Kupituluka mu Bijila
30 “Shi bino binenwa byonso bibafikidila podi, dyese ne mafingo onatūla ku meso obe,+ nobe ubavuluka’byo*+ mu mizo yonso mwimukusankenya Yehova Leza obe,+ 2 kadi ubajokela kudi Yehova Leza obe+ ne kwivwana diwi dyandi na mutyima obe onso ne muya* obe onso,+ mwendele byonso byonkusoñanya dyalelo dino’di, abe ne bobe bana, 3 nabya Yehova Leza obe ukajokeja misungi yobe+ ne kukufwila lusa+ ne kukukongakanya tamba ku bantu bonso kwakupalakeninye Yehova Leza obe.+ 4 Nansha shi bantu bobe i bapalakanibwe kufika ne ku mfulo ya madiulu, Yehova Leza obe ukemukongakanya tamba kwine’kwa ne kwimujokeja.+ 5 Yehova Leza obe ukakutweja mu ntanda yayete bashobe, nobe ukeiyata ke yobe; kadi ukakwikadija biyampe ne kukuvudija bininge kupita bashobe.+ 6 Yehova Leza obe ukatōkeja* mutyima obe ne mutyima wa lutundu lobe,+ amba usanswe Yehova Leza obe na mutyima obe onso ne muya* obe onso ne kwikala mūmi.+ 7 Penepo Yehova Leza obe ukaletela balwana nobe ano mafingo onso, boba badi bakushikilwe ne kukupangapanga.+
8 “Penepo abewa ukajoka ne kwivwana diwi dya Yehova ne kulama mbila yandi yonso yonkusoñanya dyalelo dino’di. 9 Yehova Leza obe ukakwikadija biyampe mpata mu mingilo yonso ya makasa obe,+ ukavudija bobe bana ne bimunanwa byobe ne bipa bya nshi yobe, mwanda Yehova ukaloelelwa monka kukwikadija biyampe, monka mwaadi uloelelwe bakulutuba bobe.+ 10 Mwanda ukevwana diwi dya Yehova Leza obe ne kulama mbila yandi ne bitungo byandi bilembelwe mu uno mukanda wa Bijila, kadi ukajokela kudi Yehova Leza obe na mutyima obe onso ne muya* obe onso.+
11 “Ino mbila yonkusoñanya dyalelo dino’di ke mikomopo bininge kodi, nansha yokomenwa kufikila’po.*+ 12 Keidipo mūlu, mokanena’mba, ‘Le i ani le ukakanda mūlu kwituselela’yo, amba twiivwane ne kwiilama?’+ 13 Kadi keidipo bobwa bukila bwa dijiba, bokanena’mba, ‘I ani le ukabuka bobwa bukila bwa dijiba kwituselela’yo, amba twiivwane ne kwiilama?’ 14 Mwanda kinenwa kidi nobe pabwipi bininge, mu kyakanwa kyobe ne mu mutyima obe,+ amba ulonge’kyo.+
15 “Tala, natūla ku meso obe dyalelo dino’di būmi ne biyampe, ne lufu ne bibi.+ 16 Shi wivwane mbila ya Yehova Leza obe yonkusoñanya dyalelo dino’di, usanswe Yehova Leza obe,+ ne kunangila mu mashinda andi, ne kulama mbila yandi ne bitungo byandi ne mutyibilo wandi wa mambo, nankyo ukekala mūmi+ ne kwivudija, kadi Yehova Leza obe ukakwesela mu ntanda yoenda kukayata ke yobe.+
17 “Ino shi mutyima obe usāsuke,+ uleke kwivwana kadi ongolwe, kowivukwila kudi baleza bakwabo ne kwibengidila,+ 18 nemulombola dyalelo dino’di amba mukafwa binebine.+ Kemukekalapo bōmi kitatyi kilampe mu ntanda yoabukila Yodano kukeiyata ke yobe. 19 Nayata madiulu ne ntanda bu batumoni pomudi dyalelo dino’di amba natūla būmi ne lufu ku meso obe, dyese ne mafingo;+ ufwaninwe kutonga būmi amba wikale mūmi,+ abe ne lutundu lobe,+ 20 kusanswa Yehova Leza obe,+ kwivwana diwi dyandi, ne kumulamata,+ mwanda aye i būmi bobe kadi kupityila kudi aye ukalāla kitatyi kilampe mu ntanda yatyipile Yehova kupa’yo bakulutuba bobe, ba Abalahama, Izake, ne Yakoba.”+