Tusambakanyei Musapu Wa Bulopwe No. 35 Konso Konso

¹ Kweji 11 ne kweji 12 i myeji yotukengila bininge batwe bonso. Mu mafuku 8 mabajinji a uno kweji 11, tukapāna Kiteba kya Mulami ne Amkeni! Kupwa, tamba mu dyayenga 9 kweji 11 kutūla mu dyayenga 14 kweji 12, tukasambakanya ntanda yonso na Musapu wa Bulopwe No. 35. I madyese makatampe otukekala nao a kupāna musapu ku bantu bonso ba mu mwaba wetu. Uno musapu ulondolola ku kipangujo kinena amba “Lelo Bantu Bonso Bakesanswanga Umo ne Mukwabo?” Mu kano ketu kampanye ka pa bula, tukapāna uno Musapu wa Bulopwe mu mafuku onso a mu yenga; ino mu mafuku a ku mfulo kwa yenga, tukatentekela pa Musapu wa Bulopwe, manimelo a mapepala a panopano.

² Lelo I Ani Ukapāna’o? Bakulumpe bo bakatangidila uno mwingilo monka mobekilongelanga nyeke. Muntu ye-yense ukasepelela kusambakanya uno Musapu wa Bulopwe, kadi pakubulwa kwalakana, basapudi bavule bakengila mwingilo wa bupania mukwashi mu ino myeji ibidi ya kampanye. Basapudi bakwabo nabo bakapityija kitatyi kivule mu busapudi kutabuka mobasapwilanga nyeke.

³ Lelo udi na muntu owifundanga nandi Bible pano ke mwendelele mu kwifunda dibuku Buyuki kadi kasake kubwanya bisakibwa mwanda wa kutambila mu busapudi? Padi nandi ukokeja kwikala musapudi wakubulwa kubatyijibwa kumeso kwa kano kampanye kushilula, mwanda wa nandi engile’mo. Kisakibwa’tu pa kwabanya Musapu wa Bulopwe i kwikala na musapwilo upēla. Kimfwa, ukokeja kunena amba: “Uno musapu i wa kamweno mpata, o mwanda wabanibwa kujokoloka ntanda yonso mu uno kweji mu ndimi 169. Nsakile kukushila nobe obe.” Nansha ne bana batyetye bakokeja kwingila uno mwingilo wa nsangaji.

⁴ Bendeji ba bifundwa bya kitabo bakakankamika bonso ba mu bisumpi byabo bekale kwipāna mu kusambakanya Musapu wa Bulopwe No. 35. Padi kudi ne basapudi bakwabo kebakisapulanga, bakokeja nabo kushilula kusapula monka shi abaikala kupebwa bukankamane bwibasakila. Kumeso kwa kushilula kampanye, bakulumpe bafwaninwe kupempula umo ne umo wa mu bano basapudi mwanda wa kujingulula muswelo wa kwibakwasha bekale kushindikila basapudi babwino mu uno mwingilo usa kwingilwa.

⁵ Lelo Kupwila kwa Kwenda mu Busapudi Kukapwilwa Kitatyi’ka? Uno mwingilo usakilwa kutūla’ko ne mpangiko ya kupwila kwa kwenda mu busapudi pa bitatyi bifwaninwe ne byendele’mo. Shi bibwanika, kupwila kwa kwenda mu busapudi kufwaninwe kuteakanibwa difuku ne difuku dya mu yenga, ku mfulo kwa yenga ne mu byolwa. Kufwaninwe kushilulwa pa kyaba kibwanya kupa basapudi ne bapania muswelo wa kwingidija senene kitatyi kyonso kitungilwe buno busapudi. Kupwila kukokeja kadi kutūlwa ne kyolwa mwanda wa bana ba masomo, bengidi ba twaji bengilanga mingilo ya kwikombola, ne bakwabo, nabo bamwene’ko. Mutadi wa mingilo ukata’ko mutyima; ke-pantu kufwaninwe kwikale myaba mibwane ya kusapula’mo ku njibo ne njibo ne mu mikenza ya busunga mwanda wa muntu ne muntu engile na kininga uno mwingilo. Mu bifuko mudi basapudi bavule, ke biyampepo kukasapula buvule mu kipindi kampanda kya mwaba obapelwe kusapula’mo.

⁶ Lelo Boba Botutana Kutupu Nabo? Kyotusaka i kutana bantu bavule ba kwisamba nabo mpala na mpala, shi bikokejika, kwibashintulwila mwanda waka bafwaninwe kutanga Musapu wa Bulopwe No. 35. Ino shi tubakokola ku njibo ketutene’kopo muntu, tusonekei adelese mwa kujokela’ko kyaba kikwabo dyonka dyuba’dya. Shi tubalonga bukomo kutūla ne ku yenga wamfulo wa kampanye, ino kutana’ko muntu mpika, nankyo tukokeja kwibashila Musapu wa Bulopwe pa kibelo, pa kifuko kepabwanya kumona bapityeshinda. Shi udi mu mukenza ushikatanga bantu, ta mutyima wa kupāna Musapu wa Bulopwe ku bantu benda bananga mu kipito. Ekale wendanga mu tubundi twa mufula, ne shi mwaba i mukatampe keubwanika kupwa mu bula bwa kampanye, nankyo ukashiya Musapu wa Bulopwe ku mobo kotana kwakubulwa bantu mu kupita kobe kubajinji.

⁷ Kitungo Kyetu I Kitungo’ka? Bipwilo bifwaninwe kulonga bukomo bwa kupwa kwabanya kitūtula kya Musapu wa Bulopwe kyobakatambula mu mwaba wabo onso kumeso kwa kampanye kupwa mu mafuku 14 kweji 12. Shi mwaba wa kyenu kipwilo i mukatampe ne shi kemudipo kyaka kya kusapula’mo bunka, pa kyaba kya kusapula bubidi, nankyo mukokeja kusapula bunka bunka. Kino kiketupa kyaba kya kufikila bantu bavule ba kusapwila myanda miyampe bafwaninwe’yo. (Mat. 10:11) I kipite buya kusela matrakte matyetye ku makasa ne Bible obe mu ditumba nansha mu kampokoshi, kupita’ko kusela masakoshi. Tai mutyima ku kusoneka senene majina a boba bonso botana balombola kusepelela.

⁸ Le Witeakenye Kushilula? Bakulumpe bafwaninwe kubadikila kuyuka i mapepala anga a ntentekelo asakilwa kipwilo; kupwa balomba pebabwanine. Ke biyampepo kulomba Musapu wa Bulopwe, mwanda kipwilo ne kipwilo kikatuminwa’o. Bapania ba pa bula, balonso ne bapania bakwashi bakatambula ku muntu ne muntu matrakte 250 a kwabanya, ino musapudi ne musapudi wa pa kipwilo ukapebwa matrakte 50. Tudi na mingilo mivule. Lelo tudi na kipyupyu kya kwingila uno mwingilo wa nsangaji? Bine tudi nakyo! Nanshi tusambakanyei uno musapu wa Bible utanwa mu Musapu wa Bulopwe No. 35 konso konso!