Bilongwa bya Mafuku wa Bubidi
11 Lehaboma pa kufika mu Yelusalema, wakongakanya ponka na ponka njibo ya Yuda ne Benjemani,+ bantu ba bulwi bafundijibwe* 180 000, ba kulwa na Isalela mwanda wa kujokejeja Lehaboma bulopwe.+ 2 Kupwa kinenwa kya Yehova kyaiya kudi Shemaia+ muntu wa Leza wa bine, amba: 3 “Sapwila Lehaboma mwanā Solomone mulopwe wa Yuda ne Isalela ense mu Yuda ne mu Benjemani amba, 4 ‘Yehova wanena namino amba: “Kemufwaninwepo kukanda kukalwa na banabenu. Muntu ne muntu ajokele ku yandi njibo, mwanda ami ye walengeja kino kifike.”’”+ Ponkapo bakōkela kinenwa kya Yehova, bajoka ne kuleka baleka kukalwa na Yeloboame.
5 Lehaboma washikata mu Yelusalema kadi waubaka bibundi bikomejibwe mu Yuda. 6 Enka nenki waubaka* Betelema,+ Etame, Tekoa,+ 7 Bete-Zule, Soko,+ Adulama,+ 8 Ngata,+ Malesha, Zife,+ 9 Adolame, Lakishi,+ Azeka,+ 10 Zola, Aiyalone,+ ne Hebelona,+ bibundi bikomejibwe byadi mu Yuda ne mu Benjemani. 11 Kupwa waningisha bifuko bikomejibwe, watūla’mo ne bakatampe ba basola, waleta’mo ne byakudya ne māni ne vinyu, 12 kadi watūla mu bibundi byonso palapala mangabo makatampe ne mikobe; webiningisha bininge. Penepo Yuda ne Benjemani bashala nyeke bandi.
13 Babitobo ne bene Levi badi mu Isalela ense bekupa ku wandi mutamba, badi batamba ku bipindi byonso bya ntanda yabo. 14 Bene Levi bashiya madyo abo ne bupyani bwabo,+ baiya ku Yuda ne ku Yelusalema, mwanda Yeloboame ne bandi bana bebatalwile baleke kwingidila Yehova bu babitobo.+ 15 Penepo Yeloboame watonga babitobo bandi ba pa mitenta+ ne ba bandemona+ badi bwa bambuji* ne ba byana bya ñombe byaalongele.+ 16 Kadi boba ba ku bisaka byonso bya Isalela badi batele mutyima wabo ku kukimba Yehova Leza wa Isalela, bebalonda ku Yelusalema mwanda wa kulambula bitapwa kudi Yehova Leza wa bakulutuba babo.+ 17 Bakomeja mu myaka isatu bulopwe bwa Yuda ne kukwatakanya Lehaboma mwanā Solomone, mwanda banangīle mu dishinda dya Davida ne dya Solomone mu myaka isatu.
18 Kupwa Lehaboma wayata Mahalate mwanā Yedimote mwanā Davida kadi mwanā Abihaile mwana mwana-mukaji wa Ediabu+ mwanā Yese ke wandi mukaji. 19 Mwenda mafuku wamubutwila bana: Yeushi, Shemadia, ne Zahama. 20 Kupwa uno, wasonga Maka munkanā Abisalome.+ Mwenda mafuku nandi wamubutwila Abidya,+ Atai, Ziza, ne Shelomite. 21 Lehaboma wasenswe Maka munkanā Abisalome kupita bakaji bandi bakwabo bonso ne bakaji ba pafula,+ mwanda wasongele bakaji 18, ne bakaji ba pafula 60, kadi wabutwile bana bana-balume 28 ne bana-bakaji 60. 22 Ebiya Lehaboma watonga Abidya mwanā Maka ke mutwe ne mutangidiji umbukata mwa banababo, mwanda wadi usaka kumubikika. 23 Inoko, walonga bya ñeni, watuma* bandi bana bamo mu bipindi byonso bya ntanda ya Yuda ne Benjemani, ku bibundi byonso bikomejibwe,+ webapa byakudya bingi, webasongela ne bakaji bavule.