Kifundwa 9
Bengidi ba Leza Bafwaninwe Kwikala Batōka
Mwanda waka tufwaninwe kwikala batōka mu miswelo yonso? (1)
Lelo kishintulula namani kwikala utōka ku mushipiditu? (2) mu mwikadilo? (3) mu ñeni? (4) ku ngitu? (5)
I binenwa’ka bya disubi byotufwaninwe kwepuka? (6)
1. Yehova Leza i utōka kadi i ukola. Usakanga batōtyi bandi nabo bekale batōka—ku mushipiditu, mu mwikadilo, mu ñeni, ne ku ngitu. (1 Petelo 1:16) Kwikala utōka ku meso a Leza kulomba kulonga bukomo bwabinebine. Tudi mu ntanda ya disubi. Kadi tudi na bulwi botufwaninwe kulwa na bilokoloko byetu bitukokela ku kulonga bibi. Ino ketufwaninwepo kuzoza.
2. Butōki bwa ku Mushipiditu: Shi tusaka kwingidila Yehova, ketufwaninwepo kwendelela na kulamata ku mfundijo nansha ku bisela bya mutōtelo wa bubela. Tufwaninwe kulupuka mu mitōtelo ya bubela ne kuleka kwiikwatakanya mu muswelo nansha umo. (2 Kodinda 6:14-18; Kusokwelwa 18:4) Shi tubayuka bubinebine bwa Leza, tufwaninwe kwikala badyumuke, kutyina amba twakongolwa na bantu bafundija bya bubela.—2 Yoano 10, 11.
3. Butōki bwa mu Mwikadilo: Yehova usakilanga batōtyi bandi kwikala na mwiendelejo wa bu bene Kidishitu babine kitatyi kyonso. (1 Petelo 2:12) Umonanga kintu ne kintu kyotulonga, nansha ke mu bufyafya. (Bahebelu 4:13) Tufwaninwe kwepuka bya bulongelonge bya busekese ne milongelo mikwabo ya disubi ya ino ntanda.—1 Kodinda 6:9-11.
4. Butōki bwa mu Ñeni: Shi tuyuje mu ñeni yetu milangwe itōka, yakubulwa biko, ne mwiendelejo wetu nao ukekala utōka. (Fidipai 4:8) Ino shi tudi na kibidiji kya kwimika milangwe pa bintu bya disubi, biketukokela ku bilongwa bibi. (Mateo 15:18-20) Tufwaninwe kwiepeja makayo akokeja kusubija ñeni yetu. Tukokeja kudinga mu ñeni yetu milangwe itōka na kwifunda Kinenwa kya Leza.
5. Butōki bwa ku Ngitu: Bene Kidishitu bafwaninwe kulama imbidi yabo ne bivwalwa byabo bitōka, mwanda i bantunguluji ba Leza. Tufwaninwe koya ku makasa pa kupwa kwenda ku musalani, kadi tufwaninwe koya’ko kumeso kwa kudya nansha kumeso kwa kutenga ku bidibwa. Shi kemudipo na misalani miyampe, busala bufwaninwe kujīkwa panshi. (Kupituluka 23:12, 13) Kwikala nyeke utōka ku ngitu kukiñanga bantu ku misongo. Njibo ya mwine Kidishitu ifwaninwe kwikala na bukundwe, itōka tō munda ne panja. Ifwaninwe kumweka mu mukenza bu kifwa kya kulondela’po.
6. Muneneno Utōka: Bengidi ba Leza bafwaninwe nyeke kunena bubinebine. Bambepai kebakatwelapo mu Bulopwe bwa Leza. (Efisesa 4:25; Kusokwelwa 21:8) Bene Kidishitu kebengidijangapo muneneno umbi. Kebevwanangapo nansha kufumika myanda ya mizaulo mibole nansha binsekununi bya kiboja. Pa mwanda wa muneneno wabo utōka, bekalanga bamweka nyeke bu beshile na bakwabo ku kaji, ku masomo, ne mu kifuko mobashikete.—Efisesa 4:29, 31; 5:3.
[Bifwatulo pa paje 18, 19]
Bengidi ba Leza bafwaninwe kwikala batōka umbyonso