MALONDOLOLO KU BIPANGUJO BIMANINE PA BIBLE
Lelo Leza wivwananga milombelo yonso?
Leza wivwanga bantu ba mizo yonso. (Mitōto 145:18, 19) Kinenwa kyandi Bible, kitukankamika tumulombole myanda yonso itutala. (Fidipai 4:6, 7) Inoko, milombelo imo keisangajangapo Leza. Kimfwa, kupituluka mu milombelo mikwate ku mutwe kekumusangajangapo.—Tanga Mateo 6:7.
Kadi, Yehova kasangelangapo milombelo ya bantu batyumuna bijila byandi ku kusaka. (Nkindi 28:9) Kimfwa, mu bitatyi byāsonekelwe Bible, Leza wāpelele kwivwana milombelo ya bene Isalela bādi bamwanga mashi. Na bubine, pa kusaka Leza etwivwane tufwaninwe kubwanya bisakibwa bimobimo.—Tanga Isaya 1:15.
Le i bika byotufwaninwe kulonga pa kusaka Leza etwivwane?
Ketubwanyapo kufwena kudi Leza mu milombelo pa kubulwa lwitabijo. (Yakoba 1:5, 6) Tufwaninwe kukulupila amba udi’ko kadi witutele mutyima. Tubwanya kukomeja lwitabijo lwetu na kwifunda Bible, mwanda lwitabijo lwa bine lwimanine pa bukamoni ne pa bintu bikulupilwa bidi mu Kinenwa kya Leza.—Tanga Bahebelu 11:1, 6.
Tufwaninwe kulombela pakubulwa budimbidimbi kadi na kwityepeja. Nansha ke Yesu Mwanā Leza, wādi wityepeja paādi ulombela. (Luka 22:41, 42) Nanshi, pa kyaba kya kulombola Leza byotulonga, tufwaninwe kulonga bukomo bwa kwivwanija misoñanya yandi na kutanga Bible. Nabya tukalombela kukwatañana na kiswa-mutyima kya Leza.—Tanga 1 Yoano 5:14.
Shi usaka kuyukila’ko bivule tala shapita 17 wa dino dibuku, dilupwilwe na Batumoni ba Yehova
Ditūdilwe mwanda wa kusela pa www.pr418.com
[Kifwatulo pa paje 16]
Mwanda waka milombelo imo keisangajangapo Leza?