Mwanda Wa Mvubu Mikatampe Mu Mānga Yonso Ya Muntu
1 Yesu wāile pano pantanda, munshi mwa bwendeji bwa Shandi, mwanda wa kuyukanya bubinebine bukokeja kwitutwala ku būmi bwanyeke. (Yoano 18:37) Pa kushala na kikokeji kufika enka ne ku lufu, walēmekele Yehova, wātumbije dijina Dyandi ne kupāna kinkūlwa. (Yoano 17:4, 6) Bino byonso bilonga lufu lwa Yesu lwikale ke mwanda umo wa mvubu mikatampe mu mānga yonso ya muntu.
2 Umbukata mwa bantu bonso baikeleko pano pantanda tamba pa kupangwa kwa Adama, babidi bonka bobadi babwaninine. Adama wādi ukokeja kupa lukunwa lwandi lwādi lwa kukaya kumeso muswelo wa kumona byabuyabuya bilumbuluke. Ino pa kyaba kya kino, wātombokele mwanda wa kwisakila kamweno, ne kwibaponeneja umbūmi bwa masusu bufula ku lufu. Pāile Yesu pano pantanda, wālombwele kikokeji mu muswelo mubwaninine, wāpa bonso bakulombola lwitabijo muswelo wa kwikala na būmi bwanyeke ne nyeke.—Yoano 3:16; Loma 5:12.
3 Kekudipo mwanda mukwabo nansha umo ukokeja kudingakanyibwa na lufu lwa kitapwa kya Yesu. Bine bwaalamwine Mānga ya muzo wa muntu. Kupityila ku alo, tununu ne tununu twa bantu bakokeja kukasangulwa mu bafu. I lushiye kyalwilo kitala pa Bulopwe bwanyeke bukafudija bukalabale bonso ne kwalamuna ntanda ke paladisa. Lukakula muzo wa muntu ku miswelo yonso ya masusu ne bupika bobadi’mo.—Mit. 37:11; Bilongwa 24:15; Lo. 8:21, 22.
4 Bino byonso bitukwasha tujingulule mwanda waka Yesu wāpele bandi bana-babwanga mbila bavuluke ku mwaka ne mwaka Kivulukilo kya lufu lwandi. (Luka 22:19) Byotwajingulula mvubu yakyo, tutengelei na kipyupyu kuno kubungakana pamo na mu kekilongela bipwilo bya ba Tumoni twa Yehova bya ntanda yonso, mu dyabubidi 2 kweji 4, pakupwa kutwela kwa dyuba. Dibajinji, kikekala kiyampe kutanga mu kisaka nsekununi ya mu Bible isambila pa mafuku amfulo a būmi bwa Yesu pano pantanda ne pa kulamata kwandi na bukankamane ku bubinebine. (Bisonekwa bya kutanga ibilombolwe mu Kalandadiye ka mu 1996, tamba mu mafuku 28 kweji 3, kufika ku mafuku 2 kweji 4.) Yesu wētushidile kimfwa kitala pa kutōta Umpangi. (1 Pet. 2:21) Tulongei bukomo bwetu bonso mwanda wa kwita ku kuno kupwila kukatampe bantu botwiyukile nabo ne kisaka kyetu, kadi ne botwifundanga nabo Bible ne bantu bakwabo bakusaka kuyampe. Twibashintulwilei dibajinji mokikapityila ne buluji bwa mukate ne vinyu.—1 Kod. 11:23-26.
5 Bakulumpe bafwaninwe kwiteakanya senene kumeso ne kutako mutyima Njibo ya Bulopwe ikekale milongololwe senene. Kifwaninwe kuteakanya kala mwanetu ufwaninwe kukaleta mukate ne vinyu. Kupityijibwa kwa mukate ne vinyu kufwaninwe kuteakanyibwa biyampe. Mukatana madingi mafwaninwe pa muswelo wa kulombola bulēme butala pa Bidibwa bya Mfumwetu mu Kiteba kya Mulami kya 15 kweji 2, 1985, paje 17. Kipwilo kifwaninwe kukateakanya kukasapula bininge umbula bwa mafuku akatangidila ne akalonda Kivulukilo.
6 Mwaka wapityile’u, kwādi bantu 13147201 batenwe ku Kivulukilo kya uno mwanda mukatampe. Byodidi difuku dikatampe bininge dya mwaka, tufwaninwe kukatanwa’ko batwe bonso.