Le Ino Ntanda Koyenda I Kwepi?

Bikambija bisumininwe ne bimbidikita bikomo yo ke misapu ya bukile bukya ntanda yonso! Le bino byonso bishintulula bika?

MUTYIMA-NTENKE WA MUNTU NE MUNTU: Mabombe alakata mu mansoko. Badimu ne bana ba masomo abaaswe mata. Bana batyetye batumbulwa bambutwile babo pa kwela’ko nyuma. Bana-bakaji ne bana-balume banunu batambwa mwinya nkalankala.

NGIKADILO IDI’MO MITŌTELO: Bipwilo bilunga ku mutamba umo wa ba bulwi. Bendeji ba bipwilo balambikwa kwitukija kwa bana ba kibundi. Bamumpe bona banuke na buenda; ino kipwilo kipūta mambo. Benda ku bipwilo abatyepa; mashikola abapotejibwa.

BIFUKO BITUJOKOLOKELE: Mato atemwa na bansunga. Bitema nabyo bitemwa na balanda bakimba nkuni ya kota. Mema abaoneka, keakitomeka. Mwita wa lui ubatukijibwa na busala bwa matyapu ne mupoilo wa dyalelo. Luvula lo lwine lubaoneka bibi.

KUMONA KADĪLO: Misokwe ya muntu ne muntu mu Afrika wa kunshi kwa Sahara inenwa amba isenselela ku madolala 480 ku mwaka. Bendeji ba lwiso baponeja mingilo, papo tununu ne tununu twa bantu bashala balofwa. Budimbidimbi bufikija basunga ku kujimija kamweno kabo konso.

BIPUPO BYA NZALA: Kintu kya bantu 800 000 000 kujokoloka ntanda yonso balālanga divule na nzala.

MAVITA: Bantu midiyo 100 ne bya pangala i bajimije būmi mu mavita alwilwe mu myaka katwa ka 20. Pano mata a nyukilia abwanya konakanya muzo onso wa muntu misunsa mivule. Kudi mavita a bana na bana ba ntanda imo. Butumbula nabo bwenda busambakana umbuo onso.

BIPUPO BYA MBA NE MISONGO MIKWABO: Kipupo kya manzamba kyālupukile mu Espanye kyāipaile bantu 21 000 000 tamba mu 1918. SIDA pano ke “kipupo kipaya bantu bavule mu mānga ya bantu.” Luba lwa dyaya ne lwa mukunka lukisusula bantu pi na pi.

Kokimona’nka musapu umo umo. Le i binkumenkume bīya na dimo’ni, i bipindi bibadilwa mu mwanda uselele bintu bivule ntanda yonso kadi udi na buluji bwa binebine?

[Kapango/Kifwatulo pa paje 5]

Lelo Bine Leza Utele’ko Mutyima?

Bantu bavule pa kutenekwa na binkumbulu nansha na bushiyena, beipangulanga mwanda waka Leza kakankajangapo bintu bya uno muswelo.

Leza utele’ko mutyima. Uletanga bwendeji bukulupilwa ne bunyongolodi bwa bine mu ano mafuku. (Mateo 11:28-30; 2 Temote 3:16, 17) I mwāle kala kyalwilo kya kufudija lonso butapani, misongo, ne lufu. Mpangiko yakwete ilombola amba katele mutyima enka ku bantu ba muzo umo kete, mhm, ino i ku bantu ba mizo yonso, bisaka ne ndimi.​—Bilongwa 10:34, 35.

I muswelo’ka otutele’ko netu mutyima? Le uyukile amba Umpangi wa diulu ne ntanda i ani? Dijina dyandi i ani? Mpango yandi i mpango’ka? Aye ulondolola bino bipangujo mu Bible. Witulombola’mo matabula atabula mwanda wa kupwija butapani, misongo ne lufu lwine kumo. Pa kusaka tumwene’mo, i bika byotufwaninwe netu kulonga? Tufwaninwe kumuyuka aye ne mpango yandi. Le tukokeja kumwena namani mu mpangiko yakwete shi ketumwitabijepo? (Yoano 3:16; Bahebelu 11:6) Ne kadi tufwaninwe kukōkela ku byasaka. (1 Yoano 5:3) Le bine nobe utele mutyima ku kwibilonga?

Pa kwivwanija mwanda waka Leza ulekele’ko ngikadilo ya dyalelo, tufwaninwe kwivwana mwanda wa mvubu udi’po. Bible ushintulula’o. Pa paje wa 15 wa uno boloshile, patanwa uno mwanda.