Misoñanya ya Bulopwe—Kukimba Boloke bwa Leza

UBAPĀPA mulondakani nobe kuboko powinangija. Kupwa, ubajingulula’mba wikalanga wimutala abe ne kyobe kisaka. Nandi wakupāpa kupwa wakudyobola. Kanena’mba: “Nkwipangule’po bidi. Mwanda waka mwi beshile na bantu bakwabo?” Nobe ubamwipagula’mba, “Le ukimba kunena bika?” Aye amba, “Mwene, mwi Batumoni ba Yehova? Mwi beshile na bantu bonso. Kemudipo bwa bipwilo bikwabo—kufeta mafetyi a mizo, kemufete, kadi kwikuja mu politike nansha mu mavita namo kemwikuja. Kemutomangapo mfwanka. Kadi bisaka byenu bimweka bu bīlēmeke. Ino i bika le bine bimushiyañenye uno muswelo?”

Uyukile amba kilondololwa kimanine pa kintu kimo: I mwanda tuludikwanga na Bulopwe bwa Leza. Yesu byadi Mulopwe, pano po pene paetusubula. Witukwashanga tulonde mu mayo andi ne kwisansanya na ino ntanda mibi. Mu kino kipindi, tusa kumona Bulopwe bwa Meshiasa mobusubwila bantu ba Leza ku mushipiditu, mu mwikadilo, ne mu bulongolodi—mwanda’tu wa kutumbija Yehova.