Bantu Mwānda Abapande

Noa, kisaka kyandi, ne banyema bātwelele mu safina. Yehova wāshita kibelo, mvula waanza kunoka. Wānokele bininge Safina yāanza kulela. Bityebitye, ntanda yonso yātokena mu mema. Panja pa safina, bantu babi bonso bāfwile. Inoko Noa ne kisaka kyandi bādi biyampe munda mwa safina. Le ubwanya kufwatakanya mobāsangedile pa kukōkela kobākōkele Yehova?

Mvula wānokele mafuku 40 dyuba ne bufuku, ebiya wāketeka. Mema āanza kutyepa bityebitye. Kupwa, safina yāshīka pa ngulu. Inoko, mema ādi akidi mavule konsokonso pano pa ntanda, o mwanda Noa ne kisaka kyandi kebābwenyepo kutambididila mu safina.

Bityebitye, mema āuma. Noa ne kisaka kyandi bālongele mu safina mwaka umo ne musubu. Ebiya Yehova wēbasoñanya batambe mu safina, baābukīle mu ntanda yādi imweka bu mipya. Bāsangele bininge mwanda Yehova wēbapandije, bāmufwija’ko na kulambula kya mulambu kudi Yehova.

Yehova wāsangedile kino kyamulambu. Wālaile amba, kakonakanyapo monka kintu nansha kimo pano pa ntanda ku dilobe. Pa kuleta kiyukeno kya uno mulao, wātambije nkongolo mubajinji mūlu. Le kodi mumone nkongolo?

Kupwa, Yehova wāsoñanya Noa ne kisaka kyandi babutule bana ne kuyuja ntanda.