Batadi Betuludika ​—⁠Mutadi Wa Mingilo

¹ Mutadi wa mingilo utele mutyima mpata ku kwendelela kwa mwingilo wa busapudi mu mwaba upelwe kipwilo. Pa kino, udi na mwingilo mukatampe wa kwitukwasha tuvuije senene kiselwa kyetu kya kusapula myanda miyampe. Uno musapudi mupyasakane ye ulongololanga mingilo yonso ya busapudi. I mufundiji wabwino, ukwashanga basapudi bekale na bwino mu mwingilo.​—⁠Ef. 4:​11, 12.

² Uno mukulumpe ye utala biselwa bipelwe bengidi ba mingilo bemanine mabuku, mapepala, ne kwabanya myaba. Ufwaninwe kweji ne kweji kuta mutyima mu kibīko mwikale mabuku mabwane, mapepala, ne bingidilwa bikwabo bya kwingidija mu busapudi. Musunsa umo pa mwaka, utalanga doshe ya myaba ya mobo oketupelwepo lupusa lwa kupempula, ne kutonga banabetu babwenye bisakibwa ba kukapempula ano mobo.

³ Mutadi wa mingilo udi na kiselwa kya kuteakanya busapudi bwa miswelo mishileshile, kifwa busapudi bwa mu mikenza ya busunga, mu bipito, ne ku telefone. Uteakanya mpangiko miyampe ya kutambila mu busapudi mu bula bwa yenga, ne mu mafuku a makonje. Utele mutyima bininge ku bifundwa bya Bible. Uloñanga buninge bwa kupāna bukwashi bwa kumushipiditu ku boba kebakisapulangapo nansha bakōke mu mwingilo. I mute mutyima bininge ku mwingilo wa bapania, ne kuludika mpangiko ya Bapania Bakwasha Bakwabo.

⁴ Mutadi wa mingilo i umo wa mu banabetu babundile Komite wa Mingilo wa pa Kipwilo, uletanga mulangwe shi kusakilwa kwalamuka kampanda mu bisumpi bya Kifundwa kya Kitabo. Kitatyi kyapempula kyenu kisumpi, longai buninge bwa kutanwa’ko ne kusapula nandi pamo.

⁵ Bonso badi mu kipwilo bafwaninwe kwingila na mutyima tō mungya bulombodi buletwa na mutadi wa mingilo. Kino kiketukwasha twikale bashimate mu mwingilo wa kulonga bana-babwanga ne kutana nsangaji mu wetu mwingilo.