bine.+ 10 Ebiya waimika bantu bonso, muntu ne muntu na kyabulwi kyandi mu kuboko, tamba ku mutamba wa lundyo wa njibo kutūla ne ku mutamba wa lunkuso wa njibo, dya ku kisōkelo ne dya ku njibo, bajokolokele mulopwe koku ne koku. 11 Penepo batambija mwanā mulopwe,+ bamuvwika kilukwa* ne Bukamoni,*+ bamubikika, kupwa Yehoyada ne bandi bana bamushinga māni. Kebanena’mba: “Mulopwe ufwa bununu!”+
12 Atadia pa kwivwana lunwa lwa bantu banyema koku batendela mulopwe, ponkapo waiya kwadi bantu ku njibo ya Yehova.+ 13 Ebiya wamona mulopwe wimene kwine’kwa dya ku kikomo kyandi pa kibelo. Bamfumu+ ne boba bēlanga bimpungidi badi na mulopwe, kadi bantu bonso ba ntanda badi basangale,+ bēla bimpungidi, ne batuimba badi bembija* mitendelo na byombanwa bya ñimbo. Ponkapo Atadia wasana bivwalwa byandi kadila’mba: “I kitumba! I kitumba!” 14 Ino kitobo Yehoyada watambija bakata ba tutwa, boba batongelwe kuludika kibumbo kya divita, kaebanena’mba: “Mutalulei ku milongo, kadi yewa ense usa kumulonda, mwipayei na kipete!” Mwanda kitobo wanenene amba: “Kemwakimwipailai mu njibo ya Yehova.” 15 Ebiya bamukwata, aye pa kufika pa Kibelo kya Tubalwe kya ku njibo* ya mulopwe, bamwipaididila ponka.
16 Ebiya Yehoyada wasamba kipwano pa bukata bwandi ne bantu bonso ne mulopwe, amba bendelele kwikala bantu ba Yehova.+ 17 Kupwa bantu bonso baiya ku njibo* ya Bāla beitūta,+ balalakanya bisōkelo byandi ne bankishi bandi,+ baipaila Matane kitobo wa Bāla+ kumeso kwa bisōkelo. 18 Penepo Yehoyada watūla bulami bwa njibo ya Yehova mu maboko a babitobo ne bene Levi, batūdilwe na Davida mu bibumbo pa njibo ya Yehova mwanda wa kulambula bitapwa bisōkwe bya Yehova+ mwendele byobya bilembelwe mu Bijila bya Mosesa,+ na nsangaji ne lwimbo, monka mwasoñaninye* Davida. 19 Waimikile ne batulama ba ku kibelo+ kubwipi na bibelo bya njibo ya Yehova, kutyina’mba muntu wa disubi dyo-dyonso wakatwela’mo. 20 Penepo wasela bakata ba tutwa,+ ne ba bulēme, ne baledi ba bantu, ne bantu bonso ba ntanda’ya, batambija mulopwe ku njibo ya Yehova. Ebiya bapityila pa kibelo kya pangala kyenda ku njibo* ya mulopwe, bashikatyija mulopwe pa lupona+ lwa bulopwe.+ 21 Penepo bantu bonso ba yoya ntanda basangala kadi kibundi kyaikala talala nyā, mwanda baipaile Atadia na kipete.