MUKANDA WA BUBIDI WA PETELO

1 Ami Shimona Petelo, umpika kadi mutumibwa wa Yesu Kidishitu, kudi boba batambwile lwitabijo lulēme’nka na lwetu,* kupityila ku boloke bwa Leza wetu ne bwa Umpandiji Yesu Kidishitu:

2 Kanye ka ku buntu bitupu ne ndoe bivudijibwe komudi na buyuki bwa binebine+ bwa Leza ne bwa Yesu Mfumwetu, 3 mwanda pa bukomo bwandi bwa buleza twi bapebwe* bintu byonso bikwasha ku būmi ne bwine Leza kupityila ku buyuki bwa binebine bwa Yewa wetwityile+ na ntumbo yandi ne mwikadilo muyampe. 4 Kupityila ku bino bintu’bi i mwitupe* milao milēme kadi mikatampe kutabuka,+ amba kupityila ku ayo mwikale ba kwiabila nandi mwikadilo wa buleza,+ byomwapanda ku bubole bwa ino ntanda butamba ku bya kusakasaka bibi.*

5 Pa uno mwanda uno’u, takamanai bininge+ mubweje ku lwitabijo lwenu mwikadilo muyampe,+ ku mwikadilo wenu muyampe nako buyuki,+ 6 ku buyuki bwenu kwīfula, ku kwīfula+ kwenu kūminina, ku kūminina kwenu nako bwine Leza,+ 7 ku bwine Leza bwenu kisanso kya bu bana na bana, ku kisanso kya bu bana na bana kyenu nako buswe.+ 8 Mwanda shi bino bintu’bi bikale munda mwenu ne kuvula’byo, bikemukankaja kwikala bampikwa kwingila ne bampikwa kupa bipa+ mu myanda ya buyuki bwa binebine bwa Mfumwetu Yesu Kidishitu.

9 Mwanda yewa ense kadipo na bino bintu’bi, i mpofu, upūta meso andi ku kitōkeji,*+ kadi i mwilwe amba i mutōkejibwe ku bubi bwandi+ bwa tamba kala. 10 O mwanda mwine, banwe banabetu, ikalai na kininga kyonso amba mufikidije banwe bene lwito+ ne kutongwa kwenu, mwanda shi mwendelele kulonga bino bintu’bi, kemukakankalwapo nansha dimo.+ 11 Bine, nabya mukapebwanga dyese dya ntanda ne miseke dya* kutwela mu Bulopwe+ bwa nyeke bwa Mfumwetu kadi Umpandiji Yesu Kidishitu.+

12 Pa uno mwanda nsakanga kwimuvuluja bino bintu’bi mafuku onso, nansha byomuyukile’byo kala ne byomushimatyije senene mu bubine budi momudi. 13 Inoko ami mona’mba i biyampe, pano ponakidi mu kino kipema,*+ kwimusañamuna na kwimuvuluja,+ 14 byondyukile amba kipema kyami kekisa kutalulwa, monka mwansapwidile’kyo Mfumwetu Yesu Kidishitu.+ 15 Mafuku onso nkalonga bukomo bwami bonso amba shi napu kwenda, mubwanye kuvuluka* banwe bene bino bintu’bi.

16 Potwemuyukije bukomo ne kitatyi kya kwikala’po kwa Mfumwetu Yesu Kidishitu, ketwalondelepo mfumo ya bubela mifwatakanye na bunwa, aa, ino twadi batumoni bemwenine bukatampe bwa ntumbo yandi.+ 17 Mwanda aye watambwile kudi Leza Tata bulēme ne ntumbo kitatyi kyamusapwidilwe binenwa pamo bwa bino* na ntumbo mikatampe amba: “Uno’u i wami Mwana, muswedibwe, ondoelelwe ami mwine.”+ 18 Bine, bino binenwa twebivwene bitamba mūlu popa potwadi nandi mu lūlu lujila.

19 Nanshi tudi na kinenwa kya bupolofeto kiningijibwe kutabuka, kadi muloñanga biyampe kuta’ko mutyima pamo bwa kinanu+ kitēma mu fukutu (kufika ne ku lubanga futwi ne bitamba mutumbwe wa lubanga)+ mu mityima yenu. 20 Mwanda muyukile bidi amba, i kutupu bupolofeto nansha bumo bwa Kisonekwa butamba ku nshintulwilo ya muntu aye mwine. 21 Mwanda bupolofeto kebwatambilepo ku kiswa-mutyima kya muntu+ nansha dimo, ino bantu besambile bya kwa Leza monka mobadi baludikilwa* na mushipiditu ujila.+

2 Inoko, kwāikele ne bapolofeto ba bubela mu bukata mwa bantu, monka mukekadila ne bafundiji ba bubela mu bukata mwenu.+ Bano’ba bakatweja munshimunshi tubitango twa kyonakanya, kadi bakapela enka ne mwine webapotele,+ ne kwiletela bonakani bwa bukidi padi abo bene. 2 Ne kadi, bavule bakalonda mwiendelejo wabo wampikwa bumvu,*+ kadi dishinda dya bubine dikatukibwa pa mwanda wabo.+ 3 Kadi, na makomwa-meso abo bakemudīlanga bintu na binenwa bya bongojani. Ino butyibi bwabo, bwatyibilwe tamba kala,+ kebwiyangapo bityebitye, kadi konakanibwa kwabo kekulēlepo tulo.+

4 Bine Leza kālekelepo kupa mfuto bamwikeulu bālongele bubi,+ ino wēbelele mu Talataluse,*+ wēbakuta mu miyololo* ya fukutu bwī mobalaminwe mwanda wa kutyibilwa mambo.+ 5 Kadi kālekelepo kupa yoya ntanda ya kala mfuto,+ ino wāpandije Noa, musapudi wa boloke,+ pamo ne basamba-babidi bakwabo+ paāletele dilobe pa yoya ntanda ya bantu bampikwa bwine Leza.+ 6 Pa kuloteja kibundi kya Sodoma ne kya Ngomola ke buto, wēbiponeje,+ wāpa bantu bampikwa bwine Leza kimfwa kya bintu bikāya’ko.+ 7 Kadi wākūdile Lota moloke,+ muntu wādi ujingwa mutyima bininge na mwiendelejo wampikwa bumvu* wa bantu bajilula bijila— 8 mwanda difuku ne difuku, muya* moloke wa uno muntu moloke wādi umweshibwa malwa pa bilongwa bya kujilula bijila byaādi umona ne kwivwana paādi ushikete mu bukata mwabo. 9 Nanshi, Yehova* uyukile mwa kukūdila bantu ba bwine Leza mu matompo,+ ne kulama bakondame mwanda wa konakanibwa* mu difuku dya butyibi,+ 10 nakampata boba bakimba kusubija ngitu ya bakwabo+ ne kufutulula lupusa.*+

Ba kimpwa-moyo ne ba mutwe mūmu, kebatyinangapo kutuka bantu ba ntumbo, 11 ino bamwikeulu, nansha byobatabukile bukatampe mu buninge ne bukomo, pa mwanda wa kulēmeka kobalēmekele* Yehova,* kebebasambilangapo na bishima bya mutonko.+ 12 Ino bano bantu, pamo bwa banyema bampikwa ñeni balonga bintu na kitetyima, babutwidilwe* kukwatwa ne konakanibwa, batukananga mutonko pa bintu byokebayukilepo.+ Bakonakanibwanga bonakani butamba ku lwendo lwabo lwa kyonakanya, 13 bakafikilwa na bibi bu mpalo ya lwendo lwabo lubi.

Baloelelwanga kwipāna mu būmi bwa bya kwisangaja,+ enka ne dyuba nkelenkele. I makeme ne tukoba, betobelwe* bufundiji bwabo bwa kyongo koku badya mafetyi pamo nenu.+ 14 Meso abo i mayule makoji+ bā kadi kebabwanyangapo kuleka kulonga bubi, kadi bongolanga boba batelententa.* Badi na mutyima mufundijibwe makomwa-meso. I bana bafingwe mafingo. 15 Abo pa kushiya kashinda kōloke, i balubijibwe. Balondanga kashinda ka Balame+ mwanā Beole, wādi usenswe mpalo ya kulonga bibi,+ 16 ino wātopekelwe pa mwanda wa kujilula kwaājilwile kyokya kyoloke.+ Nyema uselanga biselwa kanenanga pa kunena na diwi dya muntu, wākankeje lwendo lwa bulubi lwa yewa mupolofeto.+

17 Bano bantu i masulo ampikwa mema, ne mundu itakikwa na kimpumpu kikatampe, kadi fukutu ifīta fututu ibabīkilwe.+ 18 Banenanga binenwa bya bitupu bya kwitumbija mpata. Kadi pa kukoka bantu na bya kusakasaka bya ngitu+ ne na bilongwa bya kwiendeja pampikwa bumvu,* bongolanga bantu bakitamba mu kwinyongolola ku boba badi na būmi bubi.+ 19 Abo pobebatandila bwanapabo, abo bene i bapika ba bubole;+ mwanda shi muntu wanekenibwa na mukwabo, ke umpika wandi.*+ 20 Bine, shi abo pa kupwa kwinyongolola ku bya disubi bya ino ntanda+ na buyuki bwa binebine bwa Mfumwetu kadi Umpandiji Yesu Kidishitu, kebeela monka mu bino bintu’bi ne kunekenibwa, mwikadilo wabo wa mfulo ubabipidila kutabuka ne mubajinji mwine.+ 21 I kipite buya longa kebayukilepo senene kashinda ka boloke kupita’ko kwikayuka kupwa kebavundamina mbila ijila yobatambwile.+ 22 Byobya binena lukindi lwa bine bibebafikila, amba: “Mbwa wajokela ku byalashile aye mwine, ne ngulube mukaji moijibwe nandi wakevuba mu bitoto.”+

3 A baswedibwe, uno namino i mukanda wa bubidi onemulembela, pamo bwa umbajinji, nsa kusañamuna mulangilo wenu moloke na kwimuvuluja,+ 2 amba muvuluke myanda yānenenwe* dibajinji na bapolofeto ne mbila ya Mfumwetu kadi Umpandiji yanenenwe kupityila kudi batumibwa benu. 3 Dibajinji, yukai amba mu mafuku a mfulo bantu basepañana na kibengo bakāyanga ne kibengo kyabo, balonga mwendele bya kusakasaka byabo+ 4 kebanena’mba: “Lelo kitatyi kya kwikala’po kwandi kyalailwe kidi kwepi?+ Mwanda tamba difuku dyālēle bakulutuba betu mu tulo twa lufu, bintu byonso byendanga muswelo umo onka na mobyādi bikadile tamba ku ngalwilo ya bupangi.”+

5 Mwanda i ku kusaka kobavulaminwe uno mwanda’mba, tamba kala kwādi madiulu ne ntanda yādi mishimatyije pototo pangala pa mema ne mu bukata mwa mema na kinenwa kya Leza;+ 6 ne amba na bino’bi, ntanda ya mu kine kitatyi’kya yāonakanibwe poyālobēle mu mema.+ 7 Ino na kinenwa kimo kyonka madiulu ne ntanda bidi’ko pano’bi bibikīlwe mudilo kadi bilaminwe kufika ne mu difuku dya butyibi ne dya konakanibwa kwa bantu bampikwa bwine Leza.+

8 Inoko, kemwakelwai’ko kino’ki, a baswedibwe, amba difuku dimo kudi Yehova* i pamo bwa myaka kanunu ne myaka kanunu nayo bwa difuku dimo.+ 9 Yehova* kejengapo pa mwanda wa mulao wandi,+ na mumwena bamobamo amba waije, ino aye wimutūkijije mutyima mwanda kasakilepo muntu nansha umo oneke, ino usaka bonso bafikile pa kwisāsa.+ 10 Ino difuku dya Yehova*+ dikāyanga bwa ngivi,+ dine dikapita madiulu+ na mikungulo,* ino bintu pa kukaba’byo bininge bikasungulukanga, ntanda nayo ne mingilo idi’mo ikasokolwa patōka.+

11 Bino bintu byonso’bi byobisa kusunguluka namino, talai shi mufwaninwe kwikala bantu ba muswelo’ka mu bilongwa bijila bya mwikadilo ne mingilo ya bwine Leza, 12 pomutengele ne kulama nyeke mu ñeni* kitatyi kya kwikala’po kwa difuku dya Yehova,*+ pene pakonakanibwa madiulu+ mu mimbi ya mudilo, ne pakasunguluka bintu mu kyanga kikatampe! 13 Inoko batwe, mungya mulao wandi, tutengele madiulu mapya ne ntanda mipya+ mwine mukekalanga boloke.+

14 Nanshi, a baswedibwe, byomutengele bino bintu, longai bukomo bwenu bonso amba ku mfulo akemutane bampikwa dikeme ne bampikwa kakoba kadi mu ndoe.+ 15 Ne kadi, monai kitūkijetyima kya Mfumwetu bu lupandilo, monka mwemulembele ne mwanetu muswedibwe Polo mungya tunangu twamupelwe,+ 16 wesambila pa bino bintu mwaesambilanga mu mikanda yandi yonso. Inoko, mudi bintu bimo bikomo kwivwana, kadi bino bintu’bi binyengakanibwanga na bantu bampikwa kuyuka* kintu kadi batelententa, monka mobanyengakenya ne Bisonekwa bikwabo, mwanda wa konakanibwa kwabo.

17 Shi ke pano, banwe baswedibwe, byomuyukile kala bino’bi, dyumukai kutyina’mba bakemulubija na kilubo kya bantu bajilula bijila, kemujimija kininga kyenu.*+ 18 Ino tamai’nka kutama mu kanye ka ku buntu bitupu ne buyuki bwa Mfumwetu kadi Umpandiji Yesu Kidishitu. Atumbijibwe ntumbo pano ne mafuku onso nyeke. Amena.