YONA
1 Kinenwa kya Yehova kyaiya kudi Yona*+ mwanā Amitai amba: 2 “Imana, wende ku Nineva+ kibundi kikatampe, kasapule butyibi pa akyo, mwanda namone bubi bwabo.”
3 Ino Yona waimana, kanyemena Yehova ku Talashishi; watūkila ku Yopa, watana kyombo kyenda ku Talashishi. Penepo wafuta lupeto, wakanda mwanda wa kwenda nabo ku Talashishi, kulampe na Yehova.
4 Penepo Yehova watetula kivula kikatampe pa dijiba, paikala kimpumpu kikatampe pa dijiba, kyombo kekisake koneka. 5 Bengidi ba ku kyombo bakwatwa moyo kebabija muntu ne muntu kudi leza wandi. Kadi bashilula kwela bintu bya mu kyombo mu dijiba, mwanda wa kwikipēleja.+ Ino Yona watūkile munshi mwa kyombo,* walāla’mo ne kupona mu tulo tukatampe. 6 Kapita wa kyombo wafwena kamunena’mba: “Mwanda waka ulēle? Languka, ita leza obe! Kepabulwe padi Leza wa bine uketuta mutyima, tuleke kufwa.”+
7 Penepo kebenena amba: “Iyai, tute bubale+ tusokole mwine wa kutopeka pa kino kyamalwa.” Penepo bata bubale, nabo bwaponena padi Yona.+ 8 Bamunena’mba: “Tubakwisāshila, witusapwile, le i ani wa kutopekwa pa kino kyamalwa kyetufikila? Le mwingilo obe i mwingilo’ka, ne i kwepi kotamba? Le wi wa ku ntanda’ka, ne wi wa ku bantu’ka?”
9 Nandi webalondolola’mba: “Ami ne Muhebelu, kadi ntyinanga* Yehova Leza wa mūlu, Mwine walongele dijiba ne ntanda myūmu.”
10 Ponkapo bantu’ba bakwatwa moyo bininge, kebamwipangula’mba: “Le i kika kyowalonga?” (Bantu’ba bayukile amba wadi unyema Yehova, mwanda webalombwele.) 11 Penepo bamunena’mba: “Le tukulonge bika amba dijiba ditutalēle?” Mwanda kimpumpu kya pa dijiba kyadi kyenda kiningila’ko. 12 Nandi walondolola’mba: “Ntekunei, mungele mu dijiba, penepa dijiba disa kwimutalēla; mwanda ndyukile amba kino kimpumpu kikatampe kibemufikila pa mwanda wami.” 13 Inoko, bantu’ba bavua bininge* mwanda wa kujokeja kyombo ku ntanda, ino kebabwenyepo, mwanda kimpumpu kya pa dijiba kyadi kyenda kiningila’ko koku ne koku.
14 Penepo baabija Yehova kebanena’mba: “Shi ke pano, a Yehova, tubakwisāshila, ketwakafwa pa mwanda wa uno muntu!* Koketulambika mashi ampikwa mambo, mwanda ubalonga mosakila, abe Yehova.” 15 Penepo batekuna Yona, bamwela mu dijiba, ebiya bukalabale bwa dijiba bwatalala. 16 Penepo bantu’ba batyina Yehova+ bininge, balambula bitapwa kudi Yehova, bapika ne mpiko.
17 Ebiya Yehova watuma mushipa mukatampe, wamina Yona, Yona waikala mu difu dya mushipa mafuku asatu dyuba ne bufuku.+
2 Ebiya Yona walombela kudi Yehova Leza wandi mu difu dya mushipa,+ 2 kanena’mba:
“Naityile Yehova mu tusua twami, nandi wangitaba.+
Naabije+ mu mushike* wa Kibundu,*
Abe waivwene diwi dyami.
3 Powangelele mu mushike, mu bukata mwa dijiba,
Penepo milungu yampūta.+
Mabimbi obe onso ne mantanki ampitula.+
4 Ebiya nanena’mba, ‘Napangwa ku meso obe!
Le nkabandila monka namani tempelo yobe ijila?’
Biyombo bityani byepombele ku mutwe wami.
6 Natūkile munshi mwa ngulu.
Mikabo ya ntanda yanshityīlwe nyeke.
Ino watambije būmi bwami mu kīna, abe Yehova Leza wami.+
7 Būmi* bwami pobwadi kebujimina, navulukile’nka Yehova kete.+
Penepo milombelo yami yafika kodi, mu tempelo yobe ijila.+
8 Boba bepāna ku bilezaleza bya bitupu belwanga nsulo yabo ya buswe bwa ndamatyidile.*
9 Ino ami, nkakulambula kitapwa na diwi dya kufwija’ko.
Mpiko yonapika nkafikidija’yo.+
Lupandilo lutambanga kudi Yehova.”+
10 Kupwa Yehova wasoñanya mushipa, nao walashila Yona ku ntanda myūmu.
3 Penepo kinenwa kya Yehova kyaiya kudi Yona musunsa wa bubidi amba:+ 2 “Imana, wende ku Nineva+ kibundi kikatampe, ukekisapwile musapu onkulombola.”
3 Penepo Yona pa kukōkela kinenwa kya Yehova,+ waimana waenda ku Nineva.+ Mu kine kitatyi’kya, Nineva kyadi kibundi kikatampe bininge*—kyendwa lwa nshi mafuku asatu. 4 Kupwa Yona watwela mu kibundi, waenda lwendo lwa difuku dimo, wasapula’mba: “Kubashala’tu mafuku 40, Nineva ukafulamikwa.”
5 Ebiya bantu ba Nineva baikala na lwitabijo mudi Leza,+ baela lubila lwa kushikilwa na nzala ne kuvwala masāka, kushilwila ku mukatampe bininge mobadi kutūla ne ku mutyetye bininge. 6 Mulopwe wa Nineva pa kwivwana mwanda’wa, waimana pa lupona lwandi, wavūla kivwalwa kyandi kya bulopwe, wepūta sāka kashikete mu buto. 7 Ne kadi, wasoñanya basapule mu Nineva monso amba,
“Mwendele lubila lwa mulopwe ne bantu bandi ba bulēme: Muntu nansha nyema, nansha ñombe nansha mikōko, kebafwaninwepo kudya kintu nansha kimo. Kebafwaninwepo kudya byakudya, nansha kutoma mema kwine. 8 Bepūte masāka, bantu ne banyema bene; kadi babije Leza na kininga ne kuvundamina mashinda abo mabi ne lūma lwabo. 9 Le i ani uyukile shi Leza wa bine ukashinta milangwe pa* byalanga kulonga ne kwaluka ku bulobo bwandi budyendyemuka kutyina twakafwa?”
10 Leza wa bine pa kumona byobalongele, mobavundaminine mashinda abo mabi,+ nandi washinta milangwe pa* kyamalwa kyawanenene kwibaletela, waleka kwikileta.+
4 Ino kino’ki kyafītyija Yona mutyima bininge, wakwatwa bulobo bukatampe. 2 Penepo walombela kudi Yehova amba: “A Yehova, mwene bino’bi ye byonadi nanga ponadi mu ntanda yami? O mwanda nakimbile kunyemena ku Talashishi+ dibajinji; mwanda nadi ndyukile amba abe wi Leza wa kanye* ne lusa, wija pa kukwatwa bulobo kadi muyule buswe bwa ndamatyidile,+ ujingwa mutyima pa kyamalwa. 3 Shi ke pano a Yehova, nakwisāshila, yata būmi bwami,* mwanda i kipite buya mfwe kupita’ko kwikala mūmi.”+
4 Yehova waipangula’mba: “Le udi na bubinga bwa kulobela?”
5 Penepo Yona watamba panja pa kibundi, kashikete kutunduka kwa kibundi. Walonga mwa kufyama kwine’kwa kashikete mu mwemba, amba atale bisa kufikila kibundi.+ 6 Penepo Yehova Leza wameneja mulundu wa mungu* peulu pa Yona, wa kumuletela mwemba pa mutwe wandi ne kumusenga ku bumonya-malwa bwandi. Ebiya Yona wasangela bininge mulundu wa mungu’wa.
7 Ino Leza wa bine watuma mungwila pa kutamba kwa kibangabanga mu difuku dilonda’ko, wadya mulundu wa mungu, nao wafumba. 8 Dyuba pa kushilula kutēma, Leza watuma ne luvula lwa kyanga lwa kutunduka, kadi dyuba dyasōka Yona mu mutwe, nandi wapungila. Kalombe’nka kulomba afwe,* kadi wadi unena’nka kunena’mba, “I kipite buya mfwe kupita’ko kwikala mūmi.”+
9 Leza waipangula Yona amba: “Le udi na bubinga bwa kulobela pa mwanda wa mulundu wa mungu?”+
Nandi walondolola’mba: “Ngidi na bubinga bwa kulobela, kuloba bininge, kengabila’nka ne kufwa.” 10 Ino Yehova wanena’mba: “Ubaivwanina mulundu wa mungu lusa, okwaingidilepo nansha kwiumeneja kwine; wamenene mu bufuku bumo ne koneka mu bufuku bumo. 11 Le ami nami mbulwepo kwivwanina Nineva lusa, kibundi kikatampe,+ mudi bantu 120 000 ne kupita, kebayukilepo nansha kiyampe ne kibi kine,* pamo ne banyema babo bavule?”+
Ko kushintulula’mba “Nkunda.”
Nansha’mba “kipungwa kya kapala.”
Nansha’mba “ntōtanga.”
Nansha’mba “batompa kushitula dishinda dyabo.”
Nansha’mba “pa mwanda wa muya wa uno muntu!”
Kishima pa kishima i, “difu.”
Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
Nansha’mba “Mema anjokolokele ku muya wami.”
Nansha’mba “Muya.”
Bibwanika padi i, “lulamato lwabo.”
Kishima pa kishima i, “kibundi kikatampe kudi Leza.”
Nansha’mba “ukealakanya pa.”
Nansha’mba “wealakanya pa.”
Nansha’mba “ufwila lusa.”
Nansha’mba “muya wami.”
Bibwanika padi i, “ntondo-ndimba.”
Nansha’mba “amba muya wandi ufwe.”
Nansha’mba “kebayukilepo kusansanya kuboko kwabo kwa lundyo ne kwa lunkuso.”