Mpangiko ya Kutamija Bwino bwa bu Muneni ne bu Mufundiji

WIKALE mwanuke nansha mutame, mwana-mulume nansha mwana-mukaji, buno bufundiji bukokeja kukukwasha uyuke kwisamba biyampe shē ne kubwanya bisakibwa byonso mwa kwikadila mufundiji wa Kinenwa kya Leza.

Bipindi bikapebwa boba bonso belembeje ku Masomo a Mwingilo wa Kiteokratike bikapānwa na mutadi wa masomo. Usa kutana fomu obe wa madingi pa mapaje asatu alonda’ko. Bibalwa bidi kumeso kwa myanda pala pala bilombola bifundwa bidi pa mapaje alonda’ko. Mu bino bifundwa ukatana’mo nshintulwilo ya bine bya kulonga mwa kujingulwila biyampe myanda ya buneni ne bufundiji kadi ne kuyuka mwanda waka umo ne umo udi na mvubu. Ukemutana ne buludiki bwa kukukwasha ubwanye bintu byobakusakila ulonge.

Mikuku ya misombelo idi pa fomu wa madingi ilombola myanda ya kwingidija mu bipindi bya (1) butangi ku meso a bemvwaniki, (2) kya kumwena’ko kya bantu babidi nansha bavule, nansha (3) dishikulu dinenwa ku meso a kipwilo. Mutadi wa masomo ukakupa mwanda ofwaninwe kwingidila’po. I kipite buya kwingidila pa mwanda umo ku lwendo. Ukamona byabuyabuya bivule shi ulonga kwiibidija kutūdilwe ku mfulo kwa kifundwa kyobakupele. Shi mudingidi wamone amba ubalonda senene shē madingi a mu kifundwa kyoingidila’po, nankyo ukakupa mwanda ungi wa kwingidila’po.

Shi kipindi kyobe i kya kupityija bu kya kumwena’ko, nabya kikakulomba kutonga kyaba. Mulongo wa byaba i mutūlwe pa paje 82, ino kunenwepo kwingidija’nka byaba bidi mu uno mulongo. Mudingidi obe ukokeja kukunena utompe kyaba kampanda mwanda wa wikale na bwino, kadi ubwanya ne kukuleka utonge kyaba kyosaka abe mwine.

Kutanga dino dibuku ne kulonga kwiibidija nansha ke kitatyi kyokuteakanyapo bipindi bya ku masomo kukakupa muswelo wa kwendelela kumeso bya binebine. Kekubulwe padi ukanza kutanga kisengele kifundwa kimo ku yenga.

Nansha shi kodi mwije namani mu kupityija bipindi ku masomo ne mu kutambila mu mwingilo wa budimi, yuka’mba kukikusakila kwendelela kumeso. Bine, mwena byabuyabuya bivule mu bufundiji buletwa ku Masomo a Mwingilo wa Kiteokratike.