KIPINDI KYA BUTANO
Jokela “Kudi Mukumbi Kadi Mutadi wa Myuya Yenu”
Le ubemone nobe mu makambakano amo nansha mavule atelelwe mu uno boloshile? Shi i amo, udi mu kisense kiyampe. Bengidi ba Leza bavule ba kikōkeji—ba pa kala ne ba dyalelo—bekondanga na makambano na ano. Monka mobātambwidile bukwashi bwa Yehova bānekenye makambakano abo, nobe ubwanya kunekenya.
Yehova udi nobe pojokela kwadi
KULUPILA amba Yehova udi nobe pojokela kwadi. Ukakukwasha unekenye kuzumbija mutyima, uleke kusanshijibwa, kadi wikale na mutyima wa mundamunda utōka ukakuletela ndoe mu ñeni ne ku mutyima. Nabya ukekala monka na mutyima wa kwingidila Yehova pamo na batōtyi nobe. Ngikadilo yobe ikekala pamo bwa ya bene Kidishitu ba mu myaka katwa kabajinji, bātuminwe mukanda na mutumibwa Petelo amba: “Mwadi pamo bwa mikōko, mwenda mulumbakana; ino pano mubajokela kudi mukumbi kadi mutadi wa myuya yenu.”—1 Petelo 2:25.
Kujokela kudi Yehova e kintu kipite buya kyonenwe kulonga. Mwanda waka? Ukasangaja mutyima wa Yehova. (Nkindi 27:11) Monka moyukile, Yehova utenekwanga na bilongwa byetu. Shako Yehova ketuningilangapo tumusanswe ne kumwingidila. (Kupituluka 30:19, 20) Mubandaudi wa Bible umo unena’byo namino: “Mutyima wa muntu udi pamo bwa kibelo kikomo kushitwila panja. Poso’nka mwine udi munda ye ushitula’kyo.” Wivwane tutōte Yehova na mutyima wa buswe, nabya tubatonge kushitula kibelo’kya. Kadi shi tushitule’kyo, tubamupe kyabuntu kilēme—bululame bwetu—kadi tubamusangaja bininge. Bine i kutupu kibwanya kudingakanibwa na nsangaji yotwikalanga nayo potutōta Yehova mobifwaninwe.—Bilongwa 20:35; Kusokwelwa 4:11.
Pakwabo kadi, potujokela mu butōtyi bwetu bwa bwine Kidishitu, kyumwa kyetu kya kuyuka Leza kipwanga. (Mateo 5:3) Le kipwanga namani? Bantu betujokolokele mu ino ntanda beipangula’mba, ‘Kyotwikadile’ko i kika?’ Badi na nzala ya kubulwa malondololo ku bipangujo bitala kine kikadile’ko būmi. Bantu basakanga kuyuka kino mwanda momwebapangile Yehova. Wetupangile amba tusangele kumwingidila. Ketukokejapo kwikala na kuloelelwa kukatampe kutabukile kokwa kwa kuyuka’mba tutōtanga Yehova na mutyima wa buswe.—Ñimbo 63:1-5.
A mwana-lolo, yuka’mba Yehova usakanga ujokele kwadi. Le i kika kibwanya kukulupija? Tala bidi: Uno boloshile wateakanibwe na katentekeji ne milombelo mivule ponka. Padi i mukulumpe mwine Kidishitu nansha mwanenu mu lwitabijo wakupele’ye. Ebiya nobe watanga’ye ne kulonga byonso binenwe’mo. Byonso bino i bubinga bulombola’mba Yehova kakwidilwepo. Ino ukukokelanga kwadi na kanye.—Yoano 6:44.
Tuseñwanga nanshi pa kuyuka’mba Yehova kedilwepo bengidi bandi bajimine. O mwanda kaka umo utelwa dya bu Donna wafwijije’ko pa kino. Wanene amba: “Nashetemukile mu bubine, ino divule nadi nangulukila pa Ñimbo 139:23, 24, panena’mba: “Mandaule, abe Leza, uyūkile mutyima wami, untompe, uyūke mifwatakanyo yami. Kadi umone shi kudi dishinda dya bubi mudi ami, kadi unkunkuje mu dishinda dya nyeke.” Najingulwile amba nkidipo wa ino ntanda—nkyadi’mopo na kyaba—kadi nayukile amba i mu bulongolodi bwa Yehova momfwaninwe kwikala. Penepa naanza kumona’mba Yehova kangelelepo ami; nadi mfwaninwe’tu kujokela kwadi. Ndi na nsangaji ya kujoka!”
“Naanza kumona’mba Yehova kangelelepo ami; nadi mfwaninwe’tu kujokela kwadi”
Netu tulomba na mutyima umo amba nobe utane monka ‘nsangaji ya Yehova.’ (Nehemia 8:10) Bine, kukealakanyapo kujoka kokajokela kudi Yehova.