Twiūbakei Batwe Bene Na Bene Na Kuleta Malondololo Ku Kupwila
1 Bahebelu 10:24 witukankamika ‘kwisombela batwe bene na bene ku buswe ne ku mingilo milumbuluke.’ Kino kishintulula ne kwiūbaka batwe bene na bene na kuleta malondololo mashikate ku kupwila kwa pa kipwilo. Mwanda waka tufwaninwe kulondolola? Ne tufwaninwe kulondolola namani? Le i ani usa kumwena’mo biyampe?
2 Langa’po bidi kamweno kotumwenanga misunsa mivule pa kwivwana banabetu baleta malondololo apēla, maluji alumbulula kwivwanija kwetu, etukankamika kumushipiditu. Netu tudi na madyese a kulongela bakwetu bintu bimo byonka. Kitatyi kyotulondolola, i kulombola kotulombola’mba tudi na mutyima wa ‘kupāna kyakupāna kya kumushipiditu’ kikankamika bemvwaniki bonso.—Loma 1:11, 12.
3 Mwa Kuletela Malondololo Mayampe: Ke biyampepo kuleta nshintulwilo milampe ikomba milangwe yonso inenwe mu musāngo. Divule malondololo malamala kealetangapo kilondololwa kifike’po, kadi apungijanga bakwabo, baleka ne kulondolola kwine. Malondololo mabajinji mu musāngo afwaninwe kwikala mēpi, enda pityipityi ku kipangujo kipangwilwe. Boba balonda’ko bakokeja kulombola mwa kwingidijija mulangwe wisambilwa’po ne kwiukwatañanya na mavese. Tala dibuku Manuel pour l’École, paje 90-92.
4 Shi kulondolola kukuselejanga mutyima kūlu, nankyo teakanya malondololo mēpi, lombola mwendeji wa kupwila akufunke pa mwine musāngo oteakenye’wa. Shi ulonge namino misunsa mivule, kulondolola kukakupēlela mpata. Vuluka’mba ba Mosesa ne Yelemia nabo bētyepēlwe, bēmona bu kebabwanyapo kwisamba pa kibumbo kya bantu. (Div. 4:10; Yel. 1:6, kkd.) Ino Yehova wēbakweshe banenena mu dijina dyandi, nobe ye mwakakukwashisha.
5 I Ani Usa Kumwena Biyampe ku Malondololo Etu? Batwe bene balondolola bo bamwena’mo, mwanda malondololo otuleta ashimatyijanga bubinebine mu ñeni yetu ne mu mityima yetu, kino kiketupa muswelo wa kushala kuvuluka milangwe. Ne batōtyi netu bevwananga malondololo etu ōbaka nabo bamwenanga’mo biyampe. Tukankamikwanga batwe bonso, beje mu bulongolodi, bankasampe, bamoyomoyo, ne bapya bene, potuloñanga bukomo bwa kulombola lwitabijo lwetu ku kupwila kwa pa kipwilo.
6 I bine, ‘binenwa binenwa ponka pa kitatyi pakyo i binengele’ ekale shi tunenena’byo kwiūbaka batwe bene na bene ku kupwila!—Nk. 15:23.