Kudi Mwanda wa pa Bula—Lelo Ukatanwa’ko?

MU DIFUKU dya kasekuseku, pano ke padi myaka 3 500, Yehova Leza wāsoñenye mwine Isalela yense wādi na kipango, mupika mu Edipito, epaye kana ka mukōko nansha kana ka mbuji ne kukusa mashi ako ku ñunji ya kibelo ne ku kidyangwa kya njibo yandi. Mu bwine bufuku’bwa, mwikeulu wa Leza wāpita peulu pa mobo onso ādi na kino kiyukeno, ino wāipaya babedi mu mobo a bene Edipito bonsololo. Bene Isalela bānyongololwa. Mwaka ne mwaka, Bayuda basobanga masobo a Pashika mu dino difuku.

Yesu Kidishitu pa kupwa’tu kudya masobo andi a mfulo a Pashika pamo na batumibwa bandi, wāshilwile bidibwa bikwabo bya kivulukilo kya lufu lwandi lwa bu kitapwa. Wātambika batumibwa bandi mukate wambulwa kiyujo, amba: “Yatai, mudyei, uno [welekeja] mubidi wami.” Kupwa wēbapa kitomeno kya vinyu, amba: “Mwishīlei bānwe bonso, ke-kintu kino [kyelekeja] mashi ami a kipwanino kipya o amwangikila bavule bene, mwanda wa kulekelwa mambo.” Penepa Yesu wābweja’ko amba: ‘Mukaloñanga enka namino mwa kumvulukila.’ (Mateo 26:26-28; Luka 22:19, 20) Nanshi Yesu wāsoñenye balondi bandi kulama kivulukilo kya lufu lwandi.

Uno mwaka kivulukilo kya lufu lwa Yesu kikavulukwa mu dya Busatu, mafuku 19 Kweji 4, kupwa kwa kupona kwa dyuba. Batumoni ba Yehova kujokoloka ntanda yonso bakabungakana mwanda wa kuvuluka buno bufuku bwa pa bula monka mwāsoñaninye’kyo Yesu. Tubakwite nobe wiye utanwe’ko potukabandila muswelo obikalongwa. Ipangula Batumoni ba Yehova ba mu kibundi kyenu bakulombole kitatyi ne ku kifuko kukapwidilwa.