MUKANDA KUDI BENE EFISESA

1 Ami Polo, mutumibwa wa Kidishitu Yesu pa kiswa-mutyima kya Leza, kudi bajila badi mu Efisesa,+ bakōkele mu bumo na Kidishitu Yesu:

2 Kanye ka ku buntu bitupu ne ndoe bitamba kudi Leza Tata wetu ne kudi Mfumwetu Yesu Kidishitu bikale nenu.

3 Leza Shandya Mfumwetu Yesu Kidishitu atendelwe, mwanda i mwitwesele madyese onso a ku mushipiditu mu bifuko bya mūlu mu bumo na Kidishitu,+ 4 mwanda wetutongele twikale nandi* mu bumo ne ñanjilo ya ino ntanda mine keyaikele’ko, amba twikale bajila ne bampikwa kakoba+ ku meso andi mu buswe. 5 Mwanda wetutongele kala+ kwitwalamuna ketudi bana bandi+ kupityila kudi Yesu Kidishitu mwendele kuloelelwa kwandi ne kiswa-mutyima kyandi,+ 6 amba atendelwe pa kanye+ kandi ka ku buntu bitupu ka ntumbo kaetulombwele na mutyima tō mudi muswedibwe wandi.+ 7 Mudi aye twi banyongololwe na kinkūlwa kupityila ku mashi andi,+ bine, twi balekelwe bilubo byetu,+ mwendele bupeta bwa kanye kandi ka ku buntu bitupu.

8 Wavudije kano kanye ka ku buntu bitupu kotudi mu tunangu tonso ne kwivwanija konso* 9 pa kwituyukija kifibwe kikola+ kya kiswa-mutyima kyandi. Nakyo i mwendele kuloelelwa kwandi kwawetungīle aye mwine 10 mwanda wa buludiki* enka ne ku mfulo kwa bitatyi bitungwe, mwa kukongakenya bintu byonso mudi Kidishitu, bintu bya mūlu ne bintu bya pano panshi.+ Bine, i mudi aye 11 otudi nandi mu bumo ne otwatūdilwe nandi bu bampyana,+ pa kutongwa kala mwendele mpango ya mwine ufikidija bintu byonso monka mwatyibila mbila mungya kiswa-mutyima kyandi, 12 amba batwe babajinji kukulupila mudi Kidishitu twingile mwanda wa kutendela ntumbo yandi. 13 Ino banwe nenu mwakulupile mudi aye pa kupwa kwivwana kinenwa kya bubine, myanda miyampe ya lupandilo lwenu. Pa kupwa kwitabija, mwatūdilwe ne kiyukeno+ kupityila kudi aye na mushipiditu ujila walailwe, 14 ao i kyeya* kyetweyekelwe kala kya bupyani bwetu,+ pa mwanda wa kunyongolola bantu ba Leza+ na kinkūlwa,+ mwanda wa mitendelo yandi ya ntumbo.

15 O mwanda ami nami, ponaivwene lwitabijo lomwitabije Mfumwetu Yesu ne buswe bomusenswe bajila bonso, 16 nkilekangapo kufwija’ko pa mwanda wenu. Nemutelanga kyaba kyonso mu milombelo yami, 17 amba Leza wa Mfumwetu Yesu Kidishitu, Shandya ntumbo, emupe mushipiditu wa tunangu ne wa kusokwelwa amba mumuyukidije binebine.+ 18 Aye wamunikile meso a mutyima wenu, amba muyuke mwikadile lukulupilo lwine lwaemwityīle, ne mwikadile bupeta bwa ntumbo bwalamine kupyanika bajila,+ 19 ne mubaile bukomo bwandi bukatampe mpata kudi batwe betabije.+ I mwendele mwingilo wa lupaka lwa buninge bwandi, 20 bwaasangwile nabo Kidishitu mu bafwe, wamushikatyija ku kuboko kwandi kwa lundyo+ mu bifuko bya mūlu, 21 bidi peulu kutabuka buludiki bo-bonso ne lupusa ne bukomo ne bufumu ne dijina dyo-dyonso dikokeja kutelwa,+ ke’nkapo mu ino ngikadilo ya bintu* kete, aa, ino i ne mu yoya ikāya’ko mine. 22 Kadi watūdile bintu byonso munshi mwa maulu andi,+ wamutūla bu mutwe pa bintu byonso pa mwanda wa kipwilo,+ 23 umbidi wandi,+ mwine mwayudile bā aye uyujanga bintu byonso monsomonso.

2 Pakwabo kadi, Leza wemupele būmi, nansha byomwadi bafwe mu bilubo ne mu bubi bwenu,+ 2 momwadi munangila pa kala mwendele ngikadilo ya bintu ya* ino ntanda,+ mwendele mulopwe wa lupusa lwa luvula,+ mushipiditu+ wingila pano mu bana bampikwa kikōkeji. 3 Bine, pa kala batwe bonso twadi mu bukata mwabo twiendeja mungya bya kusakasaka bya ngitu yetu,+ tufikidija bya kusakasaka bya ngitu ne bya milangwe yetu,+ kadi mungya kibutwila, twadi bana ba bukalabale+ pamo bwa bantu bakwabo. 4 Ino Leza byadi mpeta mu lusa,+ kadi pa mwanda wa buswe bwandi bukatampe bwaetusenswe,+ 5 wetupele būmi pamo na Kidishitu, nansha byotwadi bafwe mu bilubo+—nenu mwapandijibwe pa kanye ka ku buntu bitupu. 6 Ne kadi, wetusangwile pamo ne kwitushikatyija pamo mu bifuko bya mūlu mu bumo na Kidishitu Yesu,+ 7 amba mu ngikadilo ya bintu ikāya’ko* alombole mubaile bupeta bwa kanye kandi ka ku buntu bitupu mu lusa lwandi* padi batwe mu bumo na Kidishitu Yesu.

8 Pa kano kanye ka ku buntu bitupu, mwapandijibwe pa lwitabijo,+ kadi ke pa bukomo bwenupo, aa; ino i kyabuntu kya Leza. 9 Kadi ke pa mwandapo wa mingilo,+ aa, kutyina’mba muntu wakamona bubinga bwa kwitumbijija. 10 Batwe twi mingilo ya makasa a Leza* kadi twapangilwe+ mu bumo na Kidishitu Yesu+ mwanda wa mingilo miyampe yetutungīle kala Leza amba tunangile’mo.

11 Nanshi vulukai amba kyaba kimo, banwe bantu ba mizo tamba kubutulwa ku ngitu, mwadi mwitwa bu “bampikwa disao” na boba betwa bu “ba disao,” dya kutwejibwa ku ngitu na makasa a bantu. 12 Mu kine kyaba’kyo mwadi bampikwa Kidishitu, basonsoloke ku bwine Isalela, beni ku bipwano bya mulao;+ kemwadipo na lukulupilo, kadi mwadi bampikwa Leza mu ino ntanda.+ 13 Ino pano, mu bumo na Kidishitu Yesu, banwe badi bekele kulampe mubafwena pabwipi kupityila ku mashi a Kidishitu. 14 Mwanda aye i ndoe yetu,+ aye waalamwine bisumpi bibidi ke kimo,+ wapomona lubumbu lwa pa bukata lwadi lwibakalañenye.+ 15 Kupityila ku ngitu yandi watalwile lwana, Bijila bya mbila mudi misoñanya, mwanda wa kwalamuna bisumpi bibidi ke muntu umo mupya+ mu bumo na aye mwine ne kuleta ndoe, 16 ne kupwanija ne pa mfulo mizo yonso ibidi kudi Leza mu umbidi umo kupityila ku mutyi wa masusu,*+ mwanda waipaile lwana+ kupityila kudi aye mwine. 17 Kadi waile wemusapwila myanda miyampe ya ndoe banwe badi bekele kulampe, ne kusapula ndoe ku boba badi kubwipi, 18 mwanda kupityila kudi aye, batwe ba mu mizo yonso ibidi, tudi na bwanapabo bwa kufwena Tata na mushipiditu umo.

19 Nanshi, kemukidipo beni nansha bantu ba kungi,+ ino mwi bana ba kibundi+ pamo na bajila kadi mwi ba mu njibo ya Leza,+ 20 ne kadi mwi bobakwe pa kyalwilo kya batumibwa ne bapolofeto,+ ino Kidishitu Yesu mwine ye dibwe dya difinko dya kyalwilo.+ 21 Mu bumo nandi, kyūbakwa kyonso kituntulu, byokidi kibambakanibwe pamo senene,+ kyendanga kilepa ke tempelo ijila ya Yehova.*+ 22 Mu bumo nandi, banwe nenu mūbakwanga pamo ke kifuko kya kwikala’mo Leza mu mushipiditu.+

3 Pa kino, ami Polo, mukutwa+ wa Kidishitu Yesu pa mwanda wenu, banwe bantu ba mizo— 2 shi bine, mwaivwene myanda ya bukalama+ bwa kanye ka ku buntu bitupu ka Leza bwaumpelwe pa mwanda wenu, 3 amba ami nayukijibwe kifibwe kikola kupityila ku kusokwelwa, monka monalembele’byo kala mu kīpi. 4 O mwanda mwine, pomutanga’byo, mukokeja kujingulula muswelo ongivwanije kifibwe kikola+ kya Kidishitu. 5 Mu nkongo mikwabo kino kifibwe kebayukije’kyopo bana ba bantu na mokyasokwelwa pano ku batumibwa bandi bajila ne bapolofeto na mushipiditu,+ 6 amba, bantu ba mizo, mu bumo na Kidishitu Yesu ne kupityila ku myanda miyampe, bafwaninwe kwikala bampyana pamo netu, ne bipindi bya ku umbidi umo,+ ne ba kwiabila pamo netu mulao. 7 Naikele mwingidi wakyo mwendele kyabuntu kya ku bitupu kya kanye ka ku buntu bitupu ka Leza kyaumpelwe pa mwingilo wingila bukomo bwandi.+

8 Ami mutyetye kutabuka ne mutyetyetyetye mu bajila bonsololo,+ napelwe kano kanye ka ku buntu bitupu,+ amba nsapwile mizo myanda miyampe ya bupeta bwa ntanda ne miseke bwa Kidishitu 9 ne kukwasha bantu bonso bamone buludiki bwa kifibwe kikola+ kyadi kifye mudi Leza mu bula bwa bitatyi, mwine wapangile bintu byonso. 10 Kyadi namino mwanda wa amba, kupityila ku kipwilo,+ imbikalo ne lupusa bya mu bifuko bya mūlu biyukijibwe tunangu twa Leza twa miswelo ne miswelo.+ 11 I mwendele mpango ya nyeke yaakadile mudi Kidishitu,+ Yesu Mfumwetu, 12 mudi aye tunenanga namino pampikwa kafinda kadi tudi na bwanapabo bwa kufwena Leza+ na lukulupilo kupityila ku lwitabijo mudi aye. 13 Nanshi nemunena’mba kemwakilekai’byo pa mwanda wa byamalwa bintana pa mwanda wenu, ke-pantu bino’bi i ntumbo yenu.+

14 Pa uno mwanda mfukatyilanga Tata mu manwi, 15 kudi aye ko kuselele kisaka ne kisaka dijina, mūlu ne pano panshi pene. 16 Nombelanga’mba, pa bungibungi bwa ntumbo yandi, emukomeje mu muntu wenu wa munda,+ na bukomo kupityila ku mushipiditu wandi, 17 ne amba pa lwitabijo lwenu, Kidishitu ekale mu mityima yenu na buswe.+ Ikalai bāle miji+ kadi bashimatyije pa kyalwilo,+ 18 pa kusaka’mba pamo na bajila bonso mwivwanije ne pa mfulo mwikadile bunkimbwa ne bulampe ne bula bwa mūlu ne bula bwa munshi, 19 muyuke ne buswe bwa Kidishitu,+ butabukile buyuki, amba muyujibwe bā na byonso biyule bipāna Leza.

20 Nanshi aye, mwendele bukomo bwandi bwingila motudi batwe,+ mwine ukokeja kulonga bivulevule kupita ne byonso byotulomba ne byotulanga,+ 21 atumbijibwe ntumbo kupityila ku kipwilo ne kudi Kidishitu Yesu mu nkongo yonsololo nyeke ne nyekeke. Amena.

4 Nanshi, ami mukutwa+ mudi Mfumwetu, nemwisāshila’mba nangilai mobifwaninwe+ lwito lomwaityilwe, 2 na kwityepeja*+ konso ne kutalala konso, na kitūkijetyima,+ mwitūkijija mutyima na buswe banwe bene na bene,+ 3 mwielela’ko bya binebine kulama bumo bwa mushipiditu mu kijimba kya ndoe kilungila pamo.+ 4 Kudi umbidi umo,+ ne mushipiditu nao umo,+ monka momwaityilwe ku lukulupilo lumo+ lwa lwito lwenu; 5 Mfumwetu umo,+ lwitabijo lumo, lubatyijo nalo lumo; 6 Leza umo kadi Shandya bonso, udi peulu pa bonso kupityila ku bonso ne mu bonso.

7 Ino kanye ka ku buntu bitupu ketupelwe batwe bonso mungya mwapimīne Kidishitu kyabuntu kya ku bitupu.+ 8 O mwanda kinenenwe amba: “Pawakandile peulu waselele misungi; wapēne bantu bu byabuntu.”+ 9 Penepo kishima “wakandile” kishintulula namani? Kishintulula’mba watūkile ne mu bifuko bine bya munshi, ke pano pa ntanda kadi. 10 Yewa mwine watūkile ye enka aye wakandile+ peulu pa madiulu onso,+ amba ayuje bā bintu byonso.

11 Wapēne bamo bu batumibwa,+ bamo bu bapolofeto,+ bamo bu basapudi,*+ bamo bu bakumbi ne bafundiji,+ 12 pa mwanda wa kōlola* bajila, mwanda wa kwingila mwingilo, kutamija umbidi wa Kidishitu,+ 13 enka ne byotufikila batwe bonso pa bumo bwa lwitabijo ne bwa buyuki bwa binebine bwa Mwanā Leza, twikale muntu mukulwa-kala,*+ tufikile pa kimano kituntulu kifikīle’po Kidishitu. 14 O mwanda ketukifwaninwepo kwikala monka bana, basunkanibwa pamo bwa batwalwa na mantanki ne kuselelwa koku ne koku na kivula kyo-kyonso kya bufundiji+ na budimbañani bwa bantu, na budyumuku bwa kukuta nkuku ya kyongo. 15 Ino potunena bubine, tutamei na buswe mu bintu byonso mudi aye mutwe, Kidishitu.+ 16 Kwadi aye umbidi onsololo+ i mubambakanibwe pamo senene kadi wingidilanga pamo kupityila ku nungilo ya mikupa yo-yonso ileta byobya bisakwa. Shi kipindi ne kipindi kingila biyampe, kikwashanga ku kutanta kwa umbidi powitamija ao mwine mu buswe.+

17 Shi ke pano, nanena namino ne kusapula bukamoni mudi Mfumwetu amba, kemukifwaninwepo kunanga na munangila bantu ba mizo+ mu bya bituputupu bya ñeni yabo.+ 18 Ñeni yabo idi mu fukutu, kadi i basonsoloke ku būmi bwa kwa Leza, mwanda kekudipo kyobayukile, mwanda mityima yabo i myūmu.* 19 Byobajimije kala mutyima onso wa bumvu, i bepāne mu kwiendeja pampikwa bumvu*+ kebalongalonga bya disubi bya miswelo yonso na lwiso.

20 Ino banwe kemwayukilepo Kidishitu amba udi nankyo, 21 shi bine mwamwivwene ne kufundijibwa kudi aye, monka mwikadile bubine budi mudi Yesu. 22 Mwafundijibwe kuvūla bumuntu bwa kala+ bukwatañene na mwiendelejo wenu wa pa kala, bwenda bubola mwendele bya kusakasaka byabo bya kyongo.+ 23 Kadi kyaba kyonso mufwaninwe kwalamunwa kemudi bapya mu mulangilo wenu mwinemwine,*+ 24 kadi mufwaninwe kuvwala bumuntu bupya+ bwapangilwe mwendele kiswa-mutyima kya Leza mu boloke ne lulamato lwa binebine.

25 Nanshi, pano pomwafundula bongojani, nenai bubine banwe bonso umo ku mukwabo,+ mwanda twi bya ku ngitu bīlungile kimo na kikwabo.+ 26 Kalabalai, ino kemwakipyai mambo;+ kemwakashikijai dyuba mwikele’nka na bulobo;+ 27 kemwakipai Dyabola mukenga.*+ 28 Yewa wiba kakeba monka; ino engile bikomo, wingila mingilo miyampe na makasa andi,+ amba amone kintu kya kwabila’ko yewa mufudilwe.+ 29 Kinenwa kibole kekyakatamba mu kyakanwa kyenu,+ ino enka kyokya kiyampe mwanda wa kūbaka pokifwaninwe, amba kipāne kintu kya kamweno ku ba kwivwana’kyo.+ 30 Ne kadi, kemwakafītyijai mushipiditu ujila wa Leza mutyima,*+ owa omwatūdilwe nao kiyukeno+ mwanda wa difuku dya kunyongololwa na kinkūlwa.+

31 Fundulai komudi miswelo yonso ya bululu bubibubi,+ bulobo, bukalabale, kwela mabila, ne binenwa bya mutonko,+ pamo ne bintu byonso bibi.+ 32 Ino ikalai na kanye banwe bene na bene, ba mutyima wa lusalusa,+ mwilekela na mutyima umo banwe bene na bene monka mwemulekele Leza na mutyima umo ponka padi Kidishitu.+

5 Nanshi iulai Leza,+ pamo bwa bana baswedibwe, 2 kadi nangilai nyeke mu buswe,+ monka mwetusanshilwe*+ ne Kidishitu, wepāna pa mwanda wetu* bu kyamulambu ne kitapwa, mwenye mulumbuluke kudi Leza.+

3 Busekese* ne miswelo yonso ya disubi nansha makomwa-meso kebyakitelwa nansha kutelwa kwine umbukata mwenu,+ monka mobifwaninwe bajila;+ 4 nansha mwikadilo wa bumvu nansha mīsambo ya bulembakane nansha mizaulo ya kiboja+—bintu byampikwa kufwaninwa—poso kufwija’ko.+ 5 Mwanda muyukile’kyo, mujingulwile’kyo banwe bene, amba i kutupu muntu wa busekese*+ nansha wa disubi nansha wa makomwa-meso,+ ko kunena’mba utōta bilezaleza, udi na kyakapyana mu Bulopwe bwa Kidishitu ne bwa Leza.+

6 Muntu nansha umo kakemongola na binenwa bya bitupubitupu, mwanda pa mwanda wa bintu bya uno muswelo bukalabale bwa Leza bukafikilanga bana ba kubulwa kikōkeji. 7 Nanshi kemwakipwanai nabo; 8 mwanda dibajinji mwadi fukutu, ino pano kemudi kitōkeji+ mudi Mfumwetu.+ Nangai nyeke bu bana ba kitōkeji, 9 mwanda kipa kya kitōkeji i miswelo yonso ya buyampe ne boloke ne bubine.+ 10 Tadijai’nka kutadija byobya bitabijibwa+ na Mfumwetu; 11 kadi lekai kwikuja mu mingilo ya fukutu yampikwa bipa;+ inoko sokwelai’yo patōka. 12 Mwanda bintu byobalonga mu bufyafya bidi’nka ne bumvu kwibitela. 13 Ino bintu byonso bisokolwa patōka* bilombolwanga patōka na kitōkeji, mwanda kintu kyonso kilombolwa patōka i kitōkeji. 14 O mwanda i kinenwe amba: “Languka, abe ulēle tulo, kadi būka mu bafwe,+ ne Kidishitu nandi ukakumunikila.”+

15 Nanshi tadijai’nka kutadija bya binebine amba muswelo omunanga ke pamopo bwa bampikwa tunangu, aa, ino i pamo bwa ba tunangu, 16 mwingidija biyampe shē kitatyi kyenu,*+ mwanda mafuku i mabi. 17 Pa kino lekai kwikala bampikwa ñeni, ino jingululai nyeke kiswa-mutyima kya Yehova* i kyepi.+ 18 Kadi kemwakikolwai vinyu,+ mo mudi bya bulongelonge,* ino yulwai kyaba kyonso mushipiditu. 19 Mwisambei umo ku mukwabo* na ñimbo ya mitōto, mitendelo kudi Leza, ne ñimbo ya ku mushipiditu, mwimba+ ne kutendela Yehova* na buimba mu mityima yenu,+ 20 mufwija’ko+ mafuku onso Leza wetu, Tata pa mwanda wa bintu byonso, mu dijina dya Mfumwetu Yesu Kidishitu.+

21 Mwikōkelei bininge banwe bene na bene+ mu kutyina Kidishitu. 22 Bakaji bafwaninwe kukōkela bininge balume babo+ bwa kudi Mfumwetu, 23 mwanda mulume i mutwe wa mukajandi+ monka mwikadile Kidishitu mutwe wa kipwilo,+ aye byadi umpandiji wa uno umbidi. 24 I bine, monka mukōkelele bininge kipwilo kudi Kidishitu, ne bakaji nabo bafwaninwe kukōkela bininge balume babo mu byonso. 25 Banwe balume, sanswai nyeke bakaji benu,+ monka mwasanshilwe Kidishitu kipwilo, wepāna ne kwipāna pa mwanda wakyo,+ 26 amba ekipandule, ekitōkeje na kwikyoija mema na kinenwa,+ 27 amba afikije kipwilo kwadi aye mwine mu buya bwakyo bwa dyangi, pampikwa dikeme nansha mukafi nansha kintu kidi namino,+ ino kijila kadi kyampikwa kakoba.+

28 Mo monka, balume nabo bafwaninwe kusanswa bakaji babo pamo bwa imbidi yabo abo bene. Muntu usenswe wandi mukaji wisenswe aye mwine, 29 mwanda i kutupu muntu ushikilwe umbidi* wandi aye mwine, ino wiudishanga ne kwiulela na buswe, monka mulongelanga Kidishitu ku kipwilo, 30 mwanda batwe twi bipindi bya ku umbidi wandi.+ 31 “O mwanda mwine mwana-mulume ukashiya shandi ne inandi kadi ukalamata* wandi mukaji, penepo abo babidi bakekala ngitu imo.”+ 32 Kino kifibwe kikola+ i kikatampe. Pano nesambilanga pa mwanda wa Kidishitu ne kipwilo.+ 33 Inoko, muntu ne muntu momudi’mo ufwaninwe kusanswa mukajandi+ mwaesanshilwe aye mwine; mukaji nandi ufwaninwe kulēmeka mulumyandi bikatampe.+

6 Banwe bana, kōkelai bambutwile benu+ mu bumo na Mfumwetu, mwanda kino’ki i kyoloke. 2 “Lēmeka shobe ne inobe”+ yo mbila mibajinji ne mulao ponka: 3 “Amba bikwendekele biyampe* kadi wikale mafuku mangi pano pa ntanda.” 4 Banwe bashabo nenu, kemwakilobejai benu bana,+ ino mwibatamijei na kwibalemununa+ ne kwibadyumuna bidyumu* bya Yehova.*+

5 Banwe bapika, kōkelai bamfumwenu+ ba pano panshi,* na moyo ne luzakalo mu bubinebine bwa mityima yenu pamo bwa kudi Kidishitu, 6 ke’nkapo pomutalwa mwanda’tu wa kusangaja bantu,*+ ino i pamo bwa bapika ba Kidishitu balonga kiswa-mutyima kya Leza na muya onso.*+ 7 Ingilai bu bapika na milangwe miyampe, bwa banwe bengidila Yehova,*+ ke bantupo, aa, 8 mwanda muyukile amba kiyampe kyonso kilonga muntu, shi kika shi kika, ukalubwilwa’kyo na Yehova,*+ ekale umpika nansha mwanapabo. 9 Kadi, banwe bamfumwabo nenu, mwibalongelei nyeke muswelo umo onka, lekai kwibazakaja, mwanda muyukile amba Mfumwandya bonso, ne abo ne banwe, udi mūlu,+ kadi kwadi kekudipo mboloji.

10 Shi ke pano, mwikomejei+ nyeke mudi Mfumwetu ne mu bukomokomo bwa buninge bwandi. 11 Vwalai bivwalwa byonso bya bulwi+ bya kwa Leza amba mubwanye kwimanija pototo ku bilongwa bya bukosoke* bya Dyabola; 12 mwanda bulwi botudi nabo,*+ ke bwa kulwapo na mashi ne ngitu, aa, ino i na maludiki, na ba lupusa, na bendeji ba ntanda ya ino fukutu, ne na bibumbo bya mishipiditu mibi+ mu bifuko bya mūlu. 13 O mwanda mwine tekunai bivwalwa byonso bya bulwi bya kwa Leza,+ amba muyuke kwimanija mu difuku dibi, kadi shi mubapu kuvuija kintu ne kintu, mwimanije pototo.

14 Nanshi, imanijai pototo koku mwikutyile mukaba wa bubine mu kifuka,+ ne kuvwala kilama-kyadi kya boloke,+ 15 ne kuvwala ku maulu bilato bya mutyima wa kusapula myanda miyampe ya ndoe.+ 16 Kutentekela pa bino, tekunai ngabo mikatampe ya lwitabijo,+ mine yomukabula nayo miketo* yonso ya mudilo ya yewa mubi.+ 17 Kadi, itabijai kilama-mutwe kya lupandilo,+ ne kipete kya mushipiditu, ko kunena’mba kinenwa kya Leza,+ 18 koku mulombela nyeke milombelo ya miswelo yonso+ ne kuzenza kyaba kyonso mu mushipiditu.+ Kadi pa kino kemwakilālai nansha dimo, ino zenzai mu milombelo pa mwanda wa bajila bonso. 19 Lombelai ne pa mwanda wami, amba binenwa bimpebwe pongasama kyakanwa kyami, amba mbwanye kwisamba pampikwa moyo pa kuyukanya kifibwe kikola kya myanda miyampe,+ 20 kyoñingidila bu mukendi*+ mu miyololo, kadi amba nesambe’kyo pampikwa moyo, monka momfwaninwe kwisambila’kyo.

21 Ino kadi pa kusaka muyuke myanda yami ne mongikadile, Tekikusa,+ mwanetu muswedibwe kadi mwingidi wa kikōkeji mudi Mfumwetu, ukemuyukija bintu byonso.+ 22 O mwanda mwine yao nemutumina’ye, amba muyuke motwikadile kadi amba emusenge ku mityima.

23 Banabetu bekale na ndoe ne buswe pamo ne lwitabijo bitamba kudi Leza Tata ne kudi Mfumwetu Yesu Kidishitu. 24 Kanye ka ku buntu bitupu kekale na boba bonso basenswe Mfumwetu Yesu Kidishitu buswe bwa kubulwa koneka.