Malondololo Ku Bipangujo Byenu

◼ Mwanda waka tufwaninwe kuta mutyima ku muvwadilo wetu ne mutendelo wetu potupempula mobo a Sosiete a ku Brooklyn, ku Patterson ne ku Wallkill (New York), nansha ku misambo mikwabo ingila kujokoloka ntanda?

Bene Kidishitu bafwaninwe nyeke kulama mwikadilo wa bulēmantu. Kitatyi kyonso, muvwadilo wetu ne mutendelo wetu bifwaninwe kulombola ndudi ne bulēme bufwaninwe bengidi ba Yehova Leza. Kidi uno muswelo nakampata shi tupempula mobo a Sosiete ku New York ne ku misambo mikwabo ingila kujokoloka ntanda yonso.

Mu uno mwaka wa 1998 mukekala bitango bya distrike ne bya matanda. Banabetu bavule bakatamba mu matanda angi bakapempula kitako kya Sosiete kidi mu New York nansha misambo idi mu matanda makwabo. Tufwaninwe ‘kwiyukanya mu bintu byonso bu bengidi ba Leza,’ na kuvwala pa mvwadilo, kutendwa pa ntendelo nansha kubandwa pa mandilo, ke’nkapo kitatyi kyotupempula ano mobo, ino i ne mu bitatyi byonsololo.​—⁠2 Kod. 6:​3, 4.

Dibuku Tumefanywa Tengenezo Tutimize Huduma Yetu podisambila pa mvubu ya kuvwala pa mvwadilo, kutendwa pa ntendelo nansha kubandwa pa mandilo, dilombola kamweno ka kwikala na bukundwe, kuvwala na bumvubumvu ne kulongolola nywene mokifwaninwe potusapula nansha potutanwa ku kupwila kwa pa kipwilo. Kadi, pa paje 131, mu musāngo 2, dino dibuku dinena’mba: “Ne potupempula Betele napo mo monka, ku Brooklyn nansha mu ntanda yo-yonso mudi musambo kampanda wa Sosiete. Kemukivulaminwai amba Betele ishintulula ‘Njibo ya Leza.’ O mwanda tutengele’mba pa mwanda utala mutendelo, muvwadilo ne mwiendelejo, twikale na ngikadilo yotwikalanga nayo potutanwanga ku kupwila mwanda wa kutōta ku Njibo ya Bulopwe.” Ino misoñanya imo yonka ya peulu ifwaninwe kulēmekibwa na basapudi ba Bulopwe bonso ba kubwipi ne ba kulampe bene bāya kupempula bekadi ba mu kisaka kya Betele nansha kupempula mobo a musambo.

Muvwadilo wetu ufwaninwe kushīla bakwabo mumweno muyampe pa mutōtelo wabine wa Yehova. Inoko, ketudi bamone batutu ne bakaka bamobamo mu boba bāyanga kupempula mobo a Sosiete na muvwadilo wa kapēlepēle. Muvwadilo wa uno muswelo keufwaninwepo nansha dimo potupempula Betele. Pa uno mwanda ne mu bipindi byonso bya būmi bwetu bwa bwine Kidishitu, tusaka kulēmeka ino misoñanya imo yonka ya peulu, misoñanya ishiyañanya bengidi ba Leza na ino ntanda, ke-pantu baloñanga bintu byonso mwanda wa ntumbo ya Leza. (Loma 12:2; 1 Kod. 10:31) Kidi na mvubu kuvuluja monka bantu befunda netu Bible nansha bantu bakwabo batengele kwiya kupempula Betele musunsa wabo umbajinji bekale kuta mutyima ku muvwadilo ne mutendelo wabo.

Kitatyi kyopempula mobo a Sosiete, wiipangule bidi amba: ‘Lelo nemuvwale pa mvwadilo, ne kadi nywene yami le i milongololwe mobifwaninwe?’ (Tala Mika 6:⁠8.) ‘Lelo byonso bino byelekeja senene Leza ontōta? Le bakwabo bakokeja kulabikwa nansha kutapwa na mumwekelo wami? Lelo ndetanga kifwa kilumbuluke ku boba bāya kupempula Betele musunsa wabo umbajinji?’ Shi ke pano, muvwadilo wetu ne mutendelo wetu, wikale nyeke ‘kunengeja bufundiji bwa Leza Mupandiji wetu mu bintu byonso.’​—⁠Tet. 2:⁠10.