BINTU BYA KALA BYA MU BIBĪKO BYETU

Bāimanije mu “Mwaka wa Kutompibwa”

DIVITA I dya Ntanda pa kushilula mu 1914, bantu bavule bājingulwile’mba Befundi ba Bible kebekujangapo mu myanda ya ntanda. (Is. 2:2-4; Yoa. 18:36; Ef. 6:12) Le byāikadile bengidi ba Leza ba mu Beletanye namani?

Mwingilo wa Bushidika wa mu 1916 wātūdile kijila kya kulemba bankungulume ba myaka 18 kutūla ku 40 mu Beletanye. Kino kijila kyātalwile’mo bantu badi bapela mwanda wa kulamata bya binebine ku “kipwilo nansha ku nkulupilo yabo.” Buludiki bwātūdile’ko mabilo a bidye bya mambo mwanda wa kuyuka i bāni bādi bafwaninwe kutalulwa’mo ne kufika mu ludingo’ka.

Mu kitatyi’tu kityetye, kintu kya Befundi ba Bible 40 baelwa mu bifungo bya bashidika, kadi 8 batumwa ku mulongo wa bulwi mu Franse. Pa kutengwa na kino kilongwa kya bukondame, banabetu ba mu Beletanye batumina Herbert Asquith Mpingakani wa mulopwe mukanda wa kupela kukutwa, pamo ne kamukanda katyetye katampike bitampa 5500.

Ebiya baivwana’mba, bantu mwanda bātuminwe mu Franse abatyibilwa mambo a kwipaibwa mwanda wa kupela kulwa divita. Ino batutu pobādi kumeso a kisumpi kya basola, bapingakanya mambo a lufu na myaka dikumi ya twaji twa ku bukomo. Bajokela mu Angeletele kukengidila mu bifungo bya basivile.

Divita pa kunana, bashilula ne kulemba basonge bene. Ku kiketelo kya mambo kya mu Manchester, Angeletele, avoka wādi Henry Hudson, dokitele kadi Mwifundi wa Bible. Mu mafuku 3 Kweji 8, 1916, kidye kyatyiba’mba i mupone, bamudya amande, ne kukamutūla ku bashidika. Mu kitatyi kimo kyonka, kiketelo kikwabo kya mambo kyādi mu Édimbourg, Ekose. James Frederick Scott, kalala ntanda wa myaka 25, wāmwenwe bu wakubulwa mambo. Waimuka mu kiketelo kikwabo kya mambo kya mu Londoni, ino wabinga. Mu kino kitatyi, tutu Herbert Kipps walambikwa mambo, bamudya amande, ne kukamutūla ku basola.

Mu Kweji 9, 1916, batutu 264 batuma mukanda wa kutalulwa mu mwingilo wa bushidika. Mu bano, 5 batalulwa’mo, 154 bapebwa “mwingilo mukomokomo,” 23 bapebwa biselwa bya kubulwa kulwa mavita mu mwingilo wa bushidika, 82 bakatūlwa ku bashidika, ne bamo nabo batyibilwa butyibi bwa kukutwa mwanda wa kubulwa kukōkela mbila. Bantu bavule bakalabele pa muswelo wādi ususulwa bano bana-balume mu kifungo, ebiya buludiki bwebatalula mu kifungo kya bashidika ne kwibatuma mu makomponi a basivile .

Ba Edgar Clay ne Pryce Hughes, bāingile mwenda mafuku bu batadi ba musambo mu Beletanye, bādi mu mwingilo wa nsulo ya mudilo wa nshinga. Pakwabo kadi, Herbert Senior, umo wa mu bantu mwanda bājokele mu Franse, wātuminwe mu Kifungo kya Wakefield mu Yorkshire. Bakwabo batyibilwe mambo a kwingila mwingilo mukomo, bāingile’o mu ngikadilo mibi yādi mu Kifungo kya Dartmoor, mwine mobabundile kisumpi kikatampe kya bantu bāpelele bushidika na mutyima umo.

Frank Platt, Mwifundi wa Bible wāitabije kusela biselwa bya kubulwa kulwa divita, wāpangilwepangilwe bininge kadi mafuku mavule kitatyi kyaātuminwe ku divita. Atkinson Padgett, wēfundile bubinebine pa kupwa’tu kutwela mu bushidika, nandi wāsuswilwe bininge na bakatampe ba bashidika mwanda wa kupela kulwa bulwi.

Nansha banabetu ba mu kine kitatyi’kya byokebādipo bevwanije ne pa mfulo mushintulwila kubulwa kwikuja mu myanda ya ntanda, bākimbile kusangaja Yehova Leza. Bano batelelwe pa majina mu ino lapolo, bāshile kimfwa kiyampe kya kubulwa kwikuja mu myanda ya ntanda mu kitatyi kya makambakano a pa bula a mu “mwaka wa kutompibwa.” (Kus. 3:10)—Bintu bya kala bya mu bibīko byetu bya mu Beletanye.

[Kifwatulo pa paje 31]

Henry Hudson

[Kifwatulo pa paje 31]

James Frederick Scott

[Kifwatulo pa paje 31]

Pryce Hughes

[Kifwatulo pa paje 32]

Kifungo kya Dartmoor, mwādi mukutyilwe Befundi ba Bible bavule

[Kifwatulo pa paje 32]

Herbert Senior

[Kifwatulo pa paje 32]

Frank Platt