MUKANDA UMBAJINJI KUDI TEMOTE

1 Ami Polo, mutumibwa wa Kidishitu Yesu mungya musoñanya wa Leza Umpandiji wetu ne wa Kidishitu Yesu, lukulupilo lwetu,+ 2 kudi Temote,*+ mwana wa binebine+ mu lwitabijo:

Kanye ka ku buntu bitupu, ne lusa, ne ndoe bitamba kudi Leza Tata ne kudi Kidishitu Yesu Mfumwetu bikale nobe.

3 Monka monakukankamikīle kushala mu Efisesa ponadi kensake kwenda ku Masedonya, e monkukankamikila ne pano, mwanda wa usoñanye bantu bamobamo baleke kufundija lufundijo lungi, 4 nansha kuta mutyima ku mfumo ya bubela+ ne ku myanda ya misuku. Bintu bya uno muswelo bifulanga ku bintu bya bitupu,+ ino bikolomonanga enka myanda ya kufwatakanya bitupu pa kyaba kya kuleta kintu kampanda kitamba kudi Leza pa mwanda wa lwitabijo. 5 Kitungo kine kya buno bulombodi* i kwisanswa+ na mutyima utōka tō ne mutyima wa mundamunda muyampe ne lwitabijo+ lwampikwa buzazangi. 6 Pa kusāsuka ku bino bintu, bamo abaalamukila ku mīsambo ya kinenenene.+ 7 Basaka kwikala bafundiji+ ba bijila, ino pampikwa kwivwanija bintu byobanena nansha byobya byobatakamene nabyo bininge.

8 Ino tuyukile amba Bijila i bilumbuluke shi enka muntu wibingidija biyampe,* 9 pa kujingulula’mba bijila kebiletelwepo pa mwanda wa muntu moloke, ino i pa mwanda wa boba bajilula bijila+ ne bantomboki, bampikwa bwine Leza ne babipya-mambo, bampikwa lulamato,* ne bakobakanya bintu bijila, bepaya bashabo ne bepaya bainabo, bantapañani, 10 bantu ba busekese,* bantu balāla na bantu ba ngitu imo,* batumbula, bambepai, bantu kebalongapo mungya byobatyipile,* ne bintu bikwabo byo-byonso bilwa na bufundiji buyampe*+ 11 mwendele myanda miyampe ya ntumbo ya Leza wa nsangaji, mine yonapelwe.+

12 Mfwijanga’ko Kidishitu Yesu Mfumwetu, waumpele bukomo, mwanda waumwene amba ne mukōkele pa kumpa mwingilo,+ 13 nansha byonadi pa kala muntu utuka Leza ne upangapanga bantu bandi ne wa kibengo.+ Inoko nafwidilwe lusa, mwanda nadi nonga nabya pampikwa kuyuka kadi pampikwa lwitabijo. 14 Ino kanye ka ku buntu bitupu ka Mfumwetu kavudile bininge pamo ne lwitabijo ne buswe budi mudi Kidishitu Yesu. 15 Uno mwanda i ukulupilwa kadi ufwaninwe kwitabijibwa onso amba: Kidishitu Yesu waile mu ino ntanda kupandija babipya-mambo.+ Mu bano’ba, ami ne mutabuke bonso.+ 16 Inoko, nafwidilwe lusa amba kupityila kondi ami mwine mutabuke bonso, Kidishitu Yesu alombole kitūkijetyima kyandi kyonso, antūle bu kimfwa ku boba batūla lwitabijo lwabo mudi aye pa mwanda wa kumona būmi bwa nyeke.+

17 Shi ke pano, Mulopwe wa nyeke ne nyeke,+ aye kabwanyapo kubola,+ wampikwa kumweka,+ Leza umo kete,+ apebwe bulēme ne ntumbo nyeke ne nyekeke. Amena.

18 Buno bulombodi* nakupe’bo, abe wami mwana Temote, mwendele bupolofeto bwanenenwe pa mwanda obe, amba na buno bupolofeto wendelele kulwa divita dilumbuluke,+ 19 koku ulamine lwitabijo ne mutyima wa mundamunda muyampe,+ wapelelwe na bamobamo, bafula ku kulobeja lwitabijo lwabo. 20 Mu bano mudi ne Himeneusa+ ne Alekizandele, ami nebapāna kudi Satana+ amba bafundijibwe na kulemununwa mwanda wa baleke kutuka Leza.

2 Dibajinji bidi, nesāshila bonso bekale kuzenza, kulombela, kusengela, ne kufwija’ko pa mwanda wa bantu ba miswelo yonso, 2 pa mwanda wa balopwe ne boba bonso badi pa bitenta,*+ mwanda wa twikale talala nyā ne mu ndoe na bwine Leza ne kusumininwa konso.+ 3 Kino i kilumbuluke kadi kitabijibwe ku meso a Umpandiji wetu, Leza,+ 4 mwine usaka’mba bantu ba miswelo yonso bapande+ ne kwikala na buyuki bwinebwine bwa bubine. 5 Mwanda kudi Leza umo,+ ne nsenga+ nandi umo pa bukata bwa Leza ne bantu,+ i muntu, Kidishitu Yesu,+ 6 wepēne aye mwine ke kinkūlwa kyenzankane pa mwanda wa bonso*+—kino kyo kya kusapula bukamoni pa kitatyi kyakyo kifwaninwe. 7 Pa mwanda wa buno bukamoni+ natongelwe bu musapudi ne bu mutumibwa,+ ko kunena’mba mufundiji wa mizo+ mu mwanda wa lwitabijo ne bubine; ami nenanga bya bine, nkibepangapo.

8 Shi ke pano nsaka’mba mu bifuko byonso bana-balume balombele nyeke, batulula makasa ajila,+ pampikwa bulobo+ ne kwipatanya.+ 9 Bana-bakaji nabo bafwaninwe kwineñenya na kuvwala bisandi bifwaninwe,* na butūkanye ne ñeni mibwane,* ke na biselapo bya kwibanda nywene, na olo* nansha na malungo ne mbwija ya lupoto lukomo,+ 10 ino i mu muswelo ufwaninwe bana-bakaji betela bu bene Leza,+ ko kunena’mba, na mingilo miyampe.

11 Mwana-mukaji afunde talala nyā ne kukōkelelela bininge.+ 12 Nkitabijepo mwana-mukaji kufundija, nansha kwikala na lupusa pa mwana-mulume, ino ufwaninwe kwikala talala nyā.*+ 13 Mwanda Adama wāpangilwe dibajinji, kupwa ke Eva.+ 14 Kadi, Adama kāongwelwepo, ino mwana-mukaji wāongwelwe+ mpata ne kujilula wājilula. 15 Inoko, ukalamwa pa mwanda wa kubutula kwabutula,+ enka shi endelele* mu lwitabijo ne buswe ne buujila pamo ne ñeni mibwane.*+

3 Uno mwanda i ukulupilwa: Shi muntu ukimba kwikala mutadi,+ nabya usakanga mwingilo mulumbuluke. 2 Nanshi mutadi ufwaninwe kwikala wa kubulwa kutopekwa, mulume wa mukaji umo, mwibeje mu byonso, wa ñeni mibwane,*+ wampikwa kavutakanya, wa kizaji,+ muyuke kufundija,+ 3 ke nkolwankolwapo,+ ke wa lūmapo,* ino i wa mutyima unekena,+ ke wa lupotopotopo,+ ke muntupo usenswe lupeto,+ 4 ekale muntu wendeja* ba mu yandi njibo senene, wa bana bakōkele bininge na kusumininwa konso+ 5 (mwanda shi muntu kayukilepo mwa kwendejeja* ba mu yandi njibo, le ukalela namani kipwilo kya Leza?), 6 ke muntupo waitabije panopano,+ kutyina wakayula mitatulo ne kutyibilwa butyibi bwatyibilwe Dyabola. 7 Kadi, ufwaninwe ne kunenenwa biyampe* na bantu ba panja,+ kutyina’mba wakafutululwa* ne kuponena mu dikinga dya Dyabola.

8 Bengidi ba mingilo nabo bafwaninwe kwikala belēmeke, ke ba ndimi ibidipo,* ke ba kwipānapo mu kutoma vinyu mingi, ke ba makomwa-mesopo a kumwena mu bya budimbidimbi,+ 9 ino bekale balamine kifibwe kikola kya lwitabijo na mutyima wa mundamunda utōka.+

10 Kadi, bano’ba batompibwe bidi shi i bafwaninwe;* ebiya kebengila bu bengidi, byobadi bampikwa mambo.+

11 Bana-bakaji nabo bafwaninwe kwikala belēmeke, ke bavubavubapo,+ bekale bebeje mu byonso, bakōkele mu bintu byonso.+

12 Bengidi ba mingilo bekale balume ba mukaji umo umo, bendeja babo bana ne ba mu abo mobo senene. 13 Mwanda bantu bengila senene banenenwanga biyampe kadi besambanga pampikwa kafinda nansha kamo mu lwitabijo lwa mudi Kidishitu Yesu.

14 Nakulembela bino bintu, nansha byonkulupile kwiya kwako panopano, 15 ino shi naije, amba uyuke mwa kwiendejeja mu ba mu njibo ya Leza,+ ke kipwilo kya Leza mūmi kadi, kipanda kadi kikwatyijo kya bubine. 16 Bine, kifibwe kikola kya buno bwine Leza i kikatampe bya binebine: ‘Wamwekele mu ngitu,+ watelwa bu moloke mu mushipiditu,+ wamwekela bamwikeulu,+ wasapulwa mu mizo,+ waitabijibwa mu ino ntanda,+ watambulwa mūlu mu ntumbo.’

4 Inoko, kinenwa kya ku mushipiditu* kinena patōka’mba mu bitatyi bikāya’ko bamobamo bakapona mu lwitabijo, kebate mutyima ku binenwa bya kyongo binenenwe ku mishipiditu*+ ne ku mfundijo ya bandemona, 2 na buzazangi bwa bantu banena bya bubela,+ ba mutyima wa mundamunda mufwe pamo bwa ao musokwe na kyuma kya mudilo. 3 Bakankaja bantu kwisonga+ ne kwibakanda byakudya byāpangilwe+ na Leza amba bidibwe+ ne kufwija’ko ponka na boba badi na lwitabijo+ kadi bayukidije bubine. 4 Mwanda kipangwa kyonso kya Leza i kilumbuluke,+ kadi i kutupu kintu kya kupelwa+ shi kibatambulwa ne kufwija’ko ponka, 5 mwanda i kipandulwe na kinenwa kya Leza ne na milombelo yobekilombelela.

6 Pa kudingila banabetu ano madingi, ukekala mwingidi mulumbuluke wa Kidishitu Yesu, muntu mudishibwe binenwa bya lwitabijo ne bufundiji bulumbuluke bowalonda senene shē.+ 7 Inoko pela mfumo ya bubela ya mutonko,+ pamo bwa yoya inenanga bana-bakaji banunu. Ino abe, wiibidije na kitungo kya kulombola bwine Leza. 8 Mwanda kwibidija ngitu* kudi na kamweno katyetye, ino bwine Leza abo budi na kamweno mu bintu byonso, mwanda abo budi na mulao wa būmi bwa pano ne būmi bukāya’ko.+ 9 Uno mwanda i ukulupilwa kadi ufwaninwe kwitabijibwa onso. 10 O mwanda mwine twingilanga bininge ne kwielela’ko,+ mwanda tutūdile lukulupilo lwetu mudi Leza mūmi, Umpandiji+ wa bantu ba miswelo yonso,+ nakampata boba bakōkele.

11 Endelela kusoñanya bino bintu ne kufundija’byo. 12 Muntu kakikufutulula nansha dimo amba wi mwanuke. Inoko, ikala kimfwa ku bakōkele mu muneneno, mu mwikadilo, mu buswe, mu lwitabijo, ne mu kubulwa disubi.* 13 Enka ne byongiya, abe wielele’ko nyeke kutanga ku meso a bantu,+ kwisāshila,* ne kufundija. 14 Kokapēlula kyabuntu kidi modi kyakupelwe kupityila ku bupolofeto bwanenenwe kitatyi kyowatentekelwe makasa na kitango kya bakulumpe.+ 15 Langa bininge* bino bintu; wielelele monka, amba bantu bonso bamone patōkelela kwendelela koendelela. 16 Kyaba kyonso wite mutyima abe mwine ne bufundiji bobe.+ Ūminina mu bino bintu’bi, mwanda shi ulonge namino ukepandija abe mwine ne boba bakwivwana.+

5 Kokitopeka na kipuni mwana-mulume mununu.+ Ino umwisāshila pamo bwa shobe, bansongwalume nabo pamo bwa banabenu bana-balume, 2 bana-bakaji banunu pamo bwa bainobe, bansongwakaji nabo pamo bwa banabenu bana-bakaji, kwa kubulwa disubi nansha dimo.

3 Pá* bakaji ba kishala bulēme, boba ba kishala binebine.*+ 4 Ino shi kudi mukaji wa kishala udi na bana nansha bankana, nankyo bayuke bidi kulombola bwine Leza ku ba mu njibo yabo+ ne kulubwila bambutwile ne bankambo wabo byobya bibafwaninwe,+ mwanda kino i kitabijibwe ku meso a Leza.+ 5 Ino mwana-mukaji wa kishala binebine kadi ushele makasa aye ukulupile mudi Leza+ kadi wendelelanga na kuzenza ne kulombela bufuku ne dyuba.+ 6 Ino yewa wipēne mu bya kusangaja ngitu i mufwe nansha byadi mūmi. 7 Nanshi endelela kwibalombola* bino bintu, mwanda wa bekale ba kubulwa kutopekwa. 8 I bine shi muntu kasasaketapo bandi, nakampata boba ba mu njibo yandi, nabya watune lwitabijo kadi i mubi kutabuka ne wampikwa lwitabijo mwine.+

9 Mukaji wa kishala ukokeja kutūlwa ku mulongo wa majina shi udi na myaka 60 ne kupita, wadi mukaji wa mulume umo, 10 utumbīle mingilo milumbuluke,+ shi walelele bana,+ shi wadi na kizaji,+ shi wadi oija bajila ku maulu,+ shi wadi ukwasha boba bamona malwa,+ shi wadi mwipāne mu mingilo yonso miyampe.

11 Inoko, kokatūla ku mulongo wa majina bakaji ba kishala bansongwakaji, mwanda mutyima wa kusaka kusambakena pamo powipatyikanga pa bukata bwa abo ne Kidishitu, basakanga kusongwa. 12 Bakatyibilwanga butyibi mwanda abaleka lwitabijo lwabo lubajinji.* 13 Ne kadi abaibidila kwikala bampikwa kaji, benda bajokoloka ku mobo badi mu yoi ke mu yoi; bine, ke’nkapo kwikala bampikwa kaji, ino kadi i ba lubabo, beela ne mu myanda ya bene,+ besamba bintu byokebafwaninwepo kwisamba. 14 O mwanda ami nsaka bakaji ba kishala bakidi bansongwakaji basongwe,+ babutule bana,+ balame ba mu njibo, kebakishīla kinkwa kyaba kya kwitufutulula. 15 Bine, bamo ke bapwe kala kusāsuka kebalonda Satana. 16 Shi mwana-mukaji mwitabije udi na bakaji ba kishala babutulwa nabo, nankyo ebakwashe, kutyina’mba kipwilo kyakalēmenenwa. Penepo kipwilo nakyo kimone kukwasha bakaji ba kishala binebine.*+

17 Bakulumpe bendeja senene+ bamonwe bu bantu ba kupebwa bulēme misunsa ibidi,+ nakampata boba bengila bininge mu kwisamba ne kufundija.+ 18 Mwanda kisonekwa kinena’mba, “Kokakuta ñombe lukano ku kanwa papūla miseke,”+ kadi amba, “Mwingidi ufwaninwe kupebwa mpalo yandi.”+ 19 Kokitabija byobasambila mwana-mulume mununu,* poso pa bukamoni bwa batumoni babidi nansha basatu.+ 20 Boba balongalonga bubi,+ wibadingile+ ku meso a bantu bonso, amba bakwabo badyumukile’po.* 21 Nakusoñanya na kusumininwa ku meso a Leza ne a Kidishitu Yesu ne a bamwikeulu batongwe amba lama buno bulombodi pampikwa mfwatakani ne mboloji nansha imo.+

22 Kokapeja kutenteka muntu makasa;*+ nansha kwiela mu bubi bwa bakwabo; ikala nyeke mwilame.

23 Kokatoma monka mema,* ino toma tuvinyu mwanda wa kifu kyobe ne kubelabela kobe.

24 Bubi bwa bantu bamo i buyukane patōka, butwadidila ku kidye, ino bwa bantu bakwabo buyukananga ke mungya kala.+ 25 Ne mingilo milumbuluke nayo mo monka, i miyukane patōka+ kadi yoya keiyukenepo keikokejapo kufibwa lonso.+

6 Boba badi mu lupungu lwa bupika bamone nyeke bamfumwabo bu bantu bafwaninwe kulēmekibwa bininge,+ kutyina’mba dijina dya Leza ne bufundiji byakafutululwa.+ 2 Ne kadi, boba badi na bamfumwabo betabije, kebakibapunika mwanda’po’tu i banababo. Inoko bafwaninwe kwingila na mutyima umo, mwanda bene bamwena mu mwingidilo wabo muyampe i betabije kadi baswedibwe.

Endelela kufundija bino bintu ne kukankamika bino’bi. 3 Shi muntu ufundija lufundijo lungi ne kwitabija mpika buno bulombodi buyampe,*+ butamba kudi Mfumwetu Yesu Kidishitu, nansha bufundiji bukwatañene na bwine Leza,+ 4 i muyule mitatulo, kadi kevwanijepo kintu nansha kimo.+ Witobelwe* lupata ne kwipotomeja pa mwanda wa bishima.+ Bino’bi bileñanga mukao, lupotopoto, buvubavuba,* kufwatakenya bakwabo bibi, 5 ne kwipatanya kyaba kyonso pa myanda mityemitye na bantu ba ñeni myoneke+ kadi babudilwe bubine, balanga’mba bwine Leza i mwa kumwena kamweno.+ 6 Na bubine, mu bwine Leza mudi kamweno kakatampe+ shi tusangele* byobya byotudi nabyo. 7 Mwanda ketwailepo na kintu nansha kimo mu ino ntanda, kadi ketukokejapo kusela’mo kintu.+ 8 Nanshi shi tudi na byakudya ne bya kuvwala,* tukasangela bino bintu.+

9 Inoko, boba basumininwe kwikala bampeta baponenanga mu matompo ne mu dikinga+ ne mu bya kusakasaka bivule bya bulembakane kadi bisanshija, bifikija bantu ku koneka ne ku musala.+ 10 Mwanda kusanswa lupeto i kitako kya bintu bibibibi bya miswelo yonso, kadi pa kwipāna’mo bamo ke basāsukile kulampe na lwitabijo kadi ke betapetape na misanshi mivule mine.+

11 Ino abe, a muntu wa Leza, nyema bino bintu. Ino londalonda boloke, bwine Leza, lwitabijo, buswe, kūminina, ne kutalala.+ 12 Lwá bulwi bulumbuluke bwa lwitabijo; kwatyija senene būmi bwa nyeke bwine bowaityilwe’ko kadi bowaitabije biyampe patōkelela ku meso a batumoni bavule.

13 Ku meso a Leza, mwine ulama bintu byonso byūmi, ne ku meso a Kidishitu Yesu, kamoni wanenene biyampe patōkelela ku meso a Pontyusa Pilato,+ nakusoñanya 14 ulame mbila pampikwa dikeme ne pa kubulwa kutopekwa kufika ne ku kumweka kwa Mfumwetu Yesu Kidishitu,+ 15 kwine kukalombolwa pa kitatyi kyako kitungwe na mwine wa nsangaji kadi umo kete wa Lupusa Lukatampe. Aye i Mulopwe wa boba babikele bu balopwe kadi Mfumwandya boba babikele bu bamfumu,+ 16 aye bunka kabwanyapo kufwa,+ wikele mu kitōkeji kekifikika,+ kamwenwe na muntu kadi kakokejapo kumonwa.+ Kudi aye kwikale bulēme ne bukomokomo bwa nyeke. Amena.

17 Lombola* boba bampeta mu ino ngikadilo ya bintu* amba kebakitatula,* kadi kebakikulupila bupeta kebwisumbidilwapo,+ ino bakulupile Leza, mwine witupanga bintu byonso bya ntanda ne miseke byotusangela.+ 18 Wibasapwile balonge biyampe, bekale bampeta mu mingilo milumbuluke, bekale na buntu,* ba mutyima wa kupāna,+ 19 ne kwibikila biyampe kyalwilo kilumbuluke kya mafuku a kumeso,+ amba bakwatyije pototo būmi bwinebwine.+

20 A Temote, abe lama kyokya kyakupelwe,+ vundamina binenwa bya bituputupu bijilula bintu bijila ne bya kwipatanya bitelwa bya bubela bu “buyuki.”+ 21 Pa kwimwekeja’mba badi na buno buyuki, bamobamo abasāsuka mu lwitabijo.

Kanye ka ku buntu bitupu kekale nenu.