Kuvuluja Kwa Yehova Lelo Kwitutononanga Kumushipiditu?
1 Mulembi umo wa mitōto wānene mu lwimbo lwa mitendelo kudi Yehova amba: “[Kuvuluja kobe, NW] yo milangwe yami.” (Mit. 119:99) Kishima kya mu Kihebelu kifunkila pa “kuvuluja” kiselele mulangwe wa’mba Yehova wituvulujanga byobya binena bijila byandi, nsambu yandi, misoñanya yandi ne mbila yandi. Shi twikale kwibita mutyima, biketutonona kumushipiditu ne biketuletela nsangaji.—Mit. 119:2.
2 Tubadilwa mu bantu ba Yehova, omwanda tutambulanga madingi kitatyi ne kitatyi; ne ketudi kala bemvwanike madingi mavule mu ano. Nansha byotwikalanga tusangela kuno kukankamikwa, twikalanga pavule twiavulaminwa. (Yak. 1:25) Yehova wituvulujanga na kitukije-ntyima ne buswe bonso. Mutumibwa Petelo wesambile pa madingi amo-amo na kitungo kya ‘kuvuluja milangwe yetu ya umityima ya kulanguluka biyampe, mwanda wa tuvuluke bijila bya Mfumwetu.’—2 Petelo 3:1, 2.
3 Betuvulujanga kitatyi ne kitatyi mvubu ya kwifunda kwa pa kasuku ne ya kutanwa ku kupwila. Buluji bukatampe i bwa’mba ino mingilo idi na kamweno kakatampe mu būmi bwetu bwa kumushipiditu.—1 Tem. 4:15; Bah. 10:24, 25.
4 Ku bamo-bamo, makambakano makatampe obadi nao i a kuvuija senene mingilo yabo ya bwine-Kristu ya kusapula. Bine, kino kilomba bukomo, kusumininwa kadi ne kūminina. Nansha kino byokilomba bivule ku mutamba wetu, kuvwala “bilato bya mutyima wa kupyasakana ku busapudi bwa myanda-miyampe” kuketukwasha ‘tukemanije.’—Ef. 6:14, 15.
5 Ke’nkapo kujingulula bisaka misoñanya ya Yehova kufwaninwe kutonona mwingilo wetu. Mutumibwa Polo wituvuluja’mba i umutyima mulupukanga kutononwa kotusakilwa mwanda wa ‘kusapula kumeso a bantu bonso musapu wa lupandilo.’ (Loma 10:10) Shi tudi na lwitabijo lukomo ne tutele mutyima wetu ku misoñanya ya Yehova, nankyo tukepāna mu kusapula dijina dyandi ne kwiditumbija.—Mit. 119:36; Mat. 12:34.
6 Kitatyi kyotwingila na kininga mwanda wa kuvuija mingilo milumbuluke, tukulupile kukamwena’mo nsangaji. (Mus. 2:10) Polo utela nsangaji bu kipa kya mushipiditu wa Yehova, ne tufwaninwe kukimba mwa kumwena bivule mu ino ngikadilo. (Ngal. 5:22) Petelo ubweja’ko amba “bukomo bwenu bonso” bukapalwa mpalo na mwingilo ulupula bipa, kino kileta nsangaji.—2 Petelo 1:5-8, NW.
7 Shi tutanwa na makambakano, tuvulukei mwimanino wa kūminina wa batumibwa, banene’mba: “Ino bātwe ketudipo mwakutalela, tunena’nka kunena byo twamwene ne byo twaivwene.” (Bilongwa 4:20) Tumona monka bukomo kitatyi kyotwivuluja’mba ‘na kulonga kino, tukepandija batwe bene, ne bakwitwivwana bēne kumo.’—1 Tem. 4:16.
8 Kwituvuluja kotuvulujibwa ke kintupo kitukalabaja nansha kwitutonona twikale na mutyima kanyonga. Kinyuma na kino, twibajingulule nabubine bulumbuluke bwa mvubu yao. (Mit. 119:129) Mu kino kitatyi kikomokomo, twi bayuke amba Yehova wendelela kwituvuluja myanda ikokeja kwitutonona kumushipiditu ne kwitutakika twikale bapyasakane mu mingilo milumbuluke.—2 Petelo 1:12, 13.