BILONGWA BYA BATUMIBWA

1 A Teofilusa, mu mukanda umbajinji nalembele’mo myanda ya bintu byonso byashilwile Yesu kulonga ne kufundija+ 2 kufika ne difuku dyaatekwinwe mūlu,+ pa kupwa kupa batumibwa baatongele bulombodi kupityila ku mushipiditu ujila.+ 3 Pa kupwa kususuka, welombwele mūmi kobadi na bukamoni buvule bumweke.+ Nabo bamumwene mu mafuku 40 matuntulu, kadi nandi wadi wibasapwila myanda ya Bulopwe bwa Leza.+ 4 Paadi ubungakene nabo webasoñanya’mba: “Kemwakitalukai mu Yelusalema,+ ino ilaijai’nka kwilaija kyokya kyemulaile Tata,+ kyomwaivwene kondi; 5 mwanda Yoano, shako, wadi ubatyija na mema, ino kepakapitepo mafuku mangi, banwe mukabatyijibwa na mushipiditu ujila.”+

6 Pobadi bebungile pamo, bamwipangwile amba: “A Mfumwetu, le koaluja bulopwe ku Isalela kino kitatyi?”+ 7 Nandi webanena’mba: “Ke kyenupo kya kuyuka bitatyi nansha byaba bitūdile Tata mu buludiki bwandi* aye mwine.+ 8 Ino mukatambula bukomo pakāya mushipiditu ujila pomudi,+ kadi mukekala bami batumoni+ mu Yelusalema,+ mu Yudea ne mu Samadia+ monso, ne kulakula kwine kwa* ntanda.+ 9 Paapwile kunena bino bintu, abo bakimutala, watekwinwa mūlu ne dikumbi dyamufya, nabo kebakimumwene.+ 10 Kadi pobadi bakibambīle meso mūlu aye papo wenda, abo amba batale bana-balume babidi bavwele bivwalwa bitōka tō+ bemene pamo nabo 11 kebanena’mba: “A bana-balume ba mu Ngadilea, i bika byomwimanine mutala mūlu sō? Uno Yesu wemutekwinwa mūlu ukāyanga muswelo umo enka momwamumwena wenda mūlu.”

12 Penepo bajokela ku Yelusalema+ kutamba ku lūlu lwitwa bu Lūlu lwa Impafu, ludi kubwipi na Yelusalema, pantu’tu pendwa dya Sabato. 13 Pobafikile, bakanda mu kyumba kya peulu mobadi bashikatanga. Mwine’mwa mwadi Petelo pamo ne Yoano ne Yakoba ne Andele, Fidipa ne Tomase, Balatelemi ne Mateo, Yakoba mwanā Afesa, ne Shimona mupyasakane, ne Yudasa mwanā Yakoba.+ 14 Abo bonso badi batakamene mu milombelo na kitungo kimo, pamo na bana-bakaji+ bamo ne Madia inandya Yesu ne banababo.+

15 Mu mene mafuku’a Petelo waimana umbukata mwa banabetu (bungi bwa* bantu bonso pamo badi kintu kya 120) kanena’mba: 16 “A bana-balume, banabetu, kyadi kyendele’mo kisonekwa kifikidile, kyokya kyānenene mushipiditu ujila mu bupolofeto kupityila kudi Davida pa mwanda wa Yudasa,+ yewa waikele kalombwe ka boba bakwete Yesu.+ 17 Mwanda wabadilwe umbukata mwetu+ kadi waingile pamo netu uno mwingilo. 18 (Mwine uno muntu’u, wapotele budimi na mpalo ya bukondame,+ kadi pa kupona kya mutwe munshi, ngitu yandi yasabika* kadi bya munda byandi byasukumukila panja.+ 19 Kino kyayukana mu bekadi bonso ba mu Yelusalema, o mwanda budimi’bwa bwaityilwe mu ludimi lwabo bu Akedama, ko kunena’mba, “Budimi bwa Mashi.”) 20 Mwanda kilembelwe mu mukanda wa Ñimbo ya Mitōto amba, ‘Kīkalo kyandi kikale masala, kemwakekala mwikadi nansha umo’+ kadi amba, ‘Mwingilo wandi wa butadi uselwe na ungi.’+ 21 Nanshi i kyendele’mo amba mu bana-balume badi benda netu pamo kitatyi kyonso kyadi Mfumwetu Yesu wingila mingilo yandi* mu bukata mwetu, 22 tamba paabatyijibwe na Yoano+ kufika ne difuku dyaetutekwinwe,+ umo wa mu bano bana-balume ufwaninwe kwikala kamoni wamwene pamo netu lusangukilo lwandi.”+

23 Penepo baleta bantu babidi, Yosefa witwa bu Basabasa, witwa dikwabo bu Yusutusa, ne Matyiasa. 24 Ebiya balombela kebanena’mba: “Ee, a Yehova,* abe uyukile mityima ya bonso,+ lombola i ani owatonga pa bano bana-balume babidi 25 wa kupingakena pa uno mwingilo ne butumibwa bwasāsukile Yudasa kaenda ku kifuko kyandi.”+ 26 Penepa bata bubale pa mwanda wabo,+ bwakwata Matyiasa, ebiya wabadilwa* pamo na batumibwa 11.

2 Penepo difuku dya Masobo a Pentekosa+ podyadi dikyendelela, abo bonso badi mu kifuko kimo kyonka. 2 Na mu kitulumukila, kwaikala lunwa lutamba mūlu pamo bwa kivula kikatampe kipukuma, lwayula mu njibo monso mobadi bashikete.+ 3 Ne ndimi pamo bwa mimbi ya mudilo yebamwekela kadi yakalañana, lumo ne lumo lwatentama pa muntu umo ne umo pobadi, 4 kadi bonso bayulwa mushipiditu ujila+ kebesambe mu ndimi palapala monka mwadi mwibapela’kyo mushipiditu kwisamba.+

5 Mu kine kitatyi’kya Bayuda bepāne batambile ku mizo yonso ya munshi mwa diulu badi bekele mu Yelusalema.+ 6 Penepo luno lunwa pa kwivwanwa, kibumbo kya bantu kyebunga kadi kyabezemuka, mwanda muntu ne muntu wadi wibevwana banena mu ludimi lwandi. 7 Bine, badi batulumuka bikatampe kebanena’mba: “Talai kuno, mwene bano bonso besamba i bene Ngadilea?+ 8 Le penepo i namani muntu ne muntu motudi wivwana ludimi lwandi lwa kibutwila?* 9 Bene Pafya, bene Mede,+ bene Elama,+ bekadi ba mu Mesopotemya, mu Yudea ne mu Kapodosa, mu Pontusa ne mu ntanda ya bubikavu ya Azia,+ 10 mu Fidya ne mu Pamfidya, mu Edipito ne ku matanda a Libya dya kubwipi na Shilene, beni batambile ku Loma, ne Bayuda ne ba kwalamuka,+ 11 bene Kelete, ne bene Alabia—tubebevwana besamba mu ndimi yetu bintu bikatampe bya Leza.” 12 Bine, bonso batulumuka ne kuvutakanibwa, kebenena abo bene na bene amba: “Le kino nakyo kishintulula namani?” 13 Inoko, bakwabo badi kebebabenge amba: “I bakolwe vinyu itobala.”*

14 Ino Petelo waimana pamo ne Ba Dikumi ne Umo+ kaebanena na diwi dikatampe amba: “A bantu ba mu Yudea ne banwe bekadi bonso ba mu Yelusalema, yukai kino kadi ivwanijai senene binenwa byami. 15 Na bubine bano bantu’ba kebakolelwepo momulangila’mo, mwanda i nsá ya busatu ya dyuba.* 16 Inoko kino’ki e kyokya kyānenenwe kupityila kudi mupolofeto Yoela amba: 17 ‘“Kadi mu mafuku a ku mfulo,” i Leza unena, “nkapungulwila mushipiditu wami umo pa ngitu ya miswelo yonso, kadi benu bana bana-balume ne bana bana-bakaji bakanena bupolofeto kadi bansongwalume benu bakamona bimonwa ne banunu benu bakalota bilotwa,+ 18 kadi nkapungulwila mushipiditu wami umo ne pa bapika bami bana-balume ne bana-bakaji bene mu oa mafuku, kadi bakanena bupolofeto.+ 19 Kadi nkaleta bintu bya kutendelwa* mūlu ne biyukeno panshi—mashi, mudilo, ne malenga a mwishi. 20 Dyuba dikalamuka ke fukutu ne kweji nandi ke mashi kumeso kwa difuku dikatampe kadi dya ntumbo dya Yehova* kwiya. 21 Kadi ense wa kwita dijina dya Yehova* ukapandanga.”’+

22 “A bantu ba Isalela, tejai ino myanda: Yesu mwine Nazala, i muntu wemulombwelwe patōka na Leza kupityila ku bilongwa bya bukomo, ku bintu bya kutendelwa,* ne ku biyukeno byalongele Leza kupityila kwadi umbukata mwenu,+ enka momuyukile banwe bene. 23 Uno muntu wapēnwe mungya kiswa-mutyima* kitungilwe ne buyuki bwadi buyukile kala Leza,+ banwe mwamubambile ku mutyi kupityila ku makasa a bantu ba kujilula bijila, kadi mwamwipaile.+ 24 Ino Leza wamusangwile+ na kumunyongolola mu bisanso bya* lufu, mwanda kebyabwanikilepo aye kukwatyidilwa nalo.+ 25 Mwanda Davida unena pa mwanda wandi amba: ‘Natūla Yehova* ku meso ami nyeke, mwanda aye udi ku kuboko kwami kwa lundyo amba nkyakitenkana nansha dimo. 26 O mwanda mutyima wami waikele na tusepo ne ludimi lwami nalo lwasepelele bikatampe. Kadi ami* nkekala mu lukulupilo; 27 mwanda kukanshiyepo* mu Kibundu,* kadi kukalekapo muntu obe wa lulamato amone bubole.+ 28 Ubandyukija mashinda a būmi; ukandyuja nsangaji mikatampe ku meso obe.’*+

29 “A bana-balume, banabetu, i kitabijibwe kwimusapwila pampikwa kafinda myanda ya Davida mutwe wa kisaka, amba wāfwile ne kujīkwa wājīkwa,+ kadi kibundu kyandi kikidi netu kufika ne dyalelo. 30 Byaādi mupolofeto ne byaādi uyukile amba Leza wāmutyipīle amba ukashikatyija umo wa ku lutundu lwandi* pa lupona lwandi,+ 31 wābadikile kumona, wēsamba myanda ya lusangukilo lwa Kidishitu, amba kebamwidilwepo nansha dimo mu Kibundu* ne ngitu yandi keyamwenepo bubole.*+ 32 Leza wasangwile uno Yesu, kadi batwe bonso twi batumoni ba uno mwanda.+ 33 Ino, byaazunzwilwe ku kuboko kwa lundyo kwa Leza+ ne byaatambwile kudi Tata+ mushipiditu ujila walailwe, wapungulula kyomwamona’ki ne kyomwaivwana’ki. 34 Mwanda Davida kākandilepo mūlu, ino aye mwine unena’mba, ‘Yehova* wanenene Mfumwami amba: “Shikata ku kuboko kwami kwa lundyo 35 enka ne byontūla balwana nobe ke kitūlo kya maulu obe.”’+ 36 Nanshi, njibo yonso ya Isalela iyuke na bubine amba Leza wamutūla ke Mfumwetu+ kadi ke Kidishitu, uno Yesu omwaipaile ku mutyi.”+

37 Ebiya abo pa kwivwana nabya, batapwa ku mityima, penepo kebanena Petelo ne batumibwa bakwabo amba: “A bana-balume, banabetu, le tulonge namani?” 38 Petelo webanena’mba: “Mwisāsei,+ kadi umo ne umo abatyijibwe+ mu dijina dya Yesu Kidishitu mwanda wa kulekelwa bubi bwenu,+ kadi mukatambula kyabuntu kya ku bitupu kya mushipiditu ujila. 39 Mwanda mulao+ wemulailwe banwe, ne benu bana, ne boba bonso badi kulampe, boba bonso betwa na Yehova* Leza wetu kwadi.”+ 40 Kadi wasapwile bukamoni ne pa mfulo na binenwa bikwabo bivule bine, wibesāshila’nka kwibesāshila’mba: “Mwipandijei ku luno lukongo lukondame.”+ 41 Penepo boba baitabije binenwa byandi na nsangaji babatyijibwa,+ kadi mu dyodya difuku kwabwejibwa kintu kya bantu* 3 000.+ 42 Kadi badi bepāne nyeke mu lufundijo lwa batumibwa, ne kwibungila pamo,* ne kudya byakudya,+ ne mu milombelo.+

43 Bine, bantu bonso* bashilula kukwatwa moyo, kadi bintu bya kutendelwa* ne biyukeno bivule byashilula kumweka kupityila ku batumibwa.+ 44 Bonso baitabije badi pamo, ne bintu byonso byobadi nabyo byadi ke bya abo bonso, 45 kadi badi bapoteja bintu ne bituntwa byabo,+ beabila lupeto abo bonso, mungya byadi bibudilwe muntu ne muntu.+ 46 Kadi difuku ne difuku badi benda kitatyi kyonso ku tempelo na kitungo kimo, badya byakudya ku mobo meshileshile ne kudīla byakudya pamo na nsangaji mikatampe ne na mutyima tō, 47 batendela Leza kadi bantu bonso badi bebatōkelwa mutyima. Ne kadi Yehova* wadi’nka wibabweja’ko difuku ne difuku boba bapanda.+

3 Ebiya ba Petelo ne Yoano badi bakanda ku tempelo pa nsá ya milombelo, nsá ya kitema,* 2 kadi kwadi muntu umo kilema tamba kubutulwa obadi baselele. Difuku ne difuku badi bamutūlanga pabwipi na kibelo kya tempelo kitwa bu Kibelo kya Buya, mwanda wa alombe byabuntu bya ku lusa ku boba batwela mu tempelo. 3 Paamwene ba Petelo ne Yoano kebadi pabwipi na kutwela mu tempelo, waanza kwibalomba byabuntu bya ku lusa. 4 Ino Petelo, pamo ne Yoano, wamutala sō, wamunena’mba: “Witutale bidi.” 5 Penepa webabambila meso sō, katengele bamupe kintu. 6 Inoko, Petelo wamunena’mba: “Ndalama ne olo* nkidipo nabyo, ino nsa kukupa kyokya kyondi nakyo. Mu dijina dya Yesu Kidishitu mwine Nazala, imana wende!”+ 7 Ebiya wamukwata ku kuboko kwa lundyo wamwimika.+ Ponka na ponka maulu andi ne tumpo* byaninga;+ 8 watombojoka na maulu+ andi kaenda. Ebiya watwela nabo mu tempelo, wenda utombojoka, koku utumbija Leza. 9 Kadi bantu bonso bamumwene wenda utendela Leza. 10 Kadi bamujiula’mba uno’u ye muntu wadi ushikatanga utengele byabuntu bya ku lusa pa Kibelo kya Buya kya tempelo,+ batulumuka bininge ne kusangala bya mwiko pa kumona byamufikila.

11 Muntu’wa paadi ukikwete ba Petelo ne Yoano, bantu bonso baiya lubilo kobadi, kokwa kwadi kwitwa bu Bukōnde bwa Solomone,+ babezemuka bya malwa. 12 Petelo pa kumona nabya, wanena bantu amba: “A bantu ba Isalela, i kika le kyomutulumukila bininge pa kino, ne mwanda waka mwitutala sō bwa batwe baendeja uno muntu ku bukomo bwetu nansha na bwine Leza bwetu? 13 Leza wa Abalahama ne wa Izake ne wa Yakoba,+ Leza wa bakulutuba betu, watumbija Mwingidi wandi,+ Yesu,+ mwine omwapēne+ kudi Pilato, mwamutuna ku meso andi, nansha byaadi ke mutyibe butyibi bwa kumulekelela. 14 I bine, mwatunine yewa ujila kadi moloke, ino mwalomba’ko muntu wadi ntapañani emupebwe,+ 15 ino mwaipaya’ko Kalombwe Mukatampe wa būmi.+ Inoko Leza wamusangwile mu bafwe, ne batwe bano twi batumoni+ ba uno mwanda. 16 Kadi uno muntu omumwene’u ne omuyukile wakomejibwa mu dijina dyandi, ne na lwitabijo lwetu mu dijina dyandi. Lwitabijo lotumwitabije lo lwakomeja uno muntu’u ku meso enu banwe bonso. 17 Shi ke pano, a banabetu, ndyukile amba mwalongele nabya mwanda kemwadipo muyukile,+ monka mwalongēle ne baledi benu.+ 18 Inoko mu uno muswelo Leza wafikidije bintu byaābadikile kusapula kupityila ku kyakanwa kya bapolofeto bonso, amba Kidishitu wandi ukasusukanga.+

19 “Nanshi, mwisāsei,+ kadi alamukai+ mwanda wa bubi bwenu bujimankanibwe,+ amba bitatyi bya kutūja bitambe kudi Yehova mwine* 20 kadi amba atume Kidishitu wimutongēlwe, ke Yesu kadi. 21 Diulu difwaninwe kulama uno’u kufika ne ku bitatyi bya kujokejibwa kwa bintu byonso byānenene Leza kupityila ku kyakanwa kya bapolofeto bandi bajila ba pa kala. 22 Bine, Mosesa wānenene amba: ‘Yehova* Leza wenu ukemulupwila mu banabenu mupolofeto pamo bwa ami.+ Mufwaninwe kwivwana byonso byaemulombola.+ 23 Na bubine, yewa ense* kakevwanapo yao Mupolofeto ukonakanibwa fututu umbukata mwa bantu.’+ 24 Kadi bapolofeto bonsololo, kushilwila kudi Samwele ne boba bāmulondele’po, monka mwānenene bavule bene, nabo bāsapwile patōkelela ano mafuku.+ 25 Banwe mwi bana ba bapolofeto ne ba kipwano kyāsambile Leza na bakulutuba benu,+ wānenene Abalahama amba: ‘Kadi kupityila ku lutundu* lobe bisaka byonso bya pano panshi bikeselwa.’+ 26 Leza, pa kupwa kulupula Mwingidi wandi, wamutumine bidi+ komudi mwanda wa kwimwesela na kwimuvundamija muntu ne muntu ku bilongwa byenu bibi.”

4 Bano babidi pobadi besamba na bantu, babitobo, ne kapita wa tempelo, ne Basadusea+ baiya kobadi. 2 Badi bafītwe mwanda batumibwa badi bafundija bantu ne kwibasapwila patōkelela lusangukilo lwa Yesu mu bafwe.*+ 3 Ebiya bebakwata,* bebakuta+ kufika ne dya kesha, mwanda kyadi kala ke kyolwa. 4 Inoko, bavule baivwene binenwa’bya baitabija, kadi bungi bwa bana-balume bwafika ne ku kintu kya 5 000.+

5 Dya kesha baledi babo, ne bakulumpe, ne basonekeji bebunga mu Yelusalema, 6 pamo ne Anasa+ kitobo mukulu, Kaifasa,+ Yoano, Alekizandele, ne bonso badi babutulwa na kitobo mukulu. 7 Baimika ba Petelo ne Yoano umbukata mwabo kebebepangula’mba: “Le mwalongele kino na bukomo’ka ne mu dijina dya ani?” 8 Penepo Petelo, muyulwe mushipiditu ujila,+ webanena’mba:

“Banwe baledi ba bantu ne bakulumpe, 9 shi ketusambijibwa dyalelo dino’di pa mwanda wa kiyampe kyalongelwa muntu mulemane,+ kemusake kuyuka i ani mwine wakomeja uno muntu, 10 banwe bonso ne bantu bonso ba Isalela, yukai amba mu dijina dya Yesu Kidishitu mwine Nazala,+ omwaipaile ku mutyi+ ino Leza wamusangula mu bafwe,+ na bukwashi bwandi uno muntu yeu wimene pano mukomo ku meso enu. 11 Aye ye ‘dibwe dyomwamwene banwe bōbaki bu dya bitupu dyaalamuka ke dibwe dinedine dya difinko.’*+ 12 Ne kadi, i kutupu lupandilo mu muntu mukwabo nansha umo, mwanda i kutupu dijina dikwabo+ munshi mwa diulu dipelwe bantu motufwaninwe kupandila.”+

13 Abo pa kumona ba Petelo ne Yoano banena patōkelela,* ne pa kuyuka’mba badi bantu bampikwa kufunda* kadi ba bituputupu,+ batulumuka. Penepa bajingulula’mba badi pamo na Yesu.+ 14 Pobadi batala muntu waundapilwe’wa wimene nabo,+ ne kya kutentulula kine kyebabulwa.+ 15 Ebiya bebasoñanya bende panja pa njibo ya Sanedini, kebakale ñeni abo bene na bene, 16 amba: “Le tusa kulonga namani na bano bantu?+ Mwanda, na bubine, kiyukeno kikatampe kibalongeka kupityila kobadi, kimwekelele ku bekadi bonso ba Yelusalema,+ kadi ketukokejapo kutuna’kyo. 17 Kutyina’mba uno mwanda wakendelela kusambakana mu bantu, twibazakajei ne kwibalombola baleke kusapwila monka muntu nansha umo mu dino dijina.”+

18 Penepo bebeta kupwa bebasoñanya’mba baleke kunena kintu nansha kimo nansha kufundija mu dijina dya Yesu. 19 Ino ba Petelo ne Yoano batentulula kebebanena’mba: “Shi kadi i kyoloke ku meso a Leza kwimwivwana’ko banwe kupita’ko Leza, tyibai’o banwe bene. 20 Inoko batwe, ketubwanyapo kuleka kwisamba bintu byotwamwene ne byotwaivwene.”+ 21 Ebiya pobapwile kwibazakaja dikwabo, bebalekelela, mwanda kebatenepo bubinga bwa kwibapēla mfuto ne pa mwanda wa bantu,+ ke-pantu bonso badi batumbija Leza pa mwanda wa byobya byalongekele. 22 Mwanda muntu mwine wakomejibwe na kino kingelengele* kya bundapi wadi na myaka 40 ne musubu.

23 Abo pa kulekelelwa, baenda kudi babo bantu kebebasapwila byebanenanga babitobo bakulu ne bakulumpe. 24 Nabo pa kwivwana nabya, batulwila mawi abo mwa kimo kudi Leza kebanena’mba:

“A Mfumu Mwinē Lupusa Lonso, abe ye Mwine wālongele diulu, ntanda, dijiba, ne byonso bidi’mo,+ 25 ne wānenene kupityila ku mushipiditu ujila mu kyakanwa kya mukulutuba wetu Davida,+ mwingidi obe amba: ‘Mwanda waka mizo yalobele bulobo ne bantu nabo balangulukila pa bintu bya bituputupu? 26 Balopwe ba ntanda baimene midindi ibidi ne baledi baungwila bwa muntu umo kulwa na Yehova* ne na mushingwe māni wandi.’*+ 27 Mwanda bine, ba Heloda ne Pontyusa Pilato,+ pamo ne bantu ba mizo ne bantu ba Isalela bebungile pamo mu kino kibundi kulwa na Yesu mwingidi obe ujila, owashingile māni,+ 28 kulonga kyokya kyātungile kala kuboko kobe ne milangwe yobe amba kilongeke.+ 29 Ino pano, a Yehova,* tá mutyima ku byobetuzakaja, kadi kwasha bapika bobe besambe’nka kwisamba mwanda obe pampikwa moyo nansha dimo, 30 poolola kuboko kobe mwanda wa kundapa ne palongeka biyukeno ne bintu bya kutendelwa*+ mu dijina dya Yesu mwingidi obe ujila.”+

31 Kadi abo pa kuzenza mu milombelo,* kifuko kyobadi bebungile’mo kyatenkana, ne abo bonsololo bayulwa mushipiditu ujila+ kebesambe mwanda wa Leza pampikwa moyo.+

32 Ne kadi, milwi ne milwi ya boba baitabije badi na mutyima umo ne muya* umo, kadi i kutupu nansha umo mobadi wadi unena’mba kintu kyonso kyadi nakyo i kyandi bunka, ino bintu byonso byobadi nabyo byadi bya abo bonso.+ 33 Kadi batumibwa badi basapula na bukomo bukatampe bukamoni bwa myanda ya lusangukilo lwa Mfumwetu Yesu,+ kadi kanye ka ku buntu bitupu ka ntanda ne miseke kadi pobadi abo bonso. 34 Bine, mu bukata mwabo mwadi mutupu mufudilwe,+ mwanda boba bonso badi na madimi ne mobo badi bapoteja’o baleta lupeto lwa byobadi bapoteja, 35 batūla’lo ku maulu a batumibwa.+ Ebiya kebabila muntu ne muntu, mungya kufudilwa kwandi.+ 36 Penepo Yosefa, wadi witwa na batumibwa ne bu Banabasa+ (kushintulula ko kunena’mba, “Mwana wa Busengi”), mwine Levi, mubutwilwe ku Saipusa, 37 wadi na kipēta kya ntanda kupwa wapoteja’kyo, wasela lupeto wakatūla’lo ku maulu a batumibwa.+

5 Inoko, mwana-mulume umo wa dijina dya bu Ananaisa, pamo ne wandi mukaji Safaila, wapoteje kintu kyandi. 2 Ino wafya’ko lupeto lumo, wandi mukaji nandi papo uyukile, wasela’ko’tu kipindi wakekitūla ku maulu a batumibwa.+ 3 Ebiya Petelo wanena’mba: “A Ananaisa, mwanda waka Satana wakupe mutwe kobepela+ mushipiditu ujila+ ne kufya’ko lupeto lumo lwa budimi? 4 Powadi nabo mwene bwadi bobe? Kadi powapwile kwibupoteja mwene lupeto lwadi lobe? I kika kyowalangila mu mutyima obe kulonga kilongwa kya uno muswelo? Owabepela i Leza, ke bantupo, aa.” 5 Ananaisa pa kwivwana bino binenwa, wapona panshi wafwa. Ne boba bonso baivwene uno mwanda bakwatwa moyo mukatampe. 6 Kupwa bansongwalume baimana, bamuvungila mu bisandi, bamusela, bakamujīka.

7 Kintu kya nsá isatu pa kupita’po wandi mukaji watwela, kuyuka byalongeka mpika. 8 Petelo wamwipangula’mba: “Nombole bidi, le luno lupeto ye lonso lomwapoteje budimi banwe bubidi?” Nandi amba: “En-en, i enka lwalo.” 9 Penepo Petelo wamunena’mba: “I kika kyomweivwanikila bubidi bwenu kutompa mushipiditu wa Yehova?* Tala! Maulu a boba bakajīkanga obe mulume ao pa kibelo, kadi basa kukusela.” 10 Ponka na ponka wapona panshi ku maulu a Petelo wafwa. Bansongwalume pa kutwela, bamutana ke mufwe, penepo bamusela bakamujīka pabwipi na mulumyandi. 11 Penepo kipwilo kyonso ne boba bonso baivwene ino myanda bakwatwa moyo mukatampe.

12 Ne kadi, biyukeno ne bintu bya kutendelwa* bivule byadi bilongeka nyeke mu bantu ku maboko a batumibwa;+ kadi bonso badi bebungila mu Bukōnde bwa Solomone.+ 13 Bine, i kutupu bakwabo badi na bukankamane bwa kwilunga kobadi; inoko, bantu badi bebatendela bininge. 14 Ne kadi, boba badi betabija Mfumwetu badi belundila’ko nyeke, bana-balume ne bana-bakaji bangi bininge.+ 15 Badi baselela ne babela mu bipito bikatampe ne kwibalādika pa tubitanda ne pa byata, amba Petelo pa kupita, nansha’tu munjiñininya wandi uponene’ko bamobamo.+ 16 Kadi, bibumbo bya bantu ba mu bibundi bya kufula kwa Yelusalema badi bāya’nka kwiya, baselele bantu babela ne boba bakambakanibwa na mishipiditu ya disubi, kadi abo bonsololo badi babelulwa.

17 Ino kitobo mukatampe waimana, ne bonso baadi nabo, ba mu katango ka Basadusea, badi bayulwe mukao. 18 Ebiya bakwata* batumibwa, bebela mu kifungo kya bantu bonso.+ 19 Ino bufuku, mwikeulu wa Yehova* washitula bibelo bya kifungo,+ webatambija panja kanena’mba: 20 “Endai mukemane mu tempelo kadi sapwilai bantu myanda yonso ya buno būmi.” 21 Abo pa kwivwana nabya, batwela mu tempelo pa kutamba kwa dyuba, kebafundija.

Ino kitobo mukatampe ne boba baadi nabo pa kufika, babungila Sanedini pamo ne kitango kyonso kya bakulumpe ba bana ba Isalela, batumanya bantu mu kifungo amba bakalete batumibwa ku meso abo. 22 Penepa bampulushi pa kufika’ko, kebebatenepo mu kifungo. Ebiya bajoka bebalombola, 23 amba: “Tubatana ku kifungo kushite’tu senene, ne balami bemene pa bibelo, ino batwe pa kushitula’ko, ketutene’mopo muntu.” 24 Penepo, kapita wa tempelo ne babitobo bakulu pa kwivwana ino myanda, ñeni yebavutakana, kebeipangula shi bisa kufula namani. 25 Ino muntu umo waiya kaebasapwila’mba: “Talai! Bantu bomwaelele mu kifungo’ba boba mu tempelo, bemene bafundija bantu.” 26 Penepo kapita waenda na bandi bampulushi wakebasela, ino pampikwa kwibasanshija, mwanda badi batyina bantu bakebasa mabwe.+

27 Penepo baiya nabo bebemika ku meso a Sanedini. Ebiya kitobo mukatampe webepangula 28 kanena’mba: “Twemukomene kuleka kufundija monka mu dino dijina,+ ino talai! mubayuja Yelusalema na bufundiji bwenu, kadi musumininwe kuleta mashi a uno muntu potudi.”+ 29 Petelo ne batumibwa bakwabo batentulula kebanena’mba: “Tufwaninwe kukōkela Leza bu mulopwe kupita’ko bantu.+ 30 Leza wa bakulutuba betu wasangwile Yesu, omwaipaile banwe, mwamuyeyeka ku mutyi.*+ 31 Leza wazunzwile uno’u ke Kalombwe Mukatampe+ ne Umpandiji+ ku kuboko kwandi kwa lundyo,+ amba Isalela amone kwisāsa ne kulekelwa bubi.+ 32 Kadi batwe twi batumoni ba ino myanda,+ ne mushipiditu ujila mwine,+ upēne Leza ku boba bamukōkele bu mulopwe.”

33 Abo pa kwivwana namino, bakalabala bya mwiko* kebasake kwibepaya. 34 Ino Mufadiseo umo witwa bu Ngamadyela+ waimana mu Sanedini; aye wadi mufundiji wa Bijila mulēmekibwe na bantu bonso, wasoñanya’mba balupwile bidi bantu’ba panja kitatyi kityetye. 35 Ebiya webanena’mba: “A bantu ba Isalela, tadijai byomusaka kulonga bano bantu. 36 Kimfwa, kumeso kwa ano mafuku kwatalukile Teudasa, witela bu muntu mwinemwine, kadi kintu kya bantu 400, belunga ku kitango kyandi. Ino waipailwe, ne boba bonso badi bamulonda bapalakana, bonso ne kobaya jimejime. 37 Kupwa aye, kwatalukile Yudasa mwine Ngadilea mu mafuku a kwilembeja, wakokela balondi kwadi. Uno muntu nandi wafwile, ne boba bonso badi bamulonda nabo bapalakana. 38 Shi ke pano nemulombola pa uno mwanda’mba, kemwakitwelai mu myanda ya bano bantu, ino mwibalekei. Mwanda shi ino nkuku nansha uno mwingilo i wa ku bantu, usa kufulamikwa panshi; 39 inoko shi i wa kwa Leza, kemukabwanyapo kwibafulamika panshi.+ Shi bitupu, mukokeja’nka ne kumweka bu bantu balwa na Leza mwine.”+ 40 Ponkapo baitabija madingi andi, baityija batumibwa, bebakupila nsonde,*+ bebakoma baleke kunena monka mu dijina dya Yesu, kupwa bebaleka bende.

41 Penepo bataluka ku meso a Sanedini, benda basangele+ mwanda abamweka bu bantu bafwaninwe kufutululwa pa mwanda wa dijina dyandi. 42 Kadi difuku ne difuku baendelele ne kuleka’byo mpika kufundija ne kusapula mu tempelo ne ku njibo ne njibo+ myanda miyampe ya Kidishitu, Yesu.+

6 Mu mene mafuku’a, bana ba bwanga pobadi benda bavula, Bayuda besamba Kingidiki bashilula kutompwela Bayuda besamba Kihebelu, mwanda badi basūla bakaji babo ba kishala pa kwabanya bintu difuku ne difuku.+ 2 Penepo Ba Dikumi ne Babidi baita kibumbo kya bana ba bwanga bonso pamo kebanena’mba: “Ke biyampepo* batwe tuleke mwanda wa Leza ketwabanya’ko byakudya ku mameza.+ 3 Nanshi, a banabetu, tongai banwe bene mu bukata mwenu bana-balume basamba-babidi banenenwa biyampe,*+ bayulwe mushipiditu ne tunangu,+ amba twibatūle pa uno mwingilo wa kamweno;+ 4 ino batwe twipāne mu milombelo ne mu mwingilo wa kufundija mwanda.” 5 Byobya byobanenene byasangaja kibumbo kyonso, batonga Shitevani, muntu muyulwe lwitabijo ne mushipiditu ujila, ne Fidipa,+ ne Pokolusa, ne Nikano, ne Tyimone, ne Pamenasa, ne Nikola, wa kwalamuka mwine Antyioka. 6 Bebaleta kudi batumibwa, nabo pa kupwa kulombela, bebatenteka makasa.+

7 Penepa mwanda wa Leza wadi wenda usambakana,+ ne bana ba bwanga badi benda bevudija bininge+ mu Yelusalema; kadi ne kibumbo kikatampe kya babitobo kyaitabija.+

8 Ebiya Shitevani, muyulwe katōkwe ka Leza ne bukomo, wadi ulonga bintu bikatampe bya kutendelwa* ne biyukeno mu bantu. 9 Ino bantu bamo ba mu yoya yadi itwa bu Shinankonka ya Bapebwe Bwanapabo, baiya pamo na bantu bamo bene Shilene ne bene Alekezandala, ne bantu bamo ba ku Shidisha ne Azia, kwipotomeja na Shitevani. 10 Inoko kebabwenyepo kunekenya tunangu ne mushipiditu byadi bimukwasha pa kwisamba.+ 11 Penepo banekenya bantu kufula banene amba: “Twamwivwene unena bintu bya kutuka Mosesa ne Leza.” 12 Ebiya bakela bantu bulobo, ne bakulumpe, ne basonekeji, baiya lubilo kwadi, bamukwata ku bukomo baenda nandi ku Sanedini. 13 Bapityija’ko batumoni ba bubela, kebanena’mba: “Uno muntu’u kalekelepo kunenena bibi kino kifuko kijila ne Bijila bine kumo. 14 Kimfwa, twamwivwene unena’mba uno Yesu mwine Nazala usa kubundula kino kifuko ne kushinta bibidiji byētushidile Mosesa.”

15 Kadi boba bonso badi bashikete mu Sanedini pobadi bamutala sō, bamona’mba mpala yandi yadi pamo bwa mpala ya mwikeulu.

7 Ino kitobo mukatampe wanena’mba: “Le ye nankyo?” 2 Shitevani watentulula’mba: “A bana-balume, banwe banabetu ne batata, ivwanai. Leza wa ntumbo wāmwekēle mukulutuba wetu Abalahama paādi mu Mesopotemya, kumeso kwa aye kwikala mu Halane,+ 3 wāmunena’mba: ‘Taluka mu yenu ntanda ne mu babutule bobe wende mu ntanda yonkakulombola.’+ 4 Penepo wātaluka mu ntanda ya bene Kaladea wākashikata mu Halane. Kwine’kwa, shandi pa kufwa,+ Leza wāmunena avilukile mu ino ntanda yomushikete’mo’i.+ 5 Inoko, kāmupele’mopo bupyani nansha bumo, nansha pa kunyanta lwayo pene; ino wāmulaile kumupa’yo ke yandi, ne lutundu* lwandi,+ nansha byaādi kaikele ne na mwana mwine. 6 Ne kadi, Leza wāmulombwele amba lutundu* lwandi lukekalanga lweni mu ntanda-bene ne amba bantu bakebamuna bupika ne kwibamwesha malwa* myaka 400.+ 7 ‘Kadi muzo mwine obakengidila bu bapika nkeutyibila mambo,’+ e mwānenene Leza, ‘ne bino’bi pa kupita’po bakatamba ne kuñingidila mingilo ikola mu kino kifuko.’+

8 “Kadi wāmupele ne kipwano kya disao,+ ebiya wābutula Izake+ wāmutweja kwisao mu difuku dya mwānda,+ Izake wābutula* Yakoba, Yakoba nandi wābutula mitwe ya bisaka* 12. 9 Ne mitwe ya bisaka’ya yākwatyilwa Yosefa+ mukao yāmupoteja mu Edipito.+ Inoko Leza wādi nandi,+ 10 wāmukūla mu byamalwa byandi byonso ne kumupa katōkwe ne tunangu ku meso a Felo mulopwe wa Edipito. Nandi wāmutonga kuludika Edipito ne njibo yandi yonso.+ 11 Ino kwāponene kipupo kya nzala mu Edipito ne mu Kenani monsololo, bine kyamalwa kikatampe, kadi bakulutuba betu kebādipo bamona bya kudya.+ 12 Inoko Yakoba waivwana’mba mu Edipito mudi byakudya,* ebiya wātuma’ko bakulutuba betu musunsa mubajinji.+ 13 Musunsa wa bubidi, Yosefa wēyukanya kudi banababo, penepo kisaka kya Yosefa kyāyukana kwa Felo.+ 14 Ebiya Yosefa walaija ne kwityija shandi Yakoba ne babutule bandi bonso batambe ku kyokya kifuko,+ abo bonso bādi bantu* 75.+ 15 Penepa Yakoba wātūkila ku Edipito,+ wāfwila konka,+ ne bakulutuba betu bene.+ 16 Bēbaselela ku Shekema bēbalādika mu kibundu kyāpotele Abalahama ku lupeto lwa ndalama kudi bana ba Hamola mu Shekema.+

17 “Kitatyi kya kufikidila mulao wālaile Leza kudi Abalahama byokyādi kekifwena, bantu bēbutula ne kwivudija mu Edipito, 18 kufika ne byābikele mulopwe mukwabo mu Edipito, mwine kādipo uyukile Yosefa.+ 19 Uno’u wādyumukīle bantu betu ne kuningila batata bibibibi bele babo bana ba lukeke, kutyina’mba bakekala bōmi.+ 20 Mu kine kitatyi’kyo Mosesa wābutulwa, wādi mulumbuluke kudi Leza.* Wālelwa* mu njibo ya shandi myeji isatu.+ 21 Ino aye pa kwelwa,*+ mwanā Felo mwana-mukaji wāmusela, wamutamija pamo bwa wandi mwana.+ 22 Penepo Mosesa wāfundijibwa tunangu tonso twa bene Edipito. Bine, wādi mukomo mu binenwa ne mu bilongwa.+

23 “Ebiya paābwenye myaka 40, wāikala na mutyima wa* kukapempula* banababo, bana ba Isalela.+ 24 Paāmwene mwanabo umo ususulwa pa kubulwa mwanda, wāmwitabila ne kulubula kinongo mwanda wa yewa wādi ususulwa, wāipaya mwine Edipito’wa. 25 Wālangile amba banababo basa kujingulula’mba Leza usa kwibapandija kupityila ku kuboko kwandi, ino abo kebājingulwile’byopo. 26 Difuku dyālondele’po wēbatana pobādi bekupila, wātompa kwibapwanya mu ndoe, amba: ‘A bana-balume, mwi bana na bana. I kika kyomwisuswila banwe bene?’ 27 Ino yewa wādi ususula mukwabo’wa wāmutakika, amba: ‘I ani wakutūla bu muledi ne mutyibi wetu? 28 Le kosake kungipaya nami na mowaipaile mwine Edipito kesha, a?’ 29 Mosesa pa kwivwana nabya wānyema wākekala bu mweni ku ntanda ya Midyana, kwine kwawābutwidile bana babidi bana-balume.+

30 “Myaka 40 pa kupita’po, mwikeulu umo wāmumwekela mu ntanda mutuputupu ya ku Lūlu lwa Shinai mu lubimbi lwa kimuna kya miba kitēma.+ 31 Mosesa pa kumona nabya wātulumuka. Ino pawādi kafwena kukatadija, wāivwana diwi dya Yehova* amba: 32 ‘Ami ne Leza wa bakulutuba bobe, Leza wa Abalahama, wa Izake, ne wa Yakoba.’+ Mosesa wāshilula kuzakala, kadi kāsomwenwepo kutadija’ko monka. 33 Yehova* wāmunena’mba: ‘Vūla bikwabilo ku maulu obe mwanda pa kifuko poimene’po i pa nshi ijila. 34 Bine namone malwa a bami bantu badi mu Edipito, kadi naivwana kubinza kwabo,+ kadi natūka kwibakūla. Shi ke pano iya, nsa kukutuma ku Edipito.’ 35 Uno Mosesa’u obāpelele, amba: ‘I ani wakutūla bu muledi ne mutyibi?’+ ye enka obātumine kudi Leza+ bu muledi ne munyongolodi kupityila kudi mwikeulu wāmumwekēle mu kimuna kya miba. 36 Uno muntu’u wēbalupwile+ pa kupwa kulonga bintu bya kutendelwa* ne biyukeno mu Edipito+ ne pa Dijiba Dityila+ ne mu ntanda mutuputupu myaka 40.+

37 “Uno’u ye Mosesa wānenene bana ba Isalela amba: ‘Leza ukemulupwila mu banabenu mupolofeto pamo bwa ami.’+ 38 I aye wāikele umbukata mwa kipwilo mu ntanda mutuputupu na mwikeulu+ wēsambile nandi+ ku Lūlu lwa Shinai ne na bakulutuba betu, wātambula binenwa bikola bya būmi bya kwitupa.+ 39 Bakulutuba betu bāpelele kumukōkela, ino bāmutolwela kufula+ kebājokela mu mityima yabo mu Edipito,+ 40 kebanena Alone amba: ‘Witulongele baleza ba kwitutangidila kumeso. Mwanda ketuyukilepo kyafikila uno Mosesa, mwine wetulupwile mu ntanda ya Edipito.’+ 41 Penepo bāpunga kyana kya ñombe mu oa mafuku’a, bālambula ne kitapwa ku kino kilezaleza kebesangaja mu mingilo ya makasa abo.+ 42 Ebiya Leza wēbavundamina ne kwibapāna kebengidila kibumbo kya mūlu mingilo ikola,+ monka mokilembelwe mu mukanda wa Bapolofeto amba: ‘Le i kudi ami komwālambwile banyema ne bitapwa mu myaka 40 mu ntanda mutuputupu, a njibo ya Isalela? 43 Inoko i pema wa Moloka+ ne luñenyenye lwa leza Lefana byomwāselele, bankishi bomwālongele kemwibatōta. O mwanda nkemuselela bu misungi kupita ne ku Babiloni+ kwine.’

44 “Bakulutuba betu badi na pema wa bukamoni mu ntanda mutuputupu, monka mwaāsoñaninye Mosesa pāwesambile nandi mwa kumupungila mungya kimfwa kya kulondela’po kyaāmwene.+ 45 Kadi bakulutuba betu bāmutambwile ke wabo, bāmuselela pamo na Yoshua mu ntanda yādi ya mizo+ yāpangilwe na Leza ku meso a bakulutuba betu.+ Pema wāikele mwine’mwa kufika ne mu mafuku a Davida. 46 Leza wāmutōkelwa mutyima, nandi wālomba dyese dya kulongela Leza wa Yakoba+ kīkalo. 47 Ino i Solomone wāmūbakīle njibo.+ 48 Inoko, Mwine wa Peulu Mwine kashikatangapo mu mobo alongelwe na makasa,+ monka munenena mupolofeto amba: 49 ‘Diulu i lupona lwami,+ ntanda nayo i kitūlo kya maulu ami.+ Le i njibo ya muswelo’ka yomukangubakila? i Yehova* unena. Nansha kifuko kyami pa kukōkolokelwa kidi kwepi le? 50 Mwene kuboko kwami ko kwālongele bino bintu byonso?’+

51 “Banwe ba mitwe myūmu ne bampikwa kutwela kwisao kwa mityima ne matwi, mulwanga mafuku onso na mushipiditu ujila; monka mwālongēle bakulutuba benu, nenu ye momulongela.+ 52 Le i mupolofeto’ka le kapāngilwepangilwepo na bakulutuba benu?+ Bine, bāipaile boba bādi bebasapwila kala kwiya kwa yewa moloke,+ mwine omwaabile ne kumwipaya mwamwipaya,+ 53 banwe bantu batambwile Bijila monka mobyāletelwe na bamwikeulu+ ino kulama’byo mpika.”

54 Abo pa kwivwana ino myanda, bakalabala bya mwiko* mu mityima yabo, kebashenkenya meno pa mwanda wandi. 55 Ino aye, byaadi muyulwe mushipiditu ujila, watala mūlu sō wamona ntumbo ya Leza ne Yesu wimene ku kuboko kwa lundyo kwa Leza,+ 56 wanena’mba: “Talai! Namone madiulu ashituka ne Mwanā muntu+ wimene ku kuboko kwa lundyo kwa Leza.”+ 57 Penepo baela ñanji na mawi abo makatampe ne pa mfulo, bejika makasa ku matwi, kupwa bamufyutukila bonso kya pamo. 58 Abo pa kupwa kumwela panja pa kibundi, bashilula kumwasa mabwe.+ Batumoni+ batūla bivwalwa byabo bya pangala pa maulu a nsongwalume umo witwa bu Solo.+ 59 Pobadi bamwasa mabwe, Shitevani waabija namino amba: “A Mfumwetu Yesu, tambula mushipiditu wami.” 60 Penepo wafukata manwi panshi, waela lubila na diwi dikatampe amba: “A Yehova,* kokebalambika buno bubi’bu.”+ Aye upwa’tu kunena nabya, walāla mu tulo twa lufu.

8 Solo aye waitabije Shitevani epaibwe.+

Mu dyodya difuku kwatambile kupangwapangwa kukatampe kwa kipwilo kyadi mu Yelusalema; kutalula’mo enka batumibwa, bonso bapalakenine koku ne koku ku mitamba ya Yudea ne Samadia.+ 2 Ino bantu bepāne basela Shitevani bakamujīka, bamudila madilo makatampe. 3 Inoko Solo washilula kuletela kipwilo musala. Utwela mu mobo, wadi mu yoi kadi mu yoi, ubulwila panja bana-balume ne bana-bakaji, wakebakutyija mu kifungo.+

4 Inoko boba bapalakene badi benda basapula myanda miyampe ya owa mwanda mu ntanda’ya.+ 5 Penepo Fidipa watūkila mu kibundi kya* Samadia+ kaebasapwila Kidishitu. 6 Bibumbo byonso pamo byadi bita mutyima ku byadi binena Fidipa koku bamuteja, batala ne biyukeno byawadi ulonga. 7 Mwanda bavule badi na mishipiditu ya disubi, ayo nayo yadi yela ñanji na diwi dikatampe ne kutamba yatamba.+ Ne kadi, bavule badi na bulebe ne bulema badi babeluka. 8 Penepo kwaikala nsangaji mikatampe kashā mu kyokya kibundi.

9 Mu kibundi’kya mwadi muntu umo witwa bu Shimona, dibajinji wadi ulonga bya maleñanya, utulumuna muzo wa Samadia, witela bu muntu mwine mukatampe. 10 Abo bonso, kushilwila ku mutyetye bininge kutūla ne ku mukatampe bininge, badi bamuta mutyima kebanena’mba: “Uno muntu i Bukomo bwa Leza, bwitwa bu Bukatampe.” 11 O mwanda badi bamuta mutyima mwanda wadi wibatulumuna kyaba kilampe na byandi bya maleñanya. 12 Ino abo pa kwitabija Fidipa wadi wibasapwila myanda miyampe ya Bulopwe bwa Leza+ ne ya dijina dya Yesu Kidishitu, bana-balume ne bana-bakaji badi babatyijibwa.+ 13 Ne Shimona mwine waitabija, kadi aye pa kupwa kubatyijibwa, wadi kaenda pamo na Fidipa;+ kadi wadi utulumuka pa kumona biyukeno ne bilongwa bya bukomo byadi bilongeka.

14 Batumibwa mu Yelusalema pobaivwene amba bene Samadia abaitabija mwanda wa Leza,+ bebatumina ba Petelo ne Yoano; 15 nabo batūkila’ko kadi bebalombelela’mba batambule mushipiditu ujila.+ 16 Mwanda mushipiditu wadi kewatūkīle muntu nansha umo pobadi, ino badi babatyijibwe’nka mu dijina dya Mfumwetu Yesu.+ 17 Ebiya bebatenteka makasa,+ nabo kebatambula mushipiditu ujila.

18 Ino Shimona pa kumona’mba abapebwa mushipiditu pa kutentekwa makasa na batumibwa, webatambika lupeto, 19 amba: “Nami mpei luno lupusa, amba ense’tu onkatenteka makasa atambule mushipiditu ujila.” 20 Ino Petelo wamunena’mba: “Ndalama yobe yoneke pamo nobe, mwanda ubalanga’mba kyabuntu kya ku bitupu kya Leza ukokeja kutambula’kyo ku lupeto.+ 21 Kudipo na kantu nansha na kyepelo kine mu uno mwanda, ke-muntu mutyima obe ke molokepo ku meso a Leza. 22 Shi ke pano, wisāse kino kibi kyowalonga, ne kuzenza Yehova* amba, shi bikokejika, mifwatakanyo mibi idi ku mutyima obe ikulekelwe; 23 mwanda namone amba wi bulembe bulula* kadi wi umpika wa bukondame.” 24 Kwivwana Shimona webalondolola’mba: “Nzenzelei Yehova* kutyina nakafikilwa nansha na kimo kya byomwanena’bi.”

25 Penepa abo pa kupwa kusapula bukamoni ne pa mfulo ne kwisamba mwanda wa Yehova,* baanza kujokela dya ku Yelusalema, benda basapula myanda miyampe mu bibundi bivule bya bene Samadia.+

26 Inoko, mwikeulu+ wa Yehova* wanena Fidipa amba: “Taluka wende dya kunshi ku dishinda ditamba ku Yelusalema ditūkila ku Ngaza.” (Dino i dishinda dya mu ntanda mudi zolē.) 27 Ponkapo wataluka kaenda, ino tala! kwadi ntungu* umo mwine Efiopya, muntu mupebwe lupusa kudi Kandase, mulopwe mukaji wa bene Efiopya, wadi utūdilwe pa byabulēme byandi byonso. Waendele kukatōta ku Yelusalema,+ 28 kadi wadi kajoka ushikete mu dikalo dyandi, utanga na diwi ditunduke mukanda wa mupolofeto Isaya. 29 Penepa mushipiditu wanena Fidipa amba: “Enda kafwene ku dyodya dikalo’dya.” 30 Fidipa wanyemena’ko kaenda widikunkuja, wamwivwana utanga na diwi ditunduke mukanda wa Isaya, mupolofeto, wamwipangula’mba: “Le bine uyukile* byotanga’byo?” 31 Nandi walondolola’mba: “Lelo binebine ndyuka’byo namani shi kekudipo muntu wa kunombola?” Penepa wazenza Fidipa ekile, ashikate nandi. 32 Myanda mine ya mu Kisonekwa kyaadi utanga na diwi ditunduke i ino: “Pamo bwa mukōko, aye watwelwe ku kutapwa, kadi pamo bwa kana ka mukōko kadi talala nyā ku meso a ba kwikatenda myoya, mo monka nandi kaasaminepo kyakanwa kyandi.+ 33 Mu kufwijibwa bumvu kwandi, bamupelēle boloke.+ Le i ani ukalombola myanda yonso ya lukongo lwandi? Mwanda būmi bwandi bubatalulwa pano pa ntanda.”+

34 Penepo ntungu wanena Fidipa amba: “Nombole’po bidi, i ani obanena pano kudi mupolofeto? Le i aye mwine’ni, i muntu mukwabo?” 35 Fidipa kanena, pa kushilula na kino kisonekwa, wamusapwila myanda miyampe ya Yesu. 36 Ebiya pobadi benda pamo mwishinda, bafika padi mema, penepo ntungu wanena’mba: “Tala! Mema aa keo; le kinkankaja kubatyijibwa i kika le?” 37* —— 38 Penepa wasoñanya dikalo dimane, ebiya Fidipa ne ntungu mwine batūkila mu mema; wamubatyija. 39 Abo pa kwabuka mu mema, bukidi bonka mushipiditu wa Yehova* watwala Fidipa kungi, ne ntungu nandi kamumwenepo dikwabo, ino waenda dyandi wenda usepelela. 40 Ino Fidipa watulumuka’tu kadi mu Ashedoda, kaenda upita mu ntanda yonso usapula myanda miyampe ku bibundi byonso enka ne byawafikile ku Kesalea.+

9 Inoko Solo, byaadi ukikanina kulondalonda ne kwipaya bana ba bwanga ba Mfumwetu,+ waendele kudi kitobo mukatampe 2 wakamulomba mikanda ya kwenda nayo ku mashinankonka mu Damakasa, amba ense waakatana wa mu Dyodya Dishinda+ amuselele ku Yelusalema mukutwe, ne bana-balume ne bana-bakaji.

3 Penepo paadi mu lwendo kafwena ku Damakasa, ponkapo kiké kitamba mūlu kyamusāmina koku ne koku,+ 4 ebiya wapona pa nshi, waivwana ne diwi kedimunena’mba: “Solo, Solo, le i kika kyoumpangilapangila?” 5 Nandi wamwipangula’mba: “A Mfumwetu, le wi ani?” Wamulondolola’mba: “I ami Yesu,+ mwine opangapanga.+ 6 Ino imana, katwele mu kibundi, kadi bakakulombola byofwaninwe kulonga.” 7 Bantu baadi wenda nabo baimana talala nyā, baivwana’ko mikungulo ya diwi, ino kumona muntu mpika.+ 8 Ebiya Solo wabūka pa nshi, nansha meso andi byoadi mapūtule, ino kadipo umona kintu. Penepo kebenda nandi bamukwete ku kuboko, bakamutwala mu Damakasa. 9 Kadi mafuku asatu kamwenepo kintu nansha kimo,+ nansha kudya ne kutoma kwine.

10 Mu Damakasa mwadi mwanā bwanga umo wa dijina dya bu Ananaisa,+ penepo Mfumwetu wamwita mu kimonwa’mba: “Ananaisa!” Nandi amba: “Kalombo, Mfumwami.” 11 Mfumwetu wamunena’mba: “Taluka, enda mu kipito kitwa bu Kyoloke, ku njibo ya Yudasa ukakimbe’ko muntu umo wa dijina dya bu Solo, wa ku Tasusa.+ Mwanda tala! yewa ulombela, 12 kadi wamone mu kimonwa muntu umo wa dijina dya bu Ananaisa utwela, wamutenteka makasa’mba meso andi amone.”+ 13 Ino Ananaisa walondolola’mba: “A Mfumwami, kendi mwivwane ku bavule myanda ya yao muntu, bintu bibi byonso byalonga bajila bobe ba mu Yelusalema. 14 Kadi aye udi muno na lupusa lwa babitobo bakulu mwanda wa kukwata* boba bonso beta dijina dyobe.”+ 15 Ino Mfumwetu wamunena’mba: “Abe enda, mwanda uno muntu i kingidilwa kyonatonga+ mwanda wa kuselela dijina dyami ku mizo+ enka ne ku balopwe+ ne ku bana ba Isalela bene. 16 Mwanda nkamulombola patōkelela bintu byonso byafwaninwe kususuka nabyo pa mwanda wa dijina dyami.”+

17 Ebiya Ananaisa waenda watwela mu njibo, wamutenteka makasa kanena’mba: “A Solo, mwanetu, Mfumwetu Yesu, yewa wakumwekēle mu dishinda powadi wiya, wantume mwanda wa meso obe amone kadi uyulwe mushipiditu ujila.”+ 18 Ponka na ponka bintu bidi bwa mapalu byapona mu meso andi, ne meso andi amona. Penepo waimana wabatyijibwa, 19 wadya byakudya waivwana ne bukomo.

Washikata mafuku kampanda na bana ba bwanga mu Damakasa,+ 20 kadi ponka na ponka waanza kusapula mu mashinankonka myanda ya Yesu, amba uno’u i Mwanā Leza. 21 Ino boba bonso badi bamwivwana batulumuka kebanena’mba: “Mwene uno ye muntu wadi usala boba ba mu Yelusalema beta dino dijina?+ Mwene kyaidile muno i kwibakwata ne kukebatūla* kudi babitobo bakulu?”+ 22 Ino Solo wadi wenda wikomeja’nka kwikomeja kadi wadi utulumuna Bayuda badi bekele mu Damakasa, paadi ubingija mungya buluji amba uno’u ye Kidishitu.+

23 Penepa mafuku mavule pa kupita’po, Bayuda bakuta kitumba kya kumwipaya.+ 24 Inoko, Solo wayuka kitumba kyobamukutyīle. Badi balama ne bibelo ndaminine dyuba ne bufuku mwanda wa kumwipaya. 25 Penepo bandi bana ba bwanga bamusela, bamutūkijija pa kipunzu kya lubumbu bufuku, bamwikije mu kitunga.+

26 Aye pa kufika mu Yelusalema,+ walonga bukomo bwa kwilunga ku bana ba bwanga, ino abo bonso badi bamutyina, mwanda kebaitabijepo amba i mwanā bwanga. 27 Ebiya Banabasa+ wamukwasha, wakamufikija kudi batumibwa, webalombola kamo ne kamo mwaamwenine Mfumwetu+ mu dishinda, ne amba wesambile nandi, ne mwawesambīle pampikwa moyo mu dijina dya Yesu+ mu Damakasa. 28 Penepo waikala nabo pamo, winangila’tu senene* mu Yelusalema, wisamba pampikwa moyo mu dijina dya Mfumwetu. 29 Wadi wisamba ne kwipatanya na Bayuda banena Kingidiki, ino bano badi kebasake kumwipaya.+ 30 Banabetu pa kujingulula nabya, bamuselela ku Kesalea kupwa bamutuma ku Tasusa.+

31 Bine, kipwilo kya mu Yudea, mu Ngadilea, ne mu Samadia+ monso kyaikala mu kitatyi kya ndoe, kyenda kitama; kadi byokyadi kinangila mu kutyina Yehova* ne mu kusengibwa na mushipiditu ujila,+ kyadi kivudija’nka kwivudija.

32 Penepo Petelo byawadi wenda upita mu ntanda yonso’ya, watūkila ne kudi bajila badi bashikatanga mu Dida.+ 33 Watana mwine’mwa mwana-mulume wa dijina dya bu Eneasa, ulādikilwe kitantala pa kitanda ke myaka mwānda mituntulu, mwanda wadi ubela bulebe. 34 Petelo wamunena’mba: “A Eneasa, Yesu Kidishitu wakubelula.+ Imana ulongolole kitanda kyobe.”+ Nandi waimana ponka na ponka. 35 Boba bonso badi bekele mu Dida ne mu Dilungu dya Shalone pobamumwene, baalamukila kudi Mfumwetu.

36 Mu Yopa mwadi mwanā bwanga umo wa dijina dya bu Tabita, kushintulula ko kunena’mba, “Dokasa.”* Wadi ulonga bilongwa biyampe bivule ne kupāna byabuntu bingi bya ku lusa. 37 Ino mu mene mafuku’a wabela, wafwa. Penepo bamoija bamulādika mu kyumba kya peulu. 38 Kibundi kya Dida byokyadi pabwipi na Yopa, bana ba bwanga pa kwivwana’mba Petelo udi mu kine kibundi’kyo, batuma bana-balume babidi bakamuzenze amba: “Tubakwisāshila, kokija kufika kuno kwetu.” 39 Penepa Petelo wataluka waenda nabo. Aye pa kufika, bamupitaija mu kyumba kya peulu; kadi bakaji ba kishala bonso baenda kwadi badila ne kulombola bivwalwa byabo ne minkukumba* byadi bibalongela Dokasa paadi ukidi nabo. 40 Ebiya Petelo watambija bonso panja,+ wafukata mu manwi, kalombela. Kupwa, watadidila dya kwadi umbidi, kanena’mba: “Tabita, imana!” Nandi wapūtula meso, aye pa kumona Petelo, washikata.+ 41 Petelo wamupa kuboko, wamwimika, kupwa waita bajila ne bakaji ba kishala, webapa’ye mūmi.+ 42 Uno mwanda wayukana mu Yopa monso, kadi bavule baitabija Mfumwetu.+ 43 Petelo washikata mafuku kampanda mu Yopa na sendwe umo unyukanga biseba wa dijina dya bu Shimona.+

10 Mu Kesalea mwadi muntu umo wa dijina dya bu Konilusa, mudyavita* wa kyokya kyadi kitwa bu kibumbo kya basola* kya Itadi. 2 Wadi muntu mwipāne, utyina Leza pamo ne ba mu njibo yandi bonso, kadi wadi upa bantu byabuntu bivule bya ku lusa ne kuzenza Leza mafuku onso. 3 Kubwipi na nsá ya kitema+ ya dyuba* wamona biyampe mu kimonwa mwikeulu wa Leza utwela mwadi, wamwita’mba: “A Konilusa!” 4 Konilusa wamutala sō, waivwana moyo kamwipangula’mba: “A Mfumwami, le i bika le?” Nandi wamunena’mba: “Milombelo yobe ne byabuntu byobe bya ku lusa bibakanda ku meso a Leza ke pa kuvulukila.+ 5 Shi ke pano tuma bantu ku Yopa bakete Shimona witwa bu Petelo. 6 Uno muntu ufikīle kwa* Shimona, sendwe unyukanga biseba udi na njibo dya ku dijiba.” 7 Mwikeulu waadi wisamba nandi upwa’tu kutaluka, waita bengidi bandi babidi ne sola umo mwipāne wa mu boba badi bamwingidila, 8 webabangila bintu byonso kupwa webatuma ku Yopa.

9 Difuku dyalondele’po pobadi bakyenda mu lwendo ne pobadi kebafwena ku kibundi, Petelo wakanda kukalombela peulu pa njibo kubwipi na nsá ya busamba.* 10 Ino waivwana nzala mikatampe kasake kudya. Pobadi bakitēka byakudya, waponena mu kimonwa,+ 11 penepo wamona diulu dyashituka ne kintu kimo* kitūka pamo bwa kisandi kikatampe kya bukonge kitūkijibwa panshi ku mafinko akyo aná; 12 mwadi miswelo yonso ya banyema ba maulu aná ne byobya bībulula* bya pano panshi ne byoni bya mūlu. 13 Ebiya diwi dyamunena’mba: “Petelo, imana, tapa udye!” 14 Ino Petelo wanena’mba: “Aa ke nankyopo, Mfumwami, mwanda nkyadile kashā kintu kya disubi ne kya biko.”+ 15 Ebiya diwi dyamunena monka musunsa wa bubidi amba: “Leka kwita bintu byatōkeja Leza bu bya disubi.” 16 Kino kyalongeka ne musunsa wa busatu, ponka na ponka kintu’kya* kyatekwinwa mūlu.

17 Petelo paadi ukilangalanga mushintulwila kino kimonwa kyawamona, ponkapo bantu batuminwe na Konilusa baipangula kudi njibo ya Shimona, kebemene pa kibelo.+ 18 Baita kebepangula shi kwine’kwa kufikile mweni, Shimona witwa bu Petelo. 19 Petelo paadi ukilangulukila pa kimonwa, mushipiditu+ wamunena’mba: “Tala! Bana-balume basatu baba bakukimba. 20 Shi ke pano imana, tūka munshi wende nabo, kokatatana nansha dimo, mwanda i ami webatuma.” 21 Penepo Petelo watūkila kwadi bana-balume’ba kanena’mba: “Ami uno, mwine omukimba. Le kyomwaila kuno i kika?” 22 Nabo amba: “Konilusa,+ mudyavita, muntu moloke, utyina Leza kadi unenenwa biyampe na muzo onso wa Bayuda, wapelwe bulombodi bwa Leza na mwikeulu ujila amba akwityije wiye ku yandi njibo, ateje byosa kunena.” 23 Penepo webatweja, webatundaila ke beni bandi.

Difuku dyalondele’po wataluka waenda nabo, ne banababo bamo ba mu Yopa baenda nandi. 24 Dya kesha watwela mu Kesalea. Papo Konilusa wadi wibatengele kadi wadi mwityije babutule ne balunda nandi ba pa mutyima. 25 Petelo pa kutwela, Konilusa wamutundaila, wapona ku maulu, kamufukatyila.* 26 Ino Petelo wamwimika, kamunena’mba: “Imana; ami nami ne muntu’tu.”+ 27 Pobadi besamba nandi watwela, watana bantu bangi bebungile. 28 Webanena’mba: “Muyukile biyampe mokijidikīlwe Muyuda kupwana na muntu wa muzo ungi+ nansha kumufwena, ino aye Leza wanombwele amba nkifwaninwepo kwita muntu nansha umo bu wa disubi nansha wa biko.+ 29 O mwanda naile, kwampikwa nansha kushishikita kwine, pobantumine. Shi ke pano nemwipangula, munombole kine kyomwangityijija.”

30 Penepo Konilusa nandi wanena’mba: “Kepadi mafuku aná pa ino nsá ino’i, nadi nombela mu yami njibo pa nsá ya kitema;* ponkapo muntu umo uvwele bitōka tō waimana ku meso ami 31 kanena’mba: ‘Konilusa, milombelo yobe ibaivwanikwa biyampe, kadi byabuntu byobe bya ku lusa bibavulukwa ku meso a Leza. 32 Shi ke pano, tuma bantu ku Yopa bakēte Shimona, witwa bu Petelo. Uno muntu i mweni mu njibo ya Shimona, sendwe unyukanga biseba, dya ku dijiba.’+ 33 Penepo natumine ponka na ponka bantu kodi, kadi ubalonga biyampe kwiya kuno. Shi ke pano, batwe bonso tudi pano ku meso a Leza kuteja myanda yonso ikusoñenye Yehova* kunena.”

34 Ponkapo Petelo kanena’mba: “Pano bine naivwanija’mba Leza kadipo na mboloji,+ 35 ino mu mizo yonso yewa muntu umutyina ne ulonga byoloke ye witabijibwa nandi.+ 36 Watumine kinenwa ku bana ba Isalela kwibasapwila myanda miyampe ya ndoe+ kupityila kudi Yesu Kidishitu—uno’u i Mfumwandya bonso.+ 37 Muyukile owa mwanda wanenenwe mu Yudea monso, kushilwila ku Ngadilea+ kupwa kwa lubatyijo lwasapwile Yoano: 38 wisambila padi Yesu wa ku Nazala, mwamushingīle Leza māni na mushipiditu ujila+ ne bukomo, waenda ulonga biyampe mu ntanda monso ne kubelula boba bonso bamweshibwa malwa na Dyabola,+ mwanda Leza wadi nandi.+ 39 Batwe bano twi batumoni ba bintu byonso byaalongele mu ntanda ya Bayuda ne mu Yelusalema; ino abo bamwipaile na kumuyeyeka ku mutyi.* 40 Leza wasangwile uno’u mu difuku dya busatu+ ne kumumwekeja, 41 ke ku bantu bonsopo, aa, ino i kotudi batwe, batumoni batongelwe kala na Leza, bene badile ne kutoma nandi pa kupwa kusanguka’ye mu bafwe.+ 42 Ne kadi, wetusoñenye kusapwila bantu ne kupāna bukamoni+ ne pa mfulo amba uno’u ye aye watūdilwe na Leza bu mutyibi wa bōmi ne bafwe.+ 43 Aye ye usapulwa bukamoni na bapolofeto bonso,+ amba ense umwitabija alekelwe bubi mu dijina dyandi.”+

44 Aye Petelo ukīsamba ino myanda, mushipiditu ujila watūkila boba bonso badi bevwana uno mwanda.+ 45 Ebiya boba betabije* batwejibwe kwisao baile na Petelo batulumuka, mwanda kyabuntu kya ku bitupu kya mushipiditu ujila kyadi kekipungulwilwa ne pa bantu ba mizo. 46 Mwanda bebevwene banena ndimi ingi koku batendela Leza.+ Ebiya Petelo watentulula’mba: 47 “Le kudi muntu ukokeja kukankaja mema’mba bano’ba kebakibatyijibwa,+ bantu batambula mushipiditu ujila monka motutambwidile’o batwe?” 48 Penepo webasoñanya babatyijibwe mu dijina dya Yesu Kidishitu.+ Kupwa bamunena ashikate nabo mafuku kampanda.

11 Ebiya batumibwa ne banabetu badi mu Yudea baivwana’mba bantu ba mizo nabo abaitabija mwanda wa Leza. 2 Penepo Petelo pawakandile ku Yelusalema, boba bakankamika disao+ bashilula kumufutulula,* 3 kebanena’mba: “Abe waendele mu njibo ya bantu bampikwa kutwela kwisao wadya ne nabo.” 4 Ponkapo Petelo kaebashintulwila byonso kamo ne kamo, amba:

5 “Nadi mu kibundi kya Yopa nombela, namona kimonwa kya kintu kimo* kitūka pamo bwa kisandi kikatampe kya bukonge kitūkijibwa ku mafinko akyo aná kitamba mūlu, kyatūkila’nka ponadi.+ 6 Na’mba ntadije’mo, namona banyema ba maulu aná ba pano panshi, banyema ba ntanda, byobya bībulula,* ne byoni bya mūlu. 7 Kadi naivwana ne diwi dyaunena’mba: ‘Petelo, imana, tapa udye!’ 8 Ino ami nanena’mba: ‘Aa ke nankyopo, abe Mfumwami, kintu kya disubi nansha kya biko kekyatwelele kashā mu kyakanwa kyami.’ 9 Musunsa wa bubidi, diwi dyatamba mūlu dyalondolola’mba: ‘Leka kwita bintu byatōkeja Leza bu bya disubi.’ 10 Kino kyalongeka ne musunsa wa busatu, kupwa byonso byakokelwa monka mūlu. 11 Ne kadi, enka mu kine kitatyi’kya, kwadi bantu basatu badi bemene pa njibo yotwadi’mo, bobatumine kondi batamba ku Kesalea.+ 12 Penepo mushipiditu waunombola ñende nabo pampikwa kutatana nansha dimo. Inoko ne bano banabetu basamba nabo baendele nami, twatwela mu njibo ya muntu’wa.

13 “Wetusapwila mwawamwenine mwikeulu wimene mu yandi njibo kamunena’mba: ‘Tuma bantu ku Yopa bakēte Shimona witwa bu Petelo,+ 14 nandi ukakulombola bintu bine byokokeja kupandila’ko abe ne ba mu njibo yobe bonso.’ 15 Ino ponashilwile kwisamba, mushipiditu ujila webatūkila monka mowetutūkīle ku ngalwilo.+ 16 Ebiya navuluka binenwa bya Mfumwetu, mwaadi uvudile kunena’mba: ‘Yoano, aye, wabatyije na mema,+ ino banwe mukabatyijibwa na mushipiditu ujila.’+ 17 Penepo, shi Leza webapele kyabuntu kya ku bitupu kyawetupele ne batwe baitabije mudi Mfumwetu Yesu Kidishitu, le ami ne ani ubwanya kukanda Leza?”*+

18 Pobaivwene ino myanda, baleka’byo,* kebatumbija Leza, amba: “Nanshi Leza wape ne bantu ba mizo bene muswelo wa kwisāsa mwanda wa kukamona būmi.”+

19 Penepo boba bapalakene+ pa kyamalwa kyatambile mwanda wa Shitevani baenda kufika ne ku Fenisea, ne ku Saipusa, ne ku Antyioka, ino kebadipo basapwila muntu mwanda poso enka Bayuda kete.+ 20 Inoko, mobadi’mwa bantu bamo batambile mu Saipusa ne mu Shilene baiya ku Antyioka kebesambe na bantu banena Kingidiki, bebasapwila myanda miyampe ya Mfumwetu Yesu. 21 Ne kadi, kuboko kwa Yehova* kwadi nabo, ne bantu bavule bene baitabija ne kwalamukila kudi Mfumwetu.+

22 Myanda yabo yafika ne mu matwi a kipwilo kya mu Yelusalema, nabo batuma Banabasa+ kufika ne ku Antyioka. 23 Aye pa kufika wamona kanye ka ku buntu bitupu ka Leza, wasangala kaebakankamika bonso bendelele mudi Mfumwetu koku basumininwe na mutyima umo;+ 24 mwanda wadi muntu muyampe kadi muyulwe mushipiditu ujila ne lwitabijo. Ne kibumbo kikatampe kine kyabwejibwa kudi Mfumwetu.+ 25 Penepa waenda ku Tasusa kukakimba Solo+ konsokonso. 26 Aye pa kumutana, wamuselela ku Antyioka. Ebiya bapwila nabo mwaka mutuntulu mu kipwilo ne kufundija kibumbo kikata’tu, kadi mu Antyioka mo mwaityilwe dibajinji bana ba bwanga na buludiki bwa Leza bu bene Kidishitu.+

27 Mu mene mafuku’a bapolofeto+ batambile mu Yelusalema batūkila ku Antyioka. 28 Muntu umo mobadi witwa bu Akabusa,+ waimana kalaya kupityila ku mushipiditu amba kipupo kikatampe kya nzala kisa kuponena pa ntanda yonso ikelwe na bantu,+ nakyo bine, kyafikile mu kitatyi kya Kodusa. 29 Ponkapo bana ba bwanga bakwata mulangwe, umo ne umo mungya mwabwaninya,+ wa kutuma bukwashi*+ ku banabetu bekele mu Yudea; 30 kadi balongela monka, batuma’bo kudi bakulumpe ku makasa a Banabasa ne Solo.+

12 Mu kine kitatyi’kya mulopwe Heloda waanza kususula bantu bamo ba mu kipwilo.+ 2 Waipaya Yakoba mwanabo na Yoano+ na kipete.+ 3 Aye pa kumona’mba bibasangaja Bayuda, wakakuta ne Petelo mwine. (Adi mafuku a Mikate Yampikwa Kiyujo.)+ 4 Wamukwata wamwela mu kifungo,+ wamutūla mu makasa a bisumpi biná bya basola baná baná badi bamulama bekombola, mwanda wadi na mutyima wa kumulupwila* ku meso a bantu kupwa kwa Pashika. 5 Penepo Petelo wadi’nka mukutwe mu kifungo, ino kipwilo kyadi kitakamene na kulombela Leza pa mwanda wandi.+

6 Heloda paadi kasake kumulupula, bwine bufuku’bwa Petelo wadi ulēle mukutwe miyololo ibidi pa bukata bwa basola babidi, kadi batulama badi bemene ku meso a kibelo balama kifungo. 7 Ino, amba atale! mwikeulu wa Yehova* wimene nabya,+ kadi kiké kyasāmina mu kyumba kya kifungo. Aye pa kukupila Petelo mu mbavu, wamulangula, amba: “Imana bukidi!” Penepo miyololo yamupona ku maboko.+ 8 Mwikeulu wamunena’mba: “Vwala,* uvwale ne bikwabilo byobe.” Nandi walongela monka. Ku mfulo wamunena’mba: “Vwala kivwalwa kyobe kya pangala unonde.” 9 Penepo watamba kamulonda, inoko kadipo uyukile amba byobya byadi bilonga mwikeulu i bya bine. Ino wadi ulanga’mba i kimonwa kyawamona. 10 Baenda bapita nzamu mubajinji ne wa bubidi, bafika ku kibelo kya kyuma kitwala ku kibundi, nakyo kyebashitukila akyo kine. Abo pa kupwa kutamba, batūkila mu kipito kimo, ponka na ponka mwikeulu wamushiya. 11 Petelo pa kujingulula byalongeka, wanena’mba: “Bine pano namone amba Yehova* watume mwikeulu wandi kadi wankūla mu kuboko kwa Heloda ne ku bintu byonso byadi bitengele Bayuda’mba bisa kulongeka.”+

12 Aye pa kupwa kujingulula nabya, waenda ku njibo ya Madia inandya Yoano witwa bu Mako,+ kwadi kwibungīle bantu bavule balombela. 13 Aye pa kukokola ku mulango wa ku kibelo, mwingidi umo mwana-mukaji wa dijina dya bu Loda waiya kwitaba. 14 Aye pa kujingulula diwi dya Petelo, wasangala bya mwiko, waleka ne kushitula ku kibelo, wanyemena lubilo munda kaebasapwila’mba Petelo yeu wimene pa kibelo. 15 Nabo bamunena’mba: “Ñeni ibakujina.” Ino aye kashā uninga’mba i bya bine. Nabo kebanena’mba: “I mwikeulu wandi.” 16 Ino Petelo washele ponka’pa ukokola. Abo pa kushitula mulango, bamumona ne kutulumuka batulumuka. 17 Ino aye webamāma kuboko amba bekale talala nyā, kaebalombola kamo ne kamo mwamulupwilanga Yehova* mu kifungo, kanena’mba: “Kasapwilei Yakoba+ ne banabetu ino myanda.” Ebiya wataluka kaenda kungi.

18 Bufuku pa kukya, mwadi kavutakanya kakatampe mu basola kebeipangula i kika kyafikila Petelo. 19 Heloda wamukimbakimba, ino byakamutenepo, wasambija batulama ne kusoñanya bakapebwe mfuto;+ kupwa watamba ku Yudea watūkila ku Kesalea, washikata kitatyi kampanda kwine’kwa.

20 Ino wadi mulobele* bantu ba mu Tyila ne ba mu Shidona. Penepo baiya kwadi na kitungo kimo, kadi abo pa kupwa kunekenya Balashitusa, muntu wadi na lupusa mu myanda ya mu njibo ya mulopwe,* bakimba kupwana nandi, mwanda ntanda yabo yadi iselanga byakudya ku ntanda ya mulopwe. 21 Mu difuku ditūngwe, Heloda wavwala kivwalwa kya bulopwe, washikata pa kityibilo kya mambo kaesambe ku meso a bantu bonso. 22 Penepo bantu badi bebungile kebela mabila’mba: “Dino i diwi dya leza, ke dya muntupo!” 23 Ponkapo mwikeulu wa Yehova* wamukupila, mwanda katumbijepo Leza, wadibwa na byolo wafwa.

24 Inoko mwanda wa Yehova* wadi wenda utama ne kusambakana pi na pi.+

25 Ba Banabasa+ ne Solo pobapwile kwingila mwingilo onso wa kutuma bukwashi mu Yelusalema,+ bajoka basela ne Yoano,+ witwa ne bu Mako.

13 Penepa mu Antyioka mwadi bapolofeto ne bafundiji mu kipwilo kyabo:+ Banabasa, Shimeone wadi witwa bu Nijela, Luseusa wa ku Shilene, Manene wafundile pamo na Heloda muledi wa ntanda’ya, ne Solo. 2 Pobadi bengidila* Yehova* ne kushikilwa na nzala, mushipiditu ujila wanena’mba: “Ntūdilei’ko pafula Banabasa ne Solo+ mwanda wa mwingilo mwine onebetyīle.”+ 3 Ebiya pa kupwa kushikilwa na nzala ne kulombela, bebatenteka makasa, bebaleka bende.

4 Penepo bano bana-balume, batumwe na mushipiditu ujila, batūkila ku Selusea, abo pa kutamba kwine’kwa baenda ku Saipusa lwa mema. 5 Pobafikile mu Salamise, baanza kusapula mwanda wa Leza mu mashinankonka a Bayuda. Badi ne na Yoano wadi wibengidila.*+

6 Abo pa kutyibuluka kisanga kyonso kufika ne ku Pafosa, batana Muyuda umo wa dijina dya bu Bala-Yesu, wadi wa majende kadi mupolofeto wa bubela. 7 Wadi na mbikavu* Sengusa Polosa, muntu wa ñeni. Uno muntu waityije ba Banabasa ne Solo mwanda wadi na kipyupyu kya kwivwana mwanda wa Leza. 8 Ino Edimasa wa majende (mwanda e mwadi mushintulwila dijina dyandi) washilula kwibakalakanya, ukimba kupalwila uno mbikavu kulampe na lwitabijo. 9 Penepo Solo, witwa ne bu Polo, wayulwa mushipiditu ujila, wamubambila meso sō 10 kanena’mba: “Abe muntu muyulwe budimbidimbi bwa miswelo yonso ne bukobakane bwa miswelo yonso, mwanā Dyabola,+ abe walwana na bintu byonso byoloke, le kukalekapo kunyengakanya mashinda moloke a Yehova?* 11 Tala! kuboko kwa Yehova* kudi podi, usa kwikala mpofu, kusapo kumona mwinya wa dyuba kitatyi kampanda.” Ponkapo lumundu lukatampe ne fukutu byamuponena, kapupukuta koku ne koku, ukimba ba kumukwata ku kuboko bamwendeje. 12 Penepo mbikavu, pa kumona byalongeka, waitabija, mwanda watendele bufundiji bwa Yehova.*

13 Penepo Polo ne bakwabo bataluka ku Pafosa lwa mema bafika ku Penga mu Pamfidya. Ino Yoano+ webashiya wajokela ku Yelusalema.+ 14 Inoko abo balunguluka tamba ku Penga baiya ku Antyioka mu Pishidya. Ebiya batwela mu shinankonka+ mu difuku dya Sabato, bashikata. 15 Pa kupwa kutanga Bijila+ ne Bapolofeto ku meso a bantu bonso, bendeji ba shinankonka bebatumina musapu amba: “A bana-balume, banabetu, shi kudi mwanda ukankamika bantu omudi nao, nenai’o.” 16 Penepa Polo waimana, webamāma kuboko, kanena’mba:

“A bana-balume, bene Isalela ne banwe bakwabo bakaminwe Leza, ivwanai. 17 Leza wa bano bantu ba Isalela, wātongele bakulutuba betu, wāzunzula bantu’ba pobādi bekele bu beni mu ntanda ya Edipito kadi wēbalupula’mo na kuboko kutulule.+ 18 Kadi kintu kya myaka 40, wādi wibatūkijije mutyima mu ntanda mutuputupu.+ 19 Pa kupwa konakanya mizo isamba-ibidi mu ntanda ya Kenani, wēbapa ntanda yabo bu bupyani.+ 20 Bino byonso byālongekele mu kintu kya myaka 450.

“Kupwa bino, wēbapa batyibi kufika ne kudi Samwele mupolofeto.+ 21 Ino kupwa bālomba mulopwe,+ Leza nandi wēbapa Solo mwanā Kishi, wa ku kisaka kya Benjemani,+ mu myaka 40. 22 Pa kupwa kumutalula, wēbabikikila Davida ke mulopwe wabo,+ yewa waāsapwile bukamoni ne kunena’mba: ‘Natana Davida mwanā Yese+ muntu wa mwendele mutyima wami;+ ukalonga byonso byonsaka.’ 23 Mungya mulao wandi, Leza wāletēle Isalela umpandiji, Yesu, wa ku lutundu* lwa uno muntu.+ 24 Kumeso kwa uno’u kufika, Yoano wasapwidile bantu bonso ba Isalela patōkelela lubatyijo bu kilomboji kya kwisāsa.+ 25 Ino Yoano pawadi uvuija mwingilo wandi, wadi unena’mba: ‘Le mufwatakanya’mba ami ne ani? Ami nkidipo aye. Ino talai! Kudi unonda onkifwaninwepo kukutulula nansha bikwabilo bya ku maulu andi.’+

26 “A bana-balume, banabetu, bana ba ku kisaka kya Abalahama ne banwe bakwabo bakaminwe Leza, mwanda wa luno lupandilo watuminwe kotudi.+ 27 Ke-bantu bekadi ba Yelusalema ne baledi babo kebaitabijepo uno’u, ino abo pa kutyiba mambo, bafikidija byobya byānenenwe na Bapolofeto,+ bitañwanga na diwi ditunduke dya sabato ne dya sabato. 28 Nansha byokebamwenepo kabi ka kumwipaila,+ balombele Pilato amba epaibwe.+ 29 Kadi abo pa kufikidija byonso byālembelwe pa mwanda wandi, bamutūkija ku mutyi* bakamulādika mu kibundu.*+ 30 Ino Leza wamusangula mu bafwe,+ 31 kadi mafuku mangi wadi umwekela boba batambile nandi ku Ngadilea baenda ku Yelusalema. Pano bano i bandi batumoni ku meso a bantu.+

32 “O mwanda twimusapwilanga myanda miyampe ya mulao wālailwe bakulutuba. 33 Leza wafikidija’kyo ne pa mfulo kotudi batwe babo bana na kusangula Yesu;+ monka mokilembelwe mu lwimbo lwa mitōto lwa bubidi amba: ‘Abe wi wami mwana; dyalelo’di nakubutula.’+ 34 Kadi mwanda wa amba Aye wamusangwile mu bafwe aleke kujokela monka ku bubole, wēunenene namino amba: ‘Nkemupa bilongwa bya buswe bwa ndamatyidile byonalaile Davida, bilongwa bya binebine.’*+ 35 Kadi i kinenwe monka mu lwimbo lwa mitōto lukwabo amba: ‘Kukalekapo muntu obe wa lulamato amone bubole.’+ 36 Davida aye wāingidile Leza mingilo* mu lwandi lukongo’lwa, wāponena mu tulo twa lufu, wālādikwa pamo na bakulutuba bandi, ne kumona wāmona bubole.+ 37 Ino yewa wasangwilwe na Leza, aye kamwenepo bubole.+

38 “Nanshi kiyukibwe komudi, banwe banabetu, amba i kupityila kudi uno’u komusapwilwa kulekelwa kwa bubi,+ 39 ne amba ku bintu byonso byokemwadipo mubwanya kutelwa bu ba kubulwa mambo kupityila ku Bijila bya Mosesa,+ ino kupityila kudi uno’u yewa ense witabija utelwanga bu wa kubulwa mambo.+ 40 Shi ke pano dyumukai kutyina’mba byobya binenenwe mu Bapolofeto byakemufikila, bya amba: 41 ‘Talai’o, banwe ba kafutululo, kadi tulumukai, ne koneka, mwanda ñingilanga mwingilo mu enu mafuku, mwingilo okemuketabijapo nansha dimo, nansha shi muntu emusapwile’o kamo ne kamo.’”+

42 Ebiya pobadi kebatambe, bantu kebebazenze amba bebasapwile ino myanda ne mu dya Sabato dīya’ko. 43 Penepo kitango kya mu shinankonka pa kupwa, Bayuda ne ba kwalamuka bavule badi batōta Leza balonda Polo ne Banabasa, badi bebakankamika bekale nyeke mu kanye ka ku buntu bitupu ka Leza pobadi besamba nabo.+

44 Dya Sabato dyalondele’po, kubwipi kwa kibundi kyonso kyebungila pamo kwivwana mwanda wa Yehova.* 45 Bayuda pa kumona bibumbo, bayulwa mukao kebakalakanya byadi binena Polo koku batukana mutonko.+ 46 Ebiya Polo ne Banabasa bebalombola pampikwa moyo amba: “Kyadi kyendele’mo mwanda wa Leza usapulwe bidi komudi banwe.+ Ino byomwapela’o ne byokemwimwenepo banwe bene amba mufwaninwe būmi bwa nyeke, talai! tubaalamukila ku mizo.+ 47 Mwanda Yehova* wetusoñenye namino amba: ‘Nakutonge bu kitōkeji kya mizo, mwanda wa wikale lupandilo kufika ne ku mafulo a ntanda.’”+

48 Bantu ba mizo pa kwivwana nabya, basangala kebatumbija mwanda wa Yehova,* ne boba bonso badi na mutyima muyampe wa kukamona būmi bwa nyeke baitabija. 49 Ne kadi mwanda wa Yehova* wadi wenda usambakana pi na pi mu ntanda yonso’ya. 50 Ino Bayuda basoñanya bana-bakaji batumbe badi bakaminwe Leza ne bana-balume balēmantu ba mu kibundi, kadi bakolomwena ba Polo ne Banabasa kupangwapangwa,+ kupwa bebela panja pa mikalo ya ntanda yabo. 51 Ponkapo nabo bebakūkwila luvumbi lwa ku maulu abo kebenda ku Ikoniuma.+ 52 Kadi bana ba bwanga badi bayulwe nyeke nsangaji+ ne mushipiditu ujila.

14 Penepo mu Ikoniuma’mwa batwelele pamo mu shinankonka ya Bayuda, kadi muswelo obesambile wafikije milwi ne milwi ya Bayuda ne Bangidiki ku kwitabija. 2 Ino boba Bayuda bapelele kwitabija bakela bantu* ba mizo bulobo ne kwibasoñanya bibi balwe banabetu.+ 3 Ebiya baija’mo kitatyi kilampe besamba kwampikwa moyo na lupusa lwa Yehova,* mwine wasapwile bukamoni bwa mwanda wa kanye kandi ka ku buntu bitupu, na kwibalengeja balonge biyukeno ne bintu bya kutendelwa.*+ 4 Inoko, bantu bavulevule ba mu kibundi bakalañana; aba ku Bayuda bakwabo nabo ku batumibwa. 5 Bantu ba mizo ne Bayuda pamo ne baledi babo pobadi kebasake kwibamwesha malwa ne kwibasa mabwe,+ 6 abo nabo bayuka’o, banyemena mu bibundi bya Laikonya, Lesetala, Debe, ne ku ntanda ya koku ne koku.+ 7 Kwine’kwa kebenda basapula myanda miyampe.

8 Ino mu Lesetala mwadi muntu umo wadi ushikete, wa maulu malemane. Wadi kilema tamba ubutulwa kadi kashā wadi kaendele. 9 Uno muntu’u wadi uteja padi panena Polo. Polo pa kumutala sō ne kumona’mba muntu’u udi na lwitabijo lwa kumubelula,+ 10 wanena na diwi dikatampe amba: “Imana mu maulu obe.” Nandi watombojoka kaenda.+ 11 Bibumbo pa kumona byalongele Polo, baela mabila mu ludimi lwa bene Laikonya amba: “Baleza abaikala pamo bwa bantu kadi abatūkila kotudi!”+ 12 Penepa kebete Banabasa bu Zeuse, ino Polo bu Hemese, mwanda ye wadi utabukile kwisamba. 13 Ebiya kitobo wa Zeuse, wa tempelo yadi pa kibelo kya kibundi, waiya na bañombe ne bankata ba bimuna* ku bibelo kasake kulambula bitapwa pamo na bibumbo.

14 Inoko, ba mutumibwa Banabasa ne Polo pa kwivwana nabya, basana bivwalwa byabo, banyemena lubilo mu kibumbo, kebela mabila’mba: 15 “A bana-balume, i kika le kyomulongela namino? Netu twi bantu ba bilubo pamo’nka bwa banwe.+ Batwe twimusapwilanga myanda miyampe mwanda wa muvundamine bino bintu bya bituputupu mutadidile kudi Leza mūmi, mwine wālongele diulu ne ntanda ne dijiba ne byonso bidi’mo.+ 16 Mu nkongo ya kala wālekele mizo yonso yende mu mashinda ayo,+ 17 nansha byakashelepo aye mwine pampikwa bukamoni+ pa biyampe byaalongele, na kwimupa mvula wa mūlu ne bitatyi bya kupa bipa,+ wimwikutyija byakudya ne kuyuja nsangaji mu mityima yenu.”+ 18 Ino nansha byobanenene nabya, balwile pa kukankaja bibumbo bileke kwibatapila bitapwa.

19 Ino Bayuda batambile ku Antyioka ne ku Ikoniuma bafika, banekenya bibumbo bya bantu,+ baasa Polo mabwe, bamubulwila panja pa kibundi, balanga’mba wafu.+ 20 Inoko, pamubumbile bana ba bwanga, waimana watwela mu kibundi. Mu difuku dilonda’ko wataluka pamo na Banabasa kebenda ku Debe.+ 21 Abo pa kupwa kusapula myanda miyampe mu kino kibundi ne kulonga’mo bana ba bwanga bavule, bajokela ku Lesetala, ku Ikoniuma, ne ku Antyioka. 22 Kwine’kwa bakomeja bana ba bwanga,*+ bebakankamika bekale nyeke mu lwitabijo kebanena’mba: “Tufwaninwe kutwela mu Bulopwe bwa Leza na kupita mu byamalwa bingibingi.”+ 23 Ne kadi, bebatongela bakulumpe mu kipwilo ne kipwilo,+ kadi balombela milombelo ne kushikilwa na nzala,+ bebatūla mu makasa a Yehova,* mwine obaitabije.

24 Ebiya bakapita ku Pishidya baiya mu Pamfidya,+ 25 kadi pa kupwa kusapula mwanda mu Penga, batūkila ku Atadiya. 26 Batamba kwine’kwa baenda lwa mema ku Antyioka, kokwa kobapēnwe ku kanye ka ku buntu bitupu ka Leza mwanda wa mwingilo mwine obavuija pano.+

27 Pobafikile babungila kipwilo pamo, bebabangila bintu bingi byalongele Leza kupityila kobadi, ne mwaashitwidile mizo kibelo kya lwitabijo.+ 28 Penepa bashikata’ko kitatyi kilampe na bana ba bwanga.

15 Penepo bantu bamo batambile ku Yudea, baanza kufundija banabetu amba: “Shi kemutwelelepo kwisao mungya kibidiji kya Mosesa,+ nabya kemukokejapo kukapanda.” 2 Ino pa kupwa kwipotomeja ne kwipatanya bikatampe na ba Polo ne Banabasa, kwakwatwa mulangwe amba Polo, Banabasa, ne bamo umbukata mwabo bende kudi batumibwa ne bakulumpe mu Yelusalema+ pa uno mwanda.*

3 Ebiya kipwilo kyebashindikila, kupwa bano bana-balume bapita ku Fenisea ne ku Samadia, basapula kamo ne kamo mwaalamukile bantu ba mizo, kadi badi baletela banabetu bonso nsangaji mikatampe. 4 Abo pa kufika mu Yelusalema, bebatambula senene kudi kipwilo ne batumibwa ne bakulumpe, kebebabangila bintu bingi byalongele Leza kupityila kobadi. 5 Ino bantu bamo betabije badi dibajinji mu katango ka Bafadiseo baimana pobadi bashikete kebanena’mba: “Bafwaninwe kutwejibwa kwisao ne kwibasoñanya balame Bijila bya Mosesa.”+

6 Ebiya batumibwa ne bakulumpe bebungila pamo kubandaula uno mwanda. 7 Abo pa kupwa kwisamba bivulevule,* Petelo waimana kaebanena’mba: “A bana-balume, banabetu, muyukile biyampe amba tamba mafuku mabajinji Leza watongele momudi’mo amba kupityila ku kyakanwa kyami bantu ba mizo bevwane kinenwa kya myanda miyampe ne kwitabija.+ 8 Kadi Leza, mwine uyukanga mutyima,+ wasapwile bukamoni na kwibapa mushipiditu ujila,+ enka mwawetupedile’o netu. 9 Kadi aye ketushiyañenyepo nabo nansha dimo,+ ino watōkeja mityima yabo na lwitabijo.+ 10 Penepo i kika le kyomutompela Leza na kutūla pa nshingo ya bana ba bwanga lupungu+ lwakomenwe kusela bakulutuba betu nansha batwe bene?+ 11 Inoko twitabije amba tukapandila pa kanye ka ku buntu bitupu ka Mfumwetu Yesu+ pamo’nka bwa abo.”+

12 Ponkapo kibumbo kyonso kyatalala nyā, kebateje Banabasa ne Polo pobadi babanga biyukeno ne bintu bya kutendelwa* bivule byalongele Leza mu mizo kupityila kobadi. 13 Abo pa kupwa kunena, Yakoba watentulula’mba: “A bana-balume, banabetu, ntejei. 14 Shimeone+ wanena byonso mwatedile Leza mutyima dibajinji ku mizo mwanda wa kutonga’mo bantu ba dijina dyandi.+ 15 Kadi bino’bi i bikwatañane na binenwa bya Bapolofeto, monka mokilembelwe amba: 16 ‘Bino bintu pa kupita’po nkajoka ne kwimika monka pema* wa Davida waponene panshi; nkōbakulula masala andi ne kumwaluja, 17 amba bantu bashele’ko bakimbe Yehova* na mikeketo, ne bantu ba mizo yonso pamo, bantu betwa pa dijina dyami, i Yehova* unena, mwine ulonga bino bintu,+ 18 biyukene tamba kala.’+ 19 Nanshi, butyibi bwami* i bwa kuleka kukambakanya bantu ba mu mizo bālamukila kudi Leza,+ 20 ino kwibalembela belame ku bintu bisubijibwe na bilezaleza,+ ku busekese,*+ ku byampikwa kutyiba midibu,* ne ku mashi.+ 21 Mwanda tamba pa kala Mosesa udi na bantu bamusapula mu kibundi ne kibundi, ke-bantu abo batañanga mikanda yandi na diwi ditunduke mu mashinankonka dya sabato ne dya sabato.”+

22 Penepo batumibwa ne bakulumpe ne kipwilo kyonso pamo, bakwata butyibi bwa kutuma bantu batongwe mu bukata mwabo pamo na Polo ne Banabasa ku Antyioka; batuma ba Yudasa wadi witwa ne bu Basabasa ne Shilasa,+ bana-balume badi batangidile kumeso mu banabetu. 23 Balemba bino’bi, bebatuma nabyo, amba:

“Banabenu, batumibwa ne bakulumpe, kudi banabetu ba mu Antyioka,+ mu Shidea, ne mu Shidisha batambile mu mizo: Tubaimunai! 24 Byotwaivwene amba kudi bamo batambile motudi bemukambakanya na byobanena,+ basaka kwimulumbakanya,* nansha byoketwibalombwelepo kintu, 25 tubakwata butyibi mwa kimo bwa kutonga bantu ne kwimutumina’bo pamo na Banabasa ne Polo baswedibwe betu, 26 bana-balume bapēne būmi bwabo* pa mwanda wa dijina dya Mfumwetu Yesu Kidishitu.+ 27 O mwanda tubemutumina ba Yudasa ne Shilasa, amba nabo bemusapwile bintu bimo byonka ku kanwa.+ 28 Mwanda mushipiditu ujila+ ne batwe bene kumo tubamone amba i biyampe kuleka kwimutwika biselwa bikwabo bilēma, poso enka bino bintu bya mvubu: 29 mwilamei nyeke ku bintu bitapīlwe bilezaleza,+ ku mashi,+ ku byampikwa kutyiba midibu,*+ ne ku busekese.*+ Shi mwilame senene ku bino bintu, mukekala biyampe. Shalai biyampe!”*

30 Ebiya pobanenene bano bantu bende, batūkila ku Antyioka, babungakanya kibumbo kyonso pamo, bebapa mukanda. 31 Abo pa kupwa kwiutanga, basangala mwanda wa kukankamikwa kobakankamikilwe. 32 Kadi ba Yudasa ne Shilasa, byobadi nabo bapolofeto, bakankamikile banabetu na mīsambo mivule ne kwibakomeja.+ 33 Pa kupwa kushikata nabo kitatyi kampanda kwine’kwa, banabetu bebaleka bende mu ndoe kudi boba bebatumine. 34* —— 35 Ino ba Polo ne Banabasa bashele mu Antyioka, bafundija ne kusapula, pamo ne bakwabo bavule bene, myanda miyampe ya mwanda wa Yehova.*

36 Mafuku kampanda pa kupita’po, Polo wanena Banabasa amba: “Tujoke bidi* tukapempule banabetu mu kibundi ne kibundi motwasapwile mwanda wa Yehova,* tuyuke mobekadile.”+ 37 Aye Banabasa wadi musumininwe kusela Yoano, wadi witwa ne bu Mako.+ 38 Ino Polo kaitabijepo kumusela bende nandi, mwanda webashile mu Pamfidya kadi kaendelepo nabo mu mwingilo.+ 39 Penepo belobela bya malwa, bafula ku kukalañana; Banabasa+ wasela Mako waenda nandi lwa mema ku Saipusa. 40 Polo aye watonga Shilasa, waenda pa kupwa kupānwa na banabetu ku kanye ka ku buntu bitupu ka Yehova.*+ 41 Wapita mu Shidea ne mu Shidisha, ukomeja bipwilo.

16 Ebiya wafika ku Debe kadi ne ku Lesetala.+ Kwadi mwanā bwanga umo wa dijina dya bu Temote,+ mwana wa mwana-mukaji umo Muyuda mwitabije inoko shandi Mungidiki, 2 kadi wadi unenenwa biyampe na banabetu mu Lesetala ne mu Ikoniuma. 3 Polo waikele na mutyima wa kwenda na Temote, wamusela wamutweja kwisao mwanda wa Bayuda badi mu bifuko’bya,+ ke-bantu abo bonso badi bayukile amba shandi i Mungidiki. 4 Pobadi benda bapita mu bibundi, badi bebafikijija mbila yakwete batumibwa ne bakulumpe ba mu Yelusalema amba balame’yo.+ 5 Penepo bipwilo byadi bininga mu lwitabijo ne kwivudija difuku ne difuku.

6 Ne kadi, bapita ku Fidya ne mu ntanda ya Ngalatea,+ ke-pantu mushipiditu ujila webakankeje kwisamba mwanda mu ntanda ya bubikavu ya Azia. 7 Kadi, abo pa kutūkila ku Misha, balonga bukomo bwa kutwela mu Bityinia,+ ino mushipiditu wa Yesu kewebetabijijepo. 8 Penepo bapita dya ku* Misha batūkila ku Toasa. 9 Ebiya bufuku, Polo wamona kimonwa—mwine Masedonya umo wimene kwine’kwa umuzenza’mba: “Abukila mu Masedonya witukwashe’ko.” 10 Aye upwa’tu kumona kimonwa’kya, twakimba kwenda mu Masedonya, twajingulula’mba i Leza wetwita tukebasapwile myanda miyampe.

11 Penepo twataluka ku Toasa lwa mema twaolokela swā ku Samofase, ino dya kesha twafika ku Neapodi; 12 twataluka kwine’kwa twaenda ku Fidipai,+ kibundi kitādilwe na Loma, kibundi kilēme kya mu kipindi kya ntanda ya Masedonya. Twashikata mu kino kibundi tumafuku. 13 Kadi mu dya Sabato twaenda panja pa kibelo dya ku munonga, kotwadi tulanga’mba ko kudi kifuko kya milombelo, twashikata ketwisambe na bana-bakaji badi bebungile’ko. 14 Mwana-mukaji umo wa dijina dya bu Didya, nsunga wa bityilakana wa mu kibundi kya Tyiataila+ kadi mutōtyi wa Leza, wadi uteja, Yehova* nandi wamushitula mutyima wandi bikatampe amba ate mutyima ku byadi binena Polo. 15 Aye ne ba mu njibo yandi pa kubatyijibwa,+ wetuzenza’mba: “Shi mubamone amba ne mukōkele Yehova,* iyai mwikale mu yami njibo.” Wetuningila’nka twende’ko.

16 Penepo byaikele namino potwadi twenda ku kifuko kya milombelo, twetana na mwingidi mwana-mukaji umo wadi na mushipiditu, ndemona wa lubuko.+ Wadi usokwelanga bamfumwandi lupeto lungi na bya bulumbu byandi.* 17 Uno mwana-mukaji wadi ulonda’nka kulonda Polo ne batwe koku wela mabila’mba: “Bano bantu i bapika ba Leza Mwine wa Peulu Mwine,+ kadi bemusapwilanga dishinda dya lupandilo.” 18 Wadi uloñanga namino mafuku mangi. Ku mfulo Polo wakōka’byo, wavundamuka kanena mushipiditu’wa amba: “Nakusoñanya mu dijina dya Yesu Kidishitu mutambe’mo.” Nao watamba’nka mu mine nsá’ya.+

19 Ino bamfumwandi pa kumona’mba lukulupilo lwabo lwa kumona lupeto lubapu,+ bakwata ba Polo ne Shilasa bebakokela mu nsoko kudi baledi.+ 20 Bakebatwala kudi bandela-bantu, kebanena’mba: “Bano bantu bavutakanyanga kibundi kyetu bininge.+ I Bayuda, 21 kadi basapulanga bibidiji bitujidikilwe kwitabija nansha kulonga batwe bene Loma.” 22 Penepo kibumbo kyonso pamo kyebatombokela, bandela-bantu pa kupwa kwibapandamwina bivwalwa byabo, basoñanya bebakupile nsonde.+ 23 Abo pa kupwa kwibakupila nsonde mingi, bebela mu kifungo, basoñanya mulami wa kifungo ebalame senene.+ 24 Aye byaasoñanibwe nabya, webela mu kifungo kya munda, webakuta maulu mu bikulo.

25 Ino dya pa bukata bwa bufuku, ba Polo ne Shilasa badi balombela ne kutendela Leza na lwimbo,+ kadi bakutwa bakwabo badi bebevwene. 26 Ponkapo kwaikala kutenkana kukatampe kwa ntanda, enka ne byalwilo bya kifungo byatenkena. Ne kadi, bibelo byonso byashituka ponka na ponka, ne byobya byadi bikutyilwe muntu ne muntu byakutuluka.+ 27 Mulami wa kifungo pa kubūka wamona’mba bibelo bya kifungo i bishitule, wasomona kipete kyandi kasake kwiipaya, mwanda walangile amba bakutwa abanyema.+ 28 Ino Polo waela lubila na diwi dikatampe amba: “Kokelonga kibi, mwanda batwe bonso tudi’mo!” 29 Penepo walomba bimuni watwela’mo lubilo, koku uzakala, wapona ku meso a ba Polo ne Shilasa. 30 Waenda nabo panja kawibepangula’mba: “A bakelenge, le nonge namani mpande?” 31 Nabo bamulondolola’mba: “Itabija mudi Mfumwetu Yesu, nabya usa kupanda, abe ne ba mu njibo yobe.”+ 32 Penepo bamusapwila mwanda wa Yehova* pamo ne bonso badi mu yandi njibo. 33 Webasela’nka mu mine nsá ya bufuku’ya wakebakenda bilonda. Kupwa aye ne ba mu njibo yandi bonso babatyijibwa bukidi bonka.+ 34 Webatweja mu njibo yandi webādila meza, kadi wasangala bininge ne ba mu njibo yandi bonso kumo pano pawaitabija mudi Leza.

35 Abo pa kukya, bandela-bantu batuma bampulushi bamulombole amba: “Kutulula babo bantu’bo.” 36 Mulami wa kifungo wasapwila Polo byobanena, amba: “Bandela-bantu abatume bantu amba banwe bubidi mukutululwe. Shi ke pano, tambai mwiendele mu ndoe.” 37 Ino Polo webanena’mba: “Betukupile ku meso a bantu, kwampikwa kuponejibwa,* nansha byotudi bene Loma,+ kupwa betwela mu kifungo. Le pano kebasake kwitutambija mu bufyafya? Aa, kebibwanikapo! Bāye abo bene betutambije’mo.” 38 Bampulushi bakasapwila bandela-bantu ino myanda. Nabo bakwatwa moyo pa kwivwana’mba bano bantu i bene Loma.+ 39 Penepa baiya kebebazenze, ebiya bebatambija panja, kupwa bebanena bataluke mu kibundi’kya. 40 Ino batamba mu kifungo baenda ku njibo ya Didya; kadi abo pa kumona banabetu, bebakankamika+ kupwa baenda.

17 Penepo bapita mu Amfipodi ne Apoloni baiya mu Tesalonika,+ mwine mwadi shinankonka ya Bayuda. 2 Ebiya Polo, mungya kibidiji kyandi,+ watwela mobadi’mwa, kadi mu Masabato asatu wadi ulanguluka nabo na Bisonekwa,+ 3 wibashintulwila ne kubingija na bilembwa’mba kyadi kyendele’mo Kidishitu asusuke+ ne kusanguka mu bafwe,+ amba: “Uno ye Kidishitu, uno Yesu onemusapwila’u.” 4 Penepa bamo baitabija, belunga pamo na ba Polo ne Shilasa,+ mo monka ne kibumbo kikatampe kya Bangidiki badi batōta Leza pamo ne bana-bakaji bavule balēme.

5 Ino Bayuda, pa kukwatwa mukao,+ babunga bantu bamo babi badi bazeuluka ku nsoko, bakongakanya kibumbo kebaleta lupotopoto mu kibundi. Bakatamba’dyo ku njibo ya Dyasoni bakimba kulupwila ba Polo ne Shilasa ku kibumbo. 6 Byokebebatenepo, bakokela Dyasoni ne banabetu bamo kudi baledi ba kibundi, kebela mabila’mba: “Bano bantu bafulamikile* ntanda ikelwe na bantu kebadi ne kuno,+ 7 kadi Dyasoni webatundaila ke beni bandi. Bano bantu bonso baloñanga bintu bijilula mbila ya Kesala, banenanga’mba kudi mulopwe mukwabo, Yesu.”+ 8 Pobaivwene ino myanda, kibumbo ne baledi ba kibundi batuyuka; 9 ebiya bafutyija ba Dyasoni ne bakwabo lupeto,* kupwa bebalekelela.

10 Ponka na ponka banabetu batuma ba Polo ne Shilasa ku Belea bufuku. Abo pa kufika, bakatwela mu shinankonka ya Bayuda. 11 Bano’ba badi na mutyima wa kusaka kuyuka kutabuka boba ba mu Tesalonika, ke-bantu abo baitabije kinenwa na kipyupyu kikatampe, babandaula senene Bisonekwa difuku ne difuku mwa kuyukila shi bino bintu ye mobikadile. 12 Penepo bantu bavule umbukata mwabo baitabija, ne bavule mu bana-bakaji batumbe Bangidiki, ne bana-balume bamo. 13 Ino Bayuda ba mu Tesalonika pa kuyuka’mba mwanda wa Leza owa usapulwa na Polo ne mu Belea mwine, baenda’mo kukasoñanya bibumbo ne kwibikela bulobo.+ 14 Ponka na ponka banabetu batalula Polo amba atūkile ku dijiba,+ ino ba Shilasa ne Temote bashala monka. 15 Inoko, boba bakatūdile Polo bakamufikija ne ku Atene, kadi abo pa kulombolwa’mba ba Shilasa ne Temote+ bāye kudi Polo bukidi bonka, penepo bajoka.

16 Polo paadi wibakungila mu Atene, mutyima munda wamufīta fututu pa kumona’mba kibundi i kiyule bilezaleza bā. 17 Penepo waanza kulanguluka mu shinankonka na Bayuda ne bantu bakwabo badi batōta Leza, kadi difuku ne difuku wadi ulanguluka na boba bawadi utana mu nsoko. 18 Ino befundi bamo ba tunangu twa ino ntanda* bene Epikyule ne Bashitoika baanza kwipatanya nandi, bamo badi banena’mba: “Le uno muntu wa minenakanya nandi usakanga kunena bika?” Bakwabo amba: “Umweka bwa aye usapula bavidye ba kungi.” Badi banena namino mwanda wadi usapula myanda miyampe ya Yesu ne lusangukilo.+ 19 Penepo bamukwata baenda nandi pa Aleopakusa, kebanena’mba: “Le tubwanya kuyuka buno bufundiji bupya bosapula’bu i bufundiji’ka? 20 Mwanda utwejanga bintu bimo byeni mu matwi etu, kadi tusaka kuyuka mushintulwila bino bintu.” 21 Na bubine, bene Atene bonso ne beni badi bekele’mo* kebadipo bepwija mukose na kulonga bintu bikwabo ino i enka na kubanga nansha na kwivwana bintu bipya. 22 Penepo Polo waimana pa bukata bwa Aleopakusa+ kanena’mba:

“Banwe bene Atene, namone amba mu bintu byonso mumweka bu bantu batyina bavidye* bininge kutabuka bantu bakwabo.+ 23 Kimfwa, ponadi mpita ntadija bintu byomulēmekele bininge,* namwene ne kisōkelo kimo padi palembe amba ‘Kudi Leza Wampikwa Kuyukana.’ Nanshi, kyokya kyomutōta pampikwa kuyuka, e kino kyonemusapwila. 24 Leza mwine wālongele ino ntanda ne bintu byonso bidi’mo, byadi aye ye Mfumu wa diulu ne ntanda,+ kashikatangapo mu matempelo alongelwe na makasa;+ 25 kadi kakwashibwangapo na makasa a bantu bwa aye ubudilwe kintu,+ mwanda aye ye upa bantu bonso būmi ne umpuya+ ne bintu byonso. 26 Kadi wālupwile ku muntu umo+ mizo yonso ya bantu ba kushikata pa ntanda yonso,+ wātūla ne bitatyi bitungwe ne mikalo mwa kushikatyila bantu,+ 27 amba bakimbe Leza, shi babwanya kumubabata ne kumusokola binebine,+ nansha byakadipo bine kulampe na batwe bonso. 28 Mwanda i pa mwanda wa aye potwikele na būmi, tujina ne kwikala’ko, enka munenena balembi benu bamo amba, ‘Mwanda netu twi bandi bana.’*

29 “Nanshi byotudi bana ba* Leza,+ ketufwaninwepo kulanga’mba Leza Mwine udi bwa olo, nansha ndalama, nansha dibwe, pamo bwa kintu kisōngwe mungya bwino ne milangwe ya bantu.+ 30 Bine, Leza wasūla bitatyi bya kuno kubulwa kuyuka;+ ino pano usapwilanga bantu bonso pi na pi amba bafwaninwe kwisāsa. 31 Mwanda i mutūle’ko difuku dyalanga kutyibila ntanda ikelwe na bantu mambo+ mu boloke na muntu watongele, kadi i mupe bantu bonso kikulupiji pa kumusangula mu bafwe.”+

32 Ino pa kwivwana myanda ya lusangukilo lwa bafwe, bamo baanza kumupunika,+ ino bakwabo kebanena’mba: “Tusa kukwivwana dikwabo pa uno mwanda.” 33 Penepo Polo webashiya, 34 ino bantu bamo belunga kwadi baitabija. Mu abo mwadi Dionisusa, wadi mutyibi wa mu kidye kya Aleopakusa, ne mwana-mukaji umo wa dijina dya bu Damadi, ne bakwabokwabo.

18 Bino’bi pa kupita’po, wataluka ku Atene waenda ku Kodinda. 2 Watana’ko Muyuda umo wa dijina dya bu Akwila,+ mubutwilwe mu Pontusa, watambile panopano ku Itadi na Pishila mukajandi, mwanda Kodusa wasoñenye Bayuda bonso bataluke mu Loma. Penepa Polo waenda kobadi, 3 kadi byobadi na kaji kamo, washikata mu yabo njibo kaingila nabo,+ mwanda badi bengilanga kaji ka kupunga mapema. 4 Wadi wisamba mwisambo* mu shinankonka+ dya Sabato ne dya Sabato+ kadi wadi unekenya Bayuda ne Bangidiki.

5 Penepo, paile ba Shilasa+ ne Temote+ batamba ku Masedonya, Polo wepāna bininge na kufundija mwanda, usapwila Bayuda bukamoni ne kubingija’mba Yesu ye aye Kidishitu.+ 6 Ino byobadi bamulwa’nka kumulwa ne kutukana mutonko, wakūkula bivwalwa+ byandi kaebanena’mba: “Mashi enu ekale pa mitwe yenu banwe bene.+ Ami natōka.+ Tamba pano nsa kwenda ku bantu ba mizo.”+ 7 Ebiya wataluka kwine’kwa* waenda mu njibo ya mwana-mulume umo witwa bu Tetiusa Yusutusa, mutōtyi wa Leza, wadi na njibo ilondakene na shinankonka. 8 Ino Kipusa,+ mwendeji wa shinankonka, waitabija mudi Mfumwetu, ne ba mu njibo yandi bonso kumo. Kadi mu bene Kodinda baivwene bavule baanza kwitabija ne kubatyijibwa. 9 Ne kadi, Mfumwetu wanena Polo bufuku mu kimonwa’mba: “Kokakwatwa moyo, abe wisambe’tu kadi kokekala talala, 10 mwanda ami ngidi nobe+ kadi i kutupu usa kukutamba kukulonga kibi; mwanda ngidi na bantu bangi mu kino kibundi.” 11 Ebiya washikata’mo mwaka umo ne myeji isamba, ufundija mwanda wa Leza umbukata mwabo.

12 Ngadeo pawadi mbikavu* wa Akaya, Bayuda batamba Polo abo bonso pamo bakamutwala pa kityibilo kya mambo, 13 kebanena’mba: “Uno muntu unekenyanga bantu batōte Leza mu muswelo ujilula bijila.” 14 Ino Polo pawadi kasake kwisamba, Ngadeo wanena Bayuda’mba: “A Bayuda, shi bine kwadi kilubo nansha kibi kikatampe kyalongele, longa nemwivwana’tu na mutyima mutūke. 15 Ino shi i kwipotomeja pa mwanda wa binenwa, majina ne bijila byenu,+ byabyo bimutala banwe bene. Ami nkisakilepo kutyiba yayo myanda.” 16 Penepo webapanga pa kityibilo kya mambo. 17 Ebiya bonso bakwata Sosefene,+ mwendeji wa shinankonka, kebamukupila kumeso kwa kityibilo kya mambo. Ino Ngadeo keelelepo nansha dimo mu ino myanda.

18 Inoko Polo washikata’mo mafuku matyetye, kupwa washadika banabetu kaenda lwa mema ku Shidea, pamo na Pishila ne Akwila. Watendeje nywene ya ku mutwe wandi mu Senkelea,+ mwanda wadi mupike mpiko. 19 Ebiya bafika ku Efisesa, webashiya konka; ino aye watwela mu shinankonka kalanguluka na Bayuda.+ 20 Nansha byobadi bamunena’nka kumunena ashikate nabo monka mafuku mangi, aye kaitabijepo 21 ino webashadika kaebalombola’mba: “Shi Yehova* uswile, nkajokelanga monka komudi.” Kupwa wataluka mu Efisesa lwa mema 22 watūkila ku Kesalea. Penepa wakanda* kukemuna kipwilo, ebiya watūkila ku Antyioka.+

23 Aye pa kupwa kushikata’mo kitatyi kampanda, wataluka kaenda koku ne koku mu ntanda ya Ngalatea ne ya Fidya,+ wenda ukankamika bana ba bwanga bonso.+

24 Ponkapo Muyuda umo wa dijina dya bu Apolosa,+ mubutwilwe mu Alekezandala wafika mu Efisesa; wadi mwana-mulume upotolwele kunena, kadi wadi ujingulwile Bisonekwa senene. 25 Uno muntu wadi mufundijibwe* dishinda dya Yehova* kadi mwake mushipiditu, wadi wisamba ne kufundija myanda ya Yesu mobyolokele, inoko wadi uyukile’nka lubatyijo lwa Yoano kete. 26 Washilula kwisamba pampikwa moyo mu shinankonka, kadi ba Pishila ne Akwila+ pa kumwivwana, bamusela baenda nandi pamo kebamushintulwila dishinda dya Leza mobyolokele kutabuka. 27 Ne kadi, byawadi usaka kwabukila mu Akaya, banabetu batumina bana ba bwanga mukanda, bebesāshila bamutambule senene. Penepo paafikile’ko, wakwasha bininge boba baitabije kupityila ku kanye ka ku buntu bitupu ka Leza; 28 mwanda wadi uleta bubinga ne pa mfulo ku meso a bantu ne na bukomo bukatampe amba Bayuda i betupe, wibalombola na Bisonekwa amba Yesu ye Kidishitu.+

19 Penepo, Apolosa+ pawadi mu Kodinda, Polo wadi wenda upita ku matanda a ku ntala, watūkila ku Efisesa.+ Watana’ko bana ba bwanga bamo, 2 webepangula’mba: “Lelo mwatambwile mushipiditu ujila pomwaitabije?”+ Nabo bamulondolola’mba: “Aa, kashā ketwaivwene amba kwikalanga ne mushipiditu ujila.” 3 Ebiya webanena’mba: “Le penepo mwabatyijibwe lubatyijo’ka?” Abo amba: “I lubatyijo lwa Yoano.”+ 4 Polo wanena’mba: “Yoano wadi ubatyija lubatyijo bu kilomboji kya kwisāsa,+ ulombola bantu betabije mudi yewa umulonda,+ ke mudi Yesu kadi.” 5 Abo pa kwivwana nabya, babatyijibwa mu dijina dya Mfumwetu Yesu. 6 Ebiya Polo pa kwibatenteka makasa, mushipiditu ujila webatūkila,+ kebesambe mu ndimi ingi ne kunena bupolofeto.+ 7 Abo bonso, badi kintu kya bana-balume 12.

8 Aye pa kutwela mu shinankonka,+ wanena pampikwa moyo myeji isatu mituntulu, wisamba mīsambo ne kulanguluka nabo mu muswelo unekenya pa mwanda wa Bulopwe bwa Leza.+ 9 Ino bamo pa kupela na kibengo kyonso kwitabija,* koku banenena Dyodya Dishinda+ bibi ku meso a kibumbo, webataluka’po,+ wasañuna’mo bana ba bwanga, kawisambila mīsambo mu kalasa ka masomo a Tailanusa difuku ne difuku. 10 Bino byalongekele mu myaka ibidi, penepo boba bonso bekalanga mu ntanda ya bubikavu ya Azia baivwana mwanda wa Mfumwetu, Bayuda ne Bangidiki bene kumo.

11 Kadi Leza wadi ulonga bilongwa bya bukomo bya nkuo kupityila ku makasa a Polo,+ 12 enka ne bipēta ne bisandi bya kaji byadi bitenga ngitu yandi byadi biselelwa boba babela,+ nabo ne misongo ibapwa, ne mishipiditu imbi mine itamba’mo.+ 13 Ino kwadi Bayuda bamo badi benda koku ne koku bapanga bandemona, nabo badi batompa kutela dijina dya Mfumwetu Yesu ku boba badi na mishipiditu imbi; badi banena’mba: “Nakusoñanya na kusumininwa mu dijina dya Yesu obasapula kudi Polo.”+ 14 Ebiya kwadi bana basamba-babidi ba kitobo mukulu Muyuda, wa dijina dya bu Seva badi balonga namino. 15 Ino mushipiditu mubi webatentulula keunena’mba: “Ndyukile Yesu+ kadi Polo+ nandi mupotolwele; ino le banwe mwi bāni le?” 16 Penepa muntu wa mushipiditu mubi’wa webakidila, webakomena abo bonso, webanekenya, penepo batamba lubilo mu yoya njibo mutaka kadi batapwe bilonda. 17 Uno mwanda wayukana ku bonso, ku Bayuda ne ku Bangidiki bene badi bekele mu Efisesa; penepo moyo webakwata abo bonso, ne dijina dya Mfumwetu Yesu kedyenda ditumba. 18 Kadi bavule mu boba baitabije badi bāya besapula ne kusaba patōkelela bilongwa byabo. 19 Bine, bantu bavule badi balonga bya maleñanya babungila mabuku abo pamo basōka’o ku meso a bonso.+ Penepo babala lupoto lwao batana’mba i bibese bya ndalama 50 000. 20 Penepa mwanda wa Yehova* wadi wenda utama ne kunekenya na bukomo bonso.+

21 Bino bintu pa kupwa kulongeka, Polo wasumininwa mu mutyima wandi amba shi wapu kupita ku Masedonya+ ne ku Akaya, ufwaninwe kwenda ku Yelusalema.+ Wanenene amba: “Shi napu kwenda’ko, mfwaninwe nkamone ne Loma.”+ 22 Ebiya watuma ku Masedonya bantu babidi mu boba badi bamwingidila, ba Temote+ ne Elatusa,+ ino aye mwine waikala kitatyi kampanda mu ntanda ya bubikavu ya Azia.

23 Mu kine kitatyi’kyo kwaikala kavutakanya kakatampe+ pa mwanda wa Dyodya Dishinda.+ 24 Mwanda muntu umo wa dijina dya bu Demeteusa, sendwe wa ndalama wadi ulonga tumobo twa ndalama twa tukishi twa Alatemise, wapeteje bininge basendwe.+ 25 Webakongakanya abo ne bakwabo badi bengila bino bintu kanena’mba: “A bana-balume, muyukile biyampe amba bupeta bwetu butambanga ku uno mwingilo. 26 Pano mubamone ne kwivwana muswelo wanekenya uno Polo kibumbo kikatampe kya bantu ne kwibalamwina ku milangwe ingi, ke enkapo mu Efisesa+ kete ino i ne kubwipi kwa ntanda yonso ya bubikavu ya Azia, unena’mba baleza balongelwe na makasa ke balezapo binebine.+ 27 Ne kadi, kudi kyaka, ke enkapo kya mwingilo wetu kufutululwa ino i ne kya ino tempelo ya Alatemise leza mukaji mukatampe kumonwa bu ya bitupu, kadi aye mwine utōtwa na ntanda yonso ya bubikavu ya Azia ne na ntanda ikelwe na bantu, ukayatwa bukatampe bwa ntumbo yandi.” 28 Bantu pa kwivwana nabya baloba bya mwiko, kebela mabila’mba: “Alatemise wa bene Efisesa ye mukatampe!”

29 Ponkapo kibundi kyayula kavutakanya, byobiya bonso pamo baenda lubilo pa kikailo, koku babulula ba Ngaiusa ne Aditakusa,+ bene Masedonya, badi benda na Polo. 30 Polo aye wadi usaka kwenda’nka umbukata mwadi bantu’mwa, ino bana ba bwanga bamukanda. 31 Enka ne bemaniji bamo ba mafetyi ne makayo boba badi nandi biyampe, batumanya mawi, bamwisāshila’mba kakitūla būmi bwandi mu kyaka na kutwela mu kikailo. 32 Na bubine, bamo badi bela mabila, aba banena byobi bakwabo nabo byobi; mwanda kitango kyadi mu kavutakanya, kadi bavule mu bukata mwabo kebadipo bayukile kine kyobebungidile pamo. 33 Penepo batambija Alekizandele mu kibumbo, Bayuda bamutakikila kumeso, ebiya Alekizandele webamāma kuboko mwanda wadi kasake kwishintulwila ku meso a bantu. 34 Ino abo pa kumujiula’mba i Muyuda, bonso bashilula kwela mabila mwa kimo kintu kya nsá ibidi mituntulu amba: “Alatemise wa bene Efisesa ye mukatampe!”

35 Musoneki wa kibundi pa kupwa kutalaja kibumbo, wanena’mba: “A bana-balume ba mu Efisesa, lelo i muntu’ka kayukilepo amba kibundi kya bene Efisesa ye kalama wa tempelo ya Alatemise mukatampe ne wa kyelekejo kiponene mūlu? 36 Bino bintu byokebibwanyapo kupatanibwa, mufwaninwe nanshi kushikata talala nyā ne kulonga bintu bukidibukidi mpika. 37 Mwanda mubaleta bano bana-balume kuno, abo ke bangivipo ba mu matempelo nansha bantu batuka wetu leza mukaji mutonko. 38 Nanshi shi Demeteusa+ ne basendwe badi nabo badi na mambo na muntu, mafuku a kidye adi’ko ne bambikavu* bene badi’ko; mwibalekei bakesambile abo bene. 39 Ino shi mukimba kintu kingi, nankyo kufwaninwe kukwatwa butyibi mu kitango kitabijibwe. 40 Mwanda na bubine mu uno mwanda wa dyalelo tudi mu kyaka kya kupya mambo a kutombola bantu, ke-pantu ketukaletapo bubinga nansha bumo bwaikadila kibumbo mu kano kavutakanya.” 41 Aye pa kupwa kunena nabya, wanena kitango kyende.

20 Lupotopoto pa kupwa, Polo waityija bana ba bwanga, ebiya webakankamika ne kwibashadika, kupwa kaenda mu Masedonya. 2 Aye pa kupwa kupita mu oa matanda wenda ukankamika boba badi bekele kwine’kwa na binenwa bivule, wafika mu Ngidiki. 3 Walonga’mo myeji isatu, ino pa mwanda wa kitumba kyamukutyīle Bayuda+ pawadi kasake kwenda lwa mema ku Shidea, wakwata mulangwe wa kujoka dya Masedonya. 4 Waendele pamo na ba Sopate mwanā Pilusa wa mu Belea, Aditakusa+ ne Sekundusa ba mu Tesalonika, Ngaiusa wa ku Debe, Temote,+ ne ba Tekikusa+ ne Tofimusa+ ba ku ntanda ya bubikavu ya Azia. 5 Bano bantu babadikile baketwilaija mu Toasa; 6 ino twataluka lwa mema ku Fidipai kupwa kwa mafuku a Mikate Yampikwa Kiyujo,+ twalonga mafuku atano twafika mu Toasa mobadi, twaikala’mo mafuku asamba-abidi.

7 Mu difuku dibajinji dya mu yenga, potwadi twibungile pamo tudya, Polo washilula kwisamba nabo, mwanda wadi wa kwenda kesha; penepo walepeja mwisambo wandi kufika ne pa bukata bwa bufuku. 8 Penepa kwadi binanu bivule mu kyumba kya peulu motwadi twibungīle pamo. 9 Nsongwalume umo wa dijina dya bu Yutekusa wadi ushikete pa dididisha, penepo walāla tulo tukatampe aye Polo papo wisamba’nka kwisamba, Yutekusa pa kulēmenenwa na tulo, wapona panshi tamba pa etaje ya busatu, ebiya bamuboya mufwe kala. 10 Ino Polo watūka, waponena pādi wamufumbakanya+ kanena’mba: “Lekai kulenga lunwa, mwanda i mūmi.”*+ 11 Penepo wakanda, watyumuna mukate kādi. Ebiya waendelela kwisamba kitatyi kilampe, kufika’nka ne byatambile dyuba, kupwa waenda. 12 Ponkapo basela nsongwalume’wa mūmi kadi basengwa ku mutyima bya mwiko.

13 Ebiya twabadikila ku kyombo twaenda lwa mema ku Asosa, kwine kotwadi ba kusela Polo, ke-muntu wapwile kwitulombola nabya, mwanda wadi usaka kwenda’ko lwa nshi. 14 Aye pa kwitutana mu Asosa, twamwikija ketwenda ku Mityilene. 15 Kadi difuku dilonda’ko twataluka’ko lwa mema, twafika ku Kiose, ino dya kesha twaimana bityetye pa Samose, kadi difuku dilonda’ko, twafika ku Miletusa. 16 Polo wadi munene kupitapita Efisesa,+ kutyina’mba wakeja mu ntanda ya bubikavu ya Azia, mwanda wadi wipangila kufika ku Yelusalema+ mu difuku dya Masobo a Pentekosa shi bibwanika.

17 Inoko, pawadi mu Miletusa watuma diwi ku Efisesa bakamwityile bakulumpe ba kipwilo. 18 Abo pa kufika kwadi, webanena’mba: “Muyukile senene monaikadile umbukata mwenu tamba difuku dibajinji dyonanyantyile mu ntanda ya bubikavu ya Azia,+ 19 nadi ñingidila Mfumwetu bu umpika na kwityepeja konso*+ ne na impolo ne matompo auntene mu bitumba byadi binkutyila Bayuda, 20 ne kadi nkyatyininepo kwimusapwila bintu byo-byonso bya kamweno* nansha kwimufundija ku meso a bantu bonso+ ne ku njibo ne njibo.+ 21 Ino nasapwile bukamoni ne pa mfulo ku Bayuda ne ku Bangidiki myanda ya kwisāsa+ ku meso a Leza ne ya kwitabija mudi Mfumwetu Yesu.+ 22 Ino pano talai! yeu ñenda ku Yelusalema mukutwe mu* mushipiditu, nansha byonkiyukilepo bintu bikamfikila’ko, 23 poso bukamoni bunsapwila kyaba kyonso mushipiditu ujila mu kibundi ne kibundi amba buloko ne byamalwa bintengele.+ 24 Inoko nkimwenepo būmi bwami* bu kintu kya mvubu kondi,* poso’nka mvuye lwendo+ lwami ne mwingilo onapelwe na Mfumwetu Yesu, wa kusapula ne pa mfulo bukamoni bwa myanda miyampe ya kanye ka ku buntu bitupu ka Leza.

25 “Ino pano talai! ndyukile amba mu banwe bonasapwidile Bulopwe i kutupu nansha umo ukamona mpala yami monka. 26 Shi ke pano, nemwite bu batumoni dyalelo dino’di amba natōka ku mashi a bantu bonso,+ 27 mwanda nkyalekelepo kwimusapwila madingi onso a* Leza.+ 28 Mwitei mutyima banwe bene+ ne kuta’o luombe lonso momwatongelwe na mushipiditu ujila bu batadi,+ amba mukumbe kipwilo kya Leza,+ kyaapotele na mashi a wandi Mwana.+ 29 Ndyukile amba shi napu kwenda, bampumpi ba kasusu basa kutwela momudi,+ kadi kebakalelapo luombe senene, 30 kadi umbukata mwenu mukatamba bantu bakesamba bintu binyengakane bya kukokela bana ba bwanga kobadi amba bebalonde.+

31 “Nanshi kemwakilālai, kadi vulukai amba myaka isatu+ mituntulu bufuku ne dyuba, nkyalekelepo kwimudyumuna banwe bonso ne impolo ponka. 32 Kadi pano nemupāna kudi Leza ne mu mwanda wa kanye kandi ka ku buntu bitupu, uno mwanda ukokeja kwimutamija ne kwimupa bupyani umbukata mwa bapandulwe bonso.+ 33 Nkyaikelepo kwabila ndalama, olo, nansha bisandi bya muntu nansha umo.+ 34 Banwe bene muyukile amba ano makasa asokwele byonadi mbudilwe+ ne bya boba bonadi nabo. 35 Nemulombwele mu bintu byonso amba mufwaninwe kwingila bininge+ mwa kukwashisha boba bakōkekōke, ne kuvuluka binenwa bya Mfumwetu Yesu, wanenene aye mwine amba: ‘Nsangaji ya kupāna+ itabukile ya kupebwa.’”

36 Kadi aye pa kupwa kunena nabya, wafukata mu manwi ne abo bonso pamo, kalombela. 37 Bine, abo bonso badidile bikatampe mpata, penepo bapamba Polo bīpa* kebamufifye na kisanso,* 38 mwanda mutyima webasense bibi paebalombwele amba kebakamonepo mpala yandi monka.+ Kupwa bakamutūla ku kyombo.

21 Batwe pa kwishiya nabo na mutyima-kanyonga, twataluka lwa mema, twaoloka kufika ne ku Kose, dya kesha twafika ku Lodesa, twataluka kwine’kwa twafika ku Patala. 2 Batwe pa kutana kyombo kyenda ku Fenisea, twaikila’mo ketwenda. 3 Pa kufika dya ku kisanga kya Saipusa, twekishiya dya ku lunkuso* ketwenda ku Shidea, twashīka pa Tyila, pobadi basaka kwabula bintu byadi mu kyombo. 4 Twakimba’mo bana ba bwanga twebatana, twashikata’mo mafuku asamba-abidi. Ino badi balombola Polo divule dine kupityila ku mushipiditu amba kakikatyimpa lwayo mu Yelusalema.+ 5 Kitatyi kya kushikata mwine’mwa pa kupwa, twataluka twaenda, ino abo bonso, ne bana-bakaji ne bana bene kumo, betutwala kufika ne panja pa kibundi. Penepo twafukata mu manwi ku nkula, ketulombela 6 kadi tweshadika batwe bonso. Kupwa twaikila mu kyombo ino abo bajokela kwabo.

7 Penepo twataluka ku Tyila lwa mema twafika ku Tolemese, twaimuna banabetu ne kushikata nabo difuku dimo. 8 Dya kesha twataluka twafika ku Kesalea, twatwela mu njibo ya Fidipa musapudi wa myanda miyampe, umo wa mu bana-balume basamba-babidi’ba,+ penepa twashikata nandi. 9 Uno muntu wadi na bana baná bankungakaji* badi banena bupolofeto.+ 10 Ino batwe pa kushikata’ko mafuku mavule, mupolofeto umo wa dijina dya bu Akabusa+ wafika utamba ku Yudea. 11 Waiya kotwadi, wasela mukaba wa Polo wekuta’o ku maulu ne ku maboko kanena’mba: “E mwanenena mushipiditu ujila namino amba, ‘Mwinē uno mukaba’u ukakutwa enka namino na Bayuda mu Yelusalema,+ kadi bakamupāna mu makasa a bantu ba mizo.’”+ 12 Potwaivwene nabya, ne batwe, ne boba badi’po, ketumwisāshila’mba kakikanda ku Yelusalema. 13 Penepo Polo watentulula’mba: “I kika le kyomudidila ne kutompa kuzozeja kusumininwa kwami?* Yukai’tu amba, ngitabije, ke’nkapo kukutwa ino i ne kufwila dijina dya Mfumwetu Yesu mu Yelusalema.”+ 14 Byotwatuninye kumunekenya, twaleka’byo,* twanena’mba: “Kiswa-mutyima kya Yehova* kilongeke.”

15 Ano mafuku pa kupita’po, twakuta lwendo ketwenda ku Yelusalema. 16 Bana ba bwanga bamo ba mu Kesalea baenda netu, betutwala kwa Nasoni wa mu Saipusa, umo wa mu bana ba bwanga babajinji, mwinē njibo yotwadi ba kufikila’ko. 17 Batwe pa kufika mu Yelusalema, banabetu betutundaila na nsangaji. 18 Ino difuku dilonda’ko Polo waenda netu kudi Yakoba,+ ne bakulumpe bonso badi ponka. 19 Penepo webemuna, kupwa kawibasapwila kamo ne kamo bintu byalongele Leza mu mizo kupityila ku mwingilo wandi.

20 Pa kwivwana nabya, baanza kutumbija Leza, ino bamunena’mba: “A mwanetu, ubamone amba kudi Bayuda betabije tununu ne tununu, kadi bonso i bapyasakene Bijila.+ 21 Ino bapupwile myanda yobe amba ufundijanga Bayuda bonso ba mu mizo amba bapondokele Mosesa, wibalombola baleke kutweja babo bana kwisao nansha kulonda bibidiji bya kala.+ 22 Le penepo bisa kwikala namani? Na bubine basa kwivwana’mba ubafika. 23 Nanshi longa bino byotukulombola: Tudi na bana-balume baná bapikile mpiko. 24 Sela bano bana-balume ukesubule nabo pamo mungya bijila kadi wibafutyile byobasa kwibalomba, amba bebatende lupole. Penepo bantu bonso bakayuka’mba myanda yobapupwile pa mwanda obe i ya bubela, ino amba abe unañanga mobyendele, kadi nobe ulamine Bijila.+ 25 Ino ku boba betabije ba mu mizo, twebalembele butyibi bwetu twebatumina’bo amba bafwaninwe kwilama ku bintu bitapīlwe bilezaleza+ ne ku mashi,+ ku byampikwa kutyiba midibu,*+ ne ku busekese.”*+

26 Penepo dya kesha, Polo wasela bana-balume’ba wakesubula nabo pamo mungya bijila,+ ebiya watwela mu tempelo, kawibalombola kitatyi kisa kupwa mafuku a kwisubula ne kya kulambula kyamulambu kya muntu ne muntu.

27 Mafuku asamba-abidi poadi keakapu, Bayuda batambile mu Azia pa kumumona mu tempelo, bakela kibumbo kyonso bulobo, penepa bamukwata, 28 kebela mabila’mba: “Bana-balume ba Isalela, mwitukwashei’ko! Au keye muntu mwine ufundijanga bantu bonso pi na pi kufutulula bantu betu ne Bijila byetu ne kino kifuko. Ne kadi, watwejeje ne Bangidiki mu tempelo ne kusubija wasubija kino kifuko kijila.”+ 29 Mwanda bamumwene kala na Tofimusa+ mwine Efisesa mu kibundi, penepo balanga’mba Polo wamutwejeje mu tempelo. 30 Ponkapo kibundi kyonso kyaikala mu kavutakanya, kadi bantu baiya pamo lubilo bakwata Polo, bamubulwila panja pa tempelo, ponka na ponka bashita bibelo. 31 Pobadi bakimba kumwipaya, myanda’ya yafika kudi mukulu wa kibumbo kya basola, amba Yelusalema ense udi mu kavutakanya; 32 nandi wasela ponka na ponka basola ne bamudyavita watūkila’ko lubilo. Abo pa kumona mukulu wa basola ne basola, baleka’byo kukupila Polo.

33 Ebiya mukulu wa basola wafwena wakuta Polo ne kusoñanya’mba bamukute miyololo ibidi;+ kupwa kaipangula’mba le i ani ne walonga bika. 34 Ino bamo mu kibumbo baanza kwela mabila, aba banena byobi, bakwabo nabo byobi. Penepo pa kukomenwa kuyuka myanda mine pa mwanda wa kavutakanya, wasoñanya bende nandi mu mukenza wa basola. 35 Ino Polo pa kufika pa lukala, waselwa na basola mwanda kibumbo kyadi kitomboke, 36 mwanda kibumbo kya bantu kyadi kilonda koku kyela mabila’mba: “Mwipayei!”

37 Paadi kasake kukatwalwa mu mukenza wa basola, wanena mukulu wa basola’mba: “Le mbwanya bidi kwisamba nobe?” Nandi amba: “Uyukile Kingidiki? 38 Nanshi kudipo yewa mwine Edipito watombwele bantu mafuku kunyuma ne kwenda mu ntanda mutuputupu na bana-balume 4 000 bavwele bipete?” 39 Penepo Polo wanena’mba: “Na bubine ne Muyuda,+ wa ku Tasusa+ mu Shidisha, mwana wa mu kibundi kitumbe. Bine, nakwisāshila, ndeke bidi nesambe na bantu.” 40 Aye pa kumupa kishima, Polo waimana pa lukala, wamāma bantu dikasa. Bantu pa kuba talala nyā, webanena mu Kihebelu,+ amba:

22 “A bana-balume, banabetu ne batata, ntejei pano poneshintulwila ku meso enu.”+ 2 Abo pa kumwivwana wibanena mu Kihebelu, po pene bonso baubididila’tu nyā, nandi kanena’mba: 3 “Ami ne Muyuda,+ mubutwilwe mu Tasusa wa Shidisha,+ ino mufundijibwe mu kino kibundi ku maulu a Ngamadyela,+ kadi mulombolwe kulama Bijila bya bankambo+ byonso ne katyē, ne kadi mupyasakane mu mingilo ya Leza pamo bwa banwe bonso dyalelo dino’di.+ 4 Nadi mpangapanga dino Dishinda bya lufu, nkuta ne kwela bana-balume ne bana-bakaji bene mu bifungo,+ 5 monka mukokejeja kuletela kitobo mukatampe ne kitango kyonso kya bakulumpe bukamoni. Abo baumpele ne mikanda ya kukapa banabetu ku Damakasa, penepo nami naenda’mba nkasele boba badi’ko kwiya nabo ku Yelusalema bakutwe mwanda wa kwibapa mfuto.

6 “Ino ponadi ñenda kemfwena ku Damakasa, kubwipi na dyuba mu mitwe, ponkapo kiké kikatampe kitamba mūlu kyaunsāmina koku ne koku,+ 7 penepo napona pa nshi naivwana ne diwi dyaunena’mba: ‘Solo, Solo, le i kika kyoumpangilapangila?’ 8 Nami nalondolola’mba: ‘A Mfumwami, le wi ani?’ Nandi waunena’mba: ‘I ami Yesu mwine Nazala, mwine opangapanga.’ 9 Ebiya bantu badi nami bamwene kiké’kya, ino kebaivwenepo diwi dya yewa wadi wisamba nami. 10 Penepa namwipangula’mba: ‘A Mfumwami, le nonge namani?’ Mfumwami waunena’mba: ‘Imana, enda mu Damakasa, bakakulombola’mo byonso byotongēlwe kulonga.’+ 11 Ino byonkyadipo mbwanya kumona pa mwanda wa ntumbo ya kiké’kya, nafikile mu Damakasa benda bankwete ku kuboko kudi boba bonadi nabo.

12 “Penepo muntu umo wa dijina dya bu Ananaisa, muntu mwipāne mungya Bijila, kadi unenenwa biyampe na Bayuda bonso bekele kwine’kwa, 13 waiya kondi. Waimana dya ponadi kaunena’mba: ‘A Solo, mwanetu, meso obe amone monka!’ Enka mu kine kitatyi’kya natala ne kumona namumona.+ 14 Ebiya wanena’mba: ‘Leza wa bakulutuba betu wakutonge uyuke kiswa-mutyima kyandi ne kumona yewa moloke+ ne kwivwana diwi dya kyakanwa kyandi, 15 mwanda abe usa kwikala kamoni wandi ku bantu bonso, wa bintu byowamona ne byowaivwana.+ 16 Le penepo kyoijija i kika? Imana, ubatyijibwe, ne koya bubi bobe+ na kwita dijina dyandi.’+

17 “Ino ami pa kujokela ku Yelusalema+ kenombela mu tempelo, naponena mu kimonwa, 18 penepa namumona kaunena’mba: ‘Peja, tamba mu Yelusalema bukidibukidi, mwanda kebaketabijapo bukamoni bokasapula pa mwanda wami.’+ 19 Ino nami namunena’mba: ‘A Mfumwami, abo bene bayukile senene amba nadi ngela boba bakwitabije mu kifungo ne kwibakupila mu mashinankonka nadi mu yoi kendi mu yoi;+ 20 kadi padi pamwangwa mashi a Shitevani kamoni obe, nadi ñimene’po, naitabija ne kwitabija, kadi nalamina ne boba badi bamwipaya bivwalwa bya pangala.’+ 21 Ino aye waunena’mba: ‘Enda, mwanda nkakutuma ku mizo ya kulampe.’”+

22 Ino bamwivwene kufika ne pa bino binenwa. Kupwa batulula mawi, kebanena’mba: “Fundulai yao muntu pano pa ntanda, mwanda kafwaninwepo kwikala mūmi!” 23 Byobadi bela mabila, bakusa bivwalwa byabo bya pangala koku ne koku, ne kukutula luvumbi mūlu,+ 24 mukulu wa basola wasoñanya baselele Polo mu mukenza wa basola, wanena’mba ufwaninwe kusambijibwa na bikupilwa, mwanda wa ayuke kine kyobadi belela Polo mabila nabya. 25 Ino pobamutandabikile kebasake kumukupila, Polo wanena mudyavita wadi wimene’po amba: “Le mudi na lupusa lwa kukupila mwine Loma* nsonde aye kuponejibwa mpika?”*+ 26 Penepo mudyavita pa kwivwana nabya, waenda kudi mukulu wa basola kamulombola’mba: “Le usa kulonga namani? Mwanda uno muntu’u i mwine Loma.” 27 Penepo mukulu wa basola wafwena kamwipangula’mba: “Nombole’po bidi, le wi mwine Loma?” Nandi amba: “En-en.” 28 Mukulu wa basola watentulula’mba: “Ami napotele bino byepelo bya kwikala mwanā kibundi na lupeto luvule.” Polo nandi amba: “Ino amiwa ne mubutulwe nabyo.”+

29 Ponka na ponka boba bantu badi kebasake kumusambija na kumususula bamusonsoloka; kadi mukulu wa basola wakwatwa moyo pa kujingulula’mba i mwine Loma ne amba wamukutyile miyololo.+

30 Penepa difuku dilonda’ko, byaadi usaka kuyuka na bubine kine kyadi kimusambidila Bayuda, wamukutulula ne kusoñanya babitobo bakulu ne Sanedini yonso bebunge. Ebiya watūkija Polo wamwimika umbukata mwabo.+

23 Polo watala ba mu Sanedini sō, kanena’mba: “A bana-balume, banabetu, neendejanga ku meso a Leza na mutyima wa mundamunda utōka biyampe+ shē kufika ne dyalelo.” 2 Penepa kitobo mukatampe Ananaisa wasoñanya boba badi bemene kubwipi nandi bamukupile ku kyakanwa. 3 Penepo Polo wamunena’mba: “Leza usa kukukupila, abe lubumbu lushinge bitōka. Le ubashikata kuntyibila mambo mungya Bijila koku kadi ujilula Bijila na kusoñanya bantu bankupile?” 4 Boba badi bemene’po banena’mba: “Abe kotuke kitobo mukatampe wa Leza?” 5 Ebiya Polo wanena’mba: “A banabetu, nkyadipo ndyukile amba i kitobo mukatampe. Mwanda kilembelwe amba: ‘Kufwaninwepo kunenena muledi wa bantu bobe bibi.’”+

6 Ino Polo, pa kujingulula’mba kwadi bamo Basadusea, bakwabo nabo Bafadiseo, waela lubila mu Sanedini amba: “A bana-balume, banabetu, ami ne Mufadiseo,+ mwanā Bafadiseo. Ntyibilwanga mambo pa mwanda wa lukulupilo lwa lusangukilo lwa bafwe.” 7 Aye pa kunena namino, Bafadiseo ne Basadusea kebepotomeja, kitango nakyo kyakalañana. 8 Mwanda Basadusea banenanga’mba kekudipo lusangukilo nansha mwikeulu nansha mushipiditu mwine, ino Bafadiseo betabije* bino byonso.+ 9 Penepo kwaikala kavutakanya kakatampe, kadi basonekeji bamo ba mu kitango kya Bafadiseo baimana kebapatana na bulobo bonso amba: “Ketumwenepo kabi mu uno muntu, ino shi kudi mushipiditu nansha mwikeulu wesambile nandi+—.” 10 Lupotopoto pa kuvula, mukulu wa basola waivwana moyo amba basa kusasamuna Polo, wasoñanya basola batūkile’mo ne kumusela lubilo mu bukata mwabo, bende nandi mu mukenza wa basola.

11 Ino bufuku pa kwila, Mfumwetu waimana pabwipi nandi kamunena’mba: “Kankamana’tu!+ Mwanda monka mowasapwila bukamoni ne pa mfulo mu Yelusalema pa mwanda wami, e monka mofwaninwe kusapwila bukamoni ne mu Loma mwine.”+

12 Abo pa kukya, Bayuda bakuta kitumba, batyipa koku befinga mafingo amba kebakadipo ne kutoma kwine poso bepaye bidi Polo. 13 Kwadi bana-balume 40 ne musubu bakutyile kino kitumba na mutyipo. 14 Bano bantu baenda kudi babitobo bakulu ne kudi bakulumpe kebanena’mba: “Twi batyipe bya binebine koku twifinga mafingo amba ketukadipo kakintu ko-konso poso twipaye bidi Polo. 15 Shi ke pano, banwe bonso pamo ne Sanedini mufwaninwe kulombola mukulu wa basola’mba emutūkijije’ye bwa banwe basaka kubandaula mwanda wandi ne pa mfulo. Ino batwe twi belongolole kala kumwipaya kumeso kwa aye kufwena.”

16 Inoko, mwipwa wa Polo waivwene pobadi bakala ñeni ya kukamujikila, watwela mu mukenza wa basola, wasapwila’byo Polo. 17 Penepo Polo waita mudyavita umo wamulombola’mba: “Katūle uno nsongwalume kudi mukulu wa basola, udi na mwanda wa kumusapwila.” 18 Nandi wamusela wakamutūla kudi mukulu wa basola kanena’mba: “Yewa mukutwa Polo waungitanga waunena’mba ndete uno nsongwalume kodi, amba udi na mwanda wa kukulombola.” 19 Mukulu wa basola wamukwata ku kuboko wamukokela kufula, kamwipangula’mba: “Le i mwanda’ka osaka kunsapwila?” 20 Nandi amba: “Bayuda abeivwanika kukulomba wibaletele Polo mu Sanedini kesha, bwa abo basaka kuyukidija myanda yandi kamo ne kamo.+ 21 Ino abe kokalonga byobasa kukunena, mwanda badi na bana-balume 40 ne musubu batengele kumujikila, kadi i batyipe koku befinga mafingo amba kebakadipo nansha kutoma poso bamwipaye bidi;+ pano ke belongolole kala, belaije witabije byobasa kukulomba.” 22 Penepo mukulu wa basola wanena nsongwalume’wa ende pa kupwa kumusoñanya’mba: “Kokalombola muntu nansha umo amba ubaunsokwela uno mwanda.”

23 Penepo waityija bamudyavita babidi kaebanena’mba: “Teakanyai basola 200 bende ku Kesalea, pamo ne boba bakandanga pa tubalwe 70 ne belanga mikobe 200, bataluke pa nsá ya busatu ya bufuku.* 24 Kadi longolwelai Polo tubalwe twa kukanda’po, mwanda wa kumutwala biyampe kudi Fidiki, mbikavu.” 25 Penepa waandika mukanda unena namino amba:

26 “Ami Kodusa Laisesa, kudi Mulēmekibwe Mbikavu Fidiki: Tubaimuna! 27 Uno muntu bamukwete kudi Bayuda kadi badi kebasake kumwipaya, ino naiya bukidi na bami basola namupandija,+ mwanda naivwene amba i mwine Loma.+ 28 Kadi byonadi nsaka kuyuka kine kyobadi bamusambidila, namutūkije mu Sanedini+ yabo. 29 Najingulwile amba bamusambilanga myanda ya Bijila+ byabo, ino kebamulambikilepo mambo nansha amo afwaninwe kufwila nansha kukutyilwa mu kifungo. 30 Ino byobanombwele kitumba kyobadi bamukutyīle,+ pano nakutumina’ye ponka na ponka ne kusoñanya bamusambila bāye bamusambile ku meso obe.”

31 Penepo basola’ba basela Polo+ mobebasoñaninye baenda nandi bufuku ku Antepadise. 32 Dya kesha banena boba bakandanga pa tubalwe bende nandi, ino abo bajokela mu mukenza wa basola. 33 Boba bakandanga pa tubalwe batwela mu Kesalea bapa mbikavu mukanda kadi bamulombola ne Polo. 34 Ebiya watanga’o kaipangula shi i wa ku ntanda ya bubikavu’ka, kupwa wayuka’mba i wa ku Shidisha.+ 35 Wanena’mba: “Nsa kukuteja biyampe shi boba bakusambila abafika.”+ Penepo wasoñanya’mba bamulame mu njibo mikatakata ya* Heloda.

24 Mafuku atano pa kupita’po kitobo mukatampe Ananaisa+ wafika na bakulumpe bamo ne ntenda-mambo* umo, dyandi i Teletulusa, kebasambila Polo kwa mbikavu.+ 2 Aye pa kwitwa, Teletulusa waanza kumusambila, kanena’mba:

“Byotwaikala mu ndoe mikatampe pa mwanda wa abe ne byalongoloka bintu mu uno muzo pa mwanda wa kukala ñeni kobe, 3 kitatyi kyonso ne mu bifuko byonso twibitabijanga na kufwija’ko bikatampe, abe Mulēmekibwe Fidiki. 4 Ino kutyina kukudīla kyaba bipitepite, pa kanye kobe nakwisāshila wituteje’ko bityetye. 5 Mwanda tubamone amba uno muntu i kipupo,*+ uleñanga butomboki+ mu Bayuda bonsololo badi mu ntanda yonso ikelwe na bantu kadi aye ye mwine kalombwe wa katango ka bene Nazala.+ 6 Kadi wadi kasake kusubija tempelo, penepo netu twamukwata.+ 7* —— 8 Shi abe mwine umusambije, usa kujingulula bino byonso byotwamusambila’bi.”

9 Penepo Bayuda nabo belunga nandi mu luno lonji, betabija’mba bino bintu i bya bine. 10 Mbikavu pa kukunwina Polo mutwe amba esambe, nandi watentulula’mba:

“Byondyukile amba wi mutyibi wa uno muzo pano ke myaka mingi, naitabija kwinenena ami mwine.+ 11 Monka mokokeja kubandawila’kyo ne abe mwine, pano kepadi kintu kya mafuku 12 ponakandile kukatōta ku Yelusalema;+ 12 kadi kebantenepo nepatanya na muntu mu tempelo nansha kukela kibumbo bulobo, mu mashinankonka nansha mu kibundi mwine. 13 Ne kadi kebabwanyapo kukuletela bubinga bwa bintu byobansambila pano’bi. 14 Ino naitabija kino ku meso obe amba, mungya dishinda dyobeta abo bu katango, e moñingidila Leza wa bakulutuba+ bami mingilo ikola, koku ngitabije bintu byonso bidi mu Bijila ne bilembelwe mu bilembwa bya Bapolofeto.+ 15 Kadi nkulupile mudi Leza, enka mukulupidile ne bano bantu bene, amba kukekalanga lusangukilo+ lwa boloke ne bakondame+ bene kumo. 16 Pa mwanda wa kino, noñanga nyeke buninge bwa kulama mutyima wa mundamunda utōka* ku meso a Leza ne a bantu.+ 17 Shi ke pano, kupwa kwa myaka mingi, nafikile mwanda wa kutūla byabuntu bya ku lusa+ ku muzo wetu ne kulambula byamulambu. 18 Ponadi nonga bino bintu, bauntana mwisubule mungya bijila mu tempelo,+ ino pa kubulwa kibumbo nansha kuleta kavutakanya kwine. Ino kwadi Bayuda bamo batambile mu ntanda ya bubikavu ya Azia 19 bene badi bafwaninwe kwiya ku meso obe kunsambila shi bine badi nami mwanda.+ 20 Nansha kadi leka bantu badi pano banene abo bene i kibi’ka kyobatene ponaimene ku meso a Sanedini, 21 poso i pa mwanda wa kino kintu kimo kete kyonanenene na diwi ditunduke ponadi ñimene mu bukata mwabo amba: ‘Dyalelo ntyibilwanga mambo ku meso enu pa mwanda wa lusangukilo lwa bafwe!’”+

22 Inoko, Fidiki, byaadi uyukile senene myanda itala dino Dishinda,+ webalupula kanena’mba: “Nkaketa ino yenu myanda enka shi Laisesa mukulu wa basola watūkila kuno.” 23 Kadi wasoñanya mudyavita amba uno muntu ashale mukutwe, inoko ekale na kabwanapabo, ne amba ukaleka bantu bandi bāye bamukwashe.

24 Mafuku matyetye pa kupita’po, Fidiki waiya na Dushila mukajandi, wadi Muyuda, penepa waityija Polo kamuteje panena myanda ya kwitabija mudi Kidishitu Yesu.+ 25 Ino padi pesamba Polo myanda ya boloke, ne kwīfula, ne butyibi bukāya’ko,+ Fidiki waivwana moyo katentulula’mba: “Pano enda bidi, ino shi namone mukenga nsa kukwityija monka.” 26 Kadi wadi ulanga’mba Polo usa kumupa lupeto. O mwanda mwine wadi umwityija divulevule wisamba nandi. 27 Ino myaka ibidi pa kupita’po, bapingakena Fidiki kudi Pokyusa Fetuse; kadi Fidiki byaadi usaka kusangaja Bayuda,+ washiya Polo mu kifungo.

25 Penepo Fetuse,+ pa kupwa kufika mu ntanda ya bubikavu kaendeja, mafuku asatu pa kupita’po, watamba ku Kesalea wakandila ku Yelusalema. 2 Penepo babitobo bakulu ne balēmantu ba Bayuda basambila Polo kwadi.+ Kebesāshila Fetuse 3 ebasangaje* na kwityija Polo āye ku Yelusalema. Ino badi bakimba kujikila Polo peshinda bamwipaye.+ 4 Inoko, Fetuse watentulula’mba Polo ufwaninwe kulamwa mu Kesalea kadi amba aye mwine usa kujokela’ko panopano. 5 Kanena’mba: “Boba bapelwe lupusa mu bukata mwenu batūke pamo nami bakamusambile, shi bine, uno muntu i mulonge kibi.”+

6 Ebiya aye pa kushikata nabo kintu kya mafuku mwānda nansha dikumi watūkila ku Kesalea, kadi dya kesha washikata pa kityibilo kya mambo wasoñanya balete Polo. 7 Aye pa kwiya, Bayuda batambile ku Yelusalema bamubumba, bamulambika mambo mavule mene makatampe okebadipo babwanya nansha kuleta bukamoni bwine.+

8 Ino Polo weshintulwila kanena’mba: “Ami nkipilepo mambo na kujilula Bijila+ bya Bayuda nansha kulubila tempelo nansha Kesala.” 9 Fetuse, byaadi usaka kusangaja Bayuda,+ watentulula kanena Polo amba: “Le usaka kukanda ku Yelusalema ukatyibilwe’ko ano mambo mu meso ami?” 10 Ino Polo wanena’mba: “Ñimene kumeso kwa kityibilo kya mambo kya Kesala, kwine komfwaninwe kutyibilwa mambo. Nkilubīlepo Bayuda, monka mowekiyukila biyampe ne abewa mwine. 11 Shi bine ne nonga-bibi kadi kudi kintu kyonongele kifwaninwe lufu, nkipelelepo kufwa,+ ino shi kemudipo bubine mu bino binsambila bano bantu, i kutupu udi na lupusa lwa kungaba kobadi mwanda wa kwibasangaja. Nalombe kukasamba kwa Kesala!”+ 12 Ebiya Fetuse wesamba na kitango kya badingidi, kupwa watentulula’mba: “Byowalomba kukasamba kwa Kesala; usa kwenda kwa Kesala.”

13 Mafuku matyetye pa kupita’po, Mulopwe Akidipa ne Benishi bafika mu Kesalea kwimuna Fetuse. 14 Byobadi bakidi’mo mafuku, Fetuse watūdila mulopwe myanda ya Polo, kanena’mba:

“Kudi muntu umo washīlwe mukutwe mu kifungo na Fidiki, 15 kadi ponadi mu Yelusalema babitobo bakulu ne bakulumpe ba Bayuda bamusambīle kondi,+ kebanombe muponeje. 16 Ino ami nebatentulwile amba kekilongekangapo ku bene Loma kupāna muntu ku bantu mwanda’tu wa kwibasangaja kumeso kwa usambīlwe’wa kwitana mpala na mpala na bene bamusambila ne kupebwa kyaba kya kwishintulwila pa byobamusambīle.+ 17 Penepo pobafikile muno, nkyaijijepo, dya kesha’tu nashikata kala pa kityibilo kya mambo nasoñanya’mba bakalete yao muntu. 18 Boba bamusambīle pa kwimana kebanena, kebamulambikilepo mambo a bintu bibi byonadi mulangila.+ 19 Ino badi’tu bepotomeja nandi pa mwanda wa butōtyi bwabo bwa kutōta vidye,*+ ne pa mwanda wa muntu umo witwa bu Yesu wafwile ino aye Polo unena’nka kunena’mba i mūmi.+ 20 Ponabudilwe mwa kupwila lolwa lupotopoto, namwipangwile shi usakanga kwenda ku Yelusalema akatyibilwe ano mambo kwine’kwa.+ 21 Ino palombele Polo amba alamibwe mu kifungo mwanda wa kutyibilwa butyibi na Akutusa Mwinemwine,*+ nasoñenye amba bamulame kufika ne byonkamutuma kudi Kesala.”

22 Ponkapo Akidipa wanena Fetuse amba: “Mfwaninwe kwivwana yao muntu ami mwine.”+ Nandi amba, “Kesha usa kumwivwana.” 23 Penepa difuku dilonda’ko, Akidipa ne Benishi baiya na ntumbo mikatampe batwela mu njibo ya kidye pamo ne bakulu ba basola ne bantu ba bulēme ba mu kibundi; kadi Fetuse wasoñanya, ebiya baleta Polo. 24 Fetuse wanena’mba: “A Mulopwe Akidipa ne banwe bonso badi netu pano, mubamone uno muntu wanombelwe na Bayuda bonso mu Yelusalema ne muno mwine, bela mabila’mba kafwaninwepo kwikala mūmi monka.+ 25 Ino najingulwile amba kalongelepo kintu nansha kimo kifwaninwe lufu.+ O mwanda palombele uno muntu aye mwine kukasamba kudi Akutusa Mwinemwine, natyibile butyibi bwa kumutuma. 26 Ino nkidipo na kintu kya kulembela Mfumwami pa mwanda wandi. Shi ke pano, namuleta ku meso enu banwe bonso, nakampata ku meso obe, abe Mulopwe Akidipa, amba pa kupwa kumusambija, nami mone kya kulemba. 27 Mwanda bimweka bu kebidipo na buluji kondi kutuma mukutwa pampikwa kulombola mambo mene amusambīlwe.”

26 Akidipa+ wanena Polo amba: “Ubapebwa lupusa lwa kwinenena abe mwine.” Ebiya Polo waolola kuboko kaeshintulwila’mba:

2 “Pa mwanda wa bintu byonso byonasambīlwe na Bayuda,+ abe Mulopwe Akidipa, nemone bu wa nsangaji mwanda i ku meso obe koneshintulwila dyalelo dino’di, 3 nakampata byopotolwele senene bibidiji byonso ne kwipotomeja kwipotomejanga Bayuda. Shi ke pano, nakwisāshila unteje na mutyima mutūke.

4 “I bine, būmi bonadi nabo tamba pa bwanuke mu bantu bami* ne mu Yelusalema i buyukane biyampe ku Bayuda+ bonso 5 badi bandyukile dibajinji, shi basakile bakokeja kuleta bukamoni, amba mungya katango ka kasumalomo ka mutōtelo+ wetu, nadi bu Mufadiseo.+ 6 Ino pano naimana mu kidye pa mwanda wa lukulupilo lwa mulao wālaile Leza ku bakulutuba betu;+ 7 uno’u ye mulao umo onka ukulupile bisaka byetu 12 kwiumona ufikidila na kumwingidila na bupyasakane mingilo ikola bufuku ne dyuba. Nasambilwa na Bayuda pa mwanda wa luno lukulupilo,+ abe Mulopwe.

8 “Mwanda waka mumona* amba i bikomo kwitabija’mba Leza usangulanga bafwe? 9 Ami uno, nadi nsumininwe amba mfwaninwe kulonga bilongwa bingi bya kulwa na dijina dya Yesu mwine Nazala. 10 Na bubine e byonalongele mu Yelusalema, kadi nadi nkuta bajila bavule mu bifungo,+ mwanda badi bampa lupusa kudi babitobo bakulu;+ kadi shi kebakimbe kwibepaya, nadi ngitabija’mba bepaibwe. 11 Nadi nebapa mfuto divule dine mu mashinankonka onso, ntompa kwibaningila batune lwitabijo; kadi byonadi mwibakalabele bya mwiko, nadi ñenda kukebapangapanga’nka ne mu bibundi bya kulampe bine.

12 “Ponadi ñenda ku Damakasa kukalonga bino’bi na lupusa ne na kishima kyampele babitobo bakulu, 13 namwene mu dishinda, abe Mulopwe, papo dyuba mu mitwe, kiké kitamba mūlu kikela kutabuka dyuba, kyaunsāmina koku ne koku pamo ne boba bonadi ñenda nabo.+ 14 Kadi potwaponene batwe bonso pa nshi, naivwana diwi dyaunena mu Kihebelu amba: ‘Solo, Solo, le i kika kyoumpangilapangila? Byowitungatunga ku tumisungu* wisanshijanga abe mwine.’ 15 Ino naipangula’mba: ‘A Mfumwami, le wi ani?’ Mfumwetu nandi walondolola’mba: ‘I ami Yesu, mwine opangapanga. 16 Ino languka wimane mu maulu obe. Kine kyonakumwekela i kino, amba nkutonge bu mwingidi ne bu kamoni wa bintu byowamona’bi ne byonsa kukulombola pa mwanda wami.+ 17 Kadi nsa kukukūla ku bano bantu ne ku mizo, kwine konsa kukutuma+ 18 kukapūtula meso abo,+ bavundamine ku fukutu+ batadidile ku kitōkeji+ kadi bavundamine lupusa lwa Satana+ batadidile kudi Leza, amba balekelwe bubi+ ne kutambula bupyani pamo na boba bapandulwe na lwitabijo lwabo mudi ami.’

19 “O mwanda, abe Mulopwe Akidipa, nkyapelelepo kukōkela kimonwa kya mūlu, 20 ino nadi nsapula musapu, dibajinji ku boba ba mu Damakasa,+ kupwa ke ba mu Yelusalema,+ ne mu ntanda yonso ya Yudea, ne ku mizo kwine, amba bafwaninwe kwisāsa ne kuvundamukila kudi Leza na kulonga bilongwa bifikīle pa kwisāsa.+ 21 O mwanda Bayuda baunkwete mu tempelo kebasake kungipaya.+ 22 Inoko Leza byawaunkweshe, nakyendelela ne dyalelo kusapula bukamoni ku batyetye ne bakatampe bene, pampikwa kunena myanda ingi poso enka myanda yānenene Bapolofeto ne Mosesa mwine amba ikalongekanga+— 23 amba Kidishitu ukasusukanga,+ ne amba byakekala mubajinji kusanguka mu bafwe,+ ukasapwilanga bano bantu ne mizo mine kitōkeji.”+

24 Ebiya padi panena Polo bino bintu wishintulwila, Fetuse wanena na diwi dikatampe amba: “A Polo, ñeni ibakujina! Kufunda bininge kubakujinya ñeni!” 25 Ino Polo wanena’mba: “Ñeni yami keijininepo, abe Mulēmekibwe Fetuse, ino nenanga binenwa bya bubine kadi bya ñeni mibwane. 26 Na bubine, mulopwe mwine onesamba nandi pampikwa kafinda uyukile senene byonso bino’bi; nsumininwe amba i kutupu kintu nansha kimo kyaidilwe pa bino’bi, mwanda kino’ki kekyalongelwepo kufula.+ 27 A Mulopwe Akidipa, le witabije Bapolofeto? Ndyukile amba wibetabije.” 28 Ino Akidipa wanena Polo amba: “I patyetye’tu wadi wa kunekenya ngikale mwine Kidishitu.” 29 Penepo Polo wanena’mba: “Nombanga Leza amba shi panopano, shi mwenda mafuku, ke enkapo abe kete, ino i ne bonso bangivwana dyalelo’di bekale mongikadile, kutalula’mo’tu enka bino bikutwa bya kifungo.”

30 Penepa mulopwe waimana pamo ne mbikavu ne Benishi ne bantu bobadi bashikete nabo bene. 31 Ino pobatalukile badi benda besamba abo bene na bene amba: “Uno muntu kaloñangapo kintu nansha kimo kifwaninwe lufu nansha bikutwa bya kifungo.”+ 32 Penepo Akidipa wanena Fetuse amba: “Uno muntu wadi wa kulekelelwa shi kalombelepo kukasamba kwa Kesala.”+

27 Ebiya byobatyibile butyibi amba tufwaninwe kwenda lwa mema ku Itadi,+ bapāna Polo ne bakutwa bakwabo kudi mudyavita umo utelwa bu Dyudiusa, wa mu kibumbo kya basola kya Akutusa. 2 Twaikila mu kyombo kitamba ku Adimityuma kyadi kekyenda ku byabu bya ku mbadi ya ntanda ya bubikavu ya Azia, penepo twataluka; kadi Aditakusa+ mwine Masedonya wa mu Tesalonika, wadi netu. 3 Difuku dilonda’ko twashīka ku Shidona, kadi Dyudiusa walongēle Polo bintu na kanye,* wamuleka ende kudi balunda nandi bakamukwashe.

4 Kadi twataluka kwine’kwa, twaenda mu kyepa kya Saipusa, mwanda kivula kyadi kīya motwenda. 5 Penepo twakija dijiba twenda tukunkuja Shidisha ne Pamfidya, kupwa twakafika mu kyabu kya Maila mu Laisa. 6 Mudyavita watana’mo kyombo kitambile ku Alekezandala kyenda ku Itadi, penepo wetwikija’mo. 7 Ebiya twaenda bityebitye twalonga mafuku mangi, kupwa twafika ku Nidusa na makambakano. Byotwakomenwe kwenda kumeso pa mwanda wa kivula, twaenda tufyeme mu kyepa kya Kelete ku Salamone. 8 Pa kwiya tukunkuja na makambakano ku mbadi, twafika pa kifuko patelwa bu Byabu Biyampe, kidi kubwipi na kibundi kya Lasea.

9 Kitatyi kilampe kyadi ke kipite’po kadi kyadi ke kyaka kwenda lwa mema, mwanda enka ne kitatyi kya kijila-nzala kya mu Difuku dya Kupūta Bubi+ kyadi ke kipite kala, penepo Polo webalombola, 10 amba: “A bana-balume, namone amba luno lwendo lusa kwitususula ne kujimija bivule, ke’nkapo bintu ne kyombo kete, ino i ne būmi bwetu bwine.”* 11 Ino mudyavita waivwana’ko ngovi* ne mwinē kyombo pa kyaba kya kwivwana byadi binena Polo. 12 Ino kyabu byokyadi kibi kushikata’mo kitatyi kya mashika, bavule baleta mulangwe wa kutaluka’mo, amba batale shi babwanya kukashikata kitatyi kya mashika mu Fenikise, kyabu kya Kelete kitambila dya kungala ne kutunduka ne dya kunshi ne kutunduka.

13 Kivula kya kunshi pa kupukuma bityebitye, balanga’mba pano milangwe yabo isa kufikidila biyampe, penepo baabula ñanga kebenda bakunkuja mukunko wa Kelete. 14 Ino kitatyi kityetye pa kupita’po, kivula kikomokomo kitwa bu Eulakilo* kyapukuma. 15 Kyombo pa kutādilwa bininge na luvula, twatunya kwikitadija mwiya luvula, penepo twelekelela ketweja. 16 Ebiya twanyemena mu kyepa kya kakisanga kamo ketwa bu Koda, nansha nankyo, twakambile pa kukoka bwato* bwadi ku mutofi wa kunyuma wa kyombo. 17 Ino pa kupwa kwibwikija, baanza kuningija kyombo na myonji, kadi byobadi batyina kukejīka mu musenga wa Shityise,* batūkija kidindo kikatampe, kebeja. 18 Ino byotwadi tusunkanibwa bya malwa na kivula, bashilula kupēleja kyombo difuku dyalondele’po. 19 Kadi mu difuku dya busatu, baela bingidilwa bya kyombo na makasa.

20 Dyuba ne ñenyenye byokebyamwekelepo mafuku mangi, kadi kivula kikomokomo* byokyadi kitupukumina, ku mfulo twaanza ne kujimija lukulupilo lonso lwa kupanda. 21 Pa kupityija kitatyi kilampe pampikwa kudya, Polo waimana umbukata mwabo kanena’mba: “A bana-balume, bine mwadi ba kulonda madingi ami ne kuleka kutaluka mu Kelete, longa ketususukilepo ne kujimija bintu namino.+ 22 Ino, pano nemunena’mba kankamanai, mwanda i kutupu muntu* nansha umo momudi’mo usa kujimina, poso’nka kyombo kete. 23 Buno bufuku mwikeulu+ umo wa Leza wami, mwine oñingidila mingilo ikola, wadi waiya kaimene pabwipi nami, 24 kanena’mba, ‘A Polo, kokikwatwa moyo. Ufwaninwe kukemana ku meso a Kesala,+ kadi tala! Leza wakupe bonso boenda nabo pa mema.’ 25 Nanshi kankamanai, a bana-balume, mwanda ami ngitabije mudi Leza amba kisa kulongeka monka mobaunombwelanga. 26 Inoko, tusa kukejīka bidi pa kisanga+ kimo nenki.”

27 Penepo bufuku bwa 14 pa kwila ne byotwadi tusunkanibwa koku ne koku pa Dijiba dya Adidya, bengidi ba mu kyombo baanza kufwatakanya pa bukata bwa bufuku amba pano ketwenda tufwena ku ntanda. 28 Kadi bapima bula bwa mema batana byadi 20,* ebiya baenda’mo bityetye kupwa bapima monka, batana byadi 15.* 29 Ino byotwadi tutyina kukesheta pa mabwe, baela bañanga baná dya ku mutofi wa kunyuma kebelaija bufuku bukye bidi. 30 Ino bengidi ba mu kyombo pobadi kebakimbe kunyema mu kyombo, batūkija bwato pa dijiba kebalonga bya bubela na abo bakela bañanga ku mutofi wa kumeso, 31 Polo wanena mudyavita ne basola’mba: “Shi bano bantu kebashelepo mu kyombo, kemukokejapo kupanda.”+ 32 Penepo basola baketa myonji ya bwato’bwa bebuleka kebwenda.

33 Ebiya byobwadi kebukaki, Polo wakankamika bonso badye byakudya, amba: “Dyalelo ke difuku dya 14 dyomukungila koku muzumbazumba, kadi kemwadile kakudya nansha kamo. 34 O mwanda nemukankamika mudye byakudya; i mwanda wa mumone bukomo, mwanda i kutupu lunywene nansha lumo lwa ku mutwe wenu lusa koneka.” 35 Aye pa kupwa kunena nabya, watekuna mukate, wafwija’ko Leza ku meso a abo bonso, weutyumuna kādi. 36 Penepo abo bonso bakankamana, nabo baanza kudya byakudya. 37 Batwe bonso pamo, twadi bantu* 276 mu kyombo. 38 Abo pa kudya baikuta, baanza kupēleja kyombo na kwela pa dijiba ñano yadi yomekelwe’mo.+

39 Bufuku pa kukya, kebajingulwilepo yoya ntanda,+ inoko bamona kitonto kimo nenki ne nkula monka, penepo basumininwa’mba bakashīke’mo kyombo, shi bibwanika. 40 Ponkapo baketa bañanga bebaleka bashike mu dijiba, kadi bakutulula ne nkamba ya imbindo; abo pa kupwa kukandija kidindo kya kumeso amba muteme luvula, kebenda dya ku nkula’kwa. 41 Abo pa kwitema mu kibumba kya musenga kyadi kyabenye dijiba koku ne koku, bejīka’mo na kyombo ne mutofi wa kumeso wekomena keukijina, ino mutofi wa kunyuma keuladika bibesebibese bya mwiko na mantanki.+ 42 Penepo basola bakwata butyibi bwa kwipaya bakutwa kutyina’mba kwakekala nansha umo wa koila* anyeme. 43 Ino mudyavita wadi musumininwe kufikija Polo biyampe, penepo webakankaja baleke kufikidija milangwe yabo. Ebiya wasoñanya boba badi bayukile koila beele pa mema babadikile ku ntanda, 44 ino bakwabo kebalonda, bamo pa mbao bakwabo nabo pa bibese bya kyombo. Penepo bonso bafika ku ntanda biyampe byonka.+

28 Batwe pa kupwa kupanda, twayuka’mba kisanga’kya kyadi kitwa bu Medita.+ 2 Bantu banena ludimi lungi* badi na mutyima wa kanye* kakatampe mpata potudi. Betubanjila mudilo ne kwitutambula senene batwe bonso mwanda wa mvula wadi unoka ne mwanda wa mashika. 3 Ino Polo pa kukonga nkuni waela’yo pa mudilo, mpidi watamba’mo mwanda wa kyanga, wamulamata ku kuboko. 4 Boba bantu banena ludimi lungi pobamwene kyokya kīshi kya bulembe kimuyela ku kuboko, kebanena abo bene na bene amba: “Bine ne bine ponka uno muntu i ntapañani, nansha byaapanda pa dijiba, ino Boloke* kamulekelepo ekale mūmi.” 5 Inoko, wakushila kīshi’kya mu mudilo ne kulongwa kintu mpika. 6 Ino badi balanga’mba usa kuyula nansha kupona panshi mufwididile. Abo pa kupwa kwilaija kitatyi kilampe ino kumona kibi kyamufikila mpika, bashinta milangwe yabo kebanena’mba uno muntu i leza.

7 Kubwipi na kwine’kwa kwadi madimi a mulēmantu umo wa pa kisanga’kya, wa dijina dya bu Pubyusa; wetutambwile ne kwitutundaila kwandi na kizaji mu mafuku asatu matuntulu. 8 Byaikele namino, shandya Pubyusa wadi ulēle pa butanda ubela ngitu kukaba ne munda mupita mashi, ebiya Polo watwela mwaadi’mwa kalombela, wamutenteka makasa, penepo wamubelula.+ 9 Bino pa kulongeka, bantu bakwabo badi babela pa kisanga’kya nabo badi kebāya kwadi ne kukomejibwa.+ 10 Betulēmeka na kwitupa byabuntu bingi, kadi potwadi ketwenda lwa mema, betukutyila byonso byotwadi tusakilwa.

11 Myeji isatu pa kupita’po, twaikila mu kyombo kyadi na kiyukeno ku mutofi kya “Bana ba Zeuse.” Kyombo’kya kyatambile ku Alekezandala, kyapityija kitatyi kya mashika pa kisanga. 12 Batwe pa kufika mu kyabu kya Saikuse, twalonga’mo mafuku asatu; 13 twatamba kwine’kwa twenda tukunkuja, twafika ku Lekyuma. Difuku dimo pa kupita’po luvula lwa kunshi lwaanza kupukuma, penepa twaenda ku Puteodi mu difuku dya bubidi. 14 Kuno twatene’ko banabetu kadi badi betwisāshila tushikate nabo mafuku asamba-abidi, penepo twaenda ku Loma. 15 Kwine’kwa banabetu pa kwivwana myanda yetu, baiya kwitutundaila kufika ne ku Nsoko ya Apiusa ne pa Mobo Asatu a Kifikilo. Polo pa kwibamona, wafwija’ko Leza ne kukankamana wakankamana.+ 16 Mfulo mfulō potwatwelele mu Loma, bapa Polo lupusa lwa kushikata kwa aye mwine ne sola wa kumulama.

17 Inoko, mafuku asatu pa kupita’po, waityila pamo balēmantu ba Bayuda. Abo pa kwibunga, kaebanena’mba: “A bana-balume, banabetu, nansha byonkyalongelepo kibi ku bantu ne ku bibidiji bya bakulutuba betu,+ ino napēnwe ku Yelusalema bu mukutwa mu makasa a bene Loma.+ 18 Kadi pa kupwa kunsambija,+ basakile kundekelela, ke-pantu kekwadipo mwanda wa kungipaila.+ 19 Ino Bayuda pa kupela, namona’mba mfwaninwe’nka kulomba kukasamba kwa Kesala,+ ino ke kunenapo amba ngidi na mwanda wa kusambila muzo wetu. 20 O mwanda mwine nalombele kwimumona ne kwisamba nenu, ke-pantu i pa mwanda wa lukulupilo lwa Isalela lonkutyīlwe uno muyololo.”+ 21 Nabo bamutentulula’mba: “Ketutambwilepo mikanda itamba ku Yudea pa mwanda obe, nansha banabetu batambile’ko bene kebetusapwidilepo nansha kulombola kibi kyolongele. 22 Ino tubalanga’mba i kyendele’mo tukwivwane milangwe yobe, mwanda na bubine tuyukile amba kano katango+ kanenenwanga bibi konsokonso.”+

23 Penepo belaa difuku dya kwitana nandi, ebiya baiya mulwi kwawadi ushikatanga. Kadi tamba lubanga kutūla ne ku kyolwa, webashintulwila mwanda’wa na kusapula ne pa mfulo bukamoni bwa Bulopwe bwa Leza, kwibanekenya pa myanda itala Yesu+ idi mu Bijila bya Mosesa+ ne Bapolofeto.+ 24 Bamo baanza kwitabija byawadi unena; bakwabo kebaitabijepo. 25 Penepo byokebeivwanikilepo abo bene na bene, bashilula kutaluka, Polo nandi wanena uno mwanda’mba:

“Mushipiditu ujila wānenene bya bine kupityila kudi mupolofeto Isaya ku bakulutuba benu, 26 amba, ‘Enda ku bano bantu ukanene amba: “Kwivwana, mukevwana ino kwivwanija nansha dimo mpika, kadi kutala mukatala, ino kumona nansha dimo mpika.+ 27 Mwanda mutyima wa bano bantu ulēmanga, kadi baivwene na matwi abo ino kwitaba mpika, ne kadi bapūtyile meso abo, kutyina bakamona nansha dimo na meso abo ne kwivwana na matwi abo nansha kwivwanija na mityima yabo amba balamuke penepa nami nebabelule.”’+ 28 Shi ke pano kiyukibwe komudi amba luno lupandilo lutamba kudi Leza lwatuminwe ku mizo;+ na bubine ayo ikelwivwana.”+ 29* ——

30 Penepo washikata’mo myaka ibidi mituntulu mu njibo+ yawadi ufutyila’ya, kadi wadi utambula biyampe bonso badi bāya kwadi, 31 wibasapwila Bulopwe bwa Leza ne kufundija myanda ya Mfumwetu Yesu Kidishitu pampikwa kafinda nansha kamo,*+ ne kimukankaja kine mpika.