Longa Buninge Bwa Kuyuka Banabetu
1 Mungya munenena Bible, mulunda wabine i muntu wilamatwanga nandi bininge kutabuka mwanabo; bulunda bwandi ne dikōkeji dyandi i byanyeke, ukwasha mukwabo mu byamalwa. (Nk. 17:17; 18:24) Netu ketukabulwepo kutana balunda ba uno muswelo mu kipwilo shi tulonge buninge bwa kuyuka ne bwa kwiswa batwe bonso.—Yoa. 13:35.
2 Twikalanga na mikenga miyampe ya kwiyuka na banabetu kumeso ne kupwa kwa kupwila. Lelo wabulwa’po nobe kufika kumeso kwa kitatyi ne kuleka kwiyumbila kujoka pa kupwa kupwila mwanda wa umone kusepelela kisense kiloe kadi kya kyanga? Fwena banabetu beshileshile wisambe nabo, kifwa boba banunu bapye, bankasampe ne boba ba bumvu.
3 Shilula Mīsambo: Kokibemuna bitupu kopite. Ubwanya kushilula nabo mīsambo na kusekununa mwanda owamwene mu busapudi, mulangwe kampanda ulupwilwe mu dipepala dya panopano, nansha kwisambila pa kupwila komukipwapwapwa’ku. Ukokeja kwifunda bintu bivule bitala pa banabetu shi wikale kwibevwana biyampe, kwibakankamika basekunune yabo myanda ne bintu byobefunda. Kwipangula mwafikile muntu ku kuyuka Yehova nako kukokeja kusokola bintu bivule. Bamobamo ke bapite mu makambakano akomeje lwitabijo lwabo, bakwabo nabo bakyūminina ngikadilo mikomo ne mwa kwiifwatakenya mwine. Kujingulula ino myanda kuketukwasha twikale balunda babine batengwa na bikambija bakwetu ne kwibakūkila.
4 Twitendelei Umo ne Mukwabo: Kaka umo wafwidilwe mwana mwana-mukaji wakankelwe kwimba ñimbo ya Bulopwe isambila pa lusangukilo. Uvulukanga’mba: “Kitatyi kimo, kaka umo wādi ushikete buteya na mupitwa, wāmwene ndila. Wamfwena, wangobeleja na kuboko kwandi, ebiya waimba nami kipindi kya lwimbo kyashele’ko. Mutyima wāngyula kisanso kikatampe padi batutu ne bakaka, kadi nāsangele bininge potwākatenwe ku kupwila, pa kuyuka’mba ku Njibo ya Bulopwe ko ku kifuko kobetukwasha.” Tufwaninwe kutendela banabetu ne kwibasenga kitatyi kyobasakilwa kusengibwa ne kwibakankamika kitatyi kyonso.—Bah. 10:24, 25.
5 Eyo, ino ntanda mikulu yenda imwesha shayo bantu dyemo, ino batwe tusumininwei kuyuka banabetu senene. Twikankamikei batwe bene na bene, dino dyo dyese kotudi batwe bonso.—Loma 1:11, 12.