MALAKI

1 Musapu:

Kinenwa kya Yehova kudi Isalela kupityila kudi Malaki:*

2 “Banwe bantu, nemusanswa,”+ i Yehova unena.

Ino banwe munena’mba: “Le ubetusanswa namani?”

“Mwene Esau wadi mwanabo na Yakoba?”+ i Yehova unena. “Ino nasenswe Yakoba, 3 nashikwa Esau;+ kadi nasala ngulu yandi,+ nashila mizeu ya mu ntanda mutuputupu+ bupyani bwandi.”

4 “Nansha binena Edoma amba, ‘Tubavingakanibwa, ino tukajoka ne kubakulula masala,’ Yehova wa bibumbo wanena namino amba, ‘Bakōbaka, ino ami nkapomona, kadi baketwa bu “ntanda ya bubi” ne bu “bantu baponejibwe nyeke na Yehova.”+ 5 Meso enu akekimona, kadi mukanena’mba: “Yehova atumbijibwe ntumbo pa ntanda ya Isalela.”’”

6 “‘Mwana ulēmekanga shandi,+ mwingidi nandi mfumwandi. Penepo shi ne shabana,+ le bulēme bumfwaninwe budi kwepi?+ Kadi shi ne mfumu,* le kityino* kimfwaninwe kidi kwepi?’ I Yehova wa bibumbo unena banwe babitobo bafutulula dijina dyami.+

“‘Ino mubanena’mba: “Le tubafutulula dijina dyobe namani?”’

7 “‘I na kulambula byakudya* bya disubi pa kisōkelo kyami.’

“‘Kadi munena’mba: “Le tubakusubija namani?”’

“‘I na kunena’mba: “Meza a Yehova+ i kintu kifwaninwe kufutululwa.” 8 Kadi pomulambulanga nyema musabike meso bu kitapwa, munenanga’mba: “Ke bibipo.” Kadi pomulambula nyema mulemane nansha ubela napo amba: “Ke bibipo.”’”+

“Nakwisāshila, tompa kulambula’bo mbikavu obe. Le aye ukakusangela nansha kukutambula biyampe?” I Yehova wa bibumbo unena.

9 “Shi ke pano nemwisāshila, abijai* Leza amba etutōkelwe mutyima. Na bino byamulambu bya ku kuboko kwenu, lelo ukemutambula biyampe?” i Yehova wa bibumbo unena.

10 “I ani mu bukata mwenu usaka kushita bibelo?*+ Mwanda kemukakijapo nansha kisōkelo kyami ku bitupu.+ Nkimuloelelwepo,” i Yehova wa bibumbo unena, “kadi nkisangedilepo kyabuntu kyonso kilambulwe kya ku kuboko kwenu.”+

11 “Mwanda kushilwila ku kutamba kwa dyuba kutūla ne ku kupona kwadyo,* dijina dyami dikekala dikatampe mu mizo.+ Bitapwa bikafitulwa mwishi mu kifuko kyonso, kadi ne byamulambu bikalambwilwa dijina dyami, bu kyabuntu kitōka tō; mwanda dijina dyami dikekala dikatampe mu mizo,”+ i Yehova wa bibumbo unena.

12 “Ino mubakobakanya’o,*+ ke munena’mba, ‘Meza a Yehova i a disubi, kadi bipa byao, byakudya byao bifwaninwe kufutululwa.’+ 13 Munenanga ne kunena’mba ‘Talai! Bikōkejana!’ kadi mulula’ko bya kibengo,” i Yehova wa bibumbo unena. “Muletanga banyema ba bwivi, balemane ne babela. Bine, muletanga bino bintu bu kyabuntu! Le ami nketabija’byo ku kuboko kwenu?”+ i Yehova unena.

14 “Afingwe mafingo yewa mukosoke udi na nyema mulume wampikwa bulema mu luombe lwandi, ino upika mpiko ne kulambula yewa mulemane* kudi Yehova. Mwanda ami ne Mulopwe mukatampe,”+ i Yehova wa bibumbo unena, “kadi dijina dyami dikalenga nzuba mu mizo.”+

2 “Shi ke pano, a babitobo, ino mbila i yenu.+ 2 Shi mubapele kwivwana ne kuta mutyima ku kutumbija dijina dyami,” i Yehova wa bibumbo unena, “nkemutumina mafingo,+ kadi nkalamuna madyese enu ke mafingo.+ Bine, naalamuna madyese ke mafingo, mwanda kemutele’kopo mutyima.”

3 “Talai! Nkasala* nkunwa yenu mikunwe pa mwanda wenu,+ kadi nkakusa tuvwi mu mapala enu, tuvwi twa masobo enu; mukaselelwa’ko.* 4 Penepo mukayuka’mba nemupe ino mbila amba kipwano kyompwene na Levi kyendelele,”+ i Yehova wa bibumbo unena.

5 “Kipwano kyami nandi kyadi kya būmi ne ndoe, byonamupele, pamo ne moyo.* Wauntyinine, bine, waivwanine dijina dyami nzuba. 6 Kijila* kya bubine kyadi mu kyakanwa kyandi,+ kadi ku milomo yandi kekwatenwepo bukondame. Wanangile nami mu ndoe ne mu boloke,+ kadi wajokeje bavule bavundamine kilubo. 7 Mwanda milomo ya kitobo ifwaninwe kulama buyuki, kadi bantu bafwaninwe kukimba kijila* ku kyakanwa kyandi,+ mwanda aye i mukendi wa Yehova wa bibumbo.

8 “Ino banwe mubasāsuka mu dishinda. Mubakukaja bavule pa mwanda wa kijila.*+ Mubaone kipwano kya Levi,”+ i Yehova wa bibumbo unena. 9 “O mwanda nkemufutulwija ne kwimutūkija ku meso a bantu bonso, mwanda kemwalaminepo mashinda ami, ino mwaingidije kijila na mboloji.”+

10 “Mwene batwe bonso tudi na tata umo?+ Mwene i Leza umo enka wetupangile? Penepo mwanda waka twilonga bya bundalandala batwe bene na bene,+ tukobakanya kipwano kya bakulutuba betu? 11 Yuda walonga bya bundalandala, kadi kintu kya munyanji kibalongibwa mu Isalela ne mu Yelusalema; mwanda Yuda wakobakanya buujila* bwa Yehova,+ bwine bwasenswe, kadi wasonge mwana mwana-mukaji wa leza wa kungi.+ 12 Yehova ukatyiba’ko ku mapema a Yakoba muntu ense ulonga kino’ki, shi ani shi ani,* nansha byalambula kyabuntu kilambulwe kudi Yehova wa bibumbo.”+

13 “Kadi kudi kintu kikwabo* kyomulonga, kilengeja kisōkelo kya Yehova kipūtwe na impolo ne madilo ne kubinza, amba aleke kuta mutyima monka ku kyabuntu kyenu kilambulwe nansha kuloelelwa kintu kyo-kyonso kya ku kuboko kwenu.+ 14 Kadi munenanga’mba, ‘I pa mwanda waka?’ I pa mwanda Yehova i kamoni pa bukata bwa abe ne mukaji wa pa busongwalume bobe, owalonga bya bundalandala, nansha byadi mulunda nobe kadi obe mukaji wa kipwano.*+ 15 Ino kwadi muntu umo kalongele’kyopo, mwanda wadi na kyokya kyashele ku mushipiditu. Le uno muntu wadi ukimba bika? Lutundu* lwa Leza. Nanshi mwilamei pa mwanda wa mushipiditu wenu, kadi kokalonga mukaji wa pa busongwalume bobe bya bundalandala. 16 Mwanda ami nshikilwe* dilubu,”+ i Yehova Leza wa Isalela unena, “ne yewa upūta kivwalwa kyandi na lūma,”* i Yehova wa bibumbo unena. “Mwilamei pa mwanda wa mushipiditu wenu, kadi kemwakilongai bya bundalandala.+

17 “Mubapungija Yehova na binenwa byenu.+ Ino banwe munenanga’mba, ‘Le tubamupungija namani?’ I na kunena’mba, ‘Muntu yense ulonga bibi i muyampe ku meso a Yehova, kadi umuloelelwe,’+ nansha na kunena’mba, ‘Lelo Leza wa boloke udi kwepi?’”

3 “Talai! Nsa kutuma mukendi wami, nandi ukatōkeja* dishinda ku meso ami.+ Kadi Mfumu wa bine, mwine omukimba, ukāya mu kitulumukila ku tempelo yandi;+ kadi mukendi wa kipwano ukāya, mwine omuloelelwe. Talai! Bine ukāya,” i Yehova wa bibumbo unena.

2 “Ino le i ani ukōminina difuku dya kwiya kwandi, ne i ani ukabwanya kwimana pakamweka? Mwanda aye ukekala pamo bwa mudilo wa muntu ukundula ne pamo bwa kifula*+ kya boba bakenda bisandi. 3 Kadi ukashikata pamo bwa muntu ukundula ne yewa utōkeja ndalama,+ ukatōkeja bana ba Levi; ukebatōkeja tō* pamo bwa olo* ne pamo bwa ndalama, kadi bine bakekalanga ku meso a Yehova bu bantu balambula kyabuntu kilambulwe na boloke. 4 Kyabuntu kilambulwe kya Yuda ne kya Yelusalema kikasangaja Yehova binebine, pamo’nka bwa mu mafuku a pa kala ne pamo’nka bwa mu myaka ya kala.+

5 “Nkemufwena mwanda wa butyibi, kadi nkekala kamoni wa lubilo pa ba majende,+ pa ba makoji, pa boba batyipa bya bubela,+ pa boba badimba muntu wa kaji,+ wa kishala, mwana wampikwa shandi,*+ ne pa boba bapela kukwasha mweni.* Bano’ba kebantyininepo,”+ i Yehova wa bibumbo unena.

6 “Mwanda ami ne Yehova; nkyalamukangapo.*+ Kadi banwe mwi bana ba Yakoba; kemwakubile. 7 Tamba mafuku a bakulutuba benu, mwasāsukile ku misoñanya yami kadi kemwalamine’yopo.+ Jokelai kondi, nami nkajokela komudi,”+ i Yehova wa bibumbo unena.

Ino banwe munenanga’mba: “Le tukajoka namani?”

8 “Le muntu’tu bitupu ubwanya kwiba Leza? Ino banwe mungibanga.”

Kadi munenanga’mba: “Le tubakwibe namani?”

“I mu bya kujikija dikumi* ne mu byabuntu. 9 Bine mwi bafingwe mafingo,* mwanda mungibanga—bine, muzo onso ungibanga. 10 Letai kya kujikija dikumi kyonso* mu kibīko,+ amba mu njibo yami mwikale byakudya;+ kadi nemwisāshila, ntompei mu uno mwanda,” i Yehova wa bibumbo unena, “mumone shi nkikemushitwilapo malolo a mūlu+ ne kwimupungulwila* madyese kufika ne byokemukabulwepo kintu nansha kimo.”+

11 “Nkafunina yewa ubokota* pa mwanda wenu, kadi kekikonakanyapo bipa bya ntanda yenu, nansha muñanza wa mu budimi bwenu kuleka kupa bipa mpika,”+ i Yehova wa bibumbo unena.

12 “Mizo yonso ikemutela bu ba nsangaji,+ mwanda mukekala ntanda ya kuloelelwa,” i Yehova wa bibumbo unena.

13 “Binenwa byomunena i bikomokomo,” i Yehova unena.

Kadi munenanga’mba: “Le tubakunena bibi mu bukata mwetu namani?”+

14 “Munenanga’mba, ‘Kwingidila Leza kekudipo na mvubu.+ Le i bika byotwamwena mu kulama byawitusoñanya ne mu kunanga bya bulanda ku meso a Yehova Leza wa bibumbo? 15 Pano tumwene bantu ba ditatu* bu ba nsangaji. Kadi, boba balonga bibi i banekenye.+ Basomonwanga kutūla Leza pa ditompo ne kwitambija’mo.’”

16 Mu kine kitatyi’kya, boba batyina Yehova badi besamba umo ku mukwabo, ense na mukwabo, kadi Yehova wadi utele’ko mutyima ne kwivwana. Kadi mukanda wa kivulukilo walembwa ku meso andi+ mwanda wa boba batyina Yehova ne boba balangulukila pa* dijina dyandi.+

17 “Bakekalanga bami,”+ i Yehova wa bibumbo unena, “difuku dyonkalonga kintu kya pa bula.*+ Nkebafwila lusa, enka bwa muntu ufwila lusa wandi mwana umwingidila.+ 18 Kadi mukamona monka kwishila kudi pa bukata bwa muntu moloke ne muntu mubi,+ pa bukata bwa yewa wingidila Leza ne yewa kamwingidilapo.”

4 “Mwanda talai! difuku dīyanga, didyendyemuka pamo bwa nkelwa,+ dikekala bantu bonso ba ditatu* ne boba bonso balonga bibi pamo bwa kityakuku. Difuku dīya’di dikebasasamuna,” i Yehova wa bibumbo unena, “kadi kedikebashilapo muji nansha musambo mwine. 2 Ino banwe balēmekele* dijina dyami, dyuba dya boloke dikeñenya pomudi, na bundapi mu mikejima* yadyo; kadi mukakilakila pamo bwa byana bya bañombe binune.”

3 “Kadi mukatyampa babi mu mayo, mwanda bakekala pamo bwa luvumbi munshi mwa binyantyilo byenu mu difuku dyonkalonga’po kintu,” i Yehova wa bibumbo unena.

4 “Vulukai Bijila bya mwingidi wami Mosesa, misoñanya ne butyibi byonasoñenye ku Holeba amba Isalela yense akōkele.+

5 “Talai! Nsa kwimutumina Ediya mupolofeto+ kumeso kwa difuku dikatampe kadi dilenga nzuba dya Yehova kwiya.+ 6 Aye ukajokeja mityima ya bashabo kudi bana,+ mityima ya bana nayo kudi bashabo, kutyina’mba nakāya kukupila ntanda, kwiyonakanya fututu.”

(Mfulo ya bwalamuni bwa Bisonekwa bya Kihebelu ne Kialamia, bulonda’ko ke bwa Bisonekwa bya Kingidiki bya Bwine Kidishitu)