MUKANDA KUDI BENE NGALATEA

1 Ami Polo, mutumibwa, kebutambilepo ku bantu nansha kupityila ku muntu, ino i kupityila kudi Yesu Kidishitu+ ne kudi Leza Tata,+ wamusangwile mu bafwe, 2 ne banabetu bonso pamo nami, ku bipwilo bya mu Ngalatea:

3 Kanye ka ku buntu bitupu ne ndoe bitamba kudi Leza Tata wetu ne kudi Mfumwetu Yesu Kidishitu bikale nenu. 4 Wepēne aye mwine pa mwanda wa bubi+ bwetu amba etukūle ku ino ngikadilo mibi ya bintu*+ mwendele kiswa-mutyima kya Leza wetu kadi Tata wetu,+ 5 aye atumbijibwe ntumbo nyeke ne nyekeke. Amena.

6 Natulumuka pa kumona’mba mwendanga musāsuka bukidi bonka* kudi Mwine wemwityile na kanye ka ku buntu bitupu ka Kidishitu kemwenda’ko ku myanda miyampe ya muswelo mukwabo.+ 7 Ke kunenapo amba kudi myanda miyampe mikwabo; ino kudi bamobamo bemuvutakanya+ ne basaka kunyengakanya myanda miyampe ya Kidishitu. 8 Inoko, nansha batwe nansha mwikeulu utūka mūlu shi emusapwile bintu bikwabo bu myanda miyampe abyo’ko bishīle na myanda miyampe yotwemusapwidile’ya, nankyo afingwe mafingo. 9 Enka motwanenena kala’mu, pano nanena monka’mba, Yewa ense wimusapwila bintu bikwabo bu myanda miyampe abyo’ko bishīle na byomwaitabije’bya, afingwe mafingo.

10 Lelo na bubine, nkimbanga kwitabijibwa na bantu’ni nansha na Leza? Nansha le nsakanga kusangaja bantu? Shi nadi nekisangaja bantu, nkyadipo wa kwikala umpika wa Kidishitu. 11 Mwanda nsaka muyuke, banwe banabetu, amba myanda miyampe yonemusapwidile ke mitambepo ku bantu;+ 12 mwanda nkyatambwile’yopo ku muntu, nansha kufundijibwa’yo, ino nasokwedilwe’yo na Yesu Kidishitu.

13 Na bubine, mwaivwene mwikadilo wami wa pa kala onadi nao mu mutōtelo wa Bayuda,+ amba nadi mpangapanga bininge* kipwilo kya Leza kadi nkimba kwikyonakanya fututu;+ 14 kadi nadi ñendelela mpata mu mutōtelo wa Bayuda kupita bavule ba yami myaka ba mu muzo wetu, mwanda nadi mpyasakenine bininge bishi bya batata.+ 15 Ino Leza, mwine waunsansenye mu ndá ya mama, waungita pa kanye kandi ka ku buntu bitupu,+ paalangile amba i biyampe 16 kusokola wandi Mwana kupityila kondi, amba nkasapule yandi myanda miyampe ku mizo,+ nkyakepangwilepo ponka na ponka muntu* nansha umo; 17 kadi nkyakandilepo ku Yelusalema kudi boba baumbadikile kwikala batumibwa, ino naendele ku Alabia, kupwa najokela ku Damakasa.+

18 Ebiya myaka isatu pa kupita’po nakanda ku Yelusalema+ kukapempula Kefasa,*+ nashikata nandi mafuku 15. 19 Ino nkyemwenepo na mutumibwa mukwabo, poso enka Yakoba+ mwanabo na Mfumwetu. 20 Ino pa mwanda wa bintu byonemulembela’bi, nemukulupija ku meso a Leza amba nkibepangapo.

21 Kupwa papo naenda ku matanda a Shidea ne Shidisha.+ 22 Ino ami mwine nkyadipo ndyukene ku bipwilo bya mu Yudea byadi mu bumo na Kidishitu. 23 Badi’tu bevwananga’mba: “Muntu wadi witupangapanga’wa+ pano yewa usapula myanda miyampe ya lwitabijo lwaadi ukimba dibajinji konakanya fututu.”+ 24 Penepo baanza kutumbija Leza pa mwanda wami.

2 Penepo myaka 14 pa kupita’po nakanda monka ku Yelusalema pamo ne Banabasa,+ nasela ne Tetusa.+ 2 Nakandile mwanda nasokwedilwe amba mfwaninwe kwenda’ko, nebalombola ne myanda miyampe mine yonsapulanga mu mizo. Ino nalombwele’yo kufula, ku meso a bana-balume badi balēmekibwe, mwa kujingulwila’mba lubilo lonyema nansha lonadi nyema ke lwa bitupupo. 3 Inoko, enka ne Tetusa,+ mwine onadi nandi, kaningīlwepo kutwela kwisao,+ nansha byadi Mungidiki. 4 Ino owa mwanda wakolomokele pa mwanda wa banabetu ba bubela batwejibwe’mo mu kitalala,+ bekujije’mo mwanda wa kubela bwanapabo+ botudi nabo mu bumo na Kidishitu Yesu, amba betumune lonso bupika;+ 5 ketwebakōkelepo bano bantu’ba,+ nansha mu kitatyi kityetye,* mwanda wa bubine bwa myanda miyampe bwikale nenu nyeke.

6 Inoko pa mwanda wa boba badi bamonwa bu bantu bakatampe+—shi badi ba muswelo’ka, ke mwandapo kondi, mwanda Leza katalangapo mumwekela muntu panja—boba bana-balume badi balēmekibwe kebampelepo kintu kipya nansha kimo. 7 Inoko, pobamwene amba napelwe myanda miyampe ya kusapwila boba bampikwa kutwela kwisao,+ monka mwapedilwe Petelo kusapwila boba batwelele kwisao— 8 mwanda yewa wapele Petelo bukomo bwa butumibwa ku boba batwelele kwisao ye waumpele ne amiwa mwine bukomo mwanda wa boba ba mizo+— 9 kadi pobajingulwile kanye ka ku buntu bitupu konapelwe,+ Yakoba,+ Kefasa,* ne Yoano, bene badi bamweka bu bipanda, bakunka Banabasa ne ami+ mwine kuboko kwa lundyo ketudi bengidi nabo,* amba batwe twende ku mizo, ino abo ku boba batwelele kwisao. 10 Betunena’tu tuvuluke nyeke balanda, kadi ye kyonadi neelela’ko bininge kulonga.+

11 Inoko, Kefasa*+ pawaile ku Antyioka,+ namutopekele* mpala na mpala, mwanda na bubine walubile.* 12 Mwanda padi kepafikile bantu bamo batambile kudi Yakoba,+ wadi udyanga na bantu ba mizo;+ ino abo pa kufika, waleka’byo kaebasonsoloka, mwanda’tu wa kutyina boba ba disao.+ 13 Bayuda bakwabo nabo belunga kwadi mu buno buzazangi, enka ne Banabasa mwine wakokwa nabo mu buzazangi bwabo. 14 Ino ponamwene amba abo kebanangilangapo pamo na bubine bwa myanda miyampe,+ nanena Kefasa* ku meso a abo bonso amba: “Shi abewa, nansha byodi Muyuda, wikele pamo bwa bantu ba mizo, ke pamopo bwa Bayuda, le kyoningidila bantu ba mizo balonde biloñanga Bayuda i kika?”+

15 Batwe babutwilwe Bayuda, ba kubulwa kwikala babipya-mambo ba mu mizo, 16 tujingulwile amba muntu utelwanga bu moloke, ke pa mingilo ya bijilapo, aa, ino i enka pa lwitabijo+ mudi Yesu Kidishitu+ kete. O mwanda twi betabije mudi Kidishitu Yesu, amba tutelwe bu boloke pa lwitabijo mudi Kidishitu, ke pa mingilo ya bijilapo, aa, mwanda i kutupu muntu* nansha umo ukatelwa bu moloke pa mingilo ya bijila.+ 17 Ino shi ne batwe bene tumonwa bu babipya-mambo potukimba kutelwa bu boloke padi Kidishitu, le penepo Kidishitu i mwingidi wa bubi? Nansha dimo! 18 Shi ngubakulule bintu bine byonatūtyile dibajinji, nankyo nalombola’mba ami ne wa kujilula bijila. 19 Mwanda kupityila ku bijila ami nafwile ku bijila,+ amba ngikale mūmi kudi Leza. 20 Ami ne mupopwe ku mutyi pamo na Kidishitu.+ Kakidipo ami wikele mūmi,+ ino i Kidishitu wikele mūmi mu bumo nami. Bine, būmi bondi nabo pano mu ngitu ngidi nabo pa lwitabijo mudi Mwanā Leza,+ waunsenswe ne kwipāna pa mwanda wami.+ 21 Nkipelelepo* kanye ka ku buntu bitupu ka Leza,+ mwanda shi muntu utelwanga bu moloke kupityila ku bijila, nankyo bine Kidishitu wafwile bya bitupu.+

3 Yō, banwe bene Ngalatea bampikwa ñeni! Le i ani wemwela kano kavudi,+ banwe bantu balombwelwe patōkelela Yesu Kidishitu ku meso enu bu muntu mupopwe ku mutyi?+ 2 Nsaka bidi kwimwipangula* kino: Le mwatambwile mushipiditu pa mingilo ya bijila’ni nansha i pa mwanda wa lwitabijo lomwaitabije myanda yomwaivwene?+ 3 Nanshi ye momwikadile bampikwa ñeni namino? Mwashilwile kala kunangila mwendele mushipiditu,* le kemufule na kunangila mwendele ngitu’ni, a?*+ 4 Le mwapityile mu masusu mavulevule bya bitupu? Shi bine byadi bya bitupu. 5 Penepo, yewa wimupanga mushipiditu ne kulonga bilongwa bya bukomo+ mu bukata mwenu, le uloñanga namino pa mwanda wa mingilo ya bijila’ni nansha i pa mwanda wa lwitabijo lomwaitabije myanda yomwaivwene? 6 Pamo bwa Abalahama “wāikele na lwitabijo mudi Yehova,* penepo lwāmubadilwa bu boloke.”+

7 I bine muyukile amba boba badi na lwitabijo bo bana ba Abalahama.+ 8 Ino kisonekwa, pa kubadikila kumona’mba Leza ukatela bantu ba mizo bu boloke kupityila ku lwitabijo, kyāsapwidile kala Abalahama myanda miyampe amba: “Mizo yonso ikeselwanga kupityila kudi abe.”+ 9 O mwanda boba badi na lwitabijo beselwanga dyese pamo na Abalahama, wādi na lwitabijo.+

10 Boba bonso bakulupile mingilo ya bijila i bafingwe mafingo, mwanda i kilembwe amba: “Afingwe mafingo yewa ense kekelepo nyeke mu bintu byonso bilembelwe mu muvungo wa Bijila ne kwibilonga.”+ 11 Ne kadi, i kimweke patōka’mba i kutupu utelwanga bu moloke na Leza+ pa bijila, mwanda “moloke ukekalanga mūmi pa mwanda wa lwitabijo.”+ 12 Inoko Bijila kebimaninepo pa lwitabijo. Ino, “yewa ulonga bino bintu ukekala mūmi pa mwanda wabyo.”+ 13 Kidishitu wetupotele,+ wetunyongolola+ ku mafingo a Bijila pa kwikala’ye ke mafingo pa kyetu kyaba, mwanda i kilembwe amba: “Afingwe mafingo muntu yense uyeyekelwe ku mutyi.”+ 14 Kyaikele namino mwanda wa dyese dya Abalahama difike ku mizo kupityila kudi Kidishitu Yesu,+ amba pa lwitabijo lwetu tutambule mushipiditu walailwe.+

15 Banwe banabetu, ami nanena na kuleta kyelekejo kya bantu: Shi kipwano kibasambwa—nansha’tu na muntu—i kutupu utyiba’kyo nansha kubweja’ko kintu. 16 Inoko milao yālailwe Abalahama ne lutundu* lwandi. Kisonekwa kekinenenepo amba: “Ne ku ntundu*+ yobe,” na ayo mingi. Inoko kyādi kīsambila pa lutundu lumo amba: “Ne ku lutundu* lobe,” ke Kidishitu kadi.+ 17 Ne kadi, nanena kino amba: Bijila, byobya byāikele’ko kupwa kwa myaka 430,+ kebityibilepo kipwano kyāsambile kala Leza, mwanda wa kwipaya mulao. 18 Mwanda shi bupyani bwimanine pa bijila, nankyo kebukimaninepo pa mulao; ino Leza wāpele’bo Abalahama na mutyima tō kupityila ku mulao.+

19 Le penepo Bijila i byaka? Byābwejibwe’ko mwanda wa kujilula kumweke patōka,+ enka ne bifika+ lutundu* lwālailwe mulao’wa; kadi byāletelwe kupityila kudi bamwikeulu+ ku kuboko kwa nsenga.+ 20 Ino kekwikalangapo nsenga shi kudi muntu umo kete, inoko Leza i umo kete. 21 Shi ke pano, le Bijila bilwanga na milao ya Leza? Nansha dimo! Mwanda shi bijila byādi biletwe mwanda wa kupāna būmi, longa boloke bwadi bwa kwikala’ko pa bijila. 22 Ino Kisonekwa kyākutyile bintu byonso mu buloko bwa bubi, amba mulao utamba ku lwitabijo mudi Yesu Kidishitu upebwe boba balombola lwitabijo.

23 Inoko, lwitabijo polwadi kelwafikile, twadi tulelelwe mu bijila, tukutyilwe mu buloko, tutengele lwitabijo lwadi lwa kusokolwa.+ 24 O mwanda Bijila byaikele ke mulami* wetu wa kutwala kudi Kidishitu,+ amba tutelwe bu boloke pa lwitabijo.+ 25 Ino pano pafika lwitabijo,+ ketukilaminwepo na mulami.*+

26 Na bubine, banwe bonso mwi bana ba Leza+ pa lwitabijo lwenu mudi Kidishitu Yesu.+ 27 Mwanda banwe bonso babatyijibwe mudi Kidishitu mwi bavwale Kidishitu.+ 28 Kekudipo Muyuda nansha Mungidiki,+ kekudipo umpika nansha mwanapabo,+ kekudipo mwana-mulume nansha mwana-mukaji,+ mwanda banwe bonso mwi umo, mu bumo na Kidishitu Yesu.+ 29 Ne kadi, shi mwi ba Kidishitu, bine mwi lutundu* lwa Abalahama,+ bampyana+ mwendele mulao.+

4 Ino nanena’mba mpyana shi ukidi mwana mutyetye keshidilepo na umpika, nansha byadi mfumwandya bintu byonso, 2 ino utalwanga na baledi ne batulama kufika ne difuku ditungile kala shandi. 3 Mo monka, batwe netu, potwadi tukidi bana, twadi bamunwe bupika na bintu bya kyalwilo bya ino ntanda.+ 4 Ino kitatyi kine pa kufika, Leza watuma wandi Mwana, wabutwilwe na mwana-mukaji+ kadi wadi mu bijila,+ 5 amba anyongolole boba badi mu bijila na kwibapota,+ mwanda wa batwe twalamunwe ketudi bana.+

6 Byomudi bana, Leza watume mushipiditu+ wa wandi Mwana mu mityima yetu,+ kewela lubila’mba: “Abba,* Tata!”+ 7 Penepo kukidipo umpika ino kodi mwana; kadi shi wi mwana, nanshi kadi wi mpyana kudi Leza.+

8 Inoko, pomwadi kemwayukile Leza, mwadi mumuninwe bupika na boba ke balezapo binebine. 9 Ino pano pomwayuka Leza, nansha kadi pomwayukwa na Leza, i namani le kemujokela monka ku bintu bya kyalwilo bizoze+ ne bya bulanda kadi kemusake kwibingidila monka bu bapika?+ 10 Mulamanga na katentekeji mafuku, myeji,+ bitatyi, ne myaka. 11 Nemukwatyilwa moyo, amba padi bukomo bwami bwajimine bitupu’tu pa mwanda wenu.

12 A banabetu, nemwisāshila, ikalai mongikadile, mwanda ami nami nadi enka momwikadile’mo.+ Kemwanongelepo kibi. 13 Ino muyukile amba misongo ya mu ngitu yo yaumpele dibajinji mukenga wa kwimusapwila myanda miyampe. 14 Kadi nansha ngikadila ya ngitu yami byoyadi imuletela matompo, kemwaumfutulwilepo nansha kunkwatyilwa mukenye;* ino mwauntambwile pamo bwa mwikeulu wa Leza, pamo bwa Kidishitu Yesu. 15 Le nsangaji yomwadi nayo idi kwepi? Mwanda nemusapwila bukamoni amba, shi byadi bibwanika, longa mwaswile kubongotola meso enu, mwaumpa’o.+ 16 Penepo, le naikala walwana nenu mwanda nemusapwila bubine? 17 Abo bapyasakenine kwimunekenya, ke na kitungopo kiyampe; ino basakanga kwimusonsolola kondi, amba mwikale na mutyima wa kwibalonda. 18 Inoko, i kipite buya kyaba kyonso muntu emukimbe na bupyasakane na kitungo kiyampe kadi ke enkapo kitatyi kyondi nenu, 19 twanwe twana twami,+ tonakikwatyilwe bisanso bya lubutulo kufika ne bikala* Kidishitu momudi. 20 Naabila shi nadi nakidi nenu ne pano ne kwisamba nenu mu muswelo mukwabo, mwanda nakolelwa pa mwanda wenu.

21 Nsapwilei bidi, banwe basaka kwikala mu bijila, Le kemwivwanangapo Bijila? 22 Kimfwa, i kilembwe amba Abalahama wādi na bana babidi bana-balume, umo wa mwingidi mwana-mukaji,+ mukwabo wa mwana-mukaji mwanapabo;+ 23 yewa wa mwingidi mwana-mukaji wābutwilwe mubutwilwanga nyeke,*+ ino mukwabo wa mwana-mukaji mwanapabo kupityila ku mulao.+ 24 Bino bintu bidi pamo bwa kyelekejo; mwanda bano bana-bakaji belekeja bipwano bibidi, kimo kya ku Lūlu lwa Shinai,+ kibutula bana ba bupika, kadi i Hakala. 25 Nanshi Hakala welekeja Shinai,+ lūlu lwa mu Alabia, kadi udingakene na Yelusalema dyalelo, mwanda udi mu bupika ne bana bandi bene. 26 Ino Yelusalema wa kokwa kūlu i mwanapabo, kadi i mama wetu.

27 Mwanda i kilembwe amba: “Sangala, abe mwana-mukaji ñumba kabutwilepo; ela nsadi ya tusepo, abe mwana-mukaji wampikwa bisanso bya lubutulo; mwanda bana ba mwana-mukaji udi mu musala i bangi bininge kutabuka ba yewa udi na mulume.”+ 28 Banwe banabetu, pano mwi bana ba mulao monka mwādi mwikadile Izake.+ 29 Ino monka mwashilwidile yewa wābutwilwe mubutwilwanga nyeke* kupangapanga yewa wābutwilwe kupityila ku mushipiditu,+ e mobikadile ne pano.+ 30 Inoko, le kisonekwa kinena namani? Amba, “Panga mwingidi mwana-mukaji ne wandi mwana mwine, mwanda mwanā mwingidi mwana-mukaji kakekalapo nansha dimo mpyana pamo na yewa wa mwana-mukaji mwanapabo.”+ 31 Nanshi, banwe banabetu, ketudipo bana ba mwingidi mwana-mukaji, aa, ino twi ba mwana-mukaji mwanapabo.

5 I pa mwanda wa buno bwanapabo petukūdile Kidishitu ketudi banapabo. Nanshi imanijai,+ kadi kemwakityinyai monka mu lupungu lwa bupika.+

2 Talai! Ami Polo, nemusapwila’mba shi mutwejibwe kwisao, Kidishitu kakekalapo na kamweno komudi.+ 3 Nasapula monka bukamoni kudi muntu ense utwela kwisao amba ufwaninwe kulama Bijila byonso.+ 4 Mwi basansane na Kidishitu, banwe basaka kutelwa bu boloke pa bijila;+ mubasonsoloka ku kanye kandi ka ku buntu bitupu. 5 Ino batwe, kupityila ku mushipiditu, tutengele na kipyupyu boloke botukulupile butamba ku lwitabijo. 6 Mwanda ku boba badi umbumo na Kidishitu Yesu, disao ne kubulwa disao kebidipo na mvubu,+ inoko lwitabijo lwingila na buswe lo ludi na mvubu.

7 Mwadi munyema lubilo biyampe.+ I ani le wemukankeje kwendelela kukōkela bubine? 8 Kunekenibwa kwa uno muswelo kekutambangapo kudi Yewa wimwita. 9 Kiyujo kityetye kitatulanga mukama onso.+ 10 Ami nkulupile amba banwe badi mu bumo na Mfumwetu+ kemukalangapo muswelo mukwabo; ino yewa wimuletela kavutakanya,+ shi ani shi ani, ukatyibilwa butyibi bumufwaninwe. 11 Ami’ko, banwe banabetu, shi nakisapula disao, i kika le kyompangilwapangilwa? Nabya, kikukaja kya mutyi wa masusu*+ kibafundulwa. 12 Yō, nsakile amba bantu basaka kwimuvutakanya’bo betungule abo bene.*

13 Mwaityilwe ku bwanapabo, banwe banabetu; inoko kemwakimonai buno bwanapabo bu mukenga wa kulondalonda bya kusakasaka bya ngitu,+ ino mwiingidilei bu bapika banwe bene na bene na buswe.+ 14 Mwanda Bijila byonso i bifikidile* mu mbila imo yonka, amba: “Sanswa mukwenu mowisanshilwe abe mwine.”+ 15 Inoko, shi mwikale mwisuma ne kwibokota nyeke banwe bene na bene,+ tadijai kutyina mwaketukija fututu banwe bene na bene.+

16 Ino nanena’mba, Nangilai nyeke mu mushipiditu+ nabya kemukalongapo nansha dimo bya kusakasaka bya ngitu.+ 17 Mwanda ngitu ilwanga na mushipiditu mu bya kusakasaka byayo, kadi mushipiditu ulwanga na ngitu; bino’bi bīlwanga abyo bine, o mwanda kemulongapo bine byomusaka kulonga.+ 18 Ne kadi, shi muludikwanga na mushipiditu, kemudipo mu bijila.

19 Ino mingilo ya ngitu i mimweke patōka; i busekese,*+ disubi, kwiendeja pampikwa bumvu,*+ 20 butōtyi bwa bilezaleza, majende,*+ nshikani, ñuma, mukao, bulobo bupitepite, kwilalulula, nkalañani, tubitango, 21 kwabilaabila, bunkolwankolwa,+ mafetyi mabimabi,* ne bintu bidi namino.+ Nabadikila kwimudyumuna bino bintu, monka monemudyumwinine kala, amba boba balongalonga bino bintu kebakapyanapo Bulopwe bwa Leza.+

22 Inoko kipa kya mushipiditu i buswe, nsangaji, ndoe, kitūkijetyima,* kanye, buyampe,+ lwitabijo, 23 kutalala, kwīfula.+ Bintu bidi namino kebidipo na kijila. 24 Ne kadi, bantu ba Kidishitu Yesu abo i bapopele ngitu pamo ne bilokoloko ne bya kusakasaka byayo ku mutyi.+

25 Shi tudi na būmi kupityila ku mushipiditu, nanshi twendelelei ne kunangila mu ndudi kupityila ku mushipiditu.+ 26 Ketwakikalai ba kwisakila,+ tukolomona kwitāka batwe bene na bene,+ ne kwiabilaabila batwe bene na bene.

6 Banwe banabetu, nansha shi muntu wasāsuka kumeso kwa aye kujingulula’kyo, banwe babwenye bisakibwa ku mushipiditu tompai kōlola yao muntu na mushipiditu wa butūkanye.+ Ino tadija+ kutyina’mba ne abe mwine wakatompibwa.+ 2 Mwiselejei’ko nyeke biselwa bilēma,+ nabya mukafikidija kijila kya Kidishitu.+ 3 Mwanda shi muntu ulanga’mba i muntu mwinemwine aye’ko wa bitupu,+ wiongolanga aye mwine. 4 Ino muntu ne muntu abandaule bilongwa byandi,+ nabya ukekala na buluji bwa kusangela pa mwanda wandi aye mwine, ke na kwidingakanyapo na muntu mukwabo, aa.+ 5 Mwanda muntu ne muntu ukeselelanga kiselwa* kyandi.+

6 Ne kadi, yewa ense ufundijibwa* mwanda, eabile bintu byonso biyampe na yewa umufundija.*+

7 Kemwakyongolwai: Leza kabengwepo kibengo. Mwanda kyokya kikuna muntu shi kika shi kika, e kyonka kyakangula;+ 8 mwanda yewa ukuna pa mwanda wa ngitu yandi ukangulanga bubole ku ngitu yandi, ino yewa ukuna pa mwanda wa mushipiditu ukangulanga būmi bwa nyeke ku mushipiditu.+ 9 Nanshi ketwakilekai’byo kulonga bilumbuluke, mwanda pa kitatyi kifwaninwe tukangulanga shi ketupūngilepo.*+ 10 O mwanda nanshi, ponso potumona mukenga,* tulongelei bantu bonso biyampe, ino kutabukidila boba botubutulwa nabo mu lwitabijo.

11 Talai byonemulembela na masomo makatampe na kuboko kwami.

12 Boba bonso basaka kwimwekeja biyampe mu ngitu* e bo bakimba kwimuningila mutwele kwisao, baloñanga namino kutyina’mba bakapangwapangwa pa mwanda wa mutyi wa masusu* wa Kidishitu. 13 Mwanda enka ne boba batwela kwisao bene kebalamangapo Bijila,+ ino basakanga banwe mutwejibwe kwisao amba bamone kwitumbija pa mwanda wa ngitu yenu. 14 Ino ami nkyaketumbijapo nansha dimo, poso’nka pa mutyi wa masusu* wa Mfumwetu Yesu Kidishitu,+ padi aye ino ntanda yaipailwe* pa mwanda wami, ami nami pa mwanda wa ino ntanda. 15 Mwanda disao ne kubulwa disao ke kintupo kikatampe,+ ino kipangwa kipya kyo kintu kikatampe.+ 16 Nanshi bonso banangila mu ndudi mwendele kino kijila bekale na ndoe ne lusa, en-en, kudi Isalela wa Leza.+

17 Tamba pano muntu kakinkambakanya, mwanda ngidi na biyukeno bya bu umpika wa Yesu pa umbidi wami.+

18 Kanye ka ku buntu bitupu ka Mfumwetu Yesu Kidishitu kekale na mushipiditu omulombola, banwe banabetu. Amena.