Tufwaninwe Kwikala Bafundiji, Ke’nkapo Basapudi Kete
1 Muntu umo wanene’mba, “Batumoni ba Yehova abayuja ntanda yonso bā na bukamoni bwabo.” Lelo kino kibwanikanga namani? Uno mwingilo wa kulombola bukamoni kewingilwangapo ku bukomo bwa muntu, i ku bukomo bwa mushipiditu wa Leza pa bengidi bandi, mungya mobepānina mu mpangiko mishileshile ikwetwe ya kuvuija mwingilo wibapelwe wa kusapula ne kufundija.—Zek. 4:6; Bil. 1:8.
2 Kwabanya mikanda mitampwe nako i muswelo pa bula wa kuvuija mwingilo wetu wa busapudi. Mu bula bwa myaka, Batumoni ba Yehova i batampe ne kwabanya mabuku, mikanda, mapepala ne matrakte midiyala ne midiyala mwanda wa kuyukanya myanda miyampe ya Bulopwe. Malapolo adi mu Annuaire 1997 alombola’mba kulupulwa kwa mabuku i kufikile pa kibalwa kikande. Dyalelo, ke kutampwe Mabible a Traduction du monde nouveau midiyo 91 ne musubu. Mu bula bwa mwaka umo, kutampwa kwa Kiteba kya Mulami ne Amkeni! mu Amerike (États-Unis) kwelundile’ko pa mapepala 7,1 pa katwa. Mu Alemanye, kwelundile’ko pa mapepala 35 pa katwa. Kipindi kimo ne musubu pa bisatu kya kibalwa kya mapepala atampilwe na musambo wa ino ntanda, kyatuminwe mu Rushi.
3 Mwanda waka kudi kusakibwa kukatampe kwa mabuku namino? Kujokoloka ntanda yonso, lwito lwa kufikija bukamoni konso kutanwa bantu pano i lulangule kālēle. Bavule umbukata mwetu batandabulanga mwingilo wabo na kusapula mu bifuko byungwila bantu, mu bipito ne mu mikenza ya busunga, o mwanda buvule bwa mabuku apebwa bantu basepelela musapu bubelundila’ko. Bavule umbukata mwabo badi bemvwana musapu wa Bulopwe na dimodimo, pakwabo ne kwivwana’o kwine mpika. Pa kupwija kuno kusakibwa, bipwilo i bitūle’ko kakibīko ka mabuku a kwingidija mu busapudi bwa miswelo mishileshile.
4 Lelo Twabanyanga Mabuku na Kitungo’ka? Kitungo kyetu ke kya kwabanyapo mabuku bitupu. Musoñanya wa kulonga bana-babwanga udi pabidi: Kusapula ne kufundija. Dibajinji, tudi na madyese a kusapula myanda miyampe ya Bulopwe, kuyukija bantu amba Bulopwe lo lukulupilo lumo kete ku muzo wa muntu. (Mat. 10:7; 24:14) Mabuku etu emanine pa Bible i muswelo mufwaninwe ne mukomo usamuna kusepelela ku myanda ya Bulopwe ne kupāna buyuki pa uno mwanda.
5 Dyabubidi, shi tusaka kulonga bana-babwanga, tufwaninwe kufundija myanda yonso yāsoñenye Yesu. (Mat. 11:1; 28:19, 20) Pano napo, mabuku engilanga mwingilo mukatampe mu bukomo botulonga bwa kutweja bubinebine mu mityima ya befundi, bine ebasebelanga dishinda dya kwikala bana-babwanga.
6 Kepabulwe padi bantu betabija mabuku i ‘bemvwaniki ba kinenwa,’ ino shi kebadipo na wa kwibakwasha, bakakolelwa kwikala balongi bakyo. (Yak. 1:22-25) Bine, shi kekudipo wa kwibaludika, bavule bakakomenwa kwikala bana-babwanga. (Bil. 8:30, 31) Kwibasakila bukwashi bwa mufundiji wa kwibanekenya na bubinebine budi mu Bisonekwa. (Bil. 17:2, 3) Kitungo kyetu i kwibakwasha bendelele kufika ne ku kwipāna’bo kudi Leza ne ku kubatyijibwa, kadi ne kwibafundija bwino bekale bakumbanye, babwanya kufundija bakwabo.—2 Tem. 2:2.
7 I Kyakamweno Mpata Kwikale Bafundiji Bavule: Potusapulanga, tuyukanyanga myanda miyampe ku bantu bonso. Ino, kufundija muntu, i kumukomeneja bufundiji bityebitye. Busapudi buyukijanga muntu netu musapu wa Bulopwe, ino bufundiji abo bumukwashanga etabije myanda miyampe ne kumutonwena ku mingilo. (Luka 8:15) Mufundiji uloñanga bintu bivule, ke kusapulapo bitupu, ehe: Ushintulwila mwifundi, ulanguluka nandi mwanda aye udi kala na kyalwilo kishimatyije, uleta bubinga na binenwa bipwa mwanda.
8 Bavule umbukata mwetu bafwaninwe kwikala bafundiji, ke’nkapo basapudi kete, mhm. (Bah. 5:12a) Kwabanya mabuku i kipindi kikatampe mu mudimo wetu, inoko kubwanya kufikila pa ditabula dyabubidi dya mwingilo wetu kwimanine nakampata pa muswelo otwielela’ko mu kufundija. Nansha byotusangelanga kwabanya mabuku, ino shi tusaka kuvuija mwingilo wetu ne pa mfulo, ketufwaninwepo kwikumona bu kyo kitungo kyetu kinekine. (2 Tem. 4:5) Mabuku otupāna ashitulanga senene mikenga ya kufundija muntu netu bubinebine.
9 Tulongei Kujokelamo Kupya Mwanda wa Kushilula Bifundwa bya Bible: Kepabulwe padi umo ne umo motudi ke mushiye kala kibalwa kampanda kya mabuku, mikanda ne mapepala, uno i mulongo kala wa kujokelamo kupya. Tufwaninwe kwitūdila’ko kitatyi kya kutamija kuno kusepelela. Kitatyi kyotujoka kukatala bantu, kitungo kyetu kibajinji ke kwibashilapo’nka mabuku makwabo kete, mhm, ino i ne kwibakankamika batange obadi kala nao ne kumwena’mo kamweno. Lelo batwe twādi ba kwendelela namani shi kekwādipo muntu wādi wiya kitatyi ne kitatyi witukwasha na kwitufundija buyuki bwabinebine?—Yoano 17:3.
10 Tutamijei kusepelela ko-konso na kitungo kya kushilula kifundwa kya Bible, mwikale mu mukanda I Kika Kisaka Leza Kotudi? nansha mu dibuku Buyuki Butwala ku Būmi Bwanyeke. Ano mabuku alombolanga musapu wa Bulopwe mu muswelo upēla kwivwanija. Mukanda Kisaka Leza i kifundwa kya Bible kituntulu kimanine pa bufundiji bwa pa kitako bwa Bible. Dibuku Buyuki dikwasha mu kufundija bubinebine kamo ne kamo, mu muswelo upēla, mutōkejibwe kadi mushikate.
11 Bufundiji bupēla bupēlelanga mufundiji ne mwifundi mwine, mo munenena ne papye wa ntentekelo wa Mwingilo Wetu wa Bulopwe wa kweji 7, 1996. Tutūlei uno papye pantu papēla kumusokola mwanda wa kupituluka mu ino mifundijijo ne bwino bwa bufundiji bulupula bipa biyampe. Mudi madingi alombola mwa kutela mwifundi mutyima byabinebine, buvule bwa milangwe ya kwisambila’po mu kifundwa ne kifundwa, mwa kulondolwela ku bipangujo bikwatañene na mutwe wa mwanda wifundwa, mwa kwiteakenya mwadimu ne mwifundi kumeso kwa kitatyi ne mwa kufikijija mwifundi ku bulongolodi bwa Yehova. Shi twingidije ano madingi, nankyo bavule umbukata mwetu, kubadila’mo ne bapya bene, tukafikila pa kwendeja bifundwa byendelela kumeso.
12 Malapolo Amoamo Alombola Bipa Biyampe Bilupulwa: Mukanda Kisaka Leza ne dibuku Buyuki bidi na bukwashi bukatampe mu kulonga bana-babwanga bukidibukidi. Tutu umo wa mu Bolivi watambwile mukanda Kisaka Leza, ponka’po washilwididila nao kifundwa na muntu umo. Myeji iná pa kupita’po, ku kitango kya distrike, uno muntu wabadilwa mu bakwabo basepelele pa kubatyijibwa’bo!
13 Bantu bavule bakunkwanga na mutyima wa kwipāna kudi Yehova kitatyi kyobapwanga bubandaudi bwa dibuku Buyuki. Mu Angola, bifundwa bya Bible byaendejibwe na basapudi ba mu kipwilo kimo byelundile’ko, abyo byadi 190 ke 260, kibalwa kya batanwanga ku kupwila kyavudila’ko pabidi, akyo kyadi 180 ke 360, myeji iná kete kupwa kushilula kwingidija dibuku Buyuki mu uno mwaba. Kitatyi kityetye pa kupita’po, kebakimbe kala kubunda kipwilo kipya.
14 Tutu umo washilwile kifundwa kyandi kibajinji mu dibuku Buyuki, unena’mba i “kipēla shi yewa wendeja kifundwa usangela kwipanguja’nka bipangujo, kutanga mavese amoamo emanine’po mwanda ne kutala shi muntu wifundwa nandi waivwana.” Wadi bidi ulanga’mba enka basapudi babwino bo bakokeja kwendeja bifundwa bya Bible byendelela kumeso, amba aye kebibwanyapo, ino pano i mujingulule’mba kepadipo kimukomene, o mwanda unena’mba: “Byonkokeja kwikilonga, nanshi bonso bakokeja nabo kulongela monka.”
15 Kulonga bana-babwanga i kwendeja bifundwa bya Bible, kino i kipindi kibadilwa mu mwingilo wetu. Boba batamija bwino bwabo mu kino kipindi kya mwingilo bamwenanga’mo tusepo twabinebine ne byabuyabuya bivulevule. Nanshi netu betunene amba ‘tusapulanga bulopwe bwa Leza pampikwa bumvu’!—Bil. 28:31.
[Binenwa bya Kifwatulo pa paje 8]
Batadi Betuludika —Mwendeji Wa Kifundwa Kya Kiteba Kya Mulami
1 Kiteba kya Mulami Kisapula Bulopwe bwa Yehova kyo kingidilwa kya pa kitako kingidija “umpika wabinebine ne wamanwa” pa kwitupa bidibwa bya kumushipiditu pa “kitatyi kifwaninwe.” (Mat. 24:45, NW) Mukulumpe wendeja Kifundwa kya Kiteba kya Mulami udi na kiselwa kikatampe, i mufundiji wabwino, mwine Kidishitu uleta kifwa kilumbuluke.—Loma 12:7; Yak. 3:1.
2 Mwendeji wa Kifundwa kya Kiteba kya Mulami ufwaninwe kuteakanya kifundwa byabinebine yenga ne yenga, mwa kufundijija’kyo biyampe. Ukateakanya’kyo na mutyima uno ne milombelo ponka. Kuta kwatele kipwilo mutyima bikatampe kukamweka mu kwielela’ko kwaielela’ko kutenga mityima yetu na myanda ifundwa. Ukomenejanga milangwe mikatampe idi mu kifundwa, witukwasha tuyuke muswelo oikwatañene na mutwe wa mwanda wa kishinte.
3 Kyaba kyateakanya, utalanga ne bisonekwa kumeso kwa kitatyi mwa kuyukila muswelo wa kwibingidija. Utangidija Kinenwa kya Leza kumeso na kukankamika kipwilo kingidije Bible mu bula bwa kifundwa kyonso. Ekale kudi mulangwe watabukwa mu malondololo aleta kipwilo nansha shi mwingidijijo wa bisonekwa bikatampe keulombwelwepo senene, mwendeji wipangwilanga’ko kipangujo kya ntentekelo kilupwila mulangwe’wa patōka. Uno o muswelo waetufikijanga ku milangwe myoloke, tuyuke mwa kwingidijija mu būmi bwetu bintu byotwifunda.
4 Mwendeji wa Kifundwa kya Kiteba kya Mulami wielelanga’ko kwikala mufundiji wabwino. Kanenangapo bilabila, ino witukankamikanga batwe tulete malondololo mepi, mafike’po, na bishima bya batwe bene. Dimodimo ukokeja kuvuluja amba muntu uleta malondololo mabajinji mu musāngo ufwaninwe kuleta malondololo mēpi, atenga mwanda mwine wipangwilwe. Ebiya bemvwaniki balonda’ko bakemanina pa kwingidija bisonekwa, kukoma milangwe, nansha kushintulula mwa kwingidijija biyampe ino myanda mu būmi. Mwendeji wa Kifundwa kya Kiteba kya Mulami ulangulanga mutyima wa umo ne umo ashilule kulondolola, wibatonona banze kwiteakanya pa kasuku ne mu bisaka.
5 Byotudi ‘bantu bafundijibwe na Yehova,’ tutendelanga ‘bantu bu byabuntu’ betupelwe, kifwa mwendeji wa Kifundwa kya Kiteba kya Mulami, ‘uputuma na mwingilo wa kufundija.’—Is. 54:13; Ef. 4:8, 11; 1 Tem. 5:17.