MUKANDA UMBAJINJI KUDI BENE TESALONIKA

1 Ami Polo ne Shivanusa*+ ne Temote,+ ku kipwilo kya bene Tesalonika badi mu bumo na Leza Tata ne Mfumwetu Yesu Kidishitu:

Kanye ka ku buntu bitupu ne ndoe bikale nenu.

2 Tufwijanga’ko Leza mafuku onso potwimutelanga banwe bonso mu milombelo yetu,+ 3 mwanda tuvulukanga nyeke mwingilo wa lwitabijo lwenu, kususuka komususuka na mingilo na buswe ne kūminina kwenu pa mwanda wa lukulupilo lwenu+ mudi Mfumwetu Yesu Kidishitu ku meso a Leza Tata wetu. 4 Mwanda, banwe banabetu baswedibwe na Leza, tuyukile amba i mwimutonge, 5 mwanda myanda miyampe yotusapula keyemufikīlepo na binenwa kete, ino i ne na bukomo ne mushipiditu ujila ne kusumininwa kukatampe, monka momuyukile motwaikadile mu bukata mwenu pa mwanda wa kamweno kenu. 6 Kadi mwetwiwile batwe+ ne Mfumwetu,+ pa kumona’mba mwaitabije kinenwa mu byamalwa bivule+ na nsangaji ya mushipiditu ujila, 7 penepa mwaikala kimfwa ku betabije bonso ba mu Masedonya ne mu Akaya.

8 Mwanda mwine i uno, kinenwa kya Yehova* kyomwasapwile kekyaivwanikilwepo enka mu Masedonya ne mu Akaya kete, ino lwitabijo lwenu mudi Leza lubasambakana konsokonso,+ ketukidipo ne kya kunena kine. 9 Mwanda abo bene basapulanga nyeke muswelo otwemutene dibajinji ne momwaalamukīle kudi Leza mwavundamina bilezaleza byenu+ kemwingidila Leza mūmi kadi wa bine bu bapika, 10 ne kukungila wandi Mwana utamba mūlu,+ waasangwile mu bafwe, ke Yesu kadi, mwine witukūla ku bukalabale bwiya.+

2 A banabetu, banwe bene muyukile bine amba, bupempudi botwemupempwile kebwadipo bwa bitupu.+ 2 Mwanda monka momuyukile, nansha byotwasusukile bidi ne kumweshibwa malwa mu Fidipai,+ twatakamene pampikwa moyo* mudi Leza wetu kwimusapwila myanda miyampe ya Leza+ mu lwana lukatampe.* 3 Mwanda kukankamika kotwimukankamika kekutambilepo ku kilubo nansha ku disubi nansha na bongojani, 4 ino monka motwaitabijibwe na Leza kupebwa kiselwa kya myanda miyampe, e monka motunenena, ke mwandapo wa kusangaja bantu, aa, ino i kusangaja Leza, mwine ubandaulanga mityima yetu.+

5 Bine, muyukile amba ketwemufukwilepo nansha dimo mu binenwa nansha kwimwekeja bya bubela na mutyima wa makomwa-meso;+ Leza mwine i kamoni! 6 Kadi ketwadipo tukimba ntumbo ya bantu, shi itamba komudi nansha ku bantu bakwabo, nansha byotwadi tubwanya kwikala kiselwa kilēma bininge byotudi batumibwa ba Kidishitu.+ 7 Inoko, twadi batūkanye mu bukata mwenu, monka mwikadilanga inabana wamisha ulelele senene* bandi bana. 8 O mwanda, byotwimusenswe kisanso kya ku mutyima, twadi tusumininwe* kwimupa, ke’nkapo myanda miyampe ya Leza kete, ino i ne batwe bene,*+ mwanda mwi baswedibwe betu.+

9 Na bubine, banwe banabetu, muvulukile mingilo ya masusu ne ipungija yotwaingile. Twadi twingila bufuku ne dyuba kutyina’mba twakekala kiselwa kya kulēmenena muntu kampanda mu bukata mwenu+ potwadi twimusapwila myanda miyampe ya Leza. 10 Mwi batumoni, ne Leza mwine kumo, ba motwadi twikadile na lulamato ne boloke ne bampikwa kutopekwa komudi banwe betabije. 11 Muyukile biyampe amba twadi twimukankamika nyeke ne kwimusenga ne kwimusapwila umo ne umo+ bukamoni, monka mulongelanga shabana+ na bandi bana, 12 amba munangile nyeke mwa kufwaninwa Leza,+ mwine wimwita ku Bulopwe+ ne ku ntumbo yandi.+

13 I bine, o mwanda mwine tufwijanga’ko Leza ne kuleka’byo mpika,+ mwanda pomwatambwile kinenwa kya Leza, kyomwaivwene kotudi, mwaitabije’kyo, ke bu kinenwapo kya bantu, aa, ino i monka mokikadile binebine, bu kinenwa kya Leza, kingila ne momudi banwe betabije. 14 Mwanda, banwe banabetu, mwaiwile bipwilo bya Leza mu bumo na Kidishitu Yesu bidi mu Yudea, mwanda banwe mwasusukile ku makasa a bantu ba mu ntanda yenu+ monka mobasusukila nabo ku makasa a Bayuda, 15 bantu baipaile’nka ne Mfumwetu Yesu+ ne bapolofeto kadi betupangapanga ne batwe bene.+ Ne kadi, kebasangajangapo Leza, ino balwanga na tumweno twa bantu bonso, 16 pobakimba kwitukankaja kusapwila bantu ba mizo amba nabo bapande.+ Mu uno muswelo bayujanga bā mafuku onso mudingo wa bubi bwabo. Ino ku mfulo bukalabale bwandi bubaiya pobadi.+

17 Ino, banwe banabetu, mu kitatyi kityetye kyotweshile nenu* (mu ngitu, ke mu mityima yetupo), byotwadi twabila bininge, twalongele bukomo bukatampe mpata bwa kwimona nenu mpala na mpala.* 18 O mwanda twasakile kwiya komudi; i amo, ami Polo, natompele kwiya musunsa mubajinji ne wa bubidi; ino Satana wetujikile dishinda. 19 Mwanda le lukulupilo lwetu nansha nsangaji yetu nansha kilukwa kyetu kya kusepelela ku meso a Mfumwetu Yesu mu kitatyi kya kwikala’po kwandi i byepi? Le na bubine ke banwepo?+ 20 Bine banwe yo ntumbo ne nsangaji yetu.

3 O mwanda potwakomenwe kūminina kino, twalangile amba i kipite buya kushala bunka mu Atene;+ 2 ebiya twatuma Temote,+ mwanetu kadi mwingidi wa Leza* mu myanda miyampe ya Kidishitu, mwanda wa kwimukankamika* ne kwimusenga pa mwanda wa lwitabijo lwenu, 3 amba muntu nansha umo wakatenkanibwa* na bino byamalwa. Mwanda banwe bene muyukile amba ketubwanyapo kunyema kufikilwa na bino bintu.*+ 4 Mwanda potwadi nenu, twadi twimulombolanga kala’mba tukatanwanga na byamalwa, kadi ye byonka byalongeka, enka momuyukile kala.+ 5 O mwanda mwine, ponakomenwe kūminina kino, natumenye mwa kuyukila kikōkeji kyenu,+ uyuka padi Dyabola+ wemutompele mu muswelo kampanda, ne mingilo yotwasusukile nayo yakekala ya bitupu.

6 Ino pano Temote waiya kuno kotudi utamba kwako+ kadi wetusapwila myanda miyampe ya kikōkeji ne buswe bwenu, amba mukituvulukanga kyaba kyonso na kisanso, kadi amba mwabilanga bininge kwitumona monka motwabidila netu kwimumona. 7 O mwanda mwine, banwe banabetu, mu tusua* ne mu byamalwa byetu byonso, twasengelwe pa mwanda wenu ne pa kikōkeji kyomulombola.+ 8 Mwanda tukomejibwanga* shi banwe mwimanije pototo mudi Mfumwetu. 9 Mwanda le tukafwija’ko Leza muswelo’ka pa mwanda wenu pa nsangaji mingi yotudi nayo ku meso a Leza pa mwanda wa banwe? 10 Tuzenzanga bufuku ne dyuba mu milombelo ne kutakamana’mba twimone nenu mpala na mpala* ne kwimupa byomubudilwe mu lwitabijo lwenu.+

11 Nanshi Leza Tata wetu aye mwine ne Mfumwetu Yesu betulongolwele dishinda dya kwiya komudi. 12 Ne kadi, Mfumwetu emutamije, bine, emuvudije, mu buswe bwa kwisanswa banwe bene na bene+ ne bantu bonso, monka motwimusanshilwe, 13 amba akankamike mityima yenu, ikale yampikwa matope mu buujila ku meso a Leza wetu+ kadi Tata pa kitatyi kya kwikala’po kwa Mfumwetu Yesu+ pamo ne bajila bandi bonsololo.

4 Shi ke pano, banwe banabetu, enka motwemulombwedile muswelo omufwaninwe kunanga mu ndudi mwanda wa kusangaja Leza,+ monka momunangilanga kala, tubemulombe ne kwimwisāshila mudi Mfumwetu Yesu amba, longai nyeke’nka namino ne pa mfulo. 2 Mwanda muyukile bulombodi* botwemupele mudi Mfumwetu Yesu.

3 Mwanda kiswa-mutyima kya Leza i kino amba, mufwaninwe kwikala bajila+ ne kwilama ku busekese.*+ 4 Muntu ne muntu mu bukata mwenu ufwaninwe kuyuka mwa kulamina umbidi wandi*+ aye mwine mu buujila+ ne bulēme, 5 ke na bilokolokopo bya busekese bya munyanji+ kadi bya makomwa-meso pamo bwa bya mizo yampikwa kuyuka Leza.+ 6 Muntu nansha umo kafwaninwepo kutabuka mikalo mifwaninwe ne kumwena mwanabo mu uno mwanda, ke-muntu Yehova* upānanga mfuto pa bino bintu byonso, enka motwemulombwedile’byo kala ne kwimudyumuna bya binebine. 7 Mwanda Leza wetwityile twikale bajila,+ ke ba disubipo, aa. 8 Nanshi yewa upela, kapelangapo muntu, ino upelanga Leza,+ mwine wimupa mushipiditu wandi ujila.+

9 Inoko, pa mwanda wa buswe bwa bu bana na bana,+ kekudipo kyomusakila twimulembele, mwanda banwe bene mwi bafundijibwe na Leza kwisanswa banwe bene na bene.+ 10 Na bubine, e momulongelanga ku banabetu bonso badi mu Masedonya monso. Ino, banwe banabetu, tubemwisāshila’mba endelelai kulonga namino pakatampe pene. 11 Mwitungilei kitungo kya kushikata talala+ ne kuta mutyima ku yenu myanda+ ne ku kwingila na makasa enu,+ enka motwemulombwedile, 12 amba munange bya bulēme ku meso a bantu ba panja+ kadi ne kubulwa kintu mpika.

13 Ne kadi, banwe banabetu, ketusakilepo mwikale bampikwa kuyuka* myanda itala boba balēle mu lufu,+ kutyina mwakekala na bulanda pamo bwa bantu bakwabo kebadipo na kyobakulupile.+ 14 Mwanda shi tudi na lwitabijo amba Yesu wafwile kupwa wasanguka,+ nanshi Leza ukaletanga pamo nandi ne boba balēle mu tulo twa lufu kupityila kudi Yesu.+ 15 Mwanda kino ye kyotwemusapwila pa kinenwa kya Yehova* amba batwe bōmi bakatanwa’ko pa kitatyi kya kwikala’po kwa Mfumwetu, ketukabadikidilangapo nansha dimo boba balēle mu tulo twa lufu; 16 mwanda Mfumwetu mwine ukatūka mūlu na lubila lwa lupusa, na diwi dya mwikeulu mukatampe+ ne na kimpungidi kya Leza, kadi boba bafwile mu bumo na Kidishitu bakasangukanga dibajinji.+ 17 Kupwa batwe bōmi bakatanwa’ko, tukaselelwanga pamo nabo mu makumbi+ kukasambakena Mfumwetu+ mu lwelēle; ebiya tukekala mafuku onso na Mfumwetu.+ 18 Nanshi mwisengei nyeke banwe bene na bene na bino binenwa.

5 Ino pa mwanda wa bitatyi ne byaba, banwe banabetu, kekudipo kintu kyomusakila kwimulembela. 2 Mwanda banwe bene muyukile biyampe amba difuku dya Yehova*+ dīyanga enka pamo bwa ngivi bufuku.+ 3 Kitatyi kyobakanena’mba, “Ndoe ne mutyima-ntenke!” po pakebafikila na mu kukopa kwa diso konakanibwa kwa mu kitulumukila,+ pamo bwa bisanso bya lubutulo bya mwana-mukaji wa dīmi, kadi kebakapandepo nansha dimo. 4 Ino banwe banabetu, kemudipo mu fukutu, amba dyodya difuku dimutulumune modikokeja kutulumwina bangivi, 5 mwanda banwe bonso mwi bana ba kitōkeji kadi bana ba mwinya.+ Batwe ketudipo ba bufuku nansha ba fukutu.+

6 Penepo nanshi, ketwakilālai tulo pamo bwa bantu bakwabo,+ ino tutalei’nka kutala+ ne kulama ñeni yetu mibwane.+ 7 Mwanda boba balālanga tulo, balālanga bufuku, kadi ba kukolwa nabo bakolwanga bufuku.+ 8 Ino batwe bana ba mwinya, tulamei ñeni yetu mibwane, koku tuvwele kilama-kyadi kya lwitabijo ne buswe ne kuvwala lukulupilo lwa lupandilo bwa kilama-mutwe+ 9 mwanda Leza ketutongelepo amba tufikilwe na bukalabale, aa, ino amba tumone lupandilo+ monka mudi Mfumwetu Yesu Kidishitu. 10 Aye wetufwidile+ amba, nansha tutale’nka kutala nansha tulāle,* tukekalanga bōmi pamo nandi.+ 11 Nanshi mwikankamikei* ne kwitamija nyeke banwe bene na bene,+ monka momulongelanga kala.

12 Pano tubemulombe, banwe banabetu, mulēmeke boba bengila bininge mu bukata mwenu, bemwendeja mudi Mfumwetu ne kwimudyumuna; 13 kadi mwibapei bulēme bukatampe mpata mu buswe pa mwanda wa mwingilo wabo.+ Ikalai mu ndoe banwe bene na bene.+ 14 Pakwabo kadi, tubemwisāshila banwe banabetu, dyumunai ba kavutakanya,+ mwisambei mu muswelo usenga boba banyoñame pa mityima,* kwashai bazoze, tūkijijai bonso mutyima.+ 15 Tadijai kutyina’mba muntu nansha umo wakalubwila mukwabo kibi ku kibi,+ ino longai nyeke biyampe kudi banwe bene na bene ne ku bantu bakwabo bonso.+

16 Sangalai mafuku onso.+ 17 Lombelai kitatyi kyonso.+ 18 Fwijai’ko pa bintu byonso,+ mwanda kino kyo kiswa-mutyima kya Leza komudi mudi Kidishitu Yesu. 19 Kemwakibulai mudilo wa mushipiditu.+ 20 Kemwakifutululai bupolofeto.+ 21 Jingululai senene bintu byonso;+ kwatyijai byobya bilumbuluke. 22 Mwilamei ku bubi bwa miswelo yonso.+

23 Leza mwine wa ndoe emupandwididile’tu senene. Kadi mushipiditu ne muya* ne umbidi wenu banwe banabetu, bibwane mu miswelo yonso, bikale bilamibwe pampikwa kutopekwa mu kitatyi kya kwikala’po kwa Mfumwetu Yesu Kidishitu.+ 24 Yewa wimwita i wa binebine, kadi bine ukalonga’kyo.

25 A banabetu, endelelai kwitulombelela’ko.+

26 Imunai banabetu bonso na mififyo ijila.

27 Nemutwika kiselwa kikatampe mudi Mfumwetu kya kutangija uno mukanda ku meso a banabetu bonso.+

28 Kanye ka ku buntu bitupu ka Mfumwetu Yesu Kidishitu kekale nenu.