Buya bwa Mutyima Budi na Mvubu ya Nyeke

“NSONGWALUME UFWILANGA BUYA BWA MPALA AMBA BO BUMUNTU BWINE,” MO MWANENE MWINE KIDISHITU MUTAME WAKIKŌKEJI.

I bine, tamba kalā muntu utyityijanga buya bwa panja, upēlula’ko divule buya bwa mutyima. Ino Umpangi wetu aye utalanga motwikadile mu nkulwe ya mutyima wetu, pampikwa kubanga motwikadile panja. Kino kyo kifwa kilumbuluke mpata kya butyibi bwa bantu bapye. Kukwatañana na Bible, Leza wānenene padi aye mwine amba: “Yehova kabandilangapo mubandidila muntu, mhm; mwanda muntu ubandila ponka paelele meso, ino Yehova ubandilanga pa mutyima.”​—1 Samwele 16:7.

Leza ye Nsulo ya buya bwinebwine bwa muntu, ne Kinenwa kyandi nakyo kilombola amba, pa kuyuka bumuntu bwinebwine bwa muntu, batalanga bidi ngikadilo yandi ya ku mushipiditu. Bible unena’mba: “Buntu budimbañana, ne būya i bwa bitupu, ino mwana-mukaji wakamwa Yehova aye ye ukatendelwa.” (Nkindi 31:30) I bine, bupopoke bwa muntu bukokeja kufya tuto twandi. (Eseta 1:10-12; Nkindi 11:22) Kadi buya bwa ngitu nabo bukokeja kufumba mwenda mafuku, ino buya bwa mutyima​—ngikadilo yandi​—abo bwendanga butama kadi i bwa nyeke.

Nanshi i kipite buya kutamija ngikadilo pamo bwa buswe, nsangaji, ndoe, kitūkijetyima, kanye, buyampe, lwitabijo, kutalala, ne kwīfula! (Ngalatea 5:22, 23) Namino tukekala na buya bwa mutyima budi na mvubu ya nyeke.​—1 Petelo 3:3, 4.