Uyujanga “Mityima” Yetu

Lelo Yehova witutele mutyima binebine’ni nansha kamwenepo makambakano a bantu pano pa ntanda? Malondololo aleta Bible ku kino kipangujo aseñanga mutyima wetu. Bine, Leza utele kisaka kya muntu mutyima, kadi usakanga tusangele būmi. Ulekanga bantu difuku ne difuku​—enka ne bambulwa mutyima wa kufwija’ko​—bamwene mu buyampe bwandi bungibungi. Langulukila bidi pa binenwa bya mutumibwa Polo.​—Tanga Bilongwa 14:16, 17.

Polo pa kwisambila pa bantu kebādipo batōta Leza ba mu kibundi kya Lesetala, wānene amba: “[Leza] walekele mizo yonso ya bantu, ku myaka yadiko’ya, ke balonda mu bisela byabo bēne. Nanshi koku konso nako kabudilwe kamoni, kunengeja, ne kwimupa mvula ya mūlu, ne myaka ya kupa bipa, ne kuyūja mityima ne bidibwa, ne tusepo.” Le bino binenwa byādi bishintulula bika ku bemvwaniki ba Polo?

Bantu ba mu Lesetala bapēlelwe kwivwana bubinebine bwa binenwa bya Polo. Bādi babadilwa mu babidimye kadi bādi bashikete mu kibundi kya bumeni ne kya nzaba miyampe. Inoko, monka mwēbavulwijije Polo, Leza ye Nsulo ya mvula ne bitatyi bya ntundubuko. O mwanda kitatyi kyonso kyobādi bangula mwangulo muvule ne kudya bidibwa bya munsonso, bādi bamwena mu buyampe bwa Leza.

Binenwa byānene Polo ku bantu ba mu Lesetala, bitufundija bufundiji buvule bwa kamweno padi Yehova Leza.

Yehova i mwitupe bwanapabo bwa kwitongela. Yuka’mba Yehova wālekele mizo ya bajentaila “balonda mu bisela byabo bēne.” Dibuku dimo dya balamuni ba Bible dinena’mba bino bishima bibwanya kushintulula’mba, “baenda mobasakila abo bene” nansha’mba “balonga mobalangila abo bene.” Yehova kaningilangapo muntu nansha umo kumutōta. I mwitupe bwanapabo bwa kwitongela​—bukomo bwa kutonga mwiendelejo otubwanya kwikala nao.​—Kupituluka 30:19.

Yehova usakanga tumuyuke. Polo wāshintulwile amba, “kabudilwe kamoni.” Dibajinji dibuku dilelelwe kūlu’ku dinena’mba uno musemwa ubwanya kwalamunwa amba, “welombwele ku bantu aye mwine i Leza wa muswelo’ka.” Bupangi bwa Leza busapulanga bukamoni bwa yandi “ngikadilo yambulwa kumweka,” ke buyampe, tunangu, bukomokomo ne buswe kadi. (Loma 1:20) Yehova i musokole mu Bible myanda mivule imutala. (2 Temote 3:16, 17) Lelo kino kekilombolapo amba usakanga tumuyuke?

Yehova witusakilanga twikale na nsangaji. Polo wānene’mba, uyujanga “mityima [yetu] ne bidibwa, ne tusepo.” Enka ne kipya-mambo kayukilepo Yehova ubwanya kudya bidibwa bisaka mutyima wandi ne kwikala na nsangaji mu būmi. Inoko, Leza witusakilanga twikale na nsangaji ya bine kadi ya nyeke. Tukekala nayo enka shi twifunde bubinebine bumutala ne kwingidija’bo mu būmi bwetu.​—Mitōto 144:15; Mateo 5:3.

Batwe bonso tumwenanga mu buyampe bwa Yehova difuku ne difuku. Ubulwe’po kwifunda bivule pa muswelo obwanya kulombola kufwija’ko Leza, mwine uyujanga mutyima obe “bidibwa, ne tusepo”?