Yelusalema Waonakanibwa

KEPADI myaka 10 ne kupita tamba Mulopwe Nebukaneza uselela mu Babiloni Bene Isalela ba ñeni, bafundijibwe bininge. Tala pano byamweka! Yelusalema wasokwa. Bene Isalela bakubulwa kwipaibwa abaselwa bu misungi mu Babiloni.

Vuluka, bino ye byānene bapolofeto ba Yehova’mba bikāyanga shi bantu kebalekelepo bilongwa byabo bibi. Ino Bene Isalela kebātejejepo bapolofeto. Bāendelele na kutōta baleza ba bubela pa kyaba kya kutōta Yehova. Nanshi bādi bafwaninwe kupebwa mfuto. Twikiyukile mwanda Ezekyele mupolofeto wa Leza i mwitulombole bintu bibi byadi bilonga Bene Isalela.

Lelo uyukile Ezekyele i ani? I umo wa mu bankasampe bāselelwe na Mulopwe Nebukaneza kwenda mu Babiloni myaka 10 ne kupita kumeso kwa konakanya Yelusalema. Danyele ne balunda nandi basatu, ba Shadelake, Meshake ne Abedenengo nabo bāselelwe mu Babiloni mu kino kitatyi kimo kyonka.

Ezekyele aye mu Babiloni, Yehova wamulombola bintu bibi bilongeka mu tempelo ya mu Yelusalema. Yehova wamulombola’byo mu kingelengele. Yehova walombola Ezekyele bintu byonso bilongeka mu tempelo aye Ezekyele papo mu Babiloni. Kadi Ezekyele wamone bintu bisanshija mutyima!

Yehova walombola Ezekyele amba: ‘Tala bintu bya munyanji bilonga bantu muno mu tempelo. Tala mwikadile bifwatulo bya banyoka ne banyema bakwabo ku lubumbu. Kadi tala mwibitōtela Bene Isalela!’ Ezekyele wamone’byo ne kulemba mobipityila.

Yehova wamwipangula’mba: ‘Le umwene bilonga bakulumpe ba Isalela mu bufyafya?’ Eyo, i mwibimone. Kudi bantu 70 batōta baleza ba bubela. Banena’mba: ‘Yehova ketumwenepo. Ke muviluke mu ino ntanda.’

Kupwa Yehova walombola Ezekyele bana-bakaji bamobamo ku kibelo kya kungala kya tempelo. Bashikete konka, batōta Tamuza leza wa bubela. Kadi tala bana-balume ku kibelo kya tempelo ya Yehova! Badi kubwipi kwa 25. Ezekyele webamone. Bevukwilanga dya kutunduka ne kutōta dyuba!

Yehova wanena’mba: ‘Bano bantu kebandēmekelepo. Kebaloñangapo’nka bibi, ino bāyanga kwibilongela ne ku tempelo yami!’ Penepo Yehova walaya’mba: ‘Bine bakayuka bukomo bwa bukalabale bwami. Nkikebevwaninapo lusa pobakonakanibwa.’

Yehova pa kupwa kusapwila Ezekyele bino bintu, papita kubwipi kwa myaka isatu, ponka’po Bene Isalela abatombokela Mulopwe Nebukaneza. Penepo waiya kulwa nabo. Papita mwaka umo ne kipindi, Bene Babiloni abatyumuna nsakwa ya Yelusalema ne kusoka kibundi fututu. Bantu bavule abaipaibwa, bakwabo baselwa bu misungi mu Babiloni.

Mwanda waka Yehova waleka Bene Isalela bonakanibwe byamwiko nenki? Eyo, mwanda kebevwenepo Yehova nansha kukōkela bijila byandi. Kino kilombola’mba kulonga nyeke bitunena Leza i kwa kamweno.

Dibajinji bidi bantu batyetye abashala mu Isalela. Mulopwe Nebukaneza watūla Muyuda umo witwa bu Ngedadia bu kalama wa bano bantu. Ino Bene Isalela bamo abatape Ngedadia. Kupwa bantu abakwatwa moyo’mba Bene Babiloni basa kwiya kwibakubija mwanda abalonga kintu kibi. Penepo abaningila Yelemia ende nabo, ku mfulo abanyemena mu Edipito.

Ntanda ya Isalela ibashala pampikwa muntu. Myaka 70 kutupu muntu kushikata’mo. Yonso i misadike. Ino Yehova walaya’mba usa kujokeja bantu kupwa kwa myaka 70. Ino, le i bintu’ka bifikila bantu ba Leza mu Babiloni mobaselelwe bu misungi? Tutalei.