UMBADILO

1 Kadi Yehova wesamba na Mosesa mu ntanda mutuputupu ya Shinai,+ mu pema wa kubungakena’ko,+ mu difuku dibajinji dya kweji wa bubidi, mu mwaka wa bubidi abo ke batambe mu ntanda ya Edipito.+ Wamunena’mba: 2 “Balai+ kitango kyonso kya bene Isalela* umo ne umo* mwendele bisaka byabo, mwendele mobo a bashabo, mwendele bungi bwa majina a bana-balume bonso. 3 Abe ne Alone mukabala boba bonso badi na myaka kushilwila pa 20 kokanda+ mwendele bibumbo byabo* babwanya kwingila mu kibumbo kya divita mu Isalela.

4 “Yata’ko mwana-mulume umo mu kisaka ne kisaka; muntu ne muntu ufwaninwe kwikala mutwe wa njibo ya bashabo.+ 5 Ano’a o majina a bana-balume bakakukwasha’ko: ku kisaka kya Lubeni, Edizule+ mwanā Shedelu; 6 ku kya Shimioni, Shelumiele+ mwanā Zuleshadai; 7 ku kya Yuda, Nashona+ mwanā Aminadaba; 8 ku kya Isakala, Netanele+ mwanā Zuale; 9 ku kya Zebuluna, Ediabu+ mwanā Helona; 10 ku bana ba Yosefa: ku kya Efelaimi,+ Edishama mwanā Amihuda; ku kya Manase, Ngamadyela mwanā Pedazula; 11 ku kya Benjemani, Abidane+ mwanā Ngideone; 12 ku kya Dani, Ahiezele+ mwanā Amishadai; 13 ku kya Ashela, Pangiela+ mwanā Okolanu; 14 ku kya Ngade, Ediasafa+ mwanā Deuele; 15 ku kya Nafatale, Ahila+ mwanā Enani; 16 Bano’ba bo abo baityilwe mu kitango. I bamfumu+ ba bisaka bya bashabo, mitwe ya tununu twa Isalela.”+

17 Ebiya Mosesa ne Alone basela bano bana-balume batelelwe pa majina. 18 Bakongakanya kitango kyonso mu difuku dibajinji dya kweji wa bubidi amba babalwe mwendele dijina dya muntu ne muntu, kisaka, ne mwendele mobo a bashabo, kushilwila ku wa myaka 20 kokanda,+ 19 monka mobasoñaninye Mosesa kudi Yehova. Nandi webabala mu ntanda mutuputupu ya Shinai.+

20 Bana ba Lubeni, lutundu lwa umbedi wa Isalela,+ balembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda badi babwanya kwingila mu kibumbo kya divita babadilwe umo ne umo, 21 kadi bungi bwa babadilwe ku kisaka kya Lubeni i bantu 46 500.

22 Lutundu lwa Shimioni+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe umo ne umo, 23 kadi bungi bwa babadilwe ku kisaka kya Shimioni i bantu 59 300.

24 Lutundu lwa Ngade+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 25 kadi bungi bwa babadilwe ku kisaka kya Ngade i bantu 45 650.

26 Lutundu lwa Yuda+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 27 kadi bungi bwa babadilwe ku kisaka kya Yuda i bantu 74 600.

28 Lutundu lwa Isakala+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 29 kadi bungi bwa babadilwe ku kisaka kya Isakala i bantu 54 400.

30 Lutundu lwa Zebuluna+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 31 kadi bungi bwa babadilwe ku kisaka kya Zebuluna i bantu 57 400.

32 Lutundu lwa Yosefa, kupityila kudi Efelaimi+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 33 kadi bungi bwa babadilwe ku kisaka kya Efelaimi i bantu 40 500.

34 Lutundu lwa Manase+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 35 kadi bungi bwa babadilwe ku kisaka kya Manase i bantu 32 200.

36 Lutundu lwa Benjemani+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 37 kadi bungi bwa babadilwe ku kisaka kya Benjemani i bantu 35 400.

38 Lutundu lwa Dani+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 39 kadi bungi bwa babadilwe ku kisaka kya Dani i bantu 62 700.

40 Lutundu lwa Ashela+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 41 kadi bungi bwa babadilwe ku kisaka kya Ashela i bantu 41 500.

42 Lutundu lwa Nafatale+ lwalembelwe mwendele majina, kisaka ne mwendele mobo a bashabo. Bana-balume bonso kushilwila pa ba myaka 20 kokanda babwanya kwingila mu kibumbo kya divita babadilwe, 43 kadi bungi bwa babadilwe ku kisaka kya Nafatale i bantu 53 400.

44 Bano’ba bo babadilwe na Mosesa pamo ne Alone ne bamfumu 12 ba Isalela, mfumu ne mfumu wimanine njibo ya bashabo. 45 Bene Isalela bonso ba myaka kushilwila ku 20 kokanda badi babwanya kwingila mu kibumbo kya divita babadilwe mwendele njibo ya bashabo, 46 kadi bungi bwa bonso babadilwe i bantu 603 550.+

47 Inoko bene Levi+ kebabadilwepo pamo nabo mwendele kisaka kya bashabo.+ 48 Ebiya Yehova wanena Mosesa amba: 49 “Enka kisaka kya bene Levi kokabala’kyo, kadi kokatyanga bungi bwabo na bene Isalela bakwabo.+ 50 Ukatonga bene Levi ba kulama kipema kya Bukamoni+ ne bipungwa byakyo byonso ne bintu byakyo byonso.+ Bakasela kipema ne bipungwa byakyo byonso,+ bakengila’ko+ kadi bakashikata kufulakufula kwa kipema.+ 51 Kitatyi kyonso kikatalulwa kipema, bene Levi bakakonkola’kyo;+ kadi shi ke kwikikwika, bene Levi bakashimika’kyo; ino muntu ense kapelwepo lupusa* ufwena’ko ukepaibwa.+

52 “Mwine Isalela ense ukashimika pema wandi pa kifuko kimupelwe, muntu ne muntu mwendele bisaka byabo bisatu+ mungya bibumbo byabo.* 53 Kadi bene Levi bakashikata kufulakufula kwa kipema kya Bukamoni, kutyina’mba bakafītyilwa mutyima kitango kya bene Isalela,+ kadi bene Levi bakekala na kiselwa kya kulama* kipema kya Bukamoni.”+

54 Bantu ba Isalela balonga byonso byobasoñenye Mosesa kudi Yehova. Balonga enka nabya.

2 Penepo Yehova wesamba na Mosesa ne Alone amba: 2 “Bene Isalela bakatūla nkambi kokwa kupelwe kibumbo kyabo kya bisaka bisatu,+ muntu ne muntu kubwipi na lwembela* lwa njibo ya bashabo. Bakatūla nkambi batadidile ku pema wa kubungakena’ko, bamujokolokele.

3 “Boba bakatūla nkambi ku mutamba wa kutunduka, dya kutambanga dyuba, i bisaka bisatu bya nkambi ya Yuda mwendele bibumbo byabo;* mfumu wa bana ba Yuda i Nashona+ mwanā Aminadaba. 4 Boba babadilwe mu kibumbo kyandi kya divita i bantu 74 600.+ 5 Kisaka kya Isakala kikatūla nkambi pamo nandi; mfumu wa bana ba Isakala i Netanele+ mwanā Zuale. 6 Boba babadilwe mu kibumbo kyandi kya divita i bantu 54 400.+ 7 Kupwa ke kisaka kya Zebuluna; mfumu wa bana ba Zebuluna i Ediabu+ mwanā Helona. 8 Boba babadilwe mu kibumbo kyandi kya divita i bantu 57 400.+

9 “Boba bonso babadilwe mu bibumbo bya divita bya nkambi ya Yuda i bantu 186 400. Bakekala babajinji kutalula nkambi.+

10 “Bisaka bisatu bya nkambi ya Lubeni+ mwendele bibumbo byabo* bikekala dya kunshi; mfumu wa bana ba Lubeni i Edizule+ mwanā Shedelu. 11 Boba babadilwe mu kibumbo kyandi kya divita i bantu 46 500.+ 12 Kisaka kya Shimioni kikatūla nkambi pamo nandi; mfumu wa bana ba Shimioni i Shelumiele+ mwanā Zuleshadai. 13 Boba babadilwe mu kibumbo kyandi kya divita i bantu 59 300.+ 14 Kupwa ke kisaka kya Ngade; mfumu wa bana ba Ngade i Ediasafa+ mwanā Leuele. 15 Boba babadilwe mu kibumbo kyandi kya divita i bantu 45 650.+

16 “Boba bonso babadilwe mu bibumbo bya divita bya nkambi ya Lubeni i bantu 151 450, kadi bakekala ba bubidi kutalula nkambi.+

17 “Shi pema wa kubungakena’ko katalulwa,+ nkambi ya bene Levi ikekala pa bukata bwa mankambi makwabo.

“Bafwaninwe kwenda belonda muswelo umo onka na pa kutūla nkambi,+ pa kifuko wa kyandi wa kyandi, mwendele bibumbo byabo bya bisaka bisatu.

18 “Bisaka bisatu bya nkambi ya Efelaimi mwendele bibumbo byabo* bikekala dya kushika; mfumu wa bana ba Efelaimi i Edishama+ mwanā Amihuda. 19 Boba babadilwe mu kibumbo kyandi kya divita i bantu 40 500.+ 20 Kupwa aye kukekala kisaka kya Manase;+ mfumu wa bana ba Manase i Ngamadyela+ mwanā Pedazula. 21 Boba babadilwe mu kibumbo kyandi kya divita i bantu 32 200.+ 22 Kupwa ke kisaka kya Benjemani; mfumu wa kisaka kya Benjemani i Abidane+ mwanā Ngideone. 23 Boba babadilwe mu kibumbo kyandi kya divita i bantu 35 400.+

24 “Boba bonso babadilwe mu bibumbo bya divita bya nkambi ya Efelaimi i bantu 108 100, kadi bakekala ba busatu kutalula nkambi.+

25 “Bisaka bisatu bya nkambi ya Dani mwendele bibumbo byabo* bikekala dya kungala; mfumu wa bana ba Dani i Ahiezele+ mwanā Amishadai. 26 Boba babadilwe mu kibumbo kyandi kya divita i bantu 62 700.+ 27 Kisaka kya Ashela kikatūla nkambi pamo nandi; mfumu wa bana ba Ashela i Pangiela+ mwanā Okolanu. 28 Boba babadilwe mu kibumbo kyandi kya divita i bantu 41 500.+ 29 Kupwa ke kisaka kya Nafatale; mfumu wa bana ba Nafatale i Ahila+ mwanā Enani. 30 Boba babadilwe mu kibumbo kyandi kya divita i bantu 53 400.+

31 “Boba bonso babadilwe mu nkambi ya Dani i bantu 157 600. Bakekala ba mfulo kutalula nkambi,+ mwendele bibumbo byabo bya bisaka bisatu.”

32 Bano’ba bo bene Isalela babadilwe mwendele mobo a bashabo; bungi bwa bonso babadilwe mu mankambi mwanda wa kibumbo kya divita i bantu 603 550.+ 33 Inoko bene Levi kebabadilwepo+ pamo na bene Isalela bakwabo,+ monka mobasoñaninye Mosesa kudi Yehova. 34 Bene Isalela balonga bintu byonso byobasoñenye Mosesa kudi Yehova. E namino’u mobatūdile nkambi mwendele bibumbo byabo bya bisaka bisatu+ ne mobadi batalwila nkambi,+ enselele mungya kisaka ne mwendele mobo a bashabo.

3 Ino’i yo misuku* ya ba Alone ne Mosesa mu difuku dyesambile Yehova na Mosesa ku Lūlu lwa Shinai.+ 2 Ano’a o majina a bana ba Alone bana-balume: Nadaba umbedi, ne Abihu,+ Eleaza+ ne Itamala.+ 3 Ano’a o majina a bana ba Alone, babitobo bashingwe māni batūdilwe* kwingila bu babitobo.+ 4 Inoko, ba Nadaba ne Abihu bafwile ku meso a Yehova pobalambwile mudilo wampikwa kupebwa lupusa ku meso a Yehova+ mu ntanda mutuputupu ya Shinai, kadi kebaikelepo na bana. Ino ba Eleaza+ ne Itamala+ baendelela kwingila bu babitobo pamo na shabo Alone.

5 Penepo Yehova wanena Mosesa amba: 6 “Pityija kisaka kya Levi+ kumeso, wibemike ku meso a Alone kitobo, bamwingidile.+ 7 Bafwaninwe kuvuija biselwa byabo kudi aye ne ku kitango kyonso kumeso kwa pema wa kubungakena’ko na kuvuija mingilo yabo ya ku kipema. 8 Bakalama bingidilwa+ byonso bya pema wa kubungakena’ko ne kuvuija biselwa byabo ku bene Isalela na kwingila mingilo ya ku kipema.+ 9 Ukapāna bene Levi kudi Alone ne bandi bana. I bantu bapānwe, bamupelwe mu bene Isalela.+ 10 Ukatonga Alone ne bandi bana, nabo bakavuija mingilo yabo ya butobo,+ ino muntu ense kapelwepo lupusa* ufwena’ko, ukafikijibwa ku lufu.”+

11 Yehova wesamba monka na Mosesa amba: 12 “Tala! Amiwa nayata bene Levi mu bene Isalela pa kyaba kya bana babedi bonso* ba bene Isalela,+ bene Levi bakekala bami. 13 Mwanda mwana umbedi ense i wami.+ Difuku dyonakupile bana babedi bonso mu ntanda ya Edipito,+ nepandwidile bana babedi bonso ba Isalela tamba ku muntu kutūla ne ku nyema.+ Abo bakekala bami. Amiwa ne Yehova.”

14 Yehova wesamba monka na Mosesa mu ntanda mutuputupu ya Shinai+ amba: 15 “Bala bana ba Levi mwendele mobo a bashabo ne mwendele bisaka byabo. Ukabala bana-balume bonso kushilwila ku wa mweji umo kokanda.”+ 16 Penepo Mosesa webabala na kishima kya Yehova, monka mobamusoñaninye. 17 Ano’a o majina a bana ba Levi bana-balume: Ngelashona, Kohata, ne Meladi.+

18 Ino ano’a nao o majina a bana ba Ngelashona bana-balume mwendele bisaka byabo: Lebini ne Shimei.+

19 Bana ba Kohata bana-balume mwendele bisaka byabo i Amalama, Izala, Hebelona, ne Uziele.+

20 Bana ba Meladi bana-balume mwendele bisaka byabo i Maheli+ ne Mushi.+

Bino’bi byo bisaka bya bene Levi mwendele mobo a bashabo.

21 Kwa Ngelashona kwatambile kisaka kya bene Lebini+ ne kisaka kya bene Shimei. Bino’bi byo bisaka bya bene Ngelashona. 22 Bungi bwa babo bana-balume bonso kushilwila ku wa mweji umo kokanda babadilwe i bantu 7 500.+ 23 Bisaka bya bene Ngelashona byatūdile nkambi kunyuma kwa kipema+ dya kushika. 24 Mfumu wa njibo ya bashandya bene Ngelashona i Ediasafa mwanā Laele. 25 Kiselwa kya bana ba Ngelashona+ mu pema wa kubungakena’ko i kutala kipema ne pema,+ kya kupūta’po,+ ne kya kukinga*+ ku kibelo kya pema wa kubungakena’ko, 26 mampashila+ ayela ku kipango, kya kukinga*+ ku kibelo kya kipango kijokolokele kipema ne kisōkelo, myonji ya pema wakyo, ne mingilo yonso ya bino’bi.

27 Kwa Kohata kwatambile kisaka kya bene Amalama, ne kisaka kya bene Izala, ne kisaka kya bene Hebelona, ne kisaka kya bene Uziele. Bino’bi byo bisaka bya bene Kohata.+ 28 Bungi bwa bana-balume bonso kushilwila ku wa mweji umo kokanda i bantu 8 600; badi na kiselwa kya kutala kifuko kijila.+ 29 Bisaka bya bana ba Kohata byatūdile nkambi ku mutamba wa kunshi kwa kipema.+ 30 Mfumu wa njibo ya bashandya bisaka bya bene Kohata i Edizafana mwanā Uziele.+ 31 Kiselwa kyabo i kutala Sanduku,+ meza,+ kitūlwa-binanu,+ bisōkelo,+ bipungwa+ bingilwa nabyo mu kifuko kijila, kya kukinga’ko,*+ ne mingilo yonso ya bino’bi.+

32 Mfumu mukatampe wa bene Levi i Eleaza+ mwanā Alone kitobo, mwine wadi utala boba badi bavuija biselwa bya ku kifuko kijila.

33 Kwa Meladi kwatambile kisaka kya bene Maheli ne kisaka kya bene Mushi. Bino’bi byo bisaka bya Meladi.+ 34 Bungi bwa bana-balume bonso kushilwila ku wa mweji umo kokanda babadilwe i bantu 6 200.+ 35 Mfumu wa njibo ya bashandya bisaka bya Meladi i Zudiele mwanā Abihaile. Batūdile nkambi ku mutamba wa kungala kwa kipema.+ 36 Bana ba Meladi badi na kiselwa kya kutala makadelema+ a kipema, mikabo+ yakyo, bikomo+ byakyo, bitako byakyo bya mapuki, bipungwa+ byakyo byonso ne mingilo yonso ya bino’bi,+ 37 pamo ne bikomo byadi bijokolokele kipango ne bitako byabyo bya mapuki,+ ne bikomo bya pema, ne myonji ya pema.

38 Boba badi batūdile nkambi kumeso kwa kipema dya kutunduka, kumeso kwa pema wa kubungakena’ko dya kutambanga dyuba, i ba Mosesa ne Alone ne bandi bana. Badi na kiselwa kya kutala kipandulwe bu mwingilo wabo wa kwingidila bene Isalela. Muntu ense kapelwepo lupusa* ufwena’ko wadi wa kufikijibwa ku lufu.+

39 Bene Levi bonso bana-balume kushilwila ku wa mweji umo kokanda, babadilwe na ba Mosesa ne Alone mwendele bisaka byabo na kishima kya Yehova, i bantu 22 000.

40 Penepo Yehova wanena Mosesa amba: “Bala bana-balume bonso babedi ba bene Isalela kushilwila ku wa mweji umo kokanda,+ wibabale, ulembe ne majina abo. 41 Ufwaninwe kungatyila bene Levi—amiwa ne Yehova—pa kyaba kya bana babedi bonso ba bene Isalela,+ kadi yata banyema ba nja ba bene Levi pa kyaba kya bilala-ndá byonso bya banyema ba nja ba bene Isalela.”+ 42 Penepo Mosesa wabala bana babedi bonso ba mu bene Isalela, monka mwamusoñaninye Yehova. 43 Bungi bwa bana-balume bonso babedi babadilwe mwendele majina kushilwila ku wa mweji umo kokanda i bantu 22 273.

44 Yehova wesamba monka na Mosesa amba: 45 “Yata bene Levi pa kyaba kya bana babedi bonso ba mu bene Isalela, kadi yata banyema ba nja ba bene Levi pa kyaba kya banyema babo ba nja, bene Levi bafwaninwe kwikala bami. Amiwa ne Yehova. 46 Pa mwanda wa lupoto+ lwa kinkūlwa kya bana babedi 273 ba bene Isalela batabukile bungi bwa bene Levi,+ 47 ukayatyila muntu ne muntu mashekele* atano,+ mwendele shekele ya ku kifuko kijila.* Shekele imo i mangela* 20.+ 48 Ukapa Alone ne bandi bana lupeto’lwa bu lupoto lwa kinkūlwa kya boba bebatabukile bungi.” 49 Penepo Mosesa wayata lupeto lwa lupoto lwa bukūdi ku boba badi batabukile bungi bwa lupoto lwa kinkūlwa kya bene Levi. 50 Wayata lupeto ku bana babedi ba bene Isalela, mashekele 1 365, mwendele shekele ya ku kifuko kijila. 51 Penepo Mosesa wapa Alone ne bandi bana lupeto lwa lupoto lwa kinkūlwa mwendele binenwa* bya Yehova, monka mobasoñaninye Mosesa kudi Yehova.

4 Penepo Yehova wesamba na Mosesa ne Alone amba: 2 “Mukabala bana ba Kohata+ bana-balume mu bukata mwa bana ba Levi, mwendele bisaka byabo ne mobo a bashabo, 3 boba bonso ba myaka kushilwila ku 30+ kutūla ku 50+ badi mu kisumpi kipelwe kwingila mu pema wa kubungakena’ko.+

4 “Ino’i yo mingilo ya bana ba Kohata mu pema wa kubungakena’ko.+ I kintu kijila nakampata: 5 Alone ne bandi bana bakatwela kitatyi kitalulwa nkambi ne kutūkija mpashila+ ne kupūta’yo pa sanduku+ wa Bukamoni. 6 Bakatūla’po kya kupūta kya kiseba kya foke, baala’po kisandi kikomokomo kifītuluka ne kukwika’ko mitembo+ yandi ya kuselela’ko.

7 “Kadi bakāla kisandi kifītuluka pa meza a mikate milombolwe,+ bakatūla’po masāni ao, ne bitomeno, ne ngeso, ne mityibi ya kyamulambu kya bitomibwa;+ kyamulambu kya nyeke kya mikate+ kikashala’po. 8 Bakāla’po kisandi kityila pyā, bapūta’po kya kupūta kya kiseba kya foke ne kukwika’ko mitembo+ yao ya kuselela’ko. 9 Penepo bakayata kisandi kifītuluka bapūta kitūlwa-binanu+ kya kitōkeji pamo ne binanu+ byakyo, ne tunkwato* twakyo, ne bininga bya mudilo byakyo,+ ne bintu byonso bya māni bingidijibwa pa kwikilama. 10 Bakavunga’kyo ne bipungwa byakyo byonso mu kya kupūta kya kiseba kya foke bekitūla pa mutembo wa kuselela’ko. 11 Kadi bakāla kisandi kifītuluka pa kisōkelo kya olo,*+ bapūta’po kya kupūta kya kiseba kya foke, ne kukwika’ko mitembo+ yakyo ya kuselela’ko. 12 Ebiya bakayata bipungwa+ byonso bya mwingilo byobengilanga nabyo kyaba kyonso mu kifuko kijila, bebitūla mu kisandi kifītuluka ne kwibipūta kya kupūta kya kiseba kya foke, kupwa bebitūla pa mutembo wa kuselela’ko.

13 “Bakōlola buto* pa kisōkelo+ ne kwāla’po kisandi kya myoya ityilakana. 14 Bakatūla’po bipungwa byakyo byonso bingidijibwanga shi kebengila ku kisōkelo: bininga bya mudilo, nkanya, bipawa, ne ngeso, bipungwa byonso bya kisōkelo;+ kadi bakāla’po kya kupūta kya kiseba kya foke ne kukwika’ko mitembo+ yakyo ya kuselela’ko.

15 “Alone ne bandi bana bakapwa kupūta kifuko kijila+ ne bingidilwa byonso bya kifuko kijila shi bene Isalela kebataluka kwenda ku kifuko kikwabo. Penepo bana ba Kohata bakatwela kwibisela,+ ino kebafwaninwepo kutenga kifuko kijila kutyina’mba bakafwa.+ Bino bintu i kiselwa kya bana ba Kohata ku pema wa kubungakena’ko.

16 “Eleaza+ mwanā Alone kitobo ye udi na kiselwa kya kutala māni a kumunika nao,+ ensense ya mananshi,+ kyamulambu kya miseke kya nyeke, ne māni a kushinga.+ Aye ukatala kipema kyonso ne byonso bidi’mo, kubadila’mo ne kifuko kijila ne bipungwa byakyo.”

17 Yehova wesamba monka na Mosesa ne Alone amba: 18 “Kemwakalekai bisaka bya bene Kohata+ bityibwe’ko mu bukata mwa bene Levi. 19 Ino longai namino amba bekale nyeke bōmi ne kufwa mpika pa mwanda wa kufwena ku bintu bijila nakampata.+ Alone ne bandi bana bakatwela ne kupa muntu ne muntu mwingilo wandi ne byafwaninwe kusela. 20 Kebafwaninwepo kutwela bamone bintu bijila nansha’tu dimo, kutyina bakafwa.”+

21 Penepo Yehova wesamba na Mosesa amba: 22 “Ukabala bana ba Ngelashona+ bana-balume mwendele mobo a bashabo ne bisaka byabo. 23 Ukabala boba bonso ba myaka kushilwila ku 30 kutūla ku 50 badi mu kisumpi kipelwe kwingila mu pema wa kubungakena’ko. 24 Bino’bi byo bikapebwa bisaka bya bene Ngelashona kulama ne kusela:+ 25 Bakasela bisandi bya kipema,+ pema wa kubungakena’ko, kya kupūta kyandi ne kya kupūta kya kiseba kya foke kidi pangala pandi,+ kya kukinga* ku kibelo kya pema wa kubungakena’ko,+ 26 mampashila a kipango+ ayela, kya kukinga* ku kibelo kya kipango+ kijokolokele kipema ne kisōkelo, myonji yabyo ne bipungwa byabyo byonso ne bintu byonso bingilwanga nabyo. Uno’u o mwingilo wabo. 27 Mingilo yonso ne biselwa bya bene Ngelashona+ bikatalwa na Alone ne bandi bana bana-balume; ukebapa bino biselwa byonso bu mwingilo wabo. 28 Ino’i yo mingilo ikengila bisaka bya bene Ngelashona mu pema wa kubungakena’ko,+ kadi mingilo yabo ikendejibwa na Itamala+ mwanā Alone kitobo.

29 “Ino bana ba Meladi+ bana-balume, ukebabala mwendele kisaka ne njibo ya bashabo. 30 Ukebabala kushilwila ku wa myaka 30 kutūla ku 50, boba bonso badi mu kisumpi kipelwe mingilo ya pema wa kubungakena’ko. 31 Bino’bi e byobafwaninwe kusela+ mu mingilo yabo ya ku pema wa kubungakena’ko: makadelema+ a kipema, mikabo+ yakyo, bikomo+ byakyo, bitako bya mapuki+ byakyo; 32 bikomo+ bya kipango kijokolokele, bitako byabyo bya mapuki,+ bikomo byabyo,+ ne myonji yabyo pamo ne bingidilwa byabyo byonso ne mingilo yonso ya bino’bi. Ukebapa bingidilwa byobafwaninwe kusela mwendele majina abo. 33 E namino’u mukengidila bisaka bya bana ba Meladi+ ku pema wa kubungakena’ko, bendejibwa na Itamala mwanā Alone kitobo.”+

34 Ebiya Mosesa ne Alone ne bamfumu+ ba kitango babala bana ba bene Kohata+ mwendele bisaka byabo ne mwendele njibo ya bashabo, 35 boba bonso ba myaka kushilwila ku 30 kutūla ku 50 badi mu kisumpi kipelwe mingilo ya pema wa kubungakena’ko.+ 36 Bungi bwa bonso babadilwe mwendele bisaka byabo i bantu 2 750.+ 37 Bano’ba bo babadilwe mu bisaka bya bene Kohata, boba bonso badi bengila ku pema wa kubungakena’ko. Mosesa ne Alone bebabala na kishima kya Yehova kupityila kudi Mosesa.+

38 Bana ba Ngelashona+ bana-balume babadilwe mwendele bisaka byabo ne mwendele njibo ya bashabo, 39 boba bonso ba myaka kushilwila ku 30 kutūla ku 50 badi mu kisumpi kipelwe mingilo ya pema wa kubungakena’ko. 40 Bungi bwa bonso babadilwe mwendele bisaka byabo ne mwendele njibo ya bashabo i bantu 2 630.+ 41 Bino’bi byo bisaka bya bana ba Ngelashona bana-balume byabadilwe, boba bonso badi bengila ku pema wa kubungakena’ko. Mosesa ne Alone bebabala na kishima kya Yehova.+

42 Bana ba Meladi babadilwe mwendele bisaka byabo ne mwendele njibo ya bashabo, 43 boba bonso ba myaka kushilwila ku 30 kutūla ku 50 badi mu kisumpi kipelwe mingilo ya pema wa kubungakena’ko.+ 44 Bungi bwa bonso babadilwe mwendele bisaka byabo i bantu 3 200.+ 45 Bino’bi byo bisaka bya bana ba Meladi bana-balume byabadilwe, babadilwe na Mosesa ne Alone na kishima kya Yehova kupityila kudi Mosesa.+

46 Mosesa ne Alone ne bamfumu ba Isalela babala bano bene Levi bonso mwendele bisaka byabo ne mwendele mobo a bashabo; 47 badi na myaka kushilwila ku 30 kutūla ku 50, kadi bonso bapelwe kwingila ne kusela biselwa ku pema wa kubungakena’ko.+ 48 Bungi bwa bonso babadilwe i bantu 8 580.+ 49 Babadilwe na kishima kya Yehova kupityila kudi Mosesa, enselele mwendele mingilo yandi yapelwe ne kiselwa kyandi; babadilwe monka mobasoñaninye Mosesa kudi Yehova.

5 Yehova wesamba monka na Mosesa amba: 2 “Soñanya bene Isalela batambije mu nkambi muntu ense wa makopo+ ne yewa ense udi na bimusūma+ ne yewa ense mwisubije na muntu* mufwe.+ 3 Ekale mwana-mulume nansha mwana-mukaji, mukebatambija. Mukebatambija panja pa nkambi, kutyina’mba bakasambwila’o+ bantu bongikele mu bukata mwabo.”+ 4 Penepo, bene Isalela balongela monka, bebatambija panja pa nkambi. Monka mobalombwedile Mosesa kudi Yehova, e monka mwalongēle bene Isalela.

5 Yehova wesamba na Mosesa monka’mba: 6 “Lombola bene Isalela amba, ‘Shi mwana-mulume nansha mwana-mukaji walonga bubi bo-bonso buloñanga muntu kadi walonga bilongwa byampikwa kikōkeji kudi Yehova, yao muntu* wapi mambo.+ 7 Ufwaninwe* kukesapula+ bubi bwalongele* ne kwaluja bintu byonso bya kufuta mwanda wa mambo andi kupwa wabweja’ko ne kipindi kimo kya pa bipindi bitano kya bulēme bwakyo;+ ukapa’kyo yewa walubīle. 8 Ino shi yewa obalubīle kadipo na mubutule wa pabwipi wa kutambula mfutwa’ya, ikajokejibwa kudi Yehova nayo ikekala ke ya kitobo, kutalula’mo mukōko mulume wa kupūta bubi wakamupūtyila nao bubi.+

9 “‘Kyabuntu kyonso kijila+ kya bene Isalela kiletelwe kudi kitobo kikekala ke kyandi.+ 10 Bintu bijila bya muntu ne muntu bikekala nyeke byandi aye mwine. Kintu kyonso kyobapa kitobo kudi muntu, kikekala ke kya kitobo.’”

11 Yehova wesamba monka na Mosesa amba: 12 “Wisambe na bene Isalela wibasapwile amba, ‘E namino’u mukalongelwa mukaja muntu shi wasāsuka kadi wamutomboka 13 walāla na mwana-mulume mukwabo,+ ino wandi mulume kuyuka’o mpika kadi mwanda’wa keuyukenepo, wesubija aye mwine inoko kekudipo kamoni nansha umo wa kumusapula kadi kebamukwetepo: 14 Shi mulume waikala na mukao kafwatakanya’mba wandi mukaji watomboka pa kwisubija aye mwine, nansha shi mulume udi na mukao kafwatakanya’mba wandi mukaji watomboka aye’ko kwisubija mpika, 15 mulume ufwaninwe kuselela wandi mukaji kudi kitobo, pamo ne kyamulambu kya mukaji, kipindi kimo kya pa bipindi dikumi bya efa* wa bukula bwa mebele a buluba. Kafwaninwepo kutūta’po māni nansha kwela’po ensense itōka, mwanda i kyamulambu kya miseke kya mukao, kyamulambu kya miseke kivuluja mambo.

16 “‘Kitobo ukamupityija kumeso wamwimika ku meso a Yehova.+ 17 Kitobo ukayata mema ajila mu kintu kya dilongo, kadi kitobo ukayata’ko luvumbi panshi mu kipema waela’lo mu mema’a. 18 Kadi kitobo ukemika mwana-mukaji’wa ku meso a Yehova, wakutulula nywene ya mwana-mukaji’wa kupwa waela mu makasa andi kyamulambu kya miseke bu kivulujo, ko kunena’mba, kyamulambu kya miseke kya mukao,+ kadi kitobo ukekala na mema alula mu kuboko kwandi, oa aleta mafingo.+

19 “‘Ebiya kitobo ukamutyipija, kanena mwana-mukaji amba: “Shi kulēlepo na mwana-mulume mukwabo abe papo mu lupusa lwa obe mulume+ kadi kusāsukilepo ne kwisubija abe mwine, nankyo ano mema alula aleta mafingo keakikulonga kibi. 20 Ino shi wasāsukile abe papo mu lupusa lwa obe mulume ne kwisubija abe mwine, ne walēle na mwana-mulume mukwabo+ ke obe mulumepo—” 21 Ebiya kitobo ukatyipija mwana-mukaji’wa mutyipo udi’mo mafingo, kadi kitobo ukanena mwana-mukaji’wa amba: “Yehova akwalamune kodi kintu kya mafingo ne kya mutyipo mu bantu bobe, Yehova pasa kuponeja* ditangatanga* dyobe ne kuyuja difu dyobe. 22 Ano mema aleta mafingo akatwela mu milá yobe ayuje difu dyobe ne kuponeja* ditangatanga* dyobe.” Ponkapo mwana-mukaji nandi ukanena’mba: “Amena! Amena!”*

23 “‘Ebiya kitobo ukalemba ano mafingo mu mukanda kupwa weakenda mu mema alula. 24 Penepo ukatomeja mwana-mukaji mema alula aleta mafingo’a, mema aleta mafingo nao akatwela munda mwandi ne kuleta bululu. 25 Kadi kitobo ukayata kyamulambu kya miseke kya mukao+ ku kuboko kwa mwana-mukaji’wa, kupwa wapēpeja kyamulambu kya miseke koku ne koku ku meso a Yehova, kadi ukekifwenya kubwipi na kisōkelo. 26 Kitobo ukatapula mukono umo wa kyamulambu kya miseke bu kyamulambu kya kyeya ne kwikisōka pa kisōkelo,+ kupwa ukatomeja mwana-mukaji’wa mema. 27 Pamutomeja mema, shi mwana-mukaji’wa wesubije aye mwine ne kulonga kilongwa kya kutomboka wandi mulume, mema aleta mafingo akatwela munda mwandi aikala ke kintu kilula, kadi difu dyandi dikayula, ne ditangatanga* dyandi nadyo dikapona,* kadi mwana-mukaji’wa ukekala ke kintu kya mafingo umbukata mwa bantu bandi. 28 Inoko, shi mwana-mukaji kesubijepo aye mwine kadi i utōka, nankyo kafwaninwepo kupebwa ino mfuto, kadi ukabwanya kwimita ne kubutula lutundu.

29 “‘Kino’ki kyo kijila kitala mukao,+ shi mwana-mukaji wasāsuka ne kwisubija aye mwine aye papo mu lupusa lwa wandi mulume, 30 nansha shi mwana-mulume waikala na mukao kafwatakenya wandi mukaji amba watomboka; ukemika wandi mukaji ku meso a Yehova, kitobo nandi ufwaninwe kufikidija kwadi kino kijila kyonso. 31 Mwana-mulume ukekala wampikwa mambo, ino wandi mukaji ukapebwa mfuto ya mambo andi.’”

6 Yehova wesamba monka na Mosesa amba: 2 “Wisambe na bene Isalela wibalombole amba, ‘Shi mwana-mulume nansha mwana-mukaji wapika mpiko ya pa bula ya kwikala bu mwine Nazila*+ kudi Yehova, 3 ukelama ku vinyu ne bitomibwa bikwabo bikolwañana. Kafwaninwepo kutoma busuku busosoma bwa mañanza nansha busuku busosoma bwa kintu kyo-kyonso kikolwañana.+ Kafwaninwepo kutoma bitomibwa byonso bya mañanza, nansha kudya mañanza kwine, ekale mabishi nansha mōmu. 4 Mafuku onso a bu mwine Nazila bwandi kafwaninwepo kudya kintu kyonso kya ku muñanza, tamba ku mañanza ampikwa kwela kutūla ne ku bipusu.

5 “‘Mafuku onso a mpiko ya bu mwine Nazila bwandi bwembe kebukapitepo ku mutwe wandi.+ Ukekala nyeke ujila na kuleka nywene ya ku mutwe wandi itame kufika ne bipwa mafuku andi a kutūlwa pafula mwanda wa Yehova. 6 Kafwaninwepo kufwena* muntu* mufwe mu mafuku onso atūdilwe pafula mwanda wa Yehova. 7 Nansha shi shandi, nansha inandi, nansha mwanabo mwana-mulume, nansha mwanabo mwana-mukaji wafu, kafwaninwepo kwisubija,+ mwanda kiyukeno kya bu mwine Nazila bwandi kudi Leza wandi kidi pa mutwe wandi.

8 “‘I ujila kudi Yehova mafuku onso a bu mwine Nazila bwandi. 9 Ino shi muntu wafu mu kitulumukila kubwipi nandi+ kadi wasubija nywene ilombola’mba i mutūlwe pafula mwanda wa Leza,* ufwaninwe kutenda mutwe wandi+ mu difuku dyatelwa bu utōka. Ukatenda’o mu difuku dya busamba-bubidi. 10 Mu difuku dya mwānda, ukaleta tukutyikutyi tubidi nansha bibondya bya bankunda bibidi kudi kitobo ku kibelo kya pema wa kubungakena’ko. 11 Kitobo ukalongolola kamo bu kyamulambu kya bubi, kakwabo nako bu kyamulambu kisōkwe, ne kumupūtyila bubi bwandi+ butala muntu* mufwe. Kupwa ukapandula mutwe wandi mu difuku’dya. 12 Kadi ufwaninwe kwitūla monka pafula mwanda wa Yehova mu mafuku a bu mwine Nazila bwandi, ukaleta mukōko mulume mwana wa mwaka umo ne kwika bu kyamulambu kya mambo. Inoko, mafuku mabajinji keakabalwapo mwanda wasubije bu mwine Nazila bwandi.

13 “‘Kino’ki kyo kijila kitala mwine Nazila: Shi wabwanya mafuku a bu mwine Nazila bwandi,+ ukaselelwa ku kibelo kya pema wa kubungakena’ko. 14 E kwafwaninwe kuleta kyamulambu kyandi kudi Yehova: mukōko mulume umo mwana wampikwa bulēma wa mwaka umo ne kwika bu kyamulambu kisōkwe,+ kana ka mukōko kakaji kampikwa bulema ka mwaka umo ne kwika bu kyamulambu kya bubi,+ mukōko mulume umo wampikwa bulema bu kitapwa kya kipwano,+ 15 kilala kya mikate yampikwa kiyujo idi bwa ntonto ya bukula bupēla myele’ko māni, tumikate tupapakane twampikwa kiyujo twele’ko māni, ne kyamulambu kyabyo kya miseke+ ne byamulambu byabyo bya bitomibwa.+ 16 Kitobo ukaleta’byo ku meso a Yehova kadi ukalambula kyamulambu kyandi kya bubi ne kyamulambu kyandi kisōkwe. 17 Ukalambula mukōko mulume bu kitapwa kya kipwano kudi Yehova pamo ne kilala kya mikate yampikwa kiyujo, kadi kitobo ukaleta kyamulambu kyakyo kya miseke+ ne kyamulambu kyakyo kya bitomibwa.

18 “‘Penepo mwine Nazila ukatendela pa kibelo kya pema wa kubungakena’ko nywene ya ku mutwe wandi*+ yampikwa kutendwa, kupwa ukayata nywene ya ku mutwe wandi yamenene mu kitatyi kya bu mwine Nazila bwandi ne kwiyela mu mudilo udi munshi mwa kitapwa kya kipwano. 19 Kitobo ukayata kidyoma kitēke+ kya kuboko kwa mukōko mulume, ne mukate umo wampikwa kiyujo udi bwa lutonto mu kilala, ne kamukate kamo kapapalale kampikwa kiyujo, webitūla mu maboko a mwine Nazila aye pa kupwa kutenda kiyukeno kya bu mwine Nazila bwandi. 20 Kitobo ukapēpeja’byo koku ne koku bu kyamulambu kya kupēpeja ku meso a Yehova.+ I kintu kijila kya kitobo, pamo ne lukudi* lwa kyamulambu kya kupēpeja ne kulu kwa kyabuntu.+ Kupwa, mwine Nazila ubwanya kutoma vinyu.

21 “‘Kino’ki kyo kijila kitala mwine Nazila+ upika mpiko: Shi wapika mpiko ne ubwanya kusokola kya kulambula kudi Yehova kitabukile byobya bilombelwe mu bu mwine Nazila bwandi, nankyo ufwaninwe kufikidija mpiko yandi mwendele kijila kya bu mwine Nazila bwandi.’”

22 Penepo Yehova wanena Mosesa amba: 23 “Lombola Alone ne bandi bana’mba, ‘E namino’u momukeselela+ bantu ba Isalela. Mwibanenei amba:

24 “Yehova akwesele dyese+ kadi akulame.

25 Yehova eñenye mpala yandi podi,+ kadi akutōkelwe mutyima.

26 Yehova abandwile mpala yandi kodi kadi akupe ne ndoe.”’+

27 Bafwaninwe kutūla dijina dyami pa bantu ba Isalela,+ amba nebesele dyese.”+

7 Difuku dyapwile Mosesa kushimika kipema,+ wekishingile māni+ ne kwikipandula, pamo ne bingidilwa byakyo byonso, kisōkelo, ne bipungwa byakyo byonso.+ Aye pa kushinga bino bintu byonso māni ne kwibipandula,+ 2 bamfumu ba Isalela,+ mitwe ya mobo a bashabo balambula kyamulambu. Bano bamfumu ba bisaka baimanine mwingilo wa kubala bantu 3 baselele ku meso a Yehova kyabuntu kyabo kya makalo asamba mapūte ne bañombe 12, dikalo dimo bamfumu babidi ne ñombe umo umo ku muntu; bebaleta kumeso kwa kipema. 4 Yehova wanena Mosesa amba: 5 “Wibatambule’byo, mwanda bikengidijibwa ku mingilo ya pema wa kubungakena’ko, kadi ukapa’byo bene Levi, umo ne umo mungya bisakwa mu mingilo yandi.”

6 Penepo Mosesa watambula makalo ne bañombe, wapa’byo bene Levi. 7 Wapa bana ba Ngelashona makalo abidi ne bañombe baná, mungya byadi bisakwa mu mingilo yabo;+ 8 wapa ne bana ba Meladi makalo aná ne bañombe mwānda, mungya byadi bisakwa mu mingilo yabo, yendejibwa na Itamala mwanā Alone kitobo.+ 9 Ino kapelepo bana ba Kohata kintu mwanda mingilo yabo yadi ya kwingila mu kifuko kijila,+ kadi badi basela bintu bijila pa mapuji abo.+

10 Ponkapo bamfumu balambula kyamulambu kyabo pa kufikidija*+ kisōkelo mu difuku dyokyashingilwe māni. Bamfumu pa kuleta kyamulambu kyabo ku meso a kisōkelo, 11 Yehova wanena Mosesa amba: “Mfumu umo ku difuku, mafuku onso alonda’ko, ukaleta kyamulambu kyandi mwanda wa kufikidija kisōkelo.”

12 Yewa waletele kyamulambu kyandi mu difuku dibajinji i Nashona+ mwanā Aminadaba wa ku kisaka kya Yuda. 13 Kyamulambu kyandi kyadi kya nsāni umo wa ndalama ulēma mashekele* 130 ne lweso lumo lwa ndalama lulēma mashekele 70 mwendele shekele ya ku kifuko kijila,*+ onso abidi mayule bukula bupēla bwele’ko māni bwa kyamulambu kya miseke;+ 14 kitomeno* kimo kya olo kilēma mashekele 10, kiyule ensense; 15 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 16 mbuji mwana umo wa kyamulambu kya bubi;+ 17 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Nashona mwanā Aminadaba.+

18 Mu difuku dya bubidi, Netanele+ mwanā Zuale, mfumu wa kisaka kya Isakala, walambula kyamulambu. 19 Waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 20 kitomeno kimo kya olo kilēma mashekele 10, kiyule ensense; 21 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 22 mbuji mwana umo wa kyamulambu kya bubi;+ 23 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Netanele mwanā Zuale.

24 Mu difuku dya busatu, mfumu wa bana ba Zebuluna, Ediabu+ mwanā Helona, 25 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 26 kitomeno kimo kya olo kilēma mashekele 10, kiyule ensense; 27 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 28 mbuji mwana umo wa kyamulambu kya bubi;+ 29 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Ediabu+ mwanā Helona.

30 Mu difuku dya buná, mfumu wa bana ba Lubeni, Edizule+ mwanā Shedelu, 31 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 32 kitomeno kimo kya olo kilēma mashekele 10, kiyule ensense; 33 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 34 mbuji mwana umo wa kyamulambu kya bubi;+ 35 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Edizule+ mwanā Shedelu.

36 Mu difuku dya butano, mfumu wa bana ba Shimioni, Shelumiele+ mwanā Zuleshadai, 37 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 38 kitomeno kimo kya olo kilēma mashekele 10, kiyule ensense; 39 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 40 mbuji mwana umo wa kyamulambu kya bubi;+ 41 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Shelumiele+ mwanā Zuleshadai.

42 Mu difuku dya busamba, mfumu wa bana ba Ngade, Ediasafa+ mwanā Deuele, 43 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 44 kitomeno kimo kya olo kilēma mashekele 10, kiyule ensense; 45 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 46 mbuji mwana umo wa kyamulambu kya bubi;+ 47 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Ediasafa+ mwanā Deuele.

48 Mu difuku dya busamba-bubidi, mfumu wa bana ba Efelaimi, Edishama+ mwanā Amihuda, 49 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 50 kitomeno kimo kya olo kilēma mashekele 10, kiyule ensense; 51 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 52 mbuji mwana umo wa kyamulambu kya bubi;+ 53 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Edishama+ mwanā Amihuda.

54 Mu difuku dya mwānda, mfumu wa bana ba Manase, Ngamadyela+ mwanā Pedazula, 55 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 56 kitomeno kimo kya olo kilēma mashekele 10, kiyule ensense; 57 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 58 mbuji mwana umo wa kyamulambu kya bubi;+ 59 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Ngamadyela+ mwanā Pedazula.

60 Mu difuku dya kitema, mfumu+ wa bana ba Benjemani, Abidane+ mwanā Ngideone, 61 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 62 kitomeno kimo kya olo kilēma mashekele 10, kiyule ensense; 63 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 64 mbuji mwana umo wa kyamulambu kya bubi;+ 65 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Abidane+ mwanā Ngideone.

66 Mu difuku dya dikumi, mfumu wa bana ba Dani, Ahiezele+ mwanā Amishadai, 67 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 68 kitomeno kimo kya olo kilēma mashekele 10, kiyule ensense; 69 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 70 mbuji mwana umo wa kyamulambu kya bubi;+ 71 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Ahiezele+ mwanā Amishadai.

72 Mu difuku dya 11, mfumu wa bana ba Ashela, Pangiela+ mwanā Okolanu, 73 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 74 kitomeno kimo kya olo kilēma mashekele 10, kiyule ensense; 75 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 76 mbuji mwana umo wa kyamulambu kya bubi;+ 77 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Pangiela+ mwanā Okolanu.

78 Mu difuku dya 12, mfumu wa bana ba Nafatale, Ahila+ mwanā Enani, 79 waletele kyamulambu kyandi kya nsāni umo wa ndalama ulēma mashekele 130 ne lweso lumo lwa ndalama lulēma mashekele 70 mwendele shekele ya ku kifuko kijila,+ onso abidi mayule bukula bupēla bwele’ko māni bwa kyamulambu kya miseke;+ 80 kitomeno kimo kya olo kilēma mashekele 10, kiyule ensense; 81 ñombe mwana umo, mukōko mulume umo, ne kana ka mukōko kalume kamo ka mwaka umo ne kwika mwanda wa kyamulambu kisōkwe;+ 82 mbuji mwana umo wa kyamulambu kya bubi;+ 83 kadi mwanda wa kitapwa kya kipwano,+ bañombe babidi, mikōko milume itano, bambuji balume batano, ne twana twa mikōko tulume tutano twa mwaka umo umo. Kino’ki kyo kyamulambu kya Ahila+ mwanā Enani.

84 Kino’ki kyo kyamulambu kya pa kufikidija+ kisōkelo kyaletele bamfumu ba Isalela pokyashingilwe māni: masāni 12 a ndalama, ngeso 12 ya ndalama, bitomeno 12 bya olo;+ 85 nsāni ne nsāni wa ndalama wadi ulēma mashekele 130 kadi lweso ne lweso lwadi lulēma mashekele 70, ndalama yonso ya bipungwa yafikile pa mashekele 2 400 mwendele shekele ya ku kifuko kijila;+ 86 bitomeno 12 bya ndalama biyule ensense byadi bilēma mashekele 10 kimokimo mwendele shekele ya ku kifuko kijila, olo yonso ya bitomeno yafikile pa mashekele 120. 87 Banyema bonso ba kyamulambu kisōkwe badi bañombe 12, mikōko milume 12, twana twa mikōko tulume 12 twa mwaka umo umo, ne byamulambu byabo bya miseke, ne bambuji bana 12 ba kyamulambu kya bubi; 88 kadi banyema bonso ba kitapwa kya kipwano bafikile pa bañombe 24, mikōko milume 60, bambuji balume 60, ne twana twa mikōko tulume 60 twa mwaka umo umo. Kino’ki kyo kyamulambu kya pa kufikidija+ kisōkelo pa kupwa kwikishinga māni.+

89 Kitatyi kyonso kyadi kitwela Mosesa mu pema wa kubungakena’ko kukesamba na Leza,*+ wadi wivwana diwi dīsamba nandi pangala pa mpūto+ ya sanduku wa Bukamoni, pa bukata bwa bakelubi babidi;+ Leza wadi wisamba nandi.

8 Yehova wesamba na Mosesa amba: 2 “Wisambe na Alone umulombole amba, “Shi ubaakija binanu, binanu bisamba-bibidi bifwaninwe kumunika kumeso kwa kitūlwa-binanu.’”+ 3 Penepo Alone walonga namino: Waakija binanu byakyo mwanda wa kumunika kumeso kwa kitūlwa-binanu,+ monka mobasoñaninye Mosesa kudi Yehova. 4 Kitūlwa-binanu kyadi kipungwe namino: Kyadi kya olo kifule na kitotwa; tamba ku kya pa bukata kutūla ne ku maluba akyo, kyadi kifule na kitotwa.+ Kitūlwa-binanu kyadi kilongwe mungya kimonwa+ kyobalombwele Mosesa kudi Yehova.

5 Yehova wesamba monka na Mosesa amba: 6 “Yata bene Levi mu bukata mwa bene Isalela, wibasubule.+ 7 I namino’u mokebasubwila: Wibakuse mema atōkeja bubi, kadi bafwaninwe kutenda na bwembe myoya ya pa ngitu yabo yonso, bakende bivwalwa byabo, ne kwisubula abo bene.+ 8 Ebiya bakayata ñombe mwana+ ne kyamulambu kyandi kya miseke+ kya bukula bupēla bwele’ko māni, kadi ukayata ne ñombe mukwabo mwana wa kyamulambu kya bubi.+ 9 Kadi ukaleta bene Levi kumeso kwa pema wa kubungakena’ko ne kukongakanya kitango kyonso kya bene Isalela.+ 10 Kitatyi kyoleta bene Levi ku meso a Yehova, bene Isalela bakatenteka makasa abo pa bene Levi.+ 11 Alone nandi ufwaninwe kulambula* bene Levi ku meso a Yehova bu kyamulambu kya kupēpeja+ kya bene Isalela, kadi nabo bakengila mingilo ya Yehova.+

12 “Penepa bene Levi bakatenteka makasa abo pa mitwe ya bañombe.+ Kupwa ukalambula ñombe umo bu kyamulambu kya bubi ino mukwabo nandi bu kyamulambu kisōkwe kudi Yehova mwanda wa kupūtyila bene Levi bubi.+ 13 Ukemika bene Levi ku meso a Alone ne bandi bana kadi ukebalambula* bu kyamulambu kya kupēpeja kudi Yehova. 14 Ufwaninwe kusansanya bene Levi mu bukata mwa bene Isalela, kadi bene Levi bakekala bami.+ 15 Kupwa, bene Levi bakatwela kwingila ku pema wa kubungakena’ko. E namino’u mokebasubwila ne kwibalambula* bu kyamulambu kya kupēpeja. 16 Mwanda abo i bantu bapānwe, i bampebwe ami mu bukata mwa bene Isalela. Pa kyaba kya babedi bonso* ba bene Isalela,+ nkebayata ke bami. 17 Ke-pantu umbedi ense mu bukata mwa bene Isalela i wami, ne muntu ne nyema mwine.+ Nepandwidile’bo ami mwine mu difuku dyonaipaile umbedi ense mu ntanda ya Edipito.+ 18 Nkayata bene Levi pa kyaba kya babedi bonso mu bukata mwa bene Isalela. 19 Kadi nkapāna bene Levi bu bantu bapānwe kudi Alone ne bandi bana mu bukata mwa bene Isalela, ba kwingidila bene Isalela mingilo ku pema wa kubungakena’ko+ ne kupūta bubi bwa bene Isalela, kutyina’mba kipupo nansha kimo kyakapona mu bukata mwa bene Isalela+ mwanda bantu ba Isalela abafwena ku kifuko kijila.”

20 Mosesa ne Alone ne kitango kyonso kya bene Isalela balonga bene Levi enka nabya. Mwendele byonso byobasoñenye Mosesa kudi Yehova pa mwanda wa bene Levi, e monka mwebalongele bene Isalela. 21 Ponkapo bene Levi betōkeja abo bene, bakenda ne bivwalwa byabo,+ kupwa Alone webalambula* bu kyamulambu kya kupēpeja ku meso a Yehova.+ Ebiya Alone webapūtyila bubi mwanda wa kwibasubula.+ 22 Kupwa papo, bene Levi batwela kebengila mingilo yabo ku pema wa kubungakena’ko ku meso a Alone ne bandi bana. Monka mobasoñaninye Mosesa kudi Yehova pa mwanda wa bene Levi, e mobebalongele.

23 Ebiya Yehova wesamba na Mosesa amba: 24 “Kine kino’ki kitala bene Levi: Kushilwila ku wa myaka 25 kokanda, mwana-mulume ukatwela mu kitango kya boba bengila mingilo ya pema wa kubungakena’ko. 25 Ino kupita pa myaka 50, ukataluka mu kitango kya mingilo’kya kadi kakengilapo monka. 26 Aye ubwanya kukwasha banababo batala mingilo ya ku pema wa kubungakena’ko, inoko kafwaninwepo kwingila’ko mingilo. E namino’u mokalongela bene Levi ne mingilo yabo.”+

9 Yehova wesamba na Mosesa mu ntanda mutuputupu ya Shinai mu kweji mubajinji+ wa mwaka wa bubidi abo pa kupwa kutamba mu ntanda ya Edipito amba: 2 “Bene Isalela bakalongolola kitapwa kya Pashika+ pa kitatyi kyakyo kitungwe.+ 3 Mu difuku dya 14 dya uno kweji pa kapita i kāni,* mukalongolola’kyo pa kitatyi kyakyo kitungwe. Mukalongolola’kyo mwendele bijila byakyo byonso ne misoñanya yakyo yonso itūdilwe.”+

4 Penepo Mosesa wanena bene Isalela balongolole kitapwa kya Pashika. 5 Ebiya balongolola kitapwa kya Pashika mu kweji mubajinji, mu difuku dya 14 dya kweji pa kapita i kāni,* mu ntanda mutuputupu ya Shinai. Bene Isalela balonga monka mwendele byonso byobasoñenye Mosesa kudi Yehova.

6 Ino kwadi bantu bamo besubije na kutenga umbidi* mufwe,+ bakomenwa kulongolola kitapwa kya Pashika mu dyodya difuku. Ebiya bantu’ba baenda ku meso a Mosesa ne Alone mu difuku’dya+ 7 kebamunena’mba: “Twi ba disubi pa mwanda wa kutenga umbidi* mufwe. I kika le kyotukankajibwa kuleta kyamulambu kudi Yehova pa kitatyi kyakyo kitungwe mu bukata mwa bene Isalela?”+ 8 Penepo Mosesa webalondolola’mba: “Ilaijai papo, nkevwane bisa kusoñanya Yehova pa mwanda wenu.”+

9 Ebiya Yehova wanena Mosesa amba: 10 “Lombola bene Isalela amba, ‘Muntu ense wa mu bukata mwenu nansha wa mu lukongo lwenu lukāya’ko ukesubija na kutenga umbidi* mufwe+ nansha udi kulampe mu lwendo, ufwaninwe nandi kulongolwela Yehova kitapwa kya Pashika. 11 Bafwaninwe kwikilongolola mu kweji wa bubidi,+ mu difuku dya 14 pa kapita i kāni.* Bakadya’kyo na mikate yampikwa kiyujo ne mani alula.+ 12 Kebafwaninwepo kushiya nansha kamo kufika ne lubanga,+ kadi kebafwaninwepo kulala mukupa wakyo nansha umo.+ Bafwaninwe kwikilongolola mwendele bitungo byonso bya Pashika. 13 Ino shi muntu i wampikwa disubi ne kadipo mu lwendo ino waleka kulongolola kitapwa kya Pashika, yao muntu* ufwaninwe kutyibwa’ko* mu bantu bandi,+ mwanda kaletelepo kyamulambu kudi Yehova pa kitatyi kyakyo kitungwe. Yao muntu ukapebwa mfuto pa bubi bwandi.

14 “‘Ino shi mweni wa kibundi ushikatanga nenu, nandi ufwaninwe kulongolwela Yehova kitapwa kya Pashika.+ Ukalongolola’kyo mwendele kijila kya Pashika ne musoñanya wakyo utūdilwe.+ Kukekala kijila kimo kyonka komudi, kudi mweni wa kibundi ne kudi banwe bene.’”+

15 Penepo mu difuku dyashimikilwe kipema,+ dikumbi dyapūtyile kipema, pema wa Bukamoni, ino ku kyolwa, kyokya kyadi kimweka bu mudilo kyadi’nka pangala pa kipema kufika ne lubanga.+ 16 Kino’ki kyo kyadi kilongeka nyeke: Dikumbi dyadi dipūta’po dyuba, ino bufuku dimweka bwa mudilo.+ 17 Kyaba kyonso kyadi kitaluka dikumbi pa pema, bene Isalela badi bataluka bukidibukidi,+ ino ponso padi pemana dikumbi, po padi patūla bene Isalela nkambi.+ 18 Bene Isalela badi bataluka na musoñanya wa Yehova, kadi badi batūla nkambi na musoñanya wa Yehova.+ Kitatyi kyonso kyadi dikumbi pangala pa kipema, badi batūla nkambi. 19 Shi dikumbi dibaije pangala pa kipema mafuku mangi, bene Isalela badi bakōkela Yehova ne kutaluka mpika.+ 20 Kyaba kimo dikumbi dyadi dimana mafuku matyetye pangala pa kipema. Badi batūla nkambi na musoñanya wa Yehova, kadi badi bataluka na musoñanya wa Yehova. 21 Kyaba kimo dikumbi dyadi dimana’tu tamba kyolwa kutūla ne lubanga kete, penepa shi dikumbi dibataluka lubanga, nabo bataluka. Dikale dyuba nansha bufuku butaluka dikumbi, nabo badi bataluka.+ 22 Kyaba kyonso kyadi kīja dikumbi pangala pa kipema, ekale mafuku abidi, kweji umo nansha kyaba kilampe, bene Isalela badi batūla nkambi ne kutaluka mpika. Ino shi dibataluka nabo bataluka. 23 Badi batūla nkambi na musoñanya wa Yehova, kadi badi bataluka na musoñanya wa Yehova. Badi bakōkela nyeke Yehova mwendele musoñanya obasoñenye Mosesa kudi Yehova.

10 Penepo Yehova wanena Mosesa amba: 2 “Wipungile bimpungidi+ bibidi; wibipunge bya ndalama mifule na kitotwa, ne kwibingidija pa kwita kitango ne pa kutalula nkambi. 3 Shi byonso bibidi bibavuma, kitango kyonso kifwaninwe kwibungila kodi pa kibelo kya pema wa kubungakena’ko.+ 4 Shi i kimo kyonka kyavuma, nabya i enka bamfumu, mitwe ya tununu twa Isalela, bakebungila kodi.+

5 “Pomukela kimpungidi na kuleulula, mankambi a boba badi kutunduka+ akataluka. 6 Pomukela kimpungidi na kuleulula musunsa wa bubidi, mankambi a boba badi kunshi+ akataluka. Bakela kimpungidi na kuleulula uno muswelo kitatyi kyonso kitaluka nkambi ne nkambi.

7 “Ino shi koite kipwilo amba kibunge, ukavumija bimpungidi,+ ino ke na kuleululapo. 8 Bana ba Alone, babitobo, bakavumija bimpungidi,+ kadi kwibingidija kukekala bu kijila kyenu kya myaka na myaka mu nkongo yenu yonsololo.

9 “Shi kemwenda ku divita mu ntanda yenu kukalwa na walwana wimumwesha malwa, mufwaninwe kwila bimpungidi+ bya kwita bantu ku divita, kadi mukavulukwa na Yehova Leza wenu ne kupandijibwa ku balwana nenu.

10 “Kadi, mu bitatyi byenu bya nsangaji+—masobo enu+ ne ku ñanjilo ya myeji—mukela bimpungidi pa byamulambu byenu bisōkwe+ ne bitapwa byenu bya kipwano;+ bikemwikadila bu kivulujo ku meso a Leza wenu. Amiwa ne Yehova Leza wenu.”+

11 Ebiya mu mwaka wa bubidi, mu kweji wa bubidi, mu difuku dya 20 dya kweji,+ dikumbi dyataluka pangala pa kipema+ kya Bukamoni. 12 Penepo bene Isalela baanza kutaluka mu ntanda mutuputupu ya Shinai mungya musoñanya watūdilwe’ko wa mwa kutalukila,+ dikumbi dyaimana mu ntanda mutuputupu ya Palana.+ 13 Uno’u o musunsa mubajinji obatalukile balonda musoñanya wa Yehova kupityila kudi Mosesa.+

14 Penepo bisaka bisatu bya nkambi ya bana ba Yuda byataluka dibajinji mwendele bibumbo byabo,* Nashona+ mwanā Aminadaba ye wadi wendeja kibumbo kyabo. 15 Wadi wendeja kibumbo kya kisaka kya bana ba Isakala i Netanele+ mwanā Zuale. 16 Wadi wendeja kibumbo kya kisaka kya bana ba Zebuluna i Ediabu+ mwanā Helona.

17 Kipema pa kukonkolwa,+ bana ba Ngelashona+ ne bana ba Meladi,+ badi baselele kipema, bataluka.

18 Ebiya bisaka bisatu bya nkambi ya Lubeni byataluka kebyenda mungya bibumbo byabo,* Edizule+ mwanā Shedelu ye wadi wendeja kibumbo kyabo. 19 Wadi wendeja kibumbo kya kisaka kya bana ba Shimioni i Shelumiele+ mwanā Zuleshadai. 20 Wadi wendeja kibumbo kya kisaka kya bana ba Ngade i Ediasafa+ mwanā Deuele.

21 Ebiya bene Kohata badi baselele bipungwa bya kipandulwe,+ bataluka. Kipema kyadi kya kushimikwa kitatyi kyobafika.

22 Ebiya bisaka bisatu bya nkambi ya bana ba Efelaimi byataluka mwendele bibumbo byabo,* Edishama+ mwanā Amihuda ye wadi wendeja kibumbo kyabo. 23 Wadi wendeja kibumbo kya kisaka kya bana ba Manase i Ngamadyela+ mwanā Pedazula. 24 Wadi wendeja kibumbo kya kisaka kya bana ba Benjemani i Abidane+ mwanā Ngideone.

25 Ebiya bisaka bisatu bya nkambi ya bana ba Dani byataluka mwendele bibumbo byabo,* bengila bu balami ba kunyuma ba mankambi onso, Ahiezele+ mwanā Amishadai ye wadi wendeja kibumbo kyabo. 26 Wadi wendeja kibumbo kya kisaka kya bana ba Ashela i Pangiela+ mwanā Okolanu. 27 Wadi wendeja kibumbo kya kisaka kya bana ba Nafatale i Ahila+ mwanā Enani. 28 Uno’u o musoñanya wa mwa kutalukila walondele bene Isalela ne bibumbo byabo* pobadi bataluka.+

29 Penepo Mosesa wanena Hobabe mwanā Leuele*+ mwine Midyana, muko wa Mosesa amba: “Ketwenda ku kifuko kyanenene Yehova amba, ‘Nkemupa’kyo.’+ Twaya,+ tukekala nobe biyampe mwanda Yehova i mulae Isalela bintu biyampe.”+ 30 Ino nandi wamutentulula’mba: “Nkisapo kwenda. Nsa kujokela ku ntanda yetu ne ku babutule bami.” 31 Penepo Mosesa wamunena’mba: “Nakwisāshila, koketushiyapo mwanda abewa uyukile kotufwaninwe kutūla nkambi mu ntanda mutuputupu, kadi ubwanya kwikala wa kwituludika.* 32 Kadi shi wende netu,+ nabya biyampe byonso biketulongela Yehova, netu tukakulongela’byo.”

33 Penepa batamba ku lūlu lwa Yehova+ bashilula kwenda lwendo lwa mafuku asatu, kadi sanduku+ wa kipwano kya Yehova wadi wibatangidile kumeso mu lwendo lwa mafuku asatu bakimba pa kukōkolokwa.+ 34 Dikumbi+ dya Yehova dyadi pangala pabo dyuba shi kebataluka pa nkambi.

35 Kyaba kyonso kyadi kiselwa Sanduku, Mosesa wadi unena’mba: “A Yehova, imana,+ balwana nobe bakusankanibwe, kadi boba bakushikilwe banyeme lubilo ku meso obe.” 36 Kadi kyaba kyonso kyawadi utūlwa, wadi unena’mba: “A Yehova, jokela ku tununu ketubadika* twa Isalela.”+

11 Ebiya bantu bashilula kutompola bininge ku meso a Yehova. Yehova nandi pa kwivwana nabya, webalobela bininge, kadi mudilo utamba kudi Yehova washilula kwibasōka, watukija’ko bamo kufula kwa nkambi. 2 Bantu pa kushilula kudidila Mosesa, wazenza Yehova,+ ne mudilo nao wabula. 3 Penepo kifuko’kya kyainikwa bu Tabela,* mwanda mudilo utamba kudi Yehova webasōkele.+

4 Penepa kibumbo*+ kisobakane kyadi mu bukata mwabo kyaikala na kwisakila,+ ne bene Isalela bene bashilula kudila monka kebanena’mba: “I ani le usa kwitupa mwita wa ntanda tudye?+ 5 Yō, tubavuluka owa mwita wa lui otwadi tudya ku bitupu mu Edipito, ne bibimbi, ne bitanga-bondo, ne bitungulu, ne matungulu-ai!+ 6 Pano batwe* yeu ketūme. Ketudipo kyotumona poso’tu enka māna+ ano’a.”

7 Ne kadi, māna+ adi pamo bwa miseke ya kodiandele,+ kadi adi bwa bunange bwa bedola. 8 Bantu badi bakusankana kebaboya’o bapela’o pa mpelo nansha kutwa’o mu kinu. Kupwa batēka’o mu bisuku nansha kulonga’o mikate mijokoloke,+ kadi adi atobala bwa mikate itobala myele’ko māni. 9 Kitatyi kyadi kitūka lumé pa nkambi bufuku, māna nao adi atūkila’po.+

10 Mosesa waivwana bantu badila, kisaka ne kisaka, muntu ne muntu ku kibelo kya pema wandi. Yehova nandi waloba bininge,+ ne Mosesa mwine wafītwa mutyima bininge. 11 Penepo Mosesa wanena Yehova amba: “Mwanda waka umwesha mwingidi obe malwa? Mwanda waka kuntōkelwepo mutyima, kountwika kiselwa kilēma kya bano bantu bonso’ba?+ 12 Lelo amiwa ye waimite bano bantu bonso? Lelo amiwa ye webabutwile, kounombola’mba, ‘Wibasele mu kyadi kyobe, pamo bwa mwingidi* usela mwana ukyamwa,’ kufika ne ku ntanda yowatyipīle bakulutuba babo?+ 13 I kwepi konsa kusokola mwita wa ntanda wa kupa bano bantu bonso’ba? Mwanda baba badila’nka kudila ku meso ami, amba, ‘Witupe mwita wa ntanda tudye!’ 14 Amiwa nkibwanyapo kusela bunka bano bantu bonso’ba; abampityila bungi.+ 15 Shi usa kunonga nankyo, nakwisāshila ngipaye’tu enka pano’pa.+ Shi ubauntōkelwa mutyima, kokamwesha kyamalwa kikwabo.”

16 Yehova walondolola Mosesa amba: “Nkongakenye’ko bana-balume 70 ba mu bakulumpe ba Isalela, bana-balume boyukile bu* bakulumpe ne bemaniji ba bantu,+ wibaselele ku pema wa kubungakena’ko, wimane nabo kwine’kwa. 17 Nkatūka+ kwisamba nobe kwine’kwa,+ kadi nkayata’ko mushipiditu+ udi podi ntūle’o pobadi, nabo bakakukwasha kusela kiselwa kilēma kya bano bantu kutyina’mba wakasela’kyo bunka.+ 18 Ukalombola bantu amba, ‘Mwipandulei mwanda wa kesha,+ mwanda bine mukadyanga mwita wa ntanda, ke-pantu mubadidila mu matwi a Yehova+ kemunena’mba: “I ani le usa kwitupa mwita wa ntanda tudye? Mu Edipito twadi biyampe kutabuka.”+ Bine Yehova usa kwimupa mwita, nenu musa kudya’o.+ 19 Kemukadi’opo difuku dimo, nansha mafuku 2, nansha mafuku 5 nansha mafuku 10 nansha mafuku 20, 20 ino mukadya’o kweji mutuntulu, kufika ne byowimutamba mu mapunge a myulu kewimukwata ne mukenye,+ mwanda mubapele Yehova, udi umbukata mwenu, kemudila ku meso andi amba: “I kika kyotwatambīle mu Edipito?”’”+

21 Ponkapo Mosesa wanena’mba: “Bantu bondi nabo i bana-balume 600 000+ ba lwa nshi, ino abe konena’mba, ‘Nsa kwibapa mwita wa ntanda, kadi basa kudya bekute’o mu kweji mutuntulu’! 22 Nansha shi mikōko ne bañombe bonso abatapwe, le bakebabwana? Nansha ke mwita onso wa mu dijiba shi ubakwatwa, le ukebabwana?”

23 Penepo Yehova wanena Mosesa amba: “Le kuboko kwa Yehova i kwīpi bininge?+ Pano usa kumona shi byonanena’bi bisa kulongeka’ni kebisapo kulongeka.”

24 Ebiya Mosesa watamba kukalombola bantu binenwa bya Yehova. Wakongakanya bana-balume 70 ba mu bakulumpe ba bantu’ba webemika kufulakufula kwa pema.+ 25 Penepo Yehova watūka mu dikumbi+ kaesambe nandi,+ wamuyata’ko mushipiditu+ wadi padi aye watūla’o pa boba bakulumpe 70. Kadi ao mushipiditu wibatūkila’tu, bashilula kwiendeja bwa bapolofeto,*+ ino kebalongele’byopo monka.

26 Kwadi bana-balume babidi badi bakidi mu nkambi. Majina abo i ba Eledada ne Medade. Mushipiditu washilula kwibatūkila, mwanda badi mu boba balembelwe majina, ino kebatambilepo kwenda ku pema. Penepo bashilula kwiendeja bwa bapolofeto mu nkambi. 27 Nsongwalume umo wanyema lubilo wakasapwila Mosesa amba: “Ba Eledada ne Medade boba beendeja bwa bapolofeto mu nkambi!” 28 Ebiya Yoshua+ mwanā Nuna, mwingidi wa Mosesa tamba pa bwanuke, watentulula kanena’mba: “A mfumwami Mosesa, wibakande!”+ 29 Ino Mosesa wamunena’mba: “Le ubaivwana mukao pa mwanda wami? Leka, ami nsaka longa bantu bonso ba Yehova i bapolofeto kadi longa Yehova i mutūle mushipiditu wandi pobadi!” 30 Kupwa Mosesa wajokela mu nkambi pamo ne bakulumpe ba Isalela.

31 Penepo kivula kitamba kudi Yehova kyapukuma kekileta bisesekwadi bitamba ku dijiba ne kwibiponeja kufulakufula kwa nkambi,+ palampe pendwa kintu kya difuku dimo mutamba umo, palampe pendwa kintu kya difuku dimo mutamba mukwabo, kujokoloka nkambi yonso, kadi byadi bitentametentame pa nshi kintu kya maboko* abidi mu bwimwa. 32 Ebiya dyuba dyonso’dya ne bufuku bonso ne dya kesha dine, bantu badi’nka bemene bakongakanya bisesekwadi. I kutupu wakongakenye bityetye munshi mwa mahoma* dikumi, badi bebikusankanya kujokoloka nkambi yonso. 33 Inoko mwita wa ntanda wadi ukidi mu meno abo, kebatankwinye’o, bulobo bwa Yehova bwaakila bantu, Yehova washilula kwipaya bantu, ke kutapa i kukunya.+

34 O mwanda bainikile kifuko’kya bu Kibilota-Tava,*+ ke-pantu bajīkile’ko bantu balombwele makomwa-meso.+ 35 Bantu bataluka ku Kibilota-Tava baenda ku Hazelota, bashikata ku Hazelota.+

12 Penepo ba Midiamu ne Alone bashilula kunenena Mosesa bibi pa mwanda wa mukaji mwine Kusha waasongele, mwanda waselele mukaji mwine Kusha.+ 2 Badi banena’mba: “Lelo Yehova wisambilanga enka kudi Mosesa kete?+ Lelo kesambilangapo ne kudi batwe?” Kadi Yehova wadi wivwene.+ 3 Ino Mosesa wadi muntu mwityepeje kutabuka bantu bonso*+ ba pano pa ntanda.

4 Ponkapo Yehova wanena ba Mosesa ne Alone ne Midiamu amba: “Tambai banwe bonso busatu, mwende ku pema wa kubungakena’ko.” Ebiya abo bonso busatu batamba. 5 Kupwa Yehova watūka mu dilenga dya dikumbi,+ waimana pa kibelo kya pema, waita ba Alone ne Midiamu. Bonso babidi baenda kumeso. 6 Penepo wanena’mba: “Nemwisāshila, Ivwanai binenwa byami. Shi kwadi mupolofeto wa Yehova mu bukata mwenu nadi wa kwiyukanya kwadi mu kimonwa,+ kadi nadi wa kwisamba nandi mu kilotwa.+ 7 Ino na mwingidi wami Mosesa kebidipo nankyo! I mupebwe njibo yami yonso.*+ 8 Nesambanga nandi mpala na mpala,*+ patōkelela, ke mu ntyonkopo; kadi aye umonanga mumwekelo wa Yehova. Penepa, mwanda waka kemwatyininepo kunenena Mosesa mwingidi wami bibi?”

9 Penepo bulobo bwa Yehova bwebadyendyemukila, kupwa webataluka’po. 10 Dikumbi dyataluka pangala pa pema, ino tala’po! Midiamu wakwatwa na makopo atōka tō pamo bwa mashika mekwate.+ Ebiya Alone waalamukila kudi Midiamu, wamona’mba wakwatwa na makopo.+ 11 Ponkapo Alone wanena Mosesa amba: “Nakwisāshila, a mfumwami! Koketupa mfuto pa buno bubi! Tubalonga bya bulembakane pa byotwalonga’bi. 12 Nakwisāshila, kokamuleka ekale’nka nenki pamo bwa muntu mufwe, wa ngitu mipuluke mutamba umo pa kubutulwa!” 13 Ebiya Mosesa washilula kudidila Yehova, kanena’mba: “Yō, a Leza nakwisāshila mundape! Nakwisāshila!”+

14 Yehova walondolola Mosesa amba: “Shi shandi mwine wamupelēle mata mu mpala, mwene wadi wa kufwa bumvu mu mafuku asamba-abidi? Muleke asonsololwe mafuku asamba-abidi panja pa nkambi,+ kupwa ukajokejibwa’mo.” 15 Penepo Midiamu wasonsololwa panja pa nkambi mafuku asamba-abidi,+ kadi bantu kebatalwilepo nkambi kufika ne byajokejibwe’mo Midiamu. 16 Kupwa bantu bataluka ku Hazelota+ bashilula kutūla nkambi mu ntanda mutuputupu ya Palana.+

13 Ebiya Yehova wesamba na Mosesa amba: 2 “Tuma bana-balume bakabele* ntanda ya Kenani, yonsa kupa bene Isalela. Ufwaninwe kutuma muntu umo ku kisaka ne kisaka kya bankambo wabo, muntu ne muntu ekale mfumu+ wa mu bukata mwabo.”+

3 Penepo Mosesa webatuma kutamba mu ntanda mutuputupu ya Palana+ mungya musoñanya wa Yehova. Bano bana-balume bonso badi mitwe ya bene Isalela. 4 Ano’a o majina abo: ku kisaka kya Lubeni, Shamua mwanā Zakula; 5 ku kisaka kya Shimioni, Shafata mwanā Hodi; 6 ku kisaka kya Yuda, Kalebu+ mwanā Yefune; 7 ku kisaka kya Isakala, Ingala mwanā Yosefa; 8 ku kisaka kya Efelaimi, Hoshea+ mwanā Nuna; 9 ku kisaka kya Benjemani, Paletyi mwanā Lafu; 10 ku kisaka kya Zebuluna, Ngadyele mwanā Sodi; 11 ku kisaka kya Yosefa,+ wa ku kisaka kya Manase,+ Ngadi mwanā Sushi. 12 ku kisaka kya Dani, Amiele mwanā Ngemadi; 13 ku kisaka kya Ashela, Setule mwanā Mikaele; 14 ku kisaka kya Nafatale, Nabi mwanā Vofese; 15 ku kisaka kya Ngade, Ngeuele mwanā Maki. 16 Ano’a o majina a bana-balume bobatumine kudi Mosesa kukabela ntanda. Kadi Mosesa wainika Hoshea mwanā Nuna bu Yoshua.*+

17 Kitatyi kyebatumine Mosesa kukabela ntanda ya Kenani, webanenene amba: “Kandai kokwa ku Nengeba, kupwa mukande ne ku ntanda ya ngulu.+ 18 Mufwaninwe kutala mwikadile ntanda+ ne bantu bashikete’mo shi i bakomo nansha i bazoze, shi i batyetye nansha i bangi, 19 ne ntanda shi i miyampe nansha i mibi, shi bibundi byobashikete’mo bidi mu mankambi nansha mu mansakwa. 20 Kadi kajingululei shi ntanda i ya bupeta* nansha i milanda,*+ shi mudi mityi nansha i mutupu’yo. Mufwaninwe kukankamana+ musele’ko bipa bimo bya mu ntanda’ya.” Kyadi kitatyi kya mañanza mele mabajinji.+

21 Penepa bakanda kukabela ntanda tamba mu ntanda mutuputupu ya Zine+ kutūla ku Lehobe,+ kubwipi na Lebo-Hamata.*+ 22 Abo pa kukanda ku Nengeba, bafika ku Hebelona,+ kwadi kushikata Ahimana, Sheshai, ne Talamai,+ bene Anaki.+ Kadi Hebelona waubakilwe myaka isamba-ibidi kumeso kwa Zoane wa Edipito. 23 Pobafikile ku Musanza* wa Eshekole,+ baketa musambo umo wa kisansa kya mañanza, kyadi kya kusela bantu babidi ku mutembo, ne bipa bimo bya mangelenade ne bikuyu.+ 24 Bainika kifuko’kya bu Musanza* wa Eshekole*+ mwanda wa kisansa kyaketele’ko bene Isalela.

25 Ku mfulo kwa mafuku 40,+ bajoka kobadi bakabelele ntanda. 26 Penepo bajokela kudi ba Mosesa ne Alone ne kitango kyonso kya bene Isalela mu ntanda mutuputupu ya Palana, mu Kadesha.+ Basapwila kitango kyonso byobatene’ko, bebalombola ne bipa bya mu ntanda’ya. 27 Bino e byobasapwidile Mosesa amba: “Twakatwelele mu ntanda yowetutumine’mo, kadi bine ikukanga mabele ne būki,+ ne bipa+ byayo abi kebyo. 28 Inoko, bantu bashikete mu ntanda’ya i bakomo, kadi bibundi bikomejibwe i bikatampe bininge. Twamwene’mo ne bene Anaki.+ 29 Bene Amaleke+ bashikatanga mu ntanda ya Nengeba,+ bene Hiti, bene Yebushi,+ ne bene Amole+ nabo bashikatanga mu ntanda ya ngulu, bene Kenani+ nabo bashikatanga dya ku dijiba+ ne ku mukunko wa Yodano.”

30 Penepo Kalebu watompa kutalaja bantu badi bemene ku meso a Mosesa kanena’mba: “Tukandei’nka pano, tukulupile amba tukakwata’yo, mwanda tubwanya bine kwiinekenya.”+ 31 Ino bantu bakandile nandi kebanena’mba: “Ketubwanyapo kukanda kukalwa na boba bantu, mwanda i bakomo kwitupita.”+ 32 Kadi baendelela kusapwila bene Isalela myanda mibi+ itala ntanda yobakabelele amba: “Yoya ntanda yotwakabelele i ntanda isasamuna bekadi bayo, kadi bantu bonso botwamwene’mo i bapuñame.+ 33 Kadi twamwene’mo Banefilime, bana ba Anaki,+ batambile* ku Banefilime, shi twidingakanye nabo tudi pamo bwa batēte, ku meso etu ne ku meso abo kwine.”

14 Penepo kitango kyonso kyatulula mawi, kadi bantu badi bayoyokota ne kudila bufuku bonso.+ 2 Bene Isalela bonso bashilula kwiuningila Mosesa ne Alone,+ kitango kyonso kyadi kibanenena bibi, amba: “Shi twafwile nansha mu ntanda ya Edipito, kadi shi twafwidile nansha muno mu ntanda mutuputupu! 3 I kika le kyetuselela Yehova mu ino ntanda mwanda’tu wa kufwila ku kipete?+ Bakaji betu ne betu bana bakekala bu kitūtwa.+ Le ke biyampepo tujokele mu Edipito?”+ 4 Badi kebanena ne kunena abo bene na bene amba: “Longa tutongei’ko mutangidiji tujokele mu Edipito!”+

5 Ponkapo ba Mosesa ne Alone bapona mapala abo pa nshi ku meso a kipwilo kyonso kya bene Isalela kyadi kibungile. 6 Yoshua+ mwanā Nuna ne Kalebu+ mwanā Yefune, badi mu boba bakabelele ntanda, basana bivwalwa byabo, 7 kebanena kitango kyonso kya bene Isalela namino amba: “Ntanda yotwakabelele i ntanda miyampe bininge.+ 8 Shi Yehova wetusangela, bine uketutwejanga mu yoya ntanda ne kwitupa’yo, ntanda ikuka mabele ne būki.+ 9 Ino kemufwaninwepo kutombokela Yehova, kadi kemufwaninwepo kutyina bantu ba ntanda’ya,+ mwanda tukebasasamunanga.* Kyokya kyadi kibakingile kibebatalulwa, kadi Yehova udi netu.+ Kemwakebatyinai.”

10 Inoko, kitango kyonso kyadi kinena kwibasa mabwe.+ Ino ntumbo ya Yehova yamweka pa pema wa kubungakena’ko ku bantu bonso ba Isalela.+

11 Ebiya Yehova wanena Mosesa amba: “Lelo bano bantu bakampunika kufika ne kitatyi’ka,+ ne kadi i kufika ne kitatyi’ka kyobakabulwa lwitabijo mudi ami nansha byonalongele biyukeno byonso’bi umbukata mwabo?+ 12 Leka nebakupile na kipupo kya misongo ne kwibakubija, kadi nkwalamune abe kodi muzo mukatampe ne mukomo kwibapita.”+

13 Ino Mosesa wanena Yehova amba: “Ebiya bene Edipito, mwine mowatambije bano bantu na bukomo bobe, bakevwananga’o,+ 14 kadi bakasapwila’o bekadi ba ino ntanda. Abo nabo baivwene amba abewa, Yehova, udi mu bano bantu+ kadi webamwekele mpala na mpala.+ Abe wi Yehova, dikumbi dyobe dimene peulu pabo, kadi wendanga ku meso abo mu dilenga dya dikumbi dyuba ne mu dilenga dya mudilo bufuku.+ 15 Shi wipaye bantu bonso’ba mwa kimo,* mizo yaivwene ntumbo yobe ikanena’mba: 16 ‘Yehova kabwenyepo kutweja bano bantu mu ntanda yaatyipile kwibapa, o mwanda webepaya mu ntanda mutuputupu.’+ 17 Pano nakwisāshila, a Yehova, bukomo bobe bwikale bukatampe, monka mowalaile powanenene amba: 18 ‘Yehova, wija pa kukwatwa bulobo kadi muyule buswe bwa ndamatyidile,*+ ulekela bilubo ne kujilula, ino kakalekapo nansha dimo kupa kipya-mambo mfuto, upa bana mfuto pa kilubo kya bashabo, ba ku lukongo lwa busatu ne lukongo lwa buná.’+ 19 Nakwisāshila, lekela bilubo bya bano bantu mwendele buswe bobe bukatampe bwa ndamatyidile, monka mowalekele bano bantu tamba mu Edipito kufika ne pano.”+

20 Penepo Yehova wanena’mba: “Nebalekela mwendele kinenwa kyobe.+ 21 Ino kadi, bine ne byondi mūmi, ntanda yonso ikayulanga ntumbo ya Yehova.+ 22 Inoko, kekudipo muntu nansha umo wamwene ntumbo yami ne biyukeno byami+ byonalongele mu Edipito ne mu ntanda mutuputupu aye kadi ukintompa+ ino misunsa dikumi ne kwivwana diwi dyami mpika+ 23 ukamona nansha dimo ntanda yonatyipīle bashabo. Aa, kekudipo nansha umo mu boba bampunika ukeimona.+ 24 Ino mwingidi wami Kalebu+ byadi na mushipiditu ungi kadi unondanga na mutyima onso, bine nkamutwejanga mu ntanda mwawaendele’mwa, kadi lutundu lwandi lukeikwatanga.+ 25 Bene Amaleke ne bene Kenani+ byobashikete mu musanza,* mufwaninwe kujoka kesha mwende mu ntanda mutuputupu dya ku dishinda dya ku Dijiba Dityila.”+

26 Penepo Yehova wanena ba Mosesa ne Alone amba: 27 “Lelo kino kitango kibi kikeuninga pa mwanda wami kufika ne kitatyi’ka?+ Naivwana biuninga bene Isalela pa mwanda wami.+ 28 Wibalombole amba, ‘“Bine ne byondi mūmi,” i Yehova unena, “Nkemulonga monka monemwivwanina munena!+ 29 Imbidi yenu mifwe ikapona muno mu ntanda mutuputupu,+ bine, bungi bwenu bonso kushilwila ku wa myaka 20 kokanda babadilwe, banwe bonso beuninga pa mwanda wami.+ 30 I kutupu pomudi’po nansha umo ukatwela mu ntanda yonatyipile* banwe kwikala’mo+ poso enka Kalebu mwanā Yefune ne Yoshua mwanā Nuna.+

31 “‘“Kadi nkatweja’mo benu bana, bomwanenene amba basa kwikala bu kitūtwa,+ kadi bakayuka ntanda yomwapela banwe.+ 32 Inoko imbidi yenu mifwe ikapona muno mu ntanda mutuputupu. 33 Ebiya benu bana bakekala bakumbi mu ntanda mutuputupu myaka 40,+ kadi bakapebwa mfuto pa bilongwa byenu bya butomboki* kufika ne bikapona umbidi wenu wa mfulo mu ntanda mutuputupu.+ 34 Mwendele bungi bwa mafuku omwakabelele ntanda’ya, mafuku 40,+ difuku dimo mwaka umo, difuku dimo mwaka umo, mukapebwa mfuto pa bilubo byenu myaka 40,+ mwanda mukayuka mwikadilanga kundwa amiwa.*

35 “‘“Amiwa, Yehova, nesambe’kyo. Kino’ki e kyonkalonga kino kitango kyonso kibi’ki, boba bebunga pamo kulwa nami: Mu ino ntanda mutuputupu e mobakafudila, kadi e mobakafwila.+ 36 Bantu bobatumine kudi Mosesa kukabela ntanda balengeje kitango kyonso kimwiuningile pobajokele na myanda mibi itala ntanda’ya,+ 37 bine, bantu bajokele na myanda mibi itala ntanda’ya bakapebwa mfuto ne kufwa ku meso a Yehova.+ 38 Ino Yoshua mwanā Nuna ne Kalebu mwanā Yefune, badi mu boba baendele kukabela ntanda, abo bine bakashalanga bōmi.”’”+

39 Mosesa pa kwisamba bino binenwa kudi bene Isalela bonso, bantu bashilula kudila madilo makatampe. 40 Ne kadi, babūka lubanga bwē kebakanda pangala pa lūlu, kebanena’mba: “Batwe bano, tukandei ku kifuko kyetulombwele Yehova, mwanda tubapi mambo.”+ 41 Ino Mosesa webanena’mba: “I kika le kyomwatabukila musoñanya wa Yehova? Kebisapo kwimwendekela biyampe. 42 Kemwakakandai, mwanda Yehova kadipo nenu; mukanekenibwa na balwana nenu.+ 43 Mwanda bene Amaleke ne bene Kenani badi’ko mwanda wa kulwa nenu,+ kadi mukapona ku kipete. Byomwalekele kulonda Yehova, Yehova nandi kakekalapo nenu.”+

44 Inoko, abo bataluka na ditatu* kebakanda pangala pa lūlu,+ ino sanduku wa kipwano kya Yehova ne Mosesa kebatalukilepo mu bukata mwa nkambi.+ 45 Penepa bene Amaleke ne bene Kenani badi bashikete mu lūlu’lwa batūka bebakupila, bebapalankanya kufika’nka ne ku Holama.+

15 Yehova wesamba monka na Mosesa amba: 2 “Wisambe na bene Isalela wibanene amba, ‘Pomukatwela mu ntanda yonemupa kushikata’mo,+ 3 kemulambula kyamulambu kyelwe na mudilo kudi Yehova kya mu bañombe ne mu mikōko—kikale kyamulambu kisōkwe+ nansha kitapwa mwanda wa kufikidija mpiko ya pa bula nansha kyamulambu kya kwilanga+ nansha kyamulambu mu masobo enu a bitatyi,+ mwanda wa kununkija luvumba luyampe* kudi Yehova+— 4 yewa uleta kyamulambu kyandi ukaletela Yehova ne kyamulambu kya miseke kya bukula bupēla,+ kipindi kimo kya pa bipindi dikumi bya efa,* kwele kipindi kimo kya pa bipindi biná bya hina* wa māni. 5 Kadi mukalambula ne vinyu bu kyamulambu kya bitomibwa, kipindi kimo kya pa bipindi biná bya hina, pamo ne kyamulambu kisōkwe+ nansha kitapwa kya kana ka mukōko kalume ko-konso. 6 Nansha mukōko mulume, mukalambula kyamulambu kya miseke kya bipindi bibidi bya pa bipindi dikumi bya kipimo kya efa wa bukula bupēla bwele’ko kipindi kimo kya pa bipindi bisatu bya hina wa māni. 7 Kadi mukaleta vinyu bu kyamulambu kya bitomibwa, kipindi kimo kya pa bipindi bisatu bya hina, bu luvumba luyampe* kudi Yehova.

8 “‘Inoko shi kemulambula ñombe mulume bu kyamulambu kisōkwe+ nansha kitapwa kya kufikidija mpiko ya pa bula+ nansha bitapwa bya kipwano kudi Yehova,+ 9 mukaleta ñombe mulume’wa pamo ne kyamulambu kya miseke+ kya bipindi bisatu bya pa bipindi dikumi bya kipimo kya efa wa bukula bupēla bwele’ko kipindi kya hina wa māni. 10 Kadi mukaleta ne vinyu bu kyamulambu kya bitomibwa,+ kipindi kya hina, bu kyamulambu kyelwe na mudilo, bu luvumba luyampe* kudi Yehova. 11 E namino’u mukalongelwa ñombe mulume ense nansha mukōko mulume onso, nansha kana konso ka mukōko kalume nansha mbuji. 12 Nansha shi mubalambula bya bungi’ka, e namino’u momukalongela kimo ne kimo, mwendele bungi bwabyo. 13 E namino’u mukaletela muntu ense mubutulwe mwine Isalela kyamulambu kyelwe na mudilo, bu luvumba luyampe* kudi Yehova.

14 “‘Shi mweni ushikete nenu nansha yewa wikele umbukata mwenu mu nkongo yenu mingi nandi shi kalambula kyamulambu kyelwe na mudilo, bu luvumba luyampe* kudi Yehova, ukalonga enka momulongela banwe.+ 15 Banwe ba mu kipwilo ne mweni ushikete nenu mukekala na kitungo kimo kyonka. Kikekala kitungo kya myaka na myaka mu nkongo yenu yonsololo. Mweni wa kibundi ukekala pamo bwa banwe ku meso a Yehova.+ 16 Kukekala kijila kimo kyonka ne mutyibilo wa mambo umo onka komudi ne kudi mweni ushikete nenu.’”

17 Yehova wanena Mosesa monka’mba: 18 “Wisambe na bene Isalela wibalombole amba, ‘Shi mubatwela mu ntanda yonkemutweja’mo 19 kemudi mukate* o-onso wa mu ntanda’ya,+ mufwaninwe kuleta kyabuntu kudi Yehova. 20 Mufwaninwe kuleta kyabuntu kya byangulwa bibajinji+ bya byakudya byenu bya nsekenseke bu mikate idi bwa ntonto. Mukaleta’byo pamo bwa kyabuntu kya kipūdilo. 21 Byangulwa bibajinji bimo bya byakudya byenu bya nsekenseke, mukaleta’byo bu kyabuntu kudi Yehova mu nkongo yenu yonsololo.

22 “‘Ino shi mubalonga kilubo, mubakomenwa kulama ino mbila yonso yesambile Yehova na Mosesa, 23 byonso byasoñenye Yehova kupityila kudi Mosesa tamba difuku dyasoñenye Yehova ne kwenda kumeso ku nkongo yenu, 24 shi kyalongelwe kwampikwa kusaka kadi kitango kuyuka mpika, nankyo kitango kyonso kifwaninwe kulambula ñombe mulume mwana bu kyamulambu kisōkwe mwanda wa luvumba luyampe* kudi Yehova, pamo ne kyamulambu kyakyo kya miseke ne kyamulambu kyakyo kya bitomibwa enka mulongelwanga nyeke,+ ne mbuji mwana wa kyamulambu kya bubi.+ 25 Kitobo ukapūtyila kitango kyonso kya bene Isalela bubi, nabo bukebalekelwa,+ mwanda kyadi kilubo, kadi kyamulambu kyabo kyobaselele i kyamulambu kyelwe na mudilo kudi Yehova ne kyamulambu kyabo kya bubi ku meso a Yehova mwanda wa kilubo kyabo. 26 Kitango kyonso kya bene Isalela kikalekelwa pamo ne mweni ushikete umbukata mwabo, mwanda kilubo kyalongelwe na bantu bonso kwampikwa kusaka.

27 “‘Shi muntu* walonga bubi kwampikwa kusaka, nabya ukaleta mbuji mukaji wa mwaka umo ne kwika wa kyamulambu kya bubi.+ 28 Kitobo nandi ukapūta bubi bwa muntu* walongele kilubo ku meso a Yehova kwampikwa kusaka, mwanda wa kupūta bubi, nabo bukamulekelwa.+ 29 Muntu mubutulwe mwine Isalela ne mweni ushikete umbukata mwabo, bakekala na kijila kimo kyonka mu mwanda utala kintu kilongelwe kwampikwa kusaka.+

30 “‘Ino yewa muntu* ulonga kintu ku kusaka,+ ekale mubutulwe mwine Isalela nansha mweni wa kibundi, utukanga Yehova kadi ufwaninwe kutyibwa’ko* mu bantu bandi. 31 Mwanda wafutulula kinenwa kya Yehova kadi watyumuna mbila yandi, yao muntu* ufwaninwe binebine kutyibwa’ko.+ Kilubo kyandi kidi pādi.’”+

32 Padi bene Isalela mu ntanda mutuputupu, batene muntu umo utyaba nkuni mu difuku dya Sabato.+ 33 Boba bamutene utyaba nkuni bamuselela kudi ba Mosesa ne Alone ne kitango kyonso. 34 Bamwela mu buloko+ mwanda kebadipo bayukile kine kya kumulonga.

35 Penepa Yehova wanena Mosesa amba: “Yao muntu ufwaninwe binebine kwipaibwa,+ kadi kitango kyonso kikamwasa mabwe panja pa nkambi.”+ 36 Ebiya kitango kyonso kyamuselela panja pa nkambi kyamwasa mabwe ne kufwa wafwa, monka mobasoñaninye Mosesa kudi Yehova.

37 Yehova wanena Mosesa monka namino amba: 38 “Wisambe na bene Isalela wibalombole amba bafwaninwe kwilongela manyamvwa kunshi kwa bivwalwa byabo mu nkongo yabo yonsololo, kadi bakela lupambo lufītuluka kūlu kwa manyamvwa adi kunshi.+ 39 ‘Mufwaninwe kwikala na ano manyamvwa amba pomwiamona muvuluke mbila yonso ya Yehova ne kwiilama.+ Kemufwaninwepo kulonda mityima yenu ne meso enu, bine bimutwala ku busekese bwa ku mushipiditu.+ 40 E kyo kikemukwasha muvuluke, kadi mukalama mbila yami yonso ne kwikala bajila kudi Leza wenu.+ 41 Amiwa ne Yehova Leza wenu, wemulupwile mu ntanda ya Edipito mwanda wa kwilombola bu Leza wenu.+ Amiwa ne Yehova Leza wenu.’”+

16 Penepo Kola+ mwanā Izala,+ mwanā Kohata,+ mwanā Levi,+ waimana pamo ne Datani ne Abilama bana ba Ediabu,+ ne Ona mwanā Peleta, wa ku bana ba Lubeni.+ 2 Batombokela Mosesa pamo na bana-balume bene Isalela 250, bamfumu ba kitango, batongwe mu kipwilo, bana-balume ba ntumbo. 3 Penepa bebunga kutombokela+ ba Mosesa ne Alone kebebanena’mba: “Banwe’bo mubetukōkeja! Kitango kyonso i kijila,+ abo bonso’ba, kadi Yehova udi umbukata mwabo.+ Le penepo, i kika kyomwizunzwila pa kipwilo kya Yehova?”

4 Mosesa pa kwivwana nabya, ponkapo wapona mpala panshi. 5 Ebiya wanena Kola ne bonso badi bamwitabīle amba: “Lubanga Yehova usa kuyukanya muntu wandi+ ne ujila ne ufwaninwe kumufwena,+ kadi yewa ense wasa kutonga+ ye ukamufwena. 6 Longai nenki: Yatai bininga bya mudilo,+ abe Kola ne bonso bakwitabīle,+ 7 elai’mo mudilo mutūle’mo ne ensense ku meso a Yehova kesha, yewa usa kutongwa+ na Yehova, ye ujila. Banwe bana ba Levi+ mubapityija’byo kipimo!”

8 Penepo Mosesa wanena Kola amba: “Nemwisāshila banwe bana ba Levi, tejai. 9 Le mumwene bu i mwanda mutyetye shi Leza wa Isalela i mwimusansanye na kitango kya Isalela,+ waitabija mumufwene mwanda wa kwingila mingilo ya kipema kya Yehova ne kwimana ku meso a kitango mwanda wa kwibengidila,+ 10 ne kwimufwenya kwadi pamo ne banabenu bonso, bana ba Levi? Le kemusake muyate ne butobo bwine?+ 11 Pa uno mwanda, abewa ne bonso bakwitabīle bebungile’ba mulwanga na Yehova. Le Alone nandi i ani omwiuningila?”+

12 Kupwa Mosesa watuma bakēte ba Datani ne Abilama+ bana ba Ediabu, ino abo balondolola’mba: “Ketusapo kwiya’ko! 13 Lelo i mwanda mutyetye powetulupwile mu ntanda ikuka mabele ne būki mwanda wa kwitwipaya mu ntanda mutuputupu?+ Pano kadi kosake kwitubikala?* 14 Na bubine, kwitutwejejepo mu ntanda ikuka mabele ne būki+ nansha kwitupa bupyani bwa budimi ne budimi bwa mañanza. Le usaka kubongotola meso a bano bantu? Ketusapo kwiya’ko!”

15 Penepo Mosesa waloba bininge, kanena Yehova amba: “Kokyalamuka kutala kyamulambu kyabo kya miseke. Nkiyetepo mpunda wabo nansha umo, kadi nkisanshijepo muntu mu bukata mwabo.”+

16 Ebiya Mosesa wanena Kola amba: “Kesha iyai abewa ne bonso bakwitabīle mwilombole ku meso a Yehova, abe ne abo ne Alone. 17 Muntu ne muntu ukasela kininga kyandi kya mudilo ne kutūla’mo ensense, kadi muntu ne muntu ukaleta kininga kyandi kya mudilo ku meso a Yehova, bininga bya mudilo 250, ne abe ne Alone, muntu ne muntu na kininga kyandi kya mudilo.” 18 Penepa muntu ense wasela kininga kyandi kya mudilo, baela’mo mudilo ne ensense, bakemana pa kibelo kya pema wa kubungakena’ko pamo ne ba Mosesa ne Alone. 19 Kola pa kukongakanya bantu badi bamwitabīle+ amba bebatombokele pa kibelo kya pema wa kubungakena’ko, ntumbo ya Yehova yamwekela kitango kyonso.+

20 Ebiya Yehova wanena ba Mosesa ne Alone amba: 21 “Sansanai na kino kibumbo, mwanda wa nebatukije’nka pano.”+ 22 Ponkapo bapona mapala abo pa nshi kebanena’mba: “A Leza, Leza wa mushipiditu wa bantu bonso,*+ le bubi bwa muntu umo bukokeja kukulengeja ufītyilwe kitango kyonso mutyima?”+

23 Penepo Yehova wanena Mosesa amba: 24 “Wisambe na kitango wibalombole amba, ‘Talukai ku mapema a ba Kola, Datani ne Abilama!’”+

25 Ebiya Mosesa waimana, waenda kudi Datani ne Abilama, kadi bakulumpe+ ba Isalela baenda pamo nandi. 26 Walombola kitango amba: “Nemwisāshila, sonsolokai ku mapema a bano bantu babi kadi kemwakitengai kintu kyabo nansha kimo kutyina’mba mwakakuba mu bubi bwabo bonso.” 27 Ponkapo basonsoloka ku mapema a ba Kola, Datani, ne Abilama, ku mitamba yonso, ebiya ba Datani ne Abilama batamba kebemene pa kibelo kya mapema abo, pamo ne babo bakaji, ne babo bana ne twabo twana tutyetye.

28 Penepo Mosesa wanena’mba: “Pa kino e pomusa kuyukila’mba Yehova wantumine kulonga bino bintu byonso, amba ke na mutyimapo wa ami mwine:* 29 Shi bano bantu bafwe lufu lufwanga bantu bonso, kadi shi mfuto yabo i imo yonka na ya bantu bonso, nankyo Yehova kantuminepo.+ 30 Ino shi Yehova ebalonge kintu kitulumukwa kadi nshi ishituke* ibamine kubyu ne bintu byabo byonso kadi batūkile bōmi mu Kibundu,* mukayuka bine amba bano bantu bapunikile Yehova.”

31 Aye upwa’tu kwisamba bino bishima byonso, nshi pobadi bemene yaladika.+ 32 Ntanda yashituka,* yebamina kubyu, pamo ne ba mu mobo abo bene ne muntu ense wa Kola+ ne bintu byabo byonso. 33 Enka nenki abo ne bantu babo bonso batūkila bōmi mu Kibundu,* kadi ntanda yebapūta, bafwa mu bukata mwa kipwilo.+ 34 Bene Isalela bonso badi bebajokolokele banyema pa kwibevwana badila, mwanda banenene amba: “Tubakwatwa moyo uyuka ntanda yetumina’tu kubyu!” 35 Penepo mudilo watamba kudi Yehova+ wasōka bantu 250 badi balambula ensense.+

36 Penepo Yehova wanena Mosesa amba: 37 “Lombola Eleaza mwanā Alone kitobo opole bininga’bya mu mudilo,+ mwanda i bijila. Kadi mulombole asalakenye mudilo kulampe. 38 Bininga bya mudilo bya bantu balongele bubi bwajimija ne būmi bwabo,* bikalongwa tubipapo twa byuma twa kulamika ku kisōkelo,+ mwanda bebiletele ku meso a Yehova, kadi bibaikala ke bijila. Bikekalanga bu kiyukeno ku bene Isalela.”+ 39 Ebiya Eleaza kitobo wayata bininga bya mudilo bya mukuba byaletele boba batēmene, watotola’byo mwanda wa kwibilamika ku kisōkelo, 40 monka mwamulombwedile Yehova kupityila kudi Mosesa. Kyadi kya kuvuluja bene Isalela amba kekwakekala muntu nansha umo kapelwepo lupusa* ke wa ku lutundupo lwa Alone ukafwena kusōka ensense ku meso a Yehova,+ kadi amba kekwakekala muntu nansha umo wa kwikala pamo bwa Kola ne boba badi bamwitabīle.+

41 Dya kesha, kitango kyonso kya bene Isalela kyaanza kwiuningila ba Mosesa ne Alone+ amba: “Banwe bubidi mubaipaya bantu ba Yehova.” 42 Kitango pa kwibunga kulwa ba Mosesa ne Alone, abo amba balamukile dya ku pema wa kubungakena’ko, tala! dikumbi dyapūta’po, kadi ntumbo ya Yehova yashilula kumweka.+

43 Ba Mosesa ne Alone baenda kumeso kwa pema wa kubungakena’ko,+ 44 ebiya Yehova wanena Mosesa amba: 45 “Banwe, fundukai mu bukata mwa kino kitango, mwanda wa nebatukije’nka pano.”+ Ponkapo bapona mapala abo pa nshi.+ 46 Penepo Mosesa wanena Alone amba: “Yata kininga kya mudilo wele’mo mudilo wa pa kisōkelo+ kadi wele’mo ne ensense, wende bukidibukidi ku kitango ukebapūtyile bubi,+ mwanda bulobo bwa Yehova bubaake. Kipupo kibashilula!” 47 Ponkapo Alone wayata’kyo, monka mwamunenene Mosesa, waenda lubilo mu bukata mwa kipwilo, kadi tala! kipupo kyadi ke kishilule mu bantu. Penepo waela ensense mu kininga kya mudilo kapūtyila bantu bubi. 48 Wadi wimene pa bukata bwa bafwe ne bōmi, ebiya kimpengele kyapwa. 49 Boba bafwile ku kimpengele bafikile pa bantu 14 700, kutalula’mo boba bafwile mwanda wa Kola. 50 Ku mfulo, Alone pa kujokela kudi Mosesa pa kibelo kya pema wa kubungakena’ko, kimpengele kyadi ke kipwe.

17 Ebiya Yehova wanena Mosesa amba: 2 “Wisambe na bene Isalela, uyate kobadi mukombo umo mwendele njibo ya bashabo, ku bamfumu ba njibo ne njibo ya bashabo,+ mikombo yonso ibwane 12. Ulembe dijina dya muntu ne muntu pa mukombo wandi. 3 Ukalemba dijina dya Alone pa mukombo wa Levi, mwanda kudi mukombo umo wa mutwe wa njibo ne njibo ya bashabo. 4 Ukatūla ino mikombo mu pema wa kubungakena’ko kumeso kwa Bukamoni,+ ponelombolanga nyeke komudi.+ 5 Kadi mukombo wa muntu onatonga+ ukashipuka, nabya nkafudija miuningo ya bene Isalela yobeuningila ami,+ yobakwiuningila ne abe.”+

6 Penepo Mosesa wesamba na bene Isalela, kadi bamfumu bonso baleta mikombo yabo—mukombo umo ku mfumu ne mfumu wa njibo ya bashabo, mikombo 12—kadi mukombo wa Alone wadi umbukata mwa mikombo yabo. 7 Ebiya Mosesa watūla mikombo’ya ku meso a Yehova mu pema wa Bukamoni.

8 Dya kesha, Mosesa pa kutwela mu pema wa Bukamoni, tala! mukombo wa Alone wa njibo ya Levi washipuka, kadi walupula ne mani mana, watōya maluba ne kupa bipa bya alemonde byele. 9 Penepo Mosesa watambija mikombo yonso ku meso a Yehova, kaleta’yo ku bantu bonso ba Isalela. Kebeitale, kadi muntu ne muntu wayata mukombo wandi.

10 Penepo Yehova wanena Mosesa amba: “Jokeja mukombo wa Alone+ kumeso kwa Bukamoni wikale ke kintu kya kulama bu kiyukeno+ ku bana ba butomboki,+ amba miuningo yabo yobeuningila ami ipwe kutyina’mba bakafwa.” 11 Ponkapo Mosesa walonga monka mwamusoñaninye Yehova. Walonga enka nabya.

12 Penepo bene Isalela kebanena Mosesa amba: “Pano tusa kufwa, bine tusa kutukila, tusa kutukila batwe bonso! 13 Muntu ense ufwena’tu kubwipi na kipema kya Yehova usa kufwa!+ Lelo tusa kufwa enka nenki?”+

18 Penepo Yehova wanena Alone amba: “Abewa ne bobe bana ne njibo ya bashenu mukatwikwa kilubo kyo-kyonso kyobalubila kipandulwe,+ kadi abewa ne bobe bana mukatwikwa kilubo kyo-kyonso kyobalubila butobo bwenu.+ 2 Kadi ukafwenya banabenu ba kisaka kya Levi, kisaka kya bankambo obe, amba belunge nobe ne kukwingidila abewa+ ne bobe bana kumeso kwa pema wa Bukamoni.+ 3 Bakavuija biselwa byabo kodi ne ku pema ense mutuntulu.+ Inoko kebafwaninwepo kufwena ku bipungwa bya kifuko kijila ne ku kisōkelo, kutyina’mba mwakafwa ne abo ne banwe bene.+ 4 Bakelunga nobe ne kuvuija biselwa byabo bya ku pema wa kubungakena’ko ne mingilo yonso ya pema, kadi kekwakekala muntu kapelwepo lupusa* wa kufwena komudi.+ 5 Mufwaninwe kuvuija kiselwa kyenu kya ku kifuko kijila+ ne ku kisōkelo,+ kutyina’mba bakafītyilwa mutyima+ monka bantu ba Isalela. 6 Ami mwine nayata banabenu, bene Levi mu bene Isalela ke kyabuntu kyenu.+ Abo i bapebwe kudi Yehova mwanda wa kutala mingilo ya pema wa kubungakena’ko.+ 7 Abewa ne bobe bana mudi na kiselwa kya mingilo ya butobo itala kisōkelo ne byobya bidi munda mwa mpashila,+ kadi mukengila ino mingilo.+ Nemupe mingilo ya butobo bu kyabuntu, kadi muntu ense kapelwepo lupusa* ufwena’ko ukepaibwa.”+

8 Yehova wesamba monka na Alone amba: “Ami mwine nakupe lupusa lwa kutala byabuntu byobantūdila.+ Nakupe abewa ne bobe bana kipindi kya bintu byonso bijila bilambula bene Isalela bu mposo ya nyeke.+ 9 Bino’bi bikekala byobe mu byamulambu bijila nakampata byelwe na mudilo: kyamulambu kyonso kyobalambula, ne byamulambu byabo bya miseke+ ne byamulambu byabo bya bubi+ ne byamulambu byabo bya mambo+ byobandetela. I kintu kijila nakampata kodi ne kudi bobe bana. 10 Ukadīla’byo mu kifuko kijila nakampata.+ Mwana-mulume ense ubwanya kudya’byo. Kikekala kintu kijila kodi.+ 11 Kino nakyo i kyobe: byabuntu byobaleta+ pamo ne byamulambu byonso bya kupēpeja+ bya bene Isalela. Nakupe’byo abe ne bobe bana bana-balume ne bobe bana bana-bakaji bu mposo ya nyeke.+ Muntu ense wampikwa disubi mu yobe njibo ubwanya kudya’byo.+

12 “Māni onso malumbuluke ne vinyu mipya yonso milumbuluke ne miseke, byangulwa byabo bibajinji,+ byobapa Yehova, nakupe’byo.+ 13 Bipa bibajinji byele bya bintu byonso bya mu yabo ntanda, byobakaletela Yehova, bikekala byobe.+ Muntu ense wampikwa disubi mu yobe njibo ubwanya kudya’byo.

14 “Kintu kyonso kitūdīlwe mingilo ikola* mu Isalela kikekala kyobe.+

15 “Umbedi ense wa bintu byonso byūmi*+ obakaletela Yehova, ekale muntu nansha nyema, ukekala obe. Inoko, bine abe ukakūla umbedi wa muntu+ ne bilala-ndá bya banyema ba disubi ukebikūla.+ 16 Ukamukūla na lupoto lwa kukūla shi wabwanya kweji umo ne kukanda, mwendele bulēme butungilwe bwa mashekele*+ atano a ndalama, mungya shekele ya ku kifuko kijila.* I mangela* 20. 17 Kukakūlapo enka ñombe wa kilala-ndá nansha kana ka mukōko kalume ka kilala-ndá nansha mbuji wa kilala-ndá.+ I bintu bijila. Ukakusa mashi abo pa kisōkelo,+ kadi māni abo ukasōka’o bu kyamulambu kyelwe na mudilo kya luvumba luyampe* kudi Yehova.+ 18 Kadi mwita wabo ukekala obe. Ukekalanga obe, pamo’nka na lukudi lwa kyamulambu kya kupēpeja ne kulu kulume.+ 19 Byamulambu byonso bijila bikalambula bene Isalela kudi Yehova,+ nakupe’byo abewa ne bobe bana bana-balume ne bobe bana bana-bakaji bu mposo ya nyeke.+ I kipwano kya mwepo* kya myaka na myaka ku meso a Yehova pa mwanda obe ne lutundu lobe.”

20 Yehova wanena Alone monka’mba: “Abe kukekalapo na bupyani mu ntanda yabo, kadi kukekalapo na kipindi kya ntanda mu bukata mwabo.+ Amiwa ye kipindi kyobe ne bupyani bobe mu bukata mwa bene Isalela.+

21 “Pano tala’po byonapa bana ba Levi kipindi kyonso kya pa bipindi dikumi+ mu Isalela bu bupyani bwabo pa mwanda wa mingilo yobengila, mingilo ya pema wa kubungakena’ko. 22 Bantu ba Isalela kebakafwenapo monka ku pema wa kubungakena’ko, shi bitupu bakapya mambo ne kufwa. 23 Bene Levi bakengila abo bene mingilo ya pema wa kubungakena’ko, kadi i abo bakatwikwa kilubo kyabo.+ I kitungo kya myaka na myaka mu nkongo yenu yonso amba kemukapebwapo bupyani mu bukata mwa bene Isalela.+ 24 Mwanda bupyani bonapa bene Levi i kipindi kimo kya pa bipindi dikumi bilambula bene Isalela, byobakalambula Yehova. O mwanda nebanena’mba: ‘Abo kebakapebwapo bupyani mu bukata mwa bene Isalela.’”+

25 Penepo Yehova wanena Mosesa amba: 26 “Ukalombola bene Levi amba, ‘Mukatambula ku bene Isalela kipindi kimo kya pa bipindi dikumi kyonemupa kobadi bu bupyani bwenu,+ kadi nenu mukayata’ko kipindi kimo kya pa bipindi dikumi mwalambula’kyo bu kyabuntu kudi Yehova.+ 27 Kadi kikamonwa bu kyabuntu kyenu, nansha kikale kya miseke ya pa kipūdilo+ nansha bintu byonso bya ku kyengelo kya vinyu nansha kya māni. 28 Enka nenki mukapa nenu Yehova kyabuntu kya ku bipindi byonso bya dikumi byomutambula ku bene Isalela, kadi mukapa’ko Alone kitobo kyabuntu kya Yehova. 29 Mukalambula kudi Yehova byabuntu bya miswelo yonso bya mu byabuntu byonso bilumbuluke byobemupa+ bu kintu kijila.’

30 “Ukebalombola’mba, ‘Shi mubatūla byabuntu bilumbuluke bya mu bino bintu, bene Levi bakebimona bu bintu bya pa kipūdilo ne bu bintu bya ku kyengelo kya vinyu nansha kya māni. 31 Abewa ne ba mu njibo yobe mubwanya kudya’byo mu kifuko kyo-kyonso, mwanda i mfutwa ya mingilo yenu ya ku pema wa kubungakena’ko.+ 32 Kemukapi’mopo mambo shi mulambula byabuntu bilumbuluke bya mu bino bintu, kadi kemukakobakanyapo bintu bijila bya bene Isalela, kutyina’mba mwakafwa.’”+

19 Yehova wesamba monka na Mosesa ne Alone amba: 2 “Kino’ki kyo kitungo kya kijila kyasoñanya Yehova amba, ‘Lombola bene Isalela amba bafwaninwe kukuyatyila kyana kya ñombe kityila kikomo kyampikwa kabulema+ kadi kekyavwikilwe lupungu. 3 Mukapa’kyo Eleaza kitobo, nandi ukekilupwila panja pa nkambi, kikatapwa ku meso andi. 4 Penepo Eleaza kitobo ukayata’ko mashi akyo na munwe wandi ne kukusa mashi akyo’a misunsa isamba-ibidi dya kumeso kwa pema wa kubungakena’ko.+ 5 Kyana kya ñombe’kya kikasōkwa ku meso andi. Kiseba kyakyo ne mwita wakyo ne mashi akyo pamo ne tuvwi twakyo bikasōkwa.+ 6 Kadi kitobo ukayata mutyi wa sedele, ne kimuna kya hisopa,+ ne bityila pyā webyela mu mudilo obasōka’mo kyana kya ñombe. 7 Ebiya kitobo ukakenda bivwalwa byandi ne koya mema pa ngitu, kupwa ubwanya kutwela mu nkambi; inoko kitobo ukekala wa disubi kufika ne ku kyolwa.

8 “‘Yewa usōka kyana kya ñombe ukakenda bivwalwa byandi mu mema ne koya mema pa ngitu, kadi ukekala wa disubi kufika ne ku kyolwa.

9 “‘Muntu wampikwa disubi ukakongakanya buto bwa kyana kya ñombe+ ne kwibutūla panja pa nkambi mu kifuko kitōka, bukalamwa na kitango kya bene Isalela mwanda wa kulongolola mema akengidijibwa mwanda wa kutōkeja nao.+ I kyamulambu kya bubi. 10 Yewa ukakongakanya buto bwa kyana kya ñombe ukakenda bivwalwa byandi ne kwikala wa disubi kufika ne ku kyolwa.

“‘Kino’ki kikekala kitungo kya myaka na myaka ku bene Isalela ne ku mweni ushikete mu bukata mwabo.+ 11 Muntu ense utenga muntu mufwe* ukekala wa disubi mafuku asamba-abidi.+ 12 Yao muntu ufwaninwe kwitōkeja na mema* mu difuku dya busatu, kadi mu difuku dya busamba-bubidi ukekala wampikwa disubi. Ino shi ketōkejepo mu difuku dya busatu, nankyo mu difuku dya busamba-bubidi kakekalapo wampikwa disubi. 13 Yewa ense utenga ngitu ya muntu mufwe* ne kwitōkeja mpika wasubija kipema+ kya Yehova, kadi yao muntu* ufwaninwe kutyibwa’ko* mu Isalela.+ Mwanda mema a kutōkeja+ nao keamukushilwepo, ukidi wa disubi. Disubi dyandi dikidi padi.

14 “‘Kino’ki kyo kijila kya kulonda shi muntu wafwila mu pema: Yewa ense utwela mu pema ne ense wadi kala mu pema ukekala wa disubi mafuku asamba-abidi. 15 Kintu kyonso kidi pululu kyampikwa mpūto mikutyile’ko i kya disubi.+ 16 Yewa ense udi mu ntanda utenga muntu wipailwe na kipete nansha ngitu mifwe nansha mukupa wa muntu nansha kibundu, ukekala wa disubi mafuku asamba-abidi.+ 17 Bakayatyila’ko muntu wa disubi’wa buto bwa kyamulambu kya bubi kyasōkelwe, bebwela mu kintu, ne kupungulwila’po mema a mulungu. 18 Penepo muntu wampikwa disubi+ ukayata kimuna kya hisopa,+ wekitubika mu mema ne kukusa’o ku pema ne ku bintu byonso ne ku bantu* badi’mo ne ku yewa watengele mukupa nansha muntu mwipaibwe nansha ngitu mifwe nansha kibundu. 19 Muntu wampikwa disubi’wa ukeakusa yewa wa disubi mu difuku dya busatu ne mu difuku dya busamba-bubidi, kadi ukamutōkeja ku bubi mu difuku dya busamba-bubidi;+ ebiya ukakenda bivwalwa byandi ne koya mema, penepa ukekala wampikwa disubi ku kyolwa.

20 “‘Ino muntu wa disubi ketōkejepo, yao muntu* ufwaninwe kutyibwa’ko* mu kipwilo,+ mwanda wasubija kipandulwe kya Yehova. Mema a kutōkeja nao keamukushilwepo, aye i wa disubi.

21 “‘Kino’ki kikekalanga kitungo kyabo kya myaka na myaka: Yewa ukusa mema a kutōkeja nao+ ufwaninwe kukenda bivwalwa byandi, kadi yewa utenga mema a kutōkeja nao ukekala wa disubi kufika ne ku kyolwa. 22 Kintu kyonso kitenga muntu* wa disubi kikekala kya disubi, kadi muntu utenga’kyo ukekala wa disubi kufika ne ku kyolwa.’”+

20 Mu kweji mubajinji, kitango kyonso kya bene Isalela kyaile mu ntanda mutuputupu ya Zine, bantu baanza kwikala mu Kadesha.+ E ako kwafwidile Midiamu+ wajīkwa konka.

2 Ino kekwadipo mema a kitango,+ ebiya bebunga kulwa ba Mosesa ne Alone. 3 Bantu badi kebapotomeja Mosesa,+ amba: “Shi twafwile’tu pafwile banabetu ku meso a Yehova! 4 I kika kyowaselele kipwilo kya Yehova muno mu ntanda mutuputupu mwanda wa tufwile muno ne bimunanwa byetu?+ 5 Ne i kika kyowetulupwidile mu Edipito koiya netu mu kino kifuko kibi?+ Ke kifukopo kya nkunwa ne bikuyu ne mañanza ne mityi ya mangelenade, kadi kemudipo nansha mema a kutoma mene.”+ 6 Penepo ba Mosesa ne Alone bataluka ku meso a kipwilo baiya ku kibelo kya pema wa kubungakena’ko bapona mapala abo pa nshi, ne ntumbo ya Yehova yashilula kwibamwekela.+

7 Penepo Yehova wanena Mosesa amba: 8 “Yata mukombo ukongakanye kitango pamo, abe ne Alone mwanenu, munene kidibwe ku meso abo amba kilete mema akyo, kadi ukebalupwila mema ku kidibwe upe kitango ne bimunanwa byabo batome.”+

9 Ebiya Mosesa wayata mukombo ku meso a Yehova,+ monka mwaamusoñaninye. 10 Penepo ba Mosesa ne Alone bakongakanya kipwilo kumeso kwa kidibwe, kaebanena’mba: “Pano ivwanai, banwe bantomboki! Le twimutambijije mema ku kino kidibwe?”+ 11 Ponkapo Mosesa watulula kuboko kwandi mūlu wakupila mukombo wandi ku kidibwe misunsa ibidi, mema mangi kealondomoka, kadi kitango ne bimunanwa byabo kebatome.+

12 Kupwa Yehova wanena ba Mosesa ne Alone amba: “Byokemulombwelepo lwitabijo mudi ami ne kumpandula ku meso a bantu ba Isalela, kemukatwejapo kino kipwilo mu ntanda yonkebapa.”+ 13 Ano’a i mema a Mediba,*+ kwine kobapotomeje Yehova kudi bene Isalela, nandi wapandulwa umbukata mwabo.

14 Penepo Mosesa watuma mikendi tamba ku Kadesha yaenda kudi mulopwe wa Edoma’mba:+ “Mwanenu Isalela+ wanena namino amba, ‘Uyukile biyampe masusu onso otwasusukile. 15 Batata baendele ku Edipito,+ kadi twaikele mu Edipito myaka mingi,*+ bene Edipito betususwile batwe ne batata.+ 16 Ku mfulo twadidila Yehova+ nandi wetwivwana watuma mwikeulu+ wetulupula mu Edipito, pano tudi mu Kadesha, kibundi kya ku mukalañano na yobe ntanda. 17 Tubakwisāshila wituleke tupityile mu yobe ntanda. Ketusapo kupityila mu budimi nansha mu budimi bwa mañanza nansha bumo, kadi ketusapo kutoma mema a mushimwa nansha umo. Tukenda’tu mu Dishinda dya Mulopwe kwampikwa kwalamukila ku lundyo nansha ku lunkuso kufika ne byotupita yobe ntanda.’”+

18 Inoko, Edoma wamunena’mba: “Kubwanyapo kupityila mu yetu ntanda. Shi upite’mo, nsa kutamba kukusambakana na kipete.” 19 Bene Isalela nabo bamunena’mba: “Tusa kukanda mu dishinda dikatampe, kadi shi batwe ne bimunanwa byetu tubatome obe mema, nankyo tukafutyila’o.+ Kyotusaka’tu i kupityila’mo lwa nshi.”+ 20 Aye webatentulula’mba: “Kemubwanyapo kupityila’mo.”+ Ebiya Edoma watamba kukamusambakana na bantu bavule ne kibumbo* kikomo kya divita. 21 Penepo Edoma wapela Isalela kupityila mu yandi ntanda; o mwanda Isalela wamusāsukile.+

22 Bantu ba Isalela, kitango kyonso kituntulu, bataluka ku Kadesha baenda ku Lūlu lwa Hola.+ 23 Penepo Yehova wanena ba Mosesa ne Alone mu Lūlu lwa Hola dya ku mukalañano wa ntanda ya Edoma amba: 24 “Alone usa kulungwa ku bantu bandi.*+ Kakatwelapo mu ntanda yonkapa bene Isalela, mwanda banwe bonso bubidi mwatombokēle musoñanya wami utala mema a Mediba.+ 25 Sela Alone ne wandi mwana Eleaza ukande nabo mu Lūlu lwa Hola. 26 Vūla Alone bivwalwa+ uvwike’byo Eleaza+ wandi mwana, kadi Alone usa kufwila konka.”*

27 Ebiya Mosesa walonga monka mwasoñaninye Yehova, bakanda mu Lūlu lwa Hola ku meso a kitango kyonso. 28 Penepo Mosesa wavūla Alone bivwalwa wavwika’byo Eleaza wandi mwana. Kupwa Alone wafwila konka pa mutwe wa lūlu.+ Mosesa ne Eleaza batūka ku lūlu. 29 Kitango kyonso pokyamwene amba Alone wafu, njibo yonso ya Isalela yadila Alone mafuku 30.+

21 Mulopwe wa Alada+ mwine Kenani, wadi wikele mu Nengeba, pa kwivwana’mba Isalela waiya mu dishinda dya Atadimi, wakatamba Isalela bulwi ne kusela bamo mu bukata mwabo bu misungi. 2 Penepo Isalela wapika ino mpiko kudi Yehova amba: “Shi umpe bano bantu mu kuboko kwami, nankyo binebine nkonakanya fututu bibundi byabo.” 3 Ebiya Yehova waivwana diwi dya Isalela, webapa bene Kenani, bebonakanya fututu pamo ne bibundi byabo. O mwanda bainikile kifuko’kya bu Holama.*+

4 Pobadi bakidi mu lwendo batamba ku Lūlu lwa Hola+ mu dishinda dya ku Dijiba Dityila mwa kukonkolokela ntanda ya Edoma,+ bantu* bakōka lwendo. 5 Kadi bantu badi banena Leza ne Mosesa+ amba: “I kika le kyomwetulupwidile mu Edipito mwanda wa tufwile mu ntanda mutuputupu? Kemudipo byakudya nansha mema+ mene, kadi batwe* tubashikwe* ino mikate mibimibi.”+ 6 Penepo Yehova watuma banyoka ba bulembe* mu bantu, kebasume bantu, ebiya bene Isalela bangi bafwa.+

7 Ponkapo bantu baiya kudi Mosesa kebanena’mba: “Tubajilula pa kunena Yehova ne abe mwine bibi.+ Witusengele Yehova etutalule banyoka.” Ebiya Mosesa wasengela bantu’ba.+ 8 Penepo Yehova wanena Mosesa amba: “Longa kyelekejo kya nyoka wa bulembe* umukobeke ku mutyi. Shi muntu wasumwe na nyoka, ukatala’ko amba ekale mūmi. 9 Ponkapo Mosesa walonga nyoka wa mukuba,+ wamukobeka ku mutyi,+ kadi ponso padi pasumwa muntu na nyoka, shi watala ku nyoka wa mukuba’wa, wadi upanda.+

10 Kupwa bene Isalela bataluka bakatūla nkambi mu Obota.+ 11 Ebiya bataluka ku Obota bakatūla nkambi mu Iye-Abadime,+ mu ntanda mutuputupu itadidile na Moabu, dya kutunduka. 12 Bataluka papo bakatūla nkambi mu Musanza* wa Zelede.+ 13 Bataluka papo bakatūla nkambi mu ntanda ya Alenona+ idi mu ntanda mutuputupu ishilwila ku mukalañano wa bene Amole, mwanda Alenona i mukalo wa Moabu, pa bukata bwa Moabu ne bene Amole. 14 O mwanda mukanda wa Mavita a Yehova utela “Vaheba mu Sufa ne misanza* ya Alenona, 15 ne kinekaneka* kya misanza,* kikafika ne ku kifuko kya Ale kadi kisambakene na mukalo wa Moabu.”

16 Kupwa baenda ku Bēle. Uno’u o mushimwa obanenene Mosesa kudi Yehova amba: “Kongakanya bantu, nebape mema.”

17 Penepa Isalela waimba luno lwimbo amba:

“A mushimwa, londomoka!—Tundaijai!*

Penepo bataluka mu ntanda mutuputupu baenda ku Matana, 19 bataluka ku Matana baenda ku Nahadyele, kadi bataluka ku Nahadyele baenda ku Bamota.+ 20 Bataluka ku Bamota baenda mu musanza udi mu ntanda* ya Moabu+ pa mutwe wa Pisika,+ utadidile Yeshimone.*+

21 Penepo Isalela watuma mikendi kudi Shihone, mulopwe wa bene Amole amba:+ 22 “Wituleke tupite mu yobe ntanda. Ketusapo kusāsukila mu budimi nansha mu budimi bwa mañanza. Ketukatomepo mema a mushimwa nansha umo. Tukenda’tu mu Dishinda dya Mulopwe kufika ne byotupita yobe ntanda.”+ 23 Ino Shihone kalekelepo Isalela apityile mu yandi ntanda. Shihone wakongakanya bantu bandi bonso, watamba kukalwa na Isalela mu ntanda mutuputupu, waiya ku Yahaza kalu na Isalela.+ 24 Ino Isalela wamunekenya na kipete+ wayata ne yandi ntanda+ tamba ku Alenona+ kutūla ne ku Yaboko+ kubwipi na bene Amone, mwanda Yazele+ ye mukalo wa ntanda ya bene Amone.+

25 Penepo Isalela wakwata bino bibundi byonso, bashilula kwikala mu bibundi byonso bya bene Amole,+ mu Heshebone ne bibundi byonso bidi mu bwendeji bwandi.* 26 Mwanda Heshebone kyadi kibundi kya Shihone mulopwe wa bene Amole, walwile na mulopwe wa Moabu wamuyata ntanda yandi yonso kufika ne ku Alenona. 27 Kino kyo kyalupwile lukindi lwa kibengo amba:

“Iyai ku Heshebone.

Kibundi kya Shihone kyūbakwe ne kukomejibwa pototo.

28 Mwanda mudilo watambile ku Heshebone, lubimbi ku kibundi kya Shihone.

Wasōka Ale ne Moabu, bamfumu ba mitenta ya Alenona.

29 Malwa obe abe Moabu! Mukonakanibwanga, banwe bantu ba Kemoshi!+

Wanyemeja bandi bana bana-balume ne kuseleja bandi bana bana-bakaji bu misungi ya Shihone, mulopwe wa bene Amole.

Longa tumusalei kufika ne ku Nofa;

Mudilo ukasambakana kufika ne ku Medeba.”+

31 Penepo Isalela washilula kwikala mu ntanda ya bene Amole. 32 Ebiya Mosesa watuma bana-balume bamo kukabela Yazele.+ Bakwata bibundi bidi mu bwendeji bwandi,* bapanga ne bene Amole badi’mo. 33 Kupwa baalamuka kebakanda mu Dishinda dya Bashane. Oka+ mulopwe wa Bashane watamba na bantu bandi bonso kukebasambakana na bulwi ku Edelei.+ 34 Yehova wanena Mosesa amba: “Kokimukwatwa moyo,+ mwanda nkakupa’ye mu kuboko kobe+ ne aye ne bantu bandi bonso ne ntanda yandi, kadi ukamulonga’nka mowalongele Shihone mulopwe wa bene Amole, wadi ushikata mu Heshebone.”+ 35 Penepo bamwipaya, ne bandi bana ne bantu bandi bonso, kufika ne byokekwapandilepo muntu wandi nansha umo,+ ebiya bayata ntanda yandi.+

22 Penepo bene Isalela bataluka bakatūla nkambi mu malungu a Moabu mudi zolē bobwa bukila bwa Yodano kampalampala na Yediko.+ 2 Ebiya Balake+ mwanā Zipole wamona byonso byobalongele bene Amole kudi Isalela, 3 kadi Moabu wakwatwa bantu’ba moyo, mwanda badi bangi bininge; bine, Moabu wabelele moyo pa mwanda wa bene Isalela.+ 4 Penepo Moabu wanena bakulumpe ba Midyana+ amba: “Pano kino kipwilo kisa kusasamuna byonso bitujokolokele, enka musasamwinanga ñombe biyombo mu ntanda.”

Balake mwanā Zipole ye wadi mulopwe wa Moabu mu kine kitatyi’kya. 5 Penepa watuma mikendi kudi Balame mwanā Beole ku Petole,+ dya ku Dijiba* mu ntanda yabo. Wamwityija’mba: “Tala! Kudi bantu batamba mu Edipito. Tala! I bapūte ntanda+ yonso, kadi bashikete’tu ku meso ami. 6 Shi ke pano, nakwisāshila, iya umfingile bano bantu,+ mwanda i bakomo kumpita. Kepabulwe padi nkokeja kwibanekenya ne kwibapanga mu ino ntanda, mwanda ndyukile biyampe amba yewa oesela i mweselwe kadi yewa ofinga i mufingwe.”

7 Ebiya bakulumpe ba Moabu ne bakulumpe ba Midyana bataluka na mfutwa ya lubuko ku makasa abo baenda kudi Balame,+ bamulombola musapu wa Balake. 8 Nandi webatentulula’mba: “Lālai kuno, nsa kwiya kwimusapwila binenwa byonso bisa kunombola Yehova.” Penepa bamfumu ba Moabu bashikata na Balame.

9 Penepo Leza waiya kudi Balame, kamunena’mba:+ “Le bano bantu bodi nabo i bāni?” 10 Balame walondolola Leza wa bine amba: “Balake mwanā Zipole, mulopwe wa Moabu, wantumina musapu amba, 11 ‘Tala! Bantu batamba mu Edipito abapūta ntanda yonso. Shi ke pano iya umfingile’bo.+ Kepabulwe padi nkabwanya kulwa nabo ne kwibapanga.’” 12 Ino Leza wanena Balame amba: “Kufwaninwepo kwenda nabo. Kufwaninwepo kufinga bantu’ba, mwanda i beselwe.”+

13 Balame wabūka lubanga, wanena bamfumu ba Balake amba: “Endai ku yenu ntanda, mwanda Yehova wampeleja kwenda nenu.” 14 Penepo bamfumu ba Moabu bataluka, bakajokela kudi Balake kebamusapwila’mba: “Balame wapele kwiya netu.”

15 Ino Balake watuma monka bamfumu, bangi bininge kadi balēmekibwe kutabuka babajinji. 16 Baiya kudi Balame kebamunena’mba: “Balake mwanā Zipole wanena namino amba, ‘Nakwisāshila, kokaleka kintu nansha kimo kikukankaje kwiya kondi, 17 mwanda nkakulēmeka bininge kadi nkakulongela kyonso kyokanena kulonga. Nakwisāshila, iya umfingile bano bantu.’” 18 Ino Balame walondolola bengidi ba Balake amba: “Nansha shi Balake ampe njibo yandi miyule ndalama ne olo, nkibwanyapo kulonga kintu nansha kimo kitabuka musoñanya wa Yehova Leza wami, kikale kityetye nansha kikatampe.+ 19 Ino nemwisāshilai, shikatai kuno ne buno bufuku, amba ndyuke i bika bikwabo bisa kunombola Yehova.”+

20 Penepo Leza waiya kudi Balame bufuku kamunena’mba: “Shi bano bantu i bāye kukwita, enda nabo. Ino ukesamba enka binenwa byonkakulombola kunena’bya.”+ 21 Ebiya Balame wabūka lubanga, wavwika mpunda* wandi kishikato kaenda na bamfumu ba Moabu.+

22 Ino bulobo bwa Leza bwaaka mwanda waendele, mwikeulu wa Yehova waimana mu dishinda kumukankaja. Balame wadi ukandile pa mpunda wandi, ne bengidi bandi babidi badi nandi. 23 Mpunda pa kumona mwikeulu wa Yehova wimene mu dishinda na kipete kisomone mu kuboko kwandi, kasake kusāsuka mu dishinda ende mu budimi. Ino Balame washilula kukupila mpunda mwanda wa ajokele mu dishinda. 24 Penepo mwikeulu wa Yehova waimana mu kashinda katyetye kadi pa bukata bwa madimi abidi a mañanza, a mumbu ya mabwe bukila ne bukila. 25 Mpunda pa kumona mwikeulu wa Yehova, washilula kwityininya ku lubumbu, wafininya ne Balame kulu ku lubumbu, penepa Balame waanza kumukupila monka.

26 Ebiya mwikeulu wa Yehova wapita monka, waimana pa kakyaba katyetye pakomo mwa kwalamukila ku lundyo nansha ku lunkuso. 27 Mpunda pa kumona mwikeulu wa Yehova, walāla panshi aye Balame ukandile’po, penepo Balame waloba kakupila mpunda mukombo wandi. 28 Ku mfulo Yehova waneneja mpunda,*+ nandi wanena Balame amba: “Le nakulonga bika byowankupidila ino misunsa isatu?”+ 29 Balame walondolola mpunda’mba: “I mwanda ubaunembakanya. Shi nadi’tu na kipete mu kuboko kwami, longa nakwipaya!” 30 Penepo mpunda wanena Balame amba: “Mwene amiwa ye mpunda obe okandanga’po mu būmi bobe bonso kufika ne dyalelo? Le kendi mukulonge monka uno muswelo?” Nandi walondolola’mba: “Aa!” 31 Penepo Yehova wapūtula Balame meso,+ wamona mwikeulu wa Yehova wimene mu dishinda na kipete kisomone mu kuboko kwandi. Ponkapo wafukata panshi kaevukwila ku meso andi.

32 Penepo mwikeulu wa Yehova wamunena’mba: “I kika le kyowakupidila mpunda obe ino misunsa isatu? Tala! Ami mwine nadi naiya kukukankaja, mwanda lwendo lobe kelukwatañenepo na kiswa-mutyima kyami.+ 33 Mpunda waumonanga, kasake kunsāsuka ino misunsa isatu.+ Langa’po bidi shi kaunsāsukilepo! Longa panenwa pano kendi mukwipaye ino mpunda aye washala mūmi.” 34 Balame watentulula mwikeulu wa Yehova amba: “Napi mambo, mwanda nkyadipo ndyukile amba i abewa wadi wimene mu dishinda kunsambakana. Shi i bibi ku meso obe, nankyo njoke.” 35 Ino mwikeulu wa Yehova wanena Balame amba: “Enda na bano bantu, ino ukesamba enka binenwa byonkakulombola.” Penepo Balame waenda na bamfumu ba Balake.

36 Balake pa kwivwana’mba Balame waiya, watamba bukidibukidi kukamutundaila ku kibundi kya Moabu, kidi ku lubungo lwa Alenona ku mukalañano wa ntanda. 37 Balake wanena Balame amba: “Mwene natumine bantu kukwita? Mwanda waka kwailepo kondi? Le wadi ulanga’mba nkibwanyapo kukulēmeka bikatampe?”+ 38 Balame walondolola Balake amba: “Pano naiya kodi. Ino le nkokeja kupebwa lupusa lwa kunena kintu? Nkesamba enka binenwa bitūla Leza mu kyakanwa kyami.”+

39 Penepo Balame waenda na Balake, bafika ku Kidiata-Huzota. 40 Balake watapa bitapwa bya bañombe ne mikōko, watumina’ko ne Balame ne bamfumu baadi nabo. 41 Lubanga Balake wasela Balame wakanda nandi ku Bamote-Bāla; kwine’kwa wadi ubwanya kumona bantu bonso.+

23 Penepo Balame wanena Balake amba: “Shimika pa kino kifuko bisōkelo bisamba-bibidi,+ unongolwele ne bañombe basamba-babidi ne mikōko milume isamba-ibidi.” 2 Ponkapo Balake walonga monka mwanenene Balame. Ba Balake ne Balame balambula ñombe ne mukōko pa kisōkelo ne kisōkelo.+ 3 Ebiya Balame wanena Balake amba: “Abe shala pano kubwipi na kyamulambu kyobe kisōkwe, ami keñenda. Uyuka Yehova usa kwisamba nami. Byonso byasa kunsokwela, nsa kukulombola’byo.” Penepa wakanda ku mukuna.

4 Leza wesamba na Balame,+ nandi wamusapwila’mba: “Nashimika bisōkelo bisamba-bibidi mu milongo, nalambula’po ne ñombe ne mukōko pa kisōkelo ne kisōkelo.” 5 Yehova watūla kino kinenwa mu kyakanwa kya Balame+ amba: “Jokela kudi Balake, kadi bino’bi e byokanena.” 6 Ebiya wajoka wamona Balake ne bamfumu bonso ba Moabu bemene kubwipi na kyamulambu kyandi kisōkwe. 7 Penepa wanena mu nkindi namino amba:+

‘Iya umfingile Yakoba.

En-en, iya utuluje Isalela.’+

 8 Le nkokeja namani kufinga boba kebafingilwepo na Leza?

Ne kadi nkokeja namani kutuluja boba bokebatulwijepo kudi Yehova?+

11 Penepo Balake wanena Balame amba: “I bika byowaunonga? Nakuselele ufinge balwana nami, pano kulongelepo kintu ino ubebesela’tu.”+ 12 Nandi walondolola’mba: “Le nkifwaninwepo kwisamba kyonso kitūla Yehova mu kyakanwa kyami?”+

13 Balake wamunena’mba: “Nakwisāshila twaya ku kifuko kikwabo kobwanya kwibamona. Ukamona’ko’tu bamo kete; kukebamonepo bonso. Mfingile’bo kwine’kwa.”+ 14 Ebiya wamuselela mu ntanda ya Zofimi, peulu pa Pisika,+ kadi waubaka bisōkelo bisamba-bibidi walambula ñombe ne mukōko pa kisōkelo ne kisōkelo.+ 15 Penepo Balame wanena Balake amba: “Abe shala pano kubwipi na kyamulambu kyobe kisōkwe pano ponkesamba nandi kokwa.” 16 Yehova wesamba na Balame watūla kino kinenwa mu kyakanwa kyandi amba:+ “Jokela kudi Balake, kadi bino’bi e byokanena.” 17 Nandi waiya kwadi wamumona wilaije kubwipi na kyamulambu kyandi kisōkwe, ne bamfumu ba Moabu badi nandi. Balake wamwipangula’mba: “Le Yehova wanena bika?” 18 Penepa wanena mu nkindi namino amba:+

“Taluka, a Balake, teja.

Ngivwane, a mwanā Zipole.

Shi wanena kintu, le kakekilongapo?

Shi wesambe, le kakekifikidijapo?+

22 Leza ye wibatambija mu Edipito.+

Udi pamo bwa masengo a ñombe wa ntanda kobadi.+

Pano bakokeja kunena pa mwanda wa Yakoba ne Isalela amba:

‘Talai byalonga Leza!’

25 Penepo Balake wanena Balame amba: “Shi kubwanyapo kumufinga, nankyo kufwaninwepo ne kumwesela kwine.” 26 Balame walondolola Balake amba: “Le nkyakulombwelepo amba, ‘Nkalonga byonso binena Yehova’?”+

27 Balake wanena Balame amba: “Nakwisāshila iya nkakutūle ku kifuko kikwabo. Uyuka kikekala kyoloke ku meso a Leza wa bine amba ukamfingile’ye kwine’kwa.”+ 28 Ebiya Balake waenda na Balame peulu pa Peole, utadidile ku Yeshimone.*+ 29 Penepo Balame wanena Balake amba: “Shimika bisōkelo bisamba-bibidi pa kino kifuko, unongolwele ne bañombe basamba-babidi ne mikōko milume isamba-ibidi.”+ 30 Ebiya Balake walonga monka mwanenene Balame, walambula ñombe ne mukōko pa kisōkelo ne kisōkelo.

24 Balame pa kumona’mba bibasangaja* Yehova kwesela Isalela, kaendelepo monka kukakimba mitāmu,+ ino watadidile mpala yandi mu ntanda mutuputupu. 2 Balame pa kutulula meso andi wamona Isalela utūdile nkambi mwendele bisaka byandi,+ kupwa mushipiditu wa Leza wamutūkila.+ 3 Penepa wanena mu nkindi+ namino amba:

10 Penepo Balake walobela Balame. Balake wakupila bikufi byandi bya kibengo kanena Balame amba: “Kyonakwityile i kufinga balwana nami,+ pano kulongelepo kintu ino ubebesela ke misunsa isatu. 11 Nanshi enda kwenu enka pano. Nadi nsaka kukulēmeka bininge,+ ino tala! Yehova wakubudija bulēme.”

12 Balame walondolola Balake amba: “Le nkyalombwelepo mikendi yowatumine amba, 13 ‘Nansha shi Balake ampe njibo yandi miyule ndalama ne olo, nkibwanyapo kulonga na kiswa-mutyima kyami* kintu nansha kimo kitabuka musoñanya wa Yehova, kikale kiyampe nansha kibi. Nkesamba enka byobya bikanombola Yehova’?+ 14 Pano keñenda kudi bantu bami. Iya nkulombole bano bantu byobakalonga bobe bantu mu mafuku a kumeso.* 15 Penepo wanena mu nkindi+ namino amba:

20 Pawamwene Amaleke, wanenene monka mu nkindi yandi amba:

21 Pawamwene bene Kena,+ wanenene monka mu nkindi yandi amba:

“Kīkalo kyobe i kininge, kadi kīkalo kyobe i kitūlwe pa kidibwe.

22 Ino muntu umo ukasōka Kaina.

Le kubashala bitatyi binga bene Ashidia bakusele bu musungi?”

23 Wanenene monka mu nkindi yandi amba:

“Yō malwa! I ani le ukashala mūmi shi Leza walonga kino?

Ino ne aye mwine ku mfulo ukoneka.

25 Penepo Balame+ wataluka kaenda kukajokela kwandi. Balake nandi waenda dyandi.

25 Isalela paadi wikele mu Shityime,+ bantu bashilwile kulonga busekese na bana ba Moabu bana-bakaji.+ 2 Bana-bakaji baita bantu ku bitapwa bya baleza babo,+ bantu nabo baanza kudya ne kwivukwila kudi baleza babo.+ 3 Penepo Isalela welunga ku butōtyi bwa* Bāla wa Peole,+ Yehova nandi wakalabela Isalela. 4 Yehova wanena Mosesa amba: “Kwata batangidiji* bonso ba bano bantu’ba wibayeyeke ku meso a Yehova mu dyuba kampumpu,* mwanda wa bulobo budyendyemuka bwa Yehova butaluke padi Isalela.” 5 Ebiya Mosesa wanena batyibi ba Isalela+ amba: “Umo ne umo ufwaninwe kwipaya bantu bandi belungile ku butōtyi bwa* Bāla wa Peole.”+

6 Ino ponkapo, kwaiya mwine Isalela umo wafwenya mwana-mukaji mwine Midyana+ kudi banababo ku meso a Mosesa ne kitango kyonso kya bene Isalela, pobadi badila pa kibelo kya pema wa kubungakena’ko. 7 Finease+ mwanā Eleaza mwanā Alone kitobo pa kumona kino, waimana bukidi bonka umbukata mwa kitango wasela mukobe* mu kuboko kwandi. 8 Kupwa wakalonda yewa mwana-mulume wa Isalela mu pema, webasabakanya bonso bubidi, mwana-mulume wa Isalela ne mwana-mukaji mu difu. Ebiya kimpengele kyadi pa bene Isalela kyaleka’byo.+ 9 Boba bafwile ku kimpengele bafikile pa bantu 24 000.+

10 Penepo Yehova wanena Mosesa amba: 11 “Finease+ mwanā Eleaza mwanā Alone kitobo wapu bulobo bwami padi bantu ba Isalela mwanda aye kasakangapo muntu kwitāka nami umbukata mwabo.+ O mwanda nkikubijepo bene Isalela nansha byonsaka kulamatwa bunka.+ 12 Nanshi, nena’mba, ‘Nsa kusamba nandi kipwano kya ndoe. 13 Kadi kikekala bu kipwano kya butobo bwa myaka na myaka kudi aye ne lutundu lwandi lukamulonda,+ mwanda aye kasakangapo muntu kwitāka na Leza+ wandi kadi wapūtyila bantu ba Isalela bubi.’”

14 Dijina dya mwana-mulume mwine Isalela waipailwe pamo na mwana-mukaji mwine Midyana i Zimidi mwanā Salu, mfumu wa njibo ya bashandya bene Shimioni. 15 Dijina dya mwana-mukaji mwine Midyana waipailwe i Kozibi mwanā Zula+ mwana-mukaji; uno’u wadi mutangidiji wa bisaka bya njibo ya bashabo mu Midyana.+

16 Kupwa Yehova wanena Mosesa amba: 17 “Katambei bene Midyana mwibepaye,+ 18 mwanda abemutambe na bilongwa byabo bya bukosoke mu mwanda wa Peole+ ne wa Kozibi mwanā mfumu wa Midyana, mwanabo mwana-mukaji waipailwe+ mu difuku dya kimpengele pa owa mwanda wa Peole.”+

26 Kimpengele+ pa kupwa, Yehova wanena Mosesa ne Eleaza mwana Alone kitobo amba: 2 “Balai kitango kyonso kya bene Isalela kushilwila ku wa myaka 20 kokanda, mwendele mobo a bashabo, mubale boba bonso babwanya kwingila mu kibumbo kya divita mu Isalela.+ 3 Penepo ba Mosesa ne Eleaza+ kitobo besamba nabo mu malungu a Moabu+ mudi zolē kubwipi na Yodano ku Yediko+ amba: 4 “Mwibabalei kushilwila ku wa myaka 20 kokanda, monka mobasoñaninye Mosesa+ kudi Yehova.”

Ino bana ba Isalela batambile mu ntanda ya Edipito i: 5 Lubeni+ umbedi wa Isalela; bana ba Lubeni bana-balume+ i bano: kudi Hanoki, kisaka kya bene Hanoki, kudi Palu, kisaka kya bene Palu; 6 kudi Hezelone, kisaka kya bene Hezelone; kudi Kalami, kisaka kya bene Kalami. 7 Bino’bi byo bisaka bya bene Lubeni, kadi bantu babo babadilwe bafikile pa bantu 43 730.+

8 Mwanā Palu mwana-mulume i Ediabu. 9 Kadi bana ba Ediabu bana-balume i Nemuele, Datani, ne Abilama. Uno Datani ne Abilama bo badi batongwe mu kitango badi balwa na Mosesa+ ne Alone pamo na kibumbo kya Kola+ kitatyi kyobalwile na Yehova.+

10 Penepo ntanda yashituka* yebamina kubyu. Ino Kola wafwa ne boba badi bamwitabīle kitatyi kyasōkelwe bantu 250 na mudilo.+ Baikala ke kimfwa kya kudyumukila’po.+ 11 Inoko bana ba Kola kebafwilepo.+

12 Bana ba Shimioni+ bana-balume mwendele bisaka byabo i bano: kudi Nemuele, kisaka kya bene Nemuele; kudi Yamine, kisaka kya bene Yamine; kudi Yakine, kisaka kya bene Yakine; 13 kudi Zela, kisaka kya bene Zela; kudi Shaulu, kisaka kya bene Shaulu. 14 Bino’bi byo bisaka bya bene Shimioni: bantu 22 200.+

15 Bana ba Ngade+ bana-balume mwendele bisaka byabo i bano: kudi Zefone, kisaka kya bene Zefone; kudi Haki, kisaka kya bene Haki; kudi Shuni, kisaka kya bene Shuni; 16 kudi Ozeni, kisaka kya bene Ozeni; kudi Ēdi, kisaka kya bene Ēdi; 17 kudi Aloda, kisaka kya bene Aloda; kudi Aledi, kisaka kya bene Aledi. 18 Bino’bi byo bisaka bya bana ba Ngade bana-balume, kadi bantu babo babadilwe i bantu 40 500.+

19 Bana ba Yuda+ bana-balume i Ela ne Onani.+ Inoko Ela ne Onani bafwile mu ntanda ya Kenani.+ 20 Kadi bana ba Yuda bana-balume mwendele bisaka byabo i bano: kudi Shela,+ kisaka kya bene Shela; kudi Peleze,+ kisaka kya bene Peleze; kudi Zela,+ kisaka kya bene Zela. 21 Kadi bana ba Peleze bana-balume i bano: kudi Hezelone,+ kisaka kya bene Hezelone; kudi Hamulu,+ kisaka kya bene Hamulu. 22 Bino’bi byo bisaka bya bana ba Yuda bana-balume, kadi bantu babo babadilwe i bantu 76 500.+

23 Bana ba Isakala+ bana-balume mwendele bisaka byabo i bano: kudi Tola,+ kisaka kya bene Tola; kudi Puva, kisaka kya bene Puni; 24 kudi Yashuba, kisaka kya bene Yashuba; kudi Shimelona, kisaka kya bene Shimelona. 25 Bino’bi byo bisaka bya bana ba Isakala bana-balume, kadi bantu babo babadilwe i bantu 64 300.+

26 Bana ba Zebuluna+ bana-balume mwendele bisaka byabo i bano: kudi Seleda, kisaka kya bene Seleda; kudi Elona, kisaka kya bene Elona; kudi Yalela, kisaka kya bene Yalela. 27 Bino’bi byo bisaka bya bene Zebuluna, kadi bantu babo babadilwe i bantu 60 500.+

28 Bana ba Yosefa+ bana-balume mwendele bisaka byabo i bano: Manase ne Efelaimi.+ 29 Bana ba Manase+ bana-balume i bano: kudi Makile,+ kisaka kya bene Makile; kadi Makile wabutwile Ngileade;+ kudi Ngileade, kisaka kya bene Ngileade. 30 Bano’ba bo bana ba Ngileade bana-balume: kudi Yezele, kisaka kya bene Yezele; kudi Heleke, kisaka kya bene Heleke; 31 kudi Asediele, kisaka kya bene Asediele; kudi Shekema, kisaka kya bene Shekema; 32 kudi Shemida, kisaka kya bene Shemida; kudi Hefele, kisaka kya bene Hefele. 33 Ino Zelofehade mwanā Hefele mwana-mulume kadipo na bana bana-balume, ino wadi enka na bana-bakaji,+ kadi majina a bana ba Zelofehade+ bana-bakaji i Mahala, Noa, Hokela, Milaka, ne Tiza. 34 Bino’bi byo bisaka bya Manase, kadi bantu babo babadilwe i bantu 52 700.+

35 Bano’ba bo bana ba Efelaimi+ bana-balume mwendele bisaka byabo: kudi Shutela,+ kisaka kya bene Shutela; kudi Bekela, kisaka kya bene Bekela; kudi Tahane, kisaka kya bene Tahane. 36 Kadi bano nabo bo bana ba Shutela bana-balume: kudi Elana, kisaka kya bene Elana. 37 Bino’bi byo bisaka bya bana ba Efelaimi bana-balume, kadi bantu babo babadilwe i bantu 32 500.+ Bano’ba bo bana ba Yosefa bana-balume mwendele bisaka byabo.

38 Bana ba Benjemani+ bana-balume mwendele bisaka byabo i bano: kudi Bela,+ kisaka kya bene Bela; kudi Ashebela, kisaka kya bene Ashebela; kudi Ahilama, kisaka kya bene Ahilama; 39 kudi Shefufama, kisaka kya bene Shupimi; kudi Hufama, kisaka kya bene Hufama. 40 Bana ba Bela bana-balume i Alede ne Nemani:+ kudi Alede, kisaka kya bene Alede; kudi Nemani, kisaka kya bene Nemani. 41 Bano’ba bo bana ba Benjemani bana-balume mwendele bisaka byabo, kadi bantu babo babadilwe i bantu 45 600.+

42 Bano’ba bo bana ba Dani+ bana-balume mwendele bisaka byabo: kudi Shuhama, kisaka kya bene Shuhama. Bino’bi byo bisaka bya Dani mwendele bisaka byabo. 43 Bisaka byonso bya bene Shuhama, bya bantu babo babadilwe, i bantu 64 400.+

44 Bana ba Ashela+ bana-balume mwendele bisaka byabo i bano: kudi Imanahi, kisaka kya bene Imanahi; kudi Ishivi, kisaka kya bene Ishivi, kudi Bedia, kisaka kya bene Bedia; 45 kudi bana ba Bedia bana-balume: kudi Hebela, kisaka kya bene Hebela; kudi Malekiele, kisaka kya bene Malekiele. 46 Dijina dya mwanā Ashela mwana-mukaji i Sela. 47 Bino’bi byo bisaka bya bana ba Ashela bana-balume, kadi bantu babo babadilwe i bantu 53 400.+

48 Bana ba Nafatale+ bana-balume mwendele bisaka byabo i bano: kudi Yazela, kisaka kya bene Yazela; kudi Nguni, kisaka kya bene Nguni; 49 kudi Yezela, kisaka kya bene Yezela; kudi Shilemi, kisaka kya bene Shilemi. 50 Bino’bi byo bisaka bya Nafatale mwendele bisaka byabo, kadi bantu babo babadilwe i bantu 45 400.+

51 Bungi bonso bwa bene Isalela babadilwe i buno: bantu 601 730.+

52 Kupwa Yehova wanena Mosesa amba: 53 “Ntanda ikabanibwa umbukata mwa bano’ba bu bupyani mwendele mulongo wa majina.*+ 54 Ku bibumbo bikatampe, ukebavudijija bupyani, ino ku bibumbo bityetye, ukebatyepejeja bupyani.+ Kibumbo ne kibumbo kikapebwa bupyani bwakyo mungya bungi bwa boba babadilwe. 55 Inoko, ntanda ikabanibwa na bubale.+ Bakatambula bupyani bwabo mungya majina a bisaka bya bashabo. 56 Bupyani ne bupyani bukatongwa na bubale ne kwabanibwa mu bibumbo bikatampe ne bityetye.”

57 Ino bano’ba bo bene Levi+ babadilwe mwendele bisaka byabo: kudi Ngelashona, kisaka kya bene Ngelashona; kudi Kohata,+ kisaka kya bene Kohata; kudi Meladi, kisaka kya bene Meladi. 58 Bino’bi byo bisaka bya bene Levi: kisaka kya bene Lebini,+ kisaka kya bene Hebelona,+ kisaka kya bene Maheli,+ kisaka kya bene Mushi,+ kisaka kya bene Kola.+

Kohata wabutwile Amalama.+ 59 Dijina dya mukaja Amalama i Yokebedi,+ mwanā Levi mwana-mukaji, obabutwidile Levi kudi wandi mukaji mu Edipito. Wabutwila Amalama ba Alone ne Mosesa ne mwanabo Midiamu mwana-mukaji.+ 60 Penepo Alone bamubutwila Nadaba, Abihu, Eleaza, ne Itamala.+ 61 Ino ba Nadaba ne Abihu bafwile mwanda baletele mudilo wampikwa kupebwa lupusa ku meso a Yehova.+

62 Bungi bonso bwa boba babadilwe i bantu 23 000, bana-balume bonso kushilwila ku wa mweji umo kokanda.+ Ke-pantu kebabadilwepo mu bukata mwa bene Isalela,+ mwanda i kutupu bupyani bwebapelwe mu bukata mwa bene Isalela.+

63 Bano’ba bo babadilwe na ba Mosesa ne Eleaza kitobo kitatyi kyobabadile bene Isalela mu malungu a Moabu mudi zolē dya ku Yodano kubwipi na Yediko. 64 Inoko kekwadipo mu bukata mwabo muntu nansha umo wabadilwe na ba Mosesa ne Alone kitobo pobabadile bene Isalela mu ntanda mutuputupu ya Shinai.+ 65 Mwanda Yehova webanenene amba: “Binebine, bakafwilanga mu ntanda mutuputupu.”+ O mwanda kekwashelepo muntu nansha umo poso enka Kalebu mwanā Yefune ne Yoshua mwanā Nuna.+

27 Penepo bana bana-bakaji ba Zelofehade,+ mwanā Hefele, mwanā Ngileade, mwanā Makile, mwanā Manase, ba ku bisaka bya Manase mwanā Yosefa, bafwena. Majina a bandi bana bana-bakaji i Mahala, Noa, Hokela, Milaka ne Tiza. 2 Baimana ku meso a Mosesa, ne Eleaza kitobo, ne bamfumu,+ ne kitango kyonso ku kibelo kya pema wa kubungakena’ko kebanena’mba: 3 “Tata wetu wafwidile mu ntanda mutuputupu, inoko kadipo mu kibumbo kyebungile kulwa na Yehova, boba baitabīle Kola,+ ino aye wafwidile bubi bwandi aye mwine kadi kabutwilepo mwana mwana-mulume nansha umo. 4 Lelo i kika kijiminina dijina dya tata wetu mu kisaka kyandi mwanda’po kabutwilepo mwana nansha umo mwana-mulume? Witupe’ko ntanda mu bukata mwa banababo na tata.” 5 Ebiya Mosesa waleta mwanda wabo ku meso a Yehova.+

6 Yehova nandi walombola Mosesa namino amba: 7 “Bana ba Zelofehade badi na bubinga. Bine ufwaninwe kwibapa ntanda bu bupyani mu bukata mwa banababo na shabo ne kwibapa bupyani bwa shabo.+ 8 Kadi lombola bene Isalela amba, ‘Shi muntu wafu kwampikwa kubutula mwana-mulume, mufwaninwe kupa wandi mwana mwana-mukaji bupyani bwandi. 9 Kadi shi kadipo na mwana mwana-mukaji, mukapa banababo bana-balume bupyani bwandi. 10 Shi kadipo na banababo bana-balume, nankyo mukapa banababo na shandi bana-balume bupyani bwandi. 11 Kadi shi shandi nandi kadipo na banababo bana-balume, bupyani bwandi mukapa’bo mubutule wa pabwipi wa ku mashi wa mu kyandi kisaka, nandi ukayata’bo. Kino’ki kikekala kitungo kya mwa kutyibila mambo a bene Isalela, monka mobasoñaninye Mosesa kudi Yehova.’”

12 Penepo Yehova wanena Mosesa amba: “Kanda mu luno lūlu lwa Abadimi,+ umone ntanda yonkapa bene Isalela.+ 13 Shi ubeimone, nobe ukalungwa ku bantu bobe*+ pamo bwa Alone mwanenu,+ 14 mwanda kitatyi kyaumpotomeje kitango mu ntanda mutuputupu ya Zine, mwatombokēle musoñanya wami wa kumpandula ku meso abo na mema.+ Ano i mema a Mediba+ ku Kadesha+ mu ntanda mutuputupu ya Zine.”+

15 Penepo Mosesa wanena Yehova amba: 16 “Yehova, Leza wa mushipiditu wa bantu bonso,* atonge muntu wa kulama kitango 17 ukatamba ne kutwela ku meso abo kadi ukebatambija ne kwibatweja, kutyina’mba kitango kya Yehova kyakekala pamo bwa mikōko yampikwa mukumbi.” 18 Ebiya Yehova wanena Mosesa amba: “Yata Yoshua mwanā Nuna, muntu udi na mushipiditu munda mwandi, umutenteke dikasa.+ 19 Kupwa umwimike ku meso a Eleaza kitobo ne ku meso a kitango kyonso, kadi ukamutūla bu mutangidiji ku meso abo.+ 20 Ukamupa’ko lupusa* lobe lumo,+ amba kitango kyonso kya bene Isalela kimwivwane.+ 21 Aye ukemana ku meso a Eleaza kitobo, nandi ukamwipangwila Yehova, mwa kuyukila butyibi bwandi kupityila ku Udimi.+ Bakatamba na kishima kyandi, kadi bakatwela na kishima kyandi, aye ne bene Isalela bonso badi nabo ne kitango kyonso.”

22 Ebiya Mosesa walonga monka mwamusoñaninye Yehova. Wayata Yoshua wamwimika ku meso a Eleaza kitobo ne ku meso a kitango kyonso, 23 wamutenteka makasa ne kumutūla bu mutangidiji,+ monka mwanenene Yehova kupityila kudi Mosesa.+

28 Yehova wanena Mosesa monka’mba: 2 “Soñanya bene Isalela wibalombole amba, ‘Mufwaninwe kuta mutyima mundetele kyamulambu kyami, mikate yami. Byamulambu byami byelwe na mudilo bu luvumba luyampe* kondi bifwaninwe kulambulwa pa kitatyi kitungwe.’+

3 “Kadi wibalombole amba, ‘Kino’ki kyo kyamulambu kyelwe na mudilo kyomukaleta kudi Yehova: twana twa mikōko tubidi tulume twampikwa bulema ku difuku bu kyamulambu kisōkwe kya kitatyi ne kitatyi.+ 4 Ukalambula kana ka mukōko kalume kamo lubanga, kana ka mukōko kalume kakwabo ukekalambula pa kapita i kāni,*+ 5 pamo ne kipindi kimo kya pa bipindi dikumi bya efa* wa bukula bupēla bwele’ko kipindi kimo kya pa bipindi biná bya hina* wa māni a mpafu miponde, bu kyamulambu kya miseke.+ 6 I kyamulambu kisōkwe kya kitatyi ne kitatyi,+ kyatūdilwe’ko ku Lūlu lwa Shinai bu luvumba luyampe,* kyamulambu kyelwe na mudilo kudi Yehova, 7 pamo ne kyamulambu kyakyo kya bitomibwa, kipindi kimo kya pa bipindi biná bya hina ku kana ka mukōko kalume kamo kamo.+ Ukapungulula bitomibwa bikolwañana mu kifuko kijila bu kyamulambu kya bitomibwa kudi Yehova. 8 Kadi ukalambula kana ka mukōko kalume kakwabo pa kapita i kāni.* Ne kyamulambu kya miseke kimo kyonka na kyokya kyalambulwanga lubanga ne kyamulambu kyakyo kya miseke kimo kyonka, ukaleta’kyo bu kyamulambu kyelwe na mudilo kya luvumba luyampe* kudi Yehova.+

9 “‘Inoko, mu difuku dya Sabato,+ kyamulambu kikekala kya twana twa mikōko tubidi tulume twampikwa bulema twa mwaka umo umo ne bipindi bibidi bya pa bipindi dikumi bya kipimo kya efa wa bukula bupēla bwele’ko māni bu kyamulambu kya miseke, pamo ne kyamulambu kyakyo kya bitomibwa. 10 Kino’ki kyo kyamulambu kisōkwe kya Sabato, pamo ne kyamulambu kisōkwe kya kitatyi ne kitatyi ne kyamulambu kyakyo kya bitomibwa.+

11 “‘Ku ngalwilo kwa kweji ne kweji,* mukaleta kudi Yehova kyamulambu kyenu kisōkwe kya bañombe babidi bana, mukōko mulume umo, ne twana twa mikōko tusamba-tubidi twampikwa bulema twa mwaka umo umo,+ 12 ne bipindi bisatu bya pa bipindi dikumi bya bipimo bya bukula bupēla bwele’ko māni bu kyamulambu kya miseke+ ku ñombe ne ñombe, ne bipindi bibidi bya pa bipindi dikumi bya bipimo bya bukula bupēla bwele’ko māni bu kyamulambu kya miseke ku mukōko umo,+ 13 ne kipindi kimo kya pa bipindi dikumi bya kipimo kya bukula bupēla bwele’ko māni bu kyamulambu kya miseke ku kana ka mukōko kalume kamo kamo, bu kyamulambu kisōkwe, luvumba luyampe,*+ kyamulambu kyelwe na mudilo kudi Yehova. 14 Kadi byamulambu byabyo bya bitomibwa bikekala kipindi kya hina umo wa vinyu ku ñombe+ umo ne kipindi kimo kya pa bipindi bisatu bya hina ku mukōko mulume,+ ne kipindi kimo kya pa bipindi biná bya hina ku kana ka mukōko kalume.+ Kino’ki kyo kyamulambu kisōkwe kya ku kweji kikaletwa kweji ne kweji mu mwaka onso mutuntulu. 15 Kadi, ne mbuji umo mwana ukalambulwa kudi Yehova bu kyamulambu kya bubi kutentekela pa kyamulambu kisōkwe kya kitatyi ne kitatyi pamo ne kyamulambu kyakyo kya bitomibwa.

16 “‘Mu kweji mubajinji, mu difuku dya 14 dya kweji’wa, kukekala Pashika ya Yehova.+ 17 Kadi mu difuku dya 15 dya kweji’wa, kukekala masobo. Mikate yampikwa kiyujo ikadibwa mu mafuku asamba-abidi.+ 18 Mu difuku dibajinji kukekala kitango kijila. Kemufwaninwepo kwingila mwingilo mukomo nansha umo. 19 Mukaleta kudi Yehova kyamulambu kisōkwe kyelwe na mudilo kya bañombe babidi bana, mukōko mulume umo, ne twana twa mikōko tulume tusamba-tubidi twa mwaka umo umo. Mukalambula banyema bampikwa bulema.+ 20 Mukebalambula ne byamulambu byabo bya miseke bya bukula bupēla bwele’ko māni,+ bipindi bisatu bya pa bipindi dikumi bya bipimo ku ñombe umo ne bipindi bibidi bya pa bipindi dikumi bya bipimo ku mukōko mulume. 21 Ukalambula kipindi kimo kya pa bipindi dikumi bya kipimo ku kana ka mukōko kalume kamo ne kamo ka mu twana twa mikōko tulume tusamba-tubidi, 22 ne mbuji umo bu kyamulambu kya bubi, wa kwimupūtyila nandi bubi. 23 Kutalula’mo kyamulambu kisōkwe kya lubanga, kya kyamulambu kisōkwe kya kitatyi ne kitatyi, mukalambula ne bino’bi. 24 Mukalambula bino’bi muswelo umo onka difuku ne difuku mu mafuku asamba-abidi bu byakudya,* kyamulambu kyelwe na mudilo kya luvumba luyampe* kudi Yehova. Kikalambulwa pamo ne kyamulambu kisōkwe kya kitatyi ne kitatyi ne kyamulambu kyakyo kya bitomibwa. 25 Mu difuku dya busamba-bubidi, mukalonga kitango kijila.+ Kemufwaninwepo kwingila mwingilo mukomo nansha umo.+

26 “‘Mu difuku dya bipa bibajinji byele,+ shi mubaleta kyamulambu kya miseke mipya kudi Yehova,+ mukalonga kitango kijila mu masobo enu a mayenga.+ Kemufwaninwepo kwingila mwingilo mukomo nansha umo.+ 27 Mukaleta kyamulambu kisōkwe kya luvumba luyampe* kudi Yehova kya bañombe babidi bana, mukōko mulume umo, ne twana twa mikōko tulume tusamba-tubidi twa mwaka umo umo,+ 28 ne kyamulambu kyabo kya miseke kya bukula bupēla bwele’ko māni, kipindi kimo kya pa bipindi bisatu bya bipimo ku ñombe ne ñombe, bipindi bibidi bya pa bipindi dikumi bya bipimo ku mukōko mulume umo, 29 kipindi kimo kya pa bipindi dikumi ku kana ka mukōko kalume kamo kamo ka mu twana twa mikōko tulume tusamba-tubidi, 30 ne mbuji mwana umo wa kwimupūtyila nandi bubi.+ 31 Mukebalambula kutentekela pa kyamulambu kisōkwe kya kitatyi ne kitatyi ne kyamulambu kyakyo kya miseke. Bafwaninwe kwikala banyema bampikwa bulema,+ pamo ne byamulambu byabo bya bitomibwa.

29 “‘Kadi mu kweji wa busamba-bubidi, mu difuku dibajinji dya kweji’wa, mukalonga kitango kijila. Kemufwaninwepo kwingila mwingilo mukomo nansha umo.+ I difuku dyomukela kimpungidi.+ 2 Mukalambula kyamulambu kisōkwe kya luvumba luyampe* kudi Yehova kya ñombe mwana umo, mukōko mulume umo, ne twana twa mikōko tulume tusamba-tubidi twa mwaka umo umo, bonso bampikwa bulema, 3 ne kyamulambu kyabo kya miseke kya bukula bupēla bwele’ko māni, bipindi bisatu bya pa bipindi dikumi bya kipimo kimo kya efa ku ñombe, bipindi bibidi bya pa bipindi dikumi bya bipimo ku mukōko mulume, 4 ne kipindi kimo kya pa bipindi dikumi bya kipimo ku kana ka mukōko kalume kamo kamo ka mu twana twa mikōko tulume tusamba-tubidi, 5 ne mbuji mulume mwana umo bu kyamulambu kya bubi mwanda wa kwimupūtyila bubi. 6 Kino’ki kikatentekelwa pa kyamulambu kisōkwe kya ku kweji ne kyamulambu kya miseke+ kyakyo ne kyamulambu kisōkwe kya kitatyi ne kitatyi ne kyamulambu kya miseke+ kyakyo, pamo ne byamulambu byabyo bya bitomibwa,+ enka mulongelwanga nyeke, bu luvumba luyampe,* kyamulambu kyelwe na mudilo kudi Yehova.

7 “‘Kadi mu difuku dya dikumi dya uno kweji wa busamba-bubidi, mukalonga kitango kijila,+ kadi banwe* mukekala na bulanda. Kemufwaninwepo kwingila mwingilo nansha umo.+ 8 Kadi mukaleta kyamulambu kisōkwe kudi Yehova, luvumba luyampe,* kya ñombe mwana umo, mukōko mulume umo, ne twana twa mikōko tulume tusamba-tubidi twa mwaka umo umo, bonso bampikwa bulema.+ 9 Ne kyamulambu kyabo kya miseke kya bukula bupēla bwele’ko māni, kya bipindi bisatu bya pa bipindi dikumi bya bipimo ku ñombe, bipindi bibidi bya pa bipindi dikumi bya bipimo ku mukōko mulume umo, 10 kipindi kimo kya pa bipindi dikumi ku kana ka mukōko kalume kamo kamo ka mu twana twa mikōko tulume tusamba-tubidi, 11 ne mbuji mwana umo bu kyamulambu kya bubi, kutalula’mo kyamulambu kya bubi kya kupūta nakyo bubi+ ne kyamulambu kisōkwe kya kitatyi ne kitatyi ne kyamulambu kyakyo kya miseke, pamo ne byamulambu byabyo bya bitomibwa.

12 “Kadi mu difuku dya 15 dya kweji wa busamba-bubidi, mukalonga kitango kijila. Kemufwaninwepo kwingila mwingilo mukomo nansha umo, kadi mufwaninwe kusoba masobo a Yehova mafuku asamba-abidi.+ 13 Mukaleta kyamulambu kisōkwe,+ kyamulambu kyelwe na mudilo kya luvumba luyampe* kudi Yehova, kya bañombe bana 13, mikōko milume 2, ne twana twa mikōko tulume 14 twa mwaka umo umo, bonso bampikwa bulema.+ 14 Ne kyamulambu kyabo kya miseke kya bukula bupēla bwele’ko māni, kya bipindi bisatu bya pa bipindi dikumi bya bipimo ku ñombe ne ñombe wa mu bañombe 13, bipindi bibidi bya pa bipindi dikumi bya bipimo ku mukōko ne mukōko wa mu mikōko milume 2, 15 ne kipindi kimo kya pa bipindi dikumi bya kipimo ku kana ka mukōko kamo kamo ka mu twana twa mikōko 14, 16 ne mbuji umo mwana bu kyamulambu kya bubi, kutalula’mo kyamulambu kisōkwe kya kitatyi ne kitatyi, kyamulambu kyakyo kya miseke ne kyamulambu kyakyo kya bitomibwa.+

17 “‘Kadi mu difuku dya bubidi, bañombe bana 12, mikōko milume 2, ne twana twa mikōko tulume 14 twa mwaka umo umo, bonso bampikwa bulema,+ 18 ne kyamulambu kyabo kya miseke ne byamulambu byabo bya bitomibwa ku bañombe, mikōko milume, ne twana twa mikōko tulume mwendele bungi bwabo enka mulongelwanga nyeke, 19 ne mbuji umo mwana bu kyamulambu kya bubi, kutalula’mo kyamulambu kisōkwe kya kitatyi ne kitatyi ne kyamulambu kyakyo kya miseke, pamo ne byamulambu byabyo bya bitomibwa.+

20 “‘Kadi mu difuku dya busatu, bañombe 11, mikōko milume 2, twana twa mikōko tulume 14 twa mwaka umo umo, bonso bampikwa bulema,+ 21 ne kyamulambu kyabo kya miseke ne byamulambu byabo bya bitomibwa ku bañombe, mikōko milume, ne twana twa mikōko tulume mwendele bungi bwabo enka mulongelwanga nyeke, 22 ne mbuji umo bu kyamulambu kya bubi, kutalula’mo kyamulambu kisōkwe kya kitatyi ne kitatyi ne kyamulambu kyakyo kya miseke ne kyamulambu kyakyo kya bitomibwa.+

23 “‘Kadi mu difuku dya buná, bañombe 10, mikōko milume 2, ne twana twa mikōko tulume 14 twa mwaka umo umo, bonso bampikwa bulema,+ 24 kyamulambu kyabo kya miseke ne byamulambu byabo bya bitomibwa ku bañombe, mikōko milume, ne twana twa mikōko tulume mwendele bungi bwabo enka mulongelwanga nyeke, 25 ne mbuji umo mwana bu kyamulambu kya bubi, kutalula’mo kyamulambu kisōkwe kya kitatyi ne kitatyi, kyamulambu kyakyo kya miseke, ne kyamulambu kyakyo kya bitomibwa.+

26 “‘Kadi mu difuku dya butano, bañombe 9, mikōko milume 2, ne twana twa mikōko tulume 14 twa mwaka umo umo, bonso bampikwa bulema,+ 27 ne kyamulambu kyabo kya miseke ne byamulambu byabo bya bitomibwa ku bañombe, mikōko milume, ne twana twa mikōko tulume mwendele bungi bwabo enka mulongelwanga nyeke, 28 ne mbuji umo bu kyamulambu kya bubi, kutalula’mo kyamulambu kisōkwe kya kitatyi ne kitatyi ne kyamulambu kyakyo kya miseke ne kyamulambu kyakyo kya bitomibwa.+

29 “‘Kadi mu difuku dya busamba, bañombe 8, mikōko milume 2, ne twana twa mikōko tulume 14 twa mwaka umo umo, bonso bampikwa bulema,+ 30 ne kyamulambu kyabo kya miseke ne byamulambu byabo bya bitomibwa ku bañombe, mikōko milume, ne twana twa mikōko tulume mwendele bungi bwabo enka mulongelwanga nyeke, 31 ne mbuji umo bu kyamulambu kya bubi, kutalula’mo kyamulambu kisōkwe kya kitatyi ne kitatyi, kyamulambu kyakyo kya miseke, ne kyamulambu kyakyo kya bitomibwa.+

32 “‘Kadi mu difuku dya busamba-bubidi, bañombe 7, mikōko milume 2, ne twana twa mikōko tulume 14 twa mwaka umo umo, bonso bampikwa bulema,+ 33 ne kyamulambu kyabo kya miseke ne byamulambu byabo bya bitomibwa ku bañombe, mikōko milume, ne twana twa mikōko tulume mwendele bungi bwabo enka mulongelwanga nyeke, 34 ne mbuji umo bu kyamulambu kya bubi, kutalula’mo kyamulambu kisōkwe kya kitatyi ne kitatyi, kyamulambu kyakyo kya miseke, ne kyamulambu kyakyo kya bitomibwa.+

35 “‘Mu difuku dya 8, mukalonga kitango kikola. Kemufwaninwepo kwingila mwingilo mukomo nansha umo.+ 36 Mukaleta kyamulambu kisōkwe, kyamulambu kyelwe na mudilo kya luvumba luyampe* kudi Yehova, kya ñombe umo, mukōko mulume umo, ne twana twa mikōko tulume tusamba-tubidi twa mwaka umo umo, bonso bampikwa bulema,+ 37 ne kyamulambu kyabo kya miseke ne byamulambu byabo bya bitomibwa ku ñombe, mukōko mulume, ne twana twa mikōko tulume mwendele bungi bwabo enka mulongelwanga nyeke, 38 ne mbuji umo bu kyamulambu kya bubi, kutalula’mo kyamulambu kisōkwe kya kitatyi ne kitatyi ne kyamulambu kyakyo kya miseke ne kyamulambu kyakyo kya bitomibwa.+

39 “‘Bino’bi mukalambula’byo Yehova ku masobo enu a bitatyi,+ kutentekela pa byamulambu byenu bya mpiko+ ne byamulambu byenu bya kwilanga+ bu byamulambu byenu bisōkwe+ ne byamulambu byenu bya miseke+ ne byamulambu byenu bya bitomibwa+ ne bitapwa byenu bya kipwano.’”+ 40 Mosesa walombola bene Isalela byonso byamusoñenye Yehova.

30 Penepo Mosesa wesamba na mitwe ya bisaka+ bya Isalela amba: “Kino’ki kyo kinenwa kyasoñanya Yehova amba: 2 Shi muntu wapika mpiko+ kudi Yehova nansha kutyipa mutyipo,+ mpiko ya kwilama, kafwaninwepo kujilula kinenwa kyandi.+ Ukalonga byonso byaapikile mpiko amba ukalonga’byo.+

3 “Kadi shi mwana-mukaji wapika mpiko kudi Yehova nansha wapika mpiko ya kwilama aye papo ukidi nsongwakaji ushikete mu njibo ya shandi 4 kadi shandi waivwana mpiko yandi nansha mpiko ya kwilama yaapikile ino shandi kapelelepo, nankyo mpiko yandi yonso ikashala’nka nabya, kadi mpiko yandi yonso ya kwilama yaapikile ikashala’nka nabya. 5 Inoko shi shandi wamukankaja pa kwivwana’mba wapikile mpiko nansha mpiko ya kwilama, keikashalapo’nka nabya. Yehova ukamulekela mwanda shandi wamukankeje.+

6 “Inoko, shi wasongwe na mulume aye ukidi mu mpiko yandi nansha mu mulao wandi wa bukidibukidi 7 kadi wandi mulume nandi waivwana’o ne kamupelejepo mu difuku dyaivwana’o, mpiko yandi nansha mpiko yandi ya kwilama yaapikile ikashala’nka nabya. 8 Ino shi wandi mulume amukankaje difuku dyaivwana’o, ubwanya kwipaya mpiko nansha owa mulao wa bukidibukidi waalaile,+ kadi Yehova ukamulekela.

9 “Ino shi mukaji wa kishala nansha mwana-mukaji mulubulwe wapika mpiko, kyonso kyaakejidika kikekala enka pādi.

10 “Inoko, shi mwana-mukaji wapika mpiko nansha mpiko ya kwilama aye papo ukidi mu njibo ya wandi mulume 11 kadi wandi mulume waivwene’o ino kamukandilepo nansha kupela, mpiko yandi yonso nansha mpiko yonso ya kwilama yapikile ikashala’nka nabya. 12 Inoko shi mu difuku dyaivwene’yo wandi mulume waipaile mpiko yonso nansha mpiko ya kwilama yawatyipile, nankyo keikashalapo’nka nabya.+ Wandi mulume waipaile’yo, kadi Yehova ukamulekela. 13 Pa mwanda utala mpiko yo-yonso nansha mutyipo o-onso wa mpiko ya kwilama mwanda wa kwipela,* wandi mulume uketabija’yo nansha kadi wandi mulume ukepaya’yo. 14 Inoko shi difuku ne difuku wandi mulume kapelangapo nansha dimo, nankyo waitabija ne mpiko yandi yonso mine nansha mpiko yandi ya kwilama yonso. Waitabija’yo mwanda kapelelepo mu difuku dyawamwivwene upika’yo. 15 Ino shi mulume waipaya’yo mwenda mafuku, kyaba kityetye kupwa kwa difuku dyaweivwene, ukaselanga bikalupuka ku mambo a mukaji.+

16 “Ino’i yo misoñanya yobasoñenye Mosesa kudi Yehova mu mwanda utala mulume ne wandi mukaji, ne mu mwanda utala shabana ne wandi mwana nsongwakaji ushikete mu yandi njibo.”

31 Penepo Yehova wanena Mosesa amba: 2 “Lubwila bene Midyana+ kinongo+ pa mwanda wa bene Isalela. Kupwa abe ukalungwa ku bantu bobe.”*+

3 Ebiya Mosesa wesamba na bantu amba: “Teakanyai bana-balume mu bukata mwenu ba kulwa* na Midyana ne kulubula kinongo kya Yehova pa Midyana. 4 Mukatuma bantu 1 000 ku kisaka ne kisaka mu bisaka byonso bya Isalela mu kibumbo kya divita.” 5 Penepo mu tununu twa Isalela,+ bayete’mo bantu 1 000 ku kisaka ne kisaka, bantu 12 000 bateakanibwa mwanda wa bulwi.*

6 Penepo Mosesa webatuma ku divita, bantu 1 000 ku kisaka ne kisaka, pamo ne Finease+ mwanā Eleaza kitobo mwanda wa divita, mwine wadi na bipungwa bijila ne bimpungidi bya kiyukeno+ mu kuboko kwandi. 7 Balwa divita na bene Midyana, monka mobasoñaninye Mosesa kudi Yehova, baipaya bana-balume bonso. 8 Kutentekela pa bantu bakwabo bobatapile, baipaya ne balopwe ba Midyana, ba Evi, Lekema, Zula, Hula, ne Leba, balopwe batano ba Midyana. Baipaya ne Balame+ mwanā Beole na kipete. 9 Ino bene Isalela basela bana-bakaji ne bana ba Midyana bu misungi. Batūta ne banyema babo bonso ba nja, bimunanwa byabo byonso ne bintu byabo byonso. 10 Kadi basōka bibundi byabo byonso byobadi bashikete’mo ne mankambi* abo onso na mudilo. 11 Basela bitūtwa byonso ne bikwatwa byonso, ne bantu ne banyema bene. 12 Penepo baselela misungi ne bitūtwa ne bikwatwa kudi Mosesa ne Eleaza kitobo ne kitango kya bene Isalela, ku nkambi mu malungu a Moabu+ mudi zolē kubwipi na Yodano ku Yediko.

13 Penepo Mosesa ne Eleaza kitobo ne bamfumu bonso ba kitango baenda kukebatundaila panja pa nkambi. 14 Ino Mosesa wafītyilwa mutyima bana-balume batongelwe kukalwa, bakata ba tununu ne bakata ba tutwa badi batamba ku divita. 15 Mosesa webanena’mba: “Le mubapandija bana-bakaji bonso? 16 Talai! I abo baongwele bene Isalela na binenwa bya Balame amba batombokele+ Yehova mu mwanda wa Peole,+ penepa kimpengele kyaponena kitango kya Yehova.+ 17 Shi ke pano mufwaninwe kwipaya mwana-mulume ense mu bano bana, mwipaye ne mwana-mukaji ense ke mulāle na mwana-mulume. 18 Ino bansongwakaji bonso kebalēle na mwana-mulume+ mwibaleke bōmi. 19 Banwe mukashikata panja pa nkambi mafuku asamba-abidi. Muntu ense mu bukata mwenu waipaile muntu,* ne muntu ense mu bukata mwenu watengele muntu mutapwe+ ufwaninwe kwitōkeja+ mu difuku dya busatu ne mu difuku dya busamba-bubidi, ne banwe ne misungi yenu. 20 Kadi mukatōkeja kivwalwa kyonso ku bubi, ne kintu kyonso kya kiseba, ne kintu kyonso kilongwe na myoya ya bambuji, ne kintu kyonso kya mutyi.”

21 Penepo Eleaza kitobo wanena bana-balume ba mu kibumbo kya divita baendele ku bulwi amba: “Kino’ki kyo kitungo kya kijila kyobasoñenye Mosesa kudi Yehova amba, 22 ‘Enka olo, ne ndalama, ne mukuba, ne kyuma, ne maningi, ne fweta, 23 kintu kyonso kekibwanyapo kutēma mu mudilo, mukekipityija mu mudilo, nakyo kikekala kyampikwa disubi. Inoko, kifwaninwe kutōkejibwa na mema a kutōkeja nao.+ Kintu kyonso kibwanya kutēma mu mudilo, mukekipityija mu mema. 24 Kadi mukakenda bivwalwa byenu mu difuku dya busamba-bubidi ne kwikala bampikwa disubi, penepa mubwanya kutwela mu nkambi.’”+

25 Penepo Yehova wanena Mosesa namino amba: 26 “Bala bitūtwa, ubale misungi ya bantu ne ya banyema; balai’byo pamo ne Eleaza kitobo ne mitwe ya mobo a bashabo ba kitango. 27 Abanya bitūtwa pabidi mwanda wa kwabila’byo boba ba mu kibumbo kya divita bakalwile bulwi ne boba bonso bashele mu kitango.+ 28 Ukayata musonko wa Yehova ku basola baendele ku bulwi, muya* umo pa myuya 500, ya bantu, ya bañombe, ya bampunda, ne ya mikōko. 29 Mukayata’o mu kipindi kyabo ne kupa’o Eleaza kitobo bu kyabuntu kya Yehova.+ 30 Ku kipindi kikapebwa bene Isalela, ukayata’ko umo pa 50, pa bantu, pa bañombe, pa bampunda, pa mikōko, ne pa nyema wa nja wa muswelo onso, ne kupa’ye bene Levi,+ batala mingilo ya ku kipema kya Yehova.”+

31 Penepo ba Mosesa ne Eleaza balonga monka mobasoñaninye Mosesa kudi Yehova. 32 Bitūtwa, bikwatwa byashele’ko ku byobya byaselele bantu badi batamba ku divita, byafikile pa mikōko 675 000, 33 bañombe 72 000, 34 ne bampunda 61 000. 35 Bana-bakaji badi kebalēle na mwana-mulume+ bafikile pa bana-bakaji* 32 000. 36 Kipindi kyapelwe boba baendele ku bulwi kyafikile pa mikōko 337 500. 37 Musonko wa Yehova wa mu mikōko wafikile pa mikōko 675. 38 Kadi kwadi bañombe 36 000, ne musonko wabo wa kupa Yehova wadi wa bañombe 72. 39 Kwadi bampunda 30 500, ne musonko wabo wa kupa Yehova wadi wa bampunda 61. 40 Kadi kwadi bantu* 16 000, ne musonko wabo wa kupa Yehova wadi wa bantu* 32. 41 Ebiya Mosesa wapa Eleaza kitobo+ musonko’wa bu kyabuntu kya Yehova, monka mobasoñaninye Mosesa kudi Yehova.

42 Kipindi kya bene Isalela, kyayete Mosesa ku bintu bya bantu bakalwile divita, 43 kipindi kya mikōko’kya kyafikile pa mikōko 337 500, 44 bañombe 36 000, 45 bampunda 30 500, 46 ne bantu* 16 000. 47 Ebiya Mosesa wayata ku kipindi kya bene Isalela umo pa 50, pa bantu ne pa banyema, wapa’bo bene Levi,+ badi batala mingilo ya ku kipema kya Yehova,+ monka mobasoñaninye Mosesa kudi Yehova.

48 Penepo bantu batongwe badi bendeja tununu twa kibumbo kya divita,+ bakata ba tununu ne bakata ba tutwa, bafwena Mosesa, 49 kebanena Mosesa amba: “Bengidi bobe ababala bana-balume ba divita badi munshi mwa lupusa lwetu, kekudipo nansha umo kotudi ubudilwe’mo.+ 50 Nanshi tulete muntu ne muntu byadi nabyo bu kyamulambu kya Yehova, bintu bya olo, tumiyololo twa mu tumpo,* nzenze ya ku maboko, mpete ya kashé, nzenze ya ku matwi, ne bidyangulwa bikwabo, mwanda wa kwitupūtyila batwe* bubi ku meso a Yehova.”

51 Penepo ba Mosesa ne Eleaza kitobo bebatambula olo, ne bidyangulwa byonso. 52 Olo yonso yobatūdīle Yehova bu kyabuntu yafikile pa mashekele* 16 750, yatūdile bakata ba tununu ne bakata ba tutwa. 53 Bana-balume ba mu kibumbo kya divita baselele muntu ne muntu kitūtwa kyandi aye mwine. 54 Ba Mosesa ne Eleaza batambula olo kudi bakata ba tununu ne ba tutwa, bakatūla’yo munda mwa pema wa kubungakena’ko bu kya kuvuluja* bantu ba Isalela ku meso a Yehova.

32 Penepo bana ba Lubeni+ ne bana ba Ngade+ badi na bimunanwa bingi bininge, bamona’mba ntanda ya Yazele+ ne Ngileade i ntanda miyampe na bimunanwa. 2 Ebiya bana ba Ngade ne bana ba Lubeni bafwena Mosesa, ne Eleaza kitobo, ne bamfumu ba kitango kebanena’mba: 3 “Atalote, Dibone, Yazele, Nimela, Heshebone,+ Eleale, Sebame, Nebo,+ ne Beone,+ 4 ntanda yanekenye Yehova ku meso a kitango kya Isalela,+ i ntanda miyampe na bimunanwa, kadi bengidi bobe badi na bimunanwa bingi.”+ 5 Babweja’ko amba: “Shi ubetutōkelwa mutyima, nankyo ino ntanda ipebwe bengidi bobe bu kintu kyabo. Koketwabula bobwa bukila bwa Yodano.”

6 Penepo Mosesa wanena bana ba Ngade ne bana ba Lubeni amba: “Le banabenu bende ku divita ino banwe’ko mushale mushikete kuno? 7 I kika le kyomutyumwina bantu ba Isalela mutyima baleke kwabukila mu ntanda isa kwibapa Yehova binebine? 8 Byabyo byo byalongele bashenu ponebatumine tamba ku Kadesha-Balenea bakatale ntanda.+ 9 Abo pa kukanda ku Musanza* wa Eshekole+ bamona ntanda’ya, batyumuna bantu ba Isalela mutyima baleke kwenda mu ntanda yadi ya kwibapa Yehova.+ 10 Bulobo bwa Yehova bwaaka mu dine difuku’dya watyipa+ amba: 11 ‘Bantu batambile mu Edipito kushilwila ku wa myaka 20 kokanda, kebakamonepo yoya ntanda+ yonatyipīle Abalahama, Izake, ne Yakoba,+ mwanda kebanondelepo na mutyima onso— 12 poso enka Kalebu+ mwanā Yefune mwine Kenizi ne Yoshua+ mwanā Nuna, mwanda abo balondele Yehova na mutyima onso.’+ 13 Penepo bulobo bwa Yehova bwaakila Isalela, webalumbakanya mu ntanda mutuputupu myaka 40,+ kufika ne byapwile lukongo lonso lwadi lulonga bibi ku meso a Yehova.+ 14 Pano mubapingakena pa kyaba kya bashenu bu bana ba bantu ba bubi bakela bulobo bwa Yehova budyendyemuka pa Isalela. 15 Shi muleke kumulonda, bine nandi ukebaleka monka mu ntanda mutuputupu, kadi mukakubija bano bantu bonso.”

16 Kupwa bamufwena kebanena’mba: “Longa tūbake pano bipombo bya mabwe bya bimunanwa byetu ne bibundi bya betu bana. 17 Ino batwe tuketeakanya nyeke mwanda wa bulwi+ ne kutangidila bene Isalela enka ne byotukebafikija ku kifuko kyabo, betu bana papo bashikete mu bibundi bikomejibwe, balamibwe ku bekadi ba ntanda’ya. 18 Ketukajokelapo ku mobo etu enka ne bitambula mwine Isalela ense bupyani bwa ntanda yandi.+ 19 Mwanda ketukatambulapo nabo bupyani bobwa bukila bwa Yodano ne kwenda kumeso, mwanda tubatambula bupyani bwetu bukila bwa Yodano+ bwa kutunduka.”

20 Mosesa webatentulula’mba: “Shi mulonge namino: Musele byabulwi ku meso a Yehova mwanda wa divita;+ 21 ne shi banwe bonso musele byabulwi mwabuke Yodano ku meso a Yehova kitatyi kyapanga balwana nandi ku meso andi+ 22 enka ne binekenibwa ntanda ku meso a Yehova,+ kupwa mubwanya kujoka+ ne kwikala ba kubulwa mambo ku meso a Yehova ne Isalela. Penepo ino ntanda ikekala ke kintu kyenu ku meso a Yehova.+ 23 Inoko shi kemulongelepo namino, mukalubila Yehova. Nankyo yukai amba bubi bwenu bukemupetanga. 24 Nanshi mubwanya kūbaka bibundi bya benu bana ne bipombo bya luombe+ lwenu, inoko mufwaninwe kulonga byomwalaa’byo.”

25 Bana ba Ngade ne bana ba Lubeni banena Mosesa namino amba: “Bengidi bobe bakalonga monka mwasoñenya mfumwami. 26 Betu bana, betu bakaji, bimunanwa byetu, ne banyema betu bonso ba nja bakashala mu bibundi bya Ngileade,+ 27 ino bengidi bobe bakabuka bukila, muntu ne muntu mwilumbile byabulwi mwanda wa kukalwa divita ku meso a Yehova,+ monka mwesambila mfumwami.”

28 Ebiya Mosesa wasoñanya Eleaza kitobo pa mwanda wabo, ne Yoshua mwanā Nuna, ne mitwe ya mobo a bashandya bisaka bya Isalela. 29 Mosesa webanena’mba: “Shi bana ba Ngade ne bana ba Lubeni abaabuka nenu Yodano, muntu ne muntu mwilumbile byabulwi mwanda wa kukalwa ku meso a Yehova, ne ntanda nayo ibanekenibwa ku meso enu, nankyo mukebapa ntanda ya Ngileade bu kintu kyabo.+ 30 Ino shi kebaselelepo byabulwi ne kwabuka nenu, nabya bakashikata umbukata mwenu mu ntanda ya Kenani.”

31 Ponkapo bana ba Ngade ne bana ba Lubeni balondolola’mba: “Byesamba Yehova ku bengidi bobe’byo e byotukalonga. 32 Tukasela byabulwi ne kwabuka ku meso a Yehova mu ntanda ya Kenani,+ inoko ntanda yotukapyana ikekala buno bukila bwa Yodano.” 33 Ebiya Mosesa webapa⁠—bana ba Ngade, bana ba Lubeni,+ ne kipindi kya kisaka kya Manase+ mwanā Yosefa—bulopwe bwa Shihone+ mulopwe wa bene Amole ne bulopwe bwa Oka+ mulopwe wa Bashane, ntanda ya bibundi byayo mu bino byaba, ne bibundi bijokolokele ntanda’ya.

34 Bana ba Ngade baubaka* Dibone,+ Atalote,+ Aloele,+ 35 Atelote-Shofane, Yazele,+ Yongebela,+ 36 Bete-Nimela,+ ne Bete-Halana,+ bibundi bikomejibwe, kadi baubaka ne bipombo bya mabwe bya luombe. 37 Bana ba Lubeni nabo baubaka Heshebone,+ Eleale,+ Kidiataimi,+ 38 Nebo,+ Bāla-Meone+⁠—majina abyo ashinta—ne Sibema; kadi bainika bibundi byobaubakulwile’bya majina angi.

39 Bana ba Makile+ mwanā Manase bakatamba ntanda ya Ngileade beikwata ne kupanga bene Amole badi’mo. 40 Ebiya Mosesa wapa Ngileade kudi Makile mwanā Manase, kashikete’mo.+ 41 Yaila mwanā Manase nandi wakebatamba wakwata bibundi byabo bya mapema, waanza kwibita bu Havote-Yaile.*+ 42 Noba nandi wakebatamba wakwata Kenate ne bibundi bidi mu bwendeji bwandi,* waanza kwikita bu Noba dyandi dijina.

33 Luno’lu lo lwendo lwa bantu ba Isalela pobatambile mu ntanda ya Edipito+ mwendele bibumbo byabo,*+ bendejibwa na ba Mosesa ne Alone.+ 2 Mosesa wadi ulemba bifuko byobadi batamba’ko mu lwendo lwabo na musoñanya wa Yehova, kadi luno lo lwendo lwabo pobadi batamba papa kebadi papa:+ 3 Batamba ku Lamesese+ mu kweji mubajinji, mu difuku dya 15 dya kweji’wa.+ Enka mu difuku dyalondele Pashika,+ bene Isalela batamba na kikulupiji* ku meso a bene Edipito bonso. 4 Mu kine kitatyi’kya, bene Edipito badi bajīka babo bana babedi baipailwe na Yehova mu bukata mwabo,+ mwanda Yehova wafikidije butyibi pa baleza babo.+

5 Penepo bene Isalela batamba ku Lamesese bakatūla nkambi ku Sukote.+ 6 Ebiya batamba ku Sukote bakatūla nkambi ku Etāme,+ udi kufula kwa mu ntanda mutuputupu. 7 Kupwa batamba ku Etāme bajokela dya ku Pihahilote, witadidile na Bāla-Zefona,+ bakatūla nkambi kumeso kwa Mikedole.+ 8 Kupwa papo batamba ku Pihahilote bapityila mu bukata bwa dijiba+ kebenda mu ntanda mutuputupu,+ baenda lwendo lwa mafuku asatu mu ntanda mutuputupu ya Etāme,+ bakatūla nkambi ku Mala.+

9 Ebiya batamba ku Mala baiya ku Edime. Mu Edime mwadi masulo 12 a mema ne tunkindu 70, batūla nkambi mwine’mwa.+ 10 Kupwa batamba ku Edime bakatūla nkambi kubwipi na Dijiba Dityila. 11 Kupwa papo batamba ku Dijiba Dityila bakatūla nkambi mu ntanda mutuputupu ya Shina.+ 12 Ebiya batamba mu ntanda mutuputupu ya Shina bakatūla nkambi ku Dofeka. 13 Mwenda mafuku batamba ku Dofeka bakatūla nkambi ku Alusha. 14 Kupwa batamba ku Alusha bakatūla nkambi ku Lefidimi,+ kwine kekwadipo mema a kutoma bantu. 15 Kupwa papo batamba ku Lefidimi bakatūla nkambi mu ntanda mutuputupu ya Shinai.+

16 Batamba mu ntanda mutuputupu ya Shinai bakatūla nkambi ku Kibilota-Tava.+ 17 Ebiya batamba ku Kibilota-Tava bakatūla nkambi ku Hazelota.+ 18 Kupwa papo batamba ku Hazelota bakatūla nkambi ku Letema. 19 Kupwa batamba ku Letema bakatūla nkambi ku Dimone-Peleze. 20 Ebiya batamba ku Dimone-Peleze bakatūla nkambi ku Dibena. 21 Batamba ku Dibena bakatūla nkambi ku Disa. 22 Kupwa batamba ku Disa bakatūla nkambi ku Kehelata. 23 Ebiya batamba ku Kehelata bakatūla nkambi ku Lūlu lwa Shefele.

24 Kupwa papo batamba ku Lūlu lwa Shefele bakatūla nkambi ku Halada. 25 Ebiya batamba ku Halada bakatūla nkambi ku Makelote. 26 Kupwa batamba+ ku Makelote bakatūla nkambi ku Tahate. 27 Kupwa papo batamba ku Tahate bakatūla nkambi ku Tela. 28 Ebiya batamba ku Tela bakatūla nkambi ku Miteka. 29 Mwenda mafuku batamba ku Miteka bakatūla nkambi ku Hashemona. 30 Kupwa batamba ku Hashemona bakatūla nkambi ku Moselote. 31 Ebiya batamba ku Moselote bakatūla nkambi ku Bene-Yakane.+ 32 Kadi batamba ku Bene-Yakane bakatūla nkambi ku Hole-Hakidekade. 33 Kupwa batamba ku Hole-Hakidekade bakatūla nkambi ku Yotebata.+ 34 Mwenda mafuku batamba ku Yotebata bakatūla nkambi ku Abelona. 35 Ebiya batamba ku Abelona bakatūla nkambi ku Eziona-Kebele.+ 36 Kupwa papo batamba ku Eziona-Kebele bakatūla nkambi mu ntanda mutuputupu ya Zine,+ ko kunena’mba Kadesha.

37 Mwenda mafuku batamba ku Kadesha bakatūla nkambi ku Lūlu lwa Hola,+ ku mukalo wa ntanda ya Edoma. 38 Alone kitobo wakanda ku Lūlu lwa Hola mungya musoñanya wa Yehova, wafwila kwine’kwa mu mwaka wa 40 kupwa kwa bene Isalela kutamba mu ntanda ya Edipito, mu kweji wa butano, mu difuku dibajinji dya kweji’wa.+ 39 Alone wadi na myaka 123 paafwile mu Lūlu lwa Hola.

40 Penepo mulopwe wa Alada,+ mwine Kenani wadi wikala mu Nengeba mu ntanda ya Kenani, waivwana’mba bene Isalela babo bāya.

41 Papita mafuku, batamba ku Lūlu lwa Hola+ bakatūla nkambi ku Zalemona. 42 Kupwa papo batamba ku Zalemona bakatūla nkambi ku Punone. 43 Kupwa batamba ku Punone bakatūla nkambi ku Obota.+ 44 Ebiya batamba ku Obota bakatūla nkambi ku Iye-Abadime, ku mukalañano wa Moabu.+ 45 Mwenda mafuku batamba ku Iyime bakatūla nkambi ku Dibona-Ngade.+ 46 Kupwa papo batamba ku Dibona-Ngade bakatūla nkambi ku Alemona-Dibelataime. 47 Ebiya batamba ku Alemona-Dibelataime bakatūla nkambi mu ngulu ya Abadimi+ kumeso kwa Nebo.+ 48 Ku mfulo batamba ku ngulu ya Abadimi bakatūla nkambi mu malungu a Moabu mudi zolē kubwipi na Yodano ku Yediko.+ 49 Baendelela kushikata ku Yodano, tamba ku Bete-Yeshimote kutūla ne ku Abele-Shityime,+ mu malungu a Moabu mudi zolē.

50 Yehova wesamba na Mosesa mu malungu a Moabu mudi zolē kubwipi na Yodano ku Yediko amba: 51 “Wisambe na bene Isalela wibalombole amba, ‘Pano kemwabuka Yodano mutwele mu ntanda ya Kenani.+ 52 Mufwaninwe kupanga bekadi bonso ba yoya ntanda ku meso enu ne konakanya mabwe+ abo onso masōnge ne bankishi babo ba byuma,*+ kadi mufwaninwe kutūta ne mitenta yabo yonso ikola.+ 53 Kadi mukakwata ntanda’ya ne kwikala monka, mwanda bine nkemupa’yo ke kintu kyenu.+ 54 Mufwaninwe kwabanya ntanda’ya na bubale+ bu kintu kyenu mu bisaka byenu byonso. Ku kibumbo kikatampe mukavudija bupyani bwakyo, kadi ku kibumbo kityetye nakyo mukatyepeja bupyani+ bwakyo. Bupyani bwa muntu ne muntu bukekala kokwa kuponena bubale bwandi. Mukapebwa ntanda yenu bu bupyani mwendele bisaka bya bashenu.+

55 “‘Ino shi kemupangilepo bekadi ba ntanda’ya ku meso enu,+ nankyo boba bomukaleka bakekala pamo bwa bya kwimutunga mu meso enu ne bwa miba mu mpamvu yenu, kadi bakemutamba mu ntanda yenu momukashikata.+ 56 Kadi nkemulonga byobya byonadi nsaka kwibalonga abo.’”+

34 Ebiya Yehova wesamba monka na Mosesa amba: 2 “Lombola bene Isalela namino amba: ‘Shi mubatwela mu ntanda ya Kenani,+ ino’i yo ntanda ikekala bu bupyani bwenu, ntanda ya Kenani mwendele mikalo+ yayo.

3 “‘Mukalañano wenu wa kunshi ukashilwila mu ntanda mutuputupu ya Zine kufula kwa Edoma, kadi mukalo wenu wa kunshi dya kutunduka ukatamba kufulakufula kwa Dijiba dya Mwepo.*+ 4 Mukalo wenu ukatontela kunshi kwa mukuna wa Akelabimi+ kufika’nka ne ku Zine, kadi mfulo yao ikekala kunshi kwa Kadesha-Balenea.+ Penepa ukenda kufika ne ku Hazala-Adala+ kufika’nka ne ku Azemone. 5 Mukalo ukatonta ku Azemone kewenda ku Kinekaneka* kya Edipito, kadi mfulo yao ikekala ku Dijiba.*+

6 “‘Mukalo wenu wa kushika ukekala Dijiba Dikatampe* ne nkula. Uno’u o ukekala mukalo+ wenu wa kushika.

7 “‘Uno’u o ukekala mukalo wenu wa kungala: Mukaketa mukalo wenu tamba ku Dijiba Dikatampe kufika ne ku Lūlu lwa Hola. 8 Tamba ku Lūlu lwa Hola, mukaketa mukalo kufika ne ku Lebo-Hamata,*+ kadi mfulo ya mukalo’wa ikekala ku Zedada.+ 9 Mukalo’wa ukenda kufika ne ku Zifelone, kadi mfulo yao ikekala Hazala-Enana.+ Uno’u o ukekala mukalo wenu wa kungala.

10 “‘Ebiya mukaketa mukalo wenu kutunduka tamba ku Hazala-Enana kufika ne ku Shefame. 11 Mukalo ukatamba ku Shefame kufika ne ku Dibēla kutunduka kwa Aine, kadi mukalañano ukatūka ne kutyibuluka matēlo a kutunduka kwa Dijiba dya Kinelete.*+ 12 Mukalañano ukenda kufika ne ku Yodano, kadi mfulo yao ikekala Dijiba dya Mwepo.+ Ino’i yo ikekala ntanda yenu+ ne mikalo iijokolokele.’”

13 Penepo Mosesa walombola bene Isalela amba: “Ino’i yo ntanda yomukeabila bu kintu kyenu na bubale,+ monka mwasoñaninye Yehova kupa’yo bisaka kitema ne kipindi. 14 Mwanda kisaka kya bene Lubeni mwendele njibo ya bashabo, ne kisaka kya bene Ngade mwendele njibo ya bashabo, ne kipindi kya kisaka kya Manase ke bayate kala bupyani+ bwabo. 15 Bisaka bibidi ne kipindi ke biyate kala bupyani bwabo kutunduka kwa ntanda ya Yodano kubwipi na Yediko, dya kutambanga dyuba.”+

16 Yehova wesamba monka na Mosesa amba: 17 “Ano’a o majina a bantu bakemwabanya ntanda ya kupyana: Eleaza+ kitobo ne Yoshua+ mwanā Nuna. 18 Kadi mukayata mfumu umo ku kisaka ne kisaka wa kwabanya ntanda bu bupyani+ bwenu. 19 Ano’a o majina a bantu’ba: ku kisaka kya Yuda,+ Kalebu+ mwanā Yefune; 20 ku kisaka kya bana ba Shimioni,+ Shemwele mwanā Amihuda; 21 ku kisaka kya Benjemani,+ Edidade mwanā Kiselone; 22 ku kisaka kya bana ba Dani,+ mfumu umo, Buki mwanā Yokedi; 23 ku bana ba Yosefa+ ba ku kisaka kya bana ba Manase,+ mfumu umo, Haniele mwanā Efode; 24 ku kisaka kya bana ba Efelaimi,+ mfumu umo, Kemuele mwanā Shifatane; 25 ku kisaka kya bana ba Zebuluna,+ mfumu umo, Edizafana mwanā Palenake; 26 ku kisaka kya bana ba Isakala,+ mfumu umo, Paletyele mwanā Azana; 27 ku kisaka kya bana ba Ashela,+ mfumu umo, Ahihuda mwanā Shelomi; 28 ku kisaka kya bana ba Nafatale,+ mfumu umo, Pedahele mwanā Amihuda.” 29 Bano’ba bo bantu bobasoñenye kudi Yehova kwabila bene Isalela ntanda, mu ntanda ya Kenani.+

35 Yehova wesamba monka na Mosesa mu malungu a Moabu mudi zolē kubwipi na Yodano+ ku Yediko, amba: 2 “Lombola bene Isalela amba bafwaninwe kupa bene Levi bibundi bya kwikala’mo ku bupyani bobakekala nabo,+ kadi bakapa bene Levi madyo ajokolokele bibundi’bya.+ 3 Bakekala mu bibundi’bya, kadi madyo nao akekala a bimunanwa byabo, bintu byabo, ne babo banyema bakwabo bonso. 4 Madyo a bibundi omukapa bene Levi akekala na bukatampe bwa maboko* 1 000 tamba ku lubumbu kujokoloka kibundi kyonso. 5 Mukapima panja pa kibundi maboko 2 000 mutamba wa kutunduka, maboko 2 000 mutamba wa kunshi, maboko 2 000 mutamba wa kushika, ne maboko 2 000 mutamba wa kungala, kibundi mu bukata. Ano’a o akekala madyo a byabo bibundi.

6 “Bibundi byomukapa bene Levi bikekala bibundi 6 bya kunyemena’mo,+ byomukapāna mwanda wa yewa wipaya muntu anyemene’mo,+ pamo ne bibundi bikwabo 42. 7 Bibundi byonso byomufwaninwe kupa bene Levi i bibundi 48, pamo ne madyo abyo.+ 8 Bibundi byomukebapa bikatamba ku bupyani bwa bene Isalela.+ Ku kibumbo kikatampe mukayata’ko bingi, ku kibumbo kityetye nako mwayata’ko bityetye.+ Kibumbo ne kibumbo kikapa’ko bene Levi bibundi byakyo mungya bupyani bokitambwile.”

9 Yehova wesamba monka na Mosesa amba: 10 “Wisambe na bene Isalela wibalombole amba, ‘Pano kemwabuka Yodano mwende mu ntanda ya Kenani.+ 11 Muketongela bibundi bimufwaninwe bya kwikala bu bibundi bya kunyemena’mo, mwa kunyemena yewa wipaya muntu* kwampikwa kusaka.+ 12 Bino bibundi bikekala byenu bya kunyemena’mo pa kutyina muntu ulubula kinongo kya mashi,+ kutyina’mba yewa wipaile muntu wakafwa aye kaimene mu kidye ku meso a kitango.+ 13 Bibundi bisamba bya kunyemena’mo byomukatūla’ko bikekala na kino kitungo. 14 Mukatūla’ko bibundi bisatu buno bukila bwa Yodano+ ne bibundi bisatu mu ntanda ya Kenani+ bikale bu bibundi bya kunyemena’mo. 15 Bino bibundi bisamba bikekala bya kunyemena’mo bene Isalela, mweni wa kibundi,+ ne yewa uvilukīle mwabo, mwa kunyemena yewa ense wipaya muntu* kwampikwa kusaka.+

16 “‘Ino shi wamukupile kintu kya kyuma wafu, i ntapañani. Ntapañani’wa ufwaninwe binebine kwipaibwa.+ 17 Kadi shi wamwashile dibwe dibwanya kwipaya muntu nandi wafu, i ntapañani. Ntapañani’wa ufwaninwe binebine kwipaibwa. 18 Kadi shi wamukupile kintu kya mutyi kibwanya kwipaya muntu nandi wafu, i ntapañani. Ntapañani’wa ufwaninwe binebine kwipaibwa.

19 “‘Muntu ulubula kinongo kya mashi ye ukepaya ntapañani’wa. Shi wamusambakana, aye mwine ukamwipaya. 20 Shi wafwile pa kutononwa mwanda wa mushikwa nansha shi wamwashile kintu ku nshikani,*+ 21 nansha shi i pa mushikwa paamukupile na kuboko kwandi, nandi wafu, yewa wamukupile’wa binebine ukepaibwa. I ntapañani. Muntu ulubula kinongo kya mashi ukepaya ntapañani’wa shi wamusambakana.

22 “‘Ino shi wamutonwene mu kitulumukila ne ke pa mwandapo wa mushikwa nansha kumwasa kintu kwampikwa nshikani,*+ 23 nansha shi kadipo umumwene paamuponejeje dibwe ne kadipo walwana nandi nansha kukimba kumusanshija, ino muntu’wa wafu, 24 nankyo kitango kikatyiba mambo pa bukata bwa yewa wamukupile ne muntu ulubula kinongo kya mashi, mungya buno butyibi.+ 25 Kupwa kitango kikapandija yewa wipaile muntu ku kuboko kwa muntu ulubula kinongo kya mashi ne kumujokeja mu kibundi kyandi kya kunyemena’mo mwaanyemēne, aye nandi ukashikata monka kufika ne bifwa kitobo mukatampe washingilwe māni ajila.+

26 “‘Ino shi yewa wipaile muntu wapite mukalo wa kibundi kyandi kya kunyemena’mo mwanyemēne 27 ne muntu ulubula kinongo kya mashi wamutana panja pa mukalo wa kibundi kyandi kya kunyemena’mo, waipaya yewa wipaile muntu, kapilepo mambo a mashi. 28 Mwanda ufwaninwe kwikala mu kibundi kyandi kya kunyemena’mo kufika ne bifwa kitobo mukatampe. Ino kupwa kwa lufu lwa kitobo mukatampe, yewa waipaile muntu ukokeja kujokela mu yandi ntanda.+ 29 Bino bintu’bi bikemwikadilanga bu bijila bya butyibi mu nkongo yenu mu bīkalo byenu byonsololo.

30 “‘Yewa ense wipaya muntu* ufwaninwe nandi kwipaibwa bu ntapañani+ pa bukamoni* bwa batumoni;+ ino i kutupu muntu* ukepaibwa pa bukamoni bwa kamoni umo kete. 31 Kemufwaninwepo kutambula kinkūlwa kya būmi* bwa ntapañani ufwaninwe kufwa, mwanda ufwaninwe binebine kwipaibwa.+ 32 Kadi kemufwaninwepo kutambula kinkūlwa kya yewa unyemēne mu kibundi kyandi kya kunyemena’mo, ne kumuleka ekale monka mu yandi ntanda kumeso kwa lufu lwa kitobo mukatampe.

33 “‘Kemufwaninwepo kusubija ntanda yomushikete’mo, mwanda mashi asubijanga ntanda,+ kadi i kutupu kibwanya kupūta bubi bwa mashi amwangilwe mu ntanda poso mashi a yewa umwangile’o.+ 34 Kufwaninwepo kusubija ntanda momushikete, mongikele amiwa; mwanda ami, Yehova, ngikele umbukata mwa bantu ba Isalela.’”+

36 Mitwe ya bisaka bya lutundu lwa Ngileade mwanā Makile+ mwanā Manase ba ku bisaka bya bana ba Yosefa bafwena kebanena ku meso a Mosesa ne bamfumu, mitwe ya bisaka bya bene Isalela. 2 Banena’mba: “Yehova wasoñenye mfumwami abanye ntanda na bubale+ bu bupyani ku bene Isalela; kadi Yehova wasoñenye mfumwami ape bupyani bwa mwanetu Zelofehade kudi bandi bana bana-bakaji.+ 3 Shi basongwe na bana-balume ba mu kisaka kikwabo kya Isalela, nabya bupyani bwa bano bana-bakaji nabo bukayatwa ku bupyani bwa batata ne kubwejibwa’bo ku bupyani bwa kisaka kobakasongwa, penepa bukayatwa ku bupyani bwetu bobetupele na bubale. 4 Shi Mwaka wa Bwanapabo+ ubafika mu bantu ba Isalela, ne bupyani bwa bano bana-bakaji nabo bukabwejibwa ku bupyani bwa kisaka kobakasongwa, penepa bupyani bwabo bukayatwa ku bupyani bwa kisaka kya batata.”

5 Penepo Mosesa wasoñanya bene Isalela na lupusa lwa Yehova amba: “Byanena kisaka kya bana ba Yosefa i bya bine. 6 Kino’ki kyo kyasoñanya Yehova pa mwanda wa bana ba Zelofehade bana-bakaji amba: ‘Babwanya kusongwa na muntu ense obakasaka. Inoko, bafwaninwe kusongwa na muntu wa mu difu dya kisaka kya shabo. 7 I kutupu bupyani bwa bene Isalela bukajokoloka ku kisaka ne kisaka, mwanda bene Isalela bakalama bupyani bwa kisaka kya bakulutuba babo. 8 Kadi mwana-mukaji ense udi na bupyani mu bukata mwa bisaka bya Isalela ufwaninwe kusongwa na muntu wa mu kisaka kya shandi,+ amba bene Isalela balame bupyani bwa bakulutuba babo bobapelwe. 9 I kutupu bupyani bukajokoloka bwadi ku kyoki kisaka ke ku kyoki kisaka, mwanda bisaka bya Isalela bifwaninwe kulama bupyani bwabyo.’”

10 Bana ba Zelofehade bana-bakaji balonga enka mobasoñaninye Mosesa kudi Yehova.+ 11 Penepo Mahala, Tiza, Hokela, Milaka, ne Noa bana ba Zelofehade+ bana-bakaji basongwa na bana ba banababo na shabo. 12 Baikala bakaji ba bana-balume ba mu bisaka bya Manase mwanā Yosefa mwanda wa bupyani bwabo bushale mu difu dya kisaka kya shabo.

13 Ino’i yo mbila ne mutyibilo wa mambo obapele bene Isalela kudi Yehova kupityila kudi Mosesa mu malungu a Moabu mudi zolē kubwipi na Yodano ku Yediko.+