BIPANGUJO BYA BATANGI . . .
Le Yesu wālaile nonga-bibi kwenda mūlu?
Kino kipangujo kipangulwanga mwanda Yesu wālaile ntapañani obāipailwe nandi kukekala mu Paladisa. Yesu wānene amba: “I bine nakunena’mba: Dyalelo dino’di ukēkalanga nami mu Paladisa.” (Luka 23:43) Yuka’mba Yesu kātelelepo kwine kwādi kwa kukekala Paladisa. Penepa, Yesu wādi usaka kunena’mba nonga-bibi wādi wakukekala nandi mūlu?
Tubandaulei dibajinji shi uno nonga-bibi wādi ubwenye bisakibwa bya kwenda mūlu. Bantu badi na kyepelo kya kwenda mūlu babatyijibwanga mu mema ne mu mushipiditu sandu, kadi i bana babwanga ba Yesu babutulwe ku mushipiditu. (Yoano 3:3, 5) Kisakibwa kikwabo i kya amba, beendejanga mungya misoñanya ya Leza ya mu mwikadilo ne kulombola ngikadilo pamo bwa kubulwa budimbidimbi, bululame ne lusa. (1 Kodinda 6:9-11) Bafwaninwe kadi kwikala nyeke na kikōkeji kudi Leza ne kudi Kidishitu kufika ne bikafula būmi bwabo bwa pano panshi. (Luka 22:28-30; 2 Temote 2:12) Babwanya kulombola bu i bafwaninwe kusangulwa ne kubwanya bisakibwa bya kusela biselwa bikatampe bibatengele momwa mūlu, nakampata kwingila pamo na Kidishitu bu bapidishitu ne bu balopwe pa muzo wa muntu mu bula bwa myaka kanunu, enka shi i babwanye bino bisakibwa.—Kusokwelwa 20:6.
Ino, nonga-bibi wādi kubwipi na Yesu wādi ntapani kadi wāfwile ntapani. (Luka 23:32, 39-41) Shako, wālombwele mwikadila wa bulēme kitatyi kyaānene Yesu amba: “Umvuluka Mfumwami, popa pōkāya mu bulopwe bobe.” (Luka 23:42) Nansha nabya, kābatyijibwepo, kāikelepo mwanā bwanga wa Yesu mubutulwe ku mushipiditu, kādipo na mwiendelejo muyampe nansha kwikala na kikōkeji mu būmi bwandi. Lelo byādi bya kwikala byendele’mo Yesu amulaye kukekala mu bulopwe bwa mūlu pamo na balondi bandi ba kikōkeji bālamine bululame bwabo?—Loma 2:6, 7.
Tulete kimfwa: Shi muntu wa kulombe lusa pa mwanda wa lupeto lwakwibile, ubwanya kukwata butyibi bwa kuleka kukamusambila. Le ino ukamukulupila amba ubwanya kwendeja kobe kaji ne kulela kisaka kyobe? Ukapa bino biselwa enka boba bokulupile bininge. Mu muswelo umo onka, boba badi na lukulupilo lwa kwenda mūlu, bafwaninwe kwikala na kikulupiji kikatampe kya amba bakalamata ku misoñanya myoloke ya Leza kitatyi kyobākaludika muzo wa muntu. (Kusokwelwa 2:10) Ino, nonga-bibi umweka bu kādipo na budimbidimbi mu kulomba kwandi kwaālombele dya ku mfulo kwa būmi bwandi, kādipo na kino kikulupiji.
Ino le Yesu kalombwelepo nonga-bibi amba ukekala nandi mūlu’nka mu dine difuku’dya? Kebibwanikapo, mwanda Yesu mwine kaendelepo mūlu mu dine difuku’dya. Ino, wādi “munda mwa panshi”—mu kibundu—mafuku asatu. (Mateo 12:40; Mako 10:34) Nansha ke pa kupwa kusanguka kwandi, wāikele pano panshi mafuku 40 kumeso kwa kukanda mūlu. (Bilongwa 1:3, 9) Nanshi, nonga-bibi kādipo ubwanya kwikala na Yesu momwa mūlu mu dino difuku.
Le penepa, nonga-bibi wādi wa kutwela mu Paladisa’ka? Pakasangulwa ukekalanga mu Paladisa ya pano panshi, mine ikaludikwa na Yesu. (Bilongwa 24:15; Kusokwelwa 21:3, 4) Shi usaka kuyuka bivule pa mwanda utala ino Paladisa ne misoñanya ya Leza, lombola Kamoni wa Yehova ye-yense.
[Kifwatulo pa paje 9]