Twingidijei Mabuku na Tunangu
1 Mabuku āshilwile kala kwingidijibwa na bunwa kyaba kyāshilwile kwabanibwa mapepala 6 000 a Kiteba kya Mulami kya mu difuku 1 Kweji 7, 1879 mu Angele. Tamba mwine mwaka’o, kutampwanga mabuku a miswelo ne miswelo abanibwa konso konso.
2 Mwingilo Ukwatakanibwa na Byabuntu Kete: Mayenga matyetye kunyuma, twaivwene amba mapepala ne mabuku pano akapānwa ku basapudi ne ku bantu ba mityima myoloke pampikwa kwibalomba kyabuntu kya buvule kampanda kaboko na kaboko. Inoko pa kupāna mabuku, tukatambula byabuntu bitūla bantu na mutyima tō bya kukwatakanya nabyo mwingilo wa kusapula myanda miyampe wingilwa ntanda yonso. Tukulupile amba Yehova ukesela ino mpangiko mipya.—Tala Mateo 6:33.
3 Mwa Kulongela mu Busapudi: Twingidijei ntwelelo miyampe, ilangula kusepelela kwa bantu. Shi muntu kalombwelepo kusepelela nansha kutyetye, kafwaninwepo kupebwa dibuku. Ketusakilepo kusupakanya mabuku etu na kupāna’o ku bantu bampikwa kwiasepelela. Ino shi mwisambi netu wasepelela, waitabija ne kutanga dibuku, tukokeja kumushila’dyo. Wivwane tulonge namino, nabya tubaingidija mabuku etu na tunangu.
4 Shi ubapu kulombola mwisambi nobe dibuku, ukokeja kunena’mba: “Shi usaka kutanga dino dibuku, nsa kusepelela bikatampe kukushila’dyo.” Shi waipangula’mba: “Adyo dine dipotwa inga?”; ukokeja kulondolola’mba: “Mwingilo wetu ke wa busungapo. O mwanda dino dibuku ke dya kupotapo. Mwingilo wetu wingilwanga mu matanda 230 ne kupita na bantu bewingila pakubulwa nsengwa, mwanda’tu wa kukwasha bakwabo bakamone būmi bwa nyeke. Shi usaka kutūla’ko kyabuntu kya kukwatakanya nakyo uno mwingilo, nkekitambula na nsangaji mikatampe.”
5 Shi kopāna mapepala, ukokeja kwipangula bipangujo pa kishinte kampanda, kupwa wanena’mba: “Nsaka ushale kwiivwanina abe mwine myanda mivule īsambilwe mu kino kishinte. Shi usaka kutanga ano mapepala abidi, nsa kusepelela bikatampe kukushila’o.” Shi waitabija, ukokeja kubweja’ko amba: “Nalanga kino kishinte kisa kukusangaja mpata. O mwanda nsa kwiya monka yenga wiya’ko unombole myanda isa kukusangaja’mo. Kiteba kya Mulami kilupulwanga mu ndimi 132, kitampwa mapepala 22 000 000 ne bintu pangala kujokoloka ntanda yonso. Uno mwingilo onso wendejibwanga’nka na byabuntu bitūla bantu na mutyima tō. Shi usaka kutūla’ko kyabuntu kityetye kya kukwatakanya nakyo uno mwingilo wa kufundija bantu, tukekitambula na nsangaji mikatampe.”
6 Kokikaka kulombola muntu mpangiko ya byabuntu byendejibwa nabyo mwingilo wetu. Kifwa, muntu usepelela musapu ukokeja kwipangula’mba: “Lelo mwabanga dino dibuku?” Ukokeja kulondolola’mba: “Shi usaka kutanga’dyo, ubwanya kushala nadyo ke dyobe. Ino ivwana nkushintulwile biyampe mwingidilwanga mwingilo wetu pano pantanda ponso, ne kwine kutambanga lupeto.” Ukokeja kumushintulwila amba mwingilo wetu wingilwanga pano pantanda ponso ku bitupu na Batumoni ba Yehova. Tukokeja kukokela milangwe yandi pa tubilembwa tupatyikilwe mu Kiteba kya Mulami pa paje wa 2 dya kunshi, tunena’mba “kulupula Kiteba kya Mulami i umo wa mu mingilo ya kufundija bantu Bible kujokoloka ntanda yonso, ukwatakanibwanga na byabuntu.” Kupwa ukokeja kumulombola amba, shi usaka kulunga kuboko ku uno mwingilo wingila Batumoni ba Yehova mu ino yetu ntanda, na kutūla’ko kyabuntu kampanda, nabya tukakufwija’ko bikatampe pa kyabuntu kyobe.
7 Pakwabo muntu ukokeja kwitabija dibuku ponka na ponka wakufwija’ko kwapwa. Shi walonga namino, ukokeja kunena’mba: “Nakulupila amba usa kwidisangela. Ino bantu bavule basakanga kuyuka kwine kutambanga lupeto lwingilwa nalo mwingilo wetu, mwanda bayukile amba wingilwanga ntanda yonso. O mwanda bavule betabijanga mabuku etu balombolanga kutendela kobatendela myanda yobefunda’mo na kutūla kyabuntu kityetye kya kwitupa muswelo wa kwabanya mabuku makwabo. Shi muntu wasake kukwasha’ko, tutambulanga kyabuntu kyandi na nsangaji mikatampe.”
8 Tukayuka Namani Muntu Usepelela Byabinebine?: Kunena na bubine, kyotusaka ke kupānapo mabuku etu bupānepāne. Tusakanga afikile pa kitungo kyao kya kukwasha bantu ba mityima myoloke bayukidije mpango ya kutendelwa ya Yehova. Nanshi kupāna mabuku ku bantu kebamwene mvubu idi na bintu bya kumushipiditu i kusupakanya’o bitupu. (Bah. 12:16) Kupāna mabuku etu biyampe i kujingulula senene bantu basepelela musapu na mutyima umo. Lelo bano bantu beyukanyanga namani? Shi muntu udi na mutyima wa kwisamba nobe, nabya weyukanya bu muntu usepelela. Shi ukuteja na katentekeji, ulondolola bipangujo byoipangula, uleta’po ne milangwe yandi, nankyo welombola bu muntu usaka kuyuka byonena. Shi wisamba nobe na bulēme, na diwi ditūke, nabya i muntu usepelela biyampe. Shi ulonda mu Bible kitatyi kyotanga kisonekwa, nankyo bilombola’mba ulēmekele Kinenwa kya Leza. Divule, i biyampe kwipangula muntu’wa shi ukatanga mabuku osaka kumushila. Ukokeja ne kumulombola’mba usa kujoka monka kumutala mwendeleje myanda yomwadi mwisamba. Shi waitabija, yuka’mba i kiyukeno kikwabo kilombola’mba mwanda omwisambila’po ubamusangaja byabinebine. Shi ubamumone na tuyukeno twa uno muswelo tulombola kusepelela kwa na mutyima umo, yuka’mba muntu’o ubwanya kwingidija senene dibuku dyo-dyonso dyosaka kumushila.
9 Kuno kwalamuka kwa mwingidilo wetu kulombola patōka’mba ketudipo bantu “bakongojana mu mwanda wa Leza.” (2 Kod. 2:17) Kadi kulombola’mba twi basansane na ino ntanda.—Yoa. 17:14.
10 Byafwena konakanibwa kwa Babiloni Mukatakata, bitango byonso bya bipwilo pano bilondwalondwanga na kasumalomo. Kikatampe kyotusaka i mwingilo upandija būmi bwa bantu wa kusapula Bulopwe kujokoloka ntanda yonso wendelele’nka kwendelela pampikwa kukalakanibwa’o, wikale kufikija bantu bavule ku lupandilo.—Mat. 24:14; Loma 10:13, 14.