Bengidi Ba Kitatyi Kyonso Badi Kumeso mu Mwingilo wa Busapudi

Padi Kamoni ka Yehova umbajinji kukufikila wādi pania mwingidi wa kitatyi kyonso nansha mishonele. Mwingilo wa ba Tumoni twa Yehova byokeufutyilwangapo bantu lupeto, padi ukokeja kwiipangula mwanda waka i bepāne uno muswelo mu mwingilo wa kitatyi kyonso.

Ba Tumoni twa Yehova bonso bepāne ne babatyijibwe i bengidi, ino bavule umbukata mwabo badi na bisaka nansha na biselwa bikwabo bibakoleja kupityija nsāa mivule ku yenga ne yenga mu mwingilo wabo. Inoko, tununu tuvule twa ba Tumoni kujokoloka ntanda yonso i bapime kwisuminwa bintu bimo-bimo umbūmi, mwanda wa kumona muswelo wa kupityija nsāa 1 000 ku mwaka ne mwaka mu busapudi, pamo ne kupita, koku bengila mingilo ya kungitu ya mu kipindi kimo kya dyuba kete mwanda wa kumona mwa kushikatyila umbūmi.

Bine, bapania bengidi ba kitatyi kyonso kebadipo na lupeto luvule lwa kusūpakanya, inoko ku wabo mutamba, dino i dishinda dya kukimba dibajinji Bulopwe bwa Leza. Kadi batambulanga madyese mavule. Kupityija nsāa 90 ku mweji ne mweji na kusapwila bakwabo Kinenwa kya Leza i mwanda mukatampe uleta nsangaji kashā. Mwingidi wa kitatyi kyonso uvudijanga busendwe bwandi mu mwingilo kadi udi na kitatyi kya kukwasha senene boba basangela musapu. Kino kilupulanga bipa bileta bukankamane. Kebabudilwepo bisakibwa byabo bya kungitu, kadi baloelelwanga bininge enka mu byobya byobadi nabyo.—⁠Mateo 6:33.

Mu kweji wabubidi 1943, Sosiete Watch Tower wātūdile’ko Masomo a Bible a Ngileade a Sosiete Watchtower. Kitungo kyao kyādi kya kufundija bapania kebeje mu mwingilo, bamone muswelo wa kukengidila mu matanda makwabo bu bamishonele. I masomo a myeji itano, emanine pa kwifunda Bible, mānga ya Bible, bulongolodi bwa Yehova, ne myanda mikwabo itala pa kwibateakanya mwanda wa kukengidila mu ntanda ya bweni.

Sosiete ufutyilanga bamishonele dishinda kufika ne ku kifuko kyobatuminwe’ko ne kwibapa bidibwa bifikile ne bikalo bilumbuluke mu mobo a bamishonele. Kadi utentekelanga’ko mishonele umo ne umo kalupeto katyetye ka kwikwasha nako. Bamishonele bekalanga besasaketa abo bene na kulongolola mu njibo, na kupota bidibwa, na kutēka, ne na kukenda. Na buno bukwashi butyetye, bamishonele bamonanga muswelo wa kupityija nsāa 140 ku kweji ne kweji mu busapudi bwa ku njibo ne njibo, ne kwendeja bifundwa bya Bible ku mobo a bantu basangela musapu.

Bamishonele bavule batumwanga ku makilometele tununu ne tununu, kulampe bininge na kwabo ne na byabo bisaka. Kino kibalombanga kusendulula ngikadilo ya umbūmi ne bibidiji byabo, mu myanda itala mudīlo umpya, lupēpo lwishīle, ne kwisamba ludimi lukwabo. Bengilanga uno mwingilo mwanda basenswe bantu ne basakanga kwibakwasha nabo befunde myanda itala pa Bulopwe bwa Leza.

Tamba mu 1943 kufika mu 1996, Masomo a Ngileade a Bible a Watchtower kemalupule tulasa 100 ne kutuma mu mafinko onso aná a ntanda kubwipi kwa bamishonele 7 000. Bano’ba bo badi kumeso mu kusambakanya bufundiji bwa Bible mu Afrika, mu Amerika wa Pabukata ne wa Kunshi, mu Pasifike wa Kutunduka ne wa Kunshi, ne i bengile mwingilo mukatampe mu matanda a Bulaya na bwendeji bwa Sosiete.

Ba Tumoni twa Yehova bengila mu mwingilo wa kitatyi kyonso bu bapania, nansha bu bamishonele nansha bu basapudi bitupu, bengilanga pakubulwa kusaka kumwena’mo lupeto. Bajimijanga kitatyi kyabo ne lupeto lwabo, ne kwipāna abo bene mwanda wa kukwasha bakwabo batambule buyuki butwala ku būmi bwanyeke.​—⁠Yoano 17:3.

• Ba Tumoni twa Yehova bamo-bamo babwanyanga namani kupityija kitatyi kyabo kyonso mu mwingilo, ne i kika kyobesuswila uno muswelo?

• Bengidi bafundijibwanga mwingilo wa bu mishonele namani?

• Bamishonele bakwatakanibwanga namani mu matanda a bweni obatumwa’mo?

[Kapango pa paje 22]

Ku lunkuso: Kalasa ka Masomo a Ngileade, Brooklyn, N.Y., U.S.A.

Ku lundyo: Mishonele ufundija Kinenwa kya Leza mu Papua, Nouvelle Guinée

[Kapango pa paje 23]

Bapania ne bamishonele basapula Kinenwa kya Leza mu matanda meshileshile

Brezile, République Dominicaine, Espanye, Sierra Leone, Afrika