Kokakwatyila wa kinongo

KUBULWA kukwatyila kinongo ku muntu ­witulubile kikokeja kumweka bu kutompibwa kukatampe. Mu Bible mudi madingi otukokeja kwingidija atala pa ino myanda. Mutumibwa Polo wāsonekele’mba: “Funai bulobo kemukapīlaimo mambo ponka; kemukashikija dyuba’nka na bukalabale bwenu, mhm!”​—Efisesa 4:26.

Shi muntu wetulubila, i kyendelemo kwivwana bulobo. Panena Polo’mba “funai bulobo,” kishintulula’mba kitatyi kimo-kimo muntu ukokeja kwivwana nsungu myendelemo​—padi i mwanda wa kulondolola ku kintu kampanda kyakubulwa boloke nansha kyamboloji. (Enzankanya na 2 Kodinda 11:29.) Ino shi nsungu keipwilepo, nansha shi i myendelomo ikokeja kufula ku bibi, kutwala ku bubi bukatampe. (Ngalwilo 34:​1-31; 49:​5-7; Mitōto 106:​32, 33) Lelo i kika kyofwaninwe kulonga shi ubeumvwana’mba kodi mukwatwe na nsungu?

Pamwanda utala tubilubo tutyetutye, ukokeja kufudija mwanda mu obe mutyima, mu ‘kitalala nyā,’ nansha kadi fwena yewa ukulubīle, mwisambe nandi mwanda upwe. (Mitōto 4:4; Mateo 5:​23, 24) Mu muswelo onso owakatonga kulonda, yuka’mba kintu kitabukile buya i kupwija mwanda bukidi bukidi, kutyina’mba kinongo kyakapambaila kufika ne ku kulupula lupotopoto.​—Efisesa 4:31.

Yehova witulekelanga bubi bwetu mu kusaka kwandi, enka ne bubi boketuyukilepo. Lelo netu twabulwapo kulekela bakwetu bantu tubilubo tutyetutye?​—Kolose 3:13; 1 Petelo 4:8.

I kyakamweno pakuyuka’mba kishima kya Kingidiki kyalamwinwe bu “kulekela,” pabute pabute kishintulula “kupityija.” Kulekela ke kunenapo’mba tufūtulwile kilubo, nansha’mba twikitala na meso bitupu, mhm. Pavule kilombola’tu kuleka mwanda upite, ke-pantu kukwatyila wa kinongo i kutentekela bulēmi pa kiselwa kyoselele, ne kukalañanya bumo bwa kipwilo kya bwine-Kristu. Kadi, kukwatyila wa kinongo kukokeja kutula butuntulu bwa ngitu yobe mu kyaka!​—Mitōto 103:9.