MUKANDA KUDI BENE KOLOSE
1 Ami Polo, mutumibwa wa Kidishitu Yesu pa kiswa-mutyima kya Leza, ne Temote+ mwanetu, 2 kudi banabetu bajila kadi bakōkele mu bumo na Kidishitu badi mu Kolose:
Kanye ka ku buntu bitupu ne ndoe bitamba kudi Leza Tata wetu bikale nenu.
3 Mafuku onso tufwijanga’ko Leza Shandya Mfumwetu Yesu Kidishitu potwimulombelelanga, 4 mwanda twaivwene lwitabijo lwenu mudi Kidishitu Yesu ne buswe bomusenswe bajila bonso 5 mwanda wa lukulupilo lobemulamīne mūlu.+ Mwaivwene dibajinji myanda ya luno lukulupilo mu musapu wa bubine wa myanda miyampe 6 yafikile komudi. Monka mupelanga myanda miyampe bipa ne kutama mu ino ntanda yonso,+ mo monka moilongela ne mu bukata mwenu, tamba difuku dyomwaivwene ne kuyukidija binebine kanye ka ku buntu bitupu ka Leza mu bubine. 7 E ko kemufundije Epafalasa+ mukwetu umpika muswedibwe, mwingidi mukōkele wa Kidishitu waingile pa kyetu kyaba. 8 Kadi wetulombwele buswe bwenu bwa ku mushipiditu.*
9 O mwanda kadi, tamba difuku dyotwaivwene namino, ketwalekelepo nansha dimo kwimulombelela+ ne kulomba’mba muyulwe buyuki bwa binebine+ bwa kiswa-mutyima kyandi mu tunangu tonso ne kwivwanija kuletwa na mushipiditu,+ 10 amba munangile mwa kufwaninwa Yehova* mwanda wa kumusangaja ne pa mfulo koku mwenda mupa bipa mu mwingilo onso muyampe ne kutama mu buyuki bwa binebine bwa Leza;+ 11 Kadi mukomejibwe na bukomo bonso mwendele bukomokomo bwandi bwa ntumbo+ amba mūminine ne pa mfulo na kitūkijetyima ne nsangaji, 12 pomufwija’ko Tata, mwine wemukweshe mwikale bafwaninwe kupebwa bupyani pamo na bajila+ badi mu kitōkeji.
13 Wetukūdile ku lupusa lwa fukutu+ ne kwitutundulwila mu Bulopwe bwa wandi Mwana muswedibwe, 14 mudi aye twi banyongololwe na kinkūlwa, ke kulekelwa kwa bubi bwetu kadi.+ 15 Aye i kyelekejo kya Leza wampikwa kumweka,+ umbedi wa bipangwa byonso;+ 16 mwanda kupityila kudi aye bintu bikwabo byonso byāpangilwe mūlu ne pano pa ntanda pene, bintu bimweka ne bintu byampikwa kumweka,+ shi mpona, shi bufumu, shi imbikalo nansha lupusa. Bintu bikwabo byonso byāpangilwe kupityila kudi aye+ ne mwanda wa aye. 17 Ne kadi, udi kumeso kwa bintu bikwabo byonso,+ kadi kupityila kudi aye bintu bikwabo byonso byāpangilwe, 18 kadi aye i mutwe wa umbidi, ke kipwilo kadi.+ Aye i ngalwilo, umbedi kusanguka mu bafwe,+ amba ekale mubajinji mu bintu byonso; 19 mwanda Leza waloelelwe bintu byonso bikale mwadi biyule bā,+ 20 kadi kupityila kudi aye apwanye kwadi aye mwine bintu bikwabo byonso+ na kuleta ndoe ponka pa mashi+ awamwangile pa mutyi wa masusu,* bintu bya pano panshi ne bintu bya mūlu bine.
21 Bine, banwe badi basonsoloke kadi balwana mwanda ñeni yenu yadi itele ku mingilo mibi, 22 pano wemupwanya kupityila ku umbidi wa ngitu wa uno’u ponka pa lufu lwandi, amba emufikije ku meso andi mwikele bajila kadi bampikwa kakoba ne bampikwa mambo a kutopekwa—+ 23 i amo, amba mwikale nyeke mu lwitabijo,+ bashimatyije pa kyalwilo,+ baninge+ kadi bampikwa kusāsuka ku lukulupilo lwa yoya myanda miyampe yomwaivwene, yasapwilwe mu bipangwa byonso bidi munshi mwa diulu.+ Ami Polo, naikele kendi mwingidi wa ino myanda miyampe.+
24 Pano nsangalanga mu masusu ami pa mwanda wenu,+ kadi ntanwanga na byamalwa bya Kidishitu byonakibudilwe mu ngitu yami pa mwanda wa umbidi wandi,+ ke kipwilo kadi.+ 25 Ami naikele kendi mwingidi wa kino kipwilo mungya bukalama+ butamba kudi Leza bwaumpelwe pa mwanda wenu amba nsapule mwanda wa Leza ne pa mfulo, 26 kifibwe kikola+ kyadi kifye tamba ku ngikadilo ya bintu ya kala*+ ne ku nkongo ya kala. Ino pano kibasokwelwa bajila bandi,+ 27 bobaloelelwe kudi Leza kuyukanya mu mizo bupeta bwa ntumbo bwa kino kifibwe kikola,+ ke Kidishitu mu bumo nenu kadi, lukulupilo lwa ntumbo yandi.+ 28 Ye aye otusapula’u, tudyumuna muntu ense ne kufundija muntu ense mu tunangu tonso, amba batwe tufikije muntu ense mubwane mu bumo na Kidishitu.+ 29 O mwanda ñingilanga bininge, neelela’ko na bukomo bwandi, bwine bwingila mondi na bukomo.+
2 Mwanda nsaka muyuke mwikadile bulwi bukatampe bonemulwila banwe ne bene Laodesea+ ne boba bonso kebaumwene.* 2 I pa mwanda wa mityima yabo isengibwe+ kadi babambakanibwe pamo senene mu buswe+ ne amba bekale na bupeta bonso butamba ku kikulupiji kikatampe kya ñeni yabo, mwanda wa bekale na buyuki bwa binebine bwa kifibwe kikola kya Leza, ko kunena’mba, Kidishitu.+ 3 Mudi aye mo mufilwe senene byabulēme byonsololo bya tunangu ne bya buyuki.+ 4 Nanena namino kutyina’mba kwakekala muntu wa kwimongola na binenwa bya kwimunekenya. 5 Nansha byonkidipo nenu mu ngitu, ino ngidi nenu mu mushipiditu, nsangalanga pa kumona momwikadile mu ndudi miyampe+ ne mukomene lwitabijo lwenu mudi Kidishitu.+
6 Nanshi, monka momwaitabijije Kidishitu Yesu Mfumwetu, nangilai nyeke mu bumo nandi, 7 mwikele bāle miji, bōbakwe mudi aye,+ kadi bemanije mu lwitabijo,+ enka momwafundijibwe, koku muyudilwe kufwija’ko.+
8 Tadijai kutyina’mba kwakekala muntu wa kwimukwata bu misungi* na tunangu twa ino ntanda* ne na bongojani bwa bituputupu+ mwendele kishi kya bantu, mwendele bintu bya kyalwilo bya ino ntanda, ke mwendelepo Kidishitu, aa; 9 mwanda mudi aye mo mwikele ngikadila yonso ya Leza miyule bā mu muswelo wa ngitu.+ 10 O mwanda banwe mubaikala na bintu biyule bā kupityila kudi aye, mutwe wa buludiki ne lupusa lonso.+ 11 Byomwapwene nandi, mwatwejibwe ne kwisao, ke disaopo dya kutwejibwa na makasa dya kuvūla umbidi wa ngitu,+ ino i disao dya Kidishitu.+ 12 Mwanda mwajīkilwe pamo nandi mu lubatyijo lwandi,+ kadi byomwapwene nandi, mwasangwilwe+ banwe bonso pamo pa lwitabijo lwenu mu mwingilo wa bukomo wa Leza, mwine wamusangwile mu bafwe.+
13 Ne kadi, nansha byomwadi bafwe mu bilubo byenu ne mu ngikadilo ya kubulwa kutwela kwisao ku ngitu yenu, Leza wemupele būmi pamo nandi.+ Wetulekela na mutyima tō bilubo byetu byonsololo+ 14 ne kubudidila kilembwa kya ku makasa+ mwadi mbila+ ne kyadi kilwa netu.+ Wekifundwidile kulampe na kwikipopela ku mutyi wa masusu.*+ 15 Wavūdile maludiki ne ba lupusa mutaka, webalombola patōkelela amba i banekenibwe,+ wibendeja mu mulongo wa bushindañani kupityila ku ao.*
16 Nanshi, muntu nansha umo kakimutyibila banwe mambo pa byobya byomudya ne byomutoma+ nansha pa kulēmeka masobo nansha kweji katenta+ nansha sabato.+ 17 Bino’bi i munjiñininya wa bintu bīya kumeso,+ ino bintu binebine i bya Kidishitu.+ 18 Nanshi kekwakikala muntu wa kwimubudija+ mpalo, muntu usangela kwityepeja kwa bubela ne mutōtelo kampanda wa bamwikeulu, “ulēmenena ku”* bintu byamona. Witatulanga pampikwa ne buluji bwine bushilakane pa mifwatakanyo yandi ya bungitu, 19 kadi kakwatyijepo mutwe,+ mwine upa umbidi onso byoubudilwe ne kwiubambakanya pamo senene na nungilo ya mikupa ne mijilo yao ne kwiutamija na mutamino utamba kudi Leza.+
20 Shi mwafwile pamo na Kidishitu mu bintu bya kyalwilo bya ino ntanda,+ penepo i kika kyomwikadile bwa banwe bakidi ba ino ntanda, mukōkela dikwabo mbila ya amba:+ 21 “Kokikwata, kokitompa, kokitenga,” 22 itala bintu byonekanga byonso pa kupwa kwibilonga, mwendele mbila ne bufundiji bwa bantu?+ 23 Nansha bino’bi byobimweka bu bya tunangu mu mutōtelo witongela muntu aye mwine ne kwityepeja kwa bubela, kumwesha umbidi malwa,+ kebidipo na mvubu pa kulwa na bya kusangaja ngitu.
3 Inoko, shi mwasangwilwe pamo na Kidishitu,+ kimbai nyeke bintu bya kokwa kūlu, kwine kushikete Kidishitu ku kuboko kwa lundyo kwa Leza.+ 2 Tai nyeke mityima ku bintu bya kokwa kūlu,+ ke ku bintupo bidi pano panshi.+ 3 Mwanda mwafwile, kadi būmi bwenu bwafilwe pamo na Kidishitu mu bumo na Leza. 4 Kitatyi kikasokolwa Kidishitu, būmi bwetu,+ penepo nenu mukasokolwa pamo nandi mu ntumbo.+
5 Nanshi, ipayai bipindi bya ku ngitu yenu+ bidi pano panshi mu myanda ya busekese,* disubi, bilokoloko bya busekese bya munyanji,+ kusakasaka kubi, ne makomwa-meso, nao i kutōta bilezaleza. 6 Pa mwanda wa bino bintu’bi bukalabale bwa Leza bwabo bwiya. 7 E monka momwadi mwikadile* ne banwe bene mu būmi bwenu bwa pa kala.*+ 8 Ino pano mufwaninwe kwibifundwila byonso kulampe nenu: bukalabale, bulobo, bubi,+ binenwa bya mutonko,+ ne mīsambo ya kiboja+ mu kyakanwa kyenu. 9 Kemwakībepelai banwe bene na bene.+ Vūlai bumuntu bwa* kala+ ne bilongwa byabo, 10 ino vwalai bumuntu bupya,+ bwalamunwanga ke bupya kupityila ku buyuki bwa binebine mwendele kyelekejo kya Mwine webupangile,+ 11 Pano kekukidipo Mungidiki nansha Muyuda, disao nansha kubulwa disao, mweni, Musesha,* umpika nansha mwanapabo; ino Kidishitu i bintu byonso kadi monsomonso.+
12 Mo monka, byomudi batongwe ba Leza,+ bajila kadi baswedibwe, vwalai kisanso kya mutyima wa lusalusa,+ kanye, kwityepeja,*+ kutalala,+ ne kitūkijetyima.+ 13 Endelelai kwitūkijija mityima banwe bene na bene ne kwilekela na mutyima umo+ nansha shi kudi udi na mwanda na mukwabo.+ Monka mwemulekēle Yehova* na mutyima umo, nenu mufwaninwe kulongela monka.+ 14 Ino kutentekela pa bino byonso’bi, vwalai buswe,+ mwanda abo i kijimba kibwaninine kya bumo.+
15 Kadi, ndoe ya Kidishitu imubikale mu mityima yenu,*+ mwanda mwaityilwe ku ino ndoe mu umbidi umo. Ne kadi ikalai na mutyima wa kufwija’ko. 16 Mwanda wa Kidishitu wikale muyule momudi na tunangu tonso. Mwifundijei ne kwikankamika* nyeke banwe bene na bene na ñimbo ya mitōto,+ mitendelo kudi Leza, ñimbo ya ku mushipiditu imbwa na kufwija’ko,* mwimbila Yehova* mu mityima yenu.+ 17 Byonso byomulonga mu binenwa nansha mu bilongwa, longai byonso mu dijina dya Mfumwetu Yesu, mufwija’ko Leza Tata monka mudi aye.+
18 Banwe bakaji, kōkelai bininge balume benu,+ monka mokifwaninwe mudi Mfumwetu. 19 Banwe balume, sanswai nyeke bakaji benu+ kadi kemwakibalobelai bulobo bulula bululu.*+ 20 Banwe bana, kōkelai bambutwile benu mu byonso,+ mwanda kino’ki kisangajanga Mfumwetu. 21 Banwe bashabo, kemwakikolomonai* benu bana,+ kutyina’mba bakanyoñama pa mityima.* 22 Banwe bapika, kōkelai mu byonso bamfumwenu ba pano panshi,*+ ke’nkapo pobemutala, mwanda’tu wa kusangaja bantu,* ino i na bubinebine bwa mutyima, koku mwakaminwe Yehova.* 23 Byonso byomulonga, longai’byo na muya* onso bwa banwe balongela’byo Yehova,*+ ke bantupo, aa, 24 mwanda muyukile amba i kudi Yehova* komukatambula bupyani bu mpalo.+ Ingidilai Mfumwetu Kidishitu bu bapika. 25 I bine yewa ulonga bibi ukalubwilwanga pa mwanda wa bibi byalongele,+ kadi kekudipo mboloji nansha dimo.+
4 Banwe bamfumwabo, longelai bapika benu bintu na boloke ne mobyendele, pa kuyuka’mba banwe nenu mudi na Mfumwenu mūlu.+
2 Takamanai mu milombelo,+ tai’mo mityima nyeke koku mufwija’ko.+ 3 Kadi mwitulombelelai’ko netu,+ amba Leza ashitwile kinenwa kibelo, mwanda wa tusapule kifibwe kikola kya Kidishitu, kine kyonkutyīlwe mu kifungo,+ 4 ne amba nsapule’kyo patōkelela mobifwaninwe.
5 Nangai nyeke na tunangu ku boba ba panja, mwingidija biyampe shē kitatyi kyenu.*+ 6 Binenwa byenu bikale kyaba kyonso bilumbuluke, byelwe’mo mwepo,+ amba muyuke mwa kulondolwela muntu ne muntu.+
7 Tekikusa,+ mwanetu muswedibwe, mwingidi mukōkele kadi umpika pamo netu mudi Mfumwetu, ukemulombola myanda yami yonso. 8 Yao nemutumina’ye amba muyuke motwikadile, ne amba emusenge ku mityima. 9 Usa kwiya na Onesemusa,+ mwanetu mukōkele kadi muswedibwe, wa mwenu; bakemulombola bintu byonso bilongeka kuno’ku.
10 Aditakusa,+ musungi mukwetu wemwimuna, pamo ne Mako+ mwanabo na Banabasa (mwine obemulombwele amba mutundailei+ shi waiya komudi), 11 ne Yesu witwa bu Yusutusa, ba mu boba batwejibwe kwisao. Enka bano’ba bo bengidi nami pa mwanda wa Bulopwe bwa Leza, kadi abaikala nsulo ya busengi bukatampe* kondi. 12 Epafalasa,+ wa mwenu kadi umpika wa Kidishitu Yesu, wemwimuna. Ulombelanga mafuku onso na kininga pa mwanda wenu, amba mfulo mfulō nenu mwikale babwane ne na kusumininwa binebine mu kiswa-mutyima kya Leza kyonso. 13 Mwanda nasapula bukamoni pa mwanda wandi amba uloñanga bukomo bukatampe pa mwanda wenu ne pa mwanda wa boba ba mu Laodesea ne mu Hielapodi.
14 Luka,+ muñanga muswedibwe wemwimuna, ne Demasa+ nandi wemwimuna. 15 Ñimwinei banabetu ba mu Laodesea ne Nyimfasa ne kipwilo kidi mu yandi njibo.+ 16 Kadi shi uno mukanda ubatangwe umbukata mwenu, kwatai’ko milangwe mwanda wa ukatangwe+ ne mu kipwilo kya bene Laodesea kadi amba banwe nenu mutange wa ku Laodesea. 17 Ne kadi, lombolai Akipusa+ amba: “Tá mutyima, amba uvuije mwingilo owaitabije mudi Mfumwetu.”
18 Luno i lwimu lwami ami Polo, lonalemba na makasa ami.+ Vulukai kukutwa konkutyilwe mu kifungo.+ Kanye ka ku buntu bitupu kekale nenu.
Kishima pa kishima i, “mu mushipiditu.”
Tala Mbwejo A5.
Tala Nshintulwilo ya Bishima.
Nansha’mba “bitatyi bya kala.” Tala Nshintulwilo ya Bishima.
Kishima pa kishima i, “kebamwene mpala yami mu ngitu.”
Nansha’mba “kwimusela pamo bwa kikwatwa kyandi.”
Nansha’mba “filozofi.”
Tala Nshintulwilo ya Bishima.
Bibwanika padi i, “kudi aye.”
I biselwe ku bisela bya bajentaila bya bintu bifyame.
Mu Kingidiki i, porneia. Tala Nshintulwilo ya Bishima.
Nansha’mba “momwadi munangila.”
Nansha’mba “pomwadi na būmi bwa owa muswelo.”
Kishima pa kishima i, “muntu wa.”
“Musesha” ufunkila pa muntu wampikwa kushidimuka.”
Nansha’mba “mutyima wa kwipēleka.”
Tala Mbwejo A5.
Nansha’mba “iludike mityima yenu.”
Nansha’mba “kwidyumuna.”
Nansha’mba “na lusa.”
Tala Mbwejo A5.
Nansha’mba “kemwakibasanshijai.”
Nansha’mba “kemwakisombai; kemwakilobejai.”
Nansha’mba “bakatyumukwa mutyima.”
Kishima pa kishima i, “ba ku ngitu.”
Kishima pa kishima i, “ke na mingilopo ya meso bwa bantu basangaja bantu.”
Tala Mbwejo A5.
Tala “Muya,” ku Nshintulwilo ya Bishima.
Tala Mbwejo A5.
Tala Mbwejo A5.
Kishima pa kishima i, “mupota kitatyi kitungwe.”
Nansha’mba “bukwashi bukankamika.”