Tusapulei Myanda Miyampe Pampikwa Kuleka’byo

¹ Bakristu babajinji bādi bakwete mwingilo wabo na mutyika. Luka usekununa’mba: “Ebiya abo, monka mo bukila, mo bukila, mafuku onso, kuleka’byo kufundija mpika, ne kusapula bya Yesu mu njibo īkola ya Leza ne mu mōbo bitupu.” (Bilongwa 5:42) I kutupu kintu nansha kimo kyādi kikokeja kwibakankaja, nansha ke kupangwapangwa kwine! (Bilongwa 8:⁠4) Bādi basapula bubinebine mafuku onso nyeke.

² Lelo ku wetu mutamba nako? Twiipangulei bidi: ‘Le nami nkulupile bu kitatyi kibanyema bininge? Ngitabije kusapula myanda miyampe pampikwa kuleka’byo?’

³ Basapulanga Pampikwa Kuleka’byo: Kaka umo wābelele misongo ya bulebe, bāmutweja umbidi onso mu mayumba a byūma. Wākomenwe ne mwa kwendela ku kupwila ku Njibo ya Bulopwe nansha ku kubungakana kwine. Inoko wādi mwipāne mu kusapula myanda miyampe. Umbula bwa myaka 37 yaālele mu oa mayumba a byūma, wāikele kufikija bantu 17 ku kuyuka bubinebine! Lelo wēkibwenye muswelo’ka? Nansha byādi mukomenwe kusapula ku njibo ne njibo, wāmwene muswelo wa kusapula bukamoni bwa kiponka na ponka ku boba bonso bādi batwela mwaādi.

⁴ Divita ne bufudile byaikele kuponena banabetu ba mu Bosni. Inoko abo bendelelanga kusapula. Mu Sarajevo, basapudi bapityijanga mwayene wa nsāa kubwipi kwa 20 ku kweji ne kweji mu busapudi bwa myanda miyampe, kadi umo ne umo wendejanga mwayene wa bifundwa bya Bible kubwipi kwa bibidi. Nansha byobadi mu makambakano a malwa, bendelelanga nyeke na kusapula ne kufundija pampikwa kuleka’byo.

⁵ Ne bankasampe nabo mo monka, i bapyasakene mu mwingilo. Mu Rwanda, kisaka kimo kya ba Tumoni kyatwelwe mu kyumba mwadi basola badi batengele kwibepaya. Kino kisaka kyalomba lupusa lwa kulombela kumeso kwa kwipaibwa. Penepa bebapa lupusa, Debola, nkasampe mwana-mukaji, wālombela na diwi ditunduke amba: “Yehova, ami ne Tata twaikele kuponeja milami itano uno yenga. Lelo i muswelo’ka otukokeja kukajokela ku boba bantu pamwanda wa kwibafundija bubinebine ne kwibakwasha bakamone būmi?” Pamwanda wa lwitabijo lukomo lwa uno nkasampe ne buswe bwandi butala pa mwingilo, kisaka kyonso kyapanda ku lufu.

⁶ Dyalelo, tufwaninwe kuta mutyima ku mikenga yonso yotumona mwanda wa kusapula bukamoni ne kukimba boba ‘badi mu ngikadilo mifwaninwe ya kukamona būmi bwanyeke.’ (Bilongwa 13:48) Bakulumpe bateakanyanga mpangiko ya kupwila kwa kwenda mu busapudi mu bitatyi bifwaninwe ku bonso, lubanga nansha kyolwa, kukwatañana na kifuko kyomudi’mo. Tukankamikwanga ne kupebwa madingi a miswelo mishileshile ya mwa kusapwila kupityila ku bishinte bya mu Mwingilo Wetu wa Bulopwe ne ku mīsambo inenwanga mu kupwila kwa mingilo, ku kubungakana kwa kipindi ne kwa distrike. Pakwabo kadi, mutadi wa kipindi ne wa distrike bapānanga bulombodi ku basapudi bwa mwa kusapwila mu bipito, mu mikenza ya bansunga ne bakokelanga milangwe yabo ku miswelo mikwabo ya mwa kusapwila bukamoni ponso patanwa bantu. Byonso bino bituvulujanga’mba tufwaninwe kusapula myanda miyampe pampikwa kuleka’byo.

⁷ Batumibwa ba Yesu bānene pakubulwa moyo’mba: “Ino bātwe ketudipo mwakutalela, tunena’nka kunena byo twamwene ne byo twaivwene.” I muswelo’ka obākokeje kūminina nansha byokwāikele bijika bivule? Bāabije Yehova ebape bukwashi, nandi wēbapa’bo, “bonsololo bayūlwa mushipiditu sandu ke basapula mwanda wa Leza kwa kubulwa ne moyo mwine.” (Bilongwa 4:​20, 29, 31) Ke bonso batananga myanda ya nsangaji mu mwingilo, mhm, ino shi twabilanga na bubinebine ne shi twikankilanga’ko difuku ne difuku kusapula myanda miyampe pampikwa kuleka’byo, nankyo Yehova uketukwasha.