Kibelo Kikatampe Kya Mingilo I Kishitulwe
1 Polo, musapudi mupyasakane wa myanda miyampe, wādi ukimba nyeke myaba mwādi kusakibwa kukatampe kwa basapudi. Kimfwa mu kibundi kya Efisesa. Polo wālupwile’mo bipa biyampe mpata, byāmulengeje atumine bengidi nandi bene Kidishitu mukanda amba: “Kibelo kikatampe kya mīngilo milumbuluke i kinshitwile.” (1 Kod. 16:9) Wāendelele na mwingilo wandi mu uno mwaba, wākwasha bene Efisesa bavule bāikala betabije.—Bil. 19:1-20, 26.
2 Ne dyalelo nadyo mo monka, kibelo kikatampe kitwala ku mingilo i kitushitwilwe. Twi betwe kwenda kukakwasha byobya bipwilo bikankalwanga kusambakanya mwaba wabyo onso mutuntulu ku mwaka ne mwaka. Na bukomo bwetu, tukokeja kwangula’ko banabetu bengila mu myaba imoimo mukidi kusakibwa.—Tala 2 Kodinda 8:13-15.
3 Lelo Ubwanya Kwingila Kokwa Kusakibwa Basapudi Bavule? Lelo kodi mubandaule mu milombelo shi ubwanya kukengidila kungi? Padi mu kyenu kibundi mudi kipwilo kisakilwa bukwashi. Sapwila mutadi wa kipindi uno mwanda, nandi akupe’po milangwe. Pakwabo mu mwaba wa kyenu kipwilo mudi bantu babitwi nansha banena ludimi lweni kebamwene muntu ubwanya kwibakwasha. Mwene ukokeja kwielela’ko kufunda ludimi lwabo mwa kwibakwashisha? Kikokejika padi kudi kala kisumpi nansha kipwilo kya ludimi lukwabo kidi pabwipi na kwenu ‘kilomba Mwinē byangulwa ekale na bengidi ba Bulopwe bavule.’ (Mat. 9:37, 38) Shi kidi’ko, mwene ubwanya kukekikwasha?
4 Mu myaka yapityile’i, kwadi bisaka bya bene Kidishitu tununu ne tununu byavilukīle mu matanda makwabo mwanda wa kukaputumina bininge mu mwingilo wa mwangulo. Ba-mulume ne mukaji bamo bavilukile banene namino amba: “Tusenswe kwingidila Yehova popa ponso potukokeja kukwasha bikatampe.” Shi nobe usaka ne umwene amba ubwanya kuviluka kwenda pantu pakwabo mu yenu ntanda, nansha shi wi mubwanye bisakibwa bya kwenda kukengidila mu ntanda mikwabo, nankyo wisambe dibajinji na bakulumpe pa kyenu kipwilo pa ino milangwe yobe.
5 Ekale wabilanga kwipangula Sosiete pa myanda imoimo ne bifuko bisakilwa bukwashi, i biyampe, abe soneka’tu mu kīpi kusaka kobe mu mukanda, utūle’o ku Komite wa Mwingilo wa pa kyenu kipwilo. Komite nandi ukabweja’ko milangwe mu mukanda mukwabo ukalamikwa pamo na obe ne kutumwa ku Sosiete. Shi kepano, kibelo kikatampe kya mingilo byokikidi kishitulwe ne pano, twikalei nyeke kuputumina mu mwingilo wa Yehova.—1 Kod. 15:58.