MUKANDA WA BUBIDI KUDI TEMOTE

1 Ami Polo, mutumibwa wa Kidishitu Yesu pa kiswa-mutyima kya Leza mwendele mulao wa būmi bumonwa kupityila kudi Kidishitu Yesu,+ 2 kudi Temote, mwana muswedibwe:+

Kanye ka ku buntu bitupu, ne lusa, ne ndoe bitamba kudi Leza Tata ne kudi Kidishitu Yesu Mfumwetu bikale nobe.

3 Mfwijanga’ko Leza, mwine oñingidila mingilo ikola na mutyima wa mundamunda utōka, monka mwāingidile bakulutuba bami, kadi nkilekangapo nansha dimo kukuvuluka mu kuzenza konzenzanga bufuku ne dyuba. 4 Ngabilanga bininge kwimona nobe, pomvulukanga impolo yobe, amba ndyulwe nsangaji. 5 Mwanda mvulukanga lwitabijo lobe lwampikwa buzazangi,+ lwadi bidi mudi nkambo obe Loisa ne mudi inobe Yunisa, ino nkulupile amba ludi ne mudi abe.

6 O mwanda nakuvuluja kushinsakanya pamo bwa mudilo kyabuntu kya Leza kyowatambwile ponakutentekele makasa.+ 7 Mwanda Leza ketupelepo mushipiditu wa moyomoyo,+ ino i wa bukomo+ ne buswe ne ñeni mibwane. 8 Nanshi kokikwatwa bumvu bwa kusapula myanda ya Mfumwetu+ nansha kunkwatyilwa’bo ami, mukutwa pa mwanda wandi, ino itabija kususukila+ myanda miyampe na kukulupila bukomo bwa Leza.+ 9 Aye wetupandije ne kwitwita lwito lujila,+ ke pa mwandapo wa mingilo yetu, aa, ino i pa mwanda wa mpango yandi ne kanye kandi ka ku buntu bitupu.+ Kano kanye ketupelwe mudi Kidishitu Yesu tamba kala, 10 ino pano kabalombolwa patōka pa kumweka kwa Umpandiji wetu, Kidishitu Yesu,+ watalwile lufu+ ne kumunika kitōkeji pa būmi+ ne pa kubulwa kubola+ kupityila ku myanda miyampe,+ 11 mine yonatongēlwe bu musapudi ne bu mutumibwa ne bu mufundiji.+

12 Kino e kine kyonsusukila namino,+ ino nkifwangapo bumvu.+ Mwanda ndyukile Mwine ongitabije, kadi nkulupile amba aye ubwanya kulama kyonamupele kufika ne mu dyodya difuku.+ 13 Kwatyija nyeke kimfwa kya kulondela’po* kya binenwa biyampe*+ byowaivwene kondi na lwitabijo ne buswe bya mu bumo na Kidishitu Yesu. 14 Lama kino kyabulēme kyowapelwe kupityila ku mushipiditu ujila, mwine udi motudi.+

15 Abe uyukile kino, amba bantu bonso mu ntanda ya bubikavu ya Azia+ abamvundamina, mu bano mudi ne Fikelusa ne Helamongene. 16 Mfumwetu afwile lusa ba mu njibo ya Oneshifolusa,+ mwanda divule wadi untūkija mutyima kadi kakwatyilwepo bumvu miyololo yami ya kifungo. 17 Ino, paadi mu Loma, waunkimbile na kininga, waunsokola. 18 Mfumwetu amukwashe akafwilwe lusa na Yehova* mu dyodya difuku. Kadi abe uyukile biyampe mingilo yonso yawaingile mu Efisesa.

2 Nanshi, abe wami mwana,+ wikomeje nyeke mu kanye ka ku buntu bitupu kadi mudi Kidishitu Yesu; 2 kadi bintu byowaivwene kondi byaitabije ne batumoni bavule,+ pá’byo bantu bakōkele, nabo bakabwanya senene kufundija bakwabo. 3 Byodi sola mulumbuluke+ wa Kidishitu Yesu, itabija kususuka.+ 4 I kutupu muntu wingilanga busola usuñanga* bya busunga* bya mu būmi, shi ukimba kwitabijibwa na mwine wamutwejeje bu sola. 5 Nansha ke mu makayo mwine, muntu ukaya makayo a kwitāka kavwikwangapo kilukwa shi kakailepo mungya bijila.+ 6 Kidimye wingila bininge ufwaninwe kwikala mubajinji kudya bipa. 7 Langa kyaba kyonso bino byonanena’bi; Mfumwetu ukakupa ñeni* mu bintu byonso.

8 Vuluka’mba Yesu Kidishitu wasangwilwe mu bafwe+ kadi i lutundu lwa Davida,*+ mwendele myanda miyampe yonsapula,+ 9 mine yonsusukila ne kukutwa pamo bwa nkuma-bibi.+ Inoko, kinenwa kya Leza kekikutyilwepo.+ 10 O mwanda mwine ñumininanga bintu byonso pa mwanda wa batongwe,+ amba nabo bakamone lupandilo kupityila kudi Kidishitu Yesu, pamo ne ntumbo ya nyeke. 11 Uno mwanda uno’u i ukulupilwa: Shi bine twafwile nandi pamo, nabya tukekalanga bōmi pamo nandi;+ 12 shi twendelele kūminina, nankyo netu tukabikalanga pamo nandi bu balopwe;+ ino shi tumutune, aye nandi uketutunanga;+ 13 shi twikale bampikwa bubinebine, aye i wa binebine nyeke, mwanda kabwanyapo kwituna aye mwine.

14 Wibavuluje nyeke bino bintu’bi, wibalombole* ku meso a Leza baleke kulwila bishima, kintu kya kubulwa mvubu nansha imo mwanda kisanshijanga* boba bevwana. 15 Longa bukomo bobe bonso wilombole bu muntu mwitabijibwe kudi Leza, mwingidi wampikwa kyafwila bumvu, wingidija kinenwa kya bubine mobifwaninwe.+ 16 Ino pela binenwa bya bituputupu bijilula bintu bijila,+ mwanda abyo bikavudija mpata bumpikwa bwine Leza, 17 kadi binenwa byabo byendanga bisambakana pamo bwa kilonda kya kabenga.* Ba Himeneusa ne Filetusa nabo badi mu bukata mwabo.+ 18 Bano bantu abasāsuka mu bubine, banenanga’mba lusangukilo ke lupite kala,+ kadi bavutakanyanga lwitabijo lwa bamobamo. 19 Nansha nankyo, kyalwilo kikomokomo kya Leza akyo kikimene nkū, patūlwe kino kiyukeno amba, “Yehova* uyukile bandi,”+ ne amba, “Yewa ense wita dijina dya Yehova*+ aleke bukondame.”

20 Ino mu njibo mikatampe kemwikalangapo enka bipungwa* bya olo* ne bya ndalama ino mwikalanga ne bya mityi ne bya dilongo, bimo bya mwingilo wa bulēme ino bikwabo nabyo bya mwingilo wampikwa bulēme. 21 Nanshi, shi muntu usonsoloka bino bya mfulo’bi, ukekala kingidilwa* kya mwingilo wa bulēme, kipandulwe, kya kamweno kudi mwinē’kyo, kilongololwe mwanda wa mwingilo onso muyampe. 22 Shi ke pano, nyema bya kusakasaka bya bunkasampe, ino londalonda boloke, lwitabijo, buswe, ne ndoe, pamo na boba beta Mfumwetu na mutyima utōka tō.

23 Ne kadi, pela lupata lwa bulembakane ne lwampikwa buluji,+ mwanda kelo kulenga ñuma. 24 Mwanda umpika wa Mfumwetu kafwaninwepo kūmana, ino ufwaninwe kwikala mutūkanye* ku bonso,+ muyuke kufundija, uyukile kwīfula shi abamulubila,+ 25 ufundija boba ba lupata na kutalala.+ Kepabulwe padi Leza ukebapa kwisāsa,* kutwala ku buyuki bwinebwine bwa bubine,+ 26 kadi bajokeje ñeni yabo ne kwionzola mu dikinga dya Dyabola, pa kuyuka’mba wadi mwibakwate bōmi mwanda wa kulonga kiswa-mutyima kyandi.+

3 Ino yuka kino, amba mu mafuku a mfulo+ kukekalanga bitatyi bya makambakano bikomo ne mwa kulongela. 2 Mwanda bantu bakekala ba kwisanswa abo bene, ba kusanswa lupeto, ba kwitumbika, ba kwizunzula, batuka Leza, bampikwa kukōkela bambutwile, bampikwa kufwija’ko, ba kubulwa lulamato, 3 bampikwa kisanso kya bumuntu, bapela kumvwañana ko-konso, bavubavuba, ba kubulwa kwīfula, ba bukalabale bwa malwa, bampikwa kusanswa buyampe, 4 ba kwaba bakwabo, ba mitwe myūmu, bayule mitatulo, basenswe kwisangaja kupita’ko kusanswa Leza, 5 badi na mumwekelo wa bwine Leza, ino batuna bukomo bwa bwine Leza;+ nanshi abe vundamina bene bano’ba. 6 Mu bano’ba mutambanga bantu bekuja na budyumuku mu mobo ne kukwata bu misungi bana-bakaji bazoze balēmenenwe na bubi, baludikwa na bya kusakasaka palapala, 7 befundanga mafuku onso ino kuyukidija bubine senene mpika.

8 Monka mwālwidile ba Yanese ne Yambelese na Mosesa, nabo mo mobalwila nyeke na bubine. Bantu ba uno muswelo i boneke mpata mu ñeni, kebetabijibwepo mu myanda ya lwitabijo. 9 Inoko, kebasapo kwenda kulampe, mwanda buvila* bwabo busa kumweka ku bonso, monka mwāmwekele bwa boba bantu babidi.+ 10 Ino abewa ulondanga biyampe shē bufundiji bwami, mwiendelejo wami,+ mpango yami, lwitabijo lwami, kitūkijetyima kyami, buswe bwami, kūminina kwami, 11 kupangwapangwa ne masusu pamo bwa oa onasusukile mu Antyioka,+ mu Ikoniuma,+ ne mu Lesetala.+ Naūminine kuno kupangwapangwa, kadi Mfumwetu waunkūdile mu byonso’bi.+ 12 Na bubine, boba bonso basaka kwikala na būmi bwa bwine Leza mu bumo na Kidishitu Yesu nabo bakapangwapangwa.+ 13 Ino babi ne bandimbañani bakabipila’ko kutabuka, bongola bakwabo ne kongolwa.+

14 Inoko abe, endelela mu bintu byowafundile ne byobakunekenye nobe waitabija,+ byoyukile bene bakufundije’byo 15 ne amba tamba ku bwanuke+ uyukile bilembwa bijila,+ bikokeja kukwalamuna kodi wa tunangu mwanda wa lupandilo kupityila ku lwitabijo mudi Kidishitu Yesu.+ 16 Kisonekwa kyonso i kisonekejibwe na mushipiditu wa Leza+ kadi i kya kamweno pa kufundija,+ pa kudingila, pa kōlola bintu,* ne pa kulemununa mu boloke,+ 17 amba muntu wa Leza ekale mubwanye byonsololo, muteakanibwe senene mwa kwingidila mwingilo onso muyampe.

4 Nakusoñanya na kusumininwa ku meso a Leza ne a Kidishitu Yesu, mutyibi+ wa bōmi ne bafwe,+ na kumweka kwandi+ ne na Bulopwe bwandi,+ amba: 2 Sapula kinenwa;+ pyasakena’mo mu bitatyi biyampe ne mu bitatyi bya makambakano; dingila,+ topeka, kankamika, na kitūkijetyima kyonso ne bwino bwa kufundija.+ 3 Mwanda kukekalanga kitatyi kyobakapela kwivwana bufundiji buyampe,*+ ino, mwendele kusakasaka kwabo, bakevudijija bafundiji ba abo bene ba kwibafundija bisangaja matwi abo.*+ 4 Bakālamuka kebakitejepo bubine, kebate’ko mutyima ku mfumo ya bubela. 5 Ino abe lama ñeni yobe mu bintu byonso, ūminina mu byamalwa,+ ingila mwingilo wa bu musapudi wa myanda miyampe,* vuija ne pa mfulo mwingilo obe.+

6 Mwanda ami mpungululwanga kala bwa kyamulambu kya bitomibwa,+ kadi kitatyi kyami kya kukutululwa+ kibafwena. 7 Nalu bulwi bulumbuluke,+ napu kunyema lubilo,+ nalama lwitabijo. 8 Tamba pano, kudi kilukwa kya boloke kyobambikīle,+ kikampa Mfumwetu, mutyibi moloke,+ bu mpalo mu dyodya difuku,+ ino ke’nkapo ami kete, i ne boba bonso basenswe kumweka kwandi.

9 Longa bukomo wiye kondi panopano. 10 Mwanda Demasa+ waungela, ke-muntu wasanswa ino ngikadilo ya bintu,* waenda ku Tesalonika; Kelesense ku Ngalatea, Tetusa ku Damatea. 11 Enka Luka kete ye udi nami. Sela Mako wiye nandi, mwanda aye usa kunkwasha mu mingilo. 12 Ino natume Tekikusa+ ku Efisesa. 13 Shi koiya, sela ne kikanzo kya pangala kyonashile na Kapusa mu Toasa, ne mivungo ya mikanda, nakampata mivungo ya biseba.

14 Alekizandele sendwe wa mikuba waunsanshije bininge. Yehova* ukamulubwila mungya bilongwa byandi.+ 15 Nobe ufwaninwe kumudyumuka, mwanda walwile na musapu wetu bya mwiko.

16 Ponasambile dibajinji i kutupu nansha umo waile ku wami mutamba, ino bonso baungelele—le kadi, kebakilambikwa ano mambo. 17 Ino Mfumwetu waimene pabwipi nami kadi waunkomeje, amba kupityila kudi ami busapudi busapulwe ne pa mfulo kadi mizo yonso ivwane’bo;+ ne kadi nakūdilwe mu kyakanwa kya ntambo.+ 18 Mfumwetu ukankūla ku mingilo yonso mibi kadi ukampandija mwanda wa Bulopwe bwandi bwa mūlu.+ Aye atumbijibwe ntumbo nyeke ne nyekeke. Amena.

19 Ñimwine Piseka ne Akwila+ ne ba mu njibo ya Oneshifolusa.+

20 Elatusa+ washele mu Kodinda, ino Tofimusa+ namushile ubela mu Miletusa. 21 Longa bukomo ufike kumeso kwa kitatyi kya mashika.

Ebulusa wakwimuna, ne ba Pudenesa, Dinusa, Kodia ne banabetu bonso nabo abakwimuna.

22 Mfumwetu ekale na mushipiditu olombola. Kanye kandi ka ku buntu bitupu kekale nenu.