I Kilumbuluke Shi Tutanwa’ko Nyeke!

¹ Mu bula bwa makumi a myaka, banabetu bavule ba mu Bulaya bwa Kutunduka kebadipo bakokeja kukongakena pamo pa kifuko pobamonwa na bantu. Langai’po bidi nsangaji yobadi nayo difuku dyobaikele kukumankena pamo na bwanapabo bonso, kitatyi kyapwile kukankajibwa!

² Ivwanai byalembele mutadi wa kipindi umo pangala pa kipwilo kimo kyaakapempwile: “Mu dya Bubidi kyolwa, nadi nakifikafika’tu, mashini apēpa luvula lwa kyanga mu njibo aoneka. Panja padi mashika makomo, ne mu njibo mwine. Banabetu badi bavwele makotyi, maeshalape, biswiko bya ku makasa (les gants), kitebo ne makumba. Kekwadipo muntu wadi ukokeja kukimba kisonekwa mu wandi Bible, mwanda kyadi kikomo kupūtula mapapye. Nansha byonadi na kotyi ku lukala konadi, mashika antwelele’nka ne mu mikupa, mona’nka ne mwishi wa mashika mounkakukila pa kunena. Ino kintu kyauntengele bininge i kino, nkyaivwenepo nansha kishima kimo kya mitompwe. Bonso badi banena’mba badi na nsangaji pa kutanwa’ko!” Bano banabetu kebadipo nansha na mulangwe wa kubulwa kutanwa ku kupwila!

³ Lelo Tudi na Milangwe Imo na Yabo? Lelo twikalanga na nsangaji potupwilanga yenga ne yenga pambulwa kikoleja’ni? Nansha tutanwanga ku kupwila’nka poso kūlu kudi biyampe? Kikokeja kwikala kikomo kutanwa’ko kitatyi ne kitatyi, pangala pa kikoleja kampanda. Ino tulange bidi pa boba badi umbukata mwetu, bayukile mvubu ya kupwila, batanwanga’ko nyeke ne nyeke nansha byobadi banunu, na misongo mikomo, na bulema kampanda, na mingilo yampikwa kwibashila kyaba ileta mpungiji, nansha na biselwa bikatampe. Twiulei bino bifwa bilumbuluke!​—⁠Tala Luka 2:⁠37.

⁴ Twikalei na kibidiji kya kukwatakanya mutōtelo wabine na kutanwa ku kupwila, tamba ku kifundwa kityetye kya kitabo kufika ku bitango bikatampe bya distrike. Mwanda waka tufwaninwe kukwata na mutyika kuno kukongakana? Buluji i buno, kukongakana i musoñanya wa Leza. Ino kudi ne buluji bukwabo bukatampe. Batwe bonso tusakilwanga byabuyabuya bilupuka ku bufundiji bwa Leza ne bukwashi bwa mushipiditu sandu. Bino byonso twibitambulanga ku kupwila. (Mat. 18:20) Kutentekela pa bino, tūbakwanga na bukankamane botwikankamikanga na batutu ne na bakaka.​—⁠Bah. 10:​24, 25.

⁵ Kitatyi kya kwialamuna kwa Yesu, Petelo wāmunene amba: “Abe Mfumwami, pano pabetunengelela kwikalapo.” (Luka 9:33) Netu ye motufwaninwe kumwena kupwila kwa bwine Kidishitu. Bine, i kilumbuluke shi tutanwa’ko nyeke!