Twikalei Na Binenwa Bikankamika
1 Batwe bonso tusakilwa kukankamikwa pamwanda kitatyi kyotudi’mo i ‘kyamalwa ne kikomokomo.’ (2 Tem. 3:1) Byājingulwile kala mvubu ya uno mwanda mu kitatyi kyandi, Polo wātele mutyima wa kutala byaba byādi witana na bana babo pamo bwa bitatyi bya “kwikankamika.” Webakankamikile mwanda wa ‘balondelonde bintu bya kwibakankamika abo bene na bene.’ (Loma 1:11, 12; 14:19) Buno bukomo bwaikele ‘kukankamika bana-babwanga, kwibafundija bominine mu lwitabijo.’ (Bilongwa 14:22) Tusakilwa pakatampe kukankamikwa uno muswelo dyalelo nadyo.
2 Binenwa byetu bikokeja kukankamika bakwabo, shi i bisambwe na kusansanya, bikokeja kwikala “pamo nka bwa myemba ya nsahabu mu bilala bya ndalama.” (Nk. 25:11) Na kuleta malondololo ku kupwila, ‘tukekankamika batwe bene na bene.’ (Bah. 10:25) Kwingidija ludimi lwetu mwanda wa kusekununa myanda ya mu busapudi, kutendela bakwabo nansha kwisambila pa bintu kampanda bya kumushipiditu, i kiyampe bininge. Kwisamba uno muswelo ‘i kuyampe mwanda wa kukankamika, kukapāna buntu kudi boba betwivwanika.’—Ef. 4:29.
3 Twisambei Bintu Bikankamika: Polo waletele ano madingi alombola muswelo wa kwingidija kinenwa mokyendele mu Fidipai 4:8: kuta mutyima ku bya binebine, ne ku bilemekwa buleme, ku byoloke, bitoka tō ne byabuyabuya, byonsololo bilumbuluke kumeso a bantu, mudi buleme ne kutendelelwa. Tukokeja kujingulula’mba bine byonso byotwisamba bikankamika shi bitamba mu Kinenwa kya Leza. (Yoano 17:17) Kwipāna kwa bu-muntu bwetu kudi Leza, byobya byotwifunda kitatyi kya kupwila kwa pa kipwilo, bupyasakane botulombola mu busapudi ne bintu bikwabo bya uno muswelo bya kulemeka buleme. Misambo itala pa ndundi ne pa misoñanya ya Kinenwa kya Leza iketukwasha bine mwanda wa twikale na “tunangu tutwala ku lupandilo.” (2 Tem. 3:15) Tulombole kufwijako kwetu mwanda wa mwiendelejo utoka tō wa boba badi mu bulongolodi butōka bwa Yehova. Tutumbijei bilongwa bitulumukwa bya buyampe bwa bana betu. (Yoano 13:34, 35) Ku bintu byonsololo bimweka bilumbuluke kumeso a bantu kutanibwa ngikadilo idi tō ya bwine-Kristu pamo na lwitabijo, nsangaji, ndoe ne kitūkije-ntyima, ngikadilo ilombolwa na bana betu. Kwisambila pa bintu mudi buleme ne bitendelwa i ‘biyampe mwanda wa kukankamika’ bakwabo.—Loma 15:2.
4 Kutanwa difuku ne difuku na mitambakano ya ino ntanda kituletelanga buzōze. I kilumbuluke kutula bino bintu pafula ne kutompa ku buswe bwa bu bana na bana! Bitatyi bilumbuluke byotupityija pamo i byaba bya buleme byotufwaninwe kusangela. Shi twibakankamika ne misambo yūbaka, bantu bakwabo bakokeja kukanena pamwanda wetu’mba: “Kebantu abatukija mushipiditu wami.”—1 Kod. 16:18.