MUKANDA KUDI BAHEBELU

1 Tamba kala Leza wēsambile divule dine ne mu miswelo mivule na bakulutuba betu kupityila kudi bapolofeto.+ 2 Ino ku mfulo ya ano mafuku wesambe netu kupityila kudi Mwana,+ waatongele bu mpyana wa bintu byonso,+ kadi kupityila kudi aye, wālongele ngikadilo ya bintu.*+ 3 Aye ye umwekeja ntumbo ya Leza+ kadi i kyelekejo kinekine kya mwaikadile,+ kadi ye ukwatakanya bintu byonso na kinenwa kya bukomo bwandi. Kadi pa kupwa kutōkeja bubi bwetu,+ wakashikete ku kuboko kwa lundyo kwa yewa Mukatakata, peulu.+ 4 O mwanda aye waikala mulumbuluke kupita bamwikeulu,+ ke-muntu i mupyane dijina diyampe mpata kupita dyabo.+

5 Kimfwa, i ani le mu bamwikeulu ke munenwe na Leza amba: “Abe wi wami mwana; dyalelo’di nakubutula”?+ Ne amba: “Nkekalanga shandi, nandi ukekalanga wami mwana”?+ 6 Ino paleta monka Umbedi+ wandi mu ntanda ikelwe na bantu, unena’mba: “Bamwikeulu bonso ba Leza bamufukatyile.”*

7 Kadi, aye unena pa mwanda wa bamwikeulu amba: “Walonga bamwikeulu bandi ke mishipiditu, ne bengidi*+ bandi ke lubimbi lwa mudilo.”+ 8 Ino unena pa mwanda wa Mwana’mba: “Leza i lupona lobe+ nyeke ne nyekeke, ne nkonto wa Bulopwe bobe i nkonto wa boloke.* 9 Abe wasenswe boloke, ino washikwa kujilula bijila. O mwanda mwine Leza, obe Leza, wakushingile māni+ a kusepelela kutabuka bakwenu.”+ 10 Kadi amba: “Ku ngalwilo, abe Mfumwetu, waadile byalwilo bya ntanda, kadi madiulu i mingilo ya makasa obe. 11 Bikonekanga, ino abewa ukekala’ko nyeke; kadi byonso bikanunupa pamo bwa kivwalwa, 12 kadi abewa ukebivunga pamo bwa kikanzo kya pangala, pamo’nka bwa kivwalwa, kadi bikashintwa. Ino abe udi muswelo umo onka, ne myaka yobe keikafulepo nansha dimo.”+

13 Ino i ani le mu bamwikeulu wakadi munene amba: “Shikata ku kuboko kwami kwa lundyo enka ne byontūla balwana nobe ke kitūlo kya maulu obe”?+ 14 Mwene abo bonso i mishipiditu mwanda wa mingilo ijila,*+ batumwa kukengidila boba ba kukapyana lupandilo?

2 O mwanda mwine tufwaninwe kuta mutyima bininge ku bintu byotwaivwene,+ kutyina’mba twakēja.+ 2 Mwanda shi kinenwa kyānenenwe kupityila ku bamwikeulu+ kyādi kya binebine, kadi kujilula konso ne kilongwa kyonso kya kubulwa kikōkeji kyāpelwe mfuto mwendele boloke,+ 3 le tukapanda namani shi tupēlula lupandilo lukatampe namino?+ Mwanda lwaanjile kunenwa kupityila kudi Mfumwetu+ ne kubingijibwa na boba bāmwivwene pa mwanda wa batwe, 4 ne Leza nandi welungile’ko mu kusapula bukamoni na biyukeno ne bintu bya kutendelwa* ne bilongwa bya bukomo palapala+ ne mushipiditu ujila waabanibwe mwendele kiswa-mutyima kyandi.+

5 Mwanda ke munshipo mwa bwendeji bwa bamwikeulu mwaatūdile ntanda* ikāya’ko,+ mine yotwisambila’po. 6 Ino kamoni umo wanenene pantu kampanda’mba: “Lelo muntu i waka amba umulange, nansha mwanā muntu amba umute mutyima?+ 7 Abe wamutūkije bityetye munshi mwa bamwikeulu; wamuvwika kilukwa kya ntumbo ne bulēme, kadi wamutonga abikale pa mingilo ya makasa obe. 8 Bintu byonso abe watūdile’byo munshi mwa maulu andi.”+ Pa kutūla bintu byonso munshi mwandi,+ Leza kashilepo kintu kyampikwa kutūlwa munshi mwandi.+ Pano’ko, ketwamwene bintu byonso munshi mwandi.+ 9 Inoko batwe tumwene Yesu, mwine watūkijibwe bityetye munshi mwa bamwikeulu,+ pano i muvwikwe kilukwa kya ntumbo ne bulēme mwanda wafwile,+ amba pa kanye ka ku buntu bitupu ka Leza, atompe lufu pa mwanda wa muntu ense.+

10 Mwanda kyadi kyendele’mo amba aye mwinē bintu byonso bikele’ko pa mwanda wandi ne kupityila kwadi, pa kuleta bana bavule ku ntumbo,+ afikije Kalombwe Mukatampe wa lupandilo lwabo+ ku bubwaninine kupityila ku masusu.+ 11 Mwanda ne yewa upandula ne bene bapandulwa,+ bonso i batambe kudi umo enka,+ o mwanda mwine kadipo ne kyakwatyilwa bumvu kwibeta bu banabetu,+ 12 panena’mba: “Nkasapulanga dijina dyobe ku banabetu; nkakutendelanga na ñimbo mu bukata mwa kipwilo.”+ 13 Ne amba: “Nkamukulupilanga.”+ Kadi amba: “Tala! Ami ne bana batyetye baumpele Yehova.”*+

14 Nanshi, “bana batyetye” byobadi ba mashi ne ngitu, aye nandi mo monka waikele wa mashi ne ngitu,+ amba kupityila ku lufu lwandi onakanye yewa ubwanya kuleta lufu,+ ko kunena’mba, Dyabola,+ 15 kadi amba akūle* boba bonso badi bamunwe bupika mu būmi bwabo bonso na wabo moyo wa lufu.+ 16 Mwanda na bubine aye kakwashangapo bamwikeulu, ino ukwashanga lutundu* lwa Abalahama.+ 17 O mwanda, wadi ufwaninwe kwikala pamo bwa “banababo” mu byonso,+ amba ekale kitobo mukatampe wa lusa kadi mukōkele mu myanda ya kwa Leza, mwanda wa kulambula kitapwa kya kupwanija*+ pa mwanda wa bubi bwa bantu.+ 18 Aye mwine byaasusukile kitatyi kyaatompelwe,+ ubwanya kwiya kukwasha boba batompibwa.+

3 Shi ke pano, a banabetu bajila, botwityilwe nabo lwito lwa mūlu,+ tai mutyima kudi mutumibwa kadi kitobo mukatampe otwitabije patōkelela, ke Yesu+ kadi. 2 Wadi ukōkele Yewa wamutongele,+ monka mwādi mwikadile Mosesa mu njibo yonso ya Yewa’wa.+ 3 Mwanda aye* umwenwe bu mufwaninwe ntumbo+ kutabuka Mosesa, ke-muntu yewa ūbaka njibo udi na bulēme kutabuka njibo mine. 4 Na bubine, njibo yonso i myūbakwe na muntu, ino mwine wāubakile bintu byonso i Leza. 5 Kadi Mosesa wādi mukōkele bu mwingidi mu njibo yonso ya Yewa’wa ke bukamoni bwa bintu byadi bya kusapulwa mwenda mafuku, 6 ino Kidishitu wadi mukōkele bu mwana+ upelwe lupusa pa njibo ya Leza. Batwe twi njibo Yandi,+ shi bine tūminine kufika’nka ne ku mfulo mu kunena pampikwa kafinda ne mu lukulupilo lwine lotwitemba.

7 Nanshi, monka munenena mushipiditu ujila’mba,+ “Dyalelo shi mwivwane diwi dyandi, 8 kemwakyūmijai mityima yenu pamo na mu kyokya kitatyi kyaākelelwe bulobo bulula bululu, pamo bwa mu difuku dya kutompibwa mu ntanda mutuputupu,+ 9 mwāuntūdile bakulutuba benu pa ditompo ne kumpima, nansha byobāmwene mingilo yami mu bula bwa myaka 40.+ 10 O mwanda nākwatyīlwe lolwa lukongo munyanji kenena’mba: ‘Basāsukanga kitatyi kyonso mu mityima yabo, kadi kebayukilepo mashinda ami.’ 11 Penepo nātyipa na nsungu amba: ‘Kebakatwelangapo mwa kukōkolokwa mwami.’”+

12 Dyumukai, banwe banabetu, kekwakikala muntu nansha umo mu bukata mwenu wa kutamija mutyima mubi wa kubulwa lwitabijo na kubomboka kudi Leza mūmi;+ 13 ino mwikankamikei banwe bene na bene difuku ne difuku, pano podikītwa bu “Dyalelo,”+ kutyina’mba muntu nansha umo mu bukata mwenu wakōmijibwa mutyima na bukomo bwa kyongo bwa bubi. 14 Mwanda na bubine twi ba kwiabila pamo na Kidishitu enka shi tukwatyije pototo kufika ne ku mfulo kikulupiji kyotwadi nakyo tamba ku ngalwilo.+ 15 Monka mokinenenwa’mba, “Dyalelo shi mwivwane diwi dyandi, kemwakyūmijai mityima yenu pamo na mu kyokya kitatyi kyaākelelwe bulobo bulula bululu.”+

16 Lelo i bāni bene bāivwene ino bāmukela bulobo bulula bululu? Na bubine, le ke bobapo bonso bātambile mu Edipito na Mosesa?+ 17 Ne kadi, le i bāni bobākwatyīlwe munyanji kudi Leza mu bula bwa myaka 40?+ Le ke bobapo bālongele bubi, ne imbidi yabo mifwe yāponena mu ntanda mutuputupu?+ 18 Kadi le i bāni baātyipīle amba kebakatwelapo mwa kukōkolokwa mwandi? Le ke bobapo bālongele bintu pampikwa kikōkeji? 19 Nanshi tubamone amba kebātwelele’mopo pa mwanda wa kubulwa lwitabijo.+

4 Nanshi, mulao wa kutwela mwa kukōkolokwa mwandi byoukidi’ko, tudyumukei* kutyina’mba muntu nansha umo mu bukata mwenu wakabulwa’o.+ 2 Mwanda batwe netu twasapwidilwe myanda miyampe,+ mobāsapwidilwe’yo abo; ino kinenwa kyobāivwene kebāmwenine’mopo, mwanda kebādipo na lwitabijo na lwa boba bāivwene. 3 Mwanda batwe balombola lwitabijo tutwelanga mwa kukōkolokwa, monka mwawānenene amba: “Penepo natyipa na nsungu amba, ‘Kebakatwelangapo mwa kukōkolokwa mwami,’”+ nansha mingilo yandi byoyāpwile tamba ku ñanjilo ya ino ntanda.+ 4 Mwanda wēsambile pantu pamo pa mwanda wa difuku dya busamba-bubidi namino amba: “Kadi Leza wakōkolokwa mu difuku dya busamba-bubidi ku mingilo yandi yonso,”+ 5 pano napo wanena’mba: “Kebakatwelangapo mwa kukōkolokwa mwami.”+

6 Nanshi byokukidi ba kutwela’mo, kadi boba bāsapwidilwe dibajinji myanda miyampe byokebātwelele’mopo mwanda wa kubulwa kikōkeji,+ 7 watunga’ko monka difuku kampanda pa kunena mwenda mafuku mu lwimbo lwa mitōto lwa Davida amba, “Dyalelo”; monka mokinenenwe kūlu’ku amba, “Dyalelo shi mwivwane diwi dyandi, kemwakyūmijai mityima yenu.”+ 8 Mwanda shi Yoshua+ wēbafikije mu kifuko kya kukōkolokwa, Leza kadipo kadi wa kwisambila mwenda mafuku pa difuku dikwabo. 9 Nanshi kukidi sabato ya kukōkolokwa ku bantu ba Leza.+ 10 Mwanda muntu utwela mwa kukōkolokwa mwa Leza nandi wakōkolokwa ku mingilo yandi aye mwine, mwākōkolokēlwe Leza ku yandi.+

11 Nanshi tulongei bukomo bonso tutwele muno mwa kukōkolokwa, kutyina’mba muntu nansha umo wakaponena mu kimfwa kimo kyonka kya kubulwa kikōkeji.+ 12 Mwanda kinenwa kya Leza i kyūmi kadi kidi na bukomo,+ kidi na bui kutabuka kipete kya bui kubidi+ kadi kisabanga enka ne byokyabanya muya* ne mushipiditu,* nungilo ya mikupa ku māni a mu mikupa, kadi kibwanya kujingulula milangwe ne mifwatakanyo ya mutyima. 13 Kadi i kutupu kipangwa nansha kimo kifyeme ku meso andi,+ ino bintu byonso bidi mutaka kadi i bisokokele patōka ku meso a yewa mwine otukeshintulwila’ko.+

14 Nanshi byotudi na kitobo mukatampe mpata watwelele mūlu, Yesu Mwanā Leza,+ twendelelei kumusapula patōkelela.+ 15 Mwanda ketudipo na kitobo mukatampe kakokejapo kwitūla pa kyetu kyaba mu bukōkekōke bwetu,+ ino tudi na yewa watompelwe mu byonso pamo bwa batwe, ino kwampikwa bubi.+ 16 Nanshi tufwenei ku lupona lwa kanye ka ku buntu bitupu ne kunena pampikwa kafinda,+ mwanda wa tufwilwe lusa ne kutambula kanye ka ku buntu bitupu ka kwitukwasha pa kitatyi kifwaninwe.

5 Mwanda kitobo mukatampe ense uyetwe mu bantu utūlwanga pa bintu bya kwa Leza+ pa mwanda wabo, amba alambule byabuntu ne bitapwa pa mwanda wa bubi.+ 2 Aye ubwanya kukwatyilwa lusa* bantu ba kubulwa kuyuka kadi balonga bilubo,* mwanda nandi ulwanga na* bwandi bukōkekōke, 3 o mwanda aye ufwaninwe kulambula milambu pa mwanda wa bubi bwandi monka mwalambwila pa mwanda wa bubi bwa bantu.+

4 Muntu kepangapo aye mwine buno bulēme, ino utambulanga’bo enka shi i mwitwe na Leza, monka mwāityilwe Alone.+ 5 Ne Kidishitu nandi ketumbijepo aye mwine+ pa kwikala kitobo mukatampe, ino bamutumbije kudi Yewa wamunenene’mba: “Abe wi wami mwana; dyalelo’di nakubutula.”+ 6 Monka mwanenena ne pantu pakwabo amba, “Abewa wi kitobo nyeke mu muswelo wa Melekisedeka.”+

7 Kidishitu paadi ukidi pano panshi,* wazenzele ne kulomba na diwi dikatampe ne impolo+ kudi Yewa mwine wadi ubwanya kumupandija ku lufu, kadi waivwanikilwe biyampe mwanda wadi wakaminwe Leza. 8 Nansha byaadi mwana, wefundile kikōkeji ku masusu awasusukile.+ 9 Kadi aye pa kupwa kufikijibwa ku bubwaninine,+ wapelwe kiselwa mwanda wa lupandilo lwa nyeke lwa boba bonso bamukōkela,+ 10 mwanda aye watongelwe na Leza bu kitobo mukatampe mu muswelo wa Melekisedeka.+

11 Tudi na bivule bya kunena pa mwanda wandi, kadi i bikomo kushintulula mwanda kemukivwanangapo bukidi. 12 Mwanda, nansha pano* byomufwaninwe kwikala bafundiji, mukisaka monka muntu wa kwimufundija tamba ku ñanjilo bintu bya kyalwilo+ bya binenwa bikola bya Leza, kadi mubajoka kunyuma kemusake mabele, pa kyaba kya byakudya bikomo. 13 Mwanda muntu yense wendelela kutoma mabele kayukilepo kinenwa kya boloke, mwanda i mwana mutyetye.+ 14 Ino byakudya bikomo i bya bantu batame, boba bebidije kala ñeni yabo ya kujingulula* bintu na kwingidija’yo, mwa kushiañenya ne kiyampe ne kibi.

6 Nanshi, pano potwashiya lufundijo lubajinji+ lwa myanda ya Kidishitu, twielelei’ko bininge tufikile pa butame,+ pampikwa kwala kyalwilo dikwabo, ko kunena’mba, kwisāsa ku mingilo mifwe ne lwitabijo mudi Leza, 2 bufundiji bwa mbatyijo ne kutenteka ba makasa,+ lusangukilo lwa bafwe+ ne butyibi bwa nyeke. 3 E motukalongela, shi bine Leza uswile.

4 Mwanda ku boba bamunikīlwe,+ batompa ne ku kyabuntu kya ku bitupu kya mūlu, kadi batambula ne mushipiditu ujila, 5 batompa ne ku kinenwa kilumbuluke kya Leza ne ku bukomo bwa ngikadilo ya bintu ikāya’ko,* 6 ino bapona,+ kebibwanikapo kwibalwija monka ku kwisāsa, mwanda abo bene bapopelanga monka Mwanā Leza ku mutyi ne kumufwija bumvu ku meso a bantu.+ 7 Mwanda nshi itambulanga dyese dya kwa Leza shi itoma mema a mvula unokelanga’po divule, kupwa yameneja munamuna ya kamweno ku boba badiminwe’yo. 8 Inoko shi imeneje miba ne bapimbye, ipelwanga kadi idi pabwipi na kufingwa mafingo, ku mfulo ikasōkwa mudilo.

9 Ino kudi banwe, baswedibwe, tukulupile na kusumininwa bintu bilumbuluke, bintu bya lupandilo, nansha shi tubanena namino. 10 Mwanda aye Leza ke mukondamepo wa kwilwa mingilo yenu ne buswe bomwalombwele mwanda wa dijina dyandi,+ pa kwingidila bajila ne kadi mukyendelela kwibengidila. 11 Ino batwe tusaka’mba banwe bonso mulombole bupyasakane bumo bonka mwa kwikadila na kikulupiji kikatampe kya lukulupilo+ kufika ne ku mfulo,+ 12 amba muleke kwikala na mulēle,+ ino mwiule boba bakapyana milao kupityila ku lwitabijo ne kitūkijetyima.

13 Mwanda Leza pawālaile Abalahama, byakādipo ubwanya kutyipa mu dijina dya muntu utabukile bukata, wātyipile mu dijina dyandi aye mwine,+ 14 amba: “Bine nkakweselanga dyese, kadi bine nkakuvudijanga.”+ 15 Ebiya Abalahama pa kupwa kulombola kitūkijetyima, wātambwile uno mulao. 16 Mwanda bantu batyipanga mu dijina dya yewa utabukile bukata, kadi mutyipo wabo upwanga lupata lo-lonso, mwanda ao kyo kyeya kobadi.+ 17 Ne Leza nandi mo monka, paāsakile kulombola patōka bampyana ba mulao+ amba mpango* yandi keishintangapo, wākulupije’byo* na mutyipo, 18 pa kusaka’mba mu bintu bibidi bya kubulwa kushinta kemukokejapo Leza kubepa,+ batwe banyemene twaenda mwa kufyama, twikale na bukankamane bukatampe bwa kukwatyija pototo lukulupilo lwitutūdīlwe kumeso. 19 Tudi na luno lukulupilo+ pamo bwa ñanga wa muya wetu,* lwa binebine kadi lushimate, kadi lutwelanga munda mwa mpashila,+ 20 mwatwelele pa mwanda wetu yewa wetubadikile, Yesu,+ mwine waikala ke kitobo mukatampe nyeke mu muswelo wa Melekisedeka.+

7 Mwanda uno Melekisedeka, mulopwe wa Saleme, kitobo wa Leza Mwine wa Peulu Mwine, wētene na Abalahama wādi utamba kwaākatapile balopwe, wāmwesela,+ 2 kadi Abalahama wāmupa* kipindi kimo kya pa bipindi dikumi bya bintu byonso. Dibajinji, dijina dyandi dishintulula’mba, “Mulopwe wa Boloke,” ne kadi i mulopwe wa Saleme, ko kunena’mba, “Mulopwe wa Ndoe.” 3 Byakadipo na shandi, nansha inandi, ne musuku mpika, kadipo na ngalwilo ya mafuku nansha mfulo ya būmi mine, ino waikala pamo bwa Mwanā Leza, i kitobo wa kitatyi kyonso.*+

4 Mubamone mwādi mubaile uno muntu wāpelwe na Abalahama, mutwe wa kisaka,* kipindi kimo kya pa bipindi dikumi bya bitūtwa bilumbuluke.+ 5 Bine, mwendele Bijila, bana ba Levi+ bāpelwe mwingilo wa butobo bādi na mbila ya kukonga bya kujikija dikumi ku bantu,+ ko kunena’mba, ku banababo, nansha banababo byobādi lutundu lwa* Abalahama. 6 Ino uno muntu ke wa ku musuku wabopo wātambwile bya kujikija dikumi kudi Abalahama kadi wāesele yewa wādi na milao.+ 7 Shi ke pano i kutupu kya kupatana, mutyetye ye weselwanga na mukatampe. 8 Ku mutamba umo, i bantu bafwa batambulanga bya kujikija dikumi, ino ku mutamba mukwabo, i muntu usapulwa bukamoni amba i mūmi.+ 9 Kadi tukokeja kunena’mba nansha ke Levi, mwine utambulanga bya kujikija dikumi, wāfutyile bya kujikija dikumi kupityila kudi Abalahama, 10 mwanda wādi ukidi lutundu lukāya’ko lwa* mukulutuba wandi pobētene na Melekisedeka.+

11 Ino shi bubwaninine bwadi bufikilwa’po kupityila ku butobo bwa bene Levi+ (mwanda kyadi kintu kibadilwa mu Bijila byāpelwe bantu), le i kika kyadi kya kusakilwa kutambe kitobo mukwabo unenwa’mba udi mu muswelo wa Melekisedeka,+ ino ke mu muswelopo wa Alone? 12 Mwanda butobo byobushinta, i kyendele’mo kushinta ne Bijila bine.+ 13 Mwanda muntu mwine unenenwa bino’bi watambile mu kisaka kingi, kemwadipo muntu nansha umo waingile ku kisōkelo.+ 14 Mwanda i kimweke patōka’mba Mfumwetu i wa ku musuku wa Yuda,+ ino Mosesa kānenenepo mwanda nansha umo amba babitobo bakatamba ku kino kisaka.

15 Kadi kibamwekelela’tu patōka pano pokwatamba kitobo mukwabo+ udi pamo bwa Melekisedeka,+ 16 waikala’bo, ke pa bijilapo bya kulonda musuku wa ku mashi, aa, ino i pa bukomo bwa būmi kebonakanibwapo.+ 17 Mwanda i kinenwe bukamoni pa mwanda wandi amba: “Abewa wi kitobo nyeke mu muswelo wa Melekisedeka.”+

18 Nanshi mbila mibajinji yatalwilwe’ko mwanda i mizoze kadi yampikwa kamweno.+ 19 Mwanda Bijila kebyāfikijepo kintu nansha kimo ku bubwaninine,+ ino kutweja kwatwejibwe lukulupilo lulumbuluke+ kwebifikije’ko, kadi pa luno lukulupilo tufwenanga kubwipi na Leza.+ 20 Kadi, kino’ki byokekyalongelwepo pampikwa kutyipa mutyipo 21 (mwanda na bubine, kudi bantu baikele babitobo pampikwa kutyipilwa mutyipo, ino uno’u waikala’bo na mutyipo utyipilwe pa mwanda wandi na Yewa wānenene amba: “Yehova* watyipe, kadi kakashintapo milangwe yandi,* amba ‘Abewa wi kitobo nyeke’”),+ 22 ne Yesu nandi mo monka, waikala bu kyeya* kya kipwano kipite buya.+ 23 Ne kadi, bavule bādi banenwe kwikala babitobo bepingakana+ mwanda lufu lwādi lwibakankaja kwikala’bo nyeke, 24 ino aye byadi mūmi nyeke,+ butobo bwandi kebudipo na ba kumupingakana. 25 O mwanda mwine aye ubwanya ne kupandija lonso boba bafwena Leza kupityila kwadi, ke-pantu i mūmi mafuku onso mwanda wa kwibanenena’ko.+

26 Mwanda i kyendele’mo twikale na kitobo mukatampe udi namino, wa lulamato, wampikwa mambo, wampikwa disubi,+ musansane na babipya-mambo, kadi muzunzulwe peulu pa madiulu.+ 27 Byadi mwishile na boba babitobo bakatampe, aye kadipo kyaelela bitapwa difuku ne difuku,+ dibajinji pa mwanda wa bubi bwandi aye mwine, kupwa ke bwa bantu,+ mwanda waelele’kyo dimo kupwididile, pawelambwile aye mwine.+ 28 Mwanda Bijila bitoñanga bantu badi na bukōkekōke bu babitobo bakatampe,+ ino kinenwa kya mutyipo+ utyipilwe kupwa kwa Bijila kibatonge Mwana, wafikijibwa ku bubwaninine+ nyeke.

8 Pano mwanda mukatampe mu byotwesamba’bi i uno: Tudi na kitobo mukatampe namino,+ kadi ushikete kala ku kuboko kwa lundyo lwa lupona lwa Mukatakata momwa mūlu,+ 2 mwingidi* wa mu kifuko kijila+ ne mu pema wa bine, ushimikilwe na Yehova,* ke na muntupo, aa. 3 Mwanda kitobo mukatampe ense utoñwanga mwanda wa kulambula byabuntu ne bitapwa; o mwanda i kyendele’mo uno’u nandi ekale na kintu kya kulambula.+ 4 Shi wadi pano pa ntanda, longa ke kitobopo,+ mwanda padi kala bantu balambula byabuntu mwendele Bijila. 5 Bano bantu’ba bengilanga mingilo ikola bu kyelekejo ne bu munjiñininya+ wa bintu bya mūlu;+ pamo bwa Mosesa, paādi kasake kushimika pema, wāpelwe musoñanya wa Leza: Mwanda Aye unena’mba: “Tadija ulonge byonso mungya kimfwa kyabyo kya kulondela’po, kyokya kyakulombwelwe mu lūlu.”+ 6 Inoko pano Yesu i mutambule mwingilo* mulumbuluke kutabuka, mwanda aye kadi i nsenga+ wa kipwano kipite buya,+ kine kimanine pa milao mipite buya.+

7 Shi kyokya kipwano kibajinji kyadi kyampikwa kilubo, longa i kutupu kisakilwa kipwano kya bubidi.+ 8 Mwanda aye uboyanga bantu tuto panena’mba: “‘Tala! Mafuku āyanga,’ i Yehova* unena, ‘onkasamba kipwano kipya na njibo ya Isalela ne na njibo ya Yuda. 9 Kekikekalapo pamo bwa kipwano kyonasambile na bakulutuba babo mu difuku dyonebakwete ku kuboko nebatambija mu ntanda ya Edipito,+ byokebashelepo nyeke mu kipwano kyami, nami naleka kwibata mutyima,’ i Yehova* unena.

10 “‘Mwanda kino’ki i kipwano kyonkasamba na njibo ya Isalela pakapwa oa mafuku,’ i Yehova* unena. ‘Nkatūla bijila byami mu ñeni yabo, kadi nkalemba’byo mu mityima yabo.+ Ami nkekalanga Leza wabo, nabo bakekalanga bantu bami.+

11 “‘Kadi kebakefundijapo monka, au ufundija mukwabo, au nandi ufundija mwanabo, amba: “Yuka Yehova!”* Mwanda bonso bakandyuka, kushilwila ku mutyetye bininge kutūla ne ku mukatampe bininge mobadi. 12 Mwanda ami nkebafwila lusa pa bilongwa byabo bikondame, kadi nkikavulukapo monka bubi bwabo.’”+

13 Aye pa kunena’mba “kipwano kipya,” waalamuna kipwano kibajinji ke kya kala.+ Nanshi kyokya kya kala kadi kyenda kinunupa, kekidi pabwipi na kujimankana.+

9 Kipwano kya kala, akyo, kyādi na bijila bya mingilo ikola ne kifuko kijila+ pano pa ntanda. 2 Mwanda kwāshimikilwe kandimbwa kabajinji ka pema mwādi kitūlwa-binanu+ ne meza ne pa kutūla mikate milambulwe;*+ kadi ketwanga bu Kifuko Kijila.+ 3 Ino kunyuma kwa mpashila+ ya bubidi kwādi kandimbwa ka pema ketwa bu Kijila Nakampata.+ 4 Mwādi kisōkelwa’mo ensense kya olo*+ ne sanduku wa kipwano+ mulamike’ko olo aye ense,+ mwine mwādi mutyibi wa olo mudi māna+ ne mukombo wa Alone wāshipukile’wa+ ne bipāpo+ bya kipwano; 5 kadi pangala pa sanduku pādi bakelubi ba ntumbo bapūtyile pa mpūto ya kupwanija.*+ Inoko kino ke kitatyipo kya kwisamba bino bintu kamo ne kamo.

6 Bino bintu pa kupwa kushimikwa uno muswelo, babitobo badi batwelanga mu kandimbwa kabajinji ka pema kitatyi kyonso mwanda wa kwingila mingilo ikola;+ 7 ino kitobo mukatampe utwelanga bunka mu kandimbwa ka bubidi musunsa umo ku mwaka,+ ke pampikwapo mashi,+ awadi ulambula pa mwanda wandi aye mwine+ ne pa mwanda wa bubi bulongele bantu+ pampikwa kuyuka. 8 Enka nenki mushipiditu ujila ubalombola’kyo patōka’mba dishinda dya mu kifuko kijila dyadi kedyasokwelwe padi pakidi’ko pema mubajinji.+ 9 Uno pema i kyelekejo kya mu kino kitatyi,+ kadi mwendele ino mpangiko, byabuntu ne bitapwa bilambulwanga.+ Inoko, bino’bi kebikokejapo kufikija mutyima wa mundamunda wa muntu wingila mingilo ikola ku bubwaninine.+ 10 Bitalanga’tu enka byakudya ne byakutoma ne koijibwa mungya bijila palapala.*+ Abyo byādi bijila bya umbidi+ kadi byādi biningilwa bantu kufika ne pa kitatyi kitungwe mwanda wa kusendulula bintu.

11 Inoko, Kidishitu pa kwiya bu kitobo mukatampe wa bintu biyampe bilongekele kala, watwelele mu pema mukatampe kadi mubwaninine mpata wampikwa kulongwa ku makasa, ko kunena’mba, ke wa buno bupangipo. 12 Watwelele mu kifuko kijila, ke na mashipo a bambuji ne a byana bya bañombe, aa, ino i na mashi andi aye mwine,+ dimo kupwididile, wetusokwela bunyongolodi* bwa nyeke.+ 13 Mwanda shi mashi a bambuji ne a bañombe+ ne buto bwa ñombe mukaji mwana bukuswa boba basubile bibapandulanga mwanda wa kutōkeja ngitu,+ 14 le mashi a Kidishitu+ papo ke pepi, mwine wepēne aye mwine kupityila ku mushipiditu wa nyeke pampikwa kakoba kudi Leza, mwene o mene akatōkeja mityima yetu ya mundamunda ku mingilo mifwe+ amba tumone mwa kwingidila Leza mūmi mingilo ikola?+

15 O mwanda aye i nsenga wa kipwano kipya,+ amba byaafwile mwanda wa kwibanyongolola na kinkūlwa+ ku kujilula kobadi bajilula mu kipwano kya kala, boba betyilwe batambule mulao wa bupyani bwa nyeke.+ 16 Mwanda kokwa kudi kipwano, muntu upwanya kipwano’kya ufwaninwe kufwa, 17 mwanda kipwano kingilanga pa lufu, ke-pantu kekidipo na bukomo nansha dimo shi muntu upwanya’kyo’wa ukidi mūmi. 18 O mwanda, nansha ke kipwano kya kala kine kekyāshilwilepo* pa kubulwa mashi. 19 Mwanda Mosesa paālombwele bantu bonso mbila yonso ya mu Bijila, wātekwine mashi a byana bya bañombe ne a bambuji, pamo ne mema, ne myoya ityila pyā, ne kimuna kya hisopa, wākusa pa mukanda* ne pa bantu bonso, 20 kanena’mba: “Ano’a i mashi a kipwano kyemusoñanya Leza kulama.”+ 21 Kadi wakushile mashi+ ne ku pema ne ku bipungwa byonso bya mingilo ijila.* 22 Bine, mwendele Bijila, kubwipi kwa bintu byonso bisubulwanga na mashi,+ kadi shi mashi keamwangikilepo i kutupu kulekelwa mambo.+

23 Nanshi, kyadi kyendele’mo kyelekejo+ kya bintu bya mūlu kisubulwe uno muswelo,+ inoko bintu bya mūlu bisakilwa bitapwa bipite buya kutabuka. 24 Mwanda Kidishitu katwelelepo mu kifuko kijila kilongwe na makasa,+ kimfwa kya kyokya kya binebine,+ ino watwelele mūlu mwine,+ mwanda wa kumweka ku meso a* Leza pa mwanda wetu.+ 25 Kalongelepo namino mwanda wa kwilambula aye mwine divulevule, mwādi mutwelela kitobo mukatampe mwaka ne mwaka+ mu kifuko kijila na mashi ke andipo. 26 Shi byadi nankyo, longa wadi wa kususuka divulevule tamba ku ñanjilo ya ino ntanda. Ino pano welombola aye mwine dimo kupwididile ku mvuyo ya ngikadilo ya bintu* mwanda wa kufundula bubi kupityila ku kitapwa kya aye mwine.+ 27 Kadi monka mufwaninwe kufwila bantu dimo kupwididile, ebiya ke kutyibilwa butyibi, 28 ne Kidishitu nandi mo monka walambwilwe dimo kupwididile mwanda wa kusela bubi bwa bavule;+ kadi pasa kumweka dya bubidi ke pa mwandapo wa bubi, kadi ukamonwa na boba bamukimba na mikeketo mwanda wa lupandilo lwabo.+

10 Mwanda Bijila byobidi na munjiñininya+ wa bintu bya kwiya,+ ino ke bintu binebinepo, kebibwanyapo* nansha dimo kufikija ku bubwaninine boba bafwena’ko na bitapwa bimo byonka bilambulwa nyeke mwaka ne mwaka.+ 2 Shi byadi nankyo, mwene longa bitapwa byadi bya kuleka kulambulwa? Mwanda boba bengilanga mingilo ikola pa kupwa kutōkejibwa, kebadipo ba kwikala monka na mutyima wibatopeka pa bubi bwabo. 3 Inoko, bino bitapwa bivulujanga bubi mwaka ne mwaka,+ 4 mwanda mashi a bañombe ne a bambuji keabwanyapo kufundula bubi.

5 O mwanda aye pa kwiya mu ino ntanda, unena’mba: “‘Kitapwa ne kyamulambu kwasakile’byopo, ino abe waunongolwedile umbidi. 6 Kwaloelelwepo byamulambu bisōkwe bituntulu ne byamulambu bya bubi.’+ 7 Penepo nanena’mba: ‘Tala! Naiya (mu muvungo* i kinembelwe) kulonga kiswa-mutyima kyobe, abe Leza.’”+ 8 Pa kupwa kunena bidi amba: “Abe kwasakilepo nansha kuloelelwa bitapwa ne byamulambu, ne byamulambu bisōkwe bituntulu ne byamulambu bya bubi”—bitapwa bilambulwa mwendele Bijila— 9 ebiya wanena’mba: “Tala! Naiya kulonga kiswa-mutyima kyobe.”+ Watalula kyokya kibajinji mwanda wa kushimika kino kya bubidi. 10 Pa kino “kiswa-mutyima,”+ tubapandulwa ponka pa kyamulambu kya umbidi wa Yesu Kidishitu dimo kupwididile.+

11 Ne kadi, kitobo ense wikalanga pa kyandi kyaba difuku ne difuku mwanda wa kwingila mingilo ijila*+ ne kulambula bitapwa bimo byonka divulevule,+ bintu kebikokejapo nansha dimo kufundwididila bubi.+ 12 Ino uno muntu walambwile kitapwa kimo kya kitatyi kyonso pa mwanda wa bubi, ebiya wakashikata ku lundyo lwa Leza,+ 13 tamba papo wilaije enka ne bitūlwa balwana nandi bu kitūlo kya maulu andi.+ 14 Mwanda i pa kulambulwa kwa kitapwa kimo paafikije boba bapandulwa ku bubwaninine+ kitatyi kyonso. 15 Ne kadi, mushipiditu ujila nao witusapwilanga bukamoni, mwanda ao pa kupwa kunena’mba: 16 “‘Kino’ki i kipwano kyonkasamba nabo pakapwa oa mafuku,’ i Yehova* unena. ‘Nkatūla bijila byami mu mityima yabo, kadi nkalemba’byo mu ñeni yabo.’”+ 17 Ebiya unena’mba: “Kadi nkikavulukapo monka bubi bwabo ne bilongwa byabo bya kujilula.”+ 18 Nanshi popa padi kulekelwa kwa bino’bi, kepakidipo kadi kyamulambu kya bubi.

19 Shi ke pano, a banabetu, byoketudipo na moyo wa* kupityila mu dishinda ditwela mu kifuko kijila+ pa mashi a Yesu, 20 dine dyawetushitwidile* bu dishinda dipya kadi dya būmi ponka pa mpashila,+ ke ngitu yandi kadi, 21 ne byotudi na kitobo mukata utūdilwe pa njibo ya Leza,+ 22 tufwenei’ko na mityima tō ne lwitabijo lonso, mityima yetu mitōkejibwe* ku mutyima wa mundamunda mubi+ kadi imbidi yetu myoijibwe mema atōka tō.+ 23 Tutakamanei kusapula lukulupilo lwetu ne kutenkena mpika,+ mwanda yewa mwine ulaile i wa binebine. 24 Kadi twitei mityima* batwe bene na bene mwanda wa kwikankamikila* ku buswe ne ku mingilo milumbuluke,+ 25 ne kuleka’byo kwibungila pamo kwetu mpika,+ na mwaibidila bamobamo, ino twikankamikei batwe bene na bene,+ nakampata pano pomwamona difuku dibafwena po pene.+

26 Mwanda shi tulongalonga bubi ku kusaka batwe papo ketudi kala batambule buyuki bwinebwine bwa bubine,+ kekukishelepo kitapwa kya bubi nansha kimo,+ 27 ino kudi butyibi kampanda bulenga moyo bwitutengele kadi kudi bukalabale butēma mudilo busa kuloteja balwana.+ 28 Muntu ense ufutulula Bijila bya Mosesa ufwanga pampikwa lusa, pa bukamoni bwa bantu babidi nansha basatu.+ 29 Langai’po bidi, le mfuto ifwaninwe muntu unyantyila panshi Mwanā Leza, kadi umona mashi a kipwano+ amupandwile bu a mvubu mityetye, ufutulula na kibengo mushipiditu wa kanye ka ku buntu bitupu papo ke pepi, mwene yo mine mipite bukata?+ 30 Mwanda tuyukile Mwine wanenene amba: “Kinongo i kyami; i ami ukajokeja.” Kadi amba: “Yehova* ukatyibila bantu bandi mambo.”+ 31 I kintu kilenga moyo kuponena mu makasa a Leza mūmi.

32 Inoko, vulukai nyeke mafuku a kala omwaikele kūminina bulwi bukatampe ne masusu pa kupwa kumunikilwa.+ 33 Kyaba kimo mwadi* mufutululwa ne kumweshibwa malwa pa bantu, kadi kyaba kikwabo mwadi mwiabila na* boba badi batanwa na bino bintu. 34 Mwanda mwetūdile pa kyaba kya boba badi mu kifungo kadi mwaitabije na nsangaji kutūtwa bintu byenu,+ pa kuyuka’mba banwe bene mudi na kintu kipite buya kadi kya kulādila nyeke.+

35 Nanshi, kemwakafundwilai kulampe kubulwa moyo* kwenu, kwine kukemupadilwa mpalo ya ntanda ne miseke.+ 36 Mwanda mufwaninwe kūminina,+ amba shi mubapu kulonga kiswa-mutyima kya Leza, mumone kufikidila kwa mulao. 37 Mwanda kukishele “kakitatyi katyutyutyutyu,”+ kadi “yewa wiya usa kufika kadi kasapo kwija.”+ 38 “Ino moloke wami ukekalanga mūmi pa mwanda wa lwitabijo,”+ kadi “shi ajokele kunyuma, nkiloelelwangapo* mwadi nansha dimo.”+ 39 Ino batwe ketudipo mu boba bajokela kunyuma ku bonakani,+ ino tudi mu boba badi na lwitabijo mwanda wa kulama būmi bwetu.*

11 Lwitabijo i kutengela na kikulupiji byobya bikulupilwe,+ i kilomboji kimweke patōka kya* bintu bya bine byampikwa kumweka. 2 Mwanda pa lwitabijo, bantu ba pa kala* bāsapwidilwe bukamoni.

3 Pa lwitabijo tumonanga’mba ngikadilo ya bintu* yātūdilwe mu ndudi pa kinenwa kya Leza, mu uno muswelo, byobya bimweka i bitambe ku bintu kebimwekapo.

4 Pa lwitabijo Abele wālambwile kudi Leza kitapwa kya bulēme bukatampe kupita kya Kaini,+ kadi kupityila ku luno lwitabijo wātambwile bukamoni amba i moloke, mwanda Leza wāloelelwe* byabuntu byandi,+ kadi nansha byaāfwile, ukīsambanga+ ne pano kupityila ku lwitabijo lwandi.

5 Pa lwitabijo Enoke+ wātundulwilwe kutyina’mba wakamona lufu, kadi kātenwepo kuntu nansha kumo mwanda Leza wāmutundulwile;+ ino kumeso kwa kutundululwa’ye wātambwile bukamoni amba wāsangeje Leza biyampe. 6 Ne kadi, pampikwa lwitabijo kebibwanikapo kusangaja Leza biyampe, mwanda yewa ense umufwena ufwaninwe kwitabija’mba udi’ko* ne amba upalanga mpalo boba bamukimba na mikeketo.+

7 Pa lwitabijo Noa,+ pa kupwa kudyumunwa na Leza ku bintu byādi kebyamwekele,+ wālombwele amba wakaminwe Leza ne kūbaka safina+ mwanda wa kupandija ba mu njibo yandi; kupityila ku luno lwitabijo wāponeje ntanda,+ wāikala ke mpyana wa boloke butamba ku lwitabijo.

8 Pa lwitabijo Abalahama,+ pobāmwityile, wākōkele wātaluka kaenda ku kifuko kyaādi wa kutambula bu bupyani; wāendele, nansha byakādipo uyukile kwaenda.+ 9 Pa lwitabijo wāshikete bu mweni mu ntanda ya mulao bwa mu ntanda-bene,+ wāshikata mu mapema+ na Izake ne Yakoba, bampyana pamo nandi ba mulao umo onka.+ 10 Mwanda wādi wilaija kibundi kya byalwilo bya bine, Leza ye sendwe wēkifwatakenye ne mūbaki wakyo.+

11 Pa lwitabijo Sala nandi wātambwile bukomo bwa kwimita lutundu,* nansha byaādi ke mupite myaka,+ mwanda wāmwene amba mwine wāmulaile’wa i wa binebine.* 12 O mwanda, ku mwana-mulume umo wādi enka bwa mufwe,+ kwābutwilwe bana+ bavule’nka bwa ñenyenye ya mūlu, kadi kebabadika pamo bwa musenga wa ku mbadi ya dijiba.+

13 Bano bonso bāfwidile mu lwitabijo, nansha byokēbatambwilepo kufikidila kwa milao;+ ino bēimwene’tu kulampe+ bēisepelela ne kusapula patōka’mba i beni kadi i ba lupito mu ntanda’ya. 14 Mwanda boba besamba namino balombolanga patōka’mba bakimbanga na mikeketo kifuko kyabo abo bene. 15 Inoko, shi bine bādi bavuluka’nka kuvuluka kokwa kobātambile,+ longa bāmwene muswelo wa kujokela’ko. 16 Ino pano bakimbanga kifuko kipite buya, ko kunena’mba, kya mūlu. O mwanda Leza kebakwatyilwangapo bumvu, pa kwitwa bu Leza wabo,+ mwanda i mwibalongolwele kibundi.+

17 Pa lwitabijo Abalahama, pa kutompibwa,+ wādi’nka na aye wālambwile Izake—aye muntu wātambwile na nsangaji milao, wāsakile kulambula wandi mwana wa bunka+— 18 nansha byobāmulombwele amba: “Kyokya kiketwa bu lutundu* lobe kikatambanga kudi Izake.”+ 19 Ino wālangile amba Leza ubwanya kumusangula nansha ke mu bafwe, kadi wāmutambwile’mo mu muswelo wa kyelekejo.+

20 Pa lwitabijo Izake nandi wāesele Yakoba+ ne Esau+ pa bintu bikāya kumeso.

21 Pa lwitabijo Yakoba, paādi kafu,+ wāesele bana ba Yosefa+ bonso kadi wātōtele ukonkamene pa nsongo ya mukombo wandi.+

22 Pa lwitabijo Yosefa, paādi kadi ku mfulo, wātelele divilu dya bana ba Isalela, kadi wēbalombola* ne bya kulonga na mikupa yandi.*+

23 Pa lwitabijo Mosesa wāfilwe na bambutwile bandi myeji isatu pa kupwa kubutulwa,+ mwanda bāmwene amba mwana mutyetye’wa wādi mulumbuluke+ kadi kebātyininepo musoñanya wa mulopwe.+ 24 Pa lwitabijo Mosesa, pa kutama,+ wāpelele kwitwa bu mwana wa mwanā Felo mwana-mukaji,+ 25 wātonga’ko kususulwa pamo na bantu ba Leza pa kyaba kya kwikala na nsangaji ya lupito ya bubi, 26 mwanda wāmwene mifutululo ya Kidishitu bu bupeta bukatampe kutabuka byabulēme bya mu Edipito, mwanda wābambīle meso sō ku kupalwa mpalo. 27 Pa lwitabijo wātalukile mu Edipito,+ ino kātyininepo bulobo bwa mulopwe,+ mwanda wāimanije nyeke pamo bwa aye umwene Yewa wa kubulwa kumweka.+ 28 Pa lwitabijo wāsobele masobo a Pashika ne kushinga mashi, amba yewa wa konakanya wakasanshija* babo bana babedi.+

29 Pa lwitabijo bāpityile pa Dijiba Dityila pamo’nka bwa pa nshi myūmu,+ ino bene Edipito nabo pa kutompa, bāminwa kubyu.+

30 Pa lwitabijo mumbu ya Yediko yāponene pobāpwile kwiijokoloka mafuku asamba-abidi.+ 31 Pa lwitabijo Lehaba ndumba kāfwilepo pamo na boba bālongele bya kubulwa kikōkeji, mwanda wātambwile batubedibedi mu ndoe.+

32 Le nene monka namani? Mwanda nsa kubulwa kitatyi shi ñendelele kubanga myanda ya ba Ngideoni,+ Balaka,+ Samishoni,+ Yefeta,+ Davida+ pamo ne Samwele+ ne bapolofeto bakwabo. 33 Kupityila ku lwitabijo bānekenye malopwe,+ bālongele byoloke, bātambwile milao,+ bāmuma byakanwa bya bantambo,+ 34 bātaleje bulobo bwa mudilo,+ bāpanda ku bui bwa kipete,+ boba bādi bazoze bākomejibwa,+ bāikala bakomo mu divita,+ bāpampanya bibumbo byēbatambile.+ 35 Bana-bakaji bātambula bafwe babo ku lusangukilo,+ ino bana-balume bakwabo bāsuswilwe bya mwiko mwanda kebāitabijepo kunyongololwa na kinkūlwa kampanda, amba bafikile pa lusangukilo lupite buya. 36 Bine, bakwabo nabo bāfikilwe na bitompibwa bya kuzawilwa ne kukupilwa nsonde, bine, kutentekela pa bino, bākutwa miyololo+ ne kwelwa mu bifungo.+ 37 Bāashilwe mabwe,+ bātompibwa, bālalwa mpasu* na só, bātapibwa na kipete,+ bāenda koku ne koku bavwele biseba bya mikōko, ne biseba bya bambuji,+ pobādi bafudilwe, mu byamalwa,+ bāsusulwa;+ 38 kadi ino ntanda keyādipo mibafwaninwe. Bādi bendakana mu ntanda mutuputupu ne mu ngulu ne mu mitá+ ne mu mikembo ya panshi.

39 Inoko bano bonso’ba, nansha byobātambwile bukamoni buyampe pa lwitabijo lwabo, kebāmwenepo kufikidila kwa mulao, 40 mwanda Leza wētumwenine kala kintu kipite buya,+ kutyina’mba bakafikijibwa ku bubwaninine pampikwa batwe.

12 O mwanda nanshi, byotudi na kibumbo kikatampe namino kya* batumoni betujokolokele, twelei bulēmi bo-bonso ne bubi bwitutyinya bukidi bonka,+ kadi tunyemei na kūminina lubilo lotutungīlwe,+ 2 koku tubambile meso sō kudi Kalombwe Mukatampe, Mwine ufikija lwitabijo lwetu ku bubwaninine, ke Yesu+ kadi. Pa mwanda wa nsangaji yādi imutūdilwe kumeso waūminine mutyi wa masusu,* ne kubanga bumvu mpika, washikata ku lundyo lwa lupona lwa Leza.+ 3 Bine, tai mutyima bininge kudi uno waūminine binenwa bibibibi bya uno muswelo bya babipya-mambo+ balwa na tumweno twabo abo bene, kutyina’mba mwakakōka ne kuleka’byo.*+

4 Pomulwa na buno bubi, kemwakomene nansha dimo kufika ne bimwangika mashi enu. 5 Kadi mubaididilwa kwisāshila kobemwisāshila pamo bwa bana’mba: “Wami mwana, kokapēlula shi Yehova* wakulemununa, nansha kuleka’byo pakōlola; 6 mwanda boba bobasenswe kudi Yehova,* wibalemununanga, na bubine, ukupilanga nsonde* yewa ense watambula bu mwana.”+

7 Mufwaninwe kūminina mwanda nako kubadilwa mu kulemununwa* kwenu. Leza wimumwene bu bana.+ Mwanda i mwana’ka okebalemununangapo kudi shandi?+ 8 Ino shi kemulemunwinwepo banwe bonso uno muswelo, nankyo bine mwi bana ba kamabula,* ke bana benebenepo, aa. 9 Pakwabo kadi, batata ba pano panshi* badi betulemununanga, kadi twadi twibalēmekele. Le Tata wa būmi bwetu bwa ku mushipiditu ke pepi, mwene ye mwine otukakōkela na mutyima tō ne kwikala bōmi?+ 10 Mwanda betulemunwine kitatyi kityetye mwendele byobya byadi bimweka bu biyampe kobadi, ino aye witulemununanga mwanda wa kamweno ketu amba twikale bajila mwaikadile.+ 11 Bine, i kutupu kulemununwa kumwekanga bu kusangaja mutyima ponka na ponka, ino kusanshijanga mutyima;* inoko kupanga kipa kya ndoe kya boloke mungya kala ku boba bafundijibwa nako.

12 Nanshi, komejai maboko mazēle ne manwi mazoze,+ 13 kadi ololai nyeke tushinda twa maulu enu,+ amba kyokya kilemane kyakatelemuka, ino amba kibeluke. 14 Londalondai ndoe na bantu bonso,+ ne bupandulwe’mo*+ mwanda shi muntu kadipo nabo kakamonepo Mfumwetu. 15 Tadijai senene kutyina’mba muntu nansha umo wakabulwa kanye ka ku buntu bitupu ka Leza, amba muji wa bulembe wakamena keuleta kavutakanya kadi bavule kebasubijibwa nao;+ 16 kadi tadijai kutyina’mba mu bukata mwenu mwakekala muntu wa busekese* nansha muntu kalēmekapo bintu bikola, pamo bwa Esau, wāpēne lupusa lwandi lwa bu mwana umbedi ku nsāni umo wa byakudya.+ 17 Mwanda muyukile amba mwenda mafuku paādi kasake kupyana dyese wāpelelwe; mwanda nansha byaākimbile na mikeketo kushinta milangwe* ne impolo ponka,+ kābwenyepo.*

18 Mwanda banwe kemufwenenepo ku kintu kikokeja kutengwa+ kadi kyāakile lubimbi lwa mudilo,+ ne dilenga difīta fututu ne fukutu bwī ne kimpumpu,+ 19 ne kuvuma kwa kimpungidi+ ne diwi dīsamba,+ pa kwidivwana bantu bāabije amba kebakibalombola monka kintu kikwabo.+ 20 Mwanda kebākokejepo kulonda mbila ya amba: “Nansha shi nyema watenga ku lūlu, ufwaninwe kwaswa mabwe.”+ 21 Kadi, kyobāmwene’kya kyādi kilenga moyo enka ne Mosesa kanena’mba: “Nakwatwa moyo ne luzakalo.”+ 22 Ino banwe mubafwena ku Lūlu lwa Ziona+ ne kibundi kya Leza mūmi, Yelusalema wa mūlu,+ ne tununu makumi twa* bamwikeulu 23 mu kitango kikatakata,+ ne kipwilo kya bana babedi balembelwe mūlu, ne Leza Mutyibi wa bonso,+ ne būmi bwa ku mushipiditu+ bwa bantu boloke bafikijibwe ku bubwaninine,+ 24 ne Yesu nsenga+ wa kipwano kipya,+ ne mashi akushilwe, esamba senene shē kupita mashi a Abele.+

25 Tadijai kutyina mwakapela kwivwana* yewa wisamba. Mwanda shi boba bāpelele kwivwana yewa wādi uleta kidyumu kya Leza pano pa ntanda kebāpandilepo, le batwe papo ke pepi, ketukapandepo shi tuvundamina yewa wisamba momwa mūlu!+ 26 Mu kine kyaba’kya diwi dyandi dyātenkenye ntanda,+ ino pano walaa amba: “Nkatenkanya kadi monka, ke’nkapo ntanda kete, ino i ne diulu dine kumo.”+ 27 Kino kinenwa “Kadi monka,” kilombola kutalulwa kwa bintu bitenkanibwa, bintu bilongelwe, pa kusaka’mba bintu byampikwa kutenkanibwa bishale nyeke. 28 Nanshi, byotudi ba kutambula Bulopwe kebukokejapo kutenkanibwa, twendelelei nyeke kutambula kanye ka ku buntu bitupu, kotwingidila nako Leza mingilo ikola yaitabija na kutyina Leza ne nzuba ponka. 29 Mwanda Leza wetu i mudilo uloteja.+

13 Buswe bwenu bwa bu bana na bana bwendeende.+ 2 Kemwakīlwai kizaji,*+ mwanda kyāfikije bamo ku kutundaila bamwikeulu pampikwa kuyuka.+ 3 Vulukai nyeke boba badi mu kifungo,*+ pamo bwa banwe bakutyilwe nabo,+ ne boba basusulwa, mwanda nenu mudi mu ngitu.* 4 Busongi bulēmekibwe na bonsololo, ne butanda bwa buluo nabo bwikale bwampikwa disubi,+ mwanda Leza ukatyibilanga ba busekese* ne ba makoji mambo.+ 5 Mwikadilo wa būmi bwenu wikale wa kubulwa kusanswa lupeto,+ koku musangela bintu bidi’ko pano.+ Mwanda aye wānenene amba: “Nkikakushiyepo nansha dimo kadi nkikakwelapo nansha dimo.”+ 6 Amba twikale na bukankamane bukatampe ne kunena’mba: “Yehova* i mukwashi wami; nkikakwatwapo moyo. Le muntu ukokeja kunonga kika?”+

7 Vulukai boba bemutangidile kumeso,+ bemulombwele kinenwa kya Leza, kadi pomutala byobya bilupuka ku mwikadilo wabo, iulai lwitabijo lwabo.+

8 Yesu Kidishitu i umo enka kesha ne dyalelo, ne nyeke.

9 Kemwakyongolwai na bufundiji palapala kadi bweni, mwanda i kipite buya kukomeja mutyima na kanye ka ku buntu bitupu kupita’ko na byakudya,* bintu bya kubulwa kamweno ku boba bepēne’mo.+

10 Tudi na kisōkelo, boba bengila mingilo ikola ku pema kebadipo na lupusa lwa kudya’ko.+ 11 Mwanda imbidi ya boba banyema baselwanga mashi abo na kitobo mukatampe kukeatwala mu kifuko kijila bu kyamulambu kya bubi, isōkelwanga panja pa nkambi.+ 12 O mwanda, Yesu nandi wasusukīle panja pa kibelo kya kibundi+ mwanda wa kupandula bantu na mashi andi aye mwine.+ 13 Nanshi, twendei kwadi panja pa nkambi, koku tuselele mifutululo yaaselele,+ 14 mwanda ketudipo pano na kibundi kya nyeke, ino tukimbanga na mikeketo kyokya kikāya’ko.+ 15 Kupityila kudi aye, tulambulei mafuku onso kudi Leza kitapwa kya mitendelo,+ ko kunena’mba, kipa kya milomo yetu+ inena patōkelela dijina dyandi.+ 16 Ne kadi, kemwakilwai kulonga biyampe ne kwiabila na bakwabo byomudi nabyo,+ mwanda bitapwa bidi namino bisangajanga Leza.+

17 Kōkelai boba bemutangidile kumeso+ ne kwibakōkelelela,+ mwanda bemulamanga* bu bantu bakeshintulwila,+ amba balonge namino na nsangaji ke na kubinzapo, nabya bikemwikadila bibi.

18 Mwitulombelelai’ko nyeke, mwanda tukulupile amba tudi na mutyima wa mundamunda wampikwa budimbidimbi,* byotusaka kwiendeja kwampikwa budimbidimbi mu byonso.+ 19 Inoko kupityidila nemwisāshila mulombele amba ngalujibwe komudi panopano ponka.

20 Nanshi Leza wa ndoe, mwine walupwile mu bafwe mukumbi mukatampe wa mikōko,+ Mfumwetu Yesu, na mashi a kipwano kya nyeke, 21 emulongolwele bintu byonso biyampe mwa kulongela kiswa-mutyima kyandi, kadi kupityila kudi Yesu Kidishitu alonge motudi kyokya kisangaja ku meso andi, atumbijibwe ntumbo nyeke ne nyekeke. Amena.

22 Pano nemwisāshila, banwe banabetu, ivwanai na kitūkijetyima bino binenwa bikankamika, mwanda nemulembela mukanda mwīpi. 23 Nsaka muyuke amba mwanetu Temote wakutulwilwe. Shi waiya panopano, nsa kwiya nandi pongiya kwimona nenu.

24 Ñimwinei bonso bemutangidile kumeso ne bajila bonso. Ba mu Itadi+ nabo abemwimuna.

25 Kanye ka ku buntu bitupu kekale nenu banwe bonso.