MUKANDA KUDI TETUSA

1 Ami Polo, umpika wa Leza kadi mutumibwa wa Yesu Kidishitu mwendele lwitabijo lwa batongwe ba Leza ne buyuki bwinebwine bwa bubine bwa mwendele bwine Leza 2 kadi bwimanine pa lukulupilo lwa būmi bwa nyeke+ bwālaile Leza tamba kala, aye kabwanyapo kubepa;+ 3 ino wayukenye kinenwa kyandi mu kitatyi kyandi kifwaninwe kupityila ku busapudi bonapelwe,+ mwendele musoñanya wa Umpandiji wetu, Leza; 4 kudi Tetusa, mwana wa binebine mwendele lwitabijo lotwitabije:

Kanye ka ku buntu bitupu ne ndoe bitamba kudi Leza Tata ne kudi Kidishitu Yesu Umpandiji wetu bikale nobe.

5 Nakushile mu Kelete mwanda wa ōlole bintu byadi byoneke* ne kutonga bakulumpe mu kibundi ne kibundi, monka monakulombwedile: 6 shi mudi mwana-mulume wampikwa mambo, mulume wa mukaji umo, udi na bana betabije bampikwa kulambikwa myanda ya bya bulongelonge* nansha kwikala bantomboki.+ 7 Mwanda byadi kalama wa Leza, mutadi ufwaninwe kwikala wampikwa mambo, ke wa mutwe kibengopo,+ ke wa kalobolobopo,+ ke nkolwankolwapo, ke wa lūmapo,* ke wa makomwa-mesopo a kumwena mu bya budimbidimbi, 8 ino i wa kizaji,+ usenswe buyampe, wa ñeni mibwane,*+ moloke, wa lulamato,+ wa kwīfula,+ 9 ukwatyije pototo kinenwa kya binebine* mu bwino bwandi bwa kufundija,+ amba amone mwa kukankamikila* bantu na bufundiji buyampe*+ ne mwa kudingidila+ boba bapatanya.

10 Mwanda kudi bantomboki bangi, banenakanya bya bitupu, kadi bañongojani, nakampata boba balamete ku disao.+ 11 I biyampe kumuma byakanwa byabo, mwanda baletanga’nka kuleta kavutakanya mu mobo onso matuntulu na kufundija bintu byokebafwaninwepo kufundija pa mwanda wa kamweno ka budimbidimbi. 12 Muntu umo mu bukata mwabo, mupolofeto wabo, wanenene amba: “Bene Kelete i bambepai nyeke, banyema ba ntanda babi, bankope ba mudyopolo.”

13 Buno bukamoni i bwa bine. O mwanda mwine wibadingile nyeke na kusumininwa, amba bekale bakomo mu lwitabijo, 14 bampikwa kuta mutyima ku mfumo ya Bayuda ne mbila ya bantu bavundamina ku bubine. 15 Bintu byonso i bitōka ku boba batōka;+ ino ku boba ba disubi ne bampikwa lwitabijo kekudipo kitōka, mwanda ñeni yabo ne mityima yabo ya mundamunda i ya disubi.+ 16 Banenanga patōkelela amba bayukile Leza, ino bamutuna na mingilo yabo,+ mwanda i ba munyanji, ba kubulwa kikōkeji kadi kebetabijibwepo kwingila mwingilo muyampe nansha umo.

2 Inoko abewa, wisambe’nka kwisamba byobya bikwatañene na bufundiji buyampe.*+ 2 Bana-balume banunu bekale bebeje mu byonso, belēmeke, ba ñeni mibwane, bakomo mu lwitabijo, mu buswe, ne mu kūminina. 3 Mo monka, ne bana-bakaji banunu nabo bekale kulēmeka Leza mu mwiendelejo, ke bavubavubapo, nansha ba kumunwa na vinyu mingi, ino bekale bafundiji ba bintu biyampe, 4 amba badingile* bansongwakaji kusanswa balume babo, kusanswa babo bana, 5 bekale na ñeni mibwane, belame, bengila ku mobo abo,* bayampe, bakōkele balume babo,+ amba kinenwa kya Leza kyakanenenwa bibibibi.

6 Mo monka, kankamika nyeke bansongwalume bekale na ñeni mibwane,+ 7 wilombole bu kimfwa kya mingilo milumbuluke mu miswelo yonso. Fundija byobya bitōka tō* na kusumininwa konso,+ 8 unena muneneno muyampe* keukokejapo kufutululwa,+ amba bakinkwa bafwijibwe bumvu, babulwe ne kibi* kine kya kwitunena.+ 9 Bapika bekale kukōkela bininge bamfumwabo mu bintu byonso,+ bakimbe kwibasangaja, kebakibadiulula, 10 ne kwibeba mpika,+ ino belombole bu bantu bakulupilwa mu byonso, amba banengeje mu miswelo yonso bufundiji bwa Umpandiji wetu, Leza.+

11 Mwanda kanye ka ku buntu bitupu ka Leza i kalombolwe patōka, kadi kabaleta lupandilo ku bantu ba miswelo yonso.+ 12 Ako ketufundijanga kupela bumpikwa bwine Leza ne bya kusakasaka bya ino ntanda,+ ne mwa kwiendejeja na ñeni mibwane ne boloke ne bwine Leza mu ino ngikadilo ya bintu,*+ 13 potutengele lukulupilo lwa nsangaji+ ne kumweka kwa ntumbo kwa Leza mukatampe ne kwa Umpandiji wetu, Yesu Kidishitu, 14 wepēne aye mwine pa mwanda wetu+ mwanda wa kwitunyongolola*+ ku miswelo yonso ya kujilula kwa bijila ne kwisubwila aye mwine bantu kampanda ke kintu kyandi kya pa bula, bapyasakenine mingilo milumbuluke.+

15 Nena’nka kunena bino bintu’bi kadi wisāshile* ne kudingila na lupusa lonso.+ Muntu kakikufutulula nansha dimo.

3 Wibavuluje nyeke bekale munshi mwa maludiki ne mwa ba lupusa+ ne kwibakōkela, bekale na mutyima wa kwingila mingilo yonso miyampe, 2 pampikwa kunenena muntu nansha umo kibi, kwampikwa lupotopoto, bekale ba mutyima unekena,+ batalala ku meso a bantu bonso.+ 3 Mwanda batwe netu twadi bidi bampikwa ñeni, bampikwa kikōkeji, bongolwe, bapika ba bya kusakasaka ne bya kwisangaja bya miswelo ne miswelo, twikele mu bubi ne bya kwabilaabila, ba munyanji, beshikwe batwe bene na bene.

4 Inoko, kanye ka Umpandiji wetu, Leza,+ ne buswe bwasenswe bantu pa kumweka, 5 (ke pa mwandapo wa mingilo myoloke kampanda yotwaingile,+ ino i pa mwanda wa lusa lwandi aye mwine),+ wetupandije pa kwitoija mema etupele būmi+ ne pa kwitwalamuna ketudi bapya na mushipiditu ujila.+ 6 Wetupungulwidile uno mushipiditu mungi mpata* kupityila kudi Yesu Kidishitu Umpandiji wetu,+ 7 amba, pa kupwa kutelwa bu boloke pa kanye ka ku buntu bitupu ka yewa’wa,+ twikale bampyana+ mwendele lukulupilo lwa būmi bwa nyeke.+

8 Bino binenwa i bikulupilwa, kadi nsaka unene kyaba kyonso ino myanda na kusumininwa, amba boba betabije Leza bate mutyima ku kwipāna mu mingilo milumbuluke. Bino’bi i bilumbuluke kadi bya kamweno ku bantu.

9 Ino pela bya kwipatanya bya bulembakane ne myanda ya misuku ne lupotopoto ne ñuma ya kulwila Bijila, mwanda kebidipo na kamweno kadi i bya bitupu.+ 10 Shi kudi muntu ukankamika katango+ kampanda, mupele+ pa kupwa kumudyumuna musunsa mubajinji ne wa bubidi,+ 11 pa kuyuka’mba yao muntu wasāsuka mu dishinda ne kupya mambo kadi i mwiponeje aye mwine.

12 Shi nakutumina Atemasa nansha Tekikusa,+ longa bukomo wiye untane ku Nikopodi, mwanda e konatonga kukashikata kitatyi kya mashika. 13 Tá mutyima kukwasha ba Zenasa, muntu upotolwele Bijila, ne Apolosa kutyina’mba bakabulwa kintu mu lwendo.+ 14 Ino i biyampe bantu betu nabo bayuke kwipāna mu mingilo milumbuluke mwanda wa kukwasha bukidibukidi mu bitatyi bya bufudile,+ kutyina’mba bakekala bampikwa kupa bipa.+

15 Bonso bondi nabo abakwimuna. Ñimwine boba betusenswe kisanso kikatampe mu lwitabijo.

Kanye ka ku buntu bitupu kekale nenu banwe bonso.