Bifundwa Bya Bible Bilupula Bana-babwanga
1 “Le kadi kinkankaja kubatyijibwa kadi i kika le?” Kino i kipangujo kyobāipangwile Fidipa kudi ntungu mwine Efiopya ‘paāmusapwidile myanda miyampe itala padi Yesu.’ (Bil. 8:27-39) Uno ntungu wādi kala usenswe bilembwa bya ku bukomo bwa mushipiditu wa Leza, omwanda, pa kupwa kukwashibwa kumushipiditu na Fidipa, wādi ke mwiteakanye kala kwikala mwanā bwanga. Inoko ke bantu bonsopo bekalanga na kyaka kya kwibandawila Bisonekwa abo bene.
2 Ino kibanengela, mwanda bulongolodi bwa Yehova i bwitulupwile mukanda mukwabo mupya, udi na mutwe wa mwanda unena’mba Dibuku dya Bantu Bonso (Falanse), ukankamika bantu babandaule musapu wa Bible wisambila pa ino yetu myaka. Myanda idi’mo i ikoka bantu bakubulwa budimbidimbi, pakwabo bafunde, ino abo’ko kuyuka bintu bivule binena Bible mpika. Kino kingidilwa kilumbuluke i kilongololwe mwanda wa kupa bano bantu kyaka kya kusantaula dino dibuku.
3 Kumeso kwa kushilula kifundwa kya Bible, i biyampe kubandaula monka madingi malumbuluke aletelwe pa dyani dya ntentekelo dya Mwingilo Wetu wa Bulopwe wa kweji 7, 1996, atala pa muswelo wa kwendeja bifundwa byendelela kumeso mu dibuku Buyuki. Mu bula bwa kifundwa, ta mutyima ku kwendelela kwa omwifunda nandi, mwa kuyukila i myanda’ka yofwaninwe kumukengelela’mo. Mukankamike ekale kwiteakanya kumeso kwa kitatyi, atange ne bisonekwa bya Bible bitelelwe’mo. Mwanda malondololo akaleta mu bishima bya aye mwine o akalombola shi binebine i mukwate bubinebine na mushike mukatampe. Divule, boba batañanga mabuku makwabo a Sosiete ne kutanwa ku kupwila kitatyi ne kitatyi bendelelanga kumeso bukidibukidi. Kankamika omwifunda nandi ekale kusapwila bantu bakwabo byobya byaefunda. Mulombole mu biyampe bintu byafwaninwe kulonga bibwanya kumutamija kumushipiditu. Ketufwaninwepo kwipeka na kwifunda fundē na bantu ba mityima ibidi. Befundi bafwaninwe kwikala bantu bapipidila ku kwifunda, bābila kwikala bemanije shinkidingi mu bubinebine ne bābila kwendelela kumeso kutūla ne ku kwipāna kudi Leza ne ku kubatyijibwa.
4 Mu bisaka bimobimo mwendejibwanga bifundwa bivule, mwanda mwikadi ne mwikadi wa mu kisaka wifundanga pandi pa bula. Ino, mu byaba bivule, i kipite buya kwendeja kifundwa kya kisaka kyonso pamo, ke-pantu kino kikutyilanga kisaka umbumo kumushipiditu.
5 Yesu i mwitusoñanye kulonga bana-babwanga. (Mat. 28:19) Omwanda nanshi tufwaninwe kwendeja bifundwa bisonshila bantu bendelele kumeso kufika ne pobakalomba amba: “Le kadi kinkankaja kubatyijibwa kadi i kika le?”