MUKANDA WA BUBIDI KUDI BENE KODINDA

1 Ami Polo, mutumibwa wa Kidishitu Yesu pa kiswa-mutyima kya Leza, ne Temote+ mwanetu, ku kipwilo kya Leza kidi mu Kodinda, ne bajila bonso badi mu Akaya ense:+

2 Kanye ka ku buntu bitupu ne ndoe ya Leza Tata wetu ne ya Mfumwetu Yesu Kidishitu bikale nenu.

3 Atendelwe Leza Shandya Mfumwetu Yesu Kidishitu,+ Tata wa lusa lukatampe+ ne Leza wa kusenga konso,+ 4 mwine wituseñanga* mu matompo*+ etu onso, amba netu tusenge bakwetu+ badi mu matompo* a miswelo yonso na busengi botutambula kudi Leza.+ 5 Mwanda monka muvudile masusu otususuka+ pa mwanda wa Kidishitu, mo monka muvudile ne busengi botutambula kupityila kudi Kidishitu. 6 Nanshi shi tubatanwa na matompo,* i pa mwanda wa kusengibwa kwenu ne lupandilo lwenu; kadi shi tusengibwanga, i pa mwanda wa kusengibwa kwenu, kwingila mwanda wa kwimukwasha mūminine masusu amo onka otususuka ne batwe. 7 Kadi lukulupilo lwetu momudi kelutenkenangapo, pa kuyuka’mba, monka momususukila netu pamo, mo monka momukasengelwa netu pamo.+

8 Mwanda, banwe banabetu, ketusakilepo mwikale ba kubulwa kuyuka byamalwa byetutene mu ntanda ya bubikavu ya Azia.+ Twalēmenenwe bikatampe kutabuka ne pa bukomo bwetu, twaselele’nka ne mityima kūlu pa mwanda wa būmi bwetu.+ 9 Bine, twamwene’tu amba tubatyibilwa nsambu ya lufu. Byadi namino mwanda wa tukulupile mudi Leza+ usangulanga bafwe, ke mu batwe benepo, aa. 10 Wetukūdile ku kyaka kikatampe kya lufu ne uketukūlanga, kadi tumukulupile amba ukendelela kwitukūla.+ 11 Banwe nenu mukokeja kwitukwasha na kuzenza mu milombelo+ pa mwanda wetu, amba bavule bafwije’ko pa mwanda wetu pa buntu botutambula palondololwa milombelo ya bantu bavule bene.*+

12 Mwanda kintu kyotwitumbijija, kisapulwa bukamoni ne na mutyima wetu wa mundamunda, i kino amba tweendeje mu ino ntanda, nakampata komudi, na buujila ne na mutyima umo wa bwine Leza, ke na tunangupo twa ku ngitu,+ aa, ino i na kanye ka ku buntu bitupu ka Leza. 13 Mwanda na bubine ketwimulembelangapo kintu kingi poso enka kyomubwanya kutanga* ne kwivwanija, kadi nkulupile amba mukendelela kwivwanija bino bintu ne pa mfulo,* 14 monka momwaivwanije’byo ne banwe mu muswelo kampanda amba batwe twi bubinga bwenu bwa kwitumbijija, monka momukekadila nenu kotudi mu difuku dya Mfumwetu Yesu.

15 O mwanda, na kino kikulupiji, nadi na mutyima wa kwiya bidi komudi, amba musepelele monka dikwabo;* 16 mwanda nadi nsaka kwimupempula poñenda ku Masedonya, ne kujokela komudi pa kutamba ku Masedonya, kupwa kemundeka ñende ku Yudea.+ 17 I bine, ponadi na uno mutyima, le nadi mwene amba i mitembwe? Nansha nkwatanga mpango na bungitu, mwanda wa amiwa nene amba “En-en, en-en,” kupwa kadi amba “Aa, aa”? 18 Ino Leza ukokeja kwisumbidilwa’mba byobya byotwimusapwila kebidipo “en-en” abyo’ko “aa.” 19 Mwanda Mwanā Leza, Yesu Kidishitu, wasapwilwe mu bukata mwenu na batwe, ko kunena’mba, amiwa ne Shivanusa* ne Temote,+ aye kaikelepo “en-en” aye’ko “aa,” ino “en-en” waikala “en-en” mu wandi mwanda. 20 Mwanda nansha milao ya Leza ikale mingi namani, yonso ibaikala “en-en” kupityila kudi aye.+ Nanshi, kupityila’nka kudi aye, “Amena” unenwanga kudi Leza,+ mwine umuletelanga ntumbo kupityila kudi batwe. 21 Ino mwine ukulupija’mba banwe ne batwe twi ba Kidishitu ne mwine wetushingile māni i Leza.+ 22 Kadi watūdile ne kiyukeno kyandi potudi,+ wetupa ne kyeya kya kyokya kikāya,* ke mushipiditu+ kadi, mu mityima yetu.

23 Pano naite Leza bu kamoni pondi* amba kyonkyaidilepo ku Kodinda i mwanda wa kwimukinga. 24 Ke kunenapo amba twi bamfumu ba lwitabijo lwenu,+ aa, ino twi bengidi nenu pa mwanda wa nsangaji yenu, mwanda mwimanije pa lwitabijo lwenu.

2 Mwanda nakwete mulangwe wa amba nkyakīya monka komudi na mutyima fututu. 2 Mwanda shi nemufītyije mutyima banwe, lelo i ani ukekala’ko wa kunsangaja shi ke’nkapo yewa onafītyije mutyima? 3 Nalembele byonalembele’bya amba shi naiya, nakafītyijibwa mutyima na boba bonadi wa kusangela, mwanda nkulupile amba kyokya kindetela nsangaji amiwa kimuletelanga ne banwe bonso nsangaji imo yonka. 4 Mwanda mu byamalwa bikatampe ne tusua mu mutyima wami nemulembēle na impolo mivule, ke mwandapo wa kwimufītyija mutyima,+ aa, ino i mwanda wa muyuke mubaile buswe bonemusenswe.

5 Ino shi kudi muntu wafītyije ba mutyima,+ ke amipo waafītyije’o, ino i banwe bonso mu ludingo kampanda—kutyina’tu nakanena bisansa. 6 Kufuninwa kwawafuninwa na bantu bavule i kumubwane yao muntu; 7 pano nanshi, mulekelei na mutyima tō ne kumusenga,+ kutyina’mba yao muntu wakalēmenenwa* na kufītwa mutyima bipitepite.+ 8 Nanshi nemwisāshila mumwekeje buswe bomumusenswe.+ 9 Mwanda e kyonemulembēle: mwa kuyukila shi mukalombola kikōkeji kyenu mu bintu byonso. 10 Shi mulekele muntu mambo o-onso, nami namulekela’o. I bine, kyonso kyonalekela (shi kudi mambo onalekela) i pa mwanda wa kamweno kenu ku meso a Kidishitu, 11 kutyina twakadimbwa* na Satana,+ mwanda batwe ketwidilwepo manwa andi.*+

12 Inoko ponafikile mu Toasa+ kusapula myanda miyampe ya Kidishitu, ne kibelo kyaunshitwilwa mudi Mfumwetu, 13 mushipiditu wami kewauntūkilepo mwanda nkyatenepo Tetusa+ mwanetu. Penepo nebashadika keñenda ku Masedonya.+

14 Ino Leza afwijibwe’ko, mwine witwendejanga mafuku onso mu mulongo wa bushindañani pamo na Kidishitu kadi kupityila kudi batwe usambakanyanga* mwenye wa buyuki bwandi konsokonso! 15 Mwanda kudi Leza batwe twi mwenye mulumbuluke wa Kidishitu mu boba bapandijibwa ne mu boba boneka; 16 ku bano boneka i luvumba* lwa lufu lutwala ku lufu,+ ku boba bapandijibwa i mwenye wa būmi utwala ku būmi. Kadi i ani le mwine ubwenye senene bino bintu’bi? 17 I batwe, mwanda ketudipo bansunga ba* mwanda wa Leza+ na mwikadile bantu bavule, aa, inoko twisambanga na mutyima onso pamo bwa batumwe na Leza, bine, ku meso a Leza ne pamo na Kidishitu.

3 Lelo tushilule kwiyukanya monka’ni? Nansha tusakilwa pamo bwa bantu bamo, mikanda ya kwituyukanya imutuminwa nansha yomutuma? 2 Banwe bene mwi mukanda wetu,+ mwandike pa mityima yetu kadi muyukane, utangwa na bantu bonso. 3 Mwanda mulombolanga’mba mwi mukanda wa Kidishitu otulembele batwe bengidi,+ kewandikilwepo na bwīno ino i na mushipiditu wa Leza mūmi, ke pa bipāpopo bya mabwe+ ino i pa bipāpo bya ngitu, ke pa mityima kadi.+

4 Tudi na kikulupiji kya uno muswelo mudi Leza kupityila kudi Kidishitu. 5 Ke kunenapo amba kubwanya kotubwenye senene i kwa batwe bene mwanda wa kulanga’mba kudi kintu kitambile kotudi, ino kubwanya kwetu kutambanga kudi Leza,+ 6 mwine na bubine wetubwanije senene ketudi bengidi ba kipwano kipya,+ ke ba mukanda wa bijila mulembwepo,+ aa, ino i ba mushipiditu; mwanda mukanda wa bijila mulembwe utyibilanga muntu mambo a lufu,+ ino mushipiditu upānanga būmi.+

7 Ino shi mukanda wa bijila upāna lufu, owa waāndikilwe na masomo pa mabwe,+ wāile na ntumbo ya uno muswelo, bana ba Isalela bakomenwa kutala mpala ya Mosesa mwanda wa ntumbo ya mpala yandi,+ ntumbo yadi ya kufundulwa’ko, 8 lelo mwingilo wa mushipiditu+ ubulwe kwikala na ntumbo mikatampe kutabuka?+ 9 Mwanda shi mukanda wa bijila uleta kuponejibwa+ wādi na ntumbo,+ le ntumbo ya mwingilo utwala ku boloke papo ke pepi!+ 10 Na bubine, nansha ke kyokya kyāpelwe ntumbo dibajinji, kyavūdilwe ntumbo pa mwanda wa ntumbo ikitabukile.+ 11 Mwanda shi kyokya kyafundwilwe kyāile na ntumbo,+ ntumbo ya kyokya kidi’ko nyeke yo mine ikekala mikatampe kutabuka!+

12 Byotudi na luno lukulupilo,+ tunenanga pampikwa kafinda nansha kamo, 13 kadi ketuloñangapo byobya byālongele Mosesa pawēpūtyile kilēnda mu mpala yandi,+ kutyina’mba bana ba Isalela bakatala sō mfulo ya kyokya kya kufundulwa’ko. 14 Inoko ñeni yabo yādi ilēma.+ Mwanda kufika ne dyalelo’di, kilēnda kimo kyonka’kya kekyapūtwilwe patañwanga kipwano kya kala,+ mwanda kitalulwanga enka kupityila kudi Kidishitu.+ 15 Bine, kufika ne dyalelo kitatyi kyonso kitañwanga bilembwa bya Mosesa,+ kilēnda kikidi pa mityima yabo.+ 16 Ino shi muntu waalamukila kudi Yehova,* kilēnda kitalulwanga.+ 17 Yehova* i Mushipiditu,+ kadi kokwa kudi mushipiditu wa Yehova,* kudi bwanapabo.+ 18 Kadi batwe bonso, potumwekeja ntumbo ya Yehova* pamo bwa biyo na mapala etu ampikwa kilēnda, twalamunwanga mu kyelekejo kimo kyonka kutamba ku ntumbo ya ludingo kampanda kutūla ku ntumbo mikwabo,* enka mokilongelwa na Yehova* Mushipiditu.*+

4 Nanshi, byotudi na uno mwingilo kupityila ku lusa lotwafwidilwe, ketulekanga’byopo. 2 Ino twi baleke bintu bya bumvu, bya mu bufyafya, ketunañangapo na budyumuku, nansha kunyengakanya mwanda wa Leza;+ ino byotumwekeja bubine, twiyukanyanga ku mutyima wa mundamunda wa muntu ne muntu ku meso a Leza.+ 3 Na bubine, shi myanda miyampe yotusapula i mipūtwe kilēnda, i mipūtwe’kyo mu boba boneka, 4 mu bukata mwabo leza wa ino ngikadilo ya bintu*+ i musabe meso a ñeni ya bantu bampikwa kwitabija,+ amba kitōkeji kya* myanda miyampe ya ntumbo ya Kidishitu, aye kyelekejo kya Leza,+ kyakebamunikila.+ 5 Mwanda ketusapulangapo myanda yetu batwe bene, ino tusapulanga myanda ya Yesu Kidishitu amba i Mfumwetu, ne amba twi bapika benu pa mwanda wa Yesu. 6 Mwanda Leza ye wānenene amba: “Kitōkeji kimunike mu mfindi,”+ kadi wamunikile pa mityima yetu mwanda wa kwibatōkejeja+ na buyuki bwa ntumbo bwa Leza na mpala ya Kidishitu.

7 Inoko, tudi na kino kyabulēme+ mu bipungwa bya dīma,*+ amba bukomo butabukile bwikalanga na bantu bwikale bwa Leza, ke bwetupo, aa.+ 8 Tutyinibwanga bininge mu miswelo yonso, ino kutyintyidilwa byotukomenwa kujina mpika; tukolelwanga, ino kubudidilwa dishinda dya kutambila’ko mpika;*+ 9 tupangwapañwanga, ino kwelwa mpika;+ tubaswanga panshi, ino konakanibwa mpika.+ 10 Tūmininanga mafuku onso mu umbidi wetu masusu aleta lufu asusukile Yesu,+ amba būmi bwa Yesu bumweke patōka ne mu umbidi wetu. 11 Mwanda batwe bōmi tufikijibwanga nyeke kubwipi na lufu+ pa mwanda wa Yesu, amba būmi bwa Yesu nabo bumweke patōka mu ngitu yetu ya lufu. 12 Nanshi lufu lwingilanga motudi, ino būmi nabo momudi.

13 Ino byotudi na mushipiditu wa lwitabijo umo onka na owa obālembēle amba: “Nalombwele lwitabijo, o mwanda nesambile”;+ batwe netu tulombolanga lwitabijo kadi o mwanda twisambanga, 14 pa kuyuka’mba Yewa wasangwile Yesu uketusangulanga ne batwe bene pamo na Yesu kadi uketufikijanga kwadi pamo nenu.+ 15 Mwanda bino bintu byonso bidi’ko pa mwanda wenu, amba bungi bwa kanye ka ku buntu bitupu buvudile’ko kutabuka, mwanda bavule bene bafwijanga’ko pa mwanda wa ntumbo ya Leza.+

16 Nanshi, ketulekanga’byopo, ino nansha shi muntu wetu udi panja wendanga ushinika, na bubine muntu wetu udi munda walamunwanga ke mupya difuku ne difuku. 17 Mwanda nansha kyamalwa* byokidi kya lupito kadi kipēla, kitufikijanga ku ntumbo itabukile kulampe kwine bukata* kadi ya nyeke;+ 18 koku tubambīle meso sō ku bintu byampikwa kumweka, ke ku bintupo bimweka,+ aa. Mwanda bintu bimweka i bya lupito, ino bintu byampikwa kumweka i bya nyeke.

5 Mwanda tuyukile amba njibo yetu ya pano panshi, uno pema, shi ipomoke,*+ tukekalanga na kyūbakwa kya kwa Leza, njibo ya kubulwa kūbakwa na makasa,+ ya nyeke mūlu. 2 Mwanda mu ino njibo,* bine tubinzanga’mo, tusakidila kuvwala kyetu* kya mūlu,*+ 3 amba kitatyi kyotuvwala’kyo, ketukatanwapo mutaka. 4 Na bubine, batwe badi mu uno pema tubinzanga, tulēmenwe, mwanda ketusakilepo kuvūla uno’u, ino tusakanga kuvwala kikwabo,+ amba kyokya kya lufu kiminwe na būmi kubyu.+ 5 Ino mwine wetulongolwele mwanda wa kino kintu’ki i Leza,+ mwine wetupele mushipiditu bu kyeya kya kyokya kikāya.*+

6 Nanshi tukankamene bikatampe mafuku onso kadi tuyukile amba, potukikele mu uno umbidi, ketudipo kudi Mfumwetu,+ 7 mwanda tunañanga na lwitabijo, ke na kumonapo na meso, aa. 8 Ino tukankamene bikatampe kadi tusakanga’ko kubulwa kwikala mu umbidi ino twikale na Mfumwetu.+ 9 Nanshi, nansha twikale nandi nansha ketudipo nandi, twitungilanga kitungo kya kwitabijibwa nandi. 10 Mwanda batwe bonso tufwaninwe kukemana* ku kityibilo kya mambo kya Kidishitu, amba muntu ne muntu akalubwilwe mungya bintu byaloñanga pādi mu umbidi, shi biyampe shi bibi.*+

11 Nanshi, byotuyukile kutyina Mfumwetu, tunekenyanga nyeke bantu, ino tuyukilwe senene na* Leza. Inoko, nkulupile amba tuyukilwe senene ne na* mityima yenu ya mundamunda. 12 Ketwiyukanyangapo monka komudi, aa, ino twimukankamikanga mwitwitembe batwe, amba mumone mwa kulondolwela boba betemba pa mumwekelo wa panja+ ino ke pa byobyapo bidi mu mutyima. 13 Mwanda shi twadi bajinwe ñeni,+ i pa mwanda wa Leza; shi tudi na ñeni mibwane, i pa mwanda wenu. 14 Mwanda buswe budi na Kidishitu bwituningilanga, mwanda tubafule ku kunena namino, amba muntu umo wafwidile bonso;+ penepo nanshi, bonso badi bafwe. 15 Kadi wafwidile bonso amba boba badi na būmi kebafwaninwepo kwikala monka na būmi pa mwanda wa abo bene,+ aa, ino i pa mwanda wa yewa webafwidile kupwa wasanguka.

16 O mwanda, tamba pano i kutupu muntu otuyukile mungya ngitu.+ Nansha shi twayukile Kidishitu dibajinji mwendele ngitu, bine ketukimuyukilepo wao muswelo.+ 17 Shi ke pano, shi muntu udi mu bumo na Kidishitu, nankyo i kipangwa kipya;+ bintu bya kala ke bipite; tala’po! bintu bipya bibaikala’ko. 18 Inoko bintu byonso i bitambe kudi Leza, wetupwenye na aye mwine kupityila kudi Kidishitu,+ wetupa ne mwingilo wa kupwanya,+ 19 ko kunena’mba, Leza wadi upwanya ino ntanda na aye mwine+ kupityila kudi Kidishitu, pampikwa kubala bilubo byabo,+ kadi wetupele musapu wa kupwanya.+

20 Nanshi, batwe twi mikendi*+ pa kyaba kya Kidishitu,+ pamo’nka bwa Leza uzenza kupityila kotudi. Twisāshilanga bantu pa kyaba kya Kidishitu amba: “Pwanai na Leza.” 21 Yewa kayukilepo bubi,+ wamwalamwine ke bubi* pa mwanda wetu, amba kupityila kudi aye twikale boloke bwa Leza.+

6 Byotwingila nandi pamo,+ tubemwisāshila kadi amba kemwakitabijai kanye ka ku buntu bitupu ka Leza bituputupu.+ 2 Mwanda aye unena’mba: “Nakwivwene mu kitatyi kitabijibwe, kadi nakukweshe mu difuku dya lupandilo.”+ Tala! Kino kyo kitatyi kinekine kitabijibwe. Tala! Dino dyo difuku dya lupandilo.

3 Ketuletangapo kikukaja mu muswelo nansha umo, kutyina’mba bantu bakaboya mwingilo wetu tuto;+ 4 ino mu miswelo yonso twiyukanyanga bu bengidi ba Leza,+ mu kūminina bivulevule, mu byamalwa, mu bitatyi bya bufudile, mu makambakano,+ 5 mu bikupilwa, mu bifungo,+ mu bibumbo bya tuvutakanya, mu kwingila bininge, mu kubulwa tulo bufuku, mu bitatyi bya kubulwa byakudya;+ 6 mu butōki, mu buyuki, mu kitūkijetyima,+ mu kanye,+ mu mushipiditu ujila, mu buswe bwa kubulwa buzazangi,+ 7 mu mīsambo ya bine, mu bukomo bwa Leza;+ na byabulwi bya boloke+ mu kuboko kwa lundyo* ne kwa lunkuso,* 8 na kutumbikwa ne na kufutululwa, na kunenenwa bibi ne na kunenenwa maya. Tumonwa bu bañongojani, batwe’ko ba bine, 9 tumonwa bu bampikwa kuyukana, batwe’ko bayukane senene, tumonwa bu bafwe,* inoko, tala! twikele bōmi,+ tumonwa bu bapebwe mfuto,* ino kufikijibwa ku lufu mpika,+ 10 bwa badi bya bulanda ino kasha tusangala, bwa balanda ino tupeteja bavule, bwa ba kubulwa kintu, batwe’ko na bintu byonso.+

11 Twaasamine kyakanwa kyetu mwanda wa kwisamba nenu,* banwe bene Kodinda, kadi twashitwile mutyima wetu bikatampe. 12 Ketwikakangapo* kwimulombola kisanso kyetu,+ ino banwe mwikakanga kwitulombola kisanso kyenu kya ku mutyima. 13 Penepo komudi nako—nesambe bwa ami wisamba na bami bana—banwe nenu shitulai mityima yenu bikatampe.*+

14 Kemwakīkutyilai mu lupungu lubi* na bampikwa kwitabija.+ Mwanda le i kisense’ka kidi pa boloke ne kujilula bijila?+ Nansha le kitōkeji ne fukutu bikwatañene paka le?+ 15 Ne kadi, Kidishitu ne Bediale* bapwanine paka le?+ Nansha le muntu mwitabije* ne wampikwa kwitabija pobeifwanine i paka le?*+ 16 Le tempelo ya Leza ne bilezaleza pobeivwanikile i paka le?+ Mwanda batwe twi tempelo ya Leza mūmi;+ monka mwānenene Leza amba: “Nkekalanga mu bukata mwabo+ kadi nkanañanga mu bukata mwabo, kadi nkekalanga Leza wabo, nabo bakekalanga bantu bami.”+ 17 “‘Nanshi, tambai mu bukata mwabo, ne kwisansanya,’ i Yehova* unena, ‘kadi lekai kutenga kintu kya disubi’”;+ “‘nami nkemutambulanga.’”+ 18 “‘Kadi nkekalanga shenu,+ nenu mukekalanga bami bana bana-balume ne bana-bakaji,’+ i Yehova* Mwinē Bukomo Bonso unena.”

7 Nanshi, byotudi na ino milao,+ banwe baswedibwe, twitōkejei ku byonso bisubija ngitu ne mushipiditu,+ tubwanininye buujila mu kutyina Leza.

2 Mwitushilei’ko kyaba mu mityima yenu.+ Ketulubīlepo muntu, ketonenepo muntu, ketudilepo kya muntu.+ 3 Nkinenenepo namino mwanda wa kwimuponeja. Mwanda nadi nanena kala’mba, mudi mu mityima yetu amba tufwe nenu pamo ne kwikala bōmi pamo nenu. 4 Nesambanga nenu pampikwa kafinda nansha kamo. Nemwitembanga bikatampe. Ami ne muyulwe kusengibwa; ngidi na nsangaji miyule bā mu malwa etu onso.+

5 Na bubine, potwafikile mu Masedonya,+ imbidi* yetu keyatūjijepo, ino twadi tumona’nka malwa mu miswelo yonso—kwadi bulwi panja, munda namo moyo. 6 Inoko Leza, mwine useñanga ba mityima minyoñame+ wetusengele na kwikala kotwaikele na Tetusa; 7 kadi ke’nkapo na kwikala kotwaikele nandi kete ino i ne kusengibwa kwaasengelwe pa mwanda wenu, pawetusapwidile monka’mba mwabilanga bininge kumona ami, ne amba mudi na bulanda bukatampe, kadi muntele mutyima* bininge; o mwanda nami nasangele mpata.

8 Mwanda nansha shi nemufītyije mutyima mu mukanda wami,+ nkialakanyangapo. Nansha shi nealakenye dibajinji, (pa kumona’mba mukanda’wa wemufītyije mutyima, nansha byomwafītyilwe mu kitatyi kityetye’tu), 9 pano nasangala, ke pa mwandapo’tu mwafītyilwe mutyima, ino i pa mwanda kufītwa mutyima kwenu kwemufikije ku kwisāsa. Mwanda mwafītyilwe mutyima bya bwine Leza, pa kino nanshi ketwemusanshijepo nansha dimo. 10 Mwanda kufītwa mutyima bya bwine Leza kuletanga kwisāsa kutwala ku lupandilo, kekushiyangapo kwialakanya;+ ino kufītwa mutyima bya ino ntanda kuletanga lufu. 11 Mwanda talai kufītwa komwafītyilwe mutyima bya bwine Leza mokwemupedile kininga kikatampe, bine, kwinenena, bine, mutyima fututu, bine, moyo, bine, kwabila bininge, bine, bupyasakane, bine, kōlola bilubo!+ Mu bintu byonso mwelombwele amba mwi batōka* mu uno mwanda. 12 Nansha byonemulembēle, nkyalembelepo pa mwanda wa yewa walubile,+ nansha pa mwanda wa yewa walubīlwe, ino i pa mwanda wa kininga kyenu kotudi kimweke mu bukata mwenu ku meso a Leza. 13 O mwanda twasengelwe.

Inoko kutentekela pa kusengibwa kwetu, twasepelele bikatampe pa mwanda wa nsangaji ya Tetusa, mwanda banwe bonso mwatūjije mushipiditu wandi. 14 Mwanda shi nemwitembele kwadi, nkyafwilepo bumvu; ino bintu byonso byotwemulombwele byobidi bya bine, ne kwitemba kwetu kudi Tetusa nako i kwa bine. 15 Ne kadi, kisanso kya ku mutyima kyaemusenswe i kikatampe bininge pavuluka kikōkeji kyenu banwe bonso,+ momwamutambwidile na moyo ne luzakalo. 16 Ami nasangala’mba mu bintu byonso ngikale na kikulupiji mudi banwe.*

8 Pano, banwe banabetu, tusaka muyuke kanye ka ku buntu bitupu ka Leza kalombwelwe bipwilo bya mu Masedonya.+ 2 Pobatompelwe bininge mu byamalwa, nsangaji yabo mivulevule ne bulanda bwabo bukatampe byalengeje buntu bwabo bukatampe buvudile’ko.* 3 Mwanda i mungya muswelo wabo,+ bine, naitabija, i kupita ne pa muswelo wabo+ pene, 4 pobakwete abo bene mulangwe wa kwitulomba’nka kwitulomba na kininga dyese dya kupāna na mutyima tō, amba bengile na bengila mwingilo wa kukwasha bajila.+ 5 Kadi ke’nkapo motwadi tukulupidile, ino dibajinji bepēne abo bene kudi Mfumwetu ne kotudi pa kiswa-mutyima kya Leza. 6 O mwanda twakankamikile Tetusa+ amba, monka mwaashilwidile uno mwingilo mu bukata mwenu, ufwaninwe ne kuvuija uno mwingilo wa kukonga byabuntu byenu bya na mutyima tō. 7 Inoko, monka momuvudilwe bintu byonso, lwitabijo ne kinenwa ne buyuki ne kininga kyonso ne buswe botwimusenswe, vudilwai ne kuno kupāna na mutyima tō.+

8 Nkinenangapo namino mwanda wa kwimuningila, aa, ino i mwanda wa kwimuyukija kininga kya bakwabo ne kutompa shi buswe bwenu i bwa binebine. 9 Mwanda muyukile kanye ka ku buntu bitupu ka Mfumwetu Yesu Kidishitu, amba nansha byaadi mpeta, waikele ke mulanda pa mwanda wenu,+ amba mwikale bampeta kupityila ku bulanda bwandi.

10 Kadi pa kino naleta mulangwe wami+ amba: Kino i kya kamweno komudi, pa kuyuka’mba pano ke mwaka mutuntulu pomwashilwile uno mwingilo, ke’nkapo kushilula’o ino kadi mwalombwele amba musakanga kwingila’o. 11 Pano nanshi, vuyai byomwashilwile kulonga, amba muvuye byobya byomwadi na mutyima wa kulonga mwendele muswelo omudi nao. 12 Mwanda shi mutyima utele’ko bidi, i kitabijibwe nakampata mungya byobya bidi na muntu,+ ke mungyapo byobya byakadipo nabyo, aa. 13 Mwanda nkisakilepo kupēlejeja bakwabo, ino banwe bimukomene; 14 ino amba pa kwenzankanya bintu, bya musubu byenu pano bibwanye pa byobabudilwe, amba bya musubu byabo nabyo bibwanye pa byobya byomubudilwe, amba kwikale kwenzankana. 15 Monka mokilembelwe amba: “Yewa wādi na bingi kādipo na bingi kutabuka, kadi yewa wādi na bityetye nandi kādipo na bityetye kutabuka.”+

16 Pano Leza afwijibwe’ko pa kutūla mu mutyima wa Tetusa+ milangwe imo yonka ya kwimulangila bininge, 17 mwanda na bubine walongele motwamukankamikīle, ino byadi na kininga kikatampe, wakwata milangwe aye mwine ya kwiya komudi. 18 Inoko tusa kumutuma pamo na mwanetu utumbile mu bipwilo byonso pa mwanda wa myanda miyampe. 19 Ke’nkapo kyakyo, ino watongelwe ne na bipwilo ekale mwendi-netu potwingila uno mwingilo wa byabuntu bya na mutyima umo mwanda wa ntumbo ya Mfumwetu ne mu kulombola mutyima wetu wa kukwasha. 20 Pa kino ketusakilepo muntu nansha umo etuboye tuto mu uno mwingilo wa byabuntu bya na mutyima tō otwingila.+ 21 Mwanda batwe ‘tuloñanga byonso pampikwa budimbidimbi, ke’nkapo ku meso a Yehova* kete, ino i ne ku meso a bantu kwine.’+

22 Ne kadi, tusa kwibatuma na mwanetu otwatompele, twamumona’mba udi na kininga mu myanda mingi, ino pano udi na kininga kikatampe mwanda wimukulupile bininge. 23 Inoko shi kudi walakana Tetusa, aye i mukwetu* kadi mwingidi nami mwanda wa kamweno kenu; kadi shi kudi balakana banabetu, i batumibwa ba bipwilo kadi i ntumbo ya Kidishitu. 24 Nanshi mwibalombolei buswe bwenu,+ kadi lombolai bipwilo kine kyotwimwitembelanga.

9 Pa mwanda utala mwingilo wa kwingidila bajila,+ kebidipo’tu na mvubu ami kwimulembela, 2 mwanda ndyukile mutyima wenu muyampe onetembanga kudi bene Masedonya, amba ba mu Akaya i beteakanye pano ke mwaka mutuntulu, kadi bupyasakane bwenu bubasañamuna ne bavule mu bukata mwabo. 3 Ino natume banabetu, kutyina’mba kwitemba kotwimwitemba kwakekala kwa bitupubitupu mu uno mwanda, kadi amba mwiteakanye binebine, monka monanenene’kyo. 4 Mwanda shi tubaiya na bene Masedonya, tubemutana kemwiteakenyepo, batwe—kutyina’tu kwimutela—tusa kufwa bumvu na kikulupiji kyotwimukulupile. 5 O mwanda nalangile amba i biyampe kukankamika banabetu babadikile kwiya komudi ne kuteakanya kala byabuntu bya na mutyima muyampe byomwalaile, amba bikale biteakanye bu byabuntu bya na mutyima tō, ke bu bintupo bya kuningilwa, mhm.

6 Pa uno mwanda, yewa ense ukusa tutyetutye ukangulanga tutyetutye, kadi yewa ense ukusa bingibingi nandi ukangulanga bingibingi.+ 7 Nanshi muntu ne muntu alongele mwafwatakenya mu mutyima wandi, ino ke na mutyima fututupo* nansha na kutononwa,+ mwanda Leza usenswe yewa upāna na nsangaji.+

8 Ne kadi, Leza ubwanya kuvudija kanye kandi ka ku buntu bitupu konso komudi, amba mwikale mafuku onso babwanininye senene mu bintu byonso, kadi mwikele na bivule mwa kwingidila mwingilo onso muyampe.+ 9 (Monka mokilembelwe amba: “Wabanga bininge;* upanga balanda. Boloke bwandi bwendelelanga nyeke.”+ 10 Ino Yewa upānanga nkunwa mivule kudi mukushi ne mukate wa kudya ukemupa ne kwimuvudijija nkunwa ya kukusa kadi ukavudija mwangulo wa boloke bwenu.) 11 Mu bintu byonso mupetejibwanga mu buntu bwa miswelo ne miswelo, bulengeja bantu bafwije’ko Leza pa byotwibalongela; 12 mwanda uno mwingilo ke wa kukwashapo’tu bajila+ mu byobabudilwe ino i ne wa kwikala bampeta mu kufwija’ko Leza divule dine. 13 Pa mwanda wa bubinga buleta uno mwingilo wa kukwasha, batumbijanga Leza mwanda banwe mukōkelele ku myanda miyampe ya Kidishitu yomunena patōkelela, kadi mwanda mudi na buntu mu kupāna byabuntu kobadi ne ku bonsololo.+ 14 Kadi byobemuzenzela mu milombelo, balombolanga kisanso kikatampe kyobemusenswe mwanda wa kanye ka ku buntu bitupu kene ka Leza komudi.

15 Leza afwijibwe’ko pa kyabuntu kyandi kya ku bitupu kekineneka.

10 Pano, ami mwine Polo, nemwisāshila pa kutalala ne kanye ka Kidishitu,+ nansha byongikalanga mupēlulwe mu bukata mwenu potwimona mpala na mpala,+ ino nkikalangapo na moyo komudi shi nkidi’popo.+ 2 Nemulombe amba shi nafika, nkyakafikijibwa kwikala wa kubulwa moyo ne kukwata mpango misumininwe yonkanina kukwatyila bamobamo betumonanga bwa batwe badi banangila mu bungitu. 3 Mwanda nansha tunangilanga mu ngitu, ketulwangapo divita mungya motwikadile mu ngitu. 4 Mwanda byabulwi bya divita dyetu ke bya ku ngitupo,+ aa, ino i bikomo bya kwa Leza+ mwanda wa kufulamika bishimikwa bikomejibwe. 5 Mwanda tufulamikanga milangilo ne kintu kilampe kyo-kyonso kishimikwa mwanda wa kulwa na buyuki bwa Leza,+ kadi tukwatanga mulangwe o-onso bu musungi mwanda wa kwiufikija ku kukōkela Kidishitu; 6 kadi twi beteakanye kupa mfuto muntu ense ubulwa kikōkeji,+ kitatyi kyonso kyomulombola kikōkeji ne pa mfulo.

7 Banwe mutalanga bintu mungya mobimwekela panja. Shi muntu wikulupile amba i wa Kidishitu, nankyo alangulukile monka pa uno mwanda: Monka mwaikadile wa Kidishitu, ne batwe bene mo monka. 8 Mwanda nansha shi netumbije’ko bikatampe pa mwanda wa lupusa lwetupele Mfumwetu lwa kwimūbaka, ino ke lwa kwimupomonapo,+ nankyo nkikafupo bumvu. 9 Mwanda nkisakilepo kumweka na ami ukimba kwimutuyula na mikanda yami. 10 Mwanda banenanga’mba: “Mikanda yandi ilēma kadi idi na lupaka, ino shi aye mwine udi’po i muzoze kadi muneneno wandi i wa bitupu’tu.” 11 Nanshi yewa udi namino ayuke kino, amba byobya byotunena* mu mikanda shi ketudi’po e byonka byotukalonga* shi tudi’po.+ 12 Mwanda ketusomonwangapo kwitūla batwe bene mu mulongo nansha kwidingakanya na bamobamo beyukanya abo bene.+ Ino byobepimanga mungya abo bene ne kwidingakanya mungya abo bene, i bampikwa ñeni.+

13 Inoko ketuketumbijapo panja pa mikalo yotutungīlwe, ino i munda mwa mukalo wa ntanda yetupimīne* Leza, weifikija’nka ne komudi.+ 14 I bine, ketwitandabulangapo batwe bene bwa batwe kebafikilepo komudi, mwanda twi babajinji kufika komudi’ko na myanda miyampe ya Kidishitu.+ 15 Ketwitumbijangapo pa mingilo isusukīle muntu mukwabo panja pa mikalo yetu itutungīlwe, aa, ino tukulupile amba lwitabijo lwenu polwenda lutamina’ko, byobya byotwalongele bikokeja kubaijibwa bininge mu mifwatakanyo yenu pa mwanda wa ntanda itupelwe. Penepo po pene potukalonga bivule kutabuka, 16 amba tusapule myanda miyampe mu matanda a kupita ne kwenu kwine, kutyina kwitumbika pa byobya bingilwe kala mu ntanda ya muntu mukwabo. 17 “Ino yewa witumbika, etumbike mudi Yehova.”*+ 18 Mwanda ke yewapo wiyukanya aye mwine witabijibwanga,+ aa, ino i yewa uyukanibwa na Yehova.*+

11 Nsaka longa mwauntūkijije mutyima pa mwanda wa kubulwa ñeni kwami kutyetye. Ino na bubine, muntūkijije mutyima! 2 Mwanda ngidi nenu mukao kadi i mukao wa kwa Leza,* mwanda nemulaile kwimusongeja kudi mulume umo amba nemufikije kudi Kidishitu pamo bwa mujike mwilame.*+ 3 Ino nkwetwe moyo amba mu muswelo kampanda, monka mwāongwedilwe Eva na nyoka na budyumuku bwandi,+ ñeni yenu yakoneka isonsoloke ku bubinebine ne ku kwilama,* bintu bifwaninwe Kidishitu.+ 4 Mwanda na bubine, shi muntu waiya kasapula Yesu mukwabo mwishile na otwasapwile, nansha shi mutambule mushipiditu ungi mwishile na omwatambwile, nansha myanda miyampe mishile na yoya yomwaitabije,+ banwe mumutūkijijanga mutyima lubilo lonka. 5 Mwanda mona’mba benu batumibwa balumbuluke kutabuka kebampityīlepo pa kantu nansha katyetye.+ 6 Ino nansha shi mbudilwe bwino mu kunena,+ na bubine ke mu buyukipo, aa; na bubine twemulombwele’bo patōka mu miswelo yonso ne mu bintu byonso.

7 Nansha le nalubile pa kwityepeja’mba banwe’ko muzunzulwe, mwanda nemusapwidile na nsangaji myanda miyampe ya Leza ku bitupu?+ 8 Nayete* bintu bya bipwilo bikwabo pa kwitabija bintu* byabo mwanda wa kwimwingidila banwe.+ 9 Ino, ponadi nenu ne ponafudilwe, nkyatwikilepo muntu kiselwa, mwanda banabetu batambile ku Masedonya bampele bintu bivule bine byonadi mbudilwe.+ I amo, mu miswelo yonso napelele kwimutwika kiselwa kadi nkendelela kulonga enka namino’u.+ 10 Enka ne bidi bubine bwa Kidishitu mondi, nkikalekapo kwitemba+ matanda a Akaya. 11 Mwanda waka? Le i mwanda nkimusenswepo banwe? Leza mwine uyukile amba nemusenswe.

12 Ino byononga’bi e byonka byonkendelela kulonga,+ amba mfundule kabepelo ka boba basaka bubinga bwa* kumonwa’mba badingakene netu mu bintu* byobetemba. 13 Mwanda bantu badi nankyo’bo i batumibwa ba bubela, bengidi ba bongojani, beinanya abo bene bu batumibwa ba Kidishitu.+ 14 Kino ke kya kutulumukapo, mwanda ne Satana mwine wiinanyanga bu mwikeulu wa kitōkeji.+ 15 Nanshi ke kyenipo shi bengidi bandi nabo beinanyanga bu bengidi ba boloke. Ino mfulo yabo ikekala mwendele mingilo yabo.+

16 Nanena monka’mba: Muntu kakimfwatakenya’mba ami ne wampikwa ñeni. Ino nansha shi mumfwatakenya wao muswelo, nabya ngitabijei bu muntu wampikwa ñeni, amba nami netumbije’ko bityetye. 17 Bino byonena’bi nkilondangapo kimfwa kya Mfumwetu, ino i bwa muntu wampikwa ñeni, wikulupile aye mwine ne kwitumbija ponka. 18 Bavule byobetumbija mwendele ngitu,* nanshi nami nketumbija. 19 Byomudi “na ñeni” bininge, mutūkijijanga bantu bampikwa ñeni mutyima na nsangaji. 20 Bine, mutūkijijanga mutyima yewa ense wimumuna bupika, ense wimudīla byenu bintu, ense wimusompola byomudi nabyo, ense wizunzula aye mwine pomudi, ne ense wimukupila mu meso.

21 Bitudi’tu’nka ne bumvu kunena namino, mwanda bimweka’mba twalongele bintu na buzoze.

Ino shi bakwabo balonga’byo pampikwa moyo—nesambe byampikwa ñeni—nami kenonga’byo pampikwa moyo. 22 Lelo abo i Bahebelu? Ne ami mwine.+ Lelo i bene Isalela? Ne ami mwine. Le i lutundu* lwa Abalahama? Ne ami mwine.+ 23 Le i bengidi ba Kidishitu? Nalondolola pamo bwa kilubi, ami ye mwine mutabuke’mo: naingile mingilo mingi,+ nakutyilwe divulevule,+ nadi nkupilwa bikupilwa kebibadika, nafikile misunsa mivule kubwipi na lufu.+ 24 Nakupilwe ditano na Bayuda bikupilwa makumi aná aná kutalula’mo kimo kimo,+ 25 disatu nakupilwa nsonde,+ dimo naashibwa mabwe,+ disatu nalobela+ pa mema, bufuku ne dyuba nashikilwa pejiba; 26 mu ñendo divule dine, mu byaka bya mu minonga, mu byaka bya bangivi, mu byaka bya ku bantu betu,+ mu byaka bya ku mizo mikwabo,+ mu byaka bya mu kibundi,+ mu byaka bya mu ntanda mutuputupu, mu byaka bya mu dijiba, mu byaka bya mu banabetu ba bubela, 27 mu kususuka na mingilo ne kuputuma na mingilo, mu kubulwa tulo bufuku divule dine,+ mu nzala ne kyumwa,+ kubulwa byakudya kyaba ne kyaba,+ mashika ne kubulwa bivwalwa.*

28 Kutentekela pa bino bintu bya panja, kudi kinkambija munda mwami difuku ne difuku:* kuzumbija mutyima pa mwanda wa bipwilo byonso.+ 29 Le i ani muzoze, ami kuzoza mpika? Le i ani ukukala, ami kutenekwa mpika?

30 Shi mfwaninwe kwitumbija, nketumbijijanga bintu bilombola buzoze bwami. 31 Leza Shandya Mfumwetu Yesu, Mwine wa kutumbijibwa nyeke, uyukile amba nkibepangapo. 32 Mu Damakasa mbikavu wa Mulopwe Aletasa wadi ulama kibundi kya bene Damakasa mwanda wa kunkwata, 33 ino bauntūkija mu kitunga* pa dididisha dya lubumbu lwa kibundi,+ napanda mu makasa andi.

12 Mfwaninwe kwitumbija. Kekidipo na kamweno, inoko nsa kutundulukila ku bimonwa bikata+ ne myanda yansokwedile Mfumwetu.+ 2 Ndyukile muntu umo udi umbumo na Kidishitu, pano ke myaka 14—shi wadi mu umbidi, shi kadipo mu umbidi, nkiyuka; Leza mwine uyukile—watekwininwe mu diulu dya busatu. 3 Bine, ndyukile yao muntu—shi wadi mu umbidi, shi kadipo mu umbidi, nkiyuka; Leza mwine uyukile— 4 watekwininwe mu paladisa waivwana myanda keineneka kadi ijidikilwe muntu kunena. 5 Nsa kwitumbijija yao muntu, inoko nkisapo kwitumbija ami mwine, poso pa buzoze bwami. 6 Mwanda nansha shi nasakile kwitumbija, nkyadipo wa kwikala wampikwa ñeni, mwanda nadi wa kunena bya bine. Ino naleka’byo’tu, kutyina’mba muntu wakampa bulēme bukatampe kupita’ko byobya byamonanga mondi nansha byaivwananga kondi, 7 pa mwanda’tu wa ino myanda itulumukwa yonasokwedilwe.

Nanshi, kutyina nakezunzula bipitepite, kwaumpelwe mwiba mu ngitu,+ mwikeulu wa Satana, wa kunkupila mapi* nyeke, kutyina’mba nakezunzula bipitepite. 8 Nalombele Mfumwetu misunsa isatu mituntulu pa uno mwanda, amba antalule uno mwiba. 9 Ino aye waunondolola’mba: “Kanye kami ka ku buntu bitupu i kakubwane, mwanda bukomo bwami bufikijibwanga pa bubwaninine mu buzoze.”+ Penepo nanshi, nsa kwitumbija na nsangaji pa buzoze bwami, amba bukomo bwa Kidishitu bwikale nyeke pondi pamo bwa pema. 10 O mwanda ndoelelwe mu buzoze, mu kutukwa mutonko, mu bitatyi bya bufudile, mu kupangwapangwa ne mu makambakano, pa mwanda wa Kidishitu. Mwanda pondi muzoze, e pondi na bukomo.+

11 Naikala kendi wampikwa ñeni. I banwe bauningila’bo, mwanda banwe e badi ba kundyukanya. Mwanda benu batumibwa balumbuluke kutabuka kebampityīlepo pa kantu nansha katyetye, nansha byondi wa bitupu.+ 12 Bine, biyukeno bya bu mutumibwa byalongelwe mu bukata mwenu na kūminina kukatampe,+ ne na biyukeno ne bintu bya kutendelwa* ne bilongwa bya bukomo.+ 13 Mwanda le i pa dyese’ka pemupityīle bipwilo bikwabo? Poso i mwanda nkyaikelepo kiselwa komudi.+ Nanshi ndekelei kino kilubo na mutyima tō.

14 Talai! Uno ke musunsa wa busatu oneteakanya kwiya kwenu, kadi nkikekalapo kiselwa. Mwanda bonkimba i banwe, ke byenu bintupo,+ aa; mwanda ke banapo+ bafwaninwe kubikila bambutwile bintu bya bulēme, ino bambutwile bo ba kubikila babo bana. 15 Amiwa’ko, nsa kusangela mpata kupāna bintu byami ne kupānwa ami ense pa mwanda wenu.*+ Shi nemusenswe bininge, le ami nkasanshibwa bityetye’ni? 16 Nansha nankyo, nkyemutwikilepo kiselwa.+ Inoko, banwe munenanga’mba, ami ne “mukosoke” kadi nemukwete “na budimbañani.” 17 Lelo nemudidīle bya kwimudīla kupityila ku boba bonemutumīne’ni, a? 18 Nesāshīle Tetusa kadi natuma ne mwanetu pamo nandi. Lelo Tetusa wemudidīle kintu’ni, a?+ Mwene twanangile mu mushipiditu umo onka? Mu matabula amo onka?

19 Le mulañanga ano mafuku onso amba twishintulwilanga komudi? I ku meso a Leza kotwisamba mu bumo na Kidishitu. Inoko, banwe baswedibwe, byonso byotulonga i mwanda wa kwimutamija. 20 Mwanda nkwetwe moyo amba mu muswelo kampanda, ponsa kufika kwako, nakemutana muswelo onkisakilepo, kadi nami nakekala muswelo okemusakilepo, ino kwikale’ko lupotopoto, mukao, kwilobela bulobo, kwilalulula, kunenena bantu bibi, kwisongola,* kuyula mitatulo, ne kavutakanya. 21 Padi shi naiya monka, Leza wami waumfwija bumvu ku meso enu, kendila madilo pa mwanda wa bavule balongele bubi dibajinji ino pampikwa kwisāsa bilongwa byabo byobadi balongalonga bya disubi, busekese,* ne kwiendeja pampikwa bumvu.*

13 Uno ke musunsa wa busatu ongiya komudi. “Pa bukamoni bwa* batumoni babidi nansha basatu mwanda onso ufwaninwe kwitabijibwa.”+ 2 Nansha pano byonkidipo nenu, bidi pamo bwa ami udi nenu musunsa wa bubidi, kadi nadyumuna kala boba balongele bubi dibajinji ne bakwabo bonso, amba shi naiya’tu monka nkikebelelapo kunyuma, 3 mwanda mukimbanga bubinga bulombola’mba Kidishitu, wampikwa kuzoza komudi ino mukomo mu bukata mwenu, wisambanga na bubine kupityila kondi. 4 Mwanda na bubine, aye waipailwe ku mutyi pa mwanda wa buzoze, ino i mūmi pa mwanda wa bukomo bwa Leza.+ Bine, batwe netu twi bazoze pamo nandi, inoko tukekalanga bōmi pamo nandi+ pa mwanda wa bukomo bwa Leza komudi.+

5 Mwitompei nyeke shi mudi mu lwitabijo; jingululai nyeke momwikadile banwe bene.+ Nansha le kemujingulwilepo amba Yesu Kidishitu udi nenu umbumo? Poso’tu mwi bapelwe. 6 Nkulupile na bubine amba mukajingulula’mba ketupelelwepo.

7 Pano tulombelanga Leza amba mwakalonga kibi nansha kimo, ke mwandapo wa batwe tumweke bu betabijibwe, aa, ino i mwanda wa mulonge bilumbuluke, nansha shi batwe tumweka bu bapelwe. 8 Mwanda ketukokejapo kulonga kintu nansha kimo kilwa na bubine, poso enka mwendele bubine. 9 Bine tusangalanga kyaba kyonso kyotudi bazoze banwe’ko mwikele bakomo. Kadi kyotulombela i kino, amba mwikale kusendululwa. 10 O mwanda nemulembela bino bintu pano ponkidipo nenu, amba ponsa kwikala nenu, nkyakingidija na bulobo lupusa lwampele Mfumwetu+ lwa kūbaka, ke lwa kupomonapo.

11 Shi ke pano, banwe banabetu, ikalai nyeke bantu ba kusangala, ba kusendululwa, ba kusengibwa,+ balanga bimo,+ bekele mu ndoe;+ kadi Leza wa buswe ne wa ndoe+ ukekala nenu. 12 Mwiimunei banwe bene na bene na mififyo ijila. 13 Bajila bonso abemwimuna.

14 Kanye ka ku buntu bitupu ka Mfumwetu Yesu Kidishitu ne buswe bwa Leza ne mushipiditu ujila otumwena’mo bikale nenu banwe bonso.