Yakoba Waenda ku Halana

LELO uyukile bano bana-balume besamba na Yakoba? Pa kupwa kwenda lwendo umbula mwa mafuku mavule, Yakoba wēbatene pa mushimwa. Bādi balama mikōko yabo. Penepo Yakoba wāipangula’mba: ‘Mutamba kwepi?’

Abo nabo balondolola’mba: ‘Ku Halana.’

Yakoba wēbepangula’mba: ‘Lelo muyukile Lebane?’

Nabo bāmutentulula’mba: ‘Eyo. Kadi mona’po bidi, Letyela wandi mwana mwana-mukaji yewa wiya ne luombe lwa mikōko yandi.’ Lelo umwene Letyela wiya kokwa kulampe?

Yakoba pa kumona Letyela na mikōko ya Lebane manseba wandi, wāenda kukakuvumuna dibwe ku mushimwa mwanda wa mikōko itome mema. Yakoba wāfifya Letyela kadi wētēla. Letyela wāsangala bikatampe, wāenda ku njibo kukasapwila shandi Lebane.

Lebane wāsangele bikatampe, wāitabija Yakoba ekale nandi. Ne pālombele Yakoba kusonga Letyela, Lebane wāsepelele. Inoko wālomba Yakoba engile mu budimi bwandi mu bula bwa myaka isamba-ibidi, nabya apebwe Letyela. Yakoba wāingila mwanda wādi usenswe Letyela bininge. Inoko kitatyi kya butundaile pokyābwene, lelo uyukile byālongekele?

Lebane wāmupele Lea, wandi mwana mwana-mukaji mukulumpe, pa kyaba kya Letyela. Pāitabije Yakoba kwingidila monka Lebane mu bula bwa myaka isamba-ibidi mikwabo, Lebane wāmupa kadi Letyela ke mukajandi. Mu kine kitatyi’kya, Leza wālekele bana-balume bekale na bakaji bavule. Inoko pano, pamo’nka na mwikilombwela Bible, mwana-mulume ufwaninwe kwikala enka na mukaji umo.